1. Kuzê ki apóstlu Polu sabeba?

APÓSTLU Polu sabeba ma alvês el ta xintiba fraku. El fla ma se korpu staba ta ‘kaba’ i ma el tinha ki lutaba pa el fazeba kel ki éra dretu. Tanbê el fla ma ka éra sénpri ki Jeová ta respondeba se orasons di manera ki el ta kreba. (2 Cor. 4:16; 12:7-9; Rom. 7:21-23) Polu sabeba ma se inimigus ta odjaba el sima un algen fraku. * Má, el ka dexa kes kuza mariadu ki otus ta flaba di el ô se frakézas, pô-l ta xinti ma el ka tinha valor. — 2 Cor. 10:10-12, 17, 18.

2. Sima sta na 2 Coríntios 12:9, 10, ki lison inportanti apóstlu Polu prende?

² Polu prende un lison inportanti: un algen pode ser fórti mésmu óras ki el sta xinti fraku. (Lé 2 Coríntios 12:9, 10.) Jeová fla Polu: ‘Nha puder sta ta bira perfetu na frakéza.’ Ku kes palavra li, Jeová krê flaba Polu ma el ta daba el forsa ki el mesteba. Gósi, nu sta ben odja pamodi ki nu ka meste fika preokupadu óras ki nos inimigus ta insulta-nu.

3. Pamodi ki nu pode xinti alegria óras ki nu insultadu?

³ Ningen ka gosta pa algen insulta-l. Má, si nos  inimigus insulta-nu i nu fika xatiadu ku kuzê ki es fla, nu pode fika dizanimadu. (Pro. 24:10) Nton, kuzê ki nu pode faze óras ki nos inimigus insulta-nu? Sima Polu, nu pode ‘xinti alegria na insultus’. (2 Cor. 12:10) Pamodi? Pamodi óras ki nu ta insultadu i nu ta pirsigidu, kel-li ta mostra ma nos é disiplus di Jizus. (1 Ped. 4:14) Jizus dja flaba ma se sigidoris ta sérba pirsigidu. (João 15:18-20 ) É kel-li ki kontise na ténpu di apóstlus. Na kel ténpu, kes algen ki ta sigiba kultura gregu ta atxaba ma kes kriston éra fraku i ma es éra iginoranti. Tanbê, judeus ta atxaba ma kes kriston éra algen ‘normal i ku poku skóla’, sima kes apóstlu Pedru ku Juan. (Atos 4:13 ) Ta parseba ma kes kriston éra fraku. Es ka ta meteba na pulítika i nen es ka ta baba pa trópa. I pesoas ka ta ruspetaba es na sosiadadi.

4. Kuzê ki kes kriston na ténpu di apóstlus faze kantu pesoas ta flaba kuzas mariadu di es?

⁴ Kes kriston na ténpu di apóstlus para di prega pamodi kes kuza mariadu ki ses inimigu ta flaba di es? Nau. Pur izénplu, apóstlus Pedru ku Juan ta atxaba ma éra un onra ser pirsigidu pamodi es ta sigiba Jizus i es ta inxinaba otus sobri el. (Atos 4:18-21; 5:27-29, 40-42 ) Kes disiplu ka tinha motivu pa xintiba vergónha. Mésmu ki kes algen ka ta ruspetaba kes kriston na ténpu di apóstlus, es faze mutu más kuzas pa djuda otus di ki kalker un di ses inimigus. Pur izénplu, kes livru di Bíblia ki alguns di kes kriston skrebe, kontinua ta djuda i ta da speransa pa milhons di algen. Tanbê, kel Reinu ki es pâpia di el dja sta ta governa na Séu i ka ta dura el ta ben governa tudu algen. (Mat. 24:14) Má kes govérnu poderozu ki ta pirsigiba kes kriston dja ten txeu anu ki es dexa di izisti. Tanbê, kes disiplu lial gósi sta ta governa na Séu. Má ses inimigus sta tudu mortu, i si es ben resusitadu es ten ki ben obi ku kel Reinu ki kes kriston ki es ta odiaba, papiaba di el. — Apo. 5:10.

5. Sima sta na João 15:19, pamodi ki alguns algen ta dispreza-nu?

⁵ Oji, alguns algen ta dispreza-nu i es ta faze-nu trósa. Es ta atxa ma nos é iginoranti i fraku. Pamodi? Pamodi nu ka ta konkorda ku konportamentu di pesoas na nos vólta. Nu ta tenta ser umildi, mansu i obidienti. Má, mundu ta ngaba kes algen ki é orgulhozu i rebéldi. Tanbê, nu ka ta mete na pulítika i nu ka ta bai trópa na ninhun país. Anos é diferenti di pesoas di mundu, pur isu es ta atxa ma es é más midjór ki nos. — Lé João 15:19; Rom. 12:2.

6. Kuzê ki Jeová sta ta uza se povu pa faze?

⁶ Ka ta nporta kuzê ki mundu ta pensa di nos, Jeová sta ta uza-nu pa faze kuzas grandi. Pur izénplu, el sta ta uza se povu pa faze un kanpanha di pregason más grandi ki dja fazedu na Téra. Oji se sérvus, sta ta faze revistas más traduzidu i distribuidu na mundu, i es ta uza Bíblia pa djuda milhons di algen ten un vida midjór. É Jeová ki merese glória pa tudu kes kuza grandi ki nu sta ta faze. El sta ta uza un grupu di pesoas ki mundu ta atxa ma é fraku pa faze es grandi trabadju. Má i bo? Bu ta atxa ma Jeová pode da-u forsa? Kuzê ki bu pode faze pa el djuda-u? Nu ben pâpia di três kuza ki nu pode prende ku izénplu di apóstlu Polu.

7. Kal ki é un lison ki nu ta prende ku Polu?

⁷ Un lison ki nu ta prende ku apóstlu Polu é kel-li: ka bu kunfia na bu própi forsa ô na bu kapasidadi óras ki bu ta sirbi Jeová. Nu pode fla ma Polu tinha txeu razon pa sérba un ómi orgulhozu i pa el kunfiaba na se kabésa. El kria na sidadi di Tarsu, ki éra kapital di un pruvínsia di Roma. Tarsu éra un sidadi riku i el tinha un universidadi famozu. Polu tinha bon skóla. Ken ki inxina-l éra Gamaliel, un di kes xéfi di judeu más ruspetadu di kel ténpu. (Atos 5:34; 22:3 ) I ti el txiga di ser un algen inportanti na meiu di kes judeu. El fla: ‘N ta fazeba más prugrésu na judaísmu di ki txeu algen di nha nason ki tinha mésmu idadi ki mi’. (Gál. 1:13, 14; Atos 26:4 ) Má Polu ka ta kunfiaba na se kabésa.

8. Sima sta na Filipenses 3:8, kuzê ki Polu ta atxaba di kes kuza di mundu ki el dizisti di el, i pamodi ki el ta ‘xintiba alegria na frakézas’?

⁸ Polu fika kontenti di dexa pa tras kes kuza ki pô-l ta bira un algen inportanti pa mundu. Na verdadi, el da kónta ma kes kuza éra sima un ‘lixu’. (Lé Filipenses 3:8.) Polu paga un présu pa el pode biraba un sigidor di Kristu. Se própi povu fika ta odia-l. (Atos 23:12-14 ) Kes algen ki éra romanu sima el, sota-l i es pô-l prézu. (Atos 16:19-24, 37 ) Tanbê, Polu sufri pamodi el éra inperfetu i éra difísil dimás pa el fazeba kuzê ki éra dretu. (Rom. 7:21-25) Má Polu ka dexa se inimigus ô se própi fadja da-l na txon. Envês di kel-li, el ta ‘xintiba alegria na frakézas’. Pamodi? Pamodi óras ki el ta xintiba fraku el ta odjaba modi ki Deus ta djudaba el. — 2 Cor. 4:7; 12:10.

9. Kuzê ki nu debe pensa di kes kuza ki ta pô-nu parse fraku?

⁹ Si nu krê pa Jeová da-nu se puder, nu ka pode atxa ma é nos bon saúdi, bon skóla, nos rasa ô dinheru, ki ta mostra valor ki nu ten. É ka kes kuza li ki ta pô-nu ten valor pa Jeová. Na verdadi, é  ka txeu sérvu di Deus ki ‘mundu ta atxa ma ten sabedoria, puder ô ki é di família inportanti’. Má, Jeová disidi uza ‘kes kuza fraku di mundu’. (1 Cor. 1:26, 27) Pur isu, ka bu atxa ma si bu ka ten kes kuza ki sta na komésu di es parágrafu, bu ka ta pode sirbi Jeová. Envês di pensa si, odja bu situason sima un xansi di xinti puder di Jeová na bu vida. Pur izénplu, si bu xinti medu di kes algen ki é kóntra kuzas ki bu ta kridita na el, pidi Jeová pa da-u koraji pa bu difende bu fé. (Efé. 6:19, 20) Si bu sta lida ku un duénsa ki ka ten kura, pidi Jeová pa da-u forsa ki bu meste pa bu faze bu midjór na se sirvisu. Tudu bês ki bu odja Jeová ta djuda-u, bu fé ta fika kada bês más fórti.

10. Pamodi ki nu debe studa izénplu di kes sérvu fiel ki sta na Bíblia, sima kes ki sta na Hebreus 11:32-34 ?

¹⁰ Polu ta sforsaba txeu pa studaba Skrituras dretu. Pur isu, el prende txeu kuza. Má tanbê, el prende ku izénplu di sérvus fiel di Jeová ki sta na Bíblia. Kantu Polu skrebe pa kes kriston ki éra ebreu, el pidi-s pa es pensa na un lista grandi di izénplu di sérvus fiel di Jeová di ténpu antigu. (Lé Hebreus 11:32-34.) Nu ben pâpia sô di un di kes sérvu fiel, ki éra Rei Davidi. El tevi ki lida ku pirsigison ka sô di se inimigus, má tanbê di alguns algen ki éra se amigus. Di sertéza, pensa na izénplu di Davidi djuda Polu, i faze kel-li tanbê é bon pa nos oji.

11. Pamodi ki Davidi ta parseba fraku na pé di Gulias? (Odja dizenhu na kapa.)

¹¹ Gulias ki éra un trópa fórti i balenti, ta atxaba ma Davidi éra fraku dimás pa el. Kantu Gulias odja Davidi, ‘el ndjutu-l i el dispreza-l.’ Di tudu manera, Gulias éra mutu más tamanhu ki Davidi, el staba más ben armadu i trenadu pa géra. Má Davidi, éra un rapazinhu inda, el ka tinha spiriénsa i ta parseba ma el ka staba priparadu pa géra. Má Davidi poi kel frakéza ta bira na un kuza fórti. El kunfia na puder di Jeová, pur isu el ganha Gulias. — 1 Sam. 17:41-45, 50.

12. Kal ki é otu prubléma ki Davidi tevi ki lida ku el?

¹² Davidi tevi ki lida ku un otu prubléma ki talvês pô-l ta xinti fraku. El éra lial pa Saul ki éra kel algen ki Jeová skodje pa ser rei di Israel. Na komésu Saul ta ruspetaba Davidi. Má dipôs, Saul bira orgulhozu i el fika ku invéja di Davidi. Saul maltrata Davidi i ti el tenta mata-l. — 1 Sam. 18:6-9, 29; 19:9-11.

13. Modi ki Davidi reaji kantu Saul trata-l mariadu?

¹³ Sikrê Saul trata Davidi ku injustisa, Davidi kontinua ta ruspeta-l pamodi el éra kel rei ki Jeová skodje. (1 Sam. 24:6) Davidi ka kulpa Jeová pa kes kuza mariadu ki Saul faze-l. Má Davidi kunfia ma Jeová ta daba el forsa ki el mesteba pa el aguentaba kel situason difísil. — Sal. 18:1, djobe kes informason pa riba di kel Salmo li.

14. Ki situason sima di Davidi apóstlu Polu pasa pa el?

¹⁴ Apóstlu Polu pasa pa un situason sima di Davidi. Kes inimigu di Polu, tinha mutu más puder di ki el. Txeu di kes xéfi di relijion i di pulítika di kel ténpu, ta odiaba el. Txeu bês, es manda sota-l i pa pô-l na kadia. Sima Davidi, el maltratadu pa kes algen ki devia sérba se amigus. Ti mésmu alguns  na kongregason fika kóntra el. (2 Cor. 12:11; Fil. 3:18) Má Polu konsigi ganha tudu kes ki luta kóntra el. Modi? El kontinua ta prega sikrê ku pirsigison. El kontinua lial pa se irmons ku irmans mésmu kantu es diziludi-l. I más inportanti inda, el kontinua lial pa Deus ti fin di se vida. (2 Tim. 4:8) Polu konsigi vense tudu kes prubléma difísil ka pamodi el éra fórti, má pamodi el ta kunfiaba na Jeová.

15. Kal ki é nos obijetivu, i modi ki nu ta konsigi-l?

¹⁵ I bo? Bus koléga di skóla, di trabadju ô bus família ki é ka Tistimunha di Jeová sta ta maltrata-u i pirsigi-u? Algun algen na kongregason dja kustuma trata-u mariadu? Si kel-li dja kontise ku bo, lenbra di izénplu di Davidi ku Polu. Bu pode kontinua ta ‘vense mal ku ben.’ (Rom. 12:21) Bu ka meste da algen ku pédra na kabésa móda Davidi. Má bu obijetivu é poi Palavra di Deus na menti i na korason di un algen ki sta interesadu. Bu ta konsigi kel obijetivu li, óras ki bu ta uza Bíblia pa responde perguntas di pesoas, mostra ruspetu i trata dretu kes algen ki ta trata-u mariadu. Tanbê, faze kel ki é dretu pa tudu algen, ti mésmu pa bus inimigu. — Mat. 5:44; 1 Ped. 3:15-17.

16-17. Di kuzê ki Polu nunka ka skese?

¹⁶ Antis di apóstlu Polu bira un disiplu di Kristu, el éra un jóven ki ka tinha ruspetu i el ta pirsigiba sigidoris di Jizus. (Atos 7:58; 1 Tim. 1:13) Na kel ténpu ki Polu éra konxedu pa Saulu, kes sigidor di Jizus tinha txeu medu di el. Pur isu, Jizus tevi ki para Polu. El pâpia ku Polu la di Séu i el pô-l ta fika ségu. Pa el pode odjaba otu bês, Polu tinha ki pidiba ajuda na kes algen ki el ta pirsigiba. El mostra umildadi kantu el seta ajuda di un disiplu ki txomaba Ananias, ki pô-l ta odja otu bês. — Atos 9:3-9, 17, 18.

¹⁷ Dipôs di algun ténpu, Polu bira un sigidor di Jizus txeu konxedu. Má  nunka el ka skese di lison ki Jizus inxina-l na kel strada pa Damasku. Polu kontinua umildi i el staba prontu pa seta ajuda di se irmons ku irmans. El rekonhese ma es éra di ‘grandi ajuda’ pa el. — Col. 4:10, 11, nóta di rodapé.

18. Pamodi ki alvês é difísil seta ajuda di otus?

¹⁸ Kuzê ki nu pode prende ku Polu? Talvês na komésu, kantu nu prende verdadi, éra fásil nu setaba ajuda di otus pamodi nu sabeba ma inda tinha txeu kuza pa nu prendeba. (1 Cor. 3:1, 2) Má i gósi? Si dja nu ten txeu anu ta sirbi Jeová i dja nu ganha txeu spiriénsa, talvês pode ser difísil nu seta ajuda di otus, inda más di un algen ki ten ménus ténpu na verdadi ki nos. Má, Jeová txeu bês ta uza nos irmons ku irmans pa da-nu kel forsa ki nu meste. (Rom. 1:11, 12) Pur isu, si nu krê pa Jeová djuda-nu, nu meste seta ses ajuda.

19. Pamodi ki Polu konsigi faze kuzas grandi?

¹⁹ Polu konsigi faze alguns kuza grandi dipôs ki el bira kriston. Pamodi? Pamodi el prende ma pa un algen ten bons rezultadu, ka ta nporta si el ten bon saúdi, bon skóla, txeu dinheru ô di undi ki el ben. Má, si el é umildi i el kunfia na Jeová, el ta ten bons rezultadu. Nton, nu faze sima Polu: (1) nu kunfia na Jeová, (2) nu prende ku izénplus di Bíblia i (3) nu seta ajuda di nos irmons ku irmans. Asi, sikrê nu sta fraku, Jeová ta pô-nu bira fórti!