29-زەرتتەۋ ماقالاسى
«ٵلسىز كەزىمدە كۇشتىمىن»
«ٴماسىح ٷشىن ٵلسىز بولۋدان، قورلىق، مۇقتاجدىق، قۋعىن-سۇرگىن، قيىنشىلىق كورۋدەن راقات تابامىن» (قور. 2-ح. 12:10).
38-ٵن قۇداي ساعان كۇش بەرەدى
اڭداتپا *
1. ەلشى پاۋىل نەنى اشىق مويىنداعان؟
ەلشى پاۋىل كەيدە ٶزىن ٵلسىز سەزىنەتىنىن اشىق مويىنداعان. ول «ٴتانى توزىپ السىرەگەنىن»، دۇرىس نارسەنى جاساۋ قيىنعا سوققانىن جانە ەحوبا دۇعالارىنا ٵردايىم ٶزى كۇتكەندەي جاۋاپ بەرمەگەنىن ايتقان (قور. 2-ح. 4:16؛ 12:7—9؛ ريم. 7:21—23). سونداي-اق پاۋىل قارسىلاستارى ونى ٵلسىز * ادام دەپ قاراستىراتىنىن دا بىلگەن. الايدا ول وزگەلەردىڭ جاعىمسىز كوزقاراسىنىڭ جانە ٶز السىزدىكتەرىنىڭ كەسىرىنەن ٶزىن تۇككە تۇرعىسىز سەزىنىپ كەتپەگەن (قور. 2-ح. 10:10—12، 17، 18).
2. قورىنتتىقتارعا 2-حات 12:9، 10 عا ساي، پاۋىل قانداي ماڭىزدى ساباق ٴتۇيدى؟
2 پاۋىل ماڭىزدى ٴبىر ساباق ٴتۇيدى: ادام ٵلسىز كەزىندە دە كۇشتى بولا الادى (قورىنتتىقتارعا 2-حات 12:9، 10 وقىڭىز). ەحوبا پاۋىلعا: «ٵلسىز كەزىڭدە مەنىڭ قۇدىرەتىمە تولىق يە بولاسىڭ»،— دەپ ايتقان. بۇل سوزدەر ەحوبانىڭ قۇدىرەتى پاۋىلعا قاجەت كەزدە كۇش دارىتاتىنىن ٴبىلدىردى. الدىمەن قارسىلاستارىمىزدان قورلىق كورگەندە نەگە مۇنى كوڭىلگە الماۋىمىز كەرەكتىگىن قاراستىرايىق.
«قورلىق... كورۋدەن راقات تابامىن»
3. نەلىكتەن ٴبىز قورلىق كورۋدەن راقات تابا الامىز؟
3 قورلىق كورۋ قاي-قايسىسىمىزعا دا ۇنامايدى. جاۋلارىمىزدان قورلىق كورگەندە، ولاردىڭ ايتقان سوزدەرى كوڭىلىمىزگە ٴتيىپ، ەڭسەمىزدى ٴتۇسىرۋى مۇمكىن (ناق. س. 24:10). ٴبىراق ٴبىز قارسىلاستارىمىزدىڭ قورلىعىنا قالاي قاراۋىمىز كەرەك؟ ٴبىز دە پاۋىل سياقتى «قورلىق... كورۋدەن راقات تابا» الامىز (قور. 2-ح. 12:10). نەلىكتەن؟ ويتكەنى قورلىق پەن قارسىلىقتار — يسانىڭ شىنايى شاكىرتى ەكەنىمىزدىڭ دالەلى (پەت. 1-ح. 4:14). يسا ىزباسارلارىنىڭ قۋعىندالاتىنىن ايتىپ كەتكەن (جوح. 15:18—20). راسىمەن دە، ٴبىرىنشى عاسىرداعى ماسىحشىلەر قۋعىن كوردى. گرەك مادەنيەتىنىڭ ىقپالىنا بەرىلگەندەر ماسىحشىلەرگە ساۋاتسىز، تومەن ادامدار دەپ قاراعان. ال ياھۋديلەر بولسا ماسىحشىلەردى پەتىر مەن جوحان سياقتى «ٴبىلىمى جوق قاراپايىم ادامدار» دەپ قاراستىرعان (ەل. ٸس. 4:13). ماسىحشىلەر ٵلسىز ٵرى قورعانسىز بولىپ كورىندى. ولاردىڭ ساياسي ىقپالى دا، اسكەري كۇشى دە بولعان جوق. سوندىقتان جۇرت ولاردى مۇلدەم مەنسىنبەگەن.
4. ەرتەدەگى ماسىحشىلەرگە قارسىلاستارىنىڭ جاعىمسىز كوزقاراستارى قالاي اسەر ەتتى؟
4 قارسىلاستارىنىڭ جاعىمسىز كوزقاراستارى ەرتەدەگى ماسىحشىلەردى توقتاتتى ما؟ جوق. مىسالى، ەلشى پەتىر مەن ەلشى جوحان يسانىڭ ٸزباسارى بولعاندارى ٷشىن جانە ونىڭ تالىمدەرىن ۇيرەتكەندەرى ٷشىن قۋعىن كورۋدى مارتەبە سانادى (ەل. ٸس. 4:18—21؛ 5:27—29، 40—42). شاكىرتتەردىڭ ۇيالۋىنا ەش سەبەپ جوق ەدى. ٴبىرىنشى عاسىرداعى بۇل كىشىپەيىل ماسىحشىلەر قارسىلاستارىنا قاراعاندا، ادامزات ٷشىن الدەقايدا كوپ جاقسىلىق جاسادى. مىسالى، كەيبىرىنىڭ كيەلى رۋحتىڭ جەتەلەۋىمەن جازىپ كەتكەن كىتاپتارى ٵلى كۇنگە دەيىن ميلليونداعان ادامعا ٷمىت بەرىپ، كومەك بولۋدا. سونداي-اق ولار ۋاعىزداپ كەتكەن پاتشالىق قازىر كوكتە بيلىك ەتىپ جاتىر. ال بولاشاقتا ول بۇكىل ادامزاتتىڭ ۇستىنەن بيلىك ەتەتىن بولادى (مات. 24:14). سول ماسىحشىلەردى قۋدالاعان ۇكىمەتكە كەلسەك، ونىڭ بيلىگى الدەقاشان توقتاپ، تاريحتىڭ تۇڭعيىعىنا تۇسكەن. ال سول كەزدەگى ادال ماسىحشىلەر قازىر كوكتە پاتشالار بولىپ وتىر. ولاردىڭ قارسىلاستارى بولسا جەر قويناۋىندا جاتىر. بولاشاقتا ولار قايتا ٴتىرىلىپ جاتسا، وزدەرى جەك كورگەن ماسىحشىلەر ۋاعىزداعان پاتشالىقتىڭ قول استىندا بولادى (ايان 5:10).
5. جوحان 15:19 عا ساي، نەگە وسى دۇنيەنىڭ ادامدارى ەحوبا كۋاگەرلەرىن مەنسىنبەيدى؟
5 بۇگىندە كەيبىرەۋلەر ەحوبا كۋاگەرلەرىن مەنسىنبەيدى، ولاردى ساۋاتسىز، ٵلسىز ادامدار دەپ كەلەكە-مازاق ەتەدى. ويتكەنى ٴبىزدىڭ كوزقاراسىمىز ولاردىكىنەن وزگەشە. ٴبىز كىشىپەيىل، جۇمساق، مويىنسۇنعىش بولۋعا تىرىسامىز. ال وسى دۇنيە بولسا كوكىرەكتىك، دورەكىلىك، بۇلىكشىلدىكتى قۇپ كورەدى. سونداي-اق ٴبىز ساياساتقا ارالاسپايمىز جانە ەشقانداي ەلدىڭ اسكەري كۇشىنە قوسىلمايمىز. ٴبىز وسى دۇنيەنىڭ تالابىنا ساي كەلمەگەندىكتەن، باسقالار بىزگە جوعارىدان قارايدى (جوحان 15:19 وقىڭىز؛ ريم. 12:2).
6. ەحوبا ٶز حالقى ارقىلى قانداي عالامات ىستەر اتقارۋدا؟
6 وسى دۇنيە ٴبىز جايلى نە ويلاسا دا، ەحوبا ٴبىز ارقىلى ۇلى ىستەر اتقارىپ جاتىر. ول ۋاعىزداۋ ٸسىن ادامزات تاريحىندا بۇرىن-سوڭدى بولماعان دەڭگەيدە جۇرگىزىپ جاتىر. قۇداي حالقى ادەبيەتتەردى كوپتەگەن تىلدەرگە اۋدارىپ، تاراتۋدا، سونداي-اق كيەلى كىتاپتى قولدانىپ، ميلليونداعان ادامعا ومىرلەرىن جاقسارتۋعا كومەكتەسۋدە. بۇل عالامات ىستەر تەك ەحوبانىڭ ارقاسىندا اتقارىلىپ جاتىر. ول ٵلسىز بولىپ كورىنەتىن حالىقتى قولدانىپ، تاڭعاجايىپ ىستەر جاساۋدا. ال ٵرقايسىسىمىزدى جەكە الساق، ەحوبا ٴبىزدى كۇشتى ەتە الا ما؟ ەگەر ەتە السا، سول كۇشكە يە بولۋ ٷشىن ٴبىز نە ىستەۋىمىز كەرەك؟ قازىر ەلشى پاۋىلدان ۇيرەنۋگە بولاتىن ٷش جايتتى قاراستىرايىق.
ٶز كۇشىڭىزگە سەنىم ارتپاڭىز
7. پاۋىلدان قانداي ساباق الامىز؟
7 پاۋىلدان الاتىن ٴبىر ساباعىمىز مىناداي: ەحوباعا قىزمەت ەتكەندە، ٶز كۇشىڭىز بەن قابىلەتىڭىزگە سەنىم ارتپاڭىز. پاۋىلدىڭ جاعدايى مەن قابىلەتى كوپ ادامدى ٴتانتى ەتەتىندەي ەدى. ونىڭ كوكىرەك كەرىپ، ٶزىمشىل بولىپ كەتۋىنە بولار ەدى. ويتكەنى ول ريم پروۆينسياسىنىڭ استاناسى تارس قالاسىندا ٶسىپ، ەر جەتكەن. ال تارس اتاقتى وقۋ ورىندارى بار وركەندەپ تۇرعان قالا ەدى. پاۋىل ٶز زامانىنداعى ەڭ بەدەلدى دەگەن ياھۋدي جەتەكشىلەرىنىڭ ٴبىرى گاماليەلدىڭ وزىنەن ٴتالىم العان (ەل. ٸس. 5:34؛ 22:3). ٴبىر كەزدەرى پاۋىلدىڭ ياھۋدي قوعامىندا قانداي دا ٴبىر ىقپالى دا بولعان. ول: «ياھۋدي دىنىن ۇستانۋدا ۇلتتاس قۇرداستارىمنىڭ كوبىسىنەن وزدىم»،— دەگەن (عال. 1:13، 14؛ ەل. ٸس. 26:4). سوندا دا پاۋىل وزىنە ارقا سۇيەپ كەتپەدى.
پاۋىل ٷشىن وسى دۇنيە باعالى دەپ ەسەپتەيتىن نارسەلەر ٴماسىحتىڭ شاكىرتى بولۋ مارتەبەسىنىڭ قاسىندا «تۇككە تۇرعىسىز قوقىستاي» بولدى (8-ابزاستى قاراڭىز) *
8. فىلىپىلىكتەرگە 3:8 گە ساي، پاۋىل ٶزى باس تارتقان نارسەلەرگە قالاي قارادى جانە نەگە ول ٵلسىز بولۋدان «راقات تاپتى»؟
8 پاۋىل وسى دۇنيە ماڭىزدى ساناعان نارسەلەرىنەن قۋانا-قۋانا باس تارتتى جانە ولاردى «قوقىس سانادى» (فىلىپىلىكتەرگە 3:8 وقىڭىز). ٴبىراق ٴماسىحتىڭ ٸزباسارى بولۋ ٷشىن پاۋىل ٴبىراز قيىندىق كوردى. ول ٶزىنىڭ تۋعان حالقى ٷشىن جەككورىنىشتى بولدى (ەل. ٸس. 23:12—14). ول ريم ازاماتى بولا تۇرا، وزگە ريم ازاماتتارىنان جاپا شەكتى. ولار ونى ۇرىپ-سوعىپ، تۇرمەگە جاپتى (ەل. ٸس. 16:19—24، 37). بۇعان قوسا، دۇرىس نارسەنى ىستەۋگە قينالعاندا، ٶز كەمەلسىزدىگى جانىنا باتتى (ريم. 7:21—25). ٴبىراق پاۋىل قارسىلاستارى مەن ٶز قاتەلىكتەرىنىڭ ٶزىن بۇعاۋلاپ تاستاۋىنا جول بەرمەگەن، قايتا، ول ٵلسىز بولۋدان «راقات تاپتى». نەگە؟ ويتكەنى ول ٵلسىز بولعان كەزىندە قۇدايدىڭ كۇشىن سەزىندى (قور. 2-ح. 4:7؛ 12:10).
9. بىزدە وسى الەم ماڭىزدى دەپ سانايتىن نارسەلەر بولماسا، بۇعان قالاي قاراۋىمىز كەرەك؟
9 ەگەر ٴبىز ەحوبانىڭ كۇشىنە يە بولعىمىز كەلسە، قانشالىقتى باعالى ەكەنىمىز تاندىك كۇشىمىزگە، العان بىلىمىمىزگە، شىققان ورتامىز بەن دۇنيە-مۇلكىمىزگە بايلانىستى دەپ ويلاماۋىمىز كەرەك. ٴبىزدى ەحوبانىڭ الدىندا جارامدى ەتەتىن بۇلار ەمەس. نەگىزىنەن، قۇداي حالقىنىڭ اراسىندا «ادامي تۇرعىدان قاراعاندا، دانالار، كۇشتىلەر نە اقسۇيەكتەر كوپ ەمەس». كەرىسىنشە، ەحوبا «وسى دۇنيە ٵلسىز دەپ سانايتىنداردى» تاڭداپ العان (قور. 1-ح. 1:26، 27). سوندىقتان كۇشىڭىز، ٴبىلىمىڭىز، شىققان ورتاڭىز بەن دۇنيە-مۇلكىڭىز قانداي بولماسىن، ٴسىز ەحوباعا قىزمەت ەتە الاسىز. سىزدە وسى الەم ماڭىزدى دەپ سانايتىن نارسەلەر بولماسا، مۇنى ەحوبانىڭ كۇشىنە يە بولۋدىڭ مۇمكىندىگى دەپ قاراستىرىڭىز. مىسالى، سەنىمىڭىزدى شايقالتقىسى كەلەتىن ادامداردان قورىقساڭىز، ەحوباعا دۇعا ەتىپ، سەنىمىڭىزدى قورعاۋعا باتىلدىق سۇراڭىز (ەفەس. 6:19، 20). قانداي دا ٴبىر اۋرۋمەن كۇرەسىپ جۇرگەن بولساڭىز، قولدان كەلگەنشە قىزمەتكە اتسالىسا بەرۋ ٷشىن ەحوبادان كۇش سۇراڭىز. ەحوبانىڭ كومەگىن كورگەن سايىن، سەنىمىڭىز قاتايىپ، ٶزىڭىز دە مىقتى بولا تۇسەسىز.
كيەلى كىتاپ كەيىپكەرلەرىنەن ۇلگى الىڭىز
10. نەگە ٴبىز كيەلى كىتاپتاعى، سونىڭ ىشىندە ەۆرەيلەرگە 11:32—34 تارماقتاردا جازىلعان ادال كەيىپكەرلەردىڭ ۇلگىلەرىن زەرتتەۋىمىز كەرەك؟
10 پاۋىل جازبالاردى تىڭعىلىقتى زەرتتەگەن. ول قۇداي سوزىندە جازىلعان ادال ادامداردان كوپ نارسەگە ۇيرەنگەن. پاۋىل ەۆرەي ماسىحشىلەرگە جازعان حاتىندا ەحوبانىڭ ادال قىزمەتشىلەرىنىڭ ۇزىن ٴتىزىمىن كەلتىرىپ، سولاردان ۇلگى الۋعا شاقىردى (ەۆرەيلەرگە 11:32—34 وقىڭىز). سول ادال قىزمەتشىلەردىڭ بىرەۋىن عانا الىپ كورەيىك. مىسالى، ٴداۋىت پاتشا تەك جاۋلارىنان عانا ەمەس، ٴبىر كەزدەرى دوستارى بولعان ادامداردان دا قيىندىق كورگەن. قازىر پاۋىل ٴداۋىتتىڭ ٶمىرى جايلى وي جۇگىرتكەننەن قالاي كۇش العان بولۋى مۇمكىن ەكەنىن جانە ٴبىزدىڭ پاۋىلعا قالاي ەلىكتەي الاتىنىمىزدى كورەمىز.
ٴداۋىت جاس ٵرى ٵلسىز كورىنسە دە، عولياتپەن شايقاسۋعا قورىقپادى. ول ەحوباعا ارقا سۇيەدى، ويتكەنى ول ەحوبانىڭ وعان عولياتتى جەڭۋگە كۇش بەرەتىنىنە سەنىمدى بولدى (11-ابزاستى قاراڭىز)
11. نەگە ٴداۋىت ٵلسىز بولىپ كورىندى؟ (مۇقاباداعى سۋرەتتى قاراڭىز.)
11 مىقتى جاۋىنگەر عولياتقا ٴداۋىت ٵلسىز بولىپ كورىندى. سوندىقتان ول داۋىتكە مەنسىنبەي قارادى. عوليات داۋىتكە قاراعاندا ٸرى دەنەلى، جاقسىراق قارۋلانعان جانە جاقسىراق شىنىققان جاۋىنگەر بولاتىن. ال ٴداۋىت جوندەپ قارۋلانباعان، سوعىستا ەشقانداي تاجىريبەسى جوق جاس جىگىت ەدى. ٴبىراق ول ٵلسىز بولىپ كورىنگەنمەن، شىن مانىندە مىقتى بولدى. ويتكەنى ٴداۋىت ەحوبانىڭ كۇشىنە ارقا سۇيەدى. سونىڭ ارقاسىندا ول عولياتتى جەڭىپ شىقتى (سام. 1-ج. 17:41—45، 50).
12. داۋىت تاعى قانداي قيىندىق كوردى؟
12 داۋىت ٶزىن ٵلسىز كۇيگە تۇسىرگەن تاعى ٴبىر قيىندىققا كەزىكتى. ول ەحوبانىڭ ٶزى يسرايلگە پاتشا ەتىپ تاعايىنداعان ساۋلعا ادال قىزمەت ەتكەن ەدى. ساۋل پاتشا العاشىندا ٴداۋىتتى قۇرمەتتەپ ٴجۇردى، ٴبىراق كەيىن كوكىرەكتىككە سالىنىپ، وعان قىزعانىشپەن قاراي باستادى. ساۋل داۋىتكە جاماندىق جاساپ، ٴتىپتى ونى ولتىرمەك بولدى (سام. 1-ج. 18:6—9، 29؛ 19:9—11).
13. داۋىت ساۋل پاتشادان ادىلەتسىزدىك كورگەندە نە ىستەدى؟
13 ساۋلدان ادىلەتسىزدىك كورسە دە، ٴداۋىت ەحوبا تاعايىنداعان پاتشاعا قۇرمەت كورسەتە بەردى (سام. 1-ج. 24:6). ٴداۋىت ساۋلدىڭ جاساعان جاماندىقتارى ٷشىن ەحوبانى كىنالامادى. قايتا، وعان ارقا سۇيەپ، ونىڭ وسى قيىندىققا توزۋگە كۇش بەرەتىنىنە سەنىمدى بولدى (ٴزاب. 18:1 جانە كىرىسپە).
14. پاۋىل داۋىتتىكىنە ۇقساس قانداي قيىندىقتارعا كەزىكتى؟
14 ەلشى پاۋىل دا داۋىتتىكىنە ۇقساس جاعدايلاردى باستان كەشكەن. پاۋىلدىڭ جاۋلارى ونىڭ وزىنەن الدەقايدا مىقتى بولدى. سول كەزدەگى كوپتەگەن ساياسي جانە ٴدىني جەتەكشىلەر پاۋىلدى جەك كوردى. ولار ٴجيى پاۋىلدى دۇرە سوقتىرتىپ، تۇرمەگە جاپقىزعان. سونداي-اق ٴداۋىت سياقتى، پاۋىل دا وزىمەن دوس بولاتىن ٴجونى بار ادامداردان جاماندىق كورگەن. ماسىحشىلەر قاۋىمىندا كەيبىرەۋلەر پاۋىلعا ٴتىپتى قارسى شىققان (قور. 2-ح. 12:11؛ ٴفىلىپ. 3:18). الايدا پاۋىل وزىنە قارسى شىققانداردىڭ ٴبارىن جەڭدى. قالايشا؟ ول ەشقانداي قارسىلىققا قاراماي، ۋاعىزداۋدى جالعاستىرا بەردى. سونداي-اق كوڭىلىن قالدىرعان كەزدەرى دە باۋىرلاستارىن جاقسى كورە بەردى. بارىنەن دە ماڭىزدىسى — ول ٶمىرىنىڭ سوڭىنا دەيىن قۇدايعا ادال بولىپ قالدى (ٴتىم. 2-ح. 4:8). ول بۇل قيىندىقتىڭ ٴبارىن ٶزى مىقتى بولعاندىقتان ەمەس، ەحوباعا ارقا سۇيەگەندىكتەن جەڭە الدى.
سەنىمىڭىز سىنعا الىنعان جاعدايلاردا وزگەلەرگە قۇرمەت پەن مەيىرىمدىلىك تانىتىپ سويلەڭىز (15-ابزاستى قاراڭىز) *
15. ٴبىزدىڭ ماقساتىمىز قانداي جانە وعان قالاي قول جەتكىزە الامىز؟
15 ٴسىز ارىپتەستەرىڭىزدەن، سىنىپتاستارىڭىزدان نە كۋاگەر ەمەس تۋىستارىڭىزدان قورلىق نە قارسىلىق كورىپ ٴجۇرسىز بە؟ قاۋىمدا قانداي دا ٴبىر باۋىرلاستان جاماندىق كورگەن كەزىڭىز بولعان با؟ مۇندايدا ٴداۋىت پەن پاۋىلدىڭ ۇلگىسىن ەستە ۇستاڭىز. ٴسىز جاماندىقتى «ٵردايىم جاقسىلىقپەن جەڭىپ شىعا» الاسىز (ريم. 12:21). ٴبىراق ٴبىزدىڭ ماقساتىمىز ٴداۋىت سياقتى، بىرەۋدىڭ ماڭدايىنا تاس قاداۋ ەمەس، قايتا، اقجۇرەكتى ادامداردىڭ جۇرەگى مەن ساناسىنا قۇداي ٴسوزىن تەرەڭ ەنگىزۋ. بۇل ماقساتىڭىزعا قول جەتكىزۋ ٷشىن، ادامداردىڭ سۇراقتارىنا جاۋاپ بەرگەندە كيەلى كىتاپقا جۇگىنىڭىز، سىزگە جاماندىق جاساعاندارعا قۇرمەت پەن مەيىرىمدىلىك تانىتىڭىز جانە بارىنە، ٴتىپتى جاۋلارىڭىزعا دا جاقسىلىق جاساي بەرىڭىز (مات. 5:44؛ پەت. 1-ح. 3:15—17).
وزگەلەردىڭ كومەگىن قابىل الىڭىز
16، 17. پاۋىل نەنى ەستەن شىعارمادى؟
16 ٴماسىحتىڭ شاكىرتى بولعانعا دەيىن ەلشى پاۋىل يسانىڭ ٸزباسارلارىن قۋدالاعان. ول كەزدە پاۋىل ورەسكەل مىنەزدى جاس جىگىت بولاتىن (ەل. ٸس. 7:58؛ ٴتىم. 1-ح. 1:13). ول ساۋل دەگەن اتپەن دە تانىمال ەدى. ماسىحشىلەر قاۋىمىن قۋدالاپ جۇرگەن پاۋىلدى يسانىڭ ٶزى توقتاتقان. يسا پاۋىلعا كوكتەن سويلەدى جانە ونىڭ كوزىن سوقىر ەتتى. كوز جانارىن قالپىنا كەلتىرۋ ٷشىن پاۋىل ٶزى قۋدالاپ جۇرگەن ادامداردان كومەك سۇراۋعا ٴماجبۇر بولدى. ول جانارىن قايتارعان اناني ەسىمدى شاكىرتتىڭ كومەگىن كىشىپەيىلدىلىكپەن قابىل الدى (ەل. ٸس. 9:3—9، 17، 18).
17 كەيىنىرەك پاۋىل ماسىحشىلەر قاۋىمىنىڭ ماڭىزدى مۇشەسىنە اينالدى. ٴبىراق ول يسانىڭ داماسكىگە بارار جولدا بەرگەن ٴتالىمىن ەشقاشان ۇمىتپادى. پاۋىل كىشىپەيىل بولىپ قالا بەردى جانە باۋىرلاستارىنىڭ كومەگىن قۋانا قابىلدادى. ول باۋىرلاستارىن «تىرەگىم» دەپ اتاعان (قول. 4:10، 11).
18. نەگە كەيدە وزگەلەردىڭ كومەگىن قابىلداۋ قيىن بولۋى مۇمكىن؟
18 پاۋىلدان نە نارسەگە ۇيرەنسەك بولادى؟ ەحوبانىڭ حالقىمەن ەندى ارالاسا باستاعاندا ولاردىڭ كومەگىن قابىل الۋعا اسىق بولعان شىعارمىز. ويتكەنى ٶزىمىزدىڭ رۋحاني نارەستە ەكەنىمىزدى جانە كوپ نارسە ۇيرەنۋىمىز كەرەكتىگىن جاقسى تۇسىنەتىنبىز (قور. 1-ح. 3:1، 2). ال قازىر شە؟ ەحوباعا كوپتەگەن جىلدان بەرى قىزمەت ەتىپ كەلە جاتساق، تاجىريبەمىز كوپ بولسا، وزگەلەردىڭ ۇسىنعان كومەگىن، اسىرەسە شىندىققا بىزدەن كەيىن كەلگەن باۋىرلاستىڭ كومەگىن قابىل الۋ بىزگە قيىن بولۋى مۇمكىن. ٴبىراق ەحوبا ٴبىزدى نىعايتۋ ٷشىن ٴجيى باۋىرلاستاردى قولدانادى (ريم. 1:11، 12). سوندىقتان ەحوبانىڭ كۇشىنە يە بولعىمىز كەلسە، باۋىرلاستاردىڭ كومەگىن قابىلداۋىمىز كەرەك.
19. پاۋىل نەنىڭ ارقاسىندا كەرەمەت ىستەر اتقارا الدى؟
19 پاۋىل ٴماسىحشى بولعاننان كەيىن كوپتەگەن كەرەمەت ىستەر اتقاردى. نەنىڭ ارقاسىندا؟ مىنا جايتتى تۇسىنگەنىنىڭ ارقاسىندا: شىققان ورتاسى، كۇشى مەن ٴبىلىمى جانە تۇرمىسى قانداي بولماسىن، ادام كىشىپەيىل بولىپ، ەحوباعا ارقا سۇيەسە، كوپتەگەن يگى ىستەر جاساي الادى. ٴبارىمىز دە پاۋىلعا ەلىكتەپ، 1) ەحوباعا سەنىم ارتايىق، 2) كيەلى كىتاپ كەيىپكەرلەرىنەن ساباق الايىق جانە 3) باۋىرلاستارىمىزدىڭ كومەگىن قابىلدايىق. سوندا قانشالىقتى ٵلسىز بولساق تا، ەحوبا ٴبىزدى كۇشتى ەتەدى!
71-ٵن ٴبىز ەحوبانىڭ اسكەرىمىز!
^ 5-ابزاس بۇل ماقالادا ٴبىز ەلشى پاۋىلدىڭ مىسالىنا توقتالامىز. سونداي-اق كىشىپەيىل بولساق، ەحوبا كەلەكە-مازاققا توزۋگە جانە السىزدىكتەرىمىزدى جەڭۋگە كۇش بەرەتىنىن قاراستىرامىز.
^ 1-ابزاس ٴسوز ٴمانى: بۇل ماقالاداعى ٵلسىز دەگەن ٴسوز بىرەۋ ٴبىزدى مەنسىنبەگەندە، ٶزىمىزدى تۇككە تۇرعىسىز سەزىنگەندە نە كوڭىلىمىز تۇسكەندە بولاتىن سەزىمگە نۇسقايدى. ٶزىمىزدى ٵلسىز سەزىنۋگە كەمەلسىزدىك، تۇرمىستىڭ ناشارلىعى، اۋرۋ-سىرقاۋ، جەتكىلىكتى ٴبىلىم الماۋ سياقتى جايتتار سەبەپ بولۋى مۇمكىن. بۇعان قوسا، جاۋلارىمىز ٴبىزدى ٵلسىز سەزىندىرۋ ٷشىن سوزبەن نە ىسپەن شابۋىل جاساپ جاتادى.
^ 57-ابزاس سۋرەت سيپاتتاماسى: پاۋىل ٴماسىح جايلى ۋاعىزداۋعا كەتكەندە، پارىزشىل بولعان كەزىندەگى كەيبىر زاتتارىن، مىسالى، وسى دۇنيەلىك شيىرشىقتار مەن ىشىندە جازبالارى بار ماڭدايعا تاعاتىن قوراپشانى تاستاپ كەتتى.
^ 61-ابزاس سۋرەت سيپاتتاماسى: ارىپتەستەرى باۋىرلاسىمىزدى تۋعان كۇن تويلاۋعا قويماي شاقىرىپ جاتىر.
