1. Udigu musinke ga ligwanekerere nawo Paurusa?

PAURUSA kwa tente asi poyiruwo yimwe nga lizuvhu asi kapi ga kere nononkondo. Age kwa tente asi rutu rwendi kuna ‘kuzonauka’ ntani age nga kondjo yipo a rugane youhunga. Age kwa lizuvhire hena asi Jehova kapi ana kulimburura makanderero gendi monkedi ezi ga yi ndindilire. (2 Kol. 4:16; 12:7-9; Rom. 7:21-23) Paurusa kwa tente hena asi nonkore dendi kwa mu tere asi age kwato nonkondo. * Nye age kapi ga pulisilire yininke yoyidona eyi ngava uyunga vantu ntani nomapuko gendi yi mu ninkise a lizuvhe asi age kwato mulyo.—2 Kol. 10:10-12, 17, 18.

2. Kuliza no-2 Vakolinte 12:9, 10, sirongwa musinke somulyo ga lirongere Paurusa?

² Paurusa kwa lirongere asi muntu kuvhura a kare nononkondo, nampili a lizuvhe asi kapi ana kara nononkondo. Esi kwa kere sirongwa somulyo. (Resa 2 Vakolinte 12:9, 10.) Jehova kwa tanterere Paurusa asi: “Yeeyi nonkondo dange kunenepa moupirankondo woge.” Monkango zimwe, age kwa tanterere Paurusa asi nga mu pa nonkondo edi ga hepere. Pomuhowo, tu tareni konda zeyi natu dilira kuguva nsene nonkore detu kuna kuturwanesa.

3. Morwasinke natu hafera nsene kuna kuligwanekera nomaudigu?

³ Kwato muntu ogu a yi hafere apa ava mu hepeke. Nye nsene  tu kara nosinka kuhamena eyi dina kuuyunga nonkore detu, ose ngatu guva. (Yis. 24:10, NW) Yisinke natu rugana nsene kuna kuligwanekera nomaudigu? Twa hepa ‘kuhafera . . . maudigu’ ngwendi moomu ga yi rugene Paurusa. (2 Kol. 12:10) Morwasinke natu yi ruganena? Morwa apa vantu ava tu hepeke, ayo kulikida asi ose sili varongwa vaJesus. (1 Pet. 4:14) Jesus kwa tente asi varongwa vendi ngava va hepeka. (Joh. 15:18-20) Eyi yiyo ya horokere mosiruwo sovapositoli. Posiruwo oso, vantu ava ngava kwama nompo doVagereka ngava tara Vakriste asi awo kwato nondunge ntani kwato nonkondo. Ano Vajuda ngava tara Vakriste asi “kapisi valirongi, vantuuntu tupu,” ngwendi mupositoli Peturusa ntani naJohanesa. (Yirug. 4:13) Mokumona asi Vakriste kapi ngava lihameke moupolitika nomoyita, sinzi sovantu ngava va tara asi awo kwato nonkondo, ntani kwato gokuvhura kuvapopera. Ntani vantu kapi ngava va fumadeke.

4. Yisinke va rugene Vakriste womosiruwo sovapositoli apa vantu ngava uyunga yininke yoyidona kuvahamena?

⁴ Vakriste womosiruwo sovapositoli kapi va hagekere kuzuvhisa apa vantu ngava uyunga yininke yoyidona kuvahamena. Pasihonena, mupositoli Peturusa naJohanesa kwa lizuvhire mfumwa kweyi vava hepekere morwa kuronga vantu kuhamena Jesus. (Yirug. 4:18-21; 5:27-29, 40-42) Nampili ngomu vantu ngava dili kufumadeka Vakriste wokuhova, awo kwa rugene yininke yoyinzi yipo va vatere vakwawo. Pasihonena, nobuke dimwe domoBibeli edi va tjenge Vakriste vamwe, kuna kutwikira kuvatera mamiliyona govantu nokuvapa ehuguvaro. Ntani Uhompa waKarunga ou ngava divisa, ngesi kuna kupangera meguru ntani komeho awo ngau ka pangera vantu navenye. (Mat. 24:14) Epangero lyoVaroma eli nga li hepeke Vakriste nare lya haga po. Nye Vakriste owo wovalimburukwi kuna kupangera ngesi meguru ngovahompa. Vantu ava ngava va rwanesa nare va fa, ntani nsene vantu owo ngava kava vhumbura, awo ngava ka kara konhi zepangero eli ngava divisa Vakriste, ava va nyengere.—Ehor. 5:10.

5. Kuliza naJohanesa 15:19, yisinke ayi ninkisa vantu va dire kufumadeka vantu vaJehova?

⁵ Vantu vamwe naina kapi ava fumadeke Nombangi daJehova, ntani awo kutusindagura morwa awo kugazara asi ose kwato nondunge ntani kwato nonkondo. Morwasinke ayi horokere? Morwa nkareso zetu za lisiga nezi zovantu ava va tu kundurukida. Ose kuhetekera ko kulinunupika ntani nokukara valimburukwi. Nye vantu neina kwa hara vantu wokulinenepeka, wokuhanduka ntani wokurwanesa. Ntani mokugwederera ko, ose kapi atu lihameke moupolitika ndi tu lihameke moyita mwankenye sirongo. Mokumona asi ose twa lisiga novantu womouzuni, eyi kuvaninkisa va gazare asi ose kwato mulyo.—Resa Johanesa 15:19; Rom. 12:2.

6. Sirugana musinke atu sikisa mo nevatero lyaJehova?

⁶ Nampili ngomu vantu womouzuni ava tu tara asi ose kwato nonkondo, Jehova kuturuganesa yipo tu sikise mo yininke yoyinene. Nevatero lyendi, ose ngesi kuna kuzuvhisira moyirongo yoyinzi kupitakana nare. Vakareli vendi naina kuna kunduruka yifo eyi va toroka momaraka gomanzi mouzuni mudima. Ntani awo kuna kuruganesa Bibeli mokuvatera mamiliyona govantu va rundurure eparu lyawo. Jehova yige a tu vatere tu sikise mo yininke oyo. Age kuna kuruganesa mbunga zovantu ezi ava tara vantu asi kwato nonkondo, yipo a sikise mo yirugana yoyinene oyo. Ngapi kuhamena nkenye gumwe gwetu? Jehova kuvhura a tu vatere yipo tu kare nononkondo ndi? Yisinke twa hepa kurugana yipo tu gwane evatero lyendi? Tu zeni tu ka tare yininke  yitatu eyi natu lirongera ko komupositoli Paurusa.

7. Yisinke natu lirongera ko kosihonena saPaurusa?

⁷ Sihonena saPaurusa kuturonga asi: Ngomu tuna kukarera Jehova, ayo ya wapa tu dire kuhuguvara mononkondo danyamwetu ndi ediwo eli twa kara nalyo. Vantu wovanzi kwa here Paurusa morwa ukaro wendi nediwo eli ga kere nalyo. Eyi ngano ya ninkisire Paurusa a linenepeke nokulihuguvara nyamwendi. Age kwa kulilire mositata saTaruso somoKilikiya, esi sa kere mepangero lyoVaroma. Taruso kwa kere sitata soungawo ntani mositata oso kwa kere mo univesiti ezi za divikwire. Paurusa kwa kere mugara ogu ga lirongere. Age kwa mu rongere mugara goMujuda gedina Gamaliyeli, ogu va fumadekere sinzi sovantu momazuva gawo. (Yirug. 5:34; 22:3) Kugusa ko oyo, Paurusa kwa kere muntu gomulyo mokatji koVajuda. Age kwa tente asi: “Ame kwa pitakanene vakwetu wovanzi mokusikisa mo eruganenokarunga lyoVajuda.” (Gar. 1:13, 14; Yirug. 26:4) Nye nampili ngoso, Paurusa kapi ga lihuguvarere nyamwendi.

8. Kuliza noVafilipi 3:8, ngapi omu Paurusa ga tere yininke eyi ga kere nayo nare ntani morwasinke ga haferere apa ga dilire nonkondo?

⁸ Paurusa kwa hafere apa ga sigire yininke eyi ya ninkisire vantu va gazarere asi age muntu gomulyo. Ano konyima, age kwa ya tere yininke eyi ga kere nayo asi “ayo yininke yomawoko-woko tupu.” (Resa Vafilipi 3:8.) Paurusa kwa ligwanekerere nomaudigu gomanzi apa ga ya kere murongwa gwaKristusa. Vantu womomuhoko gwendi kwa mu nyengere. (Yirug. 23:12-14) Ntani Varoma vakwawo kwa mu toonene ntani nokumutura modorongo. (Yirug. 16:19-24, 37) Ntani mokumona asi Paurusa kwa kere muntu gokudira kusikilira mo, ayo kwa mu digoperere kurugana youhunga. (Rom. 7:21-25) Nye mevango lyokupulisira nonkore dendi nomapuko gendi yi mu hagekese kukwama Kristusa, age kwa ‘haferere upirankondo’. Morwasinke Paurusa ga hafere apa ga dilire nonkondo? Morwa apa ga dilire nonkondo, age ga mwene omu Karunga ga mu vaterere.—2 Kol. 4:7; 12:10.

9. Ngapi omu natu tara yininke eyi ayi ninkisa vantu va tu tare asi ose kwato mulyo?

 ⁹ Ayo epuko kugazara asi nonkondo detu nelirongo lyetu ntani noku twa tunda nemona lyetu, yiyo ayi ninkisa Jehova a tu ruganese. Bibeli kutanta asi sinzi sovakareli vaKarunga ‘kapisi vanongo pantu, kapisi vanankondo ntani kapi va va reta vanamadina.’ Nye Jehova kuruganesa vantu ava ava tara mouzuni asi “va pira nonkondo.” (1 Kol. 1:26, 27) Yipo nye, kapisi tu pulisire yininke eyi ayi ninkisa vantu va tu tare asi ose kwato mulyo, yi tu hagekese mokukarera Jehova. Nye twa hepa kuyitara ngoyininke eyi ayi tu vatere yipo tu mone omu Jehova ana kutuvatera. Pasihonena, nsene ove kuzuvha woma apa vantu ava uyunga yininke yoyidona kuhamena eyi wa pura, kanderera kwaJehova a ku pe uradi yipo o uyunge kuhamena eyi wa pura. (Eph. 6:19, 20) Nsene ove kuna kuligwanekera nomaudigu morwa kuvera unene, kanderera kwaJehova yipo a ku pe nonkondo o liture mo unene mosirugana sendi. Apa ngo mona omu Jehova ana kukuvatera, epuro lyoge nga li nkondopara ntani ove ngo kara nononkondo.

10. Morwasinke natu lirongera kuhamena yihonena yomoBibeli ngwendi yeeyi ya kara moVahebeli 11:32-34?

¹⁰ Paurusa nga kona-kona Matjangwa nkenye apa. Age kwa lirongerere ko yininke yoyinzi kovakareli vaJehova wovalimburukwi ava va tumbura moBibeli. Apa ga tjangere mbilive koVakriste woVahebeli, age kwa va tanterere va gazadare ko koyihonena yovakareli vaJehova wovalimburukwi. (Resa Vahebeli 11:32-34.) Pasihonena, tu tareni eyi ya horokerere hompa Ndafita. Nonkore dendi novantu vamwe ava va kere vakaume vendi, kwa mu rwanesere. Nsene tu kona-kona eparu lyaNdafita, kuvhura tu kwate egano omu sihonena sendi sa vaterere Paurusa ntani nomu nose natu honena Paurusa.

11. Yisinke ya ninkisire Ndafita a moneke ngwendi kwato nonkondo? (Tara efano lyopontunda.)

¹¹ Golyata kwa tere Ndafita asi age kwato nonkondo. Apa Golyata ga mwene Ndafita, age kwa mu ‘sensere.’ Golyata kwa kere etundusika, age kwa kere noyirwiso yoyinzi kupitakana Ndafita ntani age kwa mu dewire omu na rwa yita. Nye Ndafita kwa monekere ngwendi kwato nonkondo, morwa age kwa kere mumatigona ntani age kapi ga kere mukwayita ogu va deura. Nye nampili ngoso, age ga kere nononkondo. Ndafita kwa huguvarere mwaJehova ntani Jehova kwa mu pere nonkondo yipo a funde Golyata.—1 Sam. 17:41-45, 50.

12. Udigu musinke hena ga ligwanekerere nawo Ndafita?

¹² Ndafita kwa ligwanekerere hena noudigu umwe ou ngano wa muninkisire a dire kukara nononkondo. Age nga ruganene Sauru, mugara ogu ga horowere Jehova a kare hompa goVaisraeli. Pomuhowo hompa Sauru kwa likidire efumadeko kwaNdafita, nye konyima elinenepeko kwa ninkisire Sauru a fire mfudu Ndafita. Sauru kwa tekwire Ndafita momudona ntani age kwa hetekerere ko kumudipaga.—1 Sam. 18:6-9, 29; 19:9-11.

13. Yisinke ga rugene Ndafita apa hompa Sauru ga mu tekwire momudona?

¹³ Nampili ngomu hompa Sauru nga mu tekura momudona, Ndafita kwa twikilire kulikida efumadeko kwahompa ogu ga horowora Jehova. (1 Sam. 24:6) Age kapi ga pere Jehova usima kweyi ga rugene Sauru. Nye age kwa huguvarere Jehova yipo a mu pe nonkondo a vhure kulididimikira udigu ou ga ligwanekerere nawo.—Epis. 18:1.

14. Ngapi omu maudigu aga ga ligwanekerere nago Paurusa ga lifene nomaudigu gaNdafita?

¹⁴ Mupositoli Paurusa, kwa ligwanekerere nomaudigu ngwendi gaNdafita. Nonkore  daPaurusa kwa kere nononkondo unene. Sinzi sovantu ava va kere vampitisili kwa mu nyengere. Yikando yoyinzi age kwa mu toonene nokumutura modorongo. Ntani vantu vamwe ava va kere vakaume vendi kwa mu tekwire momudona ngwendi Ndafita. Ano vamwe womombungakriste kwa mu rwanesere. (2 Kol. 12:11; Fil. 3:18) Nye nampili ngoso, Paurusa kwa fundire vantu navenye ava ngava mu rwanesa. Ngapi omu ga yi rugene? Age kwa twikilire kuzuvhisa nampili ngomu ga ligwanekere nomarwaneso. Age kwa twikilire kuvatera vapuli vakwawo nampili ngomu ngava mu guvisa poyiruwo yimwe. Ntani somulyo po, age kwa twikilire kulimburukwa Karunga dogoro konomfa dendi. (2 Tim. 4:8) Nayinye oyo kwa tompokere Paurusa morwa age kwa huguvarere mwaJehova nye kapisi mononkondo damwene.

15. Sitambo musinke twa hepa kukara naso ntani ngapi omu natu si sikisa mo?

¹⁵ Nove kukurwanesa vakweni kosure, koyirugana ndi vanekoro ndi? Ga ku handukisa rumwe munazinyetu gumwe gomombungakriste ndi? Nsene yimo, ayo ya wapa kudiworoka sihonena saNdafita naPaurusa. Nove kuvhura o ‘fundise udona kouwa.’ (Rom. 12:21) Apa vantu ava kurwanesa, kapisi hepero nove o va rwanese ngwendi moomu Ndafita ga rwanesere Golyata. Nye wa hepa kufundisa udona kouwa pokuvavatera va lironge kuhamena Jehova noNonkango dendi. Kuvhura yi ku tompoke oyo nsene o ruganesa Bibeli mokulimburura mapuro govantu, nokulikida efumadeko nonkenda kovantu ava ava kutekura momudona ntani nsene o ruganena uwa vantu navenye, kukwatera mo nononkore detu.—Mat. 5:44; 1 Pet. 3:15-17.

16-17. Yisinke ga dilire kudivara Paurusa?

¹⁶ Komeho Paurusa a ya kare murongwa gwaKristusa, age kwa kere mugara gokudira efumadeko ntani age nga hepeke varongwa vaJesus. (Yirug. 7:58; 1 Tim. 1:13) Jesus kwa konderere Paurusa yipo a hageke kuhomokera varongwa vendi. Age kwa uyungisire Paurusa kutundilira meguru ntani nokumuninka a kare mutwiku. Mokuninka asi  Paurusa a mone, age ga hepere kutambura evatero lyokutundilira kovantu ava nga hepeke. Paurusa kwa linunupikire nokutambura evatero komurongwa gedina Ananiyasa, ogu ga mu vaterere yipo a vhure kumona.—Yirug. 9:3-9, 17, 18.

¹⁷ Konyima, Paurusa kwa ya kere Mukriste ogu ga divikwire monombungakriste. Nye Paurusa kapi ga divarere eyi ga mu rongere Jesus monzira zendi zokuza koDamasikusi. Age kwa twikilire kulinunupika nokutambura evatero lyokutunda kovapuli vakwawo. Age kwa tente asi vapuli vakwawo ‘ngava mu kwafa unene.’—Koros. 4:10, 11.

18. Morwasinke atu dilire kuhara kutambura evatero poyiruwo yimwe?

¹⁸ Yisinke natu lirongera ko kwaPaurusa? Apa twa tamekere kulironga usili, ose kwa here vakwetu va tu vatere, morwa twa yi divire asi yinzi twa hepa kulironga. (1 Kol. 3:1, 2) Simpe yimo tuna kulizuvha ngoso ndi? Ayo kuvhura yi tu digopere kutambura evatero nsene ose kwa karera Jehova nomvhura dononzi. Unene po nsene evatero olyo kuna kutunda komuntu ogu ga karera Jehova nomvhura dongandi tupu. Nye Jehova kuruganesa vapuli vakwetu yipo va tu korangede. (Rom. 1:11, 12) Yipo nye, nsene tuna hara Jehova a tu vatere, twa hepa kutambura evatero lyokutunda kovapuli vakwetu.

19. Yisinke ya vaterere Paurusa yipo a rugane yininke yoyinzi?

¹⁹ Apa Paurusa ga ya kere Mukriste, age kwa rugene yininke yoyinzi. Yisinke ya mu vaterere? Paurusa ga ya dimbwilire asi mokumutompoka age ga hepere kulinunupika nokuhuguvara mwaJehova, mevango lyokuhuguvara mononkondo dendi ndi elirongo lyendi ntani nemona eli ga kere nalyo ndi oku ga tunda. Ngano natuvenye tu honeneni Paurusa (1) pokuhuguvara mwaJehova, (2) pokulirongera ko koyihonena yomoBibeli, ntani (3) pokutambura evatero kovapuli vakwetu. Nsene tu yi rugana oyo, nampili tu lizuvhe asi kapi tuna kara nononkondo, Jehova nga tu nkondopeka!