1. Ino nciinshi Paulo ncakaamba cakuteenda mweela?

MUTUMWI Paulo wakaamba cakuteenda mweela ayi cimwi ciindi wakalinga kulinyumfwa kulefuka. Wakaamba ayi mubili wakwe ‘wakalinga kuya bumana,’ wakalinga kweelesha cankusu kwaamba ayi acite shiluleme, alimwi cimwi ciindi Yehova taakalinga kukumbula mipailo yakwe kweelana ambwakalinga kulangila. (2 Koli. 4:16; 12:7-9; Loma. 7:21-23) Alimwi Paulo wakalinga kucishi ayi balwani bakwe bakalinga kumubona ayi alilefukite. * Nacibi boobo, taakwe kulinyumfwa kubula mpindu ceebo ca shintu shibiibi bamwi nshobakalinga kwaamba pali nguwe na ceebo cakulefuka kwakwe.​—2 Koli. 10:10-12, 17, 18.

2. Kweelana a 2 Bene Kolinto 12:9, 10, ino nciiyo nshi ciyandika Paulo ncakeeya?

² Paulo wakeeya ciiyo cibotu abuumbi cakwaamba ayi muntu inga wacikonsha kuba ankusu nabi ndyaatoolinyumfwa kulefuka. (Amubelenge 2 Bene Kolinto 12:9, 10.) Yehova wakalwiita Paulo ayi: “Nkusu shangu shilaboneka bunene na koolefukite,” nkokwaamba ayi Yehova wakalinga kucafwa Paulo ankusu nshaakalinga kuyandika. Amuleke tutaangune kubandika ncotuteelete kukalalila na balwani besu batucobola.

3. Ino nceebonshi inga twakondwa kucobolwa?

³ Taakuwo muntu nabi womwi weenga wakondwa kumucobola. Nacibi boobo, na balwani besu batucobola lyalo twakalala abuumbi, inga twalefuka. (Tus. 24:10) Aboobo ino tulyeelete kucita  buyani na balwani besu batucobola? Bweenka mbuli Paulo, inga ‘twakondwa . . . kucobolwa.’ (2 Koli. 12:10) Ino nceebonshi? Mukwiinga kucobolwa akupikishikwa ncitondesho cakwaamba ayi tuli bashikwiiya bakwe Yesu. (1 Pita 4:14) Yesu wakaamba ayi bashikwiiya bakwe balaakupenshekwa. (Joni 15:18-20) Alimwi ishi nsheshakacitika muciindi ca batumwi. Paciindi cilya abo bakalinga kuyungwa amilawo yaba Giliki bakalinga kubona anga Beneklistu mbantu bataiite alimwi balefukite. Alimwi pakati kaba Juda, Beneklistu bakalinga kubonwa anga ‘mbantu bataiite alimwi bantubo,’ mbuli mbobakalinga kubona mutumwi Pita alimwi a Joni. (Milimo 4:13) Beneklistu bakalinga kuboneka anga mbantu batacite nkusu; tabakalinga kwaabanamo lubasu mushamapolitiki na kuba bashilumamba, aboobo bakalinga kubonwa anga mbantu batacite ncito.

4. Ino Beneklistu bamuciindi ca batumwi bakacita buyani bantu ndyebakalinga kubacobola?

⁴ Sa Beneklistu bamuciindi ca batumwi bakaboolela mwisule ceebo ca kucobolwa abalwani babo? Sobwe. Kucakubonenaako, mutumwi Pita alimwi a Joni, bakabona kupenshekwa ceebo cakuba bashikwiiya bakwe Yesu akwiisha bamwi pali nguwe mbuli coolwe. (Milimo 4:18-21; 5:27-29, 40-42) Bashikwiiya tabakalinga kweelete kunyufwa nsoni. Nabi kwaamba ayi bantu baanji tabakalinga kubapa bulemu, Beneklistu bamuciindi ca batumwi bakasebensa cankusu kucafwa bamwi. Kucakubonenaako, mabuku amwi amu Baibo akalembwa a Beneklistu aba, atolelela kucafwa bantu baanji abuumbi akubapa kuba abulindilishi. Alimwi Bwaami mbobakalinga kushimikila bwakatalika kweendelesha kwiculu alimwi conoonobo bulaakutalika kweendelesha bantu boonse. (Mate. 24:14) Mubupusano, peenda myaaka iinji kuswa ciindi buleelo bwa bene Loma ubo bwakalinga kucite nkusu abuumbi alimwi bwakalinga kupensha Beneklistu ndyebwakamana. Ano, bashikwiiya balya bashomeka batokweendelesha kwiculu mbuli baami pacecino ciindi. Balwani babo balo balifwite, alimwi na ncakwaamba ayi balaakubushikwa, nkokwaamba ayi balaakunoolelwa a Bwaami bwakalinga kushimikila Beneklistu mbobakalinga kupatite.​—Ciyu. 5:10.

5. Kweelana a Joni 15:19, ino nceebonshi bantu bamucishi balasuula bantu bakwe Yehova?

⁵ Amunshiku shino, bantu baanji balatusuula mbuli Bakamboni Bakwe Yehova, alimwi cimwi ciindi balatucobola mukwiinga balayeeya ayi tatuiite alimwi tatucitewo nkusu. Ino nciinshi cilengesha? Cili boobo mukwiinga tatucitewo mibo icite bantu bamucishi. Tuleelesha kuba bantu baliceesha, balibombya alimwi banyumfwila. Nacibi boobo, bantu bamucishi balisuni bunene bantu balinyumfwa na balisumpula alimwi abaabo batanyumfwili. Kwiilikaawo, tatwaabanimo lubasu mushamapolitiki, alimwi tatusumini kunjila busoja mucishi cili coonse. Mukwiinga tulipuseneeko abantu bamucishi, baanji balatubona anga mbantu ba panshi.​—Amubelenge Joni 15:19; Loma. 12:2.

6. Ino ni ncito nshi inene Yehova njaatoocafwa bantu bakwe kukumanisha?

⁶ Nabi kwaamba ayi bantu bakucishi balatubona anga tuli ba panshi abuumbi, Yehova atookumanisha shintu shiinji abuumbi kwiinda muli ndiswe. Wapa kwaamba ayi incito yakushimikila iyo itana kushimikilwawo kale mbuli mboitoshimikilwa pacecino ciindi inokweenda kabotu. Basebenshi bakwe Yehova munshiku shino balapulinta mamagazini atosansululwa mumishobo iinji kwiinda magazini ili yoonse pacishi capanshi. Alimwi balacafwa bantu baanji kucana lusangalalo lwancinencine kwiinda mukubaiisha Baibo. Yehova ngoopa kwaamba ayi incito iyi ikumanishikwe. Alimwi alasebensesha likoto lya bantu abo babonwa anga taakuwo mbobabete kubantu bakucishi. Ano ino mbuyani womwi awomwi wandiswe? Sa Yehova inga watucafwa kuba ankusu? Na inga watucafwa, ino nshiinshi nshotweelete kucita? Amuleke tubandike shintu  shotatwe nsheenga tweeya kuswa kucakubonenaako ca mutumwi Paulo.

7. Ino nciinshi nceenga tweeya kuswa kucakubonenaako cakwe Paulo?

⁷ Cintu comwi nceenga tweeya kucakubonenaako cakwe Paulo ncakwaamba ayi: Tatweelete kucinka manungo munkusu na lushibo lwesu ndyetutoosebensela Yehova. Bantu baanji bakalinga kukumbwa Paulo mbwaakalinga kucishi kabotu kusebensa ncito shimwi alimwi ashintu mboshakalinga mubuumi bwakwe. Ishi shakalinga kweelete kulengesha Paulo kulisumpula akucinka manungo munkusu shakwe. Wakakulila ku Tasasi, tauni inene yakalinga mucishi ca Loma. Mu tauni iyi mwakalinga bubile abuumbi alimwi mwakalinga cikolo cipukite abuumbi bantu nkobakalinga kwiiya lwiiyo lwapeculu. Paulo wakalinga kwiite abuumbi. Wakaiishikwa a Gamalyelo, womwi pa bafundishi ba Milawo yaba Juda ngobakalinga kulemeka abuumbi paciindi cilya. (Milimo 5:34; 22:3) Alimwi paciindi cimwi, Paulo wakalinga muntu ngobakalinga kupa bulemu abuumbi ba Juda. Wakaamba ayi: “Ndakalinga kuya panembo abuumbi mubupailishi bwa ba Juda kwiinda beensuma boonse.” (Gala. 1:13, 14; Milimo 26:4) Nacibi boobo, Paulo taakwe kucinka manungo munkusu shakwe.

8. Kweelana a Bene Filipi 3:8, ino Paulo wakalinga kushibona buyani shintu nshaakashiya kwisule, alimwi ino nceebonshi ‘wakakondwa mukuba ulefukite’?

⁸ Paulo wakalyaaba akushiya shintu shoonse shakalinga kupa bantu kumubona anga alayandika kwiinda bamwi. Alimwi wakesa mukushiba ayi shintu nshaakalinga kucite kale kale, shakalingabo anga “nshakusowabo.” (Amubelenge Bene Filipi 3:8.) Paulo wakeenda mumapensho aanji ceebo cakuba shikwiiya wakwe Klistu. Wakalinga kupatitwe abene mishaabo. (Milimo 23:12-14) Alimwi wakoomwa akubikwa mujeele ku bene Loma, bantu bene mishaabo. (Milimo 16:19-24, 37) Kwiilikaawo, Paulo wakapenga ceebo cakuba utamaninite, aboobo tacakalinga cuubu kucita shiluleme. (Loma. 7:21-25) Nacibi boobo, taakwe kuboolela mwisule mbuli shikwiiya wakwe Klistu ceebo camapensho ngaakalinga kwiindaamo, sombi ‘wakakondwa mukuba ulefukite.’ Ino nceebonshi? Mukwiinga Yehova wakalinga kumucafwa na walefuka nabi kucana mapensho.​—2 Koli. 4:7; 12:10.

9. Ino shintu shipa kwaamba ayi bantu banootubona anga tatuyandiki tulyeelete kunooshibona buyani?

 ⁹ Na tulisuni kwaamba ayi Yehova atupe nkusu, tatweelete kuyeeya ayi nkusu shakumubili, lwiiyo, mbotwakakomena, na buboni mbotucite nsheenga shatupa kuba bantu bayandika. Ishi teshi nshoshintu sheenga shatupa kuba bantu bayandika kuli Yehova. Alimwi teshi baanji pakati ka bantu bakwe Lesa ‘baboneka basongo kubantu, nabi bankusu, na bakashalwa kubantu balemekwa.’ Mukwiinga Yehova wakasala kusebensesha ‘shintu shamucishi shiboneka anga tashicite nkusu.’ (1 Koli. 1:26, 27) Aboobo nabi kwaamba ayi tamucitewo shoolwe nshetwaambawo kumatalikilo a palagilafu iyi, inga mwacikonsha kusebensela Yehova. Mutaluubi kwaamba ayi na tamucite shintu ishi bantu bakucishi nshobabona ayi nsheshipa muntu kuba uyandika, mulaakunoobona Yehova mbwaamucafwa. Kucakubonenaako, na bantu basuni kwaamba ayi munootoonsha nshomushoma bamuloondesha, amupaile kuli Yehova kwaamba ayi amucaafwe kutaloonda kwaamba nshomushoma. (Efe. 6:19, 20) Na mutokwaalilwa kusebensela kabotu Yehova ceebo cakuciswa, amupaile kuli Yehova kwaamba ayi amupe nkusu shakucikonsha kumusebensela kweelana ankusu nshemucite. Lyoonse na mwabona Yehova mbwaamucafwa, lushomo lwanu lulaakuyuminaako alimwi mulaakuba bayumu.

10. Ino nceebonshi tulyeelete kwiiya shakubonenaako sha basebenshi bakwe Yehova bashomeka bakaambwa mu Baibo, mbuli baabo balembetwe pa Bene Ebulu 11:32-34?

¹⁰ Paulo wakalinga kusebensa cankusu kwiiya Malembo. Wakeeya makani aanji ancine, sombi wakeeya akuswa kushakubonenaako sha basebenshi bakwe Yehova bashomeka bakalembwa mu Baibo. Ndyaakalinga kulembela Beneklistu bene Ebulu, Paulo wakabalwiita kuyeeya pashakubonenaako sha basebenshi bakwe Yehova bashomeka bakale kale. (Amubelenge Bene Ebulu 11:32-34.) Amuyeeye cakubonenaako ca Mwaami Defedi uyo wakalinga womwi wa basebenshi bakwe Yehova bashomeka. Wakalinga kupikishikwa abalwani bakwe, kwiilikaawo abantu bakalinga beshicibusa bakwe. Ndyetutokwiiya pacakubonenaako cakwe Defedi, mutoobona kwaamba ayi Paulo alyeelete wakayuminishikwa ndyaakayeeya pashakacita Defedi, alimwi mutoobona ambweenga twakonkela cakubonenaako cakwe.

11. Ino nciinshi cakapa kwaamba ayi bantu basuule Defedi? (Amubone cikope cili pa peeji yakutaanguna.)

¹¹ Ndundwa minkulwa Golyati wakalinga kubona anga Defedi taacitewo nkusu. Golyati ndyaakabonabo Defedi, “wakamunyansha.” Ncakwiila Golyati wakalinga ngushilumamba ukwene, wakalinga kucite shilwanisho shikwene alimwi wakalinga ngushilumamba wakashibila kulwana. Ano Defedi wakalingabo musankwa wacanike watakalinga kucishiwo akulwana nkondo alimwi bantu bakalinga kumubona ayi taacitewo shilwanisho shikwene kabotu. Nabi kwaamba ayi bakamusuula ceebo cakwaamba ayi wakalinga mwanike, Defedi wakalinga musankwa utaloondi. Wakalinga kushomete kwaamba ayi Yehova atoomucafwa, aboobo wakacikonsha kukoma mulwani wakwe.​—1 Samwe. 17:41-45, 50.

12. Ino ngamapensho nshi amwi Defedi ngakeendaamo?

¹² Kwakalinga acimwi cakalinga kweelete kupa kwaamba ayi Defedi alefuke. Wakalinga kusebensela Saulo cakushomeka, uyo Yehova ngwakasala kwaamba ayi abe mwaami wa bene Isilaeli. Pakutaanguna mwaami Saulo wakalinga kumulemeka Defedi, mukuya kwaciindi wakatalika kulisumpula akutalika kumunyumfwila munyono. Saulo wakatalika kupensha Defedi cakwaamba ayi wakalinga kusuni akumucaya.​—1 Samwe. 18:6-9, 29; 19:9-11.

13. Ino Defedi wakacita buyani Mwaami Saulo ndyaakalinga kumupensha?

¹³ Defedi wakatolelela kutondesha bulemu Saulo mbuli mwaami wakasalwa a Yehova nabi kwaamba ayi wakalinga kumupensha. (1 Samwe. 24:6) Defedi taakwe kupa mulandu Yehova pashintu  shibiibi Saulo nshaakalinga kucita kuli nguwe. Sombi Defedi wakashoma kwaamba ayi Yehova alaakumupa nkusu shakucikonsha kuliyumya mumapensho ngaakalinga kwiindaamo.​—Kulu. 18:1, maswi ali peculu.

14. Ino ndipenshi nshi mutumwi Paulo ndyaakeendamo lyeelene alyakeendamo Defedi?

¹⁴ Mutumwi Paulo alakwe wakeenda mulipenshi mbuli lyakeendamo Defedi. Balwani bakwe Paulo bakalinga kucite nkusu abuumbi kumwiindaawo. Beendeleshi baanji bakalinga kushibikitwe abuumbi paciindi cilya, bakalinga kumupatite. Liinji bakalinga kuyunga bamwi kwaamba ayi bamuume akumubika mujeele. Bweenka mbuli Defedi, Paulo alakwe wakapenshekwa kubantu bakalinga kweelete kuba beshicibusa bakwe. Cimwi ciindi bamwi mulibungano bakalinga kumupikisha. (2 Koli. 12:11; Fili. 3:18) Nacibi boobo, Paulo wakabakoma boonse bakalinga kumupikisha. Munshila nshi? Wakatolelela kushimikila nabi ndyebakalinga kumupikisha. Wakatolelela kushomeka kubashominyina nabi ndyebakamukalasha. Alimwi ciinditeewo, wakatolelela kushomeka kuli Lesa kushikila akulufu. (2 Timo. 4:8) Wakacikonsha kukumanisha shoonse ishi ceebo ca kucinka manungo muli Yehova kuteshi munkusu shakwe shakumubili.

15. Ino tulyeelete kucita buyani na bantu batupikisha nabi kutucitila shibiibi, alimwi ino inga twacikonsha buyani kucita boobo?

¹⁵ Sa amwebo mulacobolwa na kupenshekwa kubaabo mbomwiyaabo, mbomusebensaabo, na beshikamukowa bateshi Bakamboni? Sa kuli wakamukalashawo mulibungano? Na mbocibete, amwiibaluke cakubonenaako cakwe Defedi alimwi a Paulo. Inga mwacikonsha kutolelela “kukoma bubi kwiinda mukucita shintu shibotu.” (Loma. 12:21) Na bantu batupikisha tatubalwani bweenka mbuli Defedi mbwakalwana Golyati, sombi tuleelesha kukoma cibiibi kwiinda mukubacafwa kwiiya pali Yehova. Inga mwacikonsha kucita boobu na kamusebensesha Baibo ndyemutokumbula miipusho bantu njobeepusha, kutondesha bulemu ankuumbu kubantu beenga bamucitila shibiibi, alimwi akucita shibotu ku bantu boonse, kwiilikaawo abalwani banu.​—Mate. 5:44; 1 Pita 3:15-17.

16-17. Ino nshiinshi Paulo nshaatana kuluba?

¹⁶ Mutumwi Paulo kaatana kuba shikwiiya wakwe Klistu, wakalinga muntu mubiibi uyo wakalinga  kupensha bashikwiiya bakwe Yesu. (Milimo 7:58; 1 Timo. 1:13) Yesu ngowakakasha Paulo kupensha libungano lya Beneklistu, uyo paciindi cilya wakalinga kushibikitwe ayi Saulo. Yesu wakalinga kwiculu ndyaakaamba a Paulo akupa kwaamba ayi acileeke kubona. Kwaamba ayi atalike alimwi kubona, Paulo wakalinga kweelete kuya mukusenga lucafwo kubantu beenka mbaakalinga kupensha. Wakaliceesha akusumina lucafwo kuswa kuli shikwiiya Ananiyasi uyo wakamucafwa kutalika kubona alimwi.​—Milimo 9:3-9, 17, 18.

¹⁷ Mukuya kwaciindi, Paulo wakesa mukuba mwineklistu womwi wakalinga kushibikitwe abuumbi mulibungano. Nacibi boobo, taakwe kuluba nshakeeya kuswa kuli Yesu ndyaakalinga kuya ku Damasikasi. Paulo wakatolelela kuliceesha, alimwi wakalinga kulibambite kusumina lucafwo kuswa kubashominyina. Wakaamba ayi bashominyina mbobakalinga ‘kumuyuminisha abuumbi.’​—Kolo. 4:10, 11

18. Ino nceebonshi cimwi ciindi cilaba ciyumu kusumina lucafwo kuswa kubamwi?

¹⁸ Ino nshiinshi nsheenga tweeya kuswa kucakubonenaako cakwe Paulo? Ciindi cakutaanguna ndyetwakatalika kubungana abantu bakwe Yehova, mpashi twakalinga kusuni abuumbi kusumina lucafwo kuswa kubamwi, ceebo cakwaamba ayi twakalinga kucishi ayi twakalinga kuyandika kwiiya shiinji kuswa kubamwi. (1 Koli. 3:1, 2) Ino mbuyani pacecino ciindi? Na twasebensela Yehova kwa myaaka iinji alimwi tweenda mu shiinji, inga caba ciyumu kusumina lucafwo kuswa kubamwi bunene bunene na mbalya bakesa conoono mucancine. Nacibi boobo, liinji Yehova alatuyuminisha kwiinda mubamakwesu abenankashi. (Loma. 1:11, 12) Aboobo na tulisuni kwaamba ayi Yehova atupe nkusu, tulyeelete kusumina lucafwo kuswa kubamakwesu abenankashi.

19. Ino nciinshi cakapa kwaamba ayi Paulo acikoonshe kucita shintu shiinji?

¹⁹ Paulo wakacita shintu shimwi shiinji shikankamika pesule lyakuba Mwineklistu. Ino nceebonshi? Nceebo cakwaamba ayi wakashiba ayi cipa muntu kuswitilila teshi nkusu shakumubili nshaacite, lwiiyo, buboni, na mbwakakomena, sombi nkuliceesha akucinka manungo muli Yehova. Aboobo soonse atukonkele cakubonenaako cakwe Paulo kwiinda (1) mukucinka manungo muli Yehova, (2) mukwiiya shakubonenaako sha baabo bakalembwa mu Baibo, alimwi a (3) kwiinda mukusumina lucafwo kuswa kubashominyineesu. Lyalo Yehova alaakutupa nkusu nabi tulinyumfwe kulefuka buyani!