1. Vyuma muka atachikijile Paulu vize avulukile hatoma?

KAPOSETOLO PAULU etavilile hatoma ngwenyi lwola lumwe alivwilenga kupwa wakuhehela. Ambile ngwenyi mujimba wenyi wapwile “nakuya nakunonga,” ngwenyi chamukaluhwililenga kulinga vyuma vyakwoloka, kaha nawa lwola lumwe Yehova akumbulwilenga kulomba chenyi mujila yeka. (Koli. 2, 4:16; 12:7-9; Loma 7:21-23) Paulu atachikijile nawa ngwenyi vaka-kole jenyi vamumwenenga kupwa wakuhehela. * Oloze ketavishile vishinganyeka vyavakwavo numba vene tutenga twenyi tumulingise alivwe kupwa wamokomokoko.—Koli. 2, 10:10-12, 17, 18.

2. Kweseka naWavaka-Kolinde 2, 12:9, 10, chishina muka chachilemu alinangwile Paulu?

² Paulu alinangwile chishina chachilemu chakwamba ngwenyi mutu nahase kupwa wakujikiza numba vene nge mwalivwa kupwa wakuhehela. (Tangenu Wavaka-Kolinde 2, 12:9, 10.) Yehova ambile ngwenyi ngolo jenyi ‘ajikupwishile mukuhehela chaPaulu,’ kulumbununa nge ahanyine Paulu ngolo jize kapwile najoko. Chatete, tushimutwilenu ovyo katwatela kuhombelako kachi nge vaka-kole jetu vanatutukana.

3. Mwomwo ika twatela kwivwila kuwaha matuka?

³ Naumwe wauchi asaka vamutukane. Kachi nge natwivwa kupihya omu navatutukana vaka-kole jetu, kaha natuhomba.  (Vishi. 24:10) Uno twatela kumona ngachilihi matuka avaka-kole jetu? Nayetu tunahase ‘kwivwila kuwaha matuka’ ngana muze alingile Paulu. (Koli. 2, 12:10) Mwomwo ika? Mwomwo matuka nakutufumbukila vyeji kutusololanga nge twapwa tutumbaji twaYesu vamuchano. (Petu. 1, 4:14) Yesu ahanjikile ngwenyi tumbaji twenyi navavayanjisanga. (Yowa. 15:18-20) Echi chateselemo mulikulukaji lyamyaka lyakulivanga. Kunyima, vatu vaze vahungumwishilenga kuvisemwa vyavaHelase vamwenenga vaka-Kulishitu kupwa vakuhona mangana kaha nawa vakuhehela. Kaha nawa vaYuleya vaze valumukile nakupwa vaka-Kulishitu, vavamwenenga kuli vakwavo kupwa “vakuzeneka kulinangula kaha nawa hivatu vanganavene,” ngana muze vamwenenga kaposetolo Petulu naYowano. (Vili. 4:13) Vaka-Kulishitu vasolokelenga kupwa vatu vakuhehela mwomwo kavazanyinenga mumapolitiki chipwe kwingila uswalaleko. Echi chikiko chalingishile vatu mungalila vavamone kupwa vamokomoko.

4. Uno vaka-Kulishitu vakulivanga valingilenga ngachilihi omu vavamwenenga ulumbi kuli vaka-kole javo?

⁴ Uno vaka-Kulishitu vakulivanga vetavishile vaka-kole vavahonese tahi? Kwakusukusuku mwane. Chakutalilaho, kaposetolo Petulu naYowano vachimwene kupwa hikutokwa kuvayanjishila hakukavangiza Yesu nakwambulila vatu vyuma anangwilenga. (Vili. 4:18-21; 5:27-29, 40-42) Kakwapwile chuma chevwishile ava tumbaji sonyiko. Kaha mukuhita chalwola, ava vaka-Kulishitu vakulinyisa vamulikulukaji lyamyaka lyakulivanga valingilile vatu vyuma vyamwaza chikuma, kuhambakana vize valingilenga vaka-kole javo. Chakutalilaho, mikanda yimwe vasonekele vaze vaka-Kulishitu, yichili nakukafwa vatu vavavulu chikuma nakuvalingisa vapwenga nalutalililo. Uze Wangana vakundwijilenga nawa kuuchili, kaha nawa kalinwomu uputuke kuyula vatu vosena. (Mateu 24:14) Fulumende yangolo yavaLoma yize yayanjishilenga vaka-Kulishitu, yauchiko makumbi ano, oloze vaze tumbaji vakushishika oholyapwa ngana hivamyangana mwilu. Vaka-kole javo vafwile lyehi, kaha kachi nge navakavasangula, kaha navakavayula kuWangana uze vakundwijilenga vaka-Kulishitu vaze vahungile.—Kuso. 5:10.

5. Kweseka naYowano 15:19, mwomwo ika vatu jaYehova veji kuvamwenanga ulumbi?

⁵ Namakumbi ano, etu Vinjiho jaYehova veji kutumonanga ulumbi nakutusaula ngwavo tuvakuhona mangana, kaha nawa ngwavo tuvakuhehela. Mwomwo ika? Mwomwo katwakavangiza vishinganyeka vyavatu vamuno mukayeko. Tweji kupwanga vakulinyisa, nakuvova, kaha nawa twapwa vakwononoka. Oloze vaka-kaye veji kwalisanga vaka-kulivwimba, navaka-kulitukwojola navaka-kulikanga. Etu nawa katwazana mumapolitiki nakwingila uswalaleko. Twalihandununa kuli vakiko, ngocho veji kutumonanga ngwavo twapwa tuvakusalila.—Tangenu Yowano 15:19; Loma 12:2.

6. Uno Yehova ali nakukafwa vatu jenyi vatesemo milimo muka yakukomwesa?

⁶ Yehova ali nakutukafwa tutesemo milimo yakukomwesa chamokomoko najila veji kutumwenangamo vaka-kaye. Mulimo wakwambulula uli nakuzovoloka chikuma mukaye kosena. Vangamba jenyi makumbi ano vali nakwalumuna mikanda yayivulu chikuma, kaha nawa vali nakuzachisa Mbimbiliya hakukafwa vatu vavavulu chikuma valumune vilinga vyavo. Yehova eji kuzachisanga lizavu lyavatu vaze vamona kuli vaka-kaye ngwavo vakuhehela mangana atesemo vyuma kanevi vyakukomwesa. Nyi ngachilihi etu mutu himutu? Kutala Yehova nahase kutukafwa tupwenga vakujikiza tahi? Nge mukiko, kaha vyuma muka twatela kulinga mangana atukafwe? Tushimutwilenu havyuma vitatu vize natulinangula kuli kaposetolo Paulu.

7. Chuma chimwe muka tunalinangula kuli Paulu?

⁷ Chuma chimwe natulinangula kuli kaposetolo Paulu shina echi: Kachi nge tuli nakuzachila Yehova, katwatela kupendamina hangolo jetu chipwe hauhashi wetuko. Kweseka navishinganyeka vyavatu, kwapwile vyuma vyavivulu vize vyatelelele kulingisa Paulu alivwimbe nakupendamina hangolo jenyi. Akolelele muTalasu, nganda yayinene yamungalila yimwe yamuLoma. Talasu yapwile nganda yauhando, kaha nawa yapwile nashikola yahelu yize yayile chikuma fuma. Paulu apwile mutu wakutanga chikuma, mwomwo vamunangwile kuli Ngamalyele twamina umwe wavaYuleya uze vavumbikilenga chikuma kuvatu hamakumbi aze. (Vili. 5:34; 22:3) Lwola lumwe, Paulu vamumwenenga kupwa mutu wamulemu chikuma kuli vakwavo vaYuleya. Ambile ngwenyi: “Ngwapwile nakuzovoloka chikuma muKwitava chavaYuleya kuhambakana vahilanyo jami vavavulu vakumuyachi wami.” (Ngale. 1:13, 14; Vili. 26:4) Chipwe ngocho, Paulu kapendaminyine hangolo jenyiko.

8. Kweseka naWavaka-Fwilipi 3:8 namazu ali mukwinyikila chamwishi, Paulu amwene ngachilihi vyuma vize asele kunyima, kaha mwomwo ika ‘evwililile kuwaha kuhehela chenyi’?

⁸ Paulu asezele vyuma vyosena vize vyalingishile vatu mukaye vamumone kupwa wamulemu. Amwene vyuma kana vize vyasolokelenga nge vyanganyo kupwa “swali” kaha. (Tangenu Wavaka-Fwilipi 3:8 nakwinyikila chamwishi.) Paulu amwenenga jino ukalu hakupwa muka-kukavangiza Kulishitu. Chakutalilaho, vatu vamungalila yenyi vamuhungile chikuma. (Vili. 23:12-14) Kaha vakwavo vaLoma vamuvetele nakumuhaka mukamenga. (Vili. 16:19-24, 37) Paulu evwilenga nawa kupihya mwomwo chamukaluhwililenga kulinga vyuma vyamwaza. (Loma 7:21-25) Chamokomoko nakumuyanjisa kuli vaka-kole jenyi, chipwe kuhehela chenyi mwomwo yakuhona kukupuka, ‘evwililile kuwaha kuhehela chenyi,’ kaha kalitwaminyinyine kukavangiza Kulishituko. Mwomwo ika? Mwomwo omu apwilenga wakuhehela, ngolo jaKalunga jamukafwilenga.—Koli. 2, 4:7; 12:10.

9. Uno twatela kumona ngachilihi kala chuma chize chinahase kutuhonesa kuzachila Yehova?

 ⁹ Kachi nge tuli nakusaka Yehova atuhane ngolo, kaha katwatela kushinganyeka ngwetu ngolo, nachinyingi chakushikola, nachisemwa chipwe luheto vikiko navitulingisa tupwenga tuvavalemu kuli ikiyeko. Evi keshi vikiko vyeji kulingisanga Yehova atuzachiseko. Vatu jaKalunga vavavulu kavapwa “vaka-mangana kumujimbako, vavavulu kaveshi vaka-ngoloko, vavavulu kaveshi vakusemukila kutanga yayilemuko.” Oloze Yehova asakula kuzachisa ava vatu vaze vapwa “vyuma vyakuhehela vyakaye.” (Koli. 1, 1:26, 27) Shikaho, kanda kushinganyeka ngwenu nge kamweshi nangolo, nachinyingi chakushikola, chipwe luhetoko, kaha kamweshi kuhasa kuzachila Yehovako, nduma. Oloze Yehova mwamikafwa mutesemo milimo yenyi. Chakutalilaho, kachi nge muli nakwivwa woma mwomwo yavatu vaze vali nakumitoleka, kaha lombenu Yehova amikafwe mupwenga vakumika nakuhakwila vyuma mwafwelela. (Efwe. 6:19, 20) Kachi nge muli nakumona ukalu mwomwo yakuviza, kaha mulombenu Yehova amihane ngolo mangana mutwaleho lika kumuzachila kweseka nahakumina ngolo jenu. Shikaho namuzama kushipilitu nakupwa nalufwelelo lwakukola hakumona omu ali nakumikafwa Yehova.

10. Mwomwo ika twatela kulinangula havyakutalilaho vyavangamba jaKalunga vakushishika vakufwana nge vaze vasoneka hali WavaHepeleu 11:32-34?

¹⁰ Paulu alinangwilenga chikuma Visoneka. Ngocho alinangwile vyuma vyavivulu kuvyakutalilaho vyavatu vaze vasoneka muMazu aKalunga. Omu asonekelele vaka-Kulishitu vavaHepeleu, avalwezele vashinganyeke hali vangamba jaYehova vakushishika. (Tangenu WavaHepeleu 11:32-34.) Achishinganyekenu hali Mwangana Ndavichi. Vamufumbukilile kuli vaka-kole jenyi nakuli vatu vaze vapwile masepa jenyi. Omu natutala hachakutalilaho chaNdavichi, natumona omwo Paulu anganyalile hakushinganyeka hakuyoya chaNdavichi, nomu etu tunahase kulondezeza Paulu.

11. Mwomwo ika Ndavichi asolokelele nge apwile wakuhehela? (Talenu muvwimbimbi wahalipapilo lyahelu.)

¹¹ Ndavichi vamumwene kupwa wakuhehela kuli Ngolyate uze apwile muka-kwasa jita wangolo. Omu Ngolyate amwene Ndavichi, “ambwatwile nakumulumbilisa.” Ngolyate apwile wakutaluka, apwile nawa navitwa vyajita vyosena, kaha nawa alinangwile chikuma kwasa jita. Oloze Ndavichi apwile kanyike uze kalinangwile jitako, kaha nawa kapwile navitwa vyajitako. Chipwe ngocho, Ndavichi apwile nangolo, mwomwo apendaminyine hali Yehova nakuhasa jino kufungulula Ngolyate.—Samwe. 1, 17:41-45, 50.

12. Ukalu muka ukwavo amwenenga Ndavichi?

¹² Ndavichi amwene ukalu ukwavo uze watelelele kumulingisa alimone kupwa wakuhehela. Apwile wakushishika hakuzachila Saulu, mwangana wavaIsalele uze vatongwele kuli Yehova. Hakavanga, Mwangana Saulu amwenenga Ndavichi kupwa wamulemu. Kutwala muze, kulivwimba chalingishile Saulu aputuke kwivwila Ndavichi lwiso. Saulu ayanjishilenga Ndavichi nakusaka vene kumujiha.—Samwe. 1, 18:6-9, 29; 19:9-11.

13. Uno Ndavichi alingile ngachilihi omwo vamuyanjishilenga kuli Mwangana Saulu?

¹³ Numba tuhu Ndavichi vamuyanjishilenga kuli Mwangana Saulu, oloze ikiye atwalileho lika kuvumbika ou mwangana vatongola kuli Yehova. (Samwe. 1, 24:6) Ndavichi kahanyine Yehova mulonga hakumulinga mwamupi kuli Sauluko. Oloze apendaminyine hali Yehova amuhane ngolo jakumika muukalu kana.—Samu 18:1, mazu akujimbula.

14. Ukalu muka amwene kaposetolo Paulu uze walifwanyine nauze waNdavichi?

 ¹⁴ Kaposetolo Paulu amwene ukalu wakulifwana nauze amwene Ndavichi. Vaka-kole jaPaulu vavavulu vapwilenga nangolo kuhambakana ikiye. Vamuhungile kuli vatwamina vavalemu vavavulu. Kakavulu vamuvetelenga nakumukasa mukamenga. Paulu vamuyanjishilenga kuvatu vaze vatelele kupwa masepa jenyi, ngana muze chapwile kuli Ndavichi. Vamufumbukililenga nakuli vandumbwenyi vamwe muchikungulwilo. (Koli. 2, 12:11; Fwili. 3:18) Oloze Paulu afungulwile vaka-kole jenyi vosena. Mujila muka? Numba tuhu vamuyanjishilenga, oloze ikiye atwalileho kwambulula. Kaha nawa atwalileho lika kupwa wakushishika kuli vandumbwenyi numba tuhu vamulingilenga mwamupi. Chachinenenyi, apwile lika wakushishika kuli Kalunga palanga nakukufwa chenyi. (Chimo. 2, 4:8) Ahashile kulinga vyuma vyosenevi mwomwo apendaminyine hali Yehova keshi hangolo jenyiko.

15. Chuma muka twatela kufwila kulinga, kaha natutesamo ngachilihi chuma kana?

¹⁵ Kutala vakwenu vaka-shikola, navaka-milimo navausoko wenu vaze kavapwa Vinjihoko veji kumitolekanga nakumiyanjisa tahi? Kutala vamilingaho lyehi mwamupi kuli ndumbwetu muchikungulwilo tahi? Nge mukiko, kaha anukenu chakutalilaho chaNdavichi naPaulu. Munahase kufungululanga “upi hakulinganga mwamwaza.” (Loma 12:21) Enu kamwafwila kwasa lilolwa muluholo lwamutu ngana muze alingile Ndavichiko, oloze mwafwila kulingisa Mazu aKalunga ahete kumichima yavatu. Ngocho munahase kutesamo chuma kana hakuzachisa Mbimbiliya hakukumbulula vihula navamihulisa vatu muwande, nakusolola kavumbi nalikoji kuvatu vaze navamilinga mwamupi, nakulinga mwamwaza kuli vatu vosena, kuhakilako vene navaka-kole jenu.—Mateu 5:44; Petu. 1, 3:15-17.

16-17. Chuma muka chize Paulu kavulyamineko?

¹⁶ Shimbu kanda kaposetolo Paulu apwenga kambaji kaKulishitu, apwile muka-kasautu uze ayanjishilenga vaka-kukavangiza Yesu. (Vili. 7:58; Chimo. 1, 1:13) Yesu akanjile Paulu uze vavulukilenga ngwavo Saulu, mangana alitwamine kuyanjisanga vaka-Kulishitu. Ahanjikile naPaulu kufuma mwilu nakumulingisa  kupwa kapuputa. Kaha vamulwezele ngwavo hakusaka aputuke cheka kumona, atela kuya kuli vatu vaze ayanjishilenga mangana vamukafwe. Alinyishile nakwitavila kumukafwa kuli kambaji Ananyiya, ngocho aputukile kumona cheka.—Vili. 9:3-9, 17, 18.

¹⁷ Kutwala muze, Paulu apwile jino mutu wamulemu muchikungulwilo chavaka-Kulishitu. Chipwe ngocho, kavulyamine vyuma vamunangwile kuli Yesu omu ahanjikile kuli ikiye mujila yakuya kuNdamashikuko. Paulu atwalileho lika kupwa wakulinyisa hakwitavila kumukafwa kuli vandumbwenyi. Atachikijile ngwenyi vapwile ‘vaka-kumukolezeza.’—Kolo. 4:10, 11, kwinyikila chamwishi.

18. Mwomwo ika lwola lumwe chinahase kutukaluhwila kwitavila vakwetu vatukafwe?

¹⁸ Vyuma muka natulinangula kuli Paulu? Omu twaputukile kulikata navatu jaYehova, twetavililenga kutukafwa kuli vakwetu mwomwo twatachikijile ngwetu twapwile nakusakiwa kulinangula vyavivulu. (Koli. 1, 3:1, 2) Ngachilihi oholili? Kachi nge tunazachilanga Yehova hamyaka yayivulu kaha nawa tunalinangula vyavivulu, tunahase kuchiwana kupwa chachikalu kwitavila vakwetu vatukafwe, chikumanyi nge tunamono ngwetu vaze vali nakusaka kutukafwa kavashimbwile mumuchanoko. Chipwe ngocho, Yehova eji kuzachisanga vandumbwetu vatukolezeze. (Loma 1:11, 12) Shikaho, nge tuli nakusaka Yehova atuhane ngolo kaha twatela kwitavila vandumbwetu vatukafwe.

19. Vyuma muka vyakafwile Paulu afukile?

¹⁹ Paulu alingile vyuma vyavivulu omu alumukile nakupwa muka-Kulishitu. Mwomwo ika? Mwomwo atachikijile ngwenyi kufukila chenyi kachapendaminyine hangolo jenyi, nachinyingi chakushikola, naluheto chipwe chiyoyelo chenyi chakunyimako, oloze chapendaminyine hakulinyisa nakufwelela Yehova. Tuvosena tumulondezezenunga Paulu (1) hakupendaminanga hali Yehova, (2) hakukavangizanga vyakutalilaho vyamuMbimbiliya, (3) nahakwitavilanga vakwetu vaka-Kulishitu vatukafwe. Shikaho numba tuhehela tuhu ngachilihi, oloze Yehova mwatujikijisa.