1. Kapostolu Pawulu wahosheli nindidi?

KAPOSTOLU PAWULU wahosheli hatooka nindi wadiña nakuzeyazeya. Wahosheli nindi mujimba windi “wunakuya nakunoña,” nindi walwishileña kwila chuma chaloña nawa Yehova hakwileña kulomba kwaPawulu kwesekeja nachakuhweleleliyiku. (2 Kor. 4:16; 12:7-9; Rom. 7:21-23) Pawulu welukili cheñi nindi akwankunyi nindi amumweneña nawu wazeya. * Ilaña hetejeli yuma yatama yahosheleñawu antu hela kuzeyazeya kwindi kumuletesha kudimona nindi wamukunkulwayiku.—2 Kor. 10:10-12, 17, 18.

2. Kwesekeja na 2 Akorinda 12:9, 10, chumanyi chalema chelukiliyi Pawulu?

² Pawulu welukili chuma chalema chakwila nawu muntu nateli kwikala nañovu hela chakwila nakumona nindi wazeya. (Tañenu 2 Akorinda 12:9, 10.) Yehova wamulejeli Pawulu nindi ñovu Yindi ‘yinakulumbulukila mukuzeyazeya,’ dikwila nawu Yehova wukumwinka Pawulu ñovu. Chatachi, tushinshikenu muloña wutwatela kubula kuneñela neyi ayilumbu jetu anakutwituka.

3. Muloñadi chitwatela kutiyila kuwaha neyi anakutwituka?

³ Kwosi muntu wakeñaña kumutukaku. Hela chochu, neyi ayilumbu jetu atwituka nawa tushaku maana, tunateli kuzeya. (Yish. 24:10) Hanu dinu twatela kwila ñahi neyi  ayilumbu jetu atwituka? Kufwana Pawulu, tunateli ‘kutiya kuwaha . . . mumatuka.’ (2 Kor. 12:10) Muloñadi? Muloña neyi anakutwituka nikutudimbulula hichinjikijilu chinakumwekesha nawu tudi atumbanji twaYesu alala. (1 Pet. 4:14) Yesu wahosheli nindi atumbanji twindi akayikabishaña. (Yow. 15:18-20) Chumichi chamwekeni mumafuku awapostolu. Munana mafuku, antu aluwankeni nachisemwa chawaGiriki ayimweneña akwaKristu nawu hiyantu abula maana nawa nawu azeya. Nawa hakachi kawaYudeya, akwaKristu ayimweneña nawu “adiña ataña shikola wanyi ilaña adiña hohu neyi akwawu antu abulili kutaña,” adi neyi kapostolu Petulu niYowanu. (Yilw. 4:13) AkwaKristu ayimweneña nawu azeya nawa akiñewa wanyi. Dichi antu ayidiwili muchituñilu.

4. AkwaKristu akusambila elileña ñahi nayuma yatama yayilileñawu kudi ayilumbu jawu?

⁴ Komana akwaKristu akusambila etejeli yuma yatama yahosheleña ayilumbu jawu kuyikañesha? Inehi. Chakutalilahu, kapostolu Petulu niYowanu amweni nawu chachiwahi kuyikabisha muloña wakumulondela Yesu nikushimwina hadi yena. (Yilw. 4:18-21; 5:27-29, 40-42) Atumbanji atiyili nsonyi wanyi. Mukuhita kwampinji akwaKristu akusambila akwashili antu kubadika ayilumbu jawu. Chakutalilahu, nyikanda yonenewa yasonekeliwu kudi awa akwaKristu yinatwalekihu kukwasha antu amavulu kwikala nakuchiñeja. Nawa Wanta watumbakesheleñawu wunakuyuula mwiwulu nawa katataka wuyuuli antu ejima. (Mat. 24:14) Kwambukaku, mawanta añovu adiña nakukabisha akwaKristu ajiya dehi. Kubombelahu, atumbanji ashinshika chayinu mpinji hiyanyanta mwiwulu. Ilaña ayilumbu jawu afwa; nawa neyi akayisañula, akayiyuulaña kudi Wanta watiyakesheleñawu akwaKristu aheleliwu.—Chim. 5:10.

5. Kwesekeja naYowanu 15:19, muloñadi antu jaYehova chayidiwilañawu?

⁵ Makonu, etu antu jaYehova atudiwulaña nawa atusehaña nawu tudana maana nawa twazeya. Muloñadi? Muloña wakwila twambukaku nawantu ejima. Twekala adizoza, amwovu nawa ovwahila. Kwambukaku, antu amukaayi ahamekaña antu adivwimba, adinka wanta niakwakudikaña. Kubombelahu, hitwadiñijaña munsañu jamatuña nachiyuuluku nawa hitweñilaña wushidikaku. Twambukaku nawantu amukaayi, dichi atumonaña nawu tudi amukunkulwayi.—Tañenu Yowanu 15:19; Rom. 12:2.

6. Mudimwinyi weneni wunakuzatayi Yehova kuhitila mudi antu jindi?

⁶ Hela chakwila antu atoñojokaña nawu twazeya, ilaña Yehova nakutuzatisha kwila yuma yamaneni. Nakuzata mudimu wakushimwina mwahita iseki dejima kubadika kunyima. Ambuña indi makonu diwu anakwidisha nikubalumuna nyikanda yayivulu mukaayi nikuzatisha Bayibolu kukwasha nachu antu amavulu kuhimpa yilwilu yawu. Yehova diyi watela kutambwila kalemesha, hanyidimu yakuhayamisha yazatañawu antu amonañawu nawu azeya. Indi etu hamuntu-hamuntu? Komana Yehova nateli kutukwasha kwikala nañovu? Neyi nateli, twatela kwiladi hakwila yatukwashi? Tuhanjekenu hayuma yisatu yitwatela kudizila kudi kapostolu Pawulu.

7. Chumanyi chitwadizilaña kudi Pawulu?

⁷ Chuma chitwadizilaña kudi Pawulu dichichi: Bayi mushindamenaña hañovu jenu hela hawuswa wenu hakumukalakela Yehovaku. Nayitoñojoka yawuntu, kudi  yuma yadi kuletesha Pawulu kudeta hantulu nikudishindamena. Wakulilili muTarusa, musumba weneni wamuRoma. Tarusa wadiña musumba wamaheta nawa mwadiña mashikola amaneni atiyakana. Pawulu wadiña wataña chikupu. Amudizishili kudi Gamaleli, nlomboli wawaYudeya alemesheliwu nankashi. (Yilw. 5:34; 22:3) Hakusambila, Pawulu adiña amulemesha nankashi kudi akwawu aYudeya. Wahosheli nindi: “Nadiña nakupaminaku chikupu mukwitiya kwawaYudeya kubadika antu amavulu amumuza wetu mutwesekeneneña.” (Ñal. 1:13, 14; Yilw. 26:4) Ilaña, Pawulu hadishindameneniku.

8. Kwesekeja naAfwilipi 3:8, Pawulu wamweneña ñahi yuma yashiliyi kunyima, nawa muloñadi ‘chatiyilileñayi kuwaha mukuzeyazeya’?

⁸ Pawulu washili yuma yejima yamuletesheli kuya mpuhu kwesekeja nachamonañawu mukaayi. Kafwampi, wenjili nakumona yuma yejima yadiñayi nayu nindi “hinswadi hohu.” (Tañenu Afwilipi 3:8.) Pawulu amukabishili muloña wakwikala kambanji kaKristu. Amuheleli kudi antu akumuza windi. (Yilw. 23:12-14) Amweteli nikumukasa mukaleya kudi akwawu Aroma. (Yilw. 16:19-24, 37) Kubombelahu, Pawulu waneñeleña muloña wakubula kuwanina nawa chamukalilileña kwila yuma yaloña. (Rom. 7:21-25) Ilaña chatela yeteji ayilumbu jindi hela kuzeyazeya kwindi kumukañeshi kumulondela Kristu, ‘watiyileña kuwaha mukuzeyazeya.’ Muloñadi? Muloña neyi nazeyi dihamweneñayi chamukwashileñawu kudi Nzambi muchihandilu chindi.—2 Kor. 4:7; 12:10.

9. Twatela kumonaña ñahi yuma yaleteshaña antu atumoneña nawu twazeya?

⁹ Neyi tunakukeña netu Yehova yatwinki ñovu, bayi tutoñojokeña netu kwikala nañovu, kutaña shikola, yitachi hela maheta diyuma yalemaku. Yehova hanateli kutuzatisha muloña wakwikala naniyi yumaku. Kafwampi, antu jaNzambi amavulu hiyekala “namaana akumujimbaku,” “akwañovuku” nawa “avwalika kuyisaka yalemaku.” Ilaña Yehova wafuukulahu kuzatisha “yuma yamukaayi yamonañawu antu nawu yakola wanyi.” (1 Kor. 1:26, 27) Bayi muleka kumukalakela  Yehova muloña wakwila himukweti yuma yaleteshaña antu kutoñojoka nawu alemaku. Ilaña monenuña chihandilu chenu nenu hinjila yimu yikuyikwasha kumona ñovu yaYehova chiyinakuzatika mudi enu. Chakutalilahu, neyi mwatiyaña woma antu akeñaña nawu mujinokeña yuma yimwakuhwelela, mulombenu Yehova yayikwashi kwikala ahamuka kulonda muhakwiluku yuma yimwakuhwelela. (Efwe. 6:19, 20) Neyi munakukabakana muloña wayikatu, mulombenu Yehova yayinki ñovu kulonda mutwalekihu kumukalakela. Neyi mumona Yehova chinakuyikwashayi, chikuhwelelu chenu chikukolelaku nawa mukwikala nañovu.

10. Muloñadi chitwatela kudizila kuyuma yeliliwu antu ashinshika ashimunawu muBayibolu, chidi neyi atenawu haAheberu 11:32-34?

¹⁰ Pawulu wadizili nankashi Nsona. Wadizili yuma yayivulu nawa wadizilili cheñi kudi antu ashinshika ashimunawu Mwizu daNzambi. Hayisonekeleliyi akwaKristu aHeberu, Pawulu wayikolesheli kutoñojoka hayuma yelileñawu ambuña aYehova ashinshika akunyima. (Tañenu Aheberu 11:32-34.) Toñojokenu yuma yeliliyi Mwanta Davidi. Amudimbulwileña kudi ayilumbu jindi nikudi antu adiñahu amabwambu jindi. Chitukuhanjekaña hadi Davidi, tukumona kutoñojoka hachihandilu chaDavidi chikwamukolesheli Pawulu nichitunateli kumwimbujola Pawulu.

11. Muloñadi Davidi chamwekeneñayi neyi wudana ñovu? (Talenu mwevulu wudi hakava.)

¹¹ Davidi amumweni kudi chilobu cheyala Goliyati nawu wudana ñovu. Goliyati chamumweniyi Davidi, ‘wamusekesheli.’ Wamumweni muniyi njila muloña Goliyati wadiña wataluka, wadiña nayitwa yanjita nawa wakuluka yitembi munjita. Munjila yikwawu, Davidi wadiña kansi wabula kwiluka kuzuña njita nawa hadiña nayitwa yanjitaku. Ilaña Davidi wamwekeneña neyi wudana ñovu diyi wenjili nakwikala nañovu. Washindameneni hañovu jaYehova nawa wamushindili chilumbu chindi.—1 Sam. 17:41-45, 50.

12. Kukalanyi kukwawu kwamweniyi Davidi?

¹² Davidi wadiña nakukala kukwawu kwadi kuletesha yatoñojoki nindi wudana ñovu. Davidi wamukalakeleli nakashinshi Sawulu atondeliwu kudi Yehova kwikala mwanta wawaIsarela. Hakusambila Mwanta Sawulu wamulemesheli Davidi. Mukuhita kwampinji, Sawulu watachikili kudivwimba nawa wamutiyilili Davidi ichima. Sawulu wamukabishileña Davidi, nawa wakeñeleña nikumujaha.—1 Sam. 18:6-9, 29; 19:9-11.

13. Davidi welili ñahi chamukabishileñawu kudi Mwanta Sawulu?

¹³ Hela chakwila Davidi amukabishileña kudi Mwanta Sawulu, watwalekelihu kulemesha mwanta atondeliwu kudi Yehova. (1 Sam. 24:6) Davidi hamumweni Yehova nindi watama muloña wayuma yamwililiwu kudi Sawuluku. Ilaña Davidi washindameneni hadi Yehova kulonda yamwinki ñovu yakuumika kukala kwamweneñayi.—Mas. 18:1, tumazu twahewulu.

14. Kukalanyi kwamweniyi Pawulu kwadifwana nakwamweniyi Davidi?

¹⁴ Kapostolu Pawulu wamweni kukala kwadifwana nakwamweniyi Davidi. Pawulu amubadikili ñovu kudi ayilumbu jindi. Anlomboli amavulu amuheleli. Amweteli kakavulu nikumukasa. Kufwana Davidi, Pawulu amukabishili kudi antu ateleleli kwikala amabwambu jindi. Amakwawu muchipompelu chawakwaKristu adiña nakumudimbulula.  (2 Kor. 12:11; Fwi. 3:18) Ilaña Pawulu washindili ikañesha dawantu ejima adiña nakumudimbulula. Munjilanyi? Watwalekelihu kushimwina hela chakwila amukañesheleña. Watwalekelihu kwikala washinshika kudi amanakwindi niahela hela chakwila amuneñesheleña. Chuma chabadika kulema, wadiña washinshika kudi Yehova kushika nikukufwa. (2 Tim. 4:8) Washindili kukala kwejima muloña wakwila washindameneni hadi Yehova.

15. Chumanyi chitwafwilaña kwila, nawa tunateli kwila ñahi mwenimu?

¹⁵ Komana ayitukolaña hela kuyikabisha kudi akwenu mumwatañilaña, imwazataña nawu hela antaña jenu abula kwikala aYinsahu? Ayilahu dehi chatama kudi muntu wamuchipompelu? Neyi mwamonahu dehi iku kukala, anukenu cheliliwu aDavidi niPawulu. Munateli ‘kwimika mushindu kutama kuhitila mukwila yuma yayiwahi.’ (Rom. 12:21) Kwambukaku, hitwazuñaña nawantu neyi chazuñiliyi Davidi naGoliyatiku, ilaña twomikaña mushindu kutama kuhitila mukukwasha antu kulonda amwiluki Yehova niBayibolu. Munateli kwila mwenimu kuhitila mukuzatisha Bayibolu hakwakula malwihu awantu, kwikala nakalemesha niwushona kudi antu ayilaña katama nawa nikwilaña yuma yayiwahi kudi antu ejima kushilahu tuhu niayilumbu jenu.—Mat. 5:44; 1 Pet. 3:15-17.

16-17. Chumanyi chabulili kuvulamenayi Pawulu?

¹⁶ Henohu kapostolu Pawulu kanda yekala kambanji kaKristu, wadiña mukwakasawuntu nawa wakabishileña atumbanji twaYesu. (Yilw. 7:58; 1 Tim. 1:13) Yesu yomwenindi wamulekesheli Pawulu ateneneñawu nawu Sawulu kukabisha chipompelu chawakwaKristu. Yesu wahosheli naPawulu iku wudi mwiwulu nawa wamuputishili mesu. Hakwila yatachiki cheñi kumona, Pawulu wayili nakulomba wukwashu kudi yowu antu akabishileñayi. Wetejeli kumukwasha kudi kambanji Ananiya nawa wamutonesheli.—Yilw. 9:3-9, 17, 18.

 ¹⁷ Nkumininaku, Pawulu wekalili mukwaKristu waya mpuhu, ilaña wavulameneni wanyi yuma yamudizishiliwu kudi Yesu hayileñayi kuDamakasa. Pawulu watwalekelihu kwikala wadizoza nawa watambwilileña wukwashu kudi amanakwindi niahela. Welukili nindi ‘amukolesheleña.’—Kol. 4:10, 11, tth.

18. Muloñadi chichinateli kutukalila mpinji yikwawu kutambwila wukwashu kudi amanakwetu?

¹⁸ Yumanyi yitukudizila kudi Pawulu? Chitwatachikili kudiza Bayibolu nawantu jaYehova, twatambwilileña wukwashu kudi amanakwetu muloña twelukili netu twadiña anyikeki kuyuma yakuspiritu nawa kwadiña yuma yayivulu yitwafwilileña kwiluka. (1 Kor. 3:1, 2) Indi chayinu mpinji? Neyi tunamukalakeli Yehova hadi yaaka yayivulu nawa tuneluki yuma yayivulu, hadaha chinateli kutukalila kwiteja kufumba sweje-e neyi muntu wunakutukwasha nashimbuli wanyi muchalala. Hela chochu, kakavulu Yehova wazatishaña amanakwetu niahela kulonda atukoleshi. (Rom. 1:11, 12) Dichi, neyi tunakukeña netu Yehova yatwinki ñovu, twatela kwiteja wukwashu kufuma kudi amanakwetu niahela.

19. Chumanyi chamukwashili Pawulu kuzata nyidimu yakuhayamisha?

¹⁹ Pawulu wazatili nyidimu yayivulu yakuhayamisha hanyima yakwikala mukwaKristu. Muloñadi? Muloña welukili nindi muntu hanateli kuzata iyi nyidimu kushindamena hañovu yindi, shikola, maheta hela muloña wankulilu yindiku, ilaña chiña yekala wadizoza nikumushindamena Yehova. Wejima wetu tumwimbujoleña Pawulu kuhitila (1) mukumushindamena Yehova, (2) mukudizila kudi antu ashimunawu muBayibolu, (3) nikwiteja wukwashu kudi akwetu akwakwitiya. Nkumininaku, hela tukutoñojoka netu twazeya, Yehova wukutwinka ñovu.