1. Tirhkoh Paula chuan eng nge a pawm?

TIRHKOH Paula chuan chak lo chângte a nei tih a pawm a. A taksa chu a ‘awngrawp telh telhin,’ thil dik a tih ṭâlh ṭâlh a ngai tih leh Jehova chuan a ṭawngṭainate chu a beisei angin a chhâng reng lo tih a pawm a ni. (2 Kor. 4:16; 12:7-9; Rom 7:21-23) Amah dodâltute chuan mi chak lo * angin an thlîr tih a hre bawk. Mahse, dik lo taka mite thlîrna avâng leh a chak lohnate avânga hlutna nei lo nia inngaih chu a duh lo a ni.—2 Kor. 10:10-12, 17, 18.

2. Korinth thawn hnih 12:9, 10-a sawi angin, Paula’n eng thil pawimawh tak nge a zir?

² Paula chuan mi chu chak lo nia a inhriat hunah pawh a chak thei tih a hria a. (2 Korinth 12:9, 10 chhiar rawh.) Jehova chuan a thiltihtheihnain Paula mamawh chakna a neihtîr theih avângin chu a thiltihtheihna chu “chak lohnaah asin tihfamkimin a awm,” tiin a hrilh a ni. Tûnah chuan, min dodâltute nêksawrna kan tawh huna kan lunghnual mai lohna tûr chhan i lo en hmasa ang u.

3. Engvângin nge nêksâwrnaahte kan lâwm theih?

³ Kan za hian nêksâwr, a nih loh leh hmuhsit nih chu kan duh lo ṭheuh va. Mahse, kan hmêlmate min hmuhsitna ṭawngkam chu kan ngai pawimawh lutuk a nih chuan, kan lunghnual thei a ni. (Thuf. 24:10) A nih leh, dodâltute  hmuhsitna chu engtin nge kan thlîr ang? Paula angin, keini pawh ‘nêksâwrnaahte kan lâwm’ thei a ni. (2 Kor. 12:10) Engvângin nge? Chûng nêksâwrnate leh dodâlnate chu Isua zirtîr dik tak kan nihzia chhinchhiahna a nih vâng a ni. (1 Pet. 4:14) Isua chuan a hnungzuitute’n tihduhdahna an tuar ang tih a sawi a. (Joh. 15:18-20) Chu chu kum zabi khatnaah a thleng dik a ni. Chutih hun lai chuan, Grik hnam dân thununa awmte chuan Kristiante chu lehkha thiam lo leh chak lo angin an thlîr a. Judate zîngah Kristiante chu tirhkoh Petera leh Johana te angin, “lehkha thiam lo, mi mâwl tak” anga ngaih an ni. (Tirh. 4:13) Kristiante chu politics thilah leh sipai thiltihnaahte an tel loh avângin, chak lo angin an lang a, mite chuan khawtlânga mi ṭangkai lote angin an thlîr a ni.

4. Kristian hmasate chuan dodâltute dik lo taka thlîrna chu engtin nge an chhân lêt?

⁴ Kristian hmasate chuan dodâltute dik lo taka thlîrna chu Isua hnungzui nihna leh thu hrilhna bânsan phah nân an hmang em? Hmang lo ve. Entîr nân, tirhkoh Petera leh Johana chuan Isua hnung zui a, mite hnêna a chungchâng an hriattîr avânga tihduhdah an ni chu chawimawina angin an thlîr a. (Tirh. 4:18-21; 5:27-29, 40-42) Chûng zirtîrte chuan zahna tûr chhan an nei lo. Hun a lo rei zêl chuan, kum zabi khatnaa chûng Kristiante chuan amahni dodâltute aiin mite tân thil ṭha tam tak an ti zâwk a ni. Entîr nân, chûng Kristian ṭhenkhatte ziah, thlarauva thâwk khum lehkhabute chuan mi maktaduai tam tak chu ṭanpuina leh beiseina a pe chhun zâwm zêl a. An puan chhuah Lalram chuan tûnah ngei pawh vâna ro a rêl tawh bâkah, nakin lawkah mi zawng zawng chungah ro a rêl ang. (Mt. 24:14) Kawng leh lamah chuan, chûng Kristian mi rinawmte chu vânah lal nia ro an rêl laiin, Kristiante tiduhdahtu hmân lai Rom sawrkâr chak tak chu a keh chhe tawh a. Chu bâkah, anni chu an thi tawh a; an rawn tholeh a nih pawhin, an mi huat êm êm Kristiante puan chhuah, chu Lalram thuneihna hnuaiah an awm tawh ang.—Thup. 5:9, 10.

5. Johana 15:19-a sawi angin, engvângin nge Jehova mite chu hmuhsita an awm?

⁵ Tûn laiah pawh, Jehova mite kan nih angin, lehkha thiam lo leh chak lo anga mite hmuhsit leh sawichhiat kan tawh chângte a awm a. Engvângin nge? Kan chhehvêla mite rilru put hmang ang kan put loh vâng a ni. Mi inngaitlâwm tak, ngilnei tak, leh thuâwih thei tak nih kan tum tlat a. Kawng leh lamah chuan, he khawvêl chuan mi chapo te, intivei te, leh hel hmangte chu a ngaisâng a. Chu bâkah, politics thilahte kan inhnamhnawih lo va, eng ram sipaiah mah kan ṭang hek lo. Khawvêl mite thununa kan awm loh avângin, mite chuan hnuaihnung tak angin min ngai a ni.—Johana 15:19 chhiar rawh; Rom 12:2.

6. Jehova’n a mite hmangin eng thil nge a hlen chhuah?

⁶ Khawvêl mite chuan engtiang pawhin min thlîr mah se, Jehova chuan keimahni hmangin thil ropui tak takte a ti a. Ani chuan mihring chanchina thu hrilhna beihpui ropui ber chu a thlâk mêk a ni. A chhiahhlawhte chuan khawvêla ṭawng lehlin tam ber leh sem chhuah tam ber magazine chu an tichhuak a, mi maktaduai tam takte nun tihhmasâwn nân Bible hmangin an ṭanpui bawk. Chûng thil ropui takte ti tûra chak lo tak anga lang mite hmangtu Jehova chu chûng thil hlen chhuah ropui tak takte avângin chawimawina zawng zawng hmu tlâk a ni. A nih leh, mi mal tinte chungchâng hi eng nge ni ve? Jehova chuan chakna nei tûrin min ṭanpui thei em? A thei a nih chuan, a ṭanpuina dawng tûrin eng nge kan tih ngai? Tûnah chuan, tirhkoh Paula entawn tûr siam aṭanga kan zir theih thil pathumte chu i lo en ang u.

7. Paula entawn tûr siam aṭanga kan zir theih pakhat chu eng nge ni?

⁷ Paula entawn tûr siam aṭanga kan zir theih pakhat chu he hi a ni: Jehova rawng i bâwlnaah i chakna emaw, i theihna emaw chu rinchhan suh, tih hi. Mihring thlîrna aṭang chuan, Paula chu chapo thei leh mahni inrinchhan thei a ni a. Rom awpna hnuaia awm Tarsa khawpuia seilian a ni. Tarsa khawpui chu ropui tak leh zirna hmun hmingthang tak a ni a. Paula chu zirna lama sâng tak a ni a, a hun laia Juda sakhaw hruaitu zahkai berte zînga pakhat, Gamaliela hnuaia zir chhuak a ni. (Tirh. 5:34; 22:3) Paula chu Juda mite zîngah mi pawimawh tak a lo ni tawh ṭhîn a. Ani chuan: “Judate sakhaw biak dân kawngah chuan ka chite zînga ka rualpui tam takte ka lehpêl ta a,” tiin a sawi. (Gal. 1:13, 14; Tirh. 26:4) Mahse, mahni inrinchhanna a nei lo.

8. Philippi 3:8-a sawi angin, engtin nge Paula chuan a thil kalsan tâkte chu a thlîr a, engvângin nge ‘a chak lohnaahte a lâwm ṭhin’?

⁸ Paula chuan khawvêlin a pêk theih ropuinate chu inhuam takin a kalsan a. Dik tak chuan, tûn hmaa a hlâwkpui mai theih chûng thilte chu “hnâwmhneah lek” a ngai a ni. (Philippi 3:8 chhiar rawh.) Ani chuan Krista hnungzui a nih avângin harsatna tam tak a hmachhawn a. A hnampuite huat a hlawh bawk. (Tirh. 23:12-14) A chipui Rom mite vuak leh tân ina khung pawh a tâwk bawk a ni. (Tirh. 16:19-24, 37) Chu bâkah, ama chak lohna ngei pawh chhel taka a tawrh a ngai bawk. (Rom 7:21-25) Mahse, amah dodâltute leh a tlin lohnate chu Krista hnungzui loh nân a hman phah lo va, chu aiin, ‘a chak lohnaahte a lâwm ṭhîn a ni.’ Engvângin nge? A chak loh apiangin Pathian thiltihtheihnain a nunah hna a thawk tih a hmuh vâng a ni.—2 Kor. 4:7; 12:10.

9. Chak lo anga min lantîr thei thilte chu engtin nge kan thlîr ang?

⁹ Jehova hnên aṭanga thiltihtheihna hmuh kan duh chuan, kan hlutna chu tisa lama chakna te, zirna te, hnam dân te, leh sum leh paitea innghat niin kan ngai tûr a ni lo. Chûng thilte chuan Jehova tâna mi ṭangkai min nihtîr lo va. Dik tak chuan, Pathian  mite zînga a tam zâwk chu “mihring ngaiha mi fing te, mi chak te, mi zahawm te” an ni lo. Chu aiin, Jehova chuan “khawvêl thila chak lote” chu a thlang zâwk a ni. (1 Kor. 1:26, 27, Baptist Mid-Missions’ Translation) Chuvângin, chak lo anga min lantîr thei thil engpawh chu Jehova rawngbâwlna dâltu angin thlîr suh. Chu aiin, chûngte chu Jehova’n i chunga a lantîr a thiltihtheihna hmuh theihna hun remchâng angin thlîr zâwk ang che. Entîr nân, i rinna chungchânga rinhlelhna neihtîr tumtute avânga hlauhna i neih chuan, i rinna humhim tûra huaisenna pe tûr chein Jehova hnênah ṭawngṭai rawh. (Eph. 6:19, 20) Natna khirh tak i tuar a nih chuan, i theih ang tâwka rawngbâwlnaa buai reng tûra i mamawh chaknate pe tûr chein Jehova hnênah dîl ang che. Jehova’n a ṭanpui che tih i hriat apiangin, i rinna chu a nghet zual sauh vang.

10. Hebrai 11:32-34-a târ lan mi rinawmte entawn tûr siam chu engvângin nge kan zir ang?

¹⁰ Paula chu Bible zirlai taima tak a ni a. Thiltawn ngah tak ni mah se, Pathian Thu-a chhinchhiah mite entawn tûr siam aṭang pawhin a inzir a. Hebrai Kristiante hnêna a lehkha thawnah, Paula chuan Jehova chhiahhlawh rinawmte entawn tûr siamte chu ngaihtuah tûrin a fuih a ni. (Hebrai 11:32-34 chhiar rawh.) Chûng a chhiahhlawhte zînga pakhat, Lal Davida chungchâng hi han ngaihtuah teh. Ani chuan a hmêlmate hnên aṭang chauh ni lovin, a ṭhian lo ni tawh ṭhînte hnên aṭang pawhin dodâlnate a hmachhawn a. Davida entawn tûr siam kan en chuan, Paula’n Davida nun a chhût ngunna aṭanga chakna a neih dân leh amah kan entawn theih dânte kan hmu ang.

11. Engvângin nge Davida chu chak lo anga a lan? (A kâwma milem en rawh.)

¹¹ Mi chak tak leh indo thiam tak Goliatha mithmuhah chuan Davida chu mi chak lo tak angin a lang a. Goliatha’n Davida a hmuh chuan “a hmusit hle” a ni. Ni e, Goliatha chu a hrawl zâwk a, râlthuam a nei ṭha zâwkin, indo a thiam zâwk bawk. Kawng leh lamah, Davida chu indo nâna râlthuam ṭha pawh nei lo, thiltawn la nei lo naupang mai a ni. Mahse, chak lohna anga lang chu chaknaah a chantîr a. Jehova thiltihtheihna a rinchhan avângin, a hmêlma chu a hneh ta a ni.—1 Sam. 17:41-45, 50.

12. Davida chuan eng harsatna dang nge a hmachhawn ngai?

¹² Davida chuan chak lo leh thiltihtheihna nei lo anga inhriatna neihtîrtu harsatna dang pawh a hmachhawn a ngai a. Ani chuan Jehova’n Israel lala a ruat Saula rawng chu rinawm takin a bâwl a ni. Lal Saula chuan a tîrin Davida chu a zah hle a. A hnuah, Saula chu a lo chapo tâk avângin, Davida chu a thîk ta a. Ṭha lo takin a cheibâwl a, tihhlum a tum ta hial a ni.—1 Sam. 18:6-9, 29; 19:9-11.

13. Engtin nge Davida chuan dik lo taka Lal Saula cheibâwlna chu a chhân lêt?

¹³ Lal Saula’n dik lo taka a cheibâwl chung pawhin, Davida chuan Jehova ruat lal chungah zahna a lantîr zawm zêl a. (1 Sam. 24:6) A chunga Saula thiltihte avângin Jehova chu a mawhphuh lo. Chu aiin, chu fiahna khirh tak hmachhawn thei tûra a mamawh chakna pe tûrin Jehova chu a rinchhan tlat zâwk a ni.—Sâm 18:1, a chunga thuziak.

14. Tirhkoh Paula’n Davida tawh ang eng dinhmun nge a hmachhawn?

¹⁴ Tirhkoh Paula chuan Davida dinhmun ang chu a tawng a. A hmêlmate chuan amah aiin nasa takin thil an tithei zâwk a ni. A hun laia mi thiltithei tak takte chuan ani chu an  hua a. An vuain lung inahte an khung ṭhîn a ni. Davida angin, Paula chu a ṭhian lo ni tawh ṭhînte’n ṭha lo takin an cheibâwl a. Kristian kohhrana mi ṭhenkhat pawhin an dodâl bawk a ni. (2 Kor. 12:11; Phil. 3:18) Mahse, Paula chuan amah dodâltu zawng zawng chu a hneh a ni. Engtin nge? Dodâlna a tâwk chung pawhin thu a hril zawm zêl a. A unaute’n an tihlungnih loh hunah pawh an chungah a rinawm reng a. Chu aia pawimawh zâwk chu, thih thlenga Pathian chunga a rinawmna hi a ni. (2 Tim. 4:8) Harsatna lian thamte chu tisa lama a chak vâng ni lovin, Jehova a rinchhan avâng zâwkin a paltlang thei a ni.

15. Kan thiltum chu eng nge ni a, chu chu engtin nge kan hlen theih?

¹⁵ I school kalpui te, hnathawhpui te, leh Thuhretu ni lo i chhûngte sawichhiatna leh tihduhdahna i hmachhawn a ngai em? Kohhrana unau tuemawin ṭha lo takin a cheibâwl tawh che em? Chutiang a nih chuan, Davida leh Paula entawn tûr siam hi hre reng ang che. ‘Ṭhatnain sual chu i ngam zâwk’ thei a ni. (Rom 12:21) Kan thiltum chu Davida anga tuemaw chala lung vawm luh ni lovin, mite thinlung leh rilrua Pathian Thu tuh hi a ni. Chu kan thiltum chu mite zawhna kan chhân hunah Bible rinchhanna te, ṭha lo taka min cheibâwltute chunga zahna leh ngilneihna lantîrna te, leh kan hmêlmate pawh tiamin, mi zawng zawng chunga ṭhatna lantîrnate hmangin kan hlen thei a ni.—Mt. 5:44; 1 Pet. 3:15-17.

16-17. Paula’n eng nge a theihnghilh ngai loh?

¹⁶ Krista zirtîr a nih hmain, tirhkoh Paula chu Isua hnungzuitute tiduhdahtu ṭhalai râwng tak a ni a. (Tirh. 7:58; 1 Tim. 1:12, 13) Isua ngeiin, Saula tia hriat ṭhin Paula chu Kristian kohhran tiduhdah tawh lo tûrin a dang a ni. Vân aṭanga biain, a mit a tihdelsak a. Khua hmu leh thei tûr chuan, Paula chuan a lo tihduhdah ṭhin mite hnên ngei aṭanga ṭanpuina a zawn a ngai a. Ani chuan khua a hmuh leh theih nân zirtîr pakhat Anania ṭanpuina chu inngaitlâwm takin a pawm a ni.—Tirh. 9:3-9, 17, 18.

¹⁷ Paula chu a hnuah Kristian kohhrana mi  pawimawh tak a rawn ni a; mahse, Damaska khaw kawnga a dawn Isua zirtîrna chu a theih nghilh ngai lo. A inngaitlâwm reng a, a unaute ṭanpuina chu lâwm takin a pawm a. Anni chu amah “thlamuantute an ni,” tih a hria a ni.—Kol. 4:10, 11.

18. Engvângin nge mi dangte ṭanpuina chu pawm kan hreh mai theih?

¹⁸ Paula hnên aṭangin eng nge kan zir theih? Jehova mite nêna kan inkawm ṭan hian thlarau lama nausên mai kan ni tih leh zir tûr tam tak kan la nei tih kan hriat avângin, mi dangte ṭanpuina chu lâwm takin kan pawm mai thei a. (1 Kor. 3:1, 2) A nih leh, tûnah eng nge ni ve? Kum tam tak chhûng Jehova rawng kan lo bâwl tawhin, thiltawn tam tak kan nei a nih chuan, keimahni tluka rawngbâwlnaa la rei lote hnên aṭanga ṭanpuina pawm chu kan hreh mai thei a ni. Mahse, Jehova chuan min tichaktu atân kan unaute a hmang fo va. (Rom 1:11, 12) Jehova thiltihtheihna dawng tûr chuan, unaute ṭanpuina chu kan pawm tûr a ni.

19. Engvângin nge Paula chu a hlawhtlin?

¹⁹ Paula chuan Kristian a nih hnuin thil ropui takte a ti a. Engvângin nge? Hlawhtlinna chu mi mal chakna te, zir sânna te, hausakna te, leh khawtlâng nihnaahte innghat lovin, inngaihtlâwmna leh Jehova rinchhannaah a innghat tih a hriat avângin. Kan za hian (1) Jehova rinchhanin, (2) Bible-a entîrnate aṭanga inzirin, leh (3) Kristian unaute ṭanpuina pawmin Paula i entawn ṭheuh vang u. Chutianga kan tih chuan, chak lo nia kan inhria a nih pawhin, Jehova’n chakna min pe ngei ang!