MWAHA WOOSOMIYA 29
“Kakhalaka oololova, phinkhalanaaka ikuru”
“Unaakitteela nrima nlattu woololova waka, uveehiya, uhiitaphula, ulupatthiya ni ukhala ni masankiho nlattu wa Kristu.”—2 AKOR. 12:10.
NCIPO 38 Jeová Vai Dar-te Força
NINHALA WIITTHUCANI? *
1. Isiyani apostolu Paulu yaaminnyaawe?
APOSTOLU Paulu ahaamini wiira uhaavo ukati wiicoonaawe ulolovaca awula uhikhalana ikuru. Uyo aheera wiira urutthwaawe ‘yahoocyaa,’ waananrika upanka citthu comaana ni wiira mavekelwaawe khayaakhuliya toko caapheelaawe. (2 Akor. 4:16; 12:7-9; Aroo. 7:21-23) Paulu ciicammo ahohimya wiira ooniya ukhala ntthu oololovaca * naalupatthyaawe. Waanookhalaru commo, Paulu kheecoonale uhikhalana ifayita nlattu wo citthu caavonyaawe ni coolumeliyaawe naatthu akiina.—2 Akor. 10:10-12, 17, 18.
2. Toko cinthoonyeraaya 2 Akorintu 12:9, 10, itthuni yuulupale apostolu Paulu yiitthucalyaawe?
2 Paulu aheetthuca itthu yuulupale—ntthu pooti ukhalana ikuru hataa iicoonaka ulolovaca. (Nsome 2 Akorintu 12:9, 10. *) Yehova ahomwiirela Paulu: “Walolovacaka kinawuuvaha ikuru caka.” Yehova aapheela uhimya wiira anhala unvaha Paulu ikuru canhaleela. Woopacera, nttwee noone nlattuni nihinlamuliyeehu ucukulaca awananiihu yanuulumaka pusya.
‘WUUTTEELENI NRIMA NLATTU WOOVEEHIYA’
3. Kontha isiyani nihaana nitteeliyaka nrima naveehiyaka?
3 Khaavo ntthu unoncivela uveehiya awula uruwaniya. Masi ukati nkiina, awananiihu anaaniveeha. Natepaka ucukulaca nlattu wo citthu cinnuulumelaaya, ninkookhala ooriipiya nrima cinene. (Miru. 24:10) Vano, isiyani ninlamuliyeehu upanka wiira nivilele noolumiyaka pusya naawananiihu? Ninlamuliya untakiha Paulu ni wiikurumica wiira ‘unitteele nrima nlattu wooveehiya.’ (2 Akor. 12:10) Kontha isiyani? Kontha naveehiyaka ni nalupatthiyaka, iyo inthoonyera wiira khweeliini nikhanle atthari a Yesu. (1 Pet. 4:14) Yesu ahaahimyera attharyaawe wiira yanhala ulupatthiya. (Joau 15:18-20) Ni iyo phi itthu yaakhumelenle ukati woseekulu yoopacera. Ule ukatyuule, atthu yaatthara ilema caakereeku yoopuwela wiira makristau yaari atthu oololovaca ni oohicuwela itthu. Ni ayuuta yaawoona makristau ukhala atthu “oohisoma,” toko apostolu Peturu ni Joau. (Mite. 4:13) Atthu enci yoopuwela wiira makristau yaari atthu oololovaca. Ayo khayeekelakeliha nsiyaasani, ni ciicammo khayaarwaa utoropani, phimaana khayaarina ikuru yo waana ikhotto wiira yiicaakihe.
4. Isiyani makristau oopacera yaapankalyaaya ukati woolumiyaaya pusya?
4 Niireke makristau oopacera yahohiya ulalyeera nlattu wo wuulumiya pusya naawanani? Mena. Wootakihera, apostolu Peturu ni Joau yiicoona uttitthimihiya yalupatthiyaka nlattu wontthara Yesu ni nlattu woolalyeera citthu ceetthucihalyaawe. (Mite. 4:18-21; 5:27-29, 40-42) Atthari a Yesu khayoona ihaaya. Hataa ukhalaka wiira khayaahisimiya naatthu enci, ayo makristau owiiyevihaayo ahaakavihera venci apinaatamu, waapwaha alupatthyaaya. Wootakihera, ilivuru co mbiiblyani cantikhalyaaya makristau akiina nanlelo ciri mowaakavihera atthu enci. Ni Umwene wa Nluku waalalyeeraaya uhancera ulamulela wiirimu ni woohipica, unaahala wancera ulamulela ituninya yotheene. (Mat. 24:14) Masi ahooleli anasiyaasa yaalupattha makristau oopacera, aholiyaliya. Ale makristau ale nna co ari wiirimu toko mamwene. Masi ale yaalupattha, otheene caya ahokhwaaca; ni hataa yahalaka wunwelelihiya wahoolo, ayo anrwaa wiiwelela Umwene wa Nluku waalalyeeraaya makristau yaalupatthalyaaya khalayi.—Apoka. 5:10.
5. Toko cinthoonyeraaya Joau 15:19, kontha isiyani apoovu a Yehova anaathanyiya?
5 Atthu akiina anaanithanya ni anaanitarawaca. Ayo anoopuwela wiira apoovu a Yehova akhanle atthu oololovaca ni khiivo incuwelaaya. Kontha isiyani? Kontha khaninttara meettelo arinaaya atthu enci. Hiiva ninawiikurumica ukhala atthu owiiyeviha, owaatatannya ni owiiwa uhimeriya. Masi atthu o ntuninyani, anawaattottopela atthu owiicoona ni oohiiwa uhimeriya. Hiiva ciicammo khanineekelakeliha isiyaasa ni khaninrwaa ukhottoni, hataa ikhalaka ilaponi. Hiiva khanintakiha meettelo o ntuninyani, phimaana khaninooniya ukhala atthu.—Nsome Joau 15:19; * Aroo. 12:2.
6. Citthuni Yehova cinaakaviheraawe apoovwaawe upanka?
6 Hataa atthu o ntuninyani yanithanyaka, Yehova naanikavihera upanka citthu cuulupale. Ilelo, Yehova naanikavihera uvara nteko woolalyeera venci khampa cihinatokwaaya uvariya khalayi. Apoovu a Yehova ilelo anaakumihera irevista cootepa utaphuleliya niiluka cinci ni cootepa ukawiya ntuninyani motheene, ni ayo anaavarela nteko Ibiiblya wiira yaakavihere atthu enci ukhalana ukumi womaana. Citthu cotheene nnyo, hiiva ninkhitiri uvara nlattu wookaviheriya ni Yehova. Atthu anooniya ulolovaca Yehova nawaakavihera upanka citthu cuulupale. Vano nyuuva? Nnaakupali wiira Yehova pooti wuukaviherani ukhalana ikuru? Isiyani inlamuliyeenyu upanka wiira nkaviheriye ni Yehova? Nttwee noopele mwaha citthu tthaaru cinniitthucihaaya ntakihero na Paulu.
NHIKHULUVELE IKURU CINYU
7. Isiyani ineetthuceehu ni Paulu?
7 Itthu imoca ineetthuceehu ni Paulu phi ila: wonswalela Yehova, nhikhuluvele ikuru cinyu awula citthu cincuweleenyu upanka. Moonelwaaya apinaatamu, Paulu ahaana citthu cinci caahala umwiiriha wiicoona ni wiikhuluvela. Uyo oonuwenle wasittatti yo Tarso, iparasa yoporovinsiya imoca yaahooleliya ni Roma. Tarso yaari isittatti yuulupale ni yaarina icikola cuulupale. Paulu aari ntthu aasomale cinene. Uyo aasomihiye ni nhooleli nyuuta aahisimiya cinene ule ukatyuule, eehaniya Gamaliel. (Mite. 5:34; 22:3) Ni wahaavo ukati Paulu waakhanlyaawe nkhulupale waapwaha ayuuta akhwaawe. Paulu mwaneene aheera: “Mi kaavira kirwaaka uhoolo ukati weettelaaka ittiini ya ayuuta waapwaha atthu enci o nlaponi waka yaakilikanana iyuunuwelo.” (Akalas. 1:13, 14; Mite. 26:4) Masi wanookhalaru commo, Paulu kheekhuluvela.
Paulu oona ukhala “ikokhola” citthu co ntuninyani alattanihaka ni iparakha yaarinaawe yo ntthara Kristu (Uwehe iparaagarafu 8) *
8. Toko cinthoonyeraaya Afilipo 3:8, Paulu oonela cani citthu co ntuninyani caahiilyaawe, ni kontha isiyani ‘waanantteela nrima nlattu woololova wawe’?
8 Niiraati, Paulu ahaamini uhiya citthu cankhaliha nakuru uhoolo waatthu o ntuninyani. Khweeliini, citthu atthu enci coonaaya ukhala cofayita, Paulu oona ukhala “ikokhola.” (Nsome Afilipo 3:8. *) Paulu yahonkhumelela marikariko nlattu wookhala nkristau. Uyo ahancera uthanyiya naatthu olapwaawe. (Mite. 23:12-14) Uyo ahaattakaciya ni ahotthukiya naarooma akhunanawe. (Mite. 16:19-24, 37) Paulu ciicammo aanoona wiira aari ntthu oopahuwa ni waananrika upanka citthu comaana. (Aroo. 7:21-25) Masi Paulu khaahiile untthara Yesu nlattu wo masankiho yamphwanya, nlattu woolupatthiya awula nlattu wo citthu caavonyaawe. Masi uyo ‘waanantteela nrima nlattu woololova wawe.’ Kontha isiyani? Kontha khula ukati wiicoonaawe ulolovaca, Paulu aanoona wiira aanaavahiya ikuru ni Nluku.—2 Akor. 4:7; 12:10.
9. Ninlamuliya uwehera cani citthu cinnikhaliha toko oololovaca?
9 Napheelaka wiira Yehova anivahe ikuru, khaninlamuliya wuupuwela wiira ukhomaala irutthu, usoma cinene, ukhalana mihakhu cinci phinnikhaliha atthu ofayita. Nnyo citthunnyo khacinnikhaliha atthu ofayita uhoolo wa Yehova. Khweeliini, iriyari waatthu anonswalela Nluku ilelo “khayincivale atthu oocuwelaca cinene uhoolo waapinaatamu, khayincivale akhulupale ni atthu ankhuma mmatthokoni coopuhiya.” Masi Yehova thanlale “citthu coololovaca co ntuninyani.” (1 Akor. 1:26, 27) Phimaana, nyuuva pooti unswalela Yehova, hataa ukhalaka wiira khanrina citthu cihimiye wuupaceroni ila iparaagarafwiila. Muupuwele wiira mwaahikhalaneke citthu atthu co ntuninyani cinoonaaya ukhalana ifayita, nyuuva nnaakhitiri woona wiira Yehova nawuuvahani ikuru. Wootakihera, wakhala wiira nyuuva nnaawoova ale cihinaacivela citthu cinkupaliinyu, munlompe Yehova munlepelaka ulipa nrima wiira nkhitiri waakihera itthu inkupaliinyu. (Efesu 6:19, 20) Wakhala wiira ihaavo iretta ihinvoniya inooweryaani, munlepele Yehova ikuru cimpheeleenyu wiira nvare ntekwaawe.
MWIITTHUCE MATAKIHERO O MBIIBLYANI
10. Kontha isiyani unaareera wuupuwela matakihero aatthu ookhuluvelya yanswalela Yehova khalayi, toko ale ahimiye nhina Maberewu 11:32-34?
10 Paulu khawannyoonya usoma Cowantikhiya Cowaarya. Phimaana, uyo kheetthucale ikhweeli paahi, masi ciicammo aheetthuca matakihero aatthu ookhuluvelya cittonkiye ihantisi caya mbiiblyani. Ukati waawantikhenlyaawe iwarakha makristau maberewu, Paulu ahaalepela wiira yuupuwele matakihero aatthu enci yanswalenle Yehova khalayi. (Nsome Maberewu 11:32-34. *) Moone ntakihero na ntthu mmoca—mwene Davidi. Uyo aholupatthiya naawanannyaawe, masi ciicammo ahaavo apatthannyaawe yanlupatthale. Khweeliini, wuupuwela ntakihero na mwene Davidi wahonlipiha apostolu Paulu. Ni hiiva ciicammo noopuwelaka nno ntakiheronno, ninaahala unikavihera venci.
Ukati waapheelaawe umwaattakanana Koliyasi, Davidi aari mmirawo ni aakhala toko oohilipa. Masi uyo ahonkhuluvela Yehova, kontha ancuwela wiira Yehova anhala unvaha ikuru wiira anttheme Koliyasi, ni uyo ahontthema (Uwehe iparaagarafu 11)
11. Kontha isiyani Davidi waakhalaawe toko khaarina ikuru uhoolo wa Koliyasi? (Nwehe ilatarato iri wakaapani.)
11 Uhoolo wa Koliyasi, waakhala toko Davidi khaarina ikuru. Ukati Koliyasi waamoonalyaawe Davidi, “ahonthanya ni ahoncocolaca.” Kontha Koliyasi aari muulupale unvikana Davidi ni ahaana ikaruma cokhotto coolikana. Davidi aari mmirawo ahaapacale urwaa ukhottoni ni khaarina ikaruma cokhotto coolikana. Masi waahookhalaru toko wiira Davidi khaarina ikuru, uyo ahokhala nakuru. Davidi ahokhuluvela ikuru ca Yehova, hataa phimaana ahontthema nwanannyaawe.—1 Sam. 17:41-45, 50.
12. Itthuni ikhwaawe yankhumelenle Davidi?
12 Davidi yahonkhumelela itthu ikhwaawe yaahala umwiiriha wiicoona ulolovaca. Uyo ananvarela nteko sana-saana mwene o Isarayeli aathanliye ni Nluku, Sawuli. Wuupaceroni, Sawuli ananhisima Davidi. Masi wahoolo, nlattu wo wiicoona, Sawuli ahomoonela nttima Davidi. Sawuli ahancera uhinwacera ratta Davidi, ni mpaka ahomananiha umwiiva.—1 Sam. 18:6-9, 29; 19:9-11.
13. Davidi aapankale isiyani ukati wahaawaceriyaawe ratta ni Sawuli?
13 Davidi khaahiile unhisima mwene Sawuli hataa ukhalaka wiira uyo khanwacera ratta, kontha Davidi ancuwela wiira Sawuli aari mwene aathanliye ni Nluku. (1 Sam. 24:6) Davidi khaamootherihale Yehova citthu cohinamaana caapankiyaawe ni Sawuli. Uhiya commo, Davidi ahokhuluvela wiira Yehova aanaahala unvaha ikuru caapheelaawe wiira avilele ale marikarikwaale.—Isaa. 18:1, moolumo ooculu ikapiitulu.
14. Itthuni yankhumelenle Paulu inlattanaca ni ile yankhumelenle Davidi?
14 Apostolu Paulu ciicammo yahonkhumelela itthu toko yankhumelenle Davidi. Alupatthi a Paulu yahaana ikuru cinene unvikana uyova. Ahooleli anasiyaasa ni ottiini enci khayampheela Paulu. Ikwaha cinci, ayo yahoruma wiira Paulu acaphiye ni yahontthukiiha. Toko Davidi, Paulu ahohuvihiya naatthu yaalamuliya ukhala apatthannyaawe. Hataa ciicammo wanlokoni ahaavo atthu yanrukunuwenle Paulu. (2 Akor. 12:11; Afili. 3:18) Masi Paulu ahokhitiri waatthema otheene ale yanrukunuwenle. Aakhitinri cani? Uyo khaahiile ulalyeera, hataa alupatthiyaka. Uyo khaahiile waafenta mayamunnaawe ni asirokorawe o wanlokoni hataa ukhalaka wiira yahonriipiha nrima. Ni itthu yuulupale cinene phi ila: Paulu khaahiile unswalela Yehova mpaka waakhwiilyaawe. (2 Tim. 4:8) Paulu khaakhitinri uvilela masankiho moolupale yankhumelenle nlattu wokuru cawe, masi aakhitinri nlattu wookhuluvela ikuru ca Yehova.
Ntthu anceraka uvaanyiha citthu cinkupaliinyu, mmananihe umuulumana sana-saana ni niihisima (Uwehe iparaagarafu 15) *
15. Isiyani impheeleenyu cinene upanka, ni manannani cinhaleenyu ukhitiri iyo?
15 Vano nyuuva? Ciicammo nnaathanyiya ni nnaalupatthiya naatthu anaasomaneenyu, anaavaraneenyu nteko awula naamuciinyu ahikhanle Masaahiti a Yehova? Nhopaca upankiya itthu yoohiloka ni munna o wanlokoni? Wakhala wiira ihookhumelelani itthu toko iyo, muupuwele ntakihero na Davidi ni na Paulu. Nyuuva nanlelo nnaahala ukhitiri ‘upanka itthu yomaana wiira nttheme itthu yoohinamaana.’ (Aroo. 12:21) Itthu intotheenyu upanka khunakhala umpwesa ntthu ni nluku, toko Davidi campwesalyaawe Koliyasi. Masi itthu impheeleenyu cinene ukhanle waakavihera atthu wiitthuca myaha ca Yehova ni co mbiiblyani. Ni nyuuva nnohala ukhitiri iyo mwapankaka nnya citthunnya: ukhuluvela Ibiiblya ukati wowaakhula makoho aatthu; waahisima ni waathoonyera unamaana ale ahinoowacerani ratta ni waapankela citthu comaana atthu otheene, hataa naale akhanle awananiinyu.—Mat. 5:44; 1 Pet. 3:15-17.
NTTHUNE UKAVIHERIYA NAAKHWIINYU
16-17. Isiyani Paulu yahaaliyanlyaawe?
16 Paulu hinaaya ukhala nkristau, aari mmirawo oohihisima aalupattha venci atthari a Yesu. (Mite. 7:58; 1 Tim. 1:13) Uyo ukatyuuyo, Paulu eehaniya Saulu ni anwoopopiha venci makristau. Ni wiira ahiye waalupattha, Yesu phanhiihale. Nari wiirimu, Yesu ahomuulumana Paulu ni ahompankiha uhoona. Wiira ancere woona, Paulu ahaana arwaaka waalepela atthu yaalupatthaawe. Athoonyeraka wiiyeviha, Paulu ahotthuna ukaviheriya ni ntthari a Yesu eehaniya Ananiya, ni uyo ahotthukula miittho a Paulu wiira oone.—Mite. 9:3-9, 17, 18.
17 Wahoolo, Paulu ahokhala munna o wanlokoni no makristau aacuweliya cinene. Masi uyo khaaliyanle itthu yeetthucihiyaawe ni Yesu ukati wahoonihiyaawe munttalani wo Damasco. Paulu kaahiile wiiyeviha ni utthuna ukaviheriya ni mayamunaawe ni asirokorawe makristau. Uyo aanaamini wiira ayo mayamunnaayo yaakhanle ‘nikavihero nanlipiha.’—Akol. 4:10, 11, niwehero.
18. Kontha isiyani ukati nkiina unaanirika utthuna ukaviheriya naakhwiihu?
18 Ntakihero na Paulu ninniitthuciha isiyani? Pooti ukhala wiira khalayi, ukati weetthucaleehu ikhweeli phiyaaru, hiiva naanaakuva utthuna ukaviheriya ni mayamunna. Uyo ukatyuuyo, hiiva niicoona ukhala anamwane nhina citthu coominepani, ni naanoona wiira cahaavo citthu cinci caapheeleehu wiitthucihiya. (1 Akor. 3:1, 2) Vano ilelo? Hataa ukhalaka wiira nihokhala myaakha cinci ninswalelaka Yehova ni niheetthuca citthu cinci, niireke ninaatthuna ukaviheriya naakhwiihu? Nna va, atthunaka unaanirika utthuna ukaviheriya naakhwiihu, utepa wakhalaka wiira ntthu nopheela unikaviherooyo eetthucale ikhweeli mphiyaaruni. Masi ikwaha cinci, Yehova naaruma mayamunneehu ni asirokorihu wiira anivahe ikuru cimpheeleehu. (Aroo. 1:11, 12) Napheelaka wiira Yehova anivahe ikuru, nihaana nitthunaka ukaviheriya ni mayamunneehu ni asirokorihu.
19. Nlattuni Paulu waakhitinryaawe upanka citthu cootikhiniha?
19 Paulu ukati waakhanlyaawe nkristau ahokhitiri upanka citthu cootikhiniha. Nlattuni? Kontha uyo aheetthuca wiira napheelaka wiira citthu cimpankeehu cineettele saana, khunakhala wiira nihaana nikhomaalaka irutthu, usoma cinene, ukhalana nsurukhu mwinci awula uthaciri. Citthu cimpankeehu wiira cinikhumele saana, nihaana niiyevihaka ni unkhuluvela Yehova. Phimaana, nlakele untakiha apostolu Paulu, (1) munkhuluvelaka Yehova, (2) nttharaka matakihero o mbiiblyani ni (3) utthuna ukaviheriya naakhwiinyu. Mwapankaka commo, hataa mwiicoonaka ulolovaca, Yehova naahala wuukhomaalihani ni wuuvahani ikuru!
NCIPO 71 Marchamos com Jeová
^ par. 5 Ula mwahoola unaahala wuuluma ntakihero na apostolu Paulu. Ninaahala woona wiira nakhalaka atthu owiiyeviha, Yehova naahala univaha ikuru wiira nikhitiri uvilela ukati nintarawaciyeehu ni nineecooneehu ulolova.
^ par. 1 NUULUMO NOOTAPHULELIYA: Hiiva pooti wiicoona ulolovaca nlattu wo citthu cinci: nlattu wo matampiihu, nlattu wookhala amasikhini, nlattu wookhalana ikwerere awula nlattu woohisoma cinene. Ciicammo, atthu akiina ahinciveliya ni hiiva pooti uniloloviha yanuulumelaka awula yanipankaka citthu coohiloka.
^ par. 2 2 Akorintu 12:9 Uyo ahokiirela: “Unamaana wowuuronya wuuthonyenryaaka unawuutosa, kontha walolovacaka kinawuuvaha ikuru caka.” Phimaana, ukitteelaka nrima, kinaahala wiittottopa nlattu woololova waka, wiira ikuru ca Kristu cikhale wamoca ni miiva toko heema. 10 Phimaana, unaakitteela nrima nlattu woololova waka, uveehiya, uhiitaphula, ulupatthiya ni ukhala ni masankiho nlattu wa Kristu. Kontha, kakhalaka oololova, phinkhalanaaka ikuru.
^ par. 5 Joau 15:19 Waari wiira nyuuva nnaapanka mphantte wotuninya, atthu yaanaahala wuufentani nlattu woopanka mphantte wotuninya. Vano, ukhala wiira nyuuva khannopanka mphantte wotuninya, ni mi kihoothanlani ntuninyani, phimaana atthu anawuuthanyani.
^ par. 8 Afilipo 3:8 Uhiya vo, citthu cotheene kinoona ukhala citthu cihalenlyaaka, nlattu wofayita yuulupale urinaaya uncuwela Kristu Yesu, Pwiyaaka. Nlattu wawawe kihotthuna uhaleela citthu cotheene ni kinoona ukhala ikokhola, wiira kihinhaleele Kristu.
^ par. 10 Maberewu 11:32 Kinhala uhimyani-tho? Kontha khawaahala ukhala ukati kinamuulumale ciicammo Gideau, Baraki, Sansau, Davidi, Samuweli ni maporofeeta makiina. 33 Nlattu wo waamini, ayo ahaatthema mamwene, ahowaana isariya, cahaakhumelela citthu caakhuluvelihiyaaya, yahotthuka malaku aakharamu, 34 yahottipihaca ikuru co mooro, yahoopwa wiira ihaahasare ikatana, yaahookhalaru oohikuru, yahovahiya ikuru, yahokhomaala ukhottoni, yahotthema itoropa caanamankeleela.
^ par. 61 ILATARATO: Paulu ukhala wawe nkristau, ahohiya uttuli citthu cotheene caarinaawe ukati waaryaawe nfarisewu. Nhina citthu caahiilyaawe uttuli, atthunaka ciicammo cahaavo ilivuru caasomenlyaawe ni ikaaxa yankaani mafarisewu waahelaaya iveerusu ni yaawaraaya wayuuci.
^ par. 65 ILATARATO: Munna mmoca naakhanyererihiya naatthu anaavaranaawe nteko wiira akele ifesta yootthapelela nihuku niyariyaawe ntthu nonvaranaawe nteko.
