1. Pauluba taena gere mûǂan?

APOSTEL Paulub ge gere mûǂan ǁîb tsîn ǁaen-ai ǂkhabusase gere tsâsa. Mîb ge ge ǁîb soros ta “ǁgaoǁgaohēsa.” ǂHanu xūnab nî dīsab nî ǃkhambas tsîb Jehovaba ǀnî ǁaegu-ai ǁîb di ǀgorede ǁîb ǂhâba hâ khami ge ǃeream tama isa. (2Kor. 4:16; 12:7-9; Rom. 7:21-23) ǁÎba ra mâǃoa khoen ge ǁîba ǂkhabusase gere mû. * Xaweb ge ge mā-am tama hâ i khoen gere mî ǁgai xūn tamas ka io ǁîb ǃnubusin xa xū tamase tsâ kaihesa.—2Kor. 10:10-12, 17, 18.

2. 2Korinteǁîn 12:9, 10 ǃoagu Pauluba tae ǂhâǂhâsa xū-e ge ǁkhāǁkhāsen?

² Paulub ge ǂhâǂhâsa xū-e ge ǁkhāǁkhāsen khoe-i ge a ǀgaisa ǁkhā ǂkhabusase i ra tsâ hîna. (Khomai re 2 Korinteǁîn 12:9, 10.) Jehovab ge Pauluba ge mîba ǁîb ǀgaib ‘ǂkhabusasib ǃnâ ra ǀoa’ di. ǁNās gera ǂâibasen Jehovab Pauluba ǂhâb hâ ǀgaiba nî mā di. Hā re ida kō tae-i amsi da tā nî ǂkhabuǂâisa sida di mâǃoa-aon ga mîǁgaiǁgai da o.

3. Mati da tsūdīhes ǃnâ ǃgâiǃgâisen-e nî ūhâ?

³ Khoe-i xare i ge mîǁgaiǁgaihe ǂgao tama hâ. Sida khākhoen ga mîǁgaiǁgai da o tsî da ga ne xūna ǂgaob ǀkha u o, o da ge a ǂkhabuǂâi ǁkhā. (ǂKhm. 24:10) O mati  da nē khoen ta mî xūn xa nî tsâ? Paulub khami da ge “ǃgâiǃgâisen-e ūhâ” ǁkhā “tsūdīhedi ǃnâ.” (2Kor. 12:10) Tae-i xa? Tsūdīhe tsî da ga mâǃoahe o, o i ge ra ǁgau Jesub di saosabe ta a ǃkhaisa. (1Pet. 4:14) Jesub ge ge mî ǁîb saosaben nî ǃgôaǃgonhe di. (Jhn. 15:18-20) ǂGuro Xristeǁîn tsîn ge gere ǃgôaǃgonhe. ǁNā ǁaeb ai ge Xrikeǁî ǂâiǀgauba ūhâ i khoen ge Xristeǁîna gâre tsî ǂhābusa khoen ase gere mû tsî Jodeǁîn ǁaegun ge Xristeǁîna “ǁkhāǁkhāhe tama tsî ǀūǂam” khoen ase gere mûhe Apostel Petrub tsî Johaneb tsîkha khami. (ǃNǃkh. 4:13) ǂGui khoen ge gere ǂâi Xristeǁîn a ǂkhabusa tsî ǁkhaubasen ǁoa ti. ǁÎn ge ǂgīǂgōsi xūn ǃnâ ǃâ-e ge ūhâ tama hâ i ǁnā-amaga ǂhanub ǃnâ mî xū-e ge ūhâ tama hâ i. ǁÎn ge toro ǃkhamsa gere ǂkhā ǁnā-amaga ǁîna nî ǃkhamba khoe-e ge ūhâ tama hâ i.

4. ǂGuro Xristeǁîna tae-e gere dī khoen gere ǁîn xa ǃgâi tama xūna ǃhoa o?

⁴ ǁNā Xristeǁîna khoen gere mî xūn xa Jehovaba ge ǃoaba ǀû? Hî-i. Aiǁgause, Apostel Petrub tsî Johaneb tsîkha ge Jesub di saosabekha a ǃkhais ams ai kha gere ǃgôaǃgônhe o ǁnāsa aiǂhanub ase gere mû. Jesub saosaben ge taoban nî ǃaromahe ge ūhâ tama hâ i. (ǃNǃkh. 4:18-21; 5:27-29, 40-42) ǁNā ǃgamǃgamsenxa Xristeǁîn ge khoen xan ge ǃgôahe tama hâ i xawe khoena kaise gere hui. Aiǁgause, Elobmîs ǂkhanidi ǁnā Xristeǁîn ge xoa di ge nētsēs kōse miluindi khoena ra hui tsî ǁnān gere ǂkhâǃnâ Gaosib ge ǀhommi ǃnâ ra ǂgaeǂgui tsî ǀgūǁaeb ǃnâ ǃhūbaib ǂhawase nî ǂgaeǂgui. (Mat. 24:14) Xawe ǁnā Romeǁî ǂgaeǂguis hîna ge Xristeǁîna a ǃgôaǃgons ge nētsē a ǀkhai. ǁNās ǂam ǁGûb, ǁgûs, ǀgôab tsî ǀgôas ge ‘Pure Worship’ ǂkhanisa ǀguiba ra ôaǃnâ. ai i ge ǁnā Xristeǁîna nētsē gao-aogu ase ǀhommi ǃnâ ra ǂgaeǂgui. ǁÎna gere mâǃoa khoen ge ǁō hâ tsîn ga ǀnîsi khâisa māhe o, on ge ǁnān gere ǃgôaǃgon khoen xa nî ǂgaeǂguihe.—J.ǂHa. 5:10.

5. Johaneb 15:19 ǃoagu i tae-i ǃaroma Jehovab khoena ra ǃgôaǁnâhe?

⁵ Nētsē da ge Jehovab khoen ase ǀnî ǁaegu ai khoen xa ra kēǁnâhe tsî ra ǃhōhe mîn rase ǂkhabusa tsî da gā-ai tama hâ ti. Tae-i amsi? Sida ǂnamipe hâ khoen di ǂâi ǀgauga da ǃkhōǃkhō tama hâ amaga. Jehovab khoen ase da ge ra dītsâ ǃgamǃgamsenxasib tsî ǁnâuǀnamxasib tsîna ūhâsa. Xaweb ge ǃhūbaiba ǀgapi ǂâixa khoen tsî mâǃoara khoena ra koa. Jehovab khoen ase da ge ǂgīǂgōsi xūn tsî torodīs ǃnâ ǁhao tama hâ. Nē ǃhūbaib ǂâiǀgauba ta ūhâ tama hâ amagan ge khoena sida ra ǃgôaǁnâ.—Khomai re Johaneb 15:19; Rom. 12:2.

6. Jehovaba ǁîb khoena tae-i sîsen-i ǀkha ra hui?

⁶ ǃHūbaib khoen ǂkhabusa da a ti ra ǂâi xaweb ge Jehovaba sida ra sîsen-ūse ǂoaǂamsa xūna ra dī. ǃHūbaib ai noxoba dīhe tama hâ aoǁnâ sîsen-eb ge nētsē ra ī ǁkhā kai. ǁÎb ǃoaba-aon ge ǂgui ǂkhanina ǂnûiǃkhūni tsî ǃhūbaib ǂhawase ra māǂui tsî Elobmîs ǀkha miliundi khoena ra hui in ǁîn ûiga ǀkharaǀkhara. Jehovab ge nē xūn hoana ra ī ǁkhā kai. ǁÎb ge ǃhūbaib mûdi ǃnâ ǂkhabusase ra mûsen khoen ǃnâ-ū nē kai sîsenga ra dī. O mâ-i hoa-i xas? Jehovaba huida ǁkhā-e ǀgaisase hâsa? ǁNās nî īs ga o, o da tae-e nî dī i da ǁîb huiba hō? Hā re i da nēsi ǃnona xūna ǃhoaǃgao Apostel Paulub di aiǁgausa xu da ra ǁkhāǁkhāsen na.

7. Tae-e da Paulub aiǁgausa xu ra ǁkhāǁkhāsen?

⁷ ǀGui ǂhâǂhâsa xū-i Paulub aiǁgausa xu da ra ǁkhāǁkhāsen i ge, tā sa ǀgaib tsî ǁkhāsib ai ǂgomaiǂnûi Jehovabats ga ra ǃoaba o. ǂGui khoen ge Pauluba ǃgôaǃgâsiba ge ūhâba hâ ī, ǁîb di ǁkhāsib tsî ǁîb gere dī xūn ǃaroma. ǂGaob ga hâ o, ob ge ǁnā ǁkhāsigu ai ga ǂgomaiǂnûi hâ, tamas ka io o ga ǀgapiǂâixa hâ. ǁÎb ge Romen ǀkharigu di ǀgui kai ǃās Tarsus ǃnâ ge kai. Tarsus ge ge kai ǃā i tsî ǂansa ǀgapi ǁkhāǁkhāsens skola ge ūhâ i. Paulub ge ǀgapi ǁkhāǁkhāsensa ge ūhâ i. ǁÎb ge ǀgapise ge ǃgôahe hâ i Jodeǁî ǂgaeǂgui-aob Gamaliel di ǀōn hâb xa ge ǁkhāǁkhāhe. (ǃNǃkh. 5:34; 22:3) Tsî ǁaerob ǀgaibab ge Pauluba Jodeǁîn ǁaegu ǁîb tsîna ge ǀgapi ǃgôahe hâ i. ǁÎb ge ge mî: Tita ge ‘Jodeǁîsis ǃnâ ǂguigu tita ǀkha ǀgui kuriga ūhâga ge ǃnā hâ i.’ (Gal. 1:13, 14; ǃNǃkh. 26:4) Xaweb ge Pauluba ǁîb ǀgaib ai ge ǂgomaiǂnûi tama hâ i.

8. Filipeǁîn 3:8 ǃoagub Pauluba ǁnāxūb ge xūna tae-i ase mû tsî tae-i amsib ‘ǃgâiǃgâisen-e ge ūhâ i ǂkhabusasigu’ ǃnâ?

⁸ Paulub ge nau khoen mûdi ǃnâ ge ǀgapise gere mûsen kai bi xūna ge xūmâi. ǁÎb ge ge mûǂan nēb ge ūhâ i aiǂhanugu “ǀapon” khama īsa. (Khomai re Filipeǁîn 3:8.) Paulub ge ǂgui ǃgomsina ge ǃkharu ǃnâ Xristeǁî kaib ge o. ǁÎb ge ǁîb ǃhaos khoen xa ge ǃhuihe. (ǃNǃkh. 23:12-14) Tsîb ge ǁîb ǁanǁare-aon Romen xa ǂnauhe tsî ǃkhōsis ǃnâ ge aoǂgāhe. (ǃNǃkh. 16:19-24, 37) ǁÎb ge ge mûǂan ǀoasa kurusab ūhâ tama hâsa tsî ǃgâi xū-e dīs a ǃgomsa. (Rom. 7:21-25) ǁÎb ge ge mā-am tama hâ i ǁîb mâǃoa-aon tamas ka io ǁîb ǃnubusina în ǁîba Xristuba sao ǀû kai. Xaweb ge ‘ǃgâiǃgâisen-e ge ūhâ ǂkhabusasigu’ ǃnâ. Tae-i amsi? ǂKhabub gere o, ob ge gere mû Jehovab mati ra hui bi ǀgausa.—2Kor. 4:7; 12:10.

9. ǂKhabusase ra mûsen kai da xūn xa da mati nî tsâ?

⁹ Jehovab ǀgaiba da ga hō ǂgao o, o da  ge tā nî ǂâi sida ǂurusib, ǁkhāǁkhāsens, khaoǃhūb tamas ka io sida mari i Jehovab mûǁae a ǂhâǂhâsa ti. Nē xūn ge tātsē Jehovab aisi ǂhâǂhâsa kai da tama hâ. ǂGui khoen Jehovab din ge ‘ǁgans ǃoa gā-ai, ǀgaisa tsî ǀgapiǃgôasa’ tama hâ. Xaweb ge ǁîba ‘ǃhūbaib di ǂkhabusana’ ra sîsen-ū. (1Kor. 1:26, 27) Nē goro ǃhoaǃgao-e xūna da ga ūhâ tama i xawes tsîna da ge Jehovaba a ǃoaba ǁkhā. Sida mâsib xa da ge ǃgâi ǀgaub xa nî ǂâi. Nēsa da mati a dī ǁkhā? ǂÂis ǃnâ ūhâ re khoena ǂhâǂhâsase ǃhūbaib mûǁae ra mûsen kai xūna da ga ūhâ tama i o, o da ge Jehovab ǀgaiba sida di ûigu ǃnâ nî mû. Aiǁgause, sa ǂgomsa ra mîǁgaiǁgai khoenats ga ǃao o, mati iots Jehovaba ǁkhoaǂgaosiba ǂgan tama hâ its sa ǂgomsa ǁkhauba? (Efe. 6:19, 20) ǁKhōǁkhōsa ǀaeb tamas ka io soros di ǃnubusiba du ga ūhâ o. Jehovaba ǂgan re îb ǀgaiba mā du i du ǁîb di ǃoabas ǃnâ mâǀgai. Jehovab ta huidu ǀgauba du ra mû ǁaeb hoab ai i ge sadu ǂgoms tsî sadu tsîna ra ǀgai.

10. Tae-i ǃaroma da ǂgomǂgomsa ǃoaba-aon hîna Hebreǁîn 11:32-34 ǃnâ ra ǃhoaǃgaohen di aiǁgaus xa nî ǁkhāǁkhāsen?

¹⁰ Paulub ge ǂōrisase xoade gere ôaǃnâ. ǂGui xūnab ge ǁnāpa xu ge ǂan tsîb ge Elobmîs ǃnâ a xoamâisa aiǁgaude xūs tsîna ge ǁkhāǁkhāsen. Hebreǁî Xristena ǃoab ge xoa sîǂkhanis ǃnâb ge Pauluba ǁîna ge mîba în Jehovaba ge ǂgomǂgomsase gere ǃoaba khoen aiǁgaudi xa ǂâi. (Khomai re Hebreǁîn 11:32-34.) Gao-aob Davib ge a nē khoen di ǀgui. ǁÎb ge ǁîb khākhoen xa ǀgui ge mâǃoahe tama hâ i, xawe ǁîb ǀhō ge i khoen ǂûn xa gere mâǃoahe. Davib aiǁgausa da ra kē hîna da ge nî mû matib ge Apostel Pauluba ǀgaiba a hōsa Davib aiǁgaus xab ta ǂâi hîna tsî da ge sida tsîna nî mû mati da Pauluba a ǁgae ǁkhāsa.

11. Daviba tae-i ǃaroma ǂkhabusase gere mûsen? (Tsoatsoas ai hâ ai-īsiba mû re.)

¹¹ Davib ge Goliati mûǁae ǂkhabusase gere mûsen. Goliati ge Daviba mû o, ob ge ǁîba ge “ǃharaxū” ǁîb a kai, ǀgaisa tsî ǂgui torona a ǃkham xui-ao. Davib ge ge ǂkhamro i tsî toro ǃkhams xa xū-e ge ǀū i. Xaweb ge Daviba ǁîb ǂkhabusasiba ǀgaib ǃnâ ge dawa. ǁÎb ge Jehovab di huib ai ge ǂgomǃgâ hâ i tsî nē huib ǀkha ǁîb khākhoeba ge dan.—1Sam. 17:41-45, 50.

12. Daviba mâ ǃgomsina gere hōǃâ?

¹² Davib ge ǀnî hâ ǃgomsiba ge ūhâ i ǂkhabuǂâi kai bi gere ba. Davib ge ǂgomǂgomsase Jehovab xa ge ǁgaumâihe gao-aob Saula gere sîsenba. Gao-aob Sauli ge Daviba gere ǃgôa, xaweb ge Saula ēga ǀgapi ǂâixa tsî Daviba ge suri tsoatsoa. Sauli ge Daviba ǃgâi tamase gere hâ-ū tsî gere ǃgam bi ǂgao.—1Sam. 18:6-9, 29; 19:9-11.

13. Daviba tae-e gere dī gao-aob Sauli xab ge ǃgâise hâ-ūhe tama i o?

¹³ ǃGâi tamaseb ge hâ ūhe tama hâ i gao-aob Sauli xa, xaweb ge Daviba Jehovab ǂkhauhesa gao-aoba gere ǃgôa. (1Sam. 24:6) Davib ge Jehovaba ge ǂgari-am tama hâ i Sauli gere dī ǁgai xūn xa. Davib ge Jehovab ai ge re ǂgomaiǂnûi tsîb ge ǂhâb ge hâ i ǀgaiba ge hō nē ǃgomsib ǃnâ mâǀgaipesa.—Psa. 18:1.

14. Pauluba mâ ǃgomsina gere hoǃâ Davib tsîn ge ūhâ ina?

¹⁴ Apostel Paulub tsîn ge Davib ge ūhâ i ǃgomsiba gere hōǃâ. Paulub khākhoen  ge ǁîb xa ge ǀgaisa i. ǀGapi ǂgaeǂgui aogu xab ge ge ǃhui-e hâ i. ǀNî ǁaegu ai gu ge ǂnau kai bi tsî ǃkhosis ǃnâ gere aoǂgā bi. Davib khamib ge Pauluba ǃgâi tamase gere hâ-ūhe khoen hîna ga ǁîb di ǀhō hân xa. ǀNîn tsîn ge Xristeǁîn ǀhaohâb ǃnâ ǁîba gere mâǃoa. (2Kor. 12:11; Fil. 3:18) Xaweb ge Pauluba, ǁîba gere mâǃoan hoana ge dan. Matib ge nēsa dī? Aiǃgûb ge gere aoǁnâ sîsenni ǃnâ mâǃoaheb ta xawe tsîb ge ǁîb ǃgâsana ǃoa ǂgomǂgomsase ge hâ tsûtsû bin ge xawe. Hoan ǂamab ge Jehovab ǃoa ǂgomǂgomsase ge hâ ǁōb nîs kose. (2Tim. 4:8) ǁÎb ge nēn hoana ge dan, ǁîb ǀgaib aib ge ǂgomaiǂnûi tama i xaweb ge Jehovab ǀgaib ai a ǂgomaiǂnûi amaga.

15. Tae-e da ra ǁgūtsâ dīsa tsî nēsa da mati a dī ǁkhā?

¹⁵ Skol ǀhōsan, sîsenǁare-aon tamas ka i ǀhûǀguitimî-ao tama ǀaokhoen xa du ra ǃhōhe, tamas ka io ra mâǃoahe? ǀHaohâb ǃnâ du ge ǃgâsa i xa ǃgâi tamase hâ-ūhe? ǁNās ga ama o, Davib tsî Paulub tsîkha aiǁgaus xa ǂâi re. Sadu ge “ǂkhababa ǃgâib ǀkha” a dan ǁkhā. (Rom. 12:21) Mâǃoahe da ga o, o da ge Davib ge Goliati ǀkha a ǃkham khami ǃkham tama hâ xawe ta ge ǂkhababa ǃgâib ǀkha ra dan ǁîna Jehovab xa ǁkhāǁkhāsa. ǁNāsa da ge a dī ǁkhā ǁîn dîna Elobmîsa xu ǃereamsa, ǁîna ǃgôasiba ǁgau tsî ǁîn ǀkha tsamtsîǃnâ ǃgâi tamasen ga hâ-ū da xawe tsî ǃgâidī sida di khākhoena ǃoa.—Mat. 5:44; 1Pet. 3:15-17.

16-17. Pauluba tae-e ge ǀuru tama hâ i?

¹⁶ Apostel Paulub ge Xristub di saosabe kaib nîs aisi ǃgôasiba ge ūhâ tama hâ i ǂkhamkhoeba Xristub di saosabena ǃoa. (ǃNǃkh. 7:58; 1Tim. 1:13) Jesub ge Paulub ǀkha Saul tib ge ǀōn hâ i ǁaeb ai ǀhomma xu ǃhoa tsî ge mîba îb Xristeǁî ǀhaohâba ǃgôaǃgon ǀû tsî ge ǂgī kai bi. ǁKhawa mûs ǃgaob ge Pauluba ǁkhā khoen hînab ge re ǃgôaǃgonan ai huiba ga ǂgan hâs ge. ǃGamǃgamsenxasib ǀkhab  ge ǁîba saosabeb hîna Ananias di ǀon hâb xa ge hui-e tsî ǁkhawa ge mû tsoatsoa.—ǃNǃkh. 9:3-9, 17, 18.

¹⁷ Paulub ge ēga ge ǂansa i Xristeǁî ǀhaohâb ǃnâ xaweb ge tātsē Jesub xab ge ǁkhāǁkhāhe xū-e ǁnā Damaskus daob aib ge garu-i hîna ge ī-e ge ǀuru tama hâ i. ǁÎb ge gere ǃgamǃgamsen tsî ǃgâsan xab gere māhe huiba ge ūǃoa. ǁÎb ge ge mûǂan ǁîn ge ǁîba “ǁkhaeǂgaose iba i” ǃkhaisa.—Kol. 4:10, 11.

18. Tae-i xa da ǀnî ǁaegu ai nau khoena xu huiba ūǃoa ǂgao tama hâ?

¹⁸ Tae-e da Pauluba xu a ǁkhāǁkhāsen ǁkhā? Jehovab khoen ǀkha da ge ǀhûǀhao tsoatsoa o, o da ge gere mûǂan nau khoena xu da huiba ǂhâ hâsa gagasise da ge ǂkhabusa i amaga. (1Kor. 3:1, 2) O nēsis? Nēsi da ge Jehovaba kurina ǃoaba hâ tsî sida ǂansa omkhâi hâ tsî da ge huiba ūǃoa ǂgao tama hâ, ǃgōsase sida xa ǀoro kurina ǃoaba hâ khoe-e xu. Xaweb ge Jehovaba ǀnî ǁaegu ai ǃgâsana ra sîsen-u sida ǀgaiǀgaisa. (Rom. 1:11, 12) Jehovaba xu da ga ǀgaiba ǂhâba o, o da ge nî huiba sida di ǃgâsana xu ūǃoa.

19. Pauluba mati nēb ge dī ǃgâi xūn hoana ge dī ǁkhā ī?

¹⁹ Paulub ge ǂgui ǃgâi xūna ge dī Xristeǁî kaib ge o. Tae-i amsi? Paulub ge ge ǁkhāǁkhāsen ǃgâi xuna dīs sats di ǂurusib, skol ǂgâs, maris tamas ka i o khaoǃhūba xu hâ tama hâ ti, xawe ǃgamǃgamsensa xu tsî Jehovab ai ǂgomaiǂnûisa xu hâ. Hâ re i da hoa da Pauluba ǁgae tsî (1) Jehovab ai ǂgomaiǂnûi, (2) Elobmîs aiǁgaude xu ǁkhāǁkhāsen tsî (3) sida ǃgâsana xu huiba ūǃoa, tsî da ge matikōse da ga ǂkhabusase tsâ xawe Jehovab xa nî ǀgaiǀgaihe.