1. Mupostori Pauro waizivenyi?

MUPOSTORI Pauro, waizviziva kuti nguva jimweni, waijizwa wakaremba. Iyena wakatonanga kuti muviri wake ‘waipera’ zvokuti wainesehwa kuita zvakanaka. Cimwenizve, asipi nguva jese mukumbiro jake jaidavihwa mukuzwirana no zvaaida. (2 VaKorinto 4:16; 12:7-9; VaRoma 7:21-23) Pauro waizvizivazve kuti vavengi vake vaimuvona inga mundhu wakarembejeka. * Pikija no zvese izvi, Pauro aazivi kusiya kuti mavonero akashata o vandhu vamweni kana kuti kurembejeka kwake kumuite kuti ajizwe inga kuti aasisiri.​—2 VaKorinto 10:10-12, 17, 18.

2. Mukuzwirana no 2 VaKorinto 12:9, 10, ngocapi cijijo cikuru cakava na Pauro?

² Pauro wakajija ciro cinosisira maningi, cokuti mundhu angava wakavanga pikija paanojizwa akaremba. (Verenganyi 2 VaKorinto 12:9, 10.) Jehovha wakati kuna Pauro: “Simba rinotatijwa mu kurembejeka.” Izvi zvaireva kuti, Jehovha waizopa Pauro simba raainga acina. Pakutanga, ngatende tivone kuti ngenyi atidikani kuneseka vavengi vaedu pavanotishora.

3. Ngenyi tingadakara patinoshohwa?

³ Apana mundhu anodakarira kushohwa. Asi nguva jimweni vavengi vedu vanotinyangajisa. Kudari tikapsasika maningi  ngo zvavanovereketa, itusu tinocamwa. (Mazwi Akangwara 24:10) Waro tingahwisana kudini no kushohwa kwatinoitwa ngo vavengi vedu? Tingatevejera muezaniso wa Pauro, ngo ‘kudakara . . . mu kuxohwa.’ (2 VaKorinto 12:10) Ngenyi? Ngokuti kushohwa no kuteverehwa, zvinokhombija kuti tiri vajiji va Jesu. (1 Pedru 4:14) Jesu wainga wakavhunja vajiji vake kuti ivona vaizoteverehwa. (Johani 15:18-20) Ndizvona zvakaitika no Makristu okutanga. Pamukuvo wondhowo, vandhu vaitevejera mugariro wo Cigiriki, vaivona Makristu kuva akaremba no kuderera. Kuveni Vajudha, vaivona Makristu inga “vandhu vacikazivi kujija no varombo,” inga mupostori Pedhru na Johani. (Maitiro o Vapostori 4:13) Ivona avacaingwinira mu zvomatongehwe o nyika no kuita divi pa hondo. Makristu aacaireremejwa ngo vandhu mundharaundhemo.

4. Makristu okutanga akadavirisa kudini kushohwa kwaaiitwa ngo vavengi vavo?

⁴ Kunanga kuti Makristu o muzana ro kutanga, akasiya kuita basa ro kucumaera ngo ndava yo kushohwa ngo vavengi vavo? Aazivi. Inga muezaniso, mupostori Pedhru na Johani, vairangarira kuti, kuteverehwa ngo pamusoro pa Jesu no kucumaera zvaakajijisa zvainga rukujo. (Maitiro o Vapostori 4:18-21; 5:27-29, 40-42) Vajiji avacainga no thangwe ro kuva no nyowa. Pikija ivona avacaireremejwa, vakaita zvizinji kuti vabesere vamweni. Inga muezaniso, mabhuku akafemehwa akatahwa ngo Makristu amweni akhona, acandoenderera mberi ecibesera no kupa vetero ku zviuru zvo vandhu. Umambo hwovainga vacibhuya ndihwona, wari uri kutonga. Cimwenizve, sambiri pano hunozotonga nyika yese. (Mateu 24:14) Asi hutongi hwainga no simba hwo Roma yo kare hwaiteverera Makristu okutanga, hwakangarangara ko makore akati kuti. Asipi izvo basi: Vajiji vayani vakagondeka, wari vaamajimambo kudenga. Vavengi vese vavo vapera kufa. Cimwenizve, pikija vakazomuswepo, vanodikana kuzwira Umambo hwakacumaehwa ngo vandhu vavainyenyaya.​—Apokalipsi 5:10.

5. Mukuzwirana na Johani 15:19, ngenyi vandhu va Mwari avareremejwi ngo vandhu vamweni?

⁵ Nyamasi uno, vandhu vamweni avatireremeji zvokuti vanotishora. Ivona vanorangarira kuti vandhu va Jehovha vakarembejeka no kuderera. Ngenyi? Ngokuti atiiti zviro ngo manera anoita vandhu vakatitendeneja. Itusu tinovangisira kuti tive vandhu vanojidodokesa, vakapfava no kuzwira. Ngo divi rimweni, nyika inodakarira vandhu vanojikuja no vapandukuri. Kusiyapo izvo, itusu atiiti divi ro nyika. Cimwenizve, atingwiniri mu zvo hondo zvo nyika iriyese. Itusu takasiyana no vandhu vo munyika ino. Ngo iyo ndava, tinovoneka kuva vakaderera maningi kupinda vamweni.​—Verenganyi Johani 15:19; VaRoma 12:2.

6. Jehovha arikuitenyi ecishandisa vandhu vake?

⁶ Pikija zvinorangarihwa ngo vandhu ngo pamusoro pedu, Jehovha anotishandisa kuti tiite zviro zvinoshamaisa. Jehovha ecishandisa vandhu vake, ari kuita fafanya icizivi kumboitikazve panyika. Vashandiri vake nyamasi uno, vari kubudisa marevhista akasandhujwa anokovaniswa pasi pese. Cimwenizve, vanoshandisa Bhaibheri kuti vabesere mamirioni o vandhu kuti vawane upenyu hwakanaka. Anofanera kuashira rukujo pa zvese izvi, ndi Jehovha. Iyena anoshandisa cikwata co vandhu cinovoneka inga cakaremba kuti ciite mabasa akakura. Waro imwimwivo keni, kunanga kuti Jehovha angakwanisa kumubesera kuti muwanevo simba? Zvicinyi zvamunodikana kuita kuti muwane besero  ra Jehovha? Ngatende tivone zviro zvitatu zvatingajija ngo muezaniso wo mupostori Pauro.

7. Ngocapi ciro co kutanga catingajija ngo muezaniso wa Pauro?

⁷ Ciro cokutanga catingajija ngo muezaniso wa Pauro, nga ici: Kuti mushandire Jehovha, mucathemba simba renyu kana zvamunokwanisa kuita. Mukuvona ko vandhu, Pauro wainga no mathangwe aizoita kuti ajikuje no kujithemba. Iyena wakakurira Tarso, dhorobha guru ro porovhinsiya yo Roma. Tarso rainga riri dhorobha rakapfuma maningi, cimwenizve kwainga no maunivherisidhadhe aizivika maningi. Pauro wainga akajija maningi. Iyena wakajijiswa ngo mutungamiriri wo Cijudha waireremejwa maningi pa mukuvo wondhowo, waidanijwa Gamarieri. (Maitiro o Vapostori 5:34; 22:3) Painga pano mukuvo wokuti Pauro waisisira maningi kuno Vajudha. Iyena wakati: “Ndaikura mu uJuda, kupinda vandhu vo jinja rangu vainga vo ndanga yangu.” (VaGalàsia 1:13, 14; Maitiro o Vapostori 26:4) Asi Pauro aacaijithemba pacake.

8. Mukuzwirana na VaFilipi 3:8, Pauro waivona kudini zviro zvo nyika zve ngenyi “waidakara mukurembejeka”?

⁸ Pauro wakadakara ngo kusiya zvese sure, zvaimuita kuti vandhu vamuvone kuti waisisira maningi. Zvaivoniwa ngo vamweni kuti zvainga zvaushoni, Pauro waizvivona “inga psina.” (Verenganyi VaFilipi 3:8.) Pauro wakasongana no zvineso ngo kuva kwake muteveri wa Kristu. Wakatanga kunyenywa ngo jinja rake kamare. (Maitiro o Vapostori 23:12-14) Iyena wakatakwa no kufungihwa mukadheya ngo Varoma. (Maitiro o Vapostori 16:19-24, 37) Kusiyapo zvondhozvo, waidikana kuhwisana no kutama kukwana kwake. (VaRoma 7:21-25) Asi aazivi kutendera kuti kuremba kwake kana kuposa kwake kumurembese. Kusiyapo izvo, iyena “waidakara mukurembejeka.” Ngenyi? Ngokuti pamukuvo wese waaijizwa akaremba, waikwanisa kuvona simba ra Mwari recimubesera.​—2 VaKorinto 4:7; 12:10.

9. Tinodikana kujizwa kudini ngo zviro zvinotiita kuti tivoneke inga takaremba?

⁹ Kudari tecida kupuwa simba ndi Jehovha, ticarangarira kuti simba ratinaro, kujija kotakaita,  basa ratinoshanda kana dinyeru yatinayo ndizvona zvinovonesa kusisira kwedu. Andizvopi zvinotiita kuti tive vandhu vanodiwa ndi Jehovha. Zvokadi, pakati po vandhu va Mwari nyamasi uno, “Apana vazivi vazinji ngokuteveja undhu, nokuti vazinji vano simba, dangani vazinji vo nderemejo.” Kusiyapo zvondhozvo, Jehovha wakakheta kushandisa vaya “vakarembejeka pa nyasi po vandhu.” (1 VaKorinto 1:26, 27) Mucatendera kuti zvineso zvidokowane, zvimujamise kushandira Jehovha. Zvivonenyi inga mukana wo kuvona simba ra Jehovha mu upenyu hwenyu. Inga muezaniso, kudari imwimwi munothya waya vanohwisana no rutendo hwenyu, kumbiranyi Jehovha kuti amupe cicunge no kukwanisa kujivirira zvamunotenda. (VaEfeso 6:19, 20) Kudari muri kuhwisana no ndhendha icikarapiki, kumbiranyi Jehovha kuti amupe simba ro kuita zvamunokwanisa mu basa rake. Pamunovona Jehovha acidavira mukumbiro jenyu, rutendo hwenyu hunozovanga maningi.

10. Ngenyi zvinosisira kujija ngo muezaniso jo vandhu vakagondeka vo kare, inga vanonangwa pana Vaheberi 11:32-34?

¹⁰ Pauro waivona jijiso jo mu Matahwa kuva jinosisira maningi. Iyena wakajija maningi soko ra Mwari, cimwenizve wakajija zvizinji ngo muezaniso jo vashandiri va Jehovha vakagondeka. Pauro, paakatarira Makristu o Cihebheru, wakakumbira kuti ivona varangarire ngo muezaniso wakasiiwa ngo vashandiri va Jehovha vo kare. (Verenganyi Vaheberi 11:32-34.) Vonanyi muezaniso wa umwe wavo, Mambo Dhavhidhi. Kusiyapo kuhwisana no vavengi vake basi, iyena wakahwisana no vamweni vainga shamwari jake. Zvokadi, kurangarijisisa ngo muezaniso wa Dhavhidhi, kangaije zvakavangisa mupostori Pauro. Kuita zvondhozvo, zvingatibeseravo.

11. Ngenyi Dhavhidhi waivoneka kuva wakaremba mukuezanisira na Goriyati? (Vonanyi pikica yo pa kapa.)

¹¹ Kuna Goriyati, Dhavhidhi wainga mundhu wakaremba. Goriyati paakavona Dhavhidhi “wakamuxora.” Kunasa kunanga, Goriyati wainga mukuru maningi kunyisa Dhavhidhi, iyena wainga wakanasiririka kuti ahwe hondo. Dhavhidhi wainga acizivi kunasiririka kuti ahwe hondo ngokuti wainga aciri mujaha. Asi Dhavidhi wainga wakavanga. Iyena wakathemba Jehovha zve Jehovha wamupekeja simba raaida kuti akwanise kunyisa Goriyati.​—1 Samueli 17:41-45, 50.

12. Ngocapi cineso cimweni cakahwisana na Dhavhidhi?

¹² Dhavhidhi wakhwisana no cineso cimweni caizomuita kuti ajizwe akaremba. Iyena waishandira Sauri, Mambo wakazojwa ndi Mwari waitonga Iziraeri. Pakutanga Mambo Sauri waireremeja Dhavhidhi. Pakufamba ko mukuvo, Sauri wakava no thima na Dhavhidhi. Iyena wakatanga kutaja Dhavhidhi ngo njira yakashata, wotoeja kumuuraya.​—1 Samueli 18:6-9, 29; 19:9-12.

13. Dhavhidhi wakaitenyi paakashaishwa kutajwa ndi Mambo Sauri?

¹³ Pikija Dhavhidhi waishaishwa kutajwa ndi Mambo Sauri, iyena aazivi kuhwirijira ngo kuti Sauri wainga Mambo wakagajwa ndi Jehovha. (1 Samueli 24:7) Dhavhidhi aazivi kupumbha Mwari ngo zviro zvakashata zvaakaizihwa ndi Sauri. Kusiyapo zvondhozvo, Dhavhidhi wakathemba Jehovha kuti waizomupa simba raaida kuti akwanise kucungirira cinesoco.​—Nduyo 18:2, masoko o panyezuru po cipauko ici.

14. Pauro wakasongana no mugariro wapi wakatojana no wa Dhavhidhi?

¹⁴ Mupostori Pauro wakasonanga no mugariro wakafanana no wa Dhavhidhi. Vavengi va  Pauro vainga vakavanga maningi kupinda iyena. Vatungamiriri vazinji vaimunyenya. Kazinji, iyena wakatakwa wodihwa mukadheya. Inga ndi Dhavhidhi, Pauro wakashaishwa kutajwa nga vaya vadikana kuva shamwari jake. No vamweni mu ungano vakatomunyenyavo. (2 VaKorinto 12:11; VaFilipi 3:18) Zvese zvaiitwa ngo vandhu ava azvizivi kubudirira kuna Pauro. Kuitisa kudini? Iyena wakaenderera mberi ecicumaera pikija eciteverehwa. Iyena wakaenderera mberi wakagondeka kuno hama no hambzaji pikija pojaimunyangajisa. Pa zvese hazvo, iyena wakaenderera mberi wakagondeka kuna Mwari mbhera kufa kwake. (2 Timoti 4:8) Pauro wakanyisa zvineso zvikuru ngokuti aacaithemba simba rake, waithemba simba ra Jehovha.

15. Ngocapi cido cenyu? Mungaitisa kudini kuti mucikwanirise?

¹⁵ Imwimwivo keni, muri kushaishwa kutajwa ngo vadoni venyu vo kucikora, kubasa no ukama hwenyu ucikaripi Zvapupu zva Jehovha? Makamboshaishwa kutajwa ngo hama yo muungano? Kudari makambosongana no mugariro jatavhari kubhuya apa, ceujanyi muezaniso wa Dhavhidhi na Pauro. Imwimwi mungaenderera mberi mecinyisa “uxaixi ngo kuita bvauxoni.” (VaRoma 12:21) Cido cenyu asipi co kufura mundhu ngo buwe inga zvakaita Dhavhidhi. Mukusiyana, tinonyisa ushati ngo kubesera vandhu kuti vajije ngo pamusoro pa Jehovha mecishandisa Bhaibheri. Imwimwi mungakwanirisa zviro izvi ngo kuita zvinoteverari: Kushandisa Bhaibheri pamunonga mecidavira muvhunjo jo vandhu; kuva no nderemejo no kunaka mwoyo kwa vaya vacikatitaji ushoni no kuita zvakanaka ku vandhu vese kubatanijavo vavengi vedu.​—Mateu 5:44; 1 Pedru 3:15-17.

16-17. Zvicinyi zvicizivi kumbokanganika ndi Pauro?

¹⁶ Pauro acito aita mujiji wa Kristu wainga mujaha acikana nderemejo, waiteverera vajiji va Jesu. (Maitiro o Vapostori 7:58; 1 Timoti 1:13) Pauro pa ngari yaaizivika inga Sauro, waiita kuti Makristu o munguva yake agare ecitywa. Jesu naari kudenga wakabhuya na Pauro womuita bofu. Kuti avonezve, Pauro  waidikana kuwana besero ku vandhu vaaitevereraya. Iyena wakatendera besero ro mujiji anodanwa Ananiya, uwo wakamuita kuti avonezve.​—Maitiro o Vapostori 9:3-9, 17, 18.

¹⁷ Pakufamba ko nguva Pauro wakava anozivika maningi mu ungano yo Cikristu. Asi iyena aazivi kukanganya zvaakajijiswa ndi Jesu mugwanja acienda Dhamaseko. Iyena wakaenderera mberi ecijidodokesa no kutendera kubeswa ngo hama no hambzaji jo Cikristu. Pauro waiziva kuti ivona vainga vakamunyaraja.’​—VaKolosi 4:10, 11.

18. Ngenyi zvinganesa kutendera besero rovamweni?

¹⁸ Zvicinyi zvatingajija ndi Pauro? Zvingaita kuti potakatanga kujija cokwadi, taitendera besero ro vamweni. Taijizwa kuti tiri zvivana mu divi ro umwari, tainga tino zvizinji kuti tijijire. (1 VaKorinto 3:1, 2) Asi wari keni? Kunanga kuti wari ticiri kutendera besero ro vamweni pikija tino makore akawana kana toziva zvizinji? Kangaije wari zvinganesa maningi, maningi-ningi, kudari mundhu anotiparo besero aana makore mazinji naari mu cokwadi. Asi kazinji, Jehovha anoshandisa hama no hambzaji kuti atipe simba ratinoda. (VaRoma 1:11, 12) Kudari tinoda kuti Jehovha atipe simba, tinodikana kuceujira zvondhozvo.

19. Ngenyi Pauro wakakwanisa kuita zvizinji?

¹⁹ Pauro paakava Mukristu wakakwanisa kuita zvizinji. Ngenyi? Ngokuti iyena wakajija kuti kubudirira akuvii ngo pamusoro po simba ratinaro, kujija kotakaita, mare yatinayo kana basa ratinaro. Kubudirira kunowanika ngo kujidodokesa no kuthemba Jehovha. Ngo kudaro, tevejeranyi Pauro, (1) ngo kuthemba Jehovha, (2) ngo kujija ngo muezaniso jo mu Bhaibheri (3) ngo kutendera besero ro vamweni. Tikadaro, pikija patinojizwa takaremba, Jehovha angatibesera kuti tiwane simba!