1. Hadia nifaduhuʼö Waulo sanandrösa ba waʼaurinia samösa?

IFADUHUʼÖ sinenge sotöi Faulo wa itaria irasoi wa lö faʼabölönia. Ifaduhuʼö wa ”itugu tebai” mbotonia, irasoi wa abua khönia ba wamalua satulö, ba so ösa wangandrö nifaʼemania si lö mufondrondrongo Lowalangi, hewaʼae na no itötöna sibai daʼö. (2 Kor. 4:16; 12:7-9; Rom. 7:21-23) Ifatunö göi Faulo wa si lö faʼabölö ia ba wamaigi niha si fatuwu khönia. * Hizaʼi, hewaʼae na lö moʼahonoa ia ba oya wehede si lö sökhi nifaʼema niha böʼö sanandrösa khönia, lö itehegö fefu daʼö tobali dane-dane wa irasoi waʼide-ide dödö.​—2 Kor. 10:10-12, 17, 18.

2. Moloʼö 2 Korindro 12:9, 10, hadia wamahaʼö si tohude nisöndra Waulo?

² No ifahaʼö ia Faulo ba zi sambua famahaʼö si tohude: Tola abölö zi samösa niha hewaʼae na irasoi wa lö faʼabölönia. (Baso 2 Korindro 12:9, 10.) Ifatunö khö Waulo Yehowa wa faʼabölönia ’zamoʼahonoa faʼabölö’ Waulo. Eluahania, hasambalö ibeʼe Yehowa waʼabölö soguna khö Waulo. Si oföna, datafaigi hadia mbörö wa lö moguna ide-ide dödöda na so niha si fatuwu khöda sangoʼaya yaʼita.

3. Hana wa tola omuso dödöda na laʼoʼaya ita?

³ Lö hadöi ba gotaluada somasi laʼoʼaya. Hizaʼi, na laʼoʼaya ita ira niha si fatuwu khöda ba abao dödöda ba wehedera, tola manö ide-ide dödöda. (Gamd. 24:10) Na simanö, hewisa  zinangeania ita ba wanaögö fangoʼaya? Simane Faulo, tola ’omuso dödöda . . . me laʼoʼaya ita’. (2 Kor. 12:10) Hadia mbörö? Börö me fangoʼaya andrö zangoromaʼö wa yaʼita andre no soloʼö khö Yesu. (1 Fet. 4:14) Iwaʼö Yesu wa hasambalö göna folohi ndra soloʼö khönia. (Yoh. 15:18-20) No alua daʼö me abad siföföna. Me inötö daʼö, lawaʼö ira niha si no tedönisi ba lala wangera-ngera niha Yunani wa niha si lö faʼatua-tua ndra niha Keriso ba lö khöra faʼabölö. Ba ba gotalua niha Yahudi, lawaʼö wa niha Keriso andrö no ”niha si toʼölö manö ba si lö sekola”, simane sinenge sotöi Fetero hegöi Yohane. (Hal. 4:13) Ato zangumaʼö wa niha sambö faʼabölö ndra niha Keriso. Börö me lö fao ira ba politik andrö wa lö hadöi dadaomara ba wamatörö. Ba börö me lö omasi ira tobali saradadu, lö hadöi khöra faʼabölö ba wasuwöta mazui ba wolumöʼö faʼaurira. Daʼö fefu zi tobali dane-dane wa lö laʼosinangegö ira niha böʼö.

4. Hadia nifalua niha Keriso me abad siföföna me laʼoʼaya ira niha si fatuwu khöra?

⁴ Hadia tobali taha-taha khö ndra niha Keriso me abad siföföna börö me laʼoʼaya ira niha si fatuwu khöra? Löʼö. Duma-dumania, faduhu dödö Wetero hegöi Yohane wa na göna ira folohi börö me laʼoʼö Keriso ba lafahaʼö niha böʼö sanandrösa khönia, no töi si sökhi daʼö. (Hal. 4:18-21; 5:27-29, 40-42) Lö moguna aila ndra nifahaʼö Yesu. Ba gafuriata, abölö oya gamuata si sökhi nifaluara moroi ba nifalua niha si fatuwu khöra. Duma-dumania, so ösa ba gotalua niha Keriso andrö zanura Sura Niʼamoniʼö, si tobali fanolo ba sameʼe fanötöna ba niha si zuta faʼato. Baero daʼö, no tefasindro Wamatörö nituriaigöra andrö, ba lö ara tö mamatörö daʼö ba gulidanö. (Mat. 24:14) Na tafaehusi, no ara tedudugö wamatörö Romawi samakao niha Keriso me abad siföföna, hizaʼi, no tobali razo ba zorugo ndra nifahaʼö Keriso si lö faröi. No ahori mate fefu niha solohi niha Keriso me götö daʼö, ba na so nisusugi ba gotaluara, tobali ira dania ono mbanua ba Wamatörö nituriaigö niha Keriso si fatuwu ira ba zilalö.​—Fam. 5:10.

5. Moloʼö Yohane 15:19, hadia mbörö wa lö laʼosinangegö nono mbanua Lowalangi ira niha gulidanö andre?

⁵ Ba götöda iadaʼa, so ösa niha si lö mangosinangegö ba sangoʼaya ndra Samaduhuʼö Yehowa, börö me lawaʼö tödöra wa no niha si lö faʼatua-tua ita ba lö khöda faʼabölö. Hadia mbörö? Börö me faehu gamuatada ba gamuata niha si so ba zi fasuida. Niha ba gulidanö andre laʼokhögö mbua-bua fayawasa, faʼamuʼi, hegöi famadaö. Hizaʼi, taforege ba wangoromaʼö fangide-ngideʼö, falöʼalio mofönu, hegöi foloʼö. Baero daʼö, lö fao ita ba politik, ba lö omasi ita tobali saradadu. Börö me faehu ita moroi ba niha gulidanö, andrö wa lö laʼosinangegö ita.​—Baso Yohane 15:19; Rom. 12:2.

6. Hadia halöwö sahöli-höli dödö si tola lafalua iraono mbanua Yehowa börö wanolo moroi khö Lowalangi?

⁶ Hewaʼae na lö faʼabölöda ba wamaigi niha gulidanö, iʼogunaʼö ita Yehowa ba wamalua ngawalö zahöli-höli dödö. Iʼogunaʼö ita ba wamalua halöwö fanuriaigö sabölö ebua sagötö waö-waö waʼauri niha. Niha samosumange yaʼia ba götö iadaʼa, lafazökhi majalah sabölö oya mufoʼeluaha ba mufazaewe ba zi sagörö ulidanö. Laʼogunaʼö goi Zura Niʼamoniʼö ba wanolo niha si zuta faʼato enaʼö itugu sökhi waʼaurira. Yehowa zinangea musuno ba ngawalö zahöli-höli dödö si no mukhamö andre. Iʼogunaʼö nono mbanuania si lö faʼabölö ba wamaigi niha gulidanö, ba wamalua ngawalö halöwö sahöli-höli dödö. Hizaʼi, hewisa göi ita zamösana? Hadia tola iʼabölöʼö ita  Yehowa? Na tola, hadia zinangea tafalua ba wanemaʼö fanolonia? Datatutunö tölu ngawalö wamahaʼö si tola tahalö moroi ba duma-duma zinenge sotöi Faulo.

7. Hadia wamahaʼö si oföna si tola tahalö moroi ba duma-duma Waulo?

⁷ Sambua wamahaʼö si tola tahalö moroi ba duma-duma Waulo, yaʼia daʼö: Böi odaligö waʼabölöu mazui faʼonekheu samösa ba wamosumange Yehowa. Ba wamaigi niha, oya dane-dane niʼokhögö Waulo irege tola fayawa ia ba iʼodaligö waʼabölönia samösa. Teʼebuaʼö ia ba Dareso, ibu kota ba zi sambua provinsi Romawi. Banua si kayo Dareso, ba so ba daʼö sambua zekola salawa si tehöngö. Niha salawa sekola Waulo, ba no itema wamahaʼö moroi khö Gamalieli, samösa zondröniaʼö niha Yahudi sabölö mufosumange ba ginötö daʼö. (Hal. 5:34; 22:3) Baero daʼö, no niha si tohude göi Waulo ba gotalua niha Yahudi tanö böʼö. Imane, ”Ba agama Yahudi, abölö tohude ndraʼo ba zi fagölö döfi khögu hegöi si sambua soi khögu.” (Gal. 1:13, 14; Hal. 26:4) Hizaʼi, lö iʼodaligö waʼabölönia samösa Faulo.

8. Moloʼö Filifi 3:8, hewisa wamaigi Waulo ngawalö zi no iröi, ba hana wa ’omuso dödönia me ambö faʼabölönia’?

⁸ Si fao faʼaoha gölö, iröi Faulo fefu hadia ia zi tola möi famolakhöminia ba wamaigi niha. Ba gafuriata, aboto ba dödönia wa ”sasao” fefu daʼö. (Baso Filifi 3:8.) Oya wamakao nitaögö Waulo börö me tobali ia soloʼö Keriso. Fatuwu khönia ndra niha si fagölö soi khönia. (Hal. 23:12-14) Laböbözi göi ia ira niha Romawi ba labeʼe ia ba gurunga. (Hal. 16:19-24, 37) Baero daʼö, abua sibai khönia ba wamalua satulö börö walömoʼahonoania. (Rom. 7:21-25) Hewaʼae na itaögö wamakao, lö iböhöli ba woloʼö Keriso. Hizaʼi, ’omuso dödönia me ambö faʼabölönia’. Hadia mbörö? Börö me ba ginötö irasoi wa ambö faʼabölönia, ba daʼö iʼila hewisa wanolo Lowalangi yaʼia.​—2 Kor. 4:7; 12:10.

9. Hadia lala wangera-ngera sinangeania taʼokhögö ba ginötö tarasoi wa lö faʼabölöda?

⁹ Na omasi tatema waʼabölö moroi khö Yehowa, böi so ba gera-erada wa faʼabölö  mbotoda, faʼalawa zekolada, si toʼölö mufalua ba mbanuada, mazui faʼakayo niʼokhögöda, zotatugöi hawaʼebua mbölida ba wamaigi Lowalangi. Tenga daʼö mbörö wa moguna ita khö Yehowa. Sindruhunia, ba gotalua nono mbanua Lowalangi, ”lö ato zatua-tua moloʼö famaigi niha, lö ato zabölö ba lö ato zi otarai ba nösi nomo si tehöngö”. (1 Kor. 1:26, 27) Börö daʼö, böi tehegö fefu daʼö tobali taha-tahamö ba wamosumange Yehowa. Hizaʼi, moguna öʼokhögö lala wangera-ngera si tefaudu, wa daʼö zameʼe khöu inötö ba wangiʼila hewisa wameʼe Yehowa khöu faʼabölö. Duma-dumania, na ataʼu ndraʼugö ba niha sangobousi famatimö, angandrö khö Yehowa enaʼö ibeʼe khöu waʼabarani ba wanutunö zi no öfaduhusi tödö. (Ef. 6:19, 20) Ba ginötö ötaögö wökhö sabölö-bölö, andrö khö Yehowa ba wameʼe khöu faʼabölö enaʼö lö aetu owölö-ölö ndraʼugö ba wamalua halöwö ba wamati. Ero na öʼila wa itolo ndraʼugö Yehowa, itegu tedou wamatimö ba itugu abölö ndraʼugö.

10. Hana wa moguna tafahaʼö ita moroi ba duma-duma niha si lö faröi si no tesura ba Zura Niʼamoniʼö, simane nitutunö ba Heberaiʼo 11:32-34?

¹⁰ Iforege sibai Faulo ba wamahaʼö yaʼia ba Zura Niʼamoniʼö. Oya zindruhu nifahaʼönia yaʼia, ba oya göi wamahaʼö nihalönia moroi ba duma-duma niha si no tesura ba Daromali Lowalangi. Me isura zura ba niha Keriso Heberaiʼo, iʼandrö khöra Faulo enaʼö laʼangeragö göi duma-duma simane daʼö. (Baso Heberaiʼo 11:32-34.) Nehegö duma-duma Razo Dawido, samösa ba gotalua niha samosumange Lowalangi. Tenga ha ira udunia zi fatuwu khönia, hizaʼi fatuwu göi khönia niha si no irai fahuwu khönia. Na tanehegö duma-duma Dawido, tola aboto ba dödöda hadia mbua nitema Waulo me iʼangeragö duma-duma Dawido, ba tola göi taʼila hadia wamahaʼö si tola tahalö moroi khö Waulo.

11. Hadia mbörö wa hulö zi lö faʼabölö Dawido? (Faigi gambara ba guli majalah.)

¹¹ No niha si lö faʼabölö Dawido ba wamaigi Goliato, samösa zaradadu sabölö. Me iʼila Dawido andrö Goliato, ”iʼositengagö” Dawido, börö me abölö ebua mbotonia, oya wakake wasuwöta niʼokhögönia, ba no tefomaha ia ba wasuwöta. Ha ono matua side-ide Dawido, lö toʼölö ia fasuwö, ba lö iʼokhögö wakake wasuwöta. Hizaʼi, abölö Dawido hewaʼae na hulö zi lö faʼabölö ia. Iʼodaligö waʼabölö moroi khö Yehowa ba ikalaisi nudunia.​—1 Zam. 17:41-45, 50.

12. Hadia gabula dödö tanö böʼö nitaögö Dawido?

¹² So gabula dödö tanö böʼö nitaögö Dawido, irege irasoi wa hulö zi lö faʼabölönia. Si fao faʼalöfaröi, mangai halöwö Dawido khö Zaulo, samösa niha si no ifili Yehowa tobali razo ndraono Gizaraʼeli. Ba wamobörö, iʼosinangegö Dawido andrö Saulo. Hizaʼi ba gafuriatania, so wayawasa khö Zaulo irege afökhö dödönia khö Dawido. Ifalua zi lö sökhi khö Dawido, ba itandraigö ba wamunu yaʼia.​—1 Zam. 18:6-9, 29; 19:9-11.

13. Hadia nifalua Dawido ba wanaögö amuata si lö sökhi nifalua Razo Saulo khönia?

¹³ Börö me Yehowa zamataro Saulo tobali razo, lö aetu ifosumange ia Dawido hewaʼae na ifalua khönia zi lö atulö. (1 Zam. 24:6) Lö fatahi Dawido khö Yehowa ba ngawalö gamuata si lö sökhi nifalua Zaulo khönia. Hizaʼi, iʼodaligö Yehowa ba wameʼe khönia faʼabölö ba wanaögö fanandraigö andrö.​—Zin. 18:2.

14. Hadia zalua khö Waulo si fakhili ba zalua khö Dawido?

¹⁴ Alua göi khö Waulo gabula dödö si  fakhili ba zalua khö Dawido. Abölö nudu Waulo moroi khönia. Ato niha sangokhögö kuaso zi fatuwu khönia. Asese laböbözi ia ba labeʼe ia ba gurunga. Simane Dawido, itaögö göi Faulo gamuata si lö sökhi nifalua niha böʼö. Baero daʼö, so ösa ndra talifusönia ba mbanua niha Keriso si fatuwu khönia. (2 Kor. 12:11; Fil. 3:18) Hizaʼi, tola itaögö Faulo fefu wanandraigö nifalua niha si fatuwu khönia. Hadia mbörö? Lö iböhöli wanuriaigö, hewaʼae na göna ia folohi. Lö faröi ia khö ndra talifusönia hewaʼae na lafalua gamuata sangafökhöiʼö tödönia. Ba sabölö tohude, lö faröi ia khö Lowalangi sandrohu faʼaurinia. (2 Tim. 4:8) Tola itaögö fefu daʼö, tenga börö waʼabölö mbotonia, hizaʼi börö me iʼodaligö Yehowa.

15. Hadia gohitö dödöda, ba hewisa lalada ba wamalua daʼö?

¹⁵ Hadia ötaögö wangoʼaya mazui folohi moroi khö ndra awöu ba zekola, awöu wohalöwö, mazui ba nösi nomou si tenga Samaduhuʼö Yehowa? Hadia so niha ba mbanua niha Keriso si no irai mamalua khöu si lö sökhi? Na daʼö zalua khömö, törö tödömö duma-duma Dawido hegöi Faulo. Tola ’ökalaisi zi lö sökhi faoma si sökhi’. (Rom. 12:21) Sindruhu sa, lö faʼudu ita ba niha si fatuwu khöda, lö faʼudu ita khöra simane nifalua Dawido khö Goliato. Hizaʼi, tola takalaisi zi lö sökhi na taforege ba wamahaʼö niha böʼö sanandrösa khö Yehowa hegöi ba Zura Niʼamoniʼö. Tola öfalua daʼö na öʼodaligö Zura Niʼamoniʼö ba wameʼe fanema li ba wanofu-nofu nifaʼema niha, öʼosinangegö niha samalua khöu si lö sökhi, ba öfalua gamuata si sökhi ba niha fefu hegöi ba niha soʼuduni yaʼugö.​—Mat. 5:44; 1 Fet. 3:15-17.

16-17. Hadia zi lö irai iʼolifugö Faulo?

¹⁶ Fatua lö tobali soloʼö Keriso Waulo, yaʼia andrö samösa ira matua sawuyu-wuyu si lö sökhi amuata, ba solohi ndra nifahaʼö Yesu. (Hal. 7:58; 1 Tim. 1:13) Itenawa ia Yesu enaʼö lö saʼae ifakao ndra niha Keriso. Mohede Yesu khö Waulo moroi ba zorugo, ba auʼa ia. Enaʼö tola ifuli iʼila niha, moguna  iʼandrö wanolo moroi ba niha si no irai ifakao. Si fao fangide-ngideʼö, itema wanolo moroi khö zi samösa niha Keriso sotöi Anania enaʼö tola ifuli iʼila niha.​—Hal. 9:3-9, 17, 18.

¹⁷ Ba gafuriata, tobali niha si tehöngö Waulo ba mbanua niha Keriso, hizaʼi lö irai iʼolifugö wamahaʼö nitemania moroi khö Yesu me so ia ba lala si numalö Ndramaseko. Lö tebulö iʼokhögö wangide-ngideʼö, ba itemaʼö wanolo moroi khö ndra talifusönia. Ifaduhuʼö wa no tobali ira ’umbu wondrara dödö’ khönia.​—Kol. 4:10, 11.

18. Hana wa tola manö lö omasi ita tatema wanolo moroi ba niha böʼö?

¹⁸ Hadia wamahaʼö si tola tahalö moroi khö Waulo? Me awena sibai tafahaʼö ita ba zindruhu, te omasi ita na latolo ita niha böʼö, börö me taʼila wa oya nasa zinangea tafahaʼö yaʼita. (1 Kor. 3:1, 2) Hizaʼi, hewisa ita iadaʼa? Na no tafosumange Yehowa ba zi hauga fakhe faʼara ba no oya zi no irai tatörö, tola manö ambö omasi ita ba wanemaʼö fanolo, mendrua manö na abölö ara ita ba zindruhu moroi ba niha daʼö. Hizaʼi, asese iʼogunaʼö ndra talifusöda Yehowa ba wangabölöʼö yaʼita. (Rom. 1:11, 12) Börö daʼö, na omasi ita tatema waʼabölö moroi khö Yehowa, moguna tatema wanolo moroi khö ndra talifusöda.

19. Hana wa tola mofozu waʼauri Waulo?

¹⁹ Oya sibai zahöli-höli dödö nifalua Waulo me no tobali ia niha Keriso. Hadia mbörö? Börö me no ifahaʼö ia wa faʼamofozu waʼauri zi samösa niha, lö teʼodaligö daʼö moloʼö faʼabölö mbotonia, faʼalawa zekola, faʼakayo, hegöi si toʼölö mufalua ba zi sambua banua, hizaʼi moloʼö fangide-ngideʼö hegöi fangodaligönia Yehowa. Dataʼoʼö duma-duma Waulo (1) ba wangodaligö Yehowa, (2) ba wangai famahaʼö moroi ba duma-duma si so ba Zura Niʼamoniʼö, hegöi (3) ba wanemaʼö fanolo moroi khö ndra talifusöda ba wamati. Na tafalua daʼö, hasambalö iʼabölöʼö ita Yehowa ba ginötö tarasoi wa lö faʼabölöda!