1. Entumwa Paulo akaikiriza ki butunu?

ENTUMWA Paulo akaikiriza ngu obumwe akaba naaba omweremwa. Akagira ngu omubiri gwe gukaba ‘niguhwaho,’ ekirikumanyisa ngu akaba naagumirwa kukora ekihikire, kandi ngu Yehova obumwe akaba atarikugarukamu okushaba kwe omu muringo ogu arikuteekateeka. (2 Kor. 4:16; 12:7-9; Rom. 7:21-23) Kandi akaba naamanya ngu abarikumuhakanisa nibamureeba nk’omweremwa. * Kwonka taraikiriize emiteekateekyere egwire y’abandi nari obweremwa bwe kumureetera kwehurira nk’otaine mugasho.​—2 Kor. 10:10-12, 17, 18.

2. Kurugiirira aha 2 Abakorinso 12:9, 10, Paulo akeega eishomo ki erikuru?

² Paulo akeega eishomo rikuru ngu omuntu naabaasa kugira amaani n’obu yaakuba naahurira aine obweremwa. (Shoma 2 Abakorinso 12:9, 10.) Yehova akagambira Paulo ngu amaani ge ‘nigahikiirizibwa omu bweremwa,’ ekirikumanyisa ngu Paulo ku yaabaire aburwa amaani, Yehova akaba agamuha. Okubanza, ka tureebe ahabw’enki tutashemereire kuguubwa kubi abazigu baitu baatujuma.

3. Ahabw’enki turikubaasa kushemererwa twaba nitujumwa?

³ Tihaine n’omwe ahariitwe orikukunda kujumwa. Kwonka, abazigu baitu baatujuma reero tukata omutima munonga aha bigambo byabo, nitubaasa kuhwamu amaani. (Enf. 24:10) Mbwenu shi tushemereire kureeba tuta ebijumo by’abazigu  baitu? Nka Paulo, nitubaasa ‘kushemererwa omu kujumwa.’ (2 Kor. 12:10) Ahabw’enki? Ahabw’okugira ngu okujumwa n’okuhiiganisibwa n’obumanyiso oburikworeka ngu turi abeegi ba Yesu ab’amazima. (1 Pet. 4:14) Yesu akagira ngu abakuratsi be bakaba nibaija kuhiiganisibwa. (Yoh. 15:18-20) Nikwo kyabaire omu kyasha ky’okubanza. Omu bwire obwo, abaabaire bahabisiibwe emiteekateekyere y’Abagriika bakaba nibareeba Abakristaayo nk’abataine bwengye kandi ab’ahansi. Kandi Abayudaaya abamwe bakaba nibatwara Abakristaayo nk’abantu “babisi abateegyesiibwe,” nk’oku baagambire aha ntumwa Petero na Yohaana. (Byak. 4:13) Abakristaayo bakaba nibareebeka nk’abatari b’amaani ahabw’okuteejumba omu by’obutegyeki nari kuza omu mahe kwerwanaho, kyabareetera kuharanwa abatuuzi bagyenzi baabo.

4. Abakristaayo omu kyasha ky’okubanza bakatwaza bata abazigu baabo ku baabagizireho emiteekateekyere etahikire?

⁴ Mbwenu shi Abakristaayo aba bakaikiriza emiteekateekyere egwire y’abazigu baabo kubaremesa? Ngaaha. Nk’eky’okureeberaho, entumwa Petero na Yohaana, bakakireeba nk’ekitiinisa kuhiiganisibwa ahabw’okuba abakuratsi ba Yesu n’okwegyesa abandi enyegyesa ze. (Byak. 4:18-21; 5:27-29, 40-42) Hakaba hatariho nshonga yoona erikureetera abeegi ba Yesu kuhemuka. N’ekyarugiremu, Abakristaayo b’omu kyasha ky’okubanza abacureezi bakakorera abantu ebirungi bingi kukira ebi abahakanisa baakozire. Nk’eky’okureeberaho, ebitabo ebi Ruhanga yaahweraire bamwe aha Bakristaayo abo kuhandiika, nibigumizamu kuhwera obukaikuru bw’abantu n’okubaha amatsiko. Kandi Obukama obu baabaire nibashagika na hati bukiriho, kandi buri haihi kutegyeka abantu boona. (Mat. 24:14) Kwonka kyo ekibiina ky’obutegyeki eky’amaani ekyahiiganiise Abakristaayo kikacwekyerezibwa kare, hati n’ekitebyo, beitu abeegi ba Yesu bo abaagumire bari abeesigwa hati n’abagabe omu iguru. Kwonka abazigu baabo, bakafa kandi ku baraatungye omugisha gw’okuzooka nibaija kutegyekwa Obukama obwabaire nibushagikwa Abakristaayo abu baabaire nibanga.​—Kush. 5:10.

5. Kurugiirira ahari Yohaana 15:19, ahabw’enki Abajurizi ba Yehova nibagaywa?

⁵ Obunaku obu obumwe abantu nibagaya Abajurizi ba Yehova, kandi nibatureeba nk’abataine bwengye n’amaani. Ahabw’enki? Ahabw’okugira ngu titurikwikiriza emiteekateekyere y’abantu b’ekicweka kyaitu. Nituteeraho kuba abacureezi, kandi abarikworoba. Kwonka abantu b’ensi bo, nibakunda abarikwetunguura, ab’amaryo, kandi abagomi. Kandi, titurikwejumba omu by’obutegyeki n’okuza omu mahe g’eihanga. Nitutaana aha bantu b’ensi, n’ahabw’ekyo nibatureeba nk’ab’ahansi.​—Shoma Yohaana 15:19; Rom. 12:2.

6. Yehova naabaasisa abaheereza be kukora ki?

⁶ Oyihireho oku abantu barikututwara, Yehova we naatuhwera kukora ebintu by’omutaano. Naatuhwera kwejumbira kimwe omu hururu y’okubuurira erikukirayo omu byafaayo by’abantu. Abaheereza be nibashohoza magaziini ezirikukirayo kuvunuurwa n’okujanjaazibwa omu nsi yoona, kandi nibakoresa Baibuli kuhwera obukaikuru bw’abantu kugira embeera nungi. Ebi byona Yehova niwe arikubibaasisa kubaho, arikukoresa abantu abarikureebeka nk’abataine maani kukora emirimo y’amaani egi. Kandi shi buri omwe ahariitwe? Yehova naabaasa kukuhwera kuba ow’amaani? Ku kiraabe kiri kityo, oine kukora ki kutunga obuhwezi bwe? Hati ka tushwijume ebintu bishatu ebi buri omwe ahariitwe arikubaasa kwegyera aha ntumwa Paulo.

7. Ni ishomo ki eri turikubaasa kwegyera ahari Paulo?

⁷ Eishomo rimwe eri turikubaasa kwegyera ahari Paulo n’eri: Oteegamira aha maani gaawe nari okubaasa kwawe omu kuheereza Yehova. Kurugiirira aha ndeeba y’obuntu, Paulo akaba aine enshonga ehikire eyaabaire neebaasa kumureetera kwetunguura, n’okweyesiga. Akakurira Taruso, orurembo rukuru omu butware bwa Rooma. Taruso rukaba nirumanywa nk’orurembo rw’eby’obushuubuzi n’obwegyese bw’ahaiguru. Paulo akaba ashomire gye, ayegyesiibwe Omuyudaaya orikuheebwa ekitiinisa ky’amaani orikwetwa Gamalieli. (Byak. 5:34; 22:3) Kandi Paulo akabaho omuntu w’amaani omu Bayudaaya. Akagira ati: “Nkahingurana omu diini y’Abayudaaya, n’okukira naakira baingi abu naanyetsire nabo omu ihanga ryangye.” (Gal. 1:13, 14; Byak. 26:4) Kwonka Paulo tarayegamiire aha kubaasa kwe.

8. Kurugiirira aha Abafilipi 3:8, Paulo akareeba ata ebintu ebi yaabaire atsigire enyima, kandi ahabw’enki yaabaire ‘naashemererwa omu bweremwa’?

⁸ Paulo akashemererwa kureka ebintu ebyamuhindwire ow’amaani kurugiirira aha mitindo y’ensi. Nangwa ebintu ebyabaire nibireebeka nk’eby’omugasho ebi yaabaire aine akabireeba “nk’eshaabo.” (Shoma Abafilipi 3:8.) Paulo akaraba omu mbeera zigumire kubaasa kuba omukuratsi wa Kristo. Akaba naayangwa abantu b’eihanga rye. (Byak. 23:12-14) Kandi bagyenzi be Abarooma bakamuteera baamuta n’omu kihome. (Byak. 16:19-24, 37) Kandi akaba naagumirwa kukora ekihikire ahabw’obweremwa bwe nk’omuntu. (Rom. 7:21-25) Kwonka omu mwanya gw’okwikiriza abahakanisa be nari obweremwa bwe kumuremesa, akaba ‘naashemererwa omu bweremwa.’ Ahabw’enki? Ahakuba ku yaabaire aba ari omweremwa nibwo yaabaire areeba oku amaani ga Ruhanga garikumuhwera.​—2 Kor. 4:7; 12:10.

9. Tushemereire kureeba tuta embeera zaitu ezirikureebeka nka mbi?

⁹ Twaba nitwenda kutunga amaani kuruga ahari Yehova, titwine kuteekateeka ngu amaani gaitu, obwegyese, obukomooko, nari obugaiga nibitureetera kuba ab’omuhendo. Ebintu ebi tibyo birikureetera Yehova kutureeba  nk’ab’omugasho. Nangwa, ti baingi aha baheereza ba Ruhanga “abaine obwengye bw’ensi egi,” nari “ab’ekitiinisa” nari abaine obuzaarwa bw’ekitiinisa. Omu mwanya gw’ekyo, Yehova “akatoorana ebitaine maani” omu nsi. (1 Kor. 1:26, 27) N’ahabw’ekyo toshemereire kwikiriza embeera ezirikureebeka nka mbi kukuremesa kuheereza Yehova. Omu mwanya gw’ekyo, zireebe nk’omugisha kureeba amaani ga Yehova nigakorera omuriiwe. Nk’eky’okureeberaho, waaba nootiina abarikukureetera kubangaanisa aha bi orikwikiriza, shaba Yehova kukuha obumanzi waaba noojuririra okwikiriza kwawe. (Efe. 6:19, 20) Waaba nooteganisibwa endwara etarikurahuka kukira, shaba Yehova kukuha amaani agarikwetengyesa kugumizamu nooyejumbira kimwe omu buheereza. Buri murundi ogu orikureeba oku Yehova arikukuhwera, okwikiriza kwawe ni kukura kandi kuhama.

10. Ahabw’enki twine kushwijuma ebirikukwata aha baheereza ba Yehova abeesigwa, nk’abo abarikugambwaho omu Abaheburaayo 11:32-34?

¹⁰ Paulo akaba ari omwegi murungi w’Ebyahandiikirwe. Akeega enshonga nyingi ez’amazima, kwonka akeegyera n’aha bantu abarikugambwaho omu Kigambo kya Ruhanga. Obu Paulo yaahandiikira Abakristaayo Abaheburaayo, akabashaba kuteekateeka aha baheereza ba Yehova aba ira. (Shoma Abaheburaayo 11:32-34.) Yetegyereze omwe aharibo, Omugabe Daudi. Akaba aine kugumira okuhiiganisibwa kutari kw’abazigu be bonka, beitu n’okw’abaabaire bari banywani be obunaku obwo. Twaba nitushwijuma ebirikukwata ahari Daudi, nitwija kureeba oku Paulo ashemereire kuba yaatungire amaani kuruga aha byahikire ahari Daudi, naitwe oku turikubaasa kutooreza Paulo.

11. Ahabw’enki Daudi yaabaire naareebeka nk’otaine maani? (Reeba ekishushani ekiri aha kipampagare.)

¹¹ Goliasi omurwani rugambwa akaba naareeba Daudi nk’otaine maani. Ku yaareebire Daudi, ‘akamugaya.’ Ahakuba Goliasi akaba ari muhango, aine eby’okurwanisa by’amaani, kandi ari omurwani otendekirwe. Beitu Daudi akaba ataine buhangu bwona, kandi ataine n’eby’okurwanisa by’amaani. Kwonka Daudi, obwabaire nibureebeka nk’obweremwa akabuhinduramu amaani. Akeesiga Yehova kumuha amaani, kandi akasingura omuzigu we.​—1 Sam. 17:41-45, 50.

12. Daudi akaba aine mbeera ki endiijo egumire?

¹² Daudi akaba aine embeera endiijo egumire eyaabaire neebaasa kumumaramu amaani. Akaba naashagika Saulo ou Yehova yaabaire atooraine kuba omugabe wa Israeli. Omugabe Saulo omu kubanza akaba naaha Daudi ekitiinisa. Bwanyima, omwetunguuro gukamureetera kugirira Daudi eihari. Saulo akatwariza kubi Daudi, nangwa yaayenda n’okumwita.​—1 Sam. 18:6-9, 29; 19:9-11.

13. Daudi akakora ki obu Omugabe Saulo yaabaire naamutwariza kubi?

¹³ Oyihireho omuringo mubi ogu Omugabe Saulo yaatwariizemu Daudi, we Daudi akaguma naamuha ekitiinisa. (1 Sam. 24:6) Daudi tarataire ahari Yehova orubanja ahabw’ebintu bibi ebi Saulo yaabaire naakora. Kureka, Daudi akeesiga Yehova kumuha amaani agarikwetengyesa kwemera okugyezibwa kugumire okwo.​—Zab. 18:1, omutwe gw’eshuura egyo.

14. Entumwa Paulo akahikwaho mbeera ki eyaabaire neeshushana n’eya Daudi?

¹⁴ N’entumwa Paulo akahikwaho embeera nk’eya Daudi. Abazigu ba Paulo bakaba baine amaani maingi kumukira. Abategyeki rugambwa omu bwire bwe bakaba nibamwanga. Obumwe, bakaba bamuteera kandi bamuta omu kihome. Nka Daudi, abantu abaabaire  baine kuba banywani ba Paulo nibo baamutwariize kubi. Nangwa na bamwe omu kibiina Ekikristaayo bakamuhakanisa. (2 Kor. 12:11; Fil. 3:18) Kwonka Paulo akasingura boona abaabaire nibamurwanisa. Mu muringo ki? Akagumizamu naabuurira n’obu araabe yaabaire naahakanisibwa. Akaguma ahamiire aha b’eishe-emwe na banyaanya n’obu obumwe baabaire bamureebya. Kandi okukira byona, akaba ari omwesigwa ahari Ruhanga kuhitsya aha kufa kwe. (2 Tim. 4:8) Akasingura okuhakanisibwa kw’amaani, tihabw’okugira ngu akaba aine amaani, kureka akaba naayesiga Yehova.

15. Ekigyendererwa kyaitu niki, kandi nitubaasa kukihikaho tuta?

¹⁵ Obumwe nooteganisibwa abu orikwega nabo, abu orikukora nabo, nari abanyabuzaare abatari Bajurizi ba Yehova? Haine orakutwariizeho kubi omu kibiina? Ku kiraabe nikwo kiri, ijuka ebyahikire ahari Daudi na Paulo. Noobaasa kugumizamu ‘ekibi orikukisinguza ekirungi.’ (Rom. 12:21) Ekigyendererwa kyawe tikuteera omuntu eibaare ry’enjungu omu mutwe nk’oku Daudi yaakozire, beitu n’okuhwera abantu kwega ebirikukwata ahari Ruhanga ebiri omu Kigambo kye. Noobaasa kuhika aha kigyendererwa ekyo orikugarukamu ebibuuzo by’abantu orikukoresa Baibuli, orikutwariza gye abarikukutwariza kubi, kandi orikukorera gye boona otwariiremu n’abazigu baawe.​—Mat. 5:44; 1 Pet. 3:15-17.

16-17. Niki eki Paulo atarayebirwe?

¹⁶ Entumwa Paulo atakahindukire omwegi wa Kristo, akaba ari omushaija enshaarizi owaabaire naahiiganisa abakuratsi ba Yesu. (Byak. 7:58; 1 Tim. 1:13) Omu bwire obwo Paulo owaabaire naamanywa nka Saulo, Yesu akamuzibira kugumizamu naateganisa ekibiina Ekikristaayo. Yesu akagamba na Paulo arikwema omu iguru yaamuhumya n’amaisho. Paulo kubaasa kuhumuuka, akagyemeserezibwa kushaba obuhwezi abantu abu yaabaire naahiiganisa. Akaba omucureezi yaikiriza kuhwerwa omwegi wa Yesu orikwetwa Anania owaamuhweraire kuhumuuka.​—Byak. 9:3-9, 17, 18.

 ¹⁷ Bwanyima Paulo akaba omwe aha b’ekibiina Ekikristaayo rurangaanwa, kwonka tarayebirwe eishomo eri Yesu yaamwegyeise aha ruguuto orurikuza Damasiko. Paulo akaguma ari omucureezi, kandi akaikiriza obuhwezi obu ab’eishe-emwe na banyaanya baamuhaire. Akamanya ngu bakaba ‘nibamuhuumuriza.’​—Kol. 4:10, 11.

18. Ahabw’enki obumwe nitweziringa kwikiriza obuhwezi bw’abandi?

¹⁸ Nitubaasa kwegyera ki ahari Paulo? Obu twatandika kukwatanisa n’abaheereza ba Yehova, nitubaasa kuba twabaire tweteekateekire kwikiriza obuhwezi bw’abandi, turikumanya ngu tukiri bato omu by’omwoyo, kandi tukiine bingi by’okwega. (1 Kor. 3:1, 2) Kandi shi hati? Twaba tuheereize Yehova kumara emyaka mingi kandi turikumanya bingi, nitubaasa kwanga obuhwezi, na munonga bwaba niburuga aha muntu omazire emyaka mikye omu mazima. Kwonka, Yehova obwire obwingi naakoresa ab’eishe-emwe na banyaanyazi-itwe kutugaruramu amaani. (Rom. 1:11, 12) Twine kumanya amazima aga kandi tukagaikiriza twaba nitwenda kutunga amaani ga Yehova.

19. Ahabw’enki Paulo yaabaire omusinguzi?

¹⁹ Paulo bwanyima y’okuba Omukristaayo akakora ebintu bimwe eby’amaani. Ahabw’enki? Ahakuba akeega ngu obusinguzi tiburikurugiirira aha maani g’omuntu, obwegyese, obugaiga, nari obukomooko, beitu aha bucureezi n’okwesiga Yehova. Twena ka tuteereho kutooreza Paulo (1) turikwesiga Yehova, (2) turikwegyera aha barikugambwaho omu Baibuli, (3) kandi turikwikiriza obuhwezi bw’ab’eishe-emwe bagyenzi baitu. Reero obwo, n’obu twakuba twine amaani makye munonga, Yehova naija kutuhindura ab’amaani munonga!