1. Antoy inamin nen apostol Pablo?

INAMIN nen apostol Pablo ya no maminsan et sikatoy onkakapuy. Imbaga to ya ‘onkakapuy so laman to,’ naiirapan ya gawaen no antoy duga, tan aglanang ya eebatan nen Jehova iray pikakasi to diad paraan ya labay to. (2 Cor. 4:16; 12:7-9; Roma 7:21-23) Imbaga met nen apostol Pablo ya makapuy * so pakanengneng ed sikato na arum. Balet agtinmundan nanlingkor si Pablo anggano babalawen na arum tan wala ray kakapuyan to.​—2 Cor. 10:10-12, 17, 18.

2. Base ed 2 Corinto 12:9, 10, antoy importantin naaralan nen apostol Pablo?

² Antoy importantin naaralan nen Pablo? Naaralan to ya sarag na sakey so magmaliw ya mabiskeg anggano say pakalikna to et sikatoy makapuy. (Basaen so 2 Corinto 12:9, 10.) Imbaga nen Jehova ed si Pablo: “No kapigan makapuy ka, diman mabisbiskeg so pakayarik.” Antoy labay ya ibaga nen Jehova? Ipapaseguro to ya iter tod si Pablo so biskeg ya kaukolan to. Pantongtongan tayo nin unona no akin ya agtayo manpapaapekto ed saray mangiinsulto ed sikatayo.

3. Akin ya sarag tayoy manliket ed saray panag-insulto?

³ Agtayo labay so nainsulto, balet no wala ray manginsulto ed sikatayo tan masyado tayon manpaapekto, ompan nadismaya  tayo. (Pro. 24:10) Anto sirin so nepeg ya reaksion tayo no walay manginsulto ed sikatayo? Singa si Pablo, sarag tayoy ‘manliket diad saray panag-insulto.’ (2 Cor. 12:10) Akin? On ta no iinsultoen itayo odino kokontraen itayo na arum ed pandadayew tayo, paneknek itan ya tuan disipulo itayo nen Jesus. (1 Ped. 4:14) Imbaga nen Jesus ya saray papatumbok to et kontraen o pasegsegangen na saray totoo. (Juan 15:18-20) Ontan so agawa ed saray Kristiano nen inmunan siglo. Diad saman ya panaon, maimpluensya so kultura na saray Griego, tan say pakanengneng da ed saray Kristiano et anggapoy amta ra tan makapuy ira. Anggan saray mismon Judio, say pakanengneng da ed saray Kristiano et “ag-akapanaral tan ordinaryo iran totoo,” ya singa si apostol Pedro tan Juan. (Gawa 4:13, paimanod leksab) Kanian singa pakaskasi iray Kristiano; anggapoy pakayari da ed politika odino diad militar tan melmelag so pakanengneng na totoo ed sikara.

4. Antoy ginawa na saray Kristiano nen inmunan siglo anggano wala ray anginsulto tan amairap ed sikara?

⁴ Kasin saray Kristiano nen inmunan siglo et tinmunda rad panlilingkor da lapud abebbebay pakanengneng na arum ed sikara? Andi, ta singa si apostol Pedro tan Juan, impasen dan kagalangan so napasegsegang lapud panutumbok dad alimbawa nen Jesus tan pangipupulong da ed saray bangat to. (Gawa 4:18-21; 5:27-29, 40-42) Anggapoy nepeg ya ibaing na saray disipulo. Ta diad tua, mas dakel so maong ya agawaan da nen saramay onkokontra ed sikara. Singa bilang, anggad natan et baleg so nitutulong na saray libro na Biblia ya insulat na saraman ya Kristiano tan satan so mangiiter na ilalo ed minilyon ya totoo. Tan say Panarian ya impulong da et manuuley la natan ed tawen tan magano lan manuley diad dalin. (Mat. 24:14) Kabaliktaran balet so agawad gobierno na Roma ya amairap ed sikara ta abaybayag lan binmagsak so uley to. Saramay matoor ya disipulo nen Jesus et ari la ra natan ed tawen, balet inaatey lan amin iray opisyal na gobiernon amairap ed sikara. No bilang ta walay napaoli ed sarayan opisyal, manpasakop met ira ed Panarian ya impulong na saray Kristiano.​—Apo. 5:10.

5. Base ed Juan 15:19, akin ya abebbebay pakanengneng na totoo ed saray Tasi nen Jehova?

⁵ Diad panaon tayo, say pakanengneng na totoo ed saray Tasi nen Jehova et anggapoy amta ra tan makapuy ira. Akin? Lapud duma so ugali tayo ed sikara. Pansasagpotan tayoy magmaliw ya mapaabeba, maulimek, tan maunor. Saray totoo ed mundo balet, iidoloen da iray mayabang, mamaong, tan rebelde. Sakey ni, agtayo mibabali ed politika tan ag-itayo mansusundalo. Agtayo manpapaimpluensya ed sayan mundo kanian abebbebay pakanengneng na totoo ed sikatayo.​—Basaen so Juan 15:19; Roma 12:2.

6. Anto ray nagagawaan na saray lingkor nen Jehova lapud tulong to?

⁶ Anggano abebbebay pakanengneng na mundo ed sikatayo, uusaren itayo nen Jehova pian sumpalen iray makapakelkelaw ya kimey to. Lapud tulong to et nipupulong la ed interon mundo so maong a balita. Saray lingkor to so mangipa-publish ed saray magasin ya nipatalos ed dakdakel ya lenguahe tan nibubunog diad dakdakel ya totoo. Anggapo lay arum ya organisasyon ya mangipa-publish na ontan karakel tan mangibabangat na Biblia ed minilyon ya totoo pian magmaliw ya maliket so bilay da. Nagagawa irayan amin lapud tulong nen Jehova. Uusaren to iray totoo ya ipapasen na arum ya makapuy. Diad sikatayo ey bilang indibidual? Kasin iikdan itayo met nen Jehova na pakayari? No on,  antoy gawaen tayo pian tulongan to tayo? Pantongtongan tayo natan so taloran ginawa nen apostol Pablo pian naawat toy tulong nen Jehova.

7. Antoy sakey ya naaralan tayo ed si Pablo?

⁷ Nia so sakey ya naaralan tayo ed si Pablo: Agka manmamatalek ed biskeg odino abilidad mo diad panlilingkor mod si Jehova. No tongtongey tua, diad pakanengneng na too et wala pa met so rason nen Pablo ya manlastog tan mantiwala ed sarili to. Sikatoy binmaleg ed Tarso, say capital city ed sakey a probinsya na Roma. Mayaman ya syudad so Tarso tan walad tay sikat ya unibersidad. Atagey so aral nen Pablo. Say nambangat ed sikato et si Gamaliel, sakey ya respetadon lider na saray Judio ed saman a panaon. (Gawa 5:34; 22:3) Walay panaon ya manbilib ed si Pablo iray kapara ton Judio. Imbaga to: “Mas inmaligwas ak ed Judaismo nen say dakel a kaedaran ko ed nasyon ko.” (Gal. 1:13, 14; Gawa 26:4) Balet, agnanmatalek si Pablo ed sarili to.

8. Base ed Filipos 3:8, antoy pakanengneng nen Pablo ed saray tinaynan to, tan akin ya maliket anggano onkakapuy so liknaan to?

⁸ Mabulos ya tinaynan nen Pablo iray ipapasen na saray totoo ed mundo ya importante. Diad tua, imbaga to ya basura iratan ed pakanengneng to. (Basaen so Filipos 3:8.) Dakel so irap ya dinalan nen Pablo manlapu nen nagmaliw ya patumbok nen Kristo. Sikatoy binusol na saray kapara ton Judio. (Gawa 23:12-14) Sikato ni ingey nilewet tan inkulong na saray kabaleyan ton Romano. (Gawa 16:19-24, 37) Aliwan saratan labat. Imbaga nen Pablo ya sikatoy nairapan ya gawaen so duga lapud kakapuyan to. (Roma 7:21-25) Balet imbes ya ontunda ed panlilingkor to lapud wala ray onkokontra tan wala ray lingo to, sikatoy maliket anggano onkakapuy so liknaan to. Akin? On ta no diman makapuy si Pablo, diman to nalilikna so tulong na Dios.​—2 Cor. 4:7; 12:10.

9. Antoy nepeg mon isipen no say pakaliknam et makapuy ka?

⁹ No labay tayon tulongan itayo nen Jehova, agtayo iisipen ya uusaren to tayo lapud  mabiskeg tayo, de-aral tayo, maong so nanlapuan tayon pamilya, odino mayaman tayo. Aliwan saratan so aanapen nen Jehova ed sakey ya too. Diad tua, ‘pigpigara ed saray lingkor na Dios so marunong unong ed estandarte na totoo, pigpigara so makapanyari, pigpigara so nanlapud prominentin pamilya.’ Say uusaren nen Jehova et saray ipapasen na mundo ya “andi-kakanaan” tan “makapuy.” (1 Cor. 1:26, 27, paimanod leksab) Kanian agmo iisipen ya agka usaren nen Jehova no aliwa kan mabiskeg, abebay aral mo, odino mairap so bilay mo. No ontan so situasyon mo, mas maliket ka ta mas naliknam so tulong nen Jehova. Singa bilang, no natatakot kan mankatunongan ed saray mangibabagan aliway papanisiaan mo, manpikasi kad si Jehova pian ikdan to kay pakpel ya idepensay pananisiam. (Efe. 6:19, 20) No bilang ta walay graben sakit mo, mikasi kad si Jehova ya ikdan to kay biskeg a kaukolan mo pian nitultuloy moy manlingkor diad anggaay nayarian mo. Kada no nanenengneng mon tutulongan ka nen Jehova, mas ombiskeg so pananisiam tan ombiskeg met so liknaan mo.

10. Akin ya kaukolan tayon aralen so alimbawa na saray lingkor na Dios nensaman ya singa saramay abitla ed Hebreo 11:32-34?

¹⁰ Maseet ya inaral nen apostol Pablo so Salita na Dios, tan dakdakel so naaralan to ed saray lingkor na Dios ya akarekord ed Kasulatan so istoryay bilay da. Nen sinulatan nen Pablo iray Hebreon Kristiano, pinaseseg to ra ya dalepdepen day alimbawa na dakdakel ya matoor a lingkor nen Jehova. (Basaen so Hebreo 11:32-34.) Say sakey ed saratan et si Arin David. Dakel so nankabusol ed sikato tan trinaidor ni ingen na saray datin kakaaro to. Legan tayon pantotongtongan so alimbawa nen David, nengnengen tayo no antoy naaralan nen Pablo ed sikato tan no antoy naaralan tayo met ed si apostol Pablo.

11. Akin ya diad pakanengneng na too et makapuy si David? (Nengnengen so litrato ed apis.)

¹¹ Diad pakanengneng na sundalon si Goliat, makapuy tan anggapoy kalaban-laban nen David kanian “binalawbalaw to.” Siempre ta higante si Goliat, kompleto so armas to, tan apasal ya miguerra. Si David balet et uga-ugaw ni tan palsot labat so armas to. Diad pakanengneng na too et makapuy si David pero diad tua et mabisbiskeg ta sikatoy nanmatalek ed si Jehova, kanian atalo toy Goliat.​—1 Sam. 17:41-45, 50.

12. Anto nin subok so inarap nen David?

¹² Wala ni sakey ya subok ya inarap nen David ya amakapuy na liknaan to tan singa anggapoy kalaban-laban to. Matoor ya nanlingkor si David ed pinili nen Jehova ya ari ed Israel, si Saul. Nen unaan et inar-aro nen Arin Saul si David. Balet lapud angimon si Saul, kinabusol toy David tan labay to ni ingen ya pateyen.​—1 Sam. 18:6-9, 29; 19:9-11.

13. Antoy ginawa nen David nen aliwliway impantrato ed sikato nen Arin Saul?

¹³ Anggano aliwliway impantrato nen Arin Saul ed si David, nirespeto nin siansia nen David ta amta to ya si Jehova so anuro ed sikato ya ari. (1 Sam. 24:6) Agtinetel nen David si Jehova ed saray mauges ya ginawa nen Saul. Imbes, matalek si David ya sikatoy ikdan nen Jehova na biskeg pian nasungdoan to itan ya subok.​—Sal. 18:1, superskripsion.

14. Anto ran subok so inarap nen apostol Pablo ya pareho ed inarap nen David?

¹⁴ Wala ray subok ya inarap nen apostol Pablo ya pareho ed saray subok ya inarap nen David. Si Pablo et binusol na saray kabkabat  tan maimpluensyan lider ed panaon to. Sikatoy aminpiga ran nilewet tan impriso. Singa si David, wala ray impasen nen Pablo ya kakaaro tod kongregasyon ya aliwliway impantrato dad sikato tan binusol da. (2 Cor. 12:11; Fil. 3:18) Pero agnampatalo si Pablo ed amin ya nambusol ed sikato. Akin ya nibaga tayon ontan? On ta intuloy toy nampulong anggano wala ray onkokontra ed sikato. Inaro to nin siansia iray agagi anggano wala ray ginawa dan akadismaya ed sikato. Tan manuna ed amin, sikatoy nanmatoor ed Dios anggad impatey to. (2 Tim. 4:8) Asarag to iratan ya graben subok aliwan lapud abilidad to, noagta lapud sikatoy nanmatalek ed si Jehova.

15. Antoy gawaen tayo pian nadaeg tayoy mauges panamegley na maong, tan panon tayon nagawaan itan?

¹⁵ Kasin iinsultoen ka na saray kaklasem, katrabahom, odino kapamilyam ya aliwan Tasi, tan manggagawa ray paraan pian ontunda ka lan manlingkor ed si Jehova? Kasin walay agi ya aliwliway impantrato tod sika? No ontan so situasyon mo, tandaan moy alimbawa nen David tan apostol Pablo. Sarag mon “daegen so mauges diad panamegley na maong.” (Roma 12:21) Aglabay ya ibaga na satan ya kaukolan mo ran labanan ya singa ginawa nen David ed si Goliat. Imbes, tulongan mo ran naaralan so katuaan diad Biblia. Nagawaan mo itan no usaren moy Biblia pian ebatan so tepet na saray totoo, no marespeto tan maomaong ka nin siansia ed saramay aliwliway panagtrato dad sika, tan no manggawa kay kamaongan ed amin pati diad saramay mamubusol ed sika.​—Mat. 5:44; 1 Ped. 3:15-17.

16-17. Antoy agnilingwanan nen Pablo?

¹⁶ Nen kabataan ni apostol Pablo antis a nagmaliw ya disipulo nen Kristo, pinairap to ray papatumbok nen Jesus. (Gawa 7:58; 1 Tim. 1:13) Pian tundaan la nen Saulo (datin ngaran nen Pablo) ya pairapen iray inmunan Kristiano, si Jesus ya mismo so akitongtong ed sikato manlapud tawen tan binulag to. Imbaga nen Jesus ya kaukolan toy onkerew na tulong ed saramay mismon papairapen to. Mapaabeban linmay Pablo ed disipulon manngaray Ananias pian ompawil so pakanengneng to.​—Gawa 9:3-9, 17, 18.

 ¹⁷ Kalabas na panaon, nagmaliw ya kabkabat a membro na Kristianon kongregasyon si apostol Pablo. Balet agbalot nilingwanan nen Pablo imay naaralan to nen sikatoy kinatongtong nen Jesus manlapud tawen. Nansiansian mapaabeba si Pablo tan mabulos ton inawat so tulong na agagi. Imbaga to ya “nagmaliw iran makapabiskeg a tulong” ed sikato.​—Col. 4:10, 11, paimanod leksab.

18. Akin ya no maminsan et agtayo labay ya awaten so tulong na arum?

¹⁸ Antoy naaralan tayo ed si apostol Pablo? Nen balo tayo ni ed katuaan, ompan labalabay tayoy onkerew na tulong ed arum ta amta tayo ya ugaw tayo ni ed espiritual tan dakel ni kaukolan tayon naamtaan. (1 Cor. 3:1, 2) Natan balet ey? No abayag tayo lan manlilingkor ed si Jehova tan dakdakel lay eksperiensya tayo, ompan agtayo la labay so manpatulong lalo la no say mamibilin ed sikatayo et mas agano ni ed katuaan. Balet tandaan ya uusaren nen Jehova iray agagi pian pabiskegen itayo. (Roma 1:11, 12) Kanian no labay tayon pabiskegen itayo nen Jehova, awaten tayoy tulong na agagi.

19. Akin ya dakel so agawaan nen apostol Pablo?

¹⁹ Manlapu nen nagmaliw ya Kristiano si apostol Pablo, dakel so agawaan to. Akin? Lapud atalosan to ya aliwan say biskeg, edukasyon, kayamanan, o binalegan ya pamilya so nenengnengen nen Jehova ed sakey ya too. Say nenengnengen nen Jehova et no mapaabeba tayo tan lanang tayon manmamatalek ed sikato. Aligen tayo sirin si apostol Pablo: (1) manmatalek tayo ed si Jehova, (2) aligen tayo iray maong ya alimbawa ed Biblia, tan (3) awaten tayoy tulong na saray agagi tayo. No ontan so gawaen tayo, anggano say pakalikna tayo et makapkapuy tayo, pabiskegen itayo nen Jehova!