1. Ndaga itshi mupostolo Phaula gakhalele mujiya?

MUPOSTOLO Phaula wazuelele egi matangua ako wakhalele waleba. Wakhalele mujiya egi muila wenji wakhalele “muya nu gubola,” yakhalelego nji ndaga yaleba gudi muene ha gutshita ndaga jiabonga, nu wakhalele mujiya egi Yehowa gakhalelego gumuhana mvutu mu luholo luakhalele gudifelela muene. (2 Kol. 4:16; 12:7-9; Lomo 7:21-23) Phaula wakhalele nji mujiya egi mbalagaji jienji jiakhalele mujiya egi wakhalele waleba. * Uvi gabembelego egi ndaga jiabola jiakhalele muzuela athu ako mukunda nu muene, nga guleba guenji gumutume ha gutangiza egi gashigo nu ndando.—2 Kol. 10:10-12, 17, 18.

2. Ha gutadila 2 Kolinto 12:9, 10, longo ditshi dia ndando Phaula gazudile?

² Phaula wazudile longo dia ndando: Muthu wajiya gukhala nu ngolo tangua gadi gudivua waleba. (Tanga 2 Kolinto 12:9, 10.) Yehowa wawambelele Phaula egi ngolo jienji jidi ‘mudijiga midimo yajio mu guleba,’ yakotelesa egi Yehowa wahanele Phaula ngolo jinyi muene gakhalele najio funu. Thomo, tutadilenu gale mukunda natshi tushigo naye guvua khabu tangua mbalagaji jietu jidi gutushingana.

3. Mukunda natshi tudi naye gusuanguluga tangua athu adi gutushingana?

³ Gushigo nga muthu mumoshi wana tshigina egi ashingiwe. Uvi gula tuavua khabu luholo mbalagaji jietu jidi gutushinga, tuajiya guleba muila. (Ish. 24:10) Itshi tuajiya gutshita gula mbalagaji  jietu jia tushingana? Tuajiya ‘gusuanguluga tangua tudi mushingiwa’ gifua Phaula. (2 Kol. 12:10) Mukunda natshi? Handaga mashingo a mbalagaji jietu ana monesa diago egi esue tudi alandudi a Yesu. (1 Phet. 4:14) Yesu wazuelele egi alandudi enji mbaasagesewa. (Yone 15:18-20) Ndaga yene yakalegewe diago ngenyi mu siekle ya thomo. Mu tangua diene, athu anyi akhalele mulandula khadilo dia enya Greke akhalele mumona Aklisto gifua ashigo atema nu ashigo nu ngolo. Enya Yuda akhalele mumona Aklisto gifua “athu a githuhu nu alongesewego,” gifua luholo akhalele mumona mupostolo Phetelo nu Yone. (Makal. 4:13) Aklisto akhalele mumonega gifua athu aleba, handaga akhalelego gudinginyisa mu ndaga jia politiki, nu akhalelego nu ukuateshi wa ba guvernema, athu akhalelego guanemesa.

4. Ndaga itshi Aklisto a mu siekle ya thomo akadigile tangua mbalagaji jiawo jia khalele guazuelela ndaga jiabola?

⁴ Aklisto a mu siekle ya thomo abembelego egi ndaga jiabola jiakhalele muzuela mbalagaji jiawo jiatunyise ha gukhala alandudi a Yesu nu ha gulongesa. Mupostolo Phetelo nu Yone amonele usageshi wene gifua lutumbu handaga akhalele mulandula Yesu nu gulongesa athu ako ndaga jiatadila Yesu. (Makal. 4:18-21; 5:27-29, 40-42) Alandundi akhalelego nga nu ndaga imoshi ya guvuila sonyi. Ikhale athu avula akhalelego guanemesa, uvi Aklisto a mu siekle ya thomo adihanele muavula ha gukhatesa athu ako. Ha gufezegesa, mikanda iko ya mu Biblia yafundiwe gudi Aklisto ene yana gukhatesa athu avula nu yana guahana felela. Luko, Ufumu wa Nzambi wakhalele mulongesa ene, wasendesele gale guhinyina mu dilu, gualeha ndo umuza muhinyina ha mavu agasue. (Mat. 24:14) Uvi ufumu wa ngolo jiavula wa Roma ikulu unu wakhalele musagesa Aklisto wafuile gale ivo yavula yabalega. Mangino, Aklisto ene adi mafumu mu dilu. Mbalagaji jiawo jiafuile gale, uvi gula jiafuzumuga, mbajituamezewa gudi Ufumu unu wakhalele mulongesa Aklisto anyi akhalele ene musagesa.—Yat. 5:10.

5. Hagutadila Yone 15:19, mukunda natshi enya ha mavu awa anago gunemesa Matemue a Yehowa?

⁵ Mangino, athu avula ana nemesa ndo Matemue a Yehowa, nu ana gutulela egi tushigo tuatema nu tushigo nu ngolo. Mukunda natshi? Handaga tuana khalago nu makalegelo a luholo lumoshi nu a athu ako. Tuana gukamba gukhala athu agudibulumuisa, atuluga, nu atumaga. Mangino, athu ana tshigina enya lulendo, enya gudihala, nu mbundudi. Luko, tuanago gudinginyisa mu ndaga jia politike, nu tuanago gudibungisa nga nu gifutshi gimoshi ha gulua ita. Luholo tuakhala agudisha nu athu a ha mavu awa, ana gutumona gifua tushigo nu ndando gu meso awo.—Tanga Yone 15:19; Lomo 12:2.

6. Mudimo utshi wakoma Yehowa gadi mukuatesa akombeledi enji ha gukalagala?

⁶ Ikhale enya ha mavu awa ana gutumona gifua tushigo nu ndando, uvi Yehowa wana gutukalegela ha gutshita ndaga jiakoma. Udi mutagenesa mudimo wakoma wa gulongesa athu a ha mavu agasue. Akombeledi enji adi mubalumuna mikanda nu guyikhapha ha mavu agasue, nu ana kalegela Biblia ha gukuatesa athu avula ha gusombegesa luholo luawo lua gujinga. Yehowa wana kalagala egi mudimo owu ukalegewe. Wana gukalegela akombeledi enji anyi athu ana mona egi ashigo nu ndando ha gutagenesa mudimo wenji wa ndando. Uvi esue giwa? Yehowa wajiya gutukuatesa ha gukhala nu ngolo ba? Gula idi ngenyi, itshi tudi naye gutshita ha guheta ukuateshi wenji? Tutadilenu ndaga thathu tuajiya gulonguga mu gifezegeselo gia Phaula.

7. Longo ditshi tuazula mu gifezegeselo gia Phaula?

⁷ Longo tuazula mu gifezegeselo gia Phaula didi egi: Guhaga ndo mutshima mu ngolo jiaye  nga mu gutema guaye tangua udi mukombelela Yehowa. Athu akhalele musuanguluga nu Phaula mukunda nu ndaga jiakhalele mujiya muene, ngenyi, yakhalelego lamba gudi muene ha gubua muenya lulendo nu ha gudihagela mutshima. Wakudile gu Tarse, dimbo dia ufumu dia provense ya Silisia ya enya Roma. Tarse yakhalele dimbo diakoma nu yakhalele nu inzo ya mikanda yakoma guene. Phaula walongugile muavula, walongesewe gudi mulongeshi wakoma wakhalele munemesewa muavula mukatshi dia mafumu a enya Yuda, jina dienji Gamaliele. (Makal. 5:34; 22:3) Phaula wakhalele muthu wa ndando mukatshi dia enya Yuda. Wazuelele egi: ‘Ngakudile muavula mu ndaga jia dingumba dia enya Yuda gubalega makanga ami nu enya mu gifutshi giami.’ (Gal. 1:13, 14; Makal. 26:4) Uvi Phaula gadihagelego mutshima.

8. Ha gutadila Filiphi 3:8, luholo lutshi Phaula gakhalele mutadila ndaga jiabembele muene, nu mukunda natshi gakhalele ‘musuanguluga tangua gakhalele waleba’?

⁸ Phaula wabembele ndaga eji jiagasue jiakhalele gumubuisa muthu wa ndando mu mavu awa. Wakhalele mumona ndaga jiene gakhalele najio thomo gifua ‘ima ya ha shita.’ (Tanga Filiphi 3:8.) Phaula watagenele nu malamba avula luholo gabuile mulandudi wa Klisto. Enya mu gifutshi gienji akhalelego gumutshigina. (Makal. 23:12-14) Wabetewe nu wambiwe mu bologo gudi aphangi enji a enya Roma. (Makal. 16:19-24, 37) Luko, Phaula wakhalele mujiya egi gashigo muthu watagana nu yakhalelego yaleba gudi muene ha gutshita ndaga jiabonga. (Lomo 7:21-25) Gabembelego gulandula Klisto mukunda nu guleba guenji nga mukunda nu mbalagaji jienji, uvi wakhalele ‘musuanguluga tangua gakhalele waleba.’ Mukunda natshi? Handaga tangua diakhalele muene wa guleba, diene gakhalele mumona luholo Nzambi gakhalele gumukuatesa.—2 Kol. 4:7; 12:10.

9. Luholo lutshi tudi naye gutadila ndaga jiana gutulebesa muila?

⁹ Gula tudi mutshigina guheta ngolo gudi Yehowa, tuajiyilego gutangiza egi ngolo jietu, makhalasa tualongugile, mafundo tuanua jinga, nga umonyi wetu wene wana gutubuisa athu a ndando. Ndaga eji tuatanga, jishigo jiene jiana gutubuisa athu a ndando gudi Yehowa. Luko, akombeledi a Nzambi avula ashigo ‘enya ndunge jiavula, enya ngolo, nga enya mu jinzo jia  manene.’ Uvi, Yehowa watombele ‘athu a guleba a ha mavu,’ ha gumukombelela. (1 Kol. 1:26, 27) Hene, gula ushigo nu ndaga jiaguasue tuazuelela guthunda, wajiya gulandula gukalegela Yehowa mudimo. Uvi, tadila ndaga jiene mu luholo luawaha. Luholu lutshi wajiya gukalagala? Jiya egi, gula ushigo nu ima yana tshita egi muthu akhale nu ndando ha mavu awa, mbawumona luholo Yehowa mbaaguhana ngolo. Gula udi muvua woma wa athu adi gugutuma ha gubolesa gutshigina guaye, udi naye gutoga Yehowa ha guguhana gikhesa gia gulongesa. (Ef. 6:19, 20) Gula udi mulua nu misongo yakola, toga Yehowa aguhane ngolo ha gukhala tangua diagasue nu ndaga jiavula jia gutshita mu mudimo wenji. Gula wamona luholo gadi gugukuatesa, gutshigina guaye mbagukola.

10. Mukunda natshi tudi naye gulonguga ifezegeselo ya akombeledi a Nzambi idi mu Biblia, gifua inyi yatangewa mu Hebelu 11:32-34?

¹⁰ Phaula wakhalele mulonguga mbimbi ya Nzambi. Walongugile ndaga jiavula, uvi wazudile malongo avula a akombeledi a Yehowa anyi akhalele mutanga muene mu mbimbi ya Nzambi. Ha sonegele muene Aklisto a Hebelu mukanda, Phaula waatogele ha gutangiza gu ifezegeselo ya akombeledi a gujinginyina a mualeha. (Tanga Hebelu 11:32-34.) Tutadilenu gifezegeselo gia muthu mumoshi mukatshi dia athu ene: Fumu Davidi. Wataganele nu malamba akhalele gumuhana mbalagaji jienji nu mafuta enji. Gula tuatadila gifezegeselo gia Davidi, tuza mukotelesa egi phaula wahetele ngolo tangua gakhalele mutangigiza lujingu lua Davidi, nu luholo tuajiya gulandula gifezegeselo gia Phaula.

11. Mukunda natshi Davidi gakhalele mumonega gifua waleba? (Tala gifuanesa holu dia gizula.)

¹¹ Davidi wakhalele mumonega gifua gathu galeba gutuama dia Goliata. Tangua Goliata gamonele Davidi, wa ‘museguluile nu wamulelele.’ Goliata wakhalele wakoma nu waleha, wakhalele nu mata agasue nu wakhalele wajiya gulua. Uvi Davidi, wakhalele mona wazonda, gakhalelego mujiya gulua, nu yakhalele mumonega egi gashigo nu iluilo yabonga ya guluila. Uvi Davidi wabalumuine ndaga, ima yakhalele mumonega gifua yaleba yabuile ima ya ngolo. Wahagele mutshima gudi Yehowa ha guheta ngolo, hene gashiyile mbalagaji wenji.—1 Sam. 17:41-45, 50.

12. Lamba tshi diko Davidi gatagenele nadio?

¹² Davidi watagenele nu lamba diko diakhalele naye gumulebesa muila. Wakhalele mukalegela Saula mudimo, muthu Yehowa gatombele ha gukhala fumu gu Isalele. Thomo, fumu Saula wakhalele munemesa Davidi. Gungima, lulendo luamutumine ha guvila Davidi fuwa. Saula wasendesele gukalegela Davidi ndaga jiabola, wakambele nji gumushiya.—1 Sam. 18:6-9, 29; 19:9-11.

13. Itshi Davidi gakalegele tangua fumu Saula gakhalele gumukalegela ndaga jiabola?

¹³ Ngatshima fumu Saula wakhalele gumukalegela ndaga jiabola, uvi Davidi walanduile gumunemesa, handaga Yehowa wamutombele ha gukhala fumu. (1 Sam. 24:6) Davidi gavidilego Yehowa khabu mukunda nu ndaga jiabola jiakhalele mukalagala Saula. Uvi wahagele mutshima gudi Yehowa ha gumuhana ngolo ha gukolesela mu malamba.—Ngi. 18:1.

14. Lamba ditshi Phaula gatagenele nadio diakhalele luholo lumoshi nu dia Davidi?

¹⁴ Mupostolo Phaula nji watagenele nu malamba gifua a Davidi. Mbalagaji jia Phaula jiakhalele nu ngolo jiavula gumubalega muene. Mafumu avula a mangumba a mu tangua dienji akhalelego gumutshigina. Amubetele, nu amumbile mu bologo. Phaula wamonesewe lamba gudi mafut’enji, gifua muatshitshiwe Davidi.  Athu ako mu hungu dia Uklisto akhalele nji gumuluisa. (2 Kol. 12:11; Fili. 3:18) Uvi Phaula wabingile athu agasue akhalele gumuluisa. Luholo lutshi? Walanduile gulongesa ngatshima watagenele nu umbalagaji. Wasalele wa gujinginyina gudi aphangi enji a mala nu a akhetu ngatshima ene akhalelego gumuzumba. Ndaga ya gubalega ndando idi egi, wasalele wa gujinginyina gudi Nzambi uu nu gu gufua. (2 Tim. 4:8) Gakalegelego ndaga eji jiagasue mu ngolo jienji, uvi mu ngolo jia Yehowa.

15. Felela dietu didi itshi, nu luholo lutshi tuajiya guditagenesa?

¹⁵ Mafuta aye a khalasa, nga athu wana kalagala nawo mudimo, nga enya fami yaye anyi ashigo Matemue, ana gugushinga nga gugusagesa ba? Phangi mumoshi mu hungu wagukalegele gale ndaga yabola ba? Gula idi ngenyi, tangiza gifezegeselo gia Davidi nu Phaula. Wajiya gulandula ‘gubinga gubola mu ngubonga.’ (Lomo 12:21) Gula athu agukalegela gubola, ushigo naye gulua gifua mualuile Davidi nu Goliata, uvi felela diaye didi naye gukhala dia gualongesa ha gujiya Yehowa nu Mbimbi yenji. Wajiya gutagenesa felela diene gula udi mukalegela Biblia ha guhana mvutu gu mihu ya athu, gula udi munemesa nu udi mumonesa gisemo gudi athu adi gugukalegela gubola, nu gula udi mukalagala ndaga jiabonga gudi athu agasue ikhale gudi mbalagaji jiaye.—Mat. 5:44; 1 Phet. 3:15-17.

16-17. Phaula gabuitshilego mutshima gu ndaga tshi?

¹⁶ Gutuama egi mupostolo Phaula abue mulandudi wa Klisto, wakhalele muthu wabola, wakhalele musagesa alandudi a Klisto. (Makal. 7:58; 1 Tim. 1:13) Yesu wakangele Phaula njila hagula galandulago gusagesa hungu dia Uklisto. Yesu wazuelele nu Phaula muene mu dilu nu wamushiyile meso. Hagula Phaula amone luko, yakhalele mutoga egi akambe ukuateshi wa athu akhalele musagesa muene. Watshiginyile nu gudibulumuisa guagasue ukuateshi wa mulandudi mumoshi mu jina dia Ananiase ha gumona luko.—Makal. 9:3-9, 17, 18.

¹⁷ Gu ngima, Phaula wabuile Muklisto nu wajiyiwe muavula mu hungu dia Uklisto, uvi gabuitshilego mutshima wa longo diamuhanele Yesu mu njila ya Damase. Phaula wasalele muthu  wa gudibulumuisa, nu wakhalele hehi ha gutshigina ukuateshi wa aphangi enji a mala nu a akhetu. Wakhalele mujiya egi akhalele gifua ‘ukuateshi udi gumuhana ngolo’.—Kol. 4:10, 11.

18. Mukunda natshi yajiya gukhala lamba ha gutshigina ukuateshi wa athu ako?

¹⁸ Longo ditshi tuajiya guzula mu gifezegeselo gia Phaula? Tangua tuasendesele gudibungisa nu Matemue a Yehowa, yakhalelego lamba ha gutshigina ukuateshi wa athu ako, handaga tuakhalele gifua ana azonda mu nyuma, nu tuakhalele nu funu ya gulonguga ndaga jiavula. (1 Kol. 3:1, 2) Uvi itshi tuajiya guzuela mangino? Gula tuana kalegela gale Yehowa sendese mualeha, nu tuajiya gale ndaga jiavula, yajiya gukhala lamba ha gutshigina ukuateshi wa aphangi ako, handaga aphangi ene khenji abalegesago ivo yavula mu giamatshidia gifua esue. Uvi Yehowa wana gukalegela aphangi etu a mala nu a akhetu ha gutuhana gikhesa. (Lomo 1:11, 12) Gula tudi mutshigina guheta ukuateshi wa Yehowa, tudi naye gukhala hehi ha gutshigina ukuateshi wa aphangi a mala nu a akhetu.

19. Mukunda natshi Phaula gatshitshile ndaga jiavula jia gushimana?

¹⁹ Phaula wakalegele ndaga jiavula jia gushimana habuile muene Muklisto. Mukunda natshi? Handaga wakhalele mujiya egi, ha gubinga mu lujingu, yana toga ndo ngolo jietu, nga makhalasa tualongugile, umonyi nga fundo tuana jinga, uvi yana toga gudibulumuisa nu guhagela Yehowa mutshima. Mukut’etu agasue tulandule gifezegeselo gia Phaula ha (1) guhagela Yehowa mutshima, (2) ha guzula malongo mu ifezegeselo ya mu Biblia, nu (3) ha gutshigina ukuateshi wa athu ako. Hene, ngatshima tudi athu aleba, Yehowa mbawutubuisa athu a ngolo jiavula!