1. Wanem nao aposol Paul no hol bak for storyim?

APOSOL PAUL no hol bak for talem hao samfala taem hem feel wik. Hem sei body blo hem “gogo for nogud,” hem stragol for duim stret samting, and samfala taem Jehovah no ansarem prea blo hem lo wei wea hem expectim. (2 Cor. 4:16; 12:7-9; Rome 7:21-23) Paul talem tu hao olketa wea againstim hem, olketa ting lo hem olsem man wea wik. * Bat hem no letem negative tingting wea pipol garem abaotem hem or olketa wik point blo hemseleva for mekem hem feel iusles.—2 Cor. 10:10-12, 17, 18.

2. Olsem 2 Corinth 12:9, 10 storyim, wanem important leson nao Paul hem lanem?

² Paul lanem wanfala important leson: Man savve feel strong nomata taem hem wik. (Readim 2 Corinth 12:9, 10.) Jehovah sei olsem lo Paul: “Paoa blo mi barava strong taem iu wik.” Datwan minim paoa blo Jehovah nao bae strongim Paul lo taem wea hem needim. Distaem, bae iumi story raonem why iumi shud no feel nogud taem olketa enemy blo iumi tok spoelem iumi.

3. Why nao iumi shud hapi nomoa nomata pipol tok spoelem iumi?

³ Iumi no laekem pipol for tok spoelem iumi. Bat sapos olketa tok spoelem iumi and iumi tingting tumas abaotem datwan, bae iumi laek “givap” nao. (Provebs 24:10) Taem olsem,  wanem nao bae iumi duim? Olsem Paul, iumi hapi nomoa nomata pipol tok spoelem iumi. (2 Cor. 12:10) Why nao olsem? Bikos taem pipol tok spoelem iumi diswan showimaot iumi olketa faithful disaepol blo Jesus. (1 Pet. 4:14) Jesus sei olketa wea followim hem bae kasem persecution. (John 15:18-20) Datwan happen lo first century. Lo datfala taem, olketa wea followim Greek culture ting lo olketa Christian olsem pipol wea no garem bigfala savve and olketa wik. And olketa Jew ting lo olketa Christian olsem pipol wea “no skul gud.” Datwan nao tingting blo olketa abaotem aposol Peter and John. (Acts 4:13) Reason why olketa ting olsem, hem bikos olketa Christian no garem paoa lo politik or lo military, and lo community pipol ting lo olketa olsem pipol wea wei blo olketa hem difren.

4. Wanem nao olketa Christian lo first century duim taem pipol garem olketa negative tingting abaotem olketa?

⁴ Waswe, olketa Christian hia lo first century letem negative tingting blo olketa enemy blo olketa for stopem olketa? Nomoa. Aposol Peter and John showimaot example lo diswan, tufala ting lo wei wea olketa kasem persecution olsem wanfala privilege bikos tufala gohed for followim Jesus and preach abaotem hem. (Acts 4:18-21; 5:27-29, 40-42) Olketa disaepol no garem eni reason for feel shame. Samting wea olketa hambol Christian hia duim hem gud and helpem staka pipol winim samting wea olketa enemy blo olketa duim. Olsem example, olketa Bible buk wea samfala Christian hia raetem, hem gohed helpem and givim hope lo staka million pipol kam kasem distaem. And Kingdom wea olketa preach abaotem, hem rul distaem and klosap nao bae hem rul ovarem evriwan. (Matt. 24:14) Bat lo narasaed, datfala strongfala politikol paoa blo Rome wea hem persecutim olketa Christian hem distroe longtaem finis, bat olketa faithful disaepol olketa kamap king distaem lo heven. Olketa enemy blo olketa, olketa dae longtaem finis, and nomata sapos olketa resurrect lo future, bae olketa mas stap anda lo kingdom wea olketa Christian wea olketa persecutim nao rulim.—Rev. 5:10.

5. Olsem John 15:19 storyim, why nao staka ting daonem pipol blo Jehovah?

⁵ Distaem samfala pipol ting daonem iumi olketa Jehovah’s Witness, and olketa tok spoelem iumi olsem pipol wea no garem bigfala savve and iumi wik. Why nao olsem? Bikos wei blo iumi hem no olsem olketa. Iumi trae for hambol, kwaet, and obey. Bat pipol lo world olketa tinghae lo pipol wea praod, wea tinghae lo olketa seleva, and bighed. And tu, iumi no tek part lo politik, and iumi no join insaed lo olketa military army lo eni kantri. Iumi no join witim pipol lo world, so olketa ting daonem iumi.—Readim John 15:19; Rome 12:2.

6. Wanem nao Jehovah gohed for iusim pipol blo hem distaem for duim?

⁶ Nomata wanem nao tingting blo world abaotem iumi, Jehovah iusim iumi for duim staka nambawan samting. Hem gohed for duim wanfala big preaching campaign winim enitaem lo history. Olketa servant blo hem distaem gohed for transleitim and givimaot staka magasin evriwea lo earth winim eni nara pipol and olketa iusim Bible for helpem staka million pipol for mekem laef blo olketa kamap gud. Evri praise for olketa samting hia hem go lo Jehovah bikos hem iusim pipol blo hem wea luk olsem olketa wik bat olketa duim disfala waka wea showimaot olketa barava strong. Bat waswe lo iumi wanwan, Jehovah savve helpem iumi for strong tu? Sapos olsem, wat nao iumi mas duim for kasem  help blo hem? Bae iumi story raonem thrifala samting wea iumi savve lanem from example blo aposol Paul.

7. Wanem nao wanfala leson wea iumi savve lanem from example blo Paul?

⁷ Wanfala leson iumi savve lanem from example blo Paul nao hem diswan: No depend lo strong or savve blo iuseleva taem iu servem Jehovah. Lo tingting blo olketa man, Paul fit for praod and hem fit for depend lo hemseleva. Hem grow ap lo Tarsus wea hem kapitol city blo wanfala province blo Rome. Tarsus hem wanfala bigfala taon and hem ples wea staka pipol savve go for skul. Paul hem kasem gudfala education. Teacher blo hem, hem wanfala man wea staka pipol barava respectim lo datfala taem, nem blo hem Gamaliel. (Acts 5:34; 22:3) Lo bifor, staka pipol lo community blo olketa Jew tinghae lo Paul. Hem sei: “Mi barava gohed strong long religion bilong olketa Jew winim olketa nara Jew wea sem age witim mi.” (Gal. 1:13, 14; Acts 26:4) Bat Paul no depend lo hemseleva.

8. Olsem wanem Philippi 3:8 storyim, hao nao Paul ting lo olketa samting wea hem lusim, and why nao hem hapi nomoa nomata hem wik?

⁸ Paul hapi nomoa for lusim olketa samting wea pipol lo disfala world tingse bae mekem hem strong. For tok stret, hem ting lo olketa samting hia wea hem garem bifor olsem hem “rabis nomoa.” (Readim Philippi 3:8) Paul feisim olketa barava hard samting bikos hem kamap wanfala follower blo Christ. Pipol blo hem heitim hem. (Acts 23:12-14) And olketa blo Rome killim hem and putim hem lo prison nomata hem wanfala citizen blo datfala kantri. (Acts 16:19-24, 37) And tu, Paul barava luksavve lo olketa wik point blo hemseleva. (Rome 7:21-25) Bat winim wei for letem olketa enemy blo hem or olketa wik point blo hem for stopem hem, hem hapi nomoa nomata hem wik. Why? Bikos taem hem wik, hem nao taem wea hem feelim paoa blo God strongim hem.—2 Cor. 4:7; 12:10.

9. Hao nao iumi shud ting lo eni hard situation wea iumi feisim?

⁹ Sapos iumi laekem Jehovah for givim iumi strong, iumi mas no tingse dat strong blo  iumiseleva, education, background blo iumi, or olketa material samting hem nao bae mekem iumi for important. Jehovah no luk for olketa kaen samting olsem. Really staka lo pipol blo Jehovah no garem big savve, staka no garem paoa, or hae position. Bat, Jehovah chus for iusim olketa nomata world ting lo olketa olsem olketa wik. (1 Cor. 1:26, 27) So no ting olketa samting olsem savve stopem iu for servem Jehovah. Bat ting lo olketa situation hia, olsem chance for iu lukim hao paoa blo Jehovah savve helpem iu. Olsem example, sapos iu feel fraet bikos pipol trae for mekem iu daotem wanem iu bilivim, prea lo Jehovah for givim iu strong for no fraet mekem iu savve defendim wanem iu bilivim. (Eph. 6:19, 20) Sapos iu stragol for deal witim wanfala big sik, askem Jehovah for givim iu strong mekem iu savve gohed busy for duim best blo iu lo service blo hem. Each taem iu lukim wei wea Jehovah helpem iu, faith blo iu bae grow and iu bae kamap strong.

10. Why nao iumi shud studyim example blo olketa faithful servant blo Jehovah, olsem olketa wea Hebrew 11:32-34 story abaotem?

¹⁰ Paul hem studyim gud Bible. Hem lanem staka information, and tu, hem lane from staka example blo olketa faithful servant blo God lo Bible. Dastawe, taem hem raet lo olketa Hebrew Christian Paul askem olketa for ting abaotem olketa example blo olketa faithful servant blo Jehovah lo bifor. (Readim Hebrew 11:32-34.) Wanfala lo olketa example hia hem King David. David no deal witim olketa enemy wea againstim hem nomoa, bat hem mas deal witim wei wea samfala fren blo hem tu olketa againstim hem. Bae iumi story raonem example blo David and then bae iumi storyim hao maet wei wea Paul ting raonem example blo David hem helpem hem for gohed strong. And tu, bae iumi lukim hao iumi savve followim example blo Paul.

11. Why nao David luk olsem hem nating strong nomoa? (Lukim piksa lo kava.)

¹¹ Goliath hem wanfala soldia wea barava strong, and lo tingting blo hem David nating strong nomoa. Taem Goliath lukim David, Goliath tok daonem hem. Tingim go, Goliath hem big winim David, hem garem staka samting for faet, and hem kasem training tu for faet lo war. Bat, David hem wanfala young boy nomoa wea luk olsem hem nating fit for faet. Nomata olsem, David iusim datfala chance for showimaot hao really hem barava strong. Hem depend lo Jehovah for paoa, and then hem faetem enemy blo hem and hem win.—Fas Samuel 17:41-45, 50.

12. Wanem nao nara challenge wea David mas deal witim?

¹² David mas deal witim nara challenge wea mekem hem feel wik and feel olsem hem no fit for duim eni samting. David faithful for servem King Saul wea Jehovah appointim olsem king blo Israel. Firstaem King Saul barava respectim David. Bat bihaen, Saul kamap praod so hem jealous lo David. Saul barava treatim David nogud and hem trae for killim hem tu.—Fas Samuel 18:6-9, 29; 19:9-11.

13. Wanem nao David duim nomata King Saul treatim hem nogud?

¹³ Nomata King Saul treatim nogud David, David gohed for respectim appointed king blo Jehovah. (Fas Samuel 24:6) David no blamem Jehovah for olketa nogud samting wea Saul duim. Bat, David gohed for depend lo Jehovah for givim hem strong wea hem needim for no givap nomata hem kasem datfala hard taem.—Ps. 18:1, NW, smol toktok wea stap antap chapter 18.

14. Wat kaen situation nao aposol Paul feisim wea hem klosap semsem olsem David?

 ¹⁴ Aposol Paul tu feisim situation wea semsem olsem David. Olketa enemy blo Paul olketa strong winim hem. Staka lo olketa bigman lo taem blo hem barava heitim hem. Staka taem olketa talem pipol for killim hem and putim hem lo prison. Olsem David, olketa fren blo Paul tu treatim hem nogud. Samfala lo Christian kongregeson againstim hem tu. (2 Cor. 12:11; Phil. 3:18) Bat Paul gohed for winim olketa wea againstim hem. Lo wanem wei? Hem gohed for preach nomata pipol againstim hem. Hem gohed faithful and lovem olketa brata and sista blo hem nomata olketa duim samting wea mekem hem feel nogud. And winim evri samting hia hem faithful lo God go kasem taem hem dae. (2 Tim. 4:8) Hem winim olketa hard samting wea hem feisim bikos hem depend lo Jehovah and no lo strong blo hemseleva.

15. Wanem nao goal blo iumi, and hao nao iumi savve kasem?

¹⁵ Waswe, iu mas deal witim wei wea pipol tok spoelem iu or persecutim iu, olsem olketa classmate, waka mate, or olketa famili member wea no Jehovah’s Witness? Waswe, eniwan lo kongregeson treatim iu nogud? Sapos olsem, tingim example blo David and Paul. Iu savve gohed duim gud samting mekem iu winim nogud samting. (Rome 12:21) Iumi no garem goal olsem David for sutim forhed blo samwan lo ston, bat goal blo iumi hem for putim toktok blo God insaed mind and heart blo narawan. Iu savve kasem datfala goal sapos iu iusim Bible for ansarem olketa kwestin blo pipol, taem iu kaen and respectim olketa wea treatim iu nogud, and taem iu duim gud samting for evriwan, nomata olketa enemy blo iu.—Matt. 5:44; 1 Pet. 3:15-17.

16-17. Wanem nao Paul no forgetim?

¹⁶ Bifor aposol Paul kamap disaepol blo Christ, hem wanfala young man wea persecutim olketa wea followim Jesus. (Acts 7:58; 1 Tim. 1:13) Jesus seleva nao stopem Paul for persecutim Christian kongregeson. Jesus story from heven and mekem Paul for blind. For Paul lukluk moa, hem mas kasem help from  olketa wea hem bin persecutim. Hem hambol and acceptim help from wanfala disaepol wea nem blo hem Ananias wea helpem Paul for lukluk moa.—Acts 9:3-9, 17, 18.

¹⁷ Bihaen, Paul kamap wanfala Christian wea waka hard lo kongregeson and pipol tinghae lo hem, bat hem no forgetim leson wea Jesus teachim hem taem hem gogo followim road for Damascus. Paul gohed hambol for acceptim help from olketa brata and sista. Paul luksavve olketa hia nao barava strongim hem.—Col. 4:10, 11.

18. Why nao maet iumi hol bak for acceptim help from olketa narawan?

¹⁸ Wanem nao iumi lanem from Paul? Taem iumi start for associate witim pipol blo Jehovah, iumi barava willing for acceptim help for olketa narawan, iumi luksavve iumi olsem wanfala pikinini nomoa and iumi laek for lanem staka samting. (1 Cor. 3:1, 2) Bat waswe distaem, sapos iumi servem Jehovah for staka year finis and iumi garem staka experience, iumi maet no willing for acceptim help, especially from olketa wea no stap longtaem lo truth olsem iumi. Bat staka taem Jehovah iusim olketa brata and sista for strongim iumi. (Rome 1:11, 12) Iumi mas luksavve lo diswan sapos iumi laek for kasem strong from Jehovah.

19. Why nao Paul hem win?

¹⁹ Bihaen Paul kamap Christian hem duim staka gud waka. Why nao olsem? Bikos hem no depend lo strong blo hemseleva, education wea hem kasem, selen, or background blo hem. Bat hem luksavve for hem win, hem mas hambol and barava depend lo Jehovah. Iumi evriwan savve followim example blo Paul for (1) depend lo Jehovah, (2) lane from olketa example lo Bible, and (3) acceptim help from olketa brata and sista. Then, nomata iumi wik, Jehovah bae mekem iumi for barava strong!