1. ¿Imanö kanqantatan apostol Pablu nirqan?

APOSTOL PABLUQA kallpannaq sientikunqantam nirqan. Pëqa kallpan ushakaptinmi Jehoväta kushitsinampaq kallpachakoq, tsëtaqa ruraq seguïdu mañakurmi (2 Cor. 4:16; 12:7-9; Rom. 7:21-23). Y chikeqninkuna kallpannaqtanö rikäyanqantapis nirqanmi. * Tsënö kaptimpis, manam tsënö pensayanqan nï kallpannaq sientikunqan llakitsinantaqa permitirqantsu (2 Cor. 10:10-12, 17, 18).

2. 2 Corintius 12:9, 10 ninqannö, ¿imatatan Pablu yachakurqan?

² Pabluqa yachakurqan, pishipashqa kanqan höra kallpayoq kanqantam (leyi 2 Corintius 12:9, 10). Jehoväqa Pabluta “pishipaq këchömi podernïqa mas rikakun” nirqanmi, tsënöqa nikarqan pë yanapanampaqmi. Tsëmi yachakushun imapis nimashqa mana llakikunapaq.

3. ¿Imanirtan “ashar ushashqa këpita” kushikunantsik?

³ Mana alli tratashqa këqa manam gustamantsiktsu. Tsëmi chikimaqnintsikkuna mana alli tratamashqaqa llakikushwan (Prov. 24:10). Tsënö kaptinqa, ¿imatatan  rurashwan? Tsëqa Pablunömi “ashar ushashqa këpita” kushikunantsik (2 Cor. 12:10). Chikimanqantsikchö y mana alli tratamanqantsikchömi Jesucristupa qateqnin kanqantsikqa rikakanqa (1 Pëd. 4:14). Jesusqa nirqannam qateqninkuna chikishqa kayänampaq kaqtaqa. Tsënömi pasakurqan punta cristiänukunawan (Juan 15:18-20). Tsë witsan Grecia nacionpita nunakunawan juntakaqkunaqa, mana allipam rikäyaq wakin wawqi panikunata. Jesuspa apostolninkuna Pëdruwan Juanpaqmi, judïukunaqa niyarqan ‘mana estudiashqa nunakuna y lluta nunakunalla’ kayanqanta (Hëch. 4:13). Atskaq nunakunam, Jesuspa qateqninkunataqa kallpannaqtanö y mana sirweqtanö rikäyaq.

4. Jesuspa punta qateqninkunaqa, ¿imatatan rurayarqan chikishqa karnin?

⁴ Jesuspa punta qateqninkunaqa, chikishqa karpis manam llakikuyarqantsu. Apostol Pëdruwan Juanqa kushikuyarqanmi Jesuspa qateqnin kayanqanrëkur qatikachashqa kayanqampita (Hëch. 4:18-21; 5:27-29, 40-42). Punta cristiänukunaqa humildi karmi, chikishqa karpis nunakunata Diospita yachatsiyarqan. Tsënö kanqantaqa rikantsik, pëkuna qellqayanqan mëtsika nunakunata kanan witsanyaq yanapaptinmi. Y Diospa Gobiernumpaq yachatsikuyanqanqa, ichikllachönam mandakamunqa (Mat. 24:14). Kanan witsanyaq ciëluta ëwaq wawqi panikunata chikeq gobiernukunaqa limpunam ushakäyashqa. Peru ciëluman ëwaq wawqi panikunaqa ciëluchönam këkäyan, tsëpita gobernayämunampaq (Rev. 5:10).

5. Juan 15:19 ninqannö, ¿imanirtan mana kaqpaq nunakuna churamantsik?

⁵ Kanan witsan chiki nunakunaqa, mana kaqpaq churamarnintsikmi imëkata nimantsik. Tsënöqa kayan, pëkunanö mana kashqam. Kanan witsan nunakunaqa, allish tukoqkunata y mana cäsukoqkunatam kuyayan. Tsënö kaptinmi humildi, pacienciakoq y cäsukoq kanantsik. Y manam polïticaman mëtikunantsiktsu nï tröpaman ëwanantsiktsu. Tsëmi pëkunanö mana kashqa mana sirweqtanö rikämantsik (leyi Juan 15:19; Rom. 12:2).

6. ¿Imakunatatan rurëkantsik Jehovä yanapamashqa?

⁶ Jehovä yanapamashqam, wakin nunakuna chikimashqapis më tsëchö yachatsikuykantsik. Tsëmi mëtsika revistakuna më tsëman chänampaq rurëkätsin y Bibliawanmi mëtsikaq nunakunata yanapëkantsik shumaq kawakuyänampaq. Tsë llapantaqa sirweqninkunawanmi Jehoväqa ruratsin. Tsënö kaptinqa, ¿imanöraq yanapakushwan? ¿Imanötan alli tsarakunapaq Jehovä yanapamantsik? Y noqantsikqa, ¿imatatan rurashwan Jehovä yanapamänapaq? Tsëtaqa Pablu ruranqampita yachakurishun.

7. ¿Imatatan Pablu ruranqampita yachakuntsik?

⁷ Pablu ruranqampitaqa yachakuntsik, Jehoväta sirwinqantsikchö kikintsikllaman mana markäkunapaq o yärakunapaqmi. Nunakunapa rikënimpaqqa  Pabluqa allish këta y reqishqa këta puëdirqanmi. Pëqa Röma nacionpa Tarsu markanchömi winarqan, tsë markachöqa imëkam kaq. Tsëchömi fariseukunapita respetashqa Gamaliel nuna, Pabluta yachatsirqan (Hëch. 5:34; 22:3). Tiempuwanqa reqishqam karqan, tsëchi kënöqa nirqan: “Judïukunapa religionninchöqa nacionnïchö winë mayïkunapitapis mas punta puntachömi këkarqä” (Gäl. 1:13, 14; Hëch. 26:4). Tsënö këkarpis Pabluqa Jehovämanmi markäkurqan o yärakurqan.

8. (1) Filipensis 3:8 ninqannö, ¿imatatan Pablu nirqan dejanqankunapaq? (2) ¿Imanirtan Pabluqa kushikurqan pishipaq kanqampita?

⁸ Pabluqa reqishqa këta y imëkatam dejarqan Jehoväta sirwinampaq. Pëqa llapan dejanqantam “mëtsika poqitanömi rikä” nirqan (leyi Filipensis 3:8). Peru Pabluta marka mayinkuna chikiyaptinmi, Jesucristupa qateqnin kanampaqqa alliraq kallpachakunan karqan (Hëch. 23:12-14). Y marka mayinkunaqa wilukacharkurmi carcelman llawitsiyarqan (Hëch. 16:19-24, 37). Pëqa, munanqannö imatapis mana rurëta puëdirninmi llakikoq (Rom. 7:21-25). Tsënö kaptimpis ‘kushikümi Cristurëkur pishipaq këpita’ nirmi, Pabluqa mana qelananqanta rikätsikurqan. Tsënöqa karqan kallpannaq kanqan tiempuchö, Jehovä yanapashqa kaptinmi (2 Cor. 4:7; 12:10).

9. ¿Imanötan mana alli pasamanqantsikkunata rikashwan?

⁹ Jehovä yanapamänapaqqa manam kikintsiklla rurëta puëdinqantsikman, yachanqantsikman, imanö wätashqa kanqantsikman y imapis kapamanqantsikmanqa pensanantsiktsu. Awmi, manam imanö kanqantsikpitatsu Jehoväqa yanapamäshun. Teyta Diospa sirweqninkunaqa manam nunakunapa rikënimpaq yachaqtsu, puëdeqtsu ni alli familiachö yurishqatsu  kayan. Tsëpa rantinqa, Jehoväqa “nunakunapa rikënimpaq kallpannaq kaqkunatam” yanapanqa (1 Cor. 1:26, 27). Teyta Diosta sirwi mana fäcilnö kaptinqa, yarpäshun kikin Jehovä yanapamänapaq kaqta. Tsëtaqa rikätsikushun creinqantsikpita y ruranqantsikpita mantsakätsimashqa Jehoväman mañakurninmi (Efes. 6:19, 20). Alläpa qeshyapäkurnimpis Jehoväman mañakushun, yachatsikur purinqantsikchö yanapëkamänapaq. Awmi, Jehovä yanapamashqam pëman mas markäkushun o yärakushun.

10. Diosta sirweqkunapaq Hebrëus 11:32-34 ninqampitaqa, ¿imatatan yachakuntsik?

¹⁰ Pabluqa seguïdum Diospa Palabrampita yachakoq. Tsënömi pëqa Jehoväpita y unë Diospa sirweqninkunapita alli yachakurqan. Tsënöllam Pablu cartakurqan Diospa unë sirweqninkunapita, Hebreu cristiänukuna yachakuyänampaq (leyi Hebrëus 11:32-34). Rey Davidta amïgunkuna chikiyanqanman pensarishun. Pablu Diosta shumaq sirwinampaqqa Davidpita yachakunqanmi yanaparqan, tsënöllam noqantsiktapis Pablu ruranqankunaqa yanapamantsik.

11. ¿Imanirtan Davidqa kallpannaqnö rikakurqan? (Rikäri qaranchö dibüjutawan).

¹¹ Goliatqa jatun y pelyëta yachaq nunam karqan, tsëchi Davidta kallpannaqtanö rikëkurqa mana kaqpaq churarqan. Davidqa pelyëta mana yachaq jövinmi karqan, tsënö karpis Jehovämanmi markäkurqan o yärakurqan. Tsënömi Jehoväqa David kallpannaq këkaptimpis, Goliatta wanutsinampaq yanaparqan (1 Sam. 17:41-45, 50).

12. ¿Ima mastan Davidta llakitsirqan?

¹² Davidtaqa manam tsëllatsu llakitsirqan, sinöqa imëkapam pasarqan. Davidqa Jehovä churanqan rey Saulpa sirweqninmi karqan. Davidta Saul allipa rikarpis, tiempu pasanqanmannömi allish tukurnin wanutsitapis munarqan (1 Sam. 18:6-9, 29; 19:9-11).

13. ¿Imatatan David rurarqan Saul mana alli trataptin?

¹³ Saul mana alli tratëkaptimpis, Jehovä churanqan rey kaptinmi Davidqa Saulta respetarqan (1 Sam. 24:6). Saul mana allikunata rurëkaptimpis, Davidqa manam Dioswan piñakurqantsu. Tsëpa rantinqa, Jehovä yanapanampaq kaqmanmi markäkurqan o yärakurqan (Sal. 18:1 y umanchö ninqantawan).

14. Davidtanö apostol Pabluta pasaptinqa, ¿imatatan rurarqan?

¹⁴ Davidtanöllam apostol Pablutapis mëtsikaq chikiyarqan. Tsë tiempuchö carguyoq nunakunaqa, Pabluta chikirmi maqatsiyaq y carcelman llawitsiyaq. Davidta Saul chikinqannöllam Pablutapis chikiyarqan. Y Pablupaqa cristiänu mayinkunapis contranmi kayarqan (2 Cor. 12:11; Filip. 3:18). Tsënö chikiyaptimpis, Pabluqa mana qelanashpam Diospita yachatsikur sïguirqan. Pabluqa wawqi paninkuna mana alli tratëkäyaptimpis, Jehovä Diosta kushitsinampaqmi pëkunata kuyëllapa tratarqan (2 Tim. 4:8). Tsënö tratëkäyaptimpis Jehoväman markäkur o yärakurmi, Pabluqa kushishqa karqan.

15. Mana alli tratamashqaqa, ¿imatatan ruranantsik?

 ¹⁵ Noqantsiktaqa, ¿trabäjuchö y familiachö Diosta mana sirweqkuna chimantsikku? ¿Imëllaqa wawqi panintsikkuna mana alli tratamashqantsikku? Tsënö kaptinqa Davidwan Pablu pasayanqanta yarpäshun. Awmi, ‘mana allita, alli kaqwan vencirnin sïguishun’ (Rom. 12:21). Noqantsikqa manam pitapis wanutsita munantsiktsu, sinöqa Diospa Palabrantam nunakunapa shonquman chätsita munantsik. Tsëtaqa rurashun nunakuna yachakuyta munayaptin Bibliawan yachatsirnin y mana alli tratamaqnintsikkunata respetarninmi (Mat. 5:44; 1 Pëd. 3:15-17).

16, 17. ¿Imatatan Pabluqa qonqarqantsu?

¹⁶ Apostol Pablutaqa Saulu nirmi reqiyaq, pëqa Jesuspa qateqninkunatam chikirnin qatikacharqan (Hëch. 7:58; 1 Tim. 1:13). Pablutaqa ciëlupitam Jesus parlapëkurqan y wiskuyäratsirmi qateqninkunata mana qatikachänampaq nirqan. Yapë rikëta munarqa chikinqan nunakunamanmi yanapayänampaq ëwanan karqan. Ananïas yanapanqantaqa chaskikurqan, humildi karmi (Hëch. 9:3-9, 17, 18).

¹⁷ Tiempuwannam Pabluqa respetashqa cristiänu karqan, pëqa manachi qonqarqantsu Damascu markaman ëwëkaptin ciëlupita patsë Jesus yachatsinqantaqa. Wawqi panikuna yanapayanqantaqa, humildi karmi wiyakurqan. Tsënö yanapayanqantaqa manachi imëpis qonqarqantsu (Col. 4:10, 11).

18. ¿Imanirtan pillapis yanapamanqantsikta wiyakuyqa fäciltsu?

¹⁸ Bibliapita yachakur qallarqa, pillapis yanapamashqaqa kushishqam wiyakoq kantsik. Tsënöqa ruraq kantsik, Teyta Diosnintsikpita maslla yachakuyta munarmi (1 Cor. 3:1, 2). Peru watakuna  pasanqanmannöqa mananam fäciltsu kanman yanapamanqantsikkunata wiyakuyqa y masqa mushoqllaraq wawqi panintsikkuna kayaptin. Yarpäshun, Jehoväqa wawqi panintsikkunawanmi yanapamantsik (Rom. 1:11, 12). Jehovä munanqannö rurashqaqa, kushishqam pëta sirwishun.

19. ¿Imanirtan Pabluqa imëkachö yanapakurqan?

¹⁹ Cristiänu tikrarirqa, imëkata rurarmi Pabluqa kushishqa karqan. Pëqa musyarqanmi humildi karninraq Jehoväwan alli kanampaq kaqta. Tsënömi rikätsikurqan puëdeq, yachaq, imëkayoq kë mana yanapakunqanta. Noqantsikpis, Pablunö Jehoväman markäkushun o yärakushun, unë Diosta sirweq nunakunapita yachakushun y wawqi panintsikkuna yanapamanqantsikta wiyakushun. Awmi, mana puëdishqaqa Jehovämi yanapamäshun.