1. ¿Apóstol Pabloca imatataj paillataj cuentata curca?

HUAQUINPICA apóstol Pabloca irquilla shinami sintirirca. Paillatajmi ñuca jahua aichaca maucayashpami caticun nirca. Paica allita rurangapaj, Diosta mañangapajmi esforzarirca. Pero maipica Jehová Diosca pai munashca shinaca mana cutichircachu (2 Corintios 4:16; 12:7-9; Romanos 7:21-23). Paipaj contracunaca Pablo irqui shina cajtami ricurcacuna. * Shujtajcuna paimanta mana allicunata nijpipish Pabloca imapi pandarishpapish chaicuna desanimachichunca mana saquircachu (2 Corintios 10:10-12, 17, 18).

2. 2 Corintios 12:9, 10-pi nishca shinaca ¿Pabloca imatataj alli intindirca?

² Huaquincunaca irquilla shina sintirishpapish sinchimi cancuna. Chaitami Pabloca alli intindirca (2 Corintios 12:9, 10-ta liyipai). Jehová Diosca Pablotaca: “Irquilla cajpimi ñuca poderca ashtahuan alli jundanga” nircami. Chashna nishpaca Pabloman Jehová Dios fuerzata cuna cashcatami nisha nirca. Puntapica pi cꞌamijpipish imamanta mana preocuparina cashcatami ricushun.

3. ¿Shujtajcuna rimajpi, llaquichijpica imamantataj cushicuna canchij?

³ Shujtajcuna ñucanchijta cꞌamichunca mana munanchijchu. Pero contracuna cꞌamijpi dimastij preocuparishpaca ñucanchijllatajmi  desanimari tucunchij (Proverbios 24:10). Shujtajcuna cꞌamijpi llaquichijpica Pablo shinami cushicunimi ni tucunchij (2 Corintios 12:10). ¿Imamantataj llaquichijpica cushicuna canchij? Ñucanchijta rimajpi llaquichijpica Jesusta alli catijcuna cashcatami ricuchishun (1 Pedro 4:14). Jesuspish paita catijcunataca llaquicunatami charinguichij nircami (Juan 15:18-20). Por ejemplo, maijancunaca Grecia llajtapi tiyaj costumbrecunata, yuyaicunatami catircacuna. Chaimantami Jesusta punta catijcunataca imapaj mana valijcunata shina, imata mana yachajcunata shina ricujcuna carca. Cutin judiocunaca apóstol Pedromanta, Juanmanta parlashpaca: ‘Paicunaca jatun yachanaman mana rishca, yanga runacunami can’ nircacunami (Hechos 4:13). Achcacunaca Jesusta catijcunataca politicapi mana chagrurishcamanta, cuartelman mana rishcamantami irquilla cajcunata shina ricurcacuna.

4. ¿Contracuna Jesusta catijcunamanta mana allicunata nijpica paicunaca imatataj rurarcacuna?

⁴ Jesusta punta catijcunaca paicunamanta mana allicunata nijpipish huillanataca manataj saquircacunachu. Por ejemplo, apóstol Pedro, apóstol Juanca Jesusmanta huillashcamanta, Jesusta catishcamanta llaquicunata apashpaca cushillami sintirircacuna (Hechos 4:18-21; 5:27-29, 40-42). Jesusta catijcunaca imamantapish mana pinganayachijcunachu carca. ¿Imamantataj caita ninchij? Jesuspaj discipulocunaca contracunatapish yallimi gentecunataca ayudarcacuna. Jehová Diosca paipaj espíritu santohuanmi huaquincunataca Bibliapi tiyaj huaquin librocunata quillcachirca. Cai librocunami achca gentecunata ayudashpa caticun. Diospaj Gobiernomanta huillashcaca cunancamami tiyan. Shinallataj cai Gobiernoca ñallami tucui muyundij Allpata mandanga (Mateo 24:14). Pero ñaupa punllacunapi Roma llajtata mandajcunaca cunan punllacunapica ña mana tiyanchu. Cutin paicuna llaquichishca Jesusta catijcunaca cunanca jahua pachapimi mandacuncuna. Shinallataj tal vez contracunata Yaya Dios causachijpica Diospaj Gobiernomi paicunataca mandanga (Apocalipsis 5:10).

5. ¿Diosta mana sirvijcunaca imamantataj ñucanchijtaca mana ricunayachisha nincuna?

⁵ Cunan punllacunapipish achca gentecunaca testigo de Jehovacunataca mana respetancunachu. Chaimantami ñucanchijmantaca burlarincuna. Imapaj mana valishcata shina, imata mana yachajcunata shinami ricuncuna. ¿Imamantataj chashna yuyancuna? Diosta mana sirvijcunaca jatun tucushcacunata, valishca tucujcunata, autoridadta mana cazujcunatami jatunyachincuna. Ashtahuanpish ñucanchijca humilde cangapaj, manso shungu cangapaj, cazuj cangapajmi esforzarinchij. Politicapipish mana chagrurinchijchu. Cuartelmanpish mana rinchijchu. Chaimantami gentecunaca ñucanchijtaca imapaj mana valishcata shina ricuncuna (Juan 15:19-ta liyipai; Romanos 12:2).

6. ¿Jehová Diosca imata pajtachichuntaj ayudacun?

⁶ Gentecuna imapaj mana valishcata shina ricujpipish Yayitu Diosca paipaj munaita pajtachichunmi ñucanchijtaca agllashca. Por ejemplo, mana nunca huillashca shina predicachunmi ñucanchijtaca ayudacun. Diosta sirvijcunaca chꞌican chiꞌcan shimicunapimi achca revistacunata traducinchij. Shinallataj achca gentecunatami alli causachun Bibliamanta yachachinchij. Tucui caicunataca Jehová Diospaj ayudahuanmi pajtachinchij. Diosca paipaj munaita pajtachingapajca irquilla shina gentecunatami utilizan. Pero  ¿cada unomanchu Yayitu Diosca fuerzata cunga? ¿Ñucanchijta ayudachunca imatataj rurana canchij? Apóstol Pablopaj ejemplomanta yachashunchij.

7. ¿Pablopaj ejemplomantaca imatataj yachanchij?

⁷ Apóstol Pablomanta yachashpaca Jehová Diosta sirvingapajca mana ñucanchijllapitaj confianatami yachanchij. Pabloca Tarso llajtapimi huiñarca. Tarso llajtaca Romapi saquirij Cilicia llajtapaj capitalmi carca. Chai llajtaca achca cullquita, rijsishca universidadtami charirca. Shinallataj Pablotaca rijsishca, respetashca Gamaliel runami yachachirca (Hechos 5:34; 22:3). Shuj tiempoca Pablopish judiocunapaj rijsishcami carca. Paica: “Ñuca mama llajtapi judiocuna yachachishcata yachacushpaca, ñuca huiñaicunatapish achcacunata yallimi yachaj carcani” nircami (Gálatas 1:13, 14; Hechos 26:4). Chashna cashpapish Pabloca mana jatun tucurcachu. Paillapitaj mana confiarcachu.

8. a) Filipenses 3:8-pi nishca shinaca ¿Pabloca pai imalla saquishca cosascunataca ima shinataj ricurca? b) ¿Pabloca irquilla cashpapish imamantataj cushicuihuan cani nirca?

⁸ Pabloca Diosta mana sirvijcunapaj ñaupajpi rijsishca, valishca canataca basurata shinami ricurca (Filipenses 3:8-ta liyipai). Jesuspaj discípulo tucujpimi Pablotaca pai huacharishca llajtapi causajcunallataj pꞌiñarcacuna (Hechos 23:12-14). Pablotaca romano cajpipish romanocunallatajmi macarcacuna, carcelpipish churarcacuna (Hechos 16:19-24, 37). Pabloca juchayuj cashcataca allimi yacharca. Chaimantami allicunata ruranaca paipajca sinchi cashcanga (Romanos 7:21-25). Contracuna llaquichijpipish, juchayuj cashpapish ñaupajmanmi catirca. Paica irquilla cashpapish cushicuihuanmi cani nircami. ¿Imamantataj chashna nirca? Pabloca irquilla shina sintirishpaca Jehová Dios ima shina ayudashcatami ricurca (2 Corintios 4:7; 12:10).

9. ¿Cai mundopi yachaj shina mana cashpapish imatataj rurai tucunchij?

⁹ Alli saludta charishcamanta, estudiashca cashcamanta, rijsishca llajtapi huacharishcamanta,  achca cullquita charishcamantami Diospajca valishcami cani nishpa mana yuyana canchij. Chashna mana yuyajpica Diosca ñucanchijmanmi fuerzata cushpa ayudanga. Cai pachapica achca yachajcuna, achca poderyujcunami tiyan. Shinapish Diospaj pueblo ucupica cai mundopaj yachajcuna shina mana tiyanchu. Ashtahuancarin irqui shina cajcunatami Diosca paita sirvichun agllashca (1 Corintios 1:26, 27). Cai mundopi charij shina o yachaj shina mana cashpapish Jehová Diostami sirvi tucunchij. Chashnami Jehová Dios ima shina ñucanchijta ayudashcataca ricui tucunchij. Por ejemplo, maijancunaca ñucanchij crishcacunamanta dudachunmi munangacuna. Paicunata manchashpaca Diospaj ayudatami mañana canchij (Efesios 6:19, 20). Ungushca cashpapish paita sirvishpa catingapajmi fuerzata cuchun mañana canchij. Jehová Dios ayudajpimi ñucanchij feca ashtahuan sinchiyanga.

10. Hebreos 11:32 al 34-pi parlashca Diosta alli sirvijcunamantaca ¿imamantataj yachana canchij?

¹⁰ Pabloca Dios quillcachishcacunata estudiashpami Diosta sirvijcunamantaca achcata yacharca. Paica hebreo huauqui panicunaman shuj cartata escribicushpaca Diosta sirvijcunapaj ejemplomanta yachachunmi animarca (Hebreos 11:32-34-ta liyipai). Rey Davidpi yuyashun. Davidtaca paipaj contracunami catirashpa llaquichirca. Shinallataj huaquincunacarin Davidpaj amigocuna canata saquishpami catirashpa llaquichircacuna. Pabloca Davidpaj ejemplomanta yachashpami ñaupajman catirca. Ñucanchijpish Pablopaj ejemplota ima shina catinatami yachashun.

11. ¿Imamantataj Davidca irquilla shina ricurirca? (Página 1-pi tiyaj dibujota ricui).

¹¹ Goliatca David irquilla huambra cajta ricushpami mana macanacui tucungachu nishpa yuyarca. Goliatca manchanai jatun runa, macanacungapajpish alli allichirishca runami carca. Cutin Davidca huambralla, macanacungapajpish mana allichirishca shinami carca. Pero paica Jehová Dios ayudanatami crirca. Jehová Dios paipaj poderhuan ayudajpimi Davidca Goliatta huañuchirca (1 Samuel 17:41-45, 50).

12. ¿Davidca ima shujtaj problematataj chꞌimbapurarca?

¹² Davidca shujtaj problemata chꞌimbapuracushpaca fuerza illaj shinami sintirishcanga. Paica Dios agllashca rey Saulta alli sirvijmi carca. Callaripica Saulca Davidtami respetaj carca. Pero qꞌuipaca jatun tucushcamantami Davidta envidiai callarirca, mana allipish tratai callarirca. Qꞌuipacarin huañuchinatami yuyarca (1 Samuel 18:6-9, 29; 19:9-11).

13. ¿Saúl mana alli tratajpica Davidca imatataj rurarca?

¹³ Davidca rey Saulta Jehová Dios agllashcatami yacharca. Chaimantami pai mana alli tratajpipish respetarca (1 Samuel 24:6). Saúl mana allicunata rurajpica Davidca Yaya Diosta mana culparcachu. Ashtahuanpish cai sinchi llaquicunata ahuantangapaj Yayitu Dios fuerzata cunatami crirca (Salmo 18:1).

14. ¿Apóstol Pabloca David shina ima jarcaicunatataj chꞌimbapurarca?

¹⁴ Pabloca casi David shina llaquicunatami chꞌimbapurarca. Religionta pushajcunapish mandajcunapishmi Pablotaca pꞌiñarcacuna. Paicunaca achca cutincunami macashpa prezupi churarcacuna. Davidta shinallatajmi paipaj huaquin amigocunapish, congregacionpi caj huaquincunapish llaquichishcanga (2 Corintios 12:11; Filipenses 3:18, NWT ).  Pero paipaj enemigocuna desanimachichunca mana saquircachu. Paicuna jarcajpipish predicashpami catirca. Huauqui panicuna pandarijpipish apóstol Pabloca paicunata cꞌuyashpami catirca. Ashtahuancarin Yaya Diostami huañuna horascama sirvirca (2 Timoteo 4:8). Jehová Diospi confiashcamantami caicunataca pajtachi tucurca.

15. ¿Shujtajcuna mana alli tratajpipish imatataj rurana canchij?

¹⁵ ¿Mana testigo familiacuna, trabajopi o escuelapi compañerocunachu mana alli tratancuna o catirashpa llaquichincuna? ¿Huauqui panicunachu mana alli tratashcacuna? Chashna pasajpica Davidpaj, Pablopaj ejemplotami yuyarina canchij. Ashtahuanpish millaitaca allihuanmi mishana canchij (Romanos 12:21). Gentecuna mana alli tratajpica David Goliathuan macanacushca layaca mana macanacunachu canchij. Chaipaj randica Yaya Diosmanta, paipaj Shimimantami yachachina canchij. Caitaca ¿ima shinataj pajtachi tucunchij? Gentecuna tapuicunata rurajpica Bibliahuanmi cutichina canchij. Ñucanchijta mana alli tratajpipish respetohuan, cꞌuyaihuanmi tratana canchij. Shinallataj shujtajcunapaj, ñucanchij contracunapajpish allicunatami rurana canchij (Mateo 5:44; 1 Pedro 3:15-17).

16, 17. ¿Pabloca imatataj mana nunca cungarirca?

¹⁶ Apóstol Pablotaca Jesuspaj discípulo manaraj tucujpica Saulo nishpami rijsijcuna carca. Paica Jesusta catijcunatapish catirashpa llaquichijmi carca (Hechos 7:58; 1 Timoteo 1:13). Pero huauqui panicunata ama llaquichichunmi Jesusca Pablotaca jahua pachamanta parlashpa mandarca. Shinallataj ñahui mana ricujtami saquirca. Pabloca cutin ricungapajca pai llaquichishcacunallatatajmi ayudata mañarca. Humilde cashcamantami Jesusta catij Ananiaspaj ayudata chasquirca (Hechos 9:3-9, 17, 18).

¹⁷ Asha tiempo qꞌuipaca Pabloca congregacionpimi rijsishca tucurca. Pero Pabloca Damasco ñanta ricujpi, Jesús jahua pachamanta parlashpa ima yachachishcataca mana cungarircachu. Paica humilde cashcamantami  huauqui panicunapish paita ayudachun saquirca. Pabloca: ‘Paicunaca ñucata achcata cushichijcunapishmi carca’ nircami (Colosenses 4:10, 11).

18. ¿Shujtajcunapaj ayudata chasquinaca imamantataj maipica sinchi can?

¹⁸ ¿Pablopaj ejemplomantaca imatataj yachanchij? Bibliamanta yachai callarishpaca shujtajcuna ñucanchijta ayudachunmi munarcanchij. Ashtahuan yachana cashcatapishmi intindircanchij (1 Corintios 3:1, 2). Shinapish Jehová Diosta achca huatacunata sirvishcamanta, achca experienciata charishcamantami shujtajcuna ayudachunca ña mana tanto munanchij. Ashtahuancarin cunanlla bautizarijcuna ayudasha nijpica chaita chasquinaca sinchimi can. Pero Jehová Diosca huauqui panicunahuanmi ñucanchijtaca sinchiyachin (Romanos 1:11, 12). Chaimantami paicunapaj ayudata chasquina canchij.

19. ¿Pabloca imamantataj valishca ruraicunata pajtachirca?

¹⁹ Jesusta sirvi callarishpaca Pabloca valishca ruraicunatami pajtachirca. Chaicunata pajtachingapajca Pabloca fuerzata charina, estudiado cana, cullquiyuj cana mana minishtirishcatami yacharca. Ashtahuanpish Jehová Diospi tucui shunguhuan confianata, humilde canatami yacharca. Ñucanchijpish Pablo shina Jehová Diospi confiashunchij. Diosta alli sirvijcunamanta yachashunchij. Huauqui panicunapaj ayudatapish chasquishunchij. Chashnami irqui shina sintirijpipish Jehová Diosca sinchiyachishpa catinga.