1. Apóstol Pabloca ¿imatata yaipi charirca?

APÓSTOL PABLOCA huaquinbica imatapash na rurai ushanshnami sintirirca. Chaimi cashna nirca: Ñuca ‘cuerpopash rucuyajunmi’, imapash nalicunata ama rurangapami ninanda esforzarini. Shinapash Jehová Diosca ñuca munashcashnaca ñuca mañaicunataca na uyahuanllu nishpa (2 Cor. 4:16; 12:7-9; Rom. 7:21-23). Pablopa contracunaca paitaca imatapash na rurai ushajtashnami ricun carca. * Shina ninajujpipash paica na llaquilla sintirircachu. Shinallata nimapa na sirvinichu nishpapash na pensarinllu carca (2 Cor. 10:10-12, 17, 18).

2. Apóstol Pabloca 2 Corintios 12:9, 10​pi nishca shinaca ¿imatata yachajurca?

² Apóstol Pabloca ¿imatata yachajurca? Huaquinbica imatapash na rurai ushanshnami sintirirca. Shinapash Jehová Dios ayudajpimi shinlli tucuita ushani nirca (2 Corintios 12:9, 10, liingui). Chaimi apóstol Pablotaca Jehová Diosca ‘imata na rurai ushajpipash, ñuca ninan ushaitami’ carasha nirca. Cunanga contracuna llaquichijpi ama yapata preocuparingapaj imata rurana cashcata yachajupashunchi.

3. ‘Rimashpa pingaichijpipash’ ¿imamandata cushijuna capanchi?

³ Pipash ñucanchita rimashpa pingaichichunga na munapanchichu. Shina tratajpica ñucanchica llaquillami sintiripanchi (Prov. 24:10). Shina tratajpica ¿imatata ñucanchicunaca rurana capanchi? Apóstol Pablopa nishcatami siempre yarina capanchi. Paica  nircami: “Rimashpa pingaichi tucujushpapash” cushijunami canguichi nishpa (2 Cor. 12:10). ¿Imamandata cushijuna capanchi? Jesuspa ali catijcuna caimandami shina llaquicunataca charigrinajuparcanchi (1 Ped. 4:14). Shinallata Jesuspashmi paipa ali catijcunataca llaquichinga nirca (Juan 15:18-20). Apostolcunapa punllacunapica Jesuspa ali catijcunaca shina llaquicunatami charirca. Griego gentecunapa costumbrecunata catijcunaca Jesusta ali catijcunataca imapapash na sirvijcunatashnami ricun carca. Shinallata judiocunapash Jesusta ali catijcunataca ‘na yachajushca, yanga runacunatashnami’ ricun carca. Apóstol Pedrota, Juandapash shinallatami ricun carca (Hech. 4:13). Jesusta ali catijcunaca politicapica na chapurinllu carca. Soldadocunapash na tucunllu carca. Chaimi ashtaca gentecunaca Jesusta ali catijcunataca imatapash na rurai ushajtashna ricushpa nimamanda na ricunayachin carca.

4. Jesusta ali catijcunaca paipa contracuna rimashpa pingaichijpica ¿imatata rurarca?

⁴ Jesusta ali catijcunaca paipa contracuna rimashpa pingaichijpi, ama parlaichichu nijpipash Jesusta catinataca na saquircachu. Shinallata Jesusmanda, paipa yachachishcacunamandapash apóstol Pedro, Juanbash cushijushpami villachishpa catirca (Hech. 4:18-21; 5:27-29, 40-42). Chai punllacunapica Jesusta ali catijcunaca Diospa Reinomanda na manllashpami villachirca. Shinami ashtaca gentecunata ayudarca. Por ejemplo, Jesuspa huaquin ali catijcunaca Bibliapa huaquin librocunatami escribirca. Chai escribishcacunami cunanbipash ashtaca ashtaca gentecunata ayudajun. Shinallata paicunaca Diospa Reinomi ñallapacha cai mundo enterota mandanga nishpami villachin carca (Mat. 24:14). Apostolcunapa punllacunapica romanocunaca ninanda catiriashpami llaquichirca. Shinapash paicunata catiriashpa llaquichijcunaca cunanbica huañushcami can. Cutin Jesusta ali catijcunaca cunanbica cielopimi Jesushuan mandanajun. Paicuna cai alpapi cashpaca Diospa Reinomandami villachin carca. Chaitami Jesusta ali catijcunata catiriashpa llaquichijcuna causarishpaca Diospa Reino mandajujta cuenta japinga (Apoc. 5:10).

5. Juan 15:19​pi nishca shinaca canllamanda gentecunaca ¿imashinata Testigocunataca ricun?

⁵ Cunanbipashmi Testigocunamandaca burlarin, imapapash na sirvijmi canguichi nin o muspacunami canguichi nin. ¿Imamandata shina nishca? Canllamanda gentecunashna na cajpimi Testigocunataca nalicachishpa ricun. Gentecunaca jariyashcacunatara, shujcunata bajopi churaj gentecunatarami alicachishpa ricun. Cutin Testigocunaca humilde, Jehovapa mandashcacunata cazuj, shujcunatapash juyaihuan tratangapami esforzaripanchi. Shinallata politicapipash na chapuripanchichu. Soldadocunapash na tucupanchichu. Chaicunapi na chapurijpimi gentecunaca Testigocunataca ricuitapacha na ricunayachin (Juan 15:19, liingui; Rom. 12:2).

6. Jehová Diosca ¿imata rurachunda ñucanchitaca ayudajun?

⁶ Gentecuna ñucanchita nalicachishpa ricujpipash Jehová Diosca shuj shuj ruraicunata pactachichunmi ayudajushca. Por ejemplo, cunan punllacunapi nimahora na villachishcatami mundo enteropi Diospa Reinomanda villachinajupanchi. Testigocunaca ashtaca ashtaca idiomacunapimi shuj shuj publicaciongunata llujchinajun. Shinallata Bibliamanda yachachishpami ashtaca millón gentecunata paicunapa causaipi cambiachun ayudanajun. Gentecuna ñucanchita na sirvijtashna ricujpipash Jehová Dios ayudajpillami pactachita ushapanchi. Shinapash ¿imashinata cada unota Jehová Diosca ayudajun? Jehová Dios ayudachunga ¿imatata rurana capanchi? Chaipaca apóstol Pablopa causaimanda ima quimsa yuyaicunata yachajui ushashcatami yachajupashun.

7. Apóstol Pablomandaca ¿imatata yachajupanchi?

⁷ Apóstol Pabloca pai imata yachajushcapi, imata rurai ushashcapipash na confiarircachu. Chaipa  randica siempremi Jehová Diospi confiarca. Gentecunapa ricuipica Pabloca jariyashca, shujcunapa ñaupajpipash alimi ricurita ushanman carca. Pabloca Tarso llactapimi viñarca. Chai llactapica ashtaca negociocuna, yachajungapapash alipacha universidadcunashnami tiarca. Pabloca alipacha estudiashcami carca. Shinallata paipa yachachijpash Gamalielmi carca. Gamalielca judiocunata ñaupaman pushajcunamanda ashtahuan rijsishca judiomi carca (Hech. 5:34; 22:3). Pabloca judiocunapurapica rijsishca rijsishcami carca. Chaimi paillata cashna nirca: “Judea llacta runacuna yachachijujta catijushpaca, ñuca llactapi ñucahuan viñaicunataca misharcanimi” nishpa (Gál. 1:13, 14; Hech. 26:4). Shina ali yachashpapash paica na paipillata confiarircachu.

8. a) Filipenses 3:8​pi nishca shinaca Jesusta catimandaca ¿imacunatallata Pabloca saquina tucurca? b) Pabloca ¿imamandata cushijuni nirca?

⁸ Apóstol Pabloca cai mundopi rijsishca rijsishca canataca na munarcachu. Shinallata cai mundopa cosascunataca ‘jupa ismushcatashnami’ ricun carca. Pabloca Jesusta ali catij tucungapaj munaimandami paipa munaitapash ladoman saquirca (Filipenses 3:8, liingui). Apóstol Pabloca Jesusta catimandami ashtaca llaquicunata charirca. Paipa propio llactamanda gentecunallatami ricuitapacha na ricunayachirca (Hech. 23:12-14). Apóstol Pablo Roma llactamanda cajpipashmi romanocunaca paitaca macashpa, prezo churarca (Hech. 16:19-24, 37). Pabloca juchayu cashcataca yaipimi charirca. Chaimi imatapash alita rurangapaj munashpapash nalitara rurana munaicuna ricurijpica llaquilla sintirin carca (Rom. 7:21-25). Contracuna paita llaquichijpi, imata na rurai ushajushpapash Jesusta catinataca na saquircachu. Ashtahuangarin cashnami nirca: ‘Imata na rurai ushajushpapash cushijunimi’ nishpa. ¿Imamandata shina nirca? Imatapash na rurai ushajushpaca Jehová Dios paita ayudajushcataca alipachami yacharca (2 Cor. 4:7; 12:10).

9. Llaquicunata charishpaca ¿imapita pensarina capanchi?

⁹ Jehová Dios ñucanchita ayudachunga colegiota o universidadta estudiashcapi, fuerzayu cashcapica na confiarinachu capanchi. Chaipa randica Jehová Dios ayudanapimi siempre confiana capanchi. Paipi confiashpaca Jehovapa  ñaupajpipash ashtahuan alimi ricurishun. Jehovata sirvijcunapurapica ‘cai pachapi alipacha yachajushcacuna, ushaita charijcuna, ninanda alicachi tucushcacunapash na taucacunachu can’. Chaipa randica Jehová Diosca “alipacha yachajushcacunata pingaichingapajmi, cai pachapi imatapash na yachajcunatara, Taita Diosca agllashca” (1 Cor. 1:26, 27). Shinaca Jehovata sirvitaca na ushashachu yashpaca na pensarijunachu capanchi. Chaipa randica Jehová Dios paita sirvichun imashna ñucanchita ayudajtami ricuna capanchi. Huaquinbica ñucanchi crishcacunamandami huaquin gentecunaca burlarin. Shina burlarinajujpica uchashpami ama manllashpa paicunahuan parlangapaj ayudahuai nishpa Jehovata mañanalla capanchi (Efes. 6:19, 20). Shinallata na jambirinalla ungüitachari charipanchi. Chashna llaquipi cashpapash Jehovata mañanataca na saquinachu capanchi. Shinallami paipa munaitapash pactachishpa catita ushashun. Shinaca Jehová Dios ayudanapi tucui shunguhuan confiapashunchi.

10. Hebreos 11:32-34​pi nishca shinaca ¿imamandata Jehovata sirvijcunamanda yachajunaca ali can?

¹⁰ Apóstol Pabloca Diospa Shimimanda yachajuna costumbreta charimandami Taita Diospa Shimitaca alipacha yacharca. Shinallata punda tiempopi Jehovata sirvijcunapa causaimanda yachajuna costumbretapashmi charirca. Hebreo huauquipanicunaman cartata escribishpaca, punda tiempopi Jehovata tucui shunguhuan sirvijcunapa causaimanda yachajuchunmi Pabloca animarca (Hebreos 11:32-34, liingui). Pabloca rey Davidpa causaimandami yachajurca. Rey Davidtaca paipa propio familiallata, shujcunapashmi ninanda llaquichirca. Cunanga Davidpa causaimanda Pablo imata yachajushcatami yachajugripanchi. Ñucanchicunapash Pabloshna cangapaj imata rurana cashcatapashmi yachajugripanchi.

11. Gentecunaca ¿imashnata Davidtaca ricun carca? (Callari paginapi dibujota ricupangui).

¹¹ Goliatca alipachami macanajunataca yacharca. Chaimi Davidtaca “chairalla huambragu cajta ricushpa yangapi churarca”. Davidhuan Goliatta ricushpaca Goliatca jatunbacha jatunmi carca. Goliatca alipacha soldadomi carca. Shinallata macanajungapaj cosascunatapash tucuitami charirca. Cutin Davidca na soldado carcachu. Macanajungapaj cosascunatapash na charircachu. Pero Davidca Jehová Dios ayudanapimi siempre confiarca. Gentecunapa ñavipica Davidca macanajuita na yachaj cuendami cashcanga. Shinapash Jehovapa ayudahuanga Davidca Goliattaca misharcami (1 Sam. 17:41-45, 50).

12. Davidca ¿ima llaquitata ashtahuan charirca?

¹² Davidca ¿ima llaquitata ashtahuan charirca? Davidca rey Saultami sirvishpa causarca. Rey Saultaca israelitacunata mandachunmi Jehová Diosca agllashca carca. Primerollaca rey Saulca Davidtaca respetashpami causajurca. Shinapash jipamanga, Saulca jariyashca o orgulloso tucuimandami Davidtaca envidiai callarirca. Chaimi nali tratashpa, huañuchingapapash munarca (1 Sam. 18:6-9, 29; 19:9-11).

13. Rey Saúl nali tratajpipash ¿imatata Davidca rurarca?

¹³ Rey Saulca Davidtaca nalipachami tratajurca. Shina nali tratajpipash Saulta Jehová Dios agllashcata yarishpami Davidca respetohuan tratarca (1 Sam. 24:6). Rey Saulca ninandapachami Davidtaca llaquichijurca. Shina llaquichijpipash Davidca canba culpami nishpaca Jehovataca na juchachircachu. Chaipa randica chai llaquicunata aguantashpa catichun Jehová Dios ayudajushcatami Davidca cuenta japirca (Sal. 18:1, callaringapaj shimicunata ricupangui).

14. Apóstol Pablopa causaica ¿imapita Davidpa causaihuanga parecido carca?

¹⁴ Apóstol Pablopa causaica ¿imapita Davidpa causaihuanga parecido carca? Pablotaca charij gentecuna, rijsishca rijsishca gentecunami na ricunayachin carca. Tauca viajetami paicunaca Pablota  macachun, prezo churachunbash mandan carca. David cuendami, Pablotapash paipa ali amigocuna nali tratarca. Huaquinbicarin huauquipanicunallatami nali tratarca (2 Cor. 12:11; Filip. 3:18). Gentecuna shina tratanajujpipash Pabloca paipa contracuna mishachunga na saquircachu. Masqui huauquipanicuna contrajpipash villachishpami catirca. Pabloca huañuna punllacamanmi tucui shunguhuan Jehovata sirvirca (2 Tim. 4:8). Llaquicunata charishpapash Pabloca Jehová Dios ayudanapimi siempre confiarca. Na paipillata confiarircachu.

15. Ñucanchica ¿imatata rurangapaj munana capanchi?

¹⁵ Huaquinbica escuelapi, colegiopi, na Testigo familiacunami ñucanchimanda burlarin, nali tratan o llaquichin. Huaquinbicarin congregacionmanda huauquipanicunallatami nali trataita ushan. Shina pasajujpica Davidpa, apóstol Pablopa causaitami yarina capanchi. Shinallata ‘aliguta rurashpa chai nalitaca mishana canguichi’ nishcatapashmi siempre yarina capanchi (Rom. 12:21). Ñucanchica Davidshnaca pihuanbash imapash problemacunata arreglangapaca na macanajunachu capanchi. Chaipa randica gentecunapa shunguman chayangapami Bibliata utilizana capanchi. Gentecuna Bibliamanda yachajungapaj munashpa shuj shuj tapuicunata rurajpica Bibliahuan ayudapashunchi. Shinallata gentecuna ñucanchita nali tratajpipash respetohuan, juyaihuanmi tratana capanchi. Ñucanchipa contracunatapashmi respetohuan tratana capanchi. Shinaca tucuicunatallata ali tratapashunchi (Mat. 5:44; 1 Ped. 3:15-17).

16, 17. Pabloca ¿imatata nimahora na cungarca?

¹⁶ Apóstol Pabloca Jesusta nara catishpaca Jesusta ali catijcunataca ninanda nalicachishpa, catiriashpa llaquichishpa, nali shimicunata rimashpami causarca. Paitaca Saulo nishpami rijsin carca (Hech. 7:58; 1 Tim. 1:13). Huauquipanicunata ama ashtahuan llaquichunmi Jesusca cielomanda Pablota parlashpa, paitaca ñausata saquirca. Cutin ricungapaca Pabloca ¿imatata rurarca? Jesusta ali catijcunapa ayudatami mascarca. Shina mascashpaca humilde cashcatami ricuchirca. Jesusta ali catij Ananías runagumi cutin Pablo ricuchun ayudarca (Hech. 9:3-9, 17, 18).

 ¹⁷ Tiempo jipaca apóstol Pabloca congregacionbi rijsishca rijsishcami tucurca. Damasco llactaman rijujpi Jesús imata rurashcataca Pabloca nimahora na cungarcachu. Humilde cana cashcatapashmi yachajurca. Shinallata shuj huauquipanicuna ayudachunbash alimanmi chasquirca. Huauquipanicuna shina ayudashcataca nimahora na cungarcachu (Col. 4:10, 11).

18. ¿Imamandata shujcunapa ayudata chasquinaca shinlli can?

¹⁸ Apóstol Pablomandaca ¿imatata yachajupanchi? Nara Testigo cashpaca shuj huauqui o shuj pani Bibliamanda intindichishpa ayudachunmi minishtipanchi. Shinallata Bibliamanda nara ali yachaimandami ayudachun munapanchi (1 Cor. 3:1, 2). Cunanga ashtaca huatacunata ña Testigo caimandami alipacha experienciata charipangui. Chaimi huaquinbica shuj huauqui o shuj pani imagutapash nishpa ayudachunga talvez na gushtapangui. Shinallata chairalla Testigo tucushca huauqui o pani quiquinda imatapash nishpa ayudachunbash na gushtapangui. Shinapash Jehová Diosca shuj huauquita o shuj panita utilizashpami quiquinda ayudaita ushan (Rom. 1:11, 12). Shinaca Jehová Dios cushca ayudacunata aliman chasquipashunchi.

19. Apóstol Pabloca ¿imatata rurarca?

¹⁹ Apóstol Pabloca cushilla causangapaca charishca cosascuna, alipacha estudiashca cana, shujcunapa ñaupajpi rijsishca rijsishca canaca na minishtirishca cashcatami ali intindirca. Ashtahuanbachaca Jehová Dios ayudanapimi siempre confiarca. Humilde cana cashcatapashmi ali intindirca. Jehová Dios ñucanchicunatapash cuidachunga Pablo cuenda cai quimsa yuyaicunata rurapashunchi: 1) Jehovapi siempre confiapashunchi. 2) Punda tiempomanda Jehovata sirvijcunamanda yachajupashunchi. 3) Shuj huauquipa, shuj panipa ayudata mascapashunchi. Imata na rurai ushanshna sintirijujpica Jehovallatami ñaupaman catichun ayudanga.