1. Eaa ta te apotetoro ko Paulo i akakite ua?

KUA akakite ua te apotetoro ko Paulo i tona turanga paruparu. Karanga aia kua “mate ua rai” e kua paruparu tona kopapa, kua aruaru aia i te rave i te tika, kua pure aia kia Iehova kia akakore i tona manamanata, kare a Iehova i pera ana. (2 Kori. 4:16; 12:7-9; Roma 7:21-23) Karanga a Paulo kua manako te aronga akaapa iaia e e tangata paruparu aia. * Kare aia i tuku ana i te manako kino o tetai ke e tona turanga, kia akaparuparu iaia.—2 Kori. 10:10-12, 17, 18.

2. Ia 2 Korinetia 12:9, 10, eaa te apiianga puapinga ta Paulo i kite?

² Kite mai a Paulo i te apiianga puapinga—ka maroiroi tetai tangata noatu me paruparu aia. (E tatau ia 2 Korinetia 12:9, 10.) Karanga a Iehova kia Paulo no Tona mana tei “te apikepike e taka meitaki ravaʼi toku maroiroi,” te aiteanga kua maroiroi a Paulo ia Iehova. Mea mua, ka akara tatou i te tumu auraka e manata me akakinoia tatou e te aronga patoi.

3. Eaa i riro ei e mea rekareka te akakino anga?

³ Kare tatou e reka ana me akakinoia tatou. Inara, me ka akakinoia mai e ka manata i ta ratou ka tuatua, ka  paruparu rai tatou. (Mase. 24:10) Akapeea tatou me ariu atu? Mei ia Paulo, ka akariro tatou e “e mea rekareka . . . te akakino” anga. (2 Kori. 12:10) No teaa ra? No te mea me akakinoia e me patoiia tatou e akairo te reira e e au pipi mou tatou na Iesu. (1 Pete. 4:14) Karanga a Iesu e ka takinokinoia tana au pipi. (Ioa. 15:18-20) Kua tupu teia i te anere mataiti mua. I te reira tuatau kua manako te aronga peu Ereni i te au Kerititiano e e aronga mārama kore e te puapinga kore. Kua manakoia e te ngati Iuda, e e aronga “apii koreia . . . e te kite kore,” te apotetoro ko Petero e Ioane. (Anga. 4:13) Akaraanga paruparu te au Kerititiano, kare ratou e piri ana ki te angaanga poritiki e te angaanga vaeau, e no reira kua akavaavaaia ratou.

4. Akapeea te au Kerititiano mua i te ariu anga atu ki te manako kino o te tangata?

⁴ Kua akariro ainei te au Kerititiano i te manako kino o te aronga patoi kia tāpu ia ratou? Kare. Ei akaraanga, kua manako te apotetoro ko Petero e Ioane e e tikaanga ngateitei kia takinga kinoia raua, no te aru ia Iesu e te apiianga iaia ki tetai ke. (Anga. 4:18-21; 5:27-29, 40-42) Kare te au pipi i akama ana. I te openga, e maata atu ta te au Kerititiano akaaka o te anere mataiti i rave no te tangata ravarai i te aronga patoi. Ei akaraanga, kua riro te au puka akauruia tei tataia, ei tauturu e ei akapuapinga i te mirioni ua atu tangata. Te Patireia ta ratou i akakite aere te tutara nei e kare e roa ki rungao i te tangata ravarai. (Mata. 24:14) Tuke ki te mana tutara poritiki tei takinokino i te au Kerititiano kua takoreia ratou, kareka ra te au pipi tiratiratu te tutara ra ei au ariki i te rangi. To ratou aronga patoi kua mate; e me ka akatuia mai ratou, ka riro ratou ei aronga i raro ake i te tutaraanga a te Patireia, tei turuia e te au Kerititiano, ta ratou i makitakita.—Apo. 5:10.

5. Ia Ioane 15:19, eaa te tumu i akavaavaaia ai te iti tangata o Iehova?

⁵ I teia tuatau, te akavaavaaia nei rai tatou ei iti tangata no Iehova e te kapikiia nei e e aronga kite kore e te paruparu. Eaa ra? No te mea kare to tatou tu e aite ana ki to te katoatoa. Ka tauta tatou i te akaari ua rai i te tu akaaka, maru, e te akarongo. I tetai tua te mareka ra teianei ao i te ngakau parau, te nengonengo e te akatietie. Kare katoa tatou e rave ana i te angaanga poritiki e te angaanga vaeau o te reira ngai. Kare tatou i to teianei ao, kua manakoia tatou e e aronga puapinga kore.—E tatau ia Ioane 15:19; Roma 12:2.

6. Eaa ta Iehova e akatupu nei na roto i tona iti tangata?

⁶ Noatu eaa to te ao manako ia tatou, e maata ta Iehova e akatupu nei. Te rave nei aia i te angaanga tutu evangeria e e angaanga puapinga maata. Te nenei ra e te tuaia ra e tona au tavini te au makatini reo tukeke i te enua ravarai, e te apii ra i te Pipiria ki te mirioni ua atu tangata kia meitaki mai to ratou oraanga. Akameitakiia a Iehova kua tupu teia angaanga manea, kua taangaanga Aia i te aronga paruparu kia akatupu i tana angaanga memeitaki. Akapeea tatou tataki tai? Ka tauturu ainei a Iehova ia tatou kia maroiroi? Me koia ïa, eaa ta tatou ka rave? Ka uriuri tatou i teianei e toru tu ka apii tatou mei te akaraanga o te apotetoro ko Paulo.

7. Eaa tetai apiianga ka kite mai tatou mei to Paulo akaraanga?

⁷ Tetai apiianga ka kite mai tatou mei te akaraanga o Paulo: Auraka e irinaki i toou uaorai maroiroi me kore toou kite me tavini ia Iehova. I to te tangata manako, e tumu ta Paulo kia ngakau parau e kia irinaki iaia uaorai. No Tareso mai aia, tetai oire maata i Roma. E oire puapinga e e ngai apiianga a Tareso. Kua apiiia a Paulo—e tetai arataki akonoanga ngati Iuda ko Gamaliela, i tona tuatau. (Anga. 5:34; 22:3) I tetai atianga, kua riro ana a Paulo e e tangata maata i roto i tona iti tangata. Karanga aia: “Ko au oki tei mua i te tuatua a te ngati Iuda ra i te tangata e manganui i toku uki i toku uaorai enua.” (Gala. 1:13, 14; Anga. 26:4) Kare a Paulo i irinaki iaia uaorai.

8. Ia Philipi 3:8, eaa to Paulo manako no te au mea tana i akaruke, e eaa i riro ei “e mea rekareka [kiaia] . . . te akakino” anga?

⁸ Rekareka a Paulo i te akaruke i te au mea tei akapuapinga iaia ki to te ao. Kua manako aia i te reira “ei teita.” (E tatau ia Philipi 3:8.) Kua tutaki a Paulo i teia i tona riro anga ei pipi na Karaiti. Kua makitakitaia aia e tona iti tangata. (Anga. 23:12-14) Kua pāpāia aia e kua tukunaia ki roto i te are auri e tona uaorai iti tangata Roma. (Anga. 16:19-24, 37) Pera katoa, kua kite mai a Paulo i tona tu apa ua e te turanga ngata, i tona rave anga i te tika. (Roma 7:21-25) Kare i akariro i te aronga patoi me kore tona tu apa ua kia akaparuparu iaia, “e mea rekareka [kiaia] . . . te akakino” anga. Eaa te tumu? No te mea me paruparu aia kua kite aia i to te Atua mana maroiroi.—2 Kori. 4:7; 12:10.

9. Eaa to tatou manako i te au mea kare i rauka ia tatou?

⁹ Me inangaro tatou i te maroiroi no ko mai ia Iehova, auraka tatou e manako e puapinga tatou me matutu tatou, te kite apii, te au peu, e te apinganui. Kare teia au mea e akapuapinga ia tatou kia  Iehova. Te tika, te maata anga i te iti tangata o te Atua “kare e rai te tangata pakari i te akonoanga i te kopapa nei, kare e rai te tangata mana, kare e rai te tangata ngateitei anau i kapikiia.” Mari ra, kua iki a Iehova i “te au mea neneva o te ao.” (1 Kori. 1:26, 27) No reira auraka e manako kare e rauka ia tatou i te tavini ia Iehova. Mari ra, e akara i te reira ei atianga noou i te kite i to Iehova maroiroi i te tauturu ia koe. Ei akaraanga, me emiemi koe i te aronga ka akaekoko ia koe, e pure kia Iehova no te ngakau toa, kia paruru koe i toou akarongo. (Ephe. 6:19, 20) Me kua tupu te taitaia kia koe no te maki kino, e pati kia Iehova te maroiroi kia rave ua atu koe i tana angaanga. I te au taime e kite ra koe i to Iehova rima tauturu, ka matutu ua atu toou akarongo e ka maroiroi ua rai koe.

10. Eaa te tumu kia apii tatou i te akaraanga o te aronga tiratiratu o te Pipiria, tei tataia ia Ebera 11:32-34?

¹⁰ E tangata apii meitaki a Paulo i te Tuatua Tapu. Maata tana i kite mai, kua apii katoa aia i te akaraanga o te aronga tataia to ratou tua i roto i te Tuatua a te Atua. Tataanga ki te au Kerititiano i Epera, kua pati a Paulo kia ratou kia akamanako i te akaraanga manea o te au tavini tiratiratu o Iehova. (E tatau ia Ebera 11:32-34.) Tetai ia ratou ko te Ariki ko Davida. Kua akakoromaki aia i te takinokino anga a tona au enemi, e au oa nona i mua ana. Ia tatou e akamanako ra i to Davida akaraanga, ka kite tatou akapeea to Davida oraanga i te akamaroiroi anga ia Paulo e ka akapeea tatou me aru i to Paulo akaraanga.

11. Eaa te tumu i akaraanga paruparu ei a Davida? (Akara i te tutu i te kapi mua.)

¹¹ Akaraanga e e tangata paruparu a Davida ki te toa uritumu ko Golia. I te kite anga a Golia ia Davida, “kua akavaavaa maira aia iaia.” No te mea, e toa maatamaata a Golia, kua papa meitaki e kua tereniia aia no te tamaki. I tetai tua e tangata ou ua a Davida i te akaraanga kare ona kite i te tamaki. Riro to Davida akaraanga paruparu ei maroiroi. Kua irinaki aia kia Iehova no te mana maroiroi e kua autu atura i tona enemi.—1 Samu. 17:41-45, 50.

12. Eaa te turanga ngata ta Davida i akakoromaki?

¹² Kua akakoromaki a Davida i te turanga ngata tei akaparuparu iaia. Kua tavini tiratiratu a Davida i ta Iehova i iki, ko Saula te ariki o Iseraela. I te akamata anga kua akono ua te Ariki ko Saula ia Davida. Muri maira, kua akatupu te ngakau parau ia Saula kia vareae ia Davida. Takinokino iora Saula ia Davida, e kua inangaro i te tamate iaia.—1 Samu. 18:6-9, 29; 19:9-11.

13. Akapeea a Davida i te ariu anga atu ki te kino a te Ariki ko Saula?

¹³ Noatu te takinokino a te Ariki ko Saula iaia, kua akangateitei ua rai a Davida i te ariki ikiia e Iehova. (1 Samu. 24:6) Kare a Davida i akaapa ia Iehova no te kino ia Saula kiaia. Kareka ra, kua irinaki a Davida kia Iehova no te maroiroi kia akakoromaki i tona turanga ngata.—Sala. 18:1.

14. Eaa te au turanga ngata tei tupu ki te apotetoro ko Paulo, kua aite rai ki to Davida?

¹⁴ Kua aite rai to Paulo turanga ki to Davida. Kua kino atu to Paulo enemi kiaia. Makitakitaia aia e te aronga mana  i tona tuatau. Kua pāpāia aia e kua tiria ki roto i te are auri. Mei ia Davida, kua takinokinoia a Paulo e tona uaorai au oa. Kua patoi tetai pae iaia i roto i te putuputuanga Kerititiano. (2 Kori. 12:11; Phili. 3:18) Noatu rai kua akakoromaki ua atu a Paulo. Akapeea? Kua tutu aere aia noatu te takinokinoanga. Kua vai tiratiratu ki tona au taeake e te au tuaine. Tei maata roa atu, kua vai tiratiratu aia ki te Atua e tae ua atu ki tona mate. (2 Timo. 4:8) Kua rauka iaia i te rave i teia no te mea kua irinaki aia kia Iehova.

15. Eaa to tatou akakoroanga, ka akapeea me rave i teia?

¹⁵ I akakinoia ana ainei koe me kore i takinga kinoia ana e toou au oa apii, oa angaanga, e te mema pamiri kare i te Kite? Akapeea i roto i te putuputuanga? Me koia ïa, akamaara i te akaraanga o Davida e Paulo. “Kia mate ra te kino ia koe i te meitaki.” (Roma 12:21) Toou akakoroanga, kare kia maka i te toka ki runga i te rae o tetai, mei ia Davida rai, mari ra kia tamou marie i ta te Atua Tuatua. Ka rauka ia koe na te akaari anga i te pauanga i roto i te Pipiria, na te akaari i te tu maru e te kauraro marie ki te aronga takinokino, e te aroa ua i to tatou enemi.—Mata. 5:44; 1 Pete. 3:15-17.

16-17. Eaa ta Paulo kare i akangaropoina?

¹⁶ I mua ake ka riro te apotetoro ko Paulo ei pipi na Karaiti, ei tangata ou, kua takinokino ana aia i te pipi a Iesu. (Anga. 7:58; 1 Timo. 1:13) Na Iesu i tāpu ia Paulo, ko Saula, mei te takinokino anga i te putuputuanga Kerititiano. Tuatua a Iesu kia Paulo mei te rangi mai e kua akamatapo iaia. Kia puera akaou tona mata, kua kimi tauturu a Paulo ki te aronga i takinokino aia. Kua āriki akaaka atura aia i te tauturu a te pipi ko Anania, kua puera akaou to Paulo mata.—Anga. 9:3-9, 17, 18.

¹⁷ Riro a Paulo ei mema matauia i roto i te putuputuanga Kerititiano, inara kare aia i akangaropoina ana i ta Iesu apii  kiaia i runga i te mataara ki Damaseko. Kua vai akaaka a Paulo, kua āriki ua i te tauturu mei tona au taeake e te au tuaine. Karanga aia ko ratou “tei akapumaana mai” iaku nei.—Kolo. 4:10, 11.

18. Eaa te tumu ka viviki tatou i te patoi i te tauturu a tetai ke?

¹⁸ Eaa te apiianga mei ia Paulo? I te kapiti anga tatou ki te iti tangata o Iehova, kua āriki ua tatou i te tauturu a tetai pae, no te mea e iti ua ta tatou i kite, mei te pepe varevare te tu i te pae vaerua. (1 Kori. 3:1, 2) Akapeea ra i teianei? Me kua tavini ana tatou ia Iehova no tetai tuatau roa e kua nakirokiro mai i teianei, penei ka viviki tatou i te patoi i te tauturu a tetai ke, a tetai tangata ou, i roto i te tuatua mou. Inara, e taangaanga ua ana a Iehova i to tatou au taeake e te au tuaine no te akapumaana ia tatou. (Roma 1:11, 12) Kia āriki ua tatou i teia, e rauka ai te mana maroiroi o Iehova.

19. Eaa te tumu i puapinga ai a Paulo?

¹⁹ E maata te au angaanga ta Paulo i rave i tona riro anga mai ei Kerititiano. No teaa ra? No te mea kua kite aia e ka puapinga tetai tangata, me irinaki aia kare i tona uaorai maroiroi, kite, apinganui e noea mai aia, mari ra ki runga i tona tu akaaka e kia Iehova. Ka aru ua rai tatou i te akaraanga o Paulo (1) irinaki kia Iehova, (2) apii i te akaraanga Pipiria, e te (3) āriki i te tauturu a te au taeake. Noatu me akaraanga paruparu tatou na Iehova tatou e akamaroiroi!