1. Со признајнѓа о апостол Павле баши песке?

О АПОСТОЛ ПАВЛЕ признајнѓа кај понекогаш осетинела пе сине слабо. Ов искрено вакерѓа кај хари похари нашавела пли физичко сила, кај мора те боринел пе те шај те постапинел исправно хем кај о Јехова на одговоринела сине леске секогаш ко молитве аѓаар сар ов со аџикерела сине (2. Кор. 4:16; 12:7-9; Рим. 7:21-23). Исто аѓаар, о Павле признајнѓа кај лескере противникија дикхена ле сине сар некој со на врединела. * Сепак, ов на мукхља о негативно мислибе е јаверенгоро ни лескере лична слабостија те влијајнен упри лесте хем те чхивен ле те мислинен кај на врединела (2. Кор. 10:10-12, 17, 18).

2. Спрема 2. Коринќаните 12:9, 10, која важно поука сиклило о Павле?

² О Павле сиклило јекх важно поука. Ов халило кај о мануш шај те овел силно чак кеда мислинела песке кај тано слабо. (Читин 2. Коринќаните 12:9, 10.) О Јехова вакерѓа леске: „Мли сила сикавела пе целосно кеда сиан слабо“. Адалеа, уствари мангља те вакерел леске кај ов ка дел ле и сила со фалинела леске. Те дикха најангле соске на ваљани те ова вознемириме кеда амаре противникија вреџинена амен.

3. Со ка поможинел аменге те овел амен исто стави спрема о вреџиба сар о апостол Павле?

³ Никој амендар на мангела те овел вреџимо. Со шај те  случинел пе ако о душмања вреџинена амен хем ако адава бут вознемиринела амен? Шај те обесхрабрина амен (Изр. 24:10). Тегани, сар ваљани те дикха ко асавке вреџиба? Шукар тано те овел амен исто стави сар о апостол Павле, кова со вакерѓа: „Уживинава... ко вреџиба“ (2. Кор. 12:10). Уствари о вреџиба хем о противибе тане доказ кај сием чачутне ученикија е Христосескере (1. Пет. 4:14). О Исус вакерѓа кај лескере следбеникија ка овен прогониме (Јован 15:18-20). Акава исто случинѓа пе ко прво веко. Ко адава време, о мануша упро кола со влијајнѓа и грчко култура дикхена сине е христијанен сар проста хем кај на врединена. Слично стави сине хем е Евреен. На пример, несаве лендар дикхена сине е Петаре хем е Јоване сар обична мануша со нане лен бари школа (Дела 4:13). Адалеске со на сине лен нисаво политичко влијание хем нисави воено моќ, о христијања дикхјона сине сар слаба хем о мануша на поштујнена лен сине.

4. Сар влијајнѓа о негативно стави е противниконгоро упро прва христијања?

⁴ Дали о прва христијања дозволинѓе о негативно стави ленгере противниконгоро те чхинавел лен те служинен е Девлеске? На. На пример е Петареске хем е Јованеске сине чест те овен прогониме адалеске со сине ученикија е Исусескере хем со сикавена сине е јаверен баши лесте (Дела 4:18-21; 5:27-29, 40-42). Е христијанен на сине лен нисави причина те лаџан. Уствари, и историја сикавела кај адала понизна Христосескере ученикија таро прво веко керѓе бут повише шукарипе е манушенге него било кој таро ленгере противникија. На пример, о библиска лила со несаве таро адала христијања пишинѓе, авдиве да поможинена хем дена надеж милиоња манушенге. Исто аѓаар, о Царство башо кова со ола керена сине лафи више постојнела хем панда хари ка владинел упри цели Пхув (Мат. 24:14). А со случинѓа пе е моќно политичко империјаја која со прогонинела лен сине? Ој више бершенцар на постојнела, а адала верна ученикија владинена сар царија таро небо. Ама, окола со противинена пе сине ленге акана тане муле. А ако јекх диве воскреснинена, упри ленде ка владинел о Царство кова со објавинена ле сине о христијања коленде со ола мрзинена лен сине (Отк. 5:10).

5. Спрема Јован 15:19, соске о мануша таро свето на поштујнена амен?

⁵ Авдиве да несаве мануша на поштујнена амен хем асана аменге адалеске со мислинена кај сием проста хем кај на врединаја. Соске? Адалеске со нане амен иста ставија сар ленде. Трудинаја амен те ова понизна, кротка хем послушна. Тари јавер страна, о мануша ко свето ценинена околен сој тане горда, арогантна хем бунтовна. Освен адава, амен на мешинаја амен ки политика хем на џаја ки војска. Адалеске со сием поразлична таро мануша ко свето авдиве, ола мислинена кај на врединаја ништо. (Читин Јован 15:19; Рим. 12:2.)

6. Со успејнела о Јехова те керел преку пло народо?

⁶ Бизи разлика сар дикхела амен о свето, о Јехова преку аменде керела баре буќа. Адалеске со дела пло водство, керела пе и најбари проповедничко активност ки манушикани историја. Авдиве лескере слуге објавинена о најпреведиме хем о најпечатиме списанија ко свето, хем користинена и Библија те шај те поможинен милиоња манушенге те овел лен пошукар живото. Са акава керела о Јехова, кова со користинела група манушен колен со о свето дикхела лен сар слаба хем бизи вредност те шај те керел моќна буќа. Ама, дали шај о Јехова те дел сила туке да хем те керел тут позорало? Ако оја, со мора те кере те добине лескири помош? Те дикха трин буќа со шај те сикљова таро апостол Павле.

7. Со сикљоваја таро е Павлескоро пример?

⁷ Јекх бути со сикљоваја таро Павле тани те на овел амен превише доверба ки амари сила или ко амаре способностија џикоте служинаја е Јеховаске. Ако дикхаја сар о мануша со дикхена, е Павле сине ле шукар причине те овел гордо хем бут уверимо ки песте. Ов барило ко Тарс, и главно диз ки Киликија, провинција ко Римско Царство. О Тарс сине барвали диз која сине пенџарди пало пле школе. Е Павле сине ле баро образование — ов сине сикавдо таро Гамалиел, јекх таро најпоштујме еврејска водачија ко прво веко (Дела 5:34; 22:3). Несаво време е Павле да сине ле несаво влијание ко еврејско општество. Ов вакерѓа: „Напредујнава сине ко јудаизам повише таро бут мле врсникија ко мло народо“ (Гал. 1:13, 14; Дела 26:4). Сепак, е Павле на сине ле превише доверба ки песте.

8. Спрема Филипјаните 3:8, сар дикхела сине о Павле ко буќа колендар со откажинѓа пе, хем ки сави смисла уживинела сине ко слабостија?

⁸ О Павле спремно откажинѓа пе таро буќа кола со е јаверенге сине превише важна. Уствари, ов халило кај са адала буќа со сине ле англедер тане обично ѓубре. (Читин Филипјаните 3:8.) О Павле скупо платинѓа адалеске со уло е Христосескоро следбенико. Лескоро народо мрзинела ле сине (Дела 23:12-14). Иако о Павле сине римско граѓани, о Римјања марѓе ле хем чхивѓе ле ко затвор (Дела 16:19-24, 37). Освен адава, о Павле сине бут свесно башо пле слабостија хем башо пле ограничувања (Рим. 7:21-25). Ама на мукхља акала буќа те разочаринен ле хем те обесхрабринен ле. Наместо адава, ов вакерѓа: „Уживинава ко слабостија“. Соске сине ле асавко стави? Адалеске со кеда осетинела пе сине слабо, шај сине јасно те дикхел кај и сила со иси ле нане лескири, него „авела таро Девел“ (2. Кор. 4:7; 12:10).

9. Сар ваљани те дикха ко буќа кола со мислинаја кај тане пречка те служина е Јеховаске?

⁹ Ако мангаја о Јехова те поможинел амен, на смејнаја те мислина кај амари вредност зависинела тари амари физичко сила, образование, таро адава котар аваја или таро барвалипе со иси амен. Нане потреба те овен  амен акала буќа те шај о Јехова те користинел амен. Уствари, машкар е Девлескере слуге „нане бут џене кола сој мудра спрема о манушикане мерилија, ни бут моќна, а ни бут џене со авена таро важна фамилие“. Наместо адава, о Јехова биринѓа те користинел „адава со о свето дикхела ле сар слабо“ (1. Кор. 1:26, 27). Адалеске, иако шај нане тут о буќа кола сој спомниме ко почеток таро акава пасус, адава нане пречка те служине е Јеховаске. Наместо адава, баш тегани шај јасно те дикхе лескоро моќно вас ко тло живото. На пример ако дараја таро окола со нападинена тло верување, молин е Јехова те поможинел туке храбро те бранине тли вера (Еф. 6:19, 20). Ако боринеа тут хронично насвалипаја, молин е Јехова те дел тут и сила со ваљани туке те шај те служине леске најшукар со шај. Секогаш кеда осетинеа сар о Јехова поможинела туке, тли вера овела позорали хем добинеа неви сила.

10. Соске ваљани те проучина о примерија е Девлескере верна слугенгере таро пурано време, сар окола сој спомниме ко Евреите 11:32-34?

¹⁰ О Павле хор истражинела сине о света списија. Ов џанела сине бут фактија, ама исто аѓаар сикљовела сине таро примерија е Девлескере верна слугенгере кола сој тане спомниме ки Библија. Кеда пишинела сине е еврејска христијаненге, о Павле вакерѓа ленге те размислинен башо пример со денѓе адала верна мануша. (Читин Евреите 11:32-34.) Размислин башо цари о Давид. Ов мора сине те соочинел пе противибаја на само таро пле душмања него хем таро окола со некогаш сине леске амала. Веројатно о Павле добинѓа бари сила адалеске со размислинела сине башо живото акале царескоро. Те дикха сар шај амен да, слично сар о Павле, те размислина хем те добина сила таро пример е Давидескоро.

11. Соске о Давид дикхјола сине слабо? (Дикх и слика ки насловно страна.)

¹¹ О Голијат кова со сине силно војнико, дикхела сине е Давиде сар слабо хем асала сине леске. Акава обучимо војнико сине бут побаро хем сине ле пошукар оружје. Бут појавер лестар, о Давид сине само јекх терно чхаво бизо искуство кова со на дикхјола сине спремно борбаке. Ама, уствари тегани кеда дикхјола сине најслабо, о Давид сине најсилно. Сине ле доверба ки е Јеховаскири сила, хем о Јехова поможинѓа леске те мударел пле душмане е Голијате (1. Сам. 17:41-45, 50).

12. Саве јавере проблемеа мора сине те соочинел пе о Давид?

¹² О Давид мора сине те соочинел пе панда јекхе проблемеа кова со шај керела ле сине те осетинел пе слабо. Ов верно служинѓа е Саулеске, коле со о Јехова чхивѓа ле те овел цари упро Израел. Ко почеток, о цари о Саул поштујнела сине е Давиде. Ама покасно, адалеске со сине гордо, ов уло љубоморно е Давидеске. О Саул понашинела пе сине бут лошно е Давидеа, па чак пробинѓа те мударел ле (1. Сам. 18:6-9, 29; 19:9-11).

13. Саво стави сине е Давиде иако о цари о Саул понашинела пе сине леа неправедно?

¹³ Иако о Саул понашинела пе сине неправедно леа, о Давид понадари да сикавела сине поштовање спрема акава цари со сине чхивдо таро Јехова (1. Сам. 24:6). О Давид на кривинела сине е Девле башо е Саулескере лошна постапке. Наместо адава, е Давиде сине ле доверба кај о Јехова ка дел ле и потребно сила те истрајнел ко акава пхаро испит (Пс. 18:1, натпис).

14. Слично сар о Давид, саве пхарипа сине е апостол Павле?

¹⁴ О апостол Павле да сине ко слична околностија сар о Давид. Лескере душмања сине  бут помоќна лестар. Бут влијателна верска хем политичка водачија ко лескоро време мрзинена ле сине. О Павле бут пути сине мардо хем чхивдо ко затвор. Освен адава, окола со ваљани сине те овен леске амала понашинена пе сине леа лошно, исто сар со сине е Давидеа. Несаве таро собрание чак противинѓе пе леске (2. Кор. 12:11; Фил. 3:18). Ама, о Павле успејнѓа те побединел саринен со сине против лесте. Сар? Ов понадари да проповединела сине, иако противинена пе сине леске. Ачхило верно пле пхраленге хем пхењенге чак кеда ола да разочаринена ле сине. А сој најважно таро са, ов ачхило верно е Девлеске џи ко крајо таро пло живото (2. Тим. 4:8). Успејнѓа те накхавел са акала пхарипа адалеске со сине ле доверба ко Јехова, а на ки пли сила хем способностија.

15. Која тани амари цел, хем сар шај те успејна ки лате?

¹⁵ Дали ту да мора те соочине тут вреџибаја хем противибаја таро тле соученикија, колеге или фамилија кола со нане е Јеховаскере сведокија? Дали некој таро собрание понашинѓа пе туја лошно? Ако оја, сетин тут ко Давид хем ко Павле. Ту да шај те победине „о лошнипа шукарипаја“ (Рим. 12:21). Кеда о мануша противинена пе туке, тли цел на ваљани те овел те борине тут ленцар сар о Давид со боринѓа пе е Голијатеа. Наместо адава, ваљани те победине о лошнипа аѓаар со ка трудине тут те поможине е манушенге те сикљовен башо Јехова хем баши Библија. Ки адаја цел шај те успејне ако одговоринеа ко ленгере пучиба аѓаар со ка користине и Библија, ако сиан љубезно хем сикавеа поштовање спрема окола со понашинена пе лошно туја, хем ако кереа шукарипе сариненге, чак хем тле душманенге (Мат. 5:44; 1. Пет. 3:15-17).

16-17. Со на бистерѓа никогаш о Павле?

¹⁶ Англедер те овел е Христосескоро ученико, о Павле сине јекх терно дрско мануш кова со прогонинела сине е Исусескере следбеникон (Дела 7:58; 1. Тим. 1:13). Коркори о Исус чхинавѓа е Павле, кова со тегани сине пенџардо сар Савле, понадари да те нападинел е христијанско собрание. Ов керѓа леа лафи таро небо хем корјарѓа ле. Те шај сине палем  те дикхел, о Павле мора сине те родел помош баш таро окола со прогонинела лен сине. Ов понизно прифатинѓа помош таро јекх ученико со викинела пе сине Ананија, кова со поможинѓа леске палем те дикхел (Дела 9:3-9, 17, 18).

¹⁷ Иако покасно сине ле важно улога ко христијанско собрание, о Павле никогаш на бистерѓа и поука со денѓа ле о Исус џикоте џала сине ко Дамаск. Ов ачхило понизно, хем спремно прифатинѓа и помош таро пле пхраља хем пхења. О Павле признајнѓа кај ола поможинѓе леске хем керѓе ле те овел позорало (Кол. 4:10, 11).

18. Соске понекогаш на сием спремна те прифатина помош јаверендар?

¹⁸ Со шај те сикљова таро Павле? Кеда прво пути почминѓем те дружина амен е Јеховаскере сведоконцар, шај сием сине спремна те прифатина помош јаверендар. Сием сине свесна кај ко духовно поглед сием сине сар „тикне чхаве“ хем кај иси бут те сикљова (1. Кор. 3:1, 2). Ама, сар тано акана? Ако више бершенцар служинаја е Јеховаске хем добинѓем побаро искуство, шај на сием више добором спремна те прифатина помош, посебно таро окола со нане ко чачипе повише време амендар. Сепак, на смејнаја те бистра кај о Јехова бут пути користинела амаре пхрален хем пхењен те шај те керел амен позорале (Рим. 1:11, 12). Ако мангаја те добина сила таро Јехова, ваљани те прифатина помош таро амаре пхраља хем пхења.

19. Соске о Павле сине успешно?

¹⁹ Откеда уло христијани, о Павле сине бут успешно. Соске? Адалеске со халило кај о успех на зависинела тари некаскири физичко сила, образование, барвалипе, котар авела или сави положба иси ле ко општество. Наместо адава, ов халило кај, ако тано понизно хем ако иси ле доверба ко Јехова, ка шај те керел бут шукар буќа. Те џа сарине пало пример е Павлескоро аѓаар со 1) ка овел амен доверба ко Јехова, 2) ка сикљова таро библиска примерија хем 3) ка прифатина помош таро амаре пхраља хем пхења. Тегани, кобор хем те мислина кај сием слаба, о Јехова ка поможинел аменге те ова силна!