1. So o apostol Pavle priznajindža?

O APOSTOL Pavle priznajindža so disavo puti osetindža pe slabo. Ov phendža so oleso telo „raspadini pe“, so valjandža te borini pe te čerel odova soj tano ispravno hem so o Jehova na odgovorindža uvek ko olese molitve adžahar sar so ov mislindža (2. Kor. 4:16; 12:7-9; Rimlj. 7:21-23). Isto adžahar, o Pavle phendža so olese protivnikija mislindže olestar soj tano slabo. * Ama, ov na dozvolindža averengo negativno mišljenje ja olese slabostija te čhiven le te mislini soj tano bezvredno (2. Kor. 10:10-12, 17, 18).

2. Premali 2. Korinćanima 12:9, 10, so o Pavle sikljilo?

² O Pavle sikljilo so o manuš šaj te ovel zoralo čak hem ked osetini pe soj tano slabo. (Čitin 2. Korinćanima 12:9, 10.) O Jehova phendža e Pavlese: „Mi sila potpuno mothovi pe ked tu hijan slabo.“ Odova značindža so o Jehova ka del le snaga koja valjani lese. Najangleder, akana ka dikha sose na valjani te ova uznemirime ked amare protivnikija vređinena amen.

3. Sose uživinaja ked vređinena amen?

³ Niko amendar na mangela neko te vređini le. Ama, ako amare neprijateljija vređinena amen hem amen but uznemirinaja  amen sebepi odova so phenena, tegani amen šaj te obeshrabrina amen (Posl. 24:10). Sar valjani te dikha ko odova ked amare neprijateljija vređinena amen? Sar o Pavle, hem amen šaj te uživina ked vređinena amen (2. Kor. 12:10). Sose? Odolese so, o uvrede hem o protivljenje tane dokaz so amen čače hijam e Isusese učenikija (1. Petr. 4:14). O Isus phendža so olese sledbenikija ka oven progonime (Jov. 15:18-20). Baš odova desindža pe e hrišćanendže ko prvo veko. Ko odova vreme, okola upro kaste utičindža i grčko kultura, mislindže so o hrišćanija nane inteligentna hem soj tane slaba. Isto adžahar, hem o Jevreja smatrindže so o hrišćanija „nane obrazovana hem soj tane obična manuša“, sar so hine o apostolija o Petar hem o Jovan (Dela 4:13). O hrišćanija šaj izgledindže slaba, sebepi so na hine len političko uticaj ja vojno moć. Isto adžahar, o manuša na poštujindže len.

4. Sar o prva hrišćanija reagujindže ked olenge protivnikija hine len negativno mišljenje olendar?

⁴ Da li o prva hrišćanija dozvolindže te zaustavini len o negativno mišljenje ando olenge protivnikija? Na. Na primer, e Petarese hem e Jovanese hine čast te oven progonime sebepi so sledinena e Isuse hem vačerena ando olese sikljoviba (Dela 4:18-21; 5:27-29, 40-42). O učenikija na hine len sose te ladžan. Odola ponizna hrišćanija čerdže pobaro šukaripe e manušendže, nego bilo kova olengo protivniko. Na primer, e biblijake knjige kola pisindže disave ando odola hrišćanija, pana pomožinena hem dena nada milionija manušendže. Isto adžahar, o Kraljevstvo kolestar on vačerdže akana vladini ko nebo hem pana hari ka vladini upro sa o manuša ki phuv (Mat. 24:14). Ama, i moćno vladavina ko purano Rim koja progonindža e hrišćanen, već beršencar na postojini, a odola verna učenikija akana tane kraljija ko nebo. Olenge protivnikija davno mulje hem ako iked ka uskrsninen, upro lende ka vladini o Kraljevstvo kolestar vačerdže o hrišćanija kolen on mrzindže (Otkr. 5:10).

5. Premalo Jovan 15:19, sose o manuša ko sveto na poštujinena e Jehovase narodo?

⁵ Avdije, disave manuša na poštujinena e Jehovase svedokonen hem marena amendže muj, odolese so mislinena so na hijam inteligentna hem so hijam slaba. Sose? Odolese so nane amen ista stavija sar o manuša ko sveto. Amen trudinaja amen te ova ponizna, krotka hem poslušna. Ki aver strana, o manuša ko sveto vazdena okolen soj tane ponosna, arogantna hem buntovna. Uzo odova, na mešinaja amen ki politika hem na pridružinaja amen e vojskače ni ki jekh država. Odolese so na uklopinaja amen ko kalup ando akava sveto, o manuša mislinena so amen hijam manje vredna. (Čitin Jovan 15:19; Rimlj. 12:2.)

6. Koja bari buti o Jehova čerela prekalo pe sluge?

⁶ Iako o manuša ko sveto mislinena so amen hijam slaba, o Jehova prekalo amende čerela bare buča. Jekh olendar tani odova so avdije propovedini pe sar niked dži akana. Avdije, olese sluge proizvodinena o časopisija kola najviše prevodinena pe hem delinena pe ko celo sveto. Isto adžahar, on koristinena i Biblija te pomožinen milionija manušendže te ovel len pošukar dživdipe. Sa akava šaj te čerel pe sebepi so o Jehova koristini jekh grupa ando manuša, kolendar o sveto mislini soj tane slaba, te čerel odola bare buča. Ama, so šaj te phena svakonestar amendar? Da li o Jehova šaj te pomožini amendže te čera bare buča? Ako ja, tegani so amen mora te čera te šaj te dobina odija pomoć? Akana ka dikha trin konkretna buča kola šaj te sikljova ando e Pavleso primer.

7. Koja tani jekh buti koja sikljovaja ando e Pavleso primer?

⁷ Jekh buti koja šaj te sikljova ando e Pavleso primer tani: Dži služineja e Jehovase, ma oslonin tut upri ti snaga ja upro te sposobnostija. Premalo e manušenge merilija, o Pavle hine le razlog te ovel ponosno hem samouvereno. Sose? Ov barilo ki glavno diz, ko Tarsis, ki rimsko pokrajina. Odija hine barvali diz ki koja hine najpendžardi škola. O Pavle hine but školujimo manuš, odolese so ole sikavdža o Gamalilo, kova hine jekh ando najpoštujime manuša maškaro jevrejska vođe ko odova vreme (Dela 5:34; 22:3). Jekh vreme, o Pavle hine but uticajno manuš maškaro Jevreja. Ov phendža: „Napredujindžum ko judaizam pobuter ando but me vrsnikija kotar mo narodo“ (Gal. 1:13, 14; Dela 26:4). Ipak, o Pavle na oslonindža pe upro peste.

8. Premalo Filipljanima 3:8, sar o Pavle dikhlja ko buča kolendar odreknindža pe, hem sose phendža so uživini ked tano slabo?

⁸ E Pavlese hine drago te odreknini pe ando buča kola premalo e manušenge merilija čerdže le te ovel važno manuš. Ov haljilo so odola buča u stvari hine sar „đubre.“ (Čitin Filipljanima 3:8.) O Pavle nakhlja bare pharipa odolese so hine e Hristeso sledbenik. O manuša ando leso narodo mrzindže le (Dela 23:12-14). O Rimljanija mardže le hem phanlje le, iako hine rimsko građanin (Dela 16:19-24, 37). Ov haljilo soj tano nesavršeno hem soj tano but pharo te čerel odova soj tano ispravno (Rimlj. 7:21-25). Umesto te dozvolini olese neprijateljija ja olese mane te čhinaven le te ovel e Hristeso učeniko, ov phendža: „Uživinava ked hijum slabo.“ Sose phendža odova? Odoleso so ked hine slabo, ov dikhlja sar o Devel pomožini lese ko leso dživdipe (2. Kor. 4:7; 12:10).

9. Sar valjani te dikha ki bilo koja buti koja šaj te čerel amen te dičhova so hijam slaba?

⁹ Amen na isminaja te mislina so i snaga, o obrazovanje, amaro poreklo ja o materijalna buča mothovena kobor hijam vredna anglo e Jehovase jačha. U stvari, but ando e Jehovaso narodo nane „mudra premalo e manušenge merilija, ni but zorale, ni but ando okola  kola avena ando ugledna porodice.“ Umesto odova, o Jehova odlučindža te koristini okolen kastar o manuša mislinena soj tane slaba (1. Kor. 1:26, 27). Odolese, iako nane amen o buča kola tane spomenime ko početko ando akava odlomko, tu šaj hem ponodri te služine e Jehovase. Odola buča šaj te oven prilika te dikhe sar o Jehova pomožini tut hem podržini tut. Na primer, ako daraja ando manuša kola napadinena tekle verovanja, tegani molin tut e Jehovase te del tut hrabrost te odbranine odova ko so verujineja (Ef. 6:19, 20). Ako borineja tut disave ozbiljno nabormipaja, molin e Jehova te del tut snaga te služine lese kobor god šaj. Svako puti ked dikheja sar o Jehova pomožini tuče, ti vera barjola hem tu oveja pana pozoralo.

10. Sose valjani te proučina o primerija kola mothovdže o verna manuša, sar soj tane okola kola spominena pe ko Jevrejima 11:32-34?

¹⁰ O Pavle temeljno proučindža o spisija. Dži proučindža, ov sikljilo but buča, ama isto adžahar but sikljilo hem kotar primerija ando e Jehovase verna sluge kolendar vačeri pe ko e Devleso Lafi. Ked pisindža e Jevrejendže, o Pavle phendža te razmislinen ando e Jehovase verna sluge kola mothovdže but šukar primer. (Čitin Jevrejima 11:32-34.) Te dikha o primer ando jekh asavko sluga, o kralj David. Ov na hine le protivljenje samo ando pe neprijateljija, nego hem ando manuša kola angleder hine olese amala. Dži ka razmotrina e Davideso primer, ka dikha sar oleso primer pomožindža e Pavlese hem sar amen šaj te oponašina e Pavle.

11. Sose o David šajindža te dičhol soj tano slabo? (Dikh i slika ko početko ando akava članko.)

¹¹ Anglo e Golijatese jačha, o David dičhilo slabo, sose o Golijat hine zoralo ratniko. Ked o Golijat dikhlja e Davide ov „asandilo lese.“ O Golijat hine pobaro, pošukar opremimo hem pošukar trenirimo aso maribe. Ki aver strana, o David hine jekh terno čhavo kova na hine le iskustvo hem kova izgledindža so nane šukar opremimo aso maribe. Ama, u stvari ov hine zoralo. Ov uzdajindža pe upro Jehova hem ov dindža le snaga te pobedini e Golijate (1. Sam. 17:41-45, 50).

12. Kole avere problemeja o David valjandža te borini pe?

¹² O David valjandža te borini pe pana jekhe problemeja sebepi kova šajindža te osetini pe soj tano slabo hem nemoćno. Ov verno služindža e Saulese, kas o Jehova čhivdža te ovel kralj ando Izrael. Ki početka, o Saul poštujindža e Davide. Ama, sar dželo o vreme, sebepi so hine ponosno, o Saul ulo ljubomorno upro David. O Saul lošno ponašindža pe premalo David hem čak pokušindža te mudari le (1. Sam. 18:6-9, 29; 19:9-11).

13. Sar o David reagujindža ked o Saul nepravedno postupindža premalo leste?

¹³ Iako o Saul nepravedno postupindža premalo David, ov hem ponodri mothovdža poštovanje premalo e Jehovaso birimo kralj (1. Sam. 24:6). O David na krivindža e Jehova sebepi o lošna buča kola o Saul čerdža. Umesto odova, ov oslonindža pe upro Jehova te del le snaga koja valjani lese te izdržini odova pharipe (Ps. 18:1, uvod).

14. Sar e Pavlesi situacija hine slično sar e Davidesi?

¹⁴ O apostol Pavle hine ki slično situacija sar o David. E Pavlese neprijateljija hine but pozorale lestar. Disave vođe kola hine len baro položaj ko oleso vreme, mrzindže le. But putija, on mardže le hem phanlje le. Sar e Davidese, hem e Pavlese protivindže pe o manuša kola valjandže te oven olese amala. Čak, disave hrišćanija ki skupština protivindže pe olese (2. Kor. 12:11; Fil. 3:18). Ama, o Pavle ikljilo sar pobednik maškaro sarinende kola borindže pe protiv oleste. Sar  čerdža odova? Iako hine le protivljenje, ov hem ponodri propovedindža. Ačhilo verno pe phraljendže hem e phenjendže, čak iako on razočarindže le. Soj tano najvažno, ov ačhilo verno e Devlese sa dži o krajo ando po dživdipe (2. Tim. 4:8). Ov šajindža te čerel sa akala buča, na sose ov hine zoralo, nego sebepi so oslonindža pe upro Jehova.

15. Kova cilj isi amen, hem sar šaj te ispunina le?

¹⁵ Da li te amala ki škola, kolege ki buti ja neko andi ti porodica vređinena tut ja protivinena pe tuče? Da li dijekh puti ki skupština neko lošno ponašindža pe premalo tute? Ako ja, tegani ma bistri e Pavleso hem e Davideso primer. Tu šaj te pobedine o lošnipe šukaripaja (Rimlj. 12:21). Ked o manuša protivinena pe amendže, amen na borinaja amen olencar sar o David e Golijateja. Umesto odova, amen pobedinaja o lošnipe adžahar so daja sa amendar te sikava e manušen ando Jehova hem andi Biblija. Odova šaj te čere ko nekobor načinija: koristin i Biblija te odgovorine ko olenge pučiba, mothov poštovanje hem ov ljubazno premalo okola kola lošno ponašinena pe premalo tute hem čer šukar buča, čak hem te neprijateljendže (Mat. 5:44; 1. Petr. 3:15-17).

16-17. So o Pavle niked na bisterdža?

¹⁶ Angleder o apostol Pavle te ovel e Isuseso učenik, ov hine jekh ponosno terno manuš kova progonindža e Isusese učenikonen (Dela 7:58; 1. Tim. 1:13). O Isus zaustavindža e Pavle, kova tegani vičindža pe Savle, te na progonini i hrišćansko skupština. O Isus ando nebo vačerdža e Pavleja hem korjačerdža le. Te šaj palem te dikhel, o Pavle morandilo te rodel pomoć upravo ando manuša kolen angleder progonindža. Ov ponizno prihvatindža i pomoć ando učenik kaso anav hine o Ananija, kova irindža leso vid (Dela 9:3-9, 17, 18).

¹⁷ Kasnije, o Pavle hine le bari uloga ki hrišćansko skupština, ama niked na bisterdža odova so o Isus sikavdža le ked hine ko drumo aso Damask. Ov ačhilo ponizno hem hine spremno te prihvatini i pomoć ando phralja hem phenja. Odolese ov phendža so on but utešindže le (Kol. 4:10, 11, fusn.).

18. Sose disavo puti na prihvatinaja averengi pomoć?

 ¹⁸ So šaj te sikljova ando Pavle? Ked prvo puti počmindžam te družina amen e Jehovase svedokonencar, amen šaj hijam le spremna te prihvatina averengi pomoć sose haljiljam so hijam čhave ko duhovno pogledi hem so isi amen pana but te sikljova (1. Kor. 3:1, 2). Ama, save hijam akana? Ako već but berša služinaja e Jehovase hem isi amen baro iskustvo, šaj na hijam više odobor spremna te prihvatina averengi pomoć, posebno ando okola kola nane odobor berša ko čačipe sar amen. Ama, but putija o Jehova koristini amare phraljen hem phenjen te zorjačeri amen (Rimlj. 1:11, 12). Amen mora te haljova odova ako mangaja o Jehova te del amen snaga.

19. Sose o Pavle hine uspešno?

¹⁹ Palo odova so ulo hrišćanin, o Pavle čerdža disave bare buča. Sose? Odolese so sikljilo so o uspeh na zavisini andi e manušesi snaga, ando e manušeso obrazovanje, barvalipe ja poreklo, već andi olesi poniznost hem ando oleso pouzdanje upro Jehova. Sare amen šaj te oponašina e Pavleso primer adžahar so (1) ka oslonina amen upro Jehova, (2) ka sikljova ando e biblijake primerija hem (3) ka prihvatina i pomoć ando amare phralja. Tegani, bizo obzir kobor amen mislinaja so hijam slaba, o Jehova ka del amen snaga.