1. Bici Paolo al’iyemire n’obwalagale?

ENTUMWA Paolo yayemire n’obwalagale oku hali amango ali muzamba. Adesire oku hali amango omubiri gwage “gwakag’isherera bunyi-bunyi,” cikone, akag’icihangana ajire aminja ciru ankaba hali amango Yehova arhakag’ishuza amasala gage nk’oku alonzize. (2 Kor. 4:16; 12:7-9; Bar. 7:21-23) Paolo al’imanyire oku abashombanyi bage bakag’imubona nka muzamba erhi ngonyi. * Cikone arhalekaga ebintu bibi bakag’imuderhera erhi obuzamba bwage birhume acibona nk’ali wabusha.​—2 Kor. 10:10-12, 17, 18.

2. Lugenda 2 Abakorinti 12:9, 10, isomo lihi lya bulagirire Paolo aciyigirizize?

² Paolo abwine oku byanahashikana omuntu abe n’emisi ciru akaba ali arhanya mpu ali muzamba. (Osome 2 Abakorinti 12:9, 10) Yehova abwira Paolo oku obuhashe bwage omu “buzamba mwo buciyerekana,” kw’okuderha oku obuhashe bwa Yehova buba bwakurhuliriza. Rhulolage bulya gurhi rhurhashinganini rhuvunike omurhima amango abashombanyi birhu bali barhuhagalika.

3. Bulya gurhi rhukwanine rhushagaluke amango rhulirhwajacirwa?

³ Ntaye muli rhwe osima ajacirwe. Cikone, erhi abashombanyi birhu bakarhujacira erhi kurhuderha kubi rhurhashinganini rhukarhanya bwenene kw’ebi bali baderha bulya oko kwanarhuvuna omurhima. (Mig. 24:10) Gurhi rhushinganine rhukabona ebyo bijaci by’abashombanyi birhu? Aka Paolo, rhwanaba  “n’omwishingo amango . . . rhuli rhwajacirwa.” (2 Kor. 12:10) Bulya gurhi? Bulya amango bali barhujacira n’okurhuhagalika, oko kwanayerekana oku rhuli banafunzi bw’okuli ba Yezu. (1 Pet. 4:14) Yezu adesire oku abanafunzi bage bakashombirwe n’igulu. (Yowane 15:18-20) Abakristu bw’omu myaka igana mirhanzi nabo balishombirwe. N’oko kwakag’irhuma Abagiriki babona Abakristu nka bihwinja na ba busha. Abayahudi, bakag’ibona Abakristu nka “bantu kone barhasomaga,” Petro na Yowane babwizirwe ntyo. (Ebijiro by’Entumwa 4:13) Abakristu bakabonekana oku barhagwerhi misi bulya ntaye wakabaderhire omu politike y’ecihugo erhi ciru omu basoda, oko kwakarhuma abantu bababona nka bakage bw’omu cihugo.

4. Gurhi Abakristu bajijire erhi abashombanyi babo bakabajacire erhi kubaderha kubi?

⁴ K’abo Bakristu barhanzi balesire ebijaci by’abashombanyi babo birhume baleka okukolera Nnamahanga? Nanga. Kwa lwiganyo, entumwa Petro na Yowane bakag’ibona oku lir’iragi na lukengwa lunene okujacirwa n’okusholoshonzwa erhi izino lya Yezu n’enyigirizo zage birhuma. (Ebijiro by’Entumwa 4:18-21; 5:27-29, 40-42) Ntabyo byoshi-byoshi byakarhumire entumwa za yumva enshonyi. Ensiku zoshi, abo Bakristu barhanzi babêra birhohye, bakag’ijira bintu binji binja lyo barhabala abandi, eco cali cijiro abashombanyi babo barhakag’ijira. Kwa lwiganyo, ebitabu byalongozibagwa n’iroho lya Nnamahanga byayandikagwa n’abo Bakristu barhanzi, bicigendekire byarhabala emiliyoni y’abantu ene n’okubaha oburhulirize. N’Obwami bakag’iyalagaza buli bwarhambula omu mpingu, na hano hofi-hofi bwarhambula abantu boshi hanw’igulu. (Mat. 24:14) Cikone, oburhegesi bw’e Roma bwakag’ilibuza Abakristu bw’okuli bwayish’ihika ebuzinda, n’abanafunzi babezire bishwekerezi kuli Nnamahanga muli ago mango, ene bali barhambula omu Bwami bwa Nnamahanga haguma na Yezu omu mpingu. Abashombanyi babo bohe bafîre, n’erhi byakahashikana bayish’ifûka, banayish’irhambulwa n’Obwami bwa Nnamahanga bwalaganyizibagwa balya Bakristu bakag’ilibuza.​—Maf. 5:10.

5. Nk’oku biyerekinwe omu lwandiko lwa Yowane 15:19, bulya gurhi Abahamirizi ba Yehova balibuzibwa?

⁵ Ene nalyo, Abahamirizi ba Yehova bali babonererwa, banarhubwire mpu nta bwenge rhujira na kandi mpu rhuba bazamba erhi ngonyi. Bulya gurhi rhushombwa? Bulya rhurhajira morhere gali nk’ag’abantu rhulamiremo. Rhuba birhohye, batûdu na bakurhumikira. Abantu bali omw’igulu ene bali bakuciyerekana, ba bucibone na bagoma. Cikone rhwehe rhurhaja omu by’epolitike, rhurhaja busoda. Rhuba lubero n’abantu b’er’igulu, na ntyo banakarhubona nka bantu ba busha bwenene.​—Osome Yowane 15:19; Bar. 12:2.

6. Mikolo ehi abakozi ba Yehova bali bahikiriza kugerera oburhabale bwage?

⁶ Ciru akaba abantu banakarhubonerera n’okubona nka rhuli bantu ba ntya-ntya, Yehova yehe ali arhukolesa lyo rhuhikiriza ebintu binja. Ali arhurhabala lyo rhuhikiriza bwinja omukolo gwirhu gw’okuyalagaza emyanzi minja y’Obwami kulusha agandi mango goshi. Abakozi bage ene bali bacapisa ebitabu, okubihindula omu zindi ndimi n’okubigabira abantu. Bali bakolesa Ebibliya lyo barhabala emiliyoni y’abantu ekubûle akalamo kabo. Yehova ye oli wajira ebyo byoshi bihashikane. Ali akolesa ecigusho c’abantu igulu libona oku bali ba busha-busha, lyo bahikiriza eyo mikolo yage ehunyire bushiru bunji na misi minji. Gurhi obo burhabale buyerekire ngasi muguma wirhu? Ka Yehova anarhurhabale rhube n’emisi? Bici rhushinganine rhujire lyo rhuhabwa obo burhabale? Rhulole bintu bisharhu rhwakaciyigiriza kugerera olwiganyo lw’entumwa Paolo.

7. Isomo lihi olwiganyo lwa Paolo lwakarhuyigiriza?

⁷ Olwiganyo lwa Paolo lwanarhuyigiriza er’isomo ly’obulagirire: Orhakag’ilangalira emisi yawe amango oli wakolera Yehova. Bantu banji bakag’izigira Paolo erhi borhere bwage n’obuhashe bwage birhuma. Akabire wakuciyerekana bwenene bulya agwerhe buhashe bunji. Akulirâga e Tarsisi omu lugo lukolu lw’e Roma, lugo lwinja na lwa basomi. Paolo agwêrhe bwenge bunji e masomo bulya ayigirizibagwa na Gamaliyeli mwalimu muyahudi walimanyikine bwenene. (Ebijiro by’Entumwa 5:34; 22:3) Ali gwerhe oborhere bw’Abayahudi. Adêrha ntya: “Omw’idîni ly’Abayahudi, nalusha birhu banji rhwakulaga rhweshi.” (Gal. 1:13, 14; Ebijiro by’Entumwa 26:4) Cikone Paolo arhalangaliraga obwenge bwage yene.

8. Nk’oku biyerekinwe omu lwandiko lwa Abafilipi 3:8, NWT, (n’amahugûlo g’idako ly’obukurasa) gurhi Paolo akag’ibona ebintu al’igwerhe embere abe Mukristu, na bulya gurhi akag’iba “n’omwishingo erhi akajacirwe?”

⁸ Erhi Paolo akalonzîze okulama nka kula igulu lilonza abantu balame, ali aba na bintu binji bwenene. Cikone ahikira ah’abona ebyo bintu byoshi agwerhe nka “bikabulirwa.” (Osome Abafilipi 3:8, NWT n’amahugûlo g’idako ly’obukurasa) Paolo agezire omu malibuko manji ly’aba mwanafunzi wa Kristu. Ciru byahikira aha ashombwa n’abantu b’ishanja lyage. (Ebijiro by’Entumwa 23:12-14) Abaroma bamushweka banamushurha. (Ebijiro by’Entumwa 16:19-24, 37) Alihugûsirwe oku arhali mwimana, kwanaba kuzibu kuli ye okujira aminja. (Bar. 7:21-25) Cikone arhalekaga okuba mwanafunzi wa Kristu mpu bulya ali omu mazibu manji erhi mpu bulya akag’icibona wa busha. Lubero n’oko aba “n’omwishingo omu buzamba bwage.” Bulya gurhi? Bulya amango akag’iba ali omu mazibu, go mango akag’ibona emisi ya Nnamahanga eri yakola omu kalamo kage.​—2 Kor. 4:7; 12:10.

9. Gurhi rhushinganine rhukabona ebintu birhujira rhubonekane nka ba busha-busha?

⁹ Erhi rhwakalonza rhube n’emisi ya Yehova, rhurhashinganini rhukarhanya okw’iranga lirhu, amasomo girhu, obûko bwirhu erhi ebintu rhugwerhe, bulya, arhali ebyo bintu byo birhuma rhwaba ba bulagirire omu masu ga Yehova. Lubero n’oko Nnamahanga “arhacishogaga bantu  banji bagwerhe obumanye bw’eby’en’igulu n’abagwerhe obuhashe barhali banji n’abalengerire barhali banji.” Cikone Yehova “acishozire ebintu bizamba by’en’igulu.” (1 Kor. 1:26, 27) Co cirhumire ciru akaba orhagwerhi ebintu biri biganirire oku murhondêro gw’eci cifungo, byanahashikana okolere Yehova. Ogendekere wabona akanga olimo kw’okubulirwa oku kali ka bulagirire bulya kakurhabala ohugûkwe kunganaci Yehova ali akurhabala n’emisi yage. Kwa lwiganyo, erhi wakabuganana n’abantu balonzize okukuyobohya bakarhuma waba n’akarhinda okubiyerekire obwemere bwawe, onashenge Yehova ho n’aho akuhe oburhwali bw’okubaganiza. (Efez. 6:19, 20) Erhi akaba oli walwisa obulwala buzibu, wanahûna Yehova emisi olagirireko ly’ogendekeza omukolo gwage. Erhi wakagendekera wabona oku Yehova ali akurhabala, obuyemere bwawe bwanagendekera bwasera na ntyo wanagendekera waba n’emisi.

10. Bulya gurhi rhushinganine rhuyige enyiganyo z’abakozi bishwekerezi ba Yehova baganirirwe omu Abahabraniya 11:32-34?

¹⁰ Paolo akag’iciyigiriza Amandiko matagatifu ngasi mango. Oko kwamurhabala aciyigiriza bintu binji lugenda abakozi ba Yehova b’amango ga mîra. Erhi Paolo ayandikira Abakristu Bahabraniya, ababwira oku bakarhanya lugenda enyiganyo z’abakozi ba Yehova ba mîra. (Osome Abahabraniya 11:32-34) Rhuganirire lwiganyo luguma lw’omukozi wa Yehova wa mîra: Mwami Daudi. Akag’ilwisa mazibu manji gakag’ilerhwa n’abashombanyi bage ciru n’abîra bage. Erhi rhwakayiga olwiganyo lwa Daudi, rhwanabona kunganaci Paolo ahabirwe emisi erhi arhanya okubiyerekire akalamo ka Daudi na kandi rhwanabona gurhi rhwakayigamwo olwiganyo lwa Paolo.

11. Bulya gurhi Daudi akagibonekana nka muzamba erhi ngonyi? (Olole enfoto eri oku cijalada c’eyi gazeti)

¹¹ Daudi akag’ibonekana ngonyi omu masu ga Goliyati, bulya Goliyati agwerhe misi minji. Erhi Goliyati alangira Daudi, “amusingiriza amugaya.” Goliyati ali muliri, munenene, agwerhe ebikolanwa byoshi by’okulwa ivita anal’imanyiri lw’ivita. Daudi yehe nta bulenga boshi-boshi agwerhe bw’okulwa ivita, bulya akagibonekana nka muntu orhakahasha kantu koshi-koshi kajirwa okw’ivita. Cikone, obuzamba bwa Daudi bwahinduka misi. Ahûna Yehova emisi yamurhabala ahima omushombanyi wage Goliyati.​—1 Sam. 17:41-45, 50.

12. Gandi mazibu gahi Daudi alembîre?

¹² Daudi alwisize agandi mazibu gw’okubonekana muzamba na ngonyi. Akag’ikolera mwami Sauli n’obwishwekerezi boshi, Sauli ali mwami washimikagwa na Yehova. Aha murhondêro Sauli akag’ikenga Daudi, buzinda eciburi ca rhuma ayumviza Daudi obumvu. Sauli arhangira ajirira Daudi ebintu bibi, ciru ahikira aha akamuniga.​—1 Sam. 18:6-9, 29; 19:9-11.

13. Gurhi Daudi akag’ijira erhi Sauli akamujirire amabi?

¹³ Ciru akaba Sauli akagijirira Daudi ebirhashinganini, Daudi agendekera amukenga n’okumubona nka mwami washimikagwa na Yehova. (1 Sam. 24:6) Daudi arhaderhaga Yehova kubi mpu ye warhumaga Sauli amujirira amabi. Lubero n’oko akashenga Yehova amuhe emisi ahash’ihima ago mazibu.​—Enna. 18:1, ebiri biyandike aha nyanya z’eyi nsura.

14. Kanga kahi entumwa Paolo yageziremo kashushine n’aka Daudi?

¹⁴ Entumwa Paolo yagezire omu kanga kashushine n’aka Daudi. Abashombanyi ba Paolo bali banji banagwerhe misi minji kumulusha. Bakulu banji b’ecihugo balimanyikine bwenene bakag’imushomba. Ashurhwa n’okushwekwa kanji-kanji. Aka Daudi, Paolo naye alenganywa n’abîra bage. Bantu baguma na baguma  bw’omu cigamba bakamubonerera n’okumuhagalika. (2 Kor. 12:11; Flp. 3:18) Cikone Paolo ahima abo bashombanyi bakag’imuhagalika. Gurhi ahikire aha abahima? Agendekera ayigiriza ciru akaba akanga alimo kali kazibu. Abêra mwishwekerezi kuli bene wabo na bali babo, ciru akaba bakag’imuvuna omurhima. Akantu kw’obulagirire, kuli kubona abêzire mwishwekerezi kuli Nnamahanga kuhika oku buzinda bw’akalamo kage. (2 Tim. 4:8) Akaba ahikire aha ajira ebyo byoshi, kurhali kuderha oku bulya ali murhwali, cikone bulya al’ilangalire Yehova.

15. Obulonza bwirhu buli buhi, na gurhi rhwakabuhikirizamwo?

¹⁵ Kw’oli walibuzibwa n’abinyu b’emasomo erhi binyu banyakasi erhi bene winyu bw’omulala barhali Bahamirizi ba Yehova? Ka hali mwene wirhu erhi mwali wirhu okola okudesire kubi erhi akujirire kubi? Akaba ebyo bikola bikuhikire, okakengera olwiganyo lwa Daudi na Paolo, “wanahash’ihima amabi omu kujira aminja.” (Bar. 12:21) Omuhigo gwirhu kurhali kubanda abantu ibuye omw’irhwe nk’oku Daudi ajirâga, cikone kuli kuba kubahira Oluderho lwa Nnamahanga omw’irhwe n’omu murhima. Wanahikira aha wakolesa Ebibliya ly’oshuza oku madoso gabo, cikone wanajira ntyo n’obukenge. Okajirira abantu boshi aminja, ciru n’abashombanyi bawe.​—Mat. 5:44; 1 Pet. 3:15-17.

16-17. Bici Paolo arhayibagira ciru n’ehitya?

¹⁶ Embere Paolo abe mwanafunzi wa Yezu, ali muminya anakag’ilibuza abanafunzi ba Yezu. (Ebijiro by’Entumwa 7:58; 1 Tim. 1:13) Yezu yene abonekera Paolo, wakag’ihamagalwa Sauli, amubwira oku aleke okulibuza ecigamba c’Ecikristu. Yezu aganiza Paolo kurhenga empingu, ho n’aho ahûrha amasu. Lyo acibirhondêra abona, byahûna aj’ibona balya bantu akag’ilibuza lyo bamurhabala. Ayemera n’obwirhohye okugend’ibona omwanafunzi wakag’ihamagalwa Ananiya lyo amurhabala acib’irhondera abona.​—Ebijiro by’Entumwa 9:3-9, 17, 18.

¹⁷ Paolo ahikira ah’aba muguma w’omu cigamba c’Ecikristu, cikone arhayibagiraga isomo Yezu amuyigirizagya erhi ali omu mulimbwa gw’okuja e Damasko. Paolo agendekire  abêra mwirhohye omu kugendekera kwa yemera oburhabale bwa bene wabo na bali babo. Ahugûkwa bwinja oku abo bene wabo na bali babo bwo bali “barhuliriza” bage.​—Kol. 4:10, 11, NWT amahugûlo g’idako ly’obukurasa.

18. Bulya gurhi mango maguma na maguma kunabe kuzibu okuyemera okurhabalwa n’abandi?

¹⁸ Bici olwiganyo lwa Paolo lwakarhuyigiriza? Amango rhwarhonderaga okuciyigiriza Ebibliya n’Abahamirizi ba Yehova rhwayemera oku banarhurhabala, oko kwayerekana n’obwalagale oku hali bintu binji rhwakaciyigiriza kuli bo. (1 Kor. 3:1, 2) K’ene nalyo onacibone nka banacikurhabala? Erhi rhwakaba rhukola rhugwerhe myaka minji rhuli rhwakolera Yehova rhunakola rhuyishi bintu binji erhi rhwahimire mazibu manji, rhurhakwanini rhukacibona nka rhurhacishinganini okuhanulwa na bene wirhu, ci bwenene balya barhacijira myaka minji omu okuli. Yehova arhuhire bene wirhu na bali birhu lyo bakarhuha omurhima. (Bar. 1:11, 12) Erhi rhwakalonza Yehova arhuhe emisi, rhushinganine rhukayemera amahano ga bene wirhu na bali birhu.

19. Bici byarhabire Paolo ahash’ihikiriza bintu binji?

¹⁹ Paolo ahikirizize bintu binji erhi aba Mukristu. Bulya gurhi ahashir’ijira ebyo bintu? Bulya ahugûsirwe oku omuntu anahasha kantu kalebe arhali mpu bulya agwerhe misi minji, masomo manji, buhirhi bunji, cikone, erhi omuntu akaba mwirhohye na kandi alangalire Yehova, anahikiriza bintu binji binja omw’ikubuliro lyage. Rhweshi rhushinganine rhuyige olwiganyo lwa Paolo, (1) omu kulangalira Yehova, (2) omu kuciyigiriza binji kugerera enyiganyo ziri omu Bibliya na (3) omu kuyemera oburhabale bw’abirhu Bakristu. Erhi rhwakajira ntyo rhurhakakacibona nka bazamba erhi ngonyi, bulya Yehova anarhuha emisi!