1. Ino ty raha nekeni-apostoly Paoly?

NEKENI-apostoly Paoly fa nisy fotoa ie nalemy. Nieky ie hoe “nihareraky” ty vatany, sady nila nialy ay ie mba hanao raha mahity, le nihainy koa fa tsy namaly ty vavaky nataony araky ty nieritseretany azy avao Jehovah. (2 Kor. 4:16; 12:7-9; Rom. 7:21-23) Nekeni-Paoly koa hoe malemy ty fahitani-mpanohitsy reo azy. * Fe ndre raty aza ty eritseritsin’olo mikasiky azy, sady nana fahalemea koa ie, le tsy nieritseritsy ty vatany ho tsy misy dikany mihintsy ie.—2 Kor. 10:10-12, 17, 18.

2. Ino ty raha bevata nianarani-Paoly, laha hentea ty 2 Korintianina 12:9, 10?

² Nianarani-Paoly hoe ndre mahatsapa hoe malemy aza ty olo raiky le afaky hahery avao ie. (Vakio 2 Korintianina 12:9, 10.) Nivola tamy Paoly Jehovah fa ‘lavorary ty fiasani-heriny aminy lafa malemy ie’, zany hoe afaky manovo ty hery tsy ampy amy Paoly ty herini-Jehovah. Ndao hohenteantsika tse hoe manino tsika ro tsy tokony hiasa loha lafa mandratiraty antsika ty mpanohitsy antsika.

3. Manino tsika ro falifaly lafa misy mandratiraty?

³ Tsy misy amintsika aloha ho falifaly lafa misy mandratiraty. Fe laha mandratiraty antsika ty fahavalontsika ka miasa loha marè mikasiky ty raha volanin-drozy tsika, le hanjary kivy. (Ohab. 24:10) Ka manao akory ty tokony ho fahitantsika ty fandratiratia ataoni-mpanohitsy? Manahaky ani-Paoly, le  tokony ho “falifaly ... amy fandratiratia” tsika. (2 Kor. 12:10) Ino ty antony? Satria ho hita hoe mpianatsini-Jesosy vatany tsika lafa misy mandratiraty noho manenjiky. (1 Pet. 4:14) Nivola Jesosy fa tsy maintsy henjehy ty mpanori-dia azy. (Jaona 15:18-20) Zay mihintsy ty raha niseho tamy taonjato voalohany. Nanaraky ty kolontsaini-Grika reo ty olo sisany tamy zay, ka nieritseritsy hoe olo tsy mahay raha noho ambany ty Kristiana. Ndre Jiosy reo koa nieritseritsy hoe ‘tsy de nahita fianara noho olon-tsotra’ ty Kristiana, anatini-zay apostoly Petera noho Jaona. (Asa. 4:13) Atao raha tsy mana fahefà noho tsy misy mpiaro ty Kristiana, satria tsy nanao politiky rozy sady tsy nanao maramila. Tsy nidary an-drozy ty olo.

4. Ino ty nataoni-Kristiana tamy taonjato voalohany lafa nisy mpanohitsy nandratiraty an-drozy?

⁴ Nahavita nampijano ani-Kristiana tamy taonjato voalohany reo va ty fandratiratia nataoni-mpanohitsy? Aha. Lafa nenjehy, ohatsy, apostoly Petera noho Jaona satria nanori-dia ani-Jesosy noho nampianatsy mikasiky azy, le nirambesin-drozy ho voninahitsy raha zay. (Asa. 4:18-21; 5:27-29, 40-42) Tsy nisy antony tokony ho nahamenatsy ani-mpianatsy rey. Lafa nandeha ty fotoa, le hita hoe mbo maro mandilatsy ani-mpanohitsy an-drozy reo ty raha soa vitani-Kristiana tamy taonjato voalohany rey ho ahi-ty hafa. Mbo manampy noho mahavy olo an-tapitrisany hana raha tamany avao, ohatsy, ty boky nisoratini-sisany tamin-drozy. Fa manjaka an-danitsy any Fanjakà nitorin-drozy iny henanizao, le tsy ho ela ie handay ty olombelo iaby. (Mat. 24:14) Fa azy fanjakà natanjaky nanenjiky ty Kristiana iny fa nirava tanatini-tao maro. Fa mpanjaka an-danitsy any koa mpianatsy tsy nivaliky rey, fa azy nanohitsy an-drozy rey fa nimaty iaby. Ka laha hovelomy ndraiky rozy, le hanjary vahoaky andesini-Fanjakà tohanani-Kristiana nihalan-drozy rey.—Apok. 5:10.

5. Manino ty olo amy tontolo toy ro manambany ty vahoakini-Jehovah laha hentea ty Jaona 15:19?

⁵ Vahoakini-Jehovah koa tsika, le misy fotoa kizahin’olo hoe tsy mahay raha noho olo ambany. Ino ty antony? Satria tsy mitovy toe-tsay amin’olo manodidy antsika tsika. Miezaky miambany, malemy fanahy noho manoriky safà avao tsika. Fa ty olo amy tontolo toy tea misehoseho, mirengirengy noho mizizo. Tsy militsy amy politiky tsika sady tsy manao maramila. Tsy maneky ho pakopakoeni-tontolo toy tsika ka eritseretin-drozy hoe olo farani-ambany.—Vakio Jaona 15:19; Rom. 12:2.

6. Ino ty asa bevata vitani-Jehovah miaraky amy ty vahoakiny?

⁶ Ndre manao akory ndre manao akory ty fieritseretani-tontolo toy antsika, le mampiasa antsika Jehovah mba hahavita raha miavaky. Mbo tsy nisy fitoria bevata mandilatsy ty ataony amy fotoa henanizao. Ty mpanompony ro mampiboaky ty gazety adika amy fivolana farani-ze maro an-tany etoy, sady mampiasa Baiboly rozy ka manampy olo an-tapitrisany mba hanasoa ty fiainany. Tsy ho nivita raha miavaky iaby reo laha tsy Jehovah. Mampiasa olo eritserety ho malemy ie mba hanatanteraha asa farani-ze bevata. Ka manao akory ty mikasiky antsika kiraidraiky? Afaky manampy antsika hahery va Jehovah? Ino ty azontsika atao mba hahazoa ty fanampeany? Ndao tsika handiniky raha telo azontsika ianara baka amy modely nameani-apostoly Paoly.

7. Ino ty fianara raiky azontsika baka amy modelini-Paoly?

⁷ Toy ty fianara raiky azontsika baka amy modelini-Paoly: Ka miantehitsy amy ty herinao na ty fahaizanao lafa manompo  ani-Jehovah. Afaky mirehareha noho matoky tena Paoly laha ty fahitan’olombelo azy. Nibe ta Tarsisy any ie. Io ro renivohitsini-faritany raiky ta Roma any. Tanà mivoatsy Tarsisy, sady nalaza ty fianara anabo natao tany. Nahita fianara Paoly satria azy mpitariky tena nihajàni-Jiosy tamy androny iny ro nampianatsy azy. Tsy ia zay fa Gamaliela. (Asa. 5:34; 22:3) Nisy fotoa koa Paoly nana fahefà tamy Jiosy reo teo. Nivola ie hoe: “Nandroso tamy Fivavahani-Jiosy aho, mandilatsy ty ankamoroani-ze nitovy tao tamiko tamy karaza raiky amiko.” (Gal. 1:13, 14; Asa. 26:4) Fe tsy niantehitsy tamy ty vatany Paoly.

8. Laha hentea ty Filipianina 3:8, manao akory ty fahitani-Paoly ani-raha nafoiny rey, le nanino ie ro ‘nifalifaly amy fahalemea’?

⁸ Nafoini-Paoly iaby ty raha nahavy azy ho olo miavaky araky ty hevitsini-tontolo toy. Nieritseretiny ho sahala amy “fako miavotsy” mihintsy aza tombontsoa nananany taloha rey. (Vakio Filipianina 3:8.) Tsy maintsy nandalo raha sarotsy Paoly lafa nanjary mpanori-dia ani-Kristy. Nalay azy ty firenena raiky aminy. (Asa. 23:12-14) Nikabokaboky noho nampigadra azy koa ty olo nana zom-pirenena romanina manahaky azy. (Asa. 16:19-24, 37) Tsy vitani-zay, fa nanjary tsapani-Paoly koa hoe tsy nimora taminy ty nanao raha soa. (Rom. 7:21-25) Fe tsy nengany hampikepaky azy ty mpanohitsy noho ty raha nanahira azy, fa naleony ‘nifalifaly amy fahalemea.’ Nanino? Satria tamy fotoa nampalemy azy rey ro nahitany ty fiasani-heri-Ndranahary amy ty fiainany.—2 Kor. 4:7; 12:10.

9. Ino ty tokony ho tsapantsika ndre eritserety hoe malemy aza tsika satria misy raha sisany tsy ananantsika?

⁹ Mba hahazoantsika hery baka amy Jehovah, le tsy tokony hieritseritsy tsika hoe ty herim-batantsika, na ty fianarantsika, na ty kolontsay nahabe antsika, na ty hananantsika ro mahavy antsika ho lafovily. Tsy mianky amy reo ty antony hampiasani-Jehovah antsika. Laha ty tena marina aza, le tsy maro ty vahoakini-Jehovah “hendry arakini-nofotsy, tsy maro ty mahery, le tsy maro ty abo raza.” “Ty raha malemy amy zao tontolo zao” ro nifilini-Jehovah mba hampiasany. (1 Kor. 1:26, 27) Ka ndre tsy anananao aza raha voaresaky taloha teo rey, le matokisa fa afaky manompo ani-Jehovah  avao iha. Rambeso ho tombontsoa mihintsy aza raha zay, satria ho hitanao hoe miasa aminao ty herini-Jehovah. Laha misy olo mampitahotsy anao, ohatsy, sady manao ze hahavy anao hisalasala amy ty raha inoanao, le mivavaha amy Jehovah mba hahasaky hiaro ty finoanao. (Efes. 6:19, 20) Laha sahira iha satria misy arety miteza, le mangataha amy Jehovah mba hahazo hery hahafahanao manompo araky ze farani-vitanao. Saky mahita ty fanampeani-Jehovah anao iha, le hitombo ty finoanao sady hihamatanjaky iha.

10. Manino tsika ro tokony handiniky ty modelin’olo tsy nivaliky amy Baiboly ao, ohatsy azy amy Hebreo 11:32-34 ao rey?

¹⁰ Nazoto nianatsy Soratsy Masy Paoly. Nahay tantara maro amy Safà-Ndranahary ao ie, le maro ty raha nianarany baka amy mpanomponi-Jehovah tsy nivaliky rey. Lafa nanoratsy tamy Kristiana Hebreo reo Paoly, le nampirisiky an-drozy mba hametsivetsy ty modelini-mpanomponi-Jehovah tsy nivaliky taloha rey. (Vakio Hebreo 11:32-34.) Mba diniho avao tse moa Davida Mpanjaka. Nisahira ie satria tsy ty fahavalony avao ro nanohitsy azy, fa nisy fotoa nanohitsy azy koa ty namany. Lafa mandiniky ty tantarani-Davida tsika, le ho hitantsika hoe nanino Paoly ro nahazo hery lafa nametsivetsy ty modelini-Davida, le akory ty azontsika anahafa ani-Paoly.

11. Manino Davida ro atao ho raha malemy? (Henteo sary amy fononi-gazety toy.)

¹¹ Atao ho raha malemy Davida lafa hentea Goliata, azy maramila be noho abo iny. Lafa nahita ani-Davida Goliata, le “nivaza azy.” Bevata ie sady ampy fitaova noho fa zatsy aly. Fa Davida, mbo ajà tsy mahay raha maro sady atao raha tsy ampy fitaova handesy mialy. Fe nirambesini-Davida ho hery ty fahità azy hoe malemy. Niantehitsy amy ty herini-Jehovah ie ka niresiny fahavalony iny.—1 Sam. 17:41-45, 50.

12. Ino koa ty raha sarotsy natrehini-Davida?

¹² Nisy raha sarotsy hafa tsy maintsy natrehini-Davida koa. Mety ho nahatsapa ho tsy nana hery mihintsy ie tamy zay. Nanompo ani-Mpanjaka nitendreni-Jehovah tamy Israely teo iny Davida. Nanaja ani-Davida tse Saoly Mpanjaka tamy voalohany. Fe tafara tatoa, nanambony tena Saoly ka nanjary nialona ani-Davida. Niraty fanahy tamy Davida Saoly, le ta ho namono azy mihintsy aza.—1 Sam. 18:6-9, 29; 19:9-11.

13. Ino ty nataoni-Davida ndre niraty fanahy aminy aza Saoly Mpanjaka?

¹³ Ndre niraty fanahy tamy Davida aza Saoly Mpanjaka, le mbo nanaja ani-mpanjaka nitendreni-Jehovah io avao ie. (1 Sam. 24:6) Tsy nameany tsiny Jehovah amy ty raha raty nataoni-Saoly taminy. Vomaiky aza Davida niantehitsy tamy Jehovah mba hanome azy hery hahafahany miaritsy ani-raha sarotsy iny.—Sal. 18:1, safà fampilira.

14. Ino ty raha sarotsy natrehini-Paoly manahaky ty nahazo ani-Davida?

¹⁴ Niatriky raha mitovy amy nahazo ani-Davida apostoly Paoly. Nahery mandilatsy azy ty fahavalony. Nalay azy ty mpitariky farani-ze nalaza tamy androny. Matetiky ie nikabokabohin-drozy, le nigadran-drozy. Manahaky ani-Davida, le niraty fanahy tamy Paoly ty olo tokony ho namany. Nanohitsy azy koa ty Kristiana sisany tamy fiangona eo. (2 Kor. 12:11; Fil. 3:18) Fe niresini-Paoly iaby ze nialy taminy. Akory ty nanaovany ani-zay? Nitory avao ie ndre nisy nanohitsy aza. Tsy nivaliky tamy rahalahy noho anabavy reo ie ndre nandiso fanantenà azy rozy. Fa ty vatan-draha marè, tsy nivaliky tamy Ndranahary ie zisiky nahafaty azy. (2 Tim. 4:8) Nandresy raha sarotsy  bevata maro ie, fe tsy ty herim-batany ro nahavitany ani-zay, fa ty fianteherany amy Jehovah.

15. Ino ty raha kendrentsika, le akory ty hahavitantsika ani-zay?

¹⁵ Misy mikizaky na manenjiky anao koa va ty mpiaraky mianatsy na mpiaraky miasa aminao, na ty longonao tsy Vavolombeloni-Jehovah? Nisy olo niraty fanahy taminao va amy fiangona eo? Laha zay, le tiarovo ty modelini-Davida noho Paoly. “Reseo amy ty soa avao ty raty.” (Rom. 12:21) Tsy mikendry hitoraky vato amy handrin’olo rey eo tsika, manahaky ty nataoni-Davida. Fa ty raha kendrentsika le mba ho tafilitsy an-tsainy noho am-pony ao ty Safà-Ndranahary. Ho vitantsika raha zay laha ty Baiboly ro engàntsika hamaly ty fanontanea apetrakin’olo. Manaja noho soa fanahy koa tsika lafa misy olo raty fanahy amintsika, sady manao soa amin’olo iaby, anatini-zay ty fahavalontsika.—Mat. 5:44; 1 Pet. 3:15-17.

16-17. Ino ty raha tsy nihalinoni-Paoly mihintsy?

¹⁶ Mpamaraky naharengirengy apostoly Paoly tamin’ie mbo tsy nimpianatsini-Kristy, sady nenjehiny ty mpanori-dia ani-Jesosy. (Asa. 7:58; 1 Tim. 1:13) Saoly ty nikaiha azy tamy zay. Jesosy mihintsy ro nanaka azy mba tsy hanafiky ty fiangona kristiana. Niresaky amy Paoly baka an-danitsy any Jesosy, bakeo nataony jiky Paoly. Voatery nila fanampea tamin’olo nenjehiny rey Paoly mba hampahita azy ndraiky. Niambany Paoly, ka naneky hampeani-mpianatsy raiky kaihy hoe Ananiasy, farany nahita ndraiky.—Asa. 9:3-9, 17, 18.

¹⁷ Nanjary Kristiana maro mpahay Paoly tafara tatoy, fe tsy nihalinony mihintsy ty raha nampianarini-Jesosy azy, tamin’ie nandeha ho a Damaskosy any iny. Niambany avao Paoly, ka niparè haneky ty fanampeani-rahalahy noho anabaviny rey. Nieky ie hoe “nanampy noho nampahery” azy rozy.—Kol. 4:10, 11.

18. Ino ty mety hahavy antsika tsy haneky lafa misy manampy?

¹⁸ Ino ty azontsika ianara baka amy Paoly? Laha vo niaraky tamy vahoakini-Jehovah tsika, le mety ho niteantsika ty hahazo fanampea baka amin’olo, satria tsapantsika hoe mbo ajà ara-panahy tsika ka mbo maro ty raha  mila ianarantsika. (1 Kor. 3:1, 2) Mety tsy ho parè handramby fanampea manahaky ani-zay sasy tsika, laha fa ela ty nanompoantsika ani-Jehovah sady fa maro ty raha nihitantsika, sirtò laha olo nahita fahamarina tafarantsika ro ta hanampy antsika. Kanefa rahalahy noho anabavintsika reo matetiky ro ampiasani-Jehovah mba hampahereza antsika. (Rom. 1:11, 12) Tokony hotiarovintsika raha zay laha ta hahazo hery baka amy Jehovah tsika.

19. Nanino Paoly ro nahavita raha miavaky?

¹⁹ Nahavita raha miavaky maro Paoly lafa nanjary Kristiana. Ino ty antony? Satria nihainy fa tsy mila mana herim-bata, nahavita fianara, manan-kanana, na baka amy fiavia raiky ty olo vo ho tafaboaky, fa mila miambany noho miantehitsy amy Jehovah. Loniky lahy tsika iaby mba hanahaky ani-Paoly ka 1) hiantehitsy amy Jehovah, 2) handramby fianara baka amin’olo amy Baiboly ao, le 3) haneky lafa misy mpiara-manompo manampy. Ka ndre mahatiaro ho malemy manao akory aza tsika, le hataoni-Jehovah ze hampahery antsika!