1. N’kambo djɛkɔnge ɔpɔstɔlɔ Poolo ndewaka wɔlɔwɔlɔ lá n’kambo djɛnde nyɔmɛlɛ?

ƆPƆSTƆLƆ Poolo ewaki wɔlɔ wɔlɔ djɛ lá wina ɛmɔtshi nde ayawokaki djɛ alekɔ wɔdju. Nde atepelaka djɛ demba djɛnde ‘djeta tshitanaki,’ nde ayalaki ladjɛ nana mbandji djɛ nde nangha kɛnɛ kelekɔ wɔlɔ, edjinge ape wina onkfumɔ ndeke Yehova ndakadjimolaka ndɔmbɔ yɛnde lá wopo wɔndakombolaka. (2 Kɔ. 4:16; 12:7-9; Ɔrɔ. 7:21-23) Poolo ewaki lonkina djɛ antonyi wande wɔwɔsaki ngete onto wɔ wɔdju. * Koko, nde atawola djɛ tokanyi tɔ nyɛtshi t’anto ankina edjinge wɛdju wɛnde ndokomɛ djɛ ndawɔsa entengo kanga wɔdju.​—2 Kɔ. 10:10-12, 17, 18.

2. Lá nkilika 2 Kɔrɛtɔ 12:9, 10, olakanyelo wɔkɔnge wɔ djonyi wowisa Poolo?

² Poolo awaka olakanyelo wɔ djonyi ante onto nkoka ndjala la wolo kaanga wina woyawokande djɛ alekɔ wɔdju. (Wala 2 Kɔrɛtɔ 12:9, 10.) Yehova ashimelaka Poolo ante wolo Wɔnde ‘wolekɔ nkoma djɔ lá wɛdju,’ ntepela ente wolo wɔ Yehova wokoka pɛyɛ Poolo nkfulu keyalisa lande djonyi. Nyotshɔ tokoshishima ntondotondo ladjikɛnge isopakoke ndjoka nkɛlɛ wina wɔ antonyi waso ototolawɔ.

3. Ladjikɛnde okokaso nsaasanga l’atoyi?

³ Lako onto l’anteyi kɛso lɔkɔpa iwɔ ndotola. Koko, ntsha antonyi waso wambototola, ko iso ndaakiyanyɛ ambolekola, tokoka ndɛmba. (Woo. 24:10) Ko wopo wɔkɔnge okokaso  ndɔsa atoyi wa antonyi waso? Lá ndjɔmbɔmba kɛ Poolo, Iso ladjɛ ‘nsaasangaka l’atoyi.’ (2 Kɔ. 12:10) Ladjikɛnge? Ladjikɛnde atoyi edjinge ɛhɛnyɔhɛnyɔ welekɔ tolembetelo tɛnyɛ ambɔ tolekɔ ambeki wa nsɔnsɔlɔ wa Yeso. (1 Pɛ. 4:14) Yeso atepelaka ante ambeki wande wangɛna ndjolo. (Dj. 15:18-20) Nsɔsɔlɔ kɛ n’kambo ntshɔ kɛnamaka l’ɛtɛndɔ kɛ ntondo. L’ɛtɛndɔ kɛsɔ, anto waatshindamaki la nkfumbo dj’ase Ngirika wɔɔsaki Akristo entengo anto wapalekɔ la balo edjinge anto w’anyanya. Ladjikɛnde l’eteyi k’ase Juda Akristo wɔsamaki entengo anto ‘wapewe onkanda edjinge anto w’anto,’ ndjɔmbɔmba ɔpɔstɔlɔ Pɛtɛlɔ nya Djɔanɛ. (Ele 4:13) Akristo wɛnamaki entengo anto w’anyanya; iwɔ watayala la lomu lá wayi wa pɔlitikɛ, w’angala edjinge wawɔsaki entengo anto wapakoke ndjala l’olonghanyelo wɔ wana w’anto.

4. Kɛkɔnge k’enanghisa Akristo wa l’ɛtɛndɔ kɛ ntondo la tokanyi tɔnyɛtshi toyalisa la antonyi wawɔ lá n’kambo djɛwɔ?

⁴ Oyɛwɔ mo, Akristo wa l’ɛtɛndɔ kɛ ntondo wasɔ wawolaka djɛ tokanyi tɔ nyɛtshi toyalisa l’antonyi wawɔ lá n’kambo djɛwɔ ndashimba djɛ nkambela Yehova? Lako. Ndjɔmbɔmba ɔpɔstɔlɔ Pɛtɛlo nya Djɔanɛ wɔsaka djɛ ayalaka lomu lewɔ djɛ nyɛna ndjolo l’ɔtɛ w’iya nkilikaka Yeso la w’iya lakanyɛka anto akambo wa nsɔsɔlɔ wa lendana lande. (Ele 4:18-21; 5:27-29, 40-42) Ambeki wasɔ watayala kaanga l’elonga kɛ ndjoka nsɔnyi. Kaanga anto wa l’elonghanyelo iyotalɛmɛyɛka Akristo wa l’ɛtɛndɔ kɛ ntondo wasɔ, iwɔ wananghaka akambo efula djɛ nkotshɛ anto ankina. Ndjɔmbɔmba, enkanda ɛmɔtshi welá Bible w’efunamisa me Akristo amɔtshi l’anteyi kɛwɔ, wekindjɛ nkotshɛ anto edjinge mpɛyɛ miliyɔ y’anto n’kongi. Edjinge Onkfumi wiyapoposanyɛka wɔlɔndjɛ winɔsɔ l’olongo edjinge lako ila wɔngɔlɔdjɛ looko l’otondo. (Mat. 24:14) Lá ndjɛdjɛ l’Onkfumi wɔkɔ, lowandji l’ekekete lá pɔlitkɛ loyalisa la wolo lɔkfɔka balakata, koko ambeki wa Yeso walɔndjɛ win’ɔsɔ l’olongo. Koko antonyi wawɔ wamboshiyɛka mvɔ, ntsha wango kfundjɔ mbɔkoko wangɔlɔdjɛma ngo má Onkfumi wɔ Akristo wiyatonaka wina wiyatatsheyɛ mpoposanyɛ.​—Ndj. 5:10.

5. Lá nkilika Djɔanɛ 15:19, ladjikɛnge ankambi wa Yehova iyɔpɔsama l’odjito?

⁵ Lɔɔko kɛnɛ, entengo oyɛso ankambi wa Yehova, anto wapatɔshi l’odjito lá wina ɛmɔtshi edjinge ntɔnyɔlaka ambɔ iso topalekɔ la balo edjinge tolekɔ anto w’anyanya. Ladjikɛnge? Ladjikɛnde iso topawola nanghedji dj’anto watodjinga. Iso nanghaka la wolo djɛ ndjala l’okitshakitshɛ, la ɔkɔkɛ, edjinge n’tshunamo. Koko, andja wanɛ numɛka anto w’etako, wa ntamanyɛ edjinge w’ɛtɔlɔki. Laadjiko djɛ lasɔ, iso topingela lá wayi wa pɔlitikɛ edjinge topakambaka olemo w’ongala l’ongidji onkfumɔ woyalaso. Iso ntshikitana l’anto wa l’andja wanɛ, djɛko ndeke ɔfɛnyɛwɔ djɛ anto ankina ntoleka.​—Wala Djɔanɛ 15:19; Ɔrɔ. 12:2.

6. Yehova okotshɛnde ankambi wande djɛ nangha nge?

⁶ Kaanga n’kambo n’kɔnge djekanela andja wanɛ lá n’kambo djɛso, Yehova alekɔ ntokotshɛ dj’iso nangha akambo wankamɔ. Nde alekɔ ntokotshɛ djɛ olemo wipoposanyɛ woleka ekekete l’ɔkɔndɔ w’anto nanghema. Lɔɔko kɛnɛ ankambi yɛnde walekɔ mposɛ periodikɛ yemboleka nkadjimɔma edjinge kapanyema l’andja w’ontondo, edjinge wakamba la Bible djɛ nkotshɛ wa miliyɔ y’anto djɛ mbɔngɛ nsɛnɔ yɛwɔ. Yehova ndeke lokoka mba womu l’akambo wankamɔ wasɔ, ladjikɛnde nde akamba l’anto wɔsama ngete anto wanyanya me ase andja wanɛ dj’iwɔ nkamba elemo wakamɔ wɛ nghɔsɔ. Ko okokaso tepela nge lá n’kambo djɛ onto onkfumɔ wɔ l’anteyi kɛso? Yehova akoka ntokotshɛ djɛ mba wolo? Ntsha nghɔsɔ, kɛkɔnge kokokaso nangha dj’iso mba okotshɔ wɔnde? Nyotshɔ toshishime winɔsɔ  akambo asato wɛnama papoo wokokaso mba olakanyelo ma ndjɔmbɔmba kɛ Poolo.

7. Olakanyelo wɔkɔnge wowaso ma ndjɔmbɔmba kɛ Poolo?

⁷ Olakanyelo ɔmɔtshi wowaso ma ndjɔmbɔmba kɛ Poolo nde: Topakoke ndaawɛkɛ lá wolo kana l’akoka waso isɔmɛlɛ wina wokambelaso Yehova. Lá nkilika tokanyi t’anto, Poolo ayalaki la donga djɛ ndjala l’otako edjinge ndawɛkɛ la wolo wɔnde nyɔmɛlɛ. Nde afulaka lá Taraso, kapitalɛ kɛ prɔvɛsɛ kɛmɔtshi ke l’Ɔrɔma. Taraso ayalaki ngando k’ofudji edjinge keyalaki l’inivɛrsite imɔtshi yɛ lomo efula. Poolo ingelaka nkalasa yɛ wɔlɔ edjinge alakanyemaka me owandji wɔmɔtshi w’ose Juda wiyalɛmɛyɛka efula l’etsho wɛnde, ntepela ente Ngamaliyɛlɛ. (Ele 5:34; 22:3) Lá wopo ɔmɔtshi Poolo ayalaka l’ekopo kɛmɔtshi l’etolo kase Juda, nde atepelaka ante: ‘Lemi lakindjɛki nfula l’etolo k’ase Juda ndekola anto efula wa Iɔsɔkɛ lɔmi wayalisa l’ongidji wɔso.’ (Nga. 1:13, 14; Ele 26:4) Koko kaanga oyɛwɔ nghɔsɔ Poolo atayawɛkɛ lende nyɔmɛlɛ.

8. Lá nkilika Filipɛ 3:8, wopo wɔkɔnge Poolo ndɔsaka akambo windatshike l’ɔkɔngɔ, edjinge lamo ‘ndasaasangaka lá wɛdju’?

⁸ Poolo asaasangaka djɛ ntshika akambo wowilaki onto wɔ djonyi l’andja wanɛ. Nde ayɛka ndɔsa akambo wɛnamaki ngete walekɔ la wapɔ entengo ‘oloyi wɔ mbindo.’ (Wala Filipɛ 3:8.) Poolo apomanaka l’ekakasano efula ladjikɛnde ndawolaka ndjala ombeki wɔ Kristo. Ase ongindji wɔnde wotonaka. (Ele 23:12-14) Nde akfusamaka edjinge akowamaka lá nkando me winande was’Ɔrɔma. (Ele 16:19-24, 37) La okiyano onkfumɔ Poolo ɛnaka djɛ nde alekɔ la elelo wɛmɔtshi. (Ɔrɔ. 7:21-25) Koko l’edjena kɛnde ndjawola djɛ antonyi wande kana wɛdju wɛnde ndopekala djɛ nkambela Yehova, nde ‘asaasangaka lá wɛdju.’ Lamo? Ladjikɛnde wina windayalaka wɔdju ndeke ndɛnaka wopo wɔ Ndjambe ndookotshɛka.​—2 Kɔ. 4:7; 12:10.

9. Wopo wɔkɔnge okokaso ndɔsa akambo watɛnyɛ entengo tolekɔ anto w’anyanya?

⁹ Ntsha iso nkɔpaka mba wolo me Yehova, totafɛnyɛke djɛ wolo wɔso wɔ demba, nkalasa yisingela, edjena kisafule kana okfudji wɔso ndeke longotila anto wa ndjonyi. Ape n’kete  djɛsɔ ndeke lotila anto wa djonyi le Yehova. Nsɔsɔlɔ l’anteyi k’ankambi wa Ndjambe, ‘anto walekɔ la balo djɛ lolelemba wapalekɔ efula, anto walekɔ la wolo wapalekɔ efula edjinge anto walekɔ la botshɔ djɛ lomo wapalekɔ efula.’ Koko, Yehova asɔna ‘n’kete djɛ wɔdju dje l’andja wanɛ.’ (1 Kɔ. 1:26, 27) Djɛkondeke, kaanga opalekɔ la n’kete dj’isolumolaki l’ɔnɔnghɔ wɔ ntondo w’etenyi kɛnɛ, wɛ nkoka nkindjɛ nkambela Yehova. N’kambo n’tshɔ djeyale mbamba edjinge mpeyi lewɛ djɛ nyɛna wopo wɔ nkfulu kɛ Yehova onanghande olemo lewɛ. Ndjɔmbɔmba, ntsha anto w’ila ehamo lá djawo djɛko wakɔpɛyɛ wɔma, lɔmba Yehova djɛnde nkɔpɛyɛ oloko wolo wina woseelɛ djawo djɛko. (Ɛfɛ. 6:19, 20) Ntsha ɛna ndjolo l’olando ɔmɔtshi wopashile, lɔmba Yehova djɛnde nkɔpɛyɛ wolo woyɛ la djonyi djɛ wɛ ndeka ndaapɛyɛ l’olemo wɔnde l’akoka wako. Wina onkfumɔ wɛnɛ okotshɔ wɔ Yehova lá lowiko lɔko, djawo djɛko nkembaka edjinge wɛ ndjalaka la wolo efula.

10. Ladjikɛnge oyɛso la djɛ ndjeka ndjɔmbɔmba y’anto wa n’kɔmano wotepelawɔ lá Bible, entengo ndjɔmbɔmba yelekɔ lá Hebero 11:32-34?

¹⁰ Poolo ayalaka ombeki wa nsɔnsɔlɔ w’Afunelo. Nde ekaka akambo efula, koko nde awaka elakanyelo ma ndjɔmbɔmba y’anto wapomanisa l’akambo wafunamisa l’Otepela wɔ Ndjambe. Wina ndafunela Akristo welá Hebero, Poolo alɔmbaka dj’iwɔ nkanela lá n’kambo djɛ djɔmbɔmba yetotshikelisa ankambi wa Yehova wayalisa la n’kɔmano. (Wala Hebero 11:32-34.) Toshishime Ndjɔmbɔmba kɛmɔtshi l’anteyi k’ankambi yɛsɔ, Nkfumi Davidɛ. Wonanyɛka, ape ngo me antonyi wande toko koko edjinge me onto ɔmɔtshi woyalaki ilongo yɛnde l’etsho ɛmɔtshi. Wina woshishimaso ndjɔmbɔmba kɛ Davidɛ, tolende wopo wɔ Poolo ndayale ladjɛ nkanela lá ndjɔmbɔmba kɛ Davidɛ akokaka ndokotshɛ edjinge wopo wokokaso ndowokola.

11. Lamo Davidɛ ndɛnamaka ngete kanga wɔdju? (Lenda n’tshango dje lá loposo.)

¹¹ Davidɛ ɛnamaki ngete onto wolekɔ wɔdju lá wiso wa Gɔliyatɛ. Wina wɔ Gɔliyatɛ ndɛnyi Davidɛ, ‘nde ɔwɔnyɔlaka.’ Ládjiko djɛ lasɔ, Gɔliyatɛ ayalaki n’konga, ayalaki la m’peko efula, edjinge akfumbamaka efula lá n’kambo djɛ mbandji ndoleka. Davidɛ l’onkoko wɔnde ayalaki ilɛngɛ yetayalaki la balo l’akambo w’ambandji edjinge yɛnamaki ngete apalekɔ la m’peko djɛ mbandji. Koko Davidɛ akadjimolaka kɛnɛ kɛnamaki ngete wɔdju tá wolo. Nde ilaka oloko wɔnde te Yehova djɛnde ndɔpɛyɛ wolo ko alekaka ontonyi wɔnde wolo.​—1 Sa. 17:41-45, 50.

12. Okakasano onkina wɔkɔnge wopomanisa la Davidɛ?

¹² Davidɛ apomanaka l’okakasano onkina wokokisa ndotshinda djɛ ndawoka djɛ alekɔ wɔdju edjinge lako la wolo. La n’kɔmano onkfumɔ, Davidɛ akambelaka Saolo, onto wɔ Yehova ndasɔnɛ djɛ ndjala nkfumi k’Isariyɛlɛ. Má bango Nkfumi Saolo ɔsaki Davidɛ l’odjito. Mɔkɔngɔ, otako wotshindaka Saolo djɛ ndjoka Davidɛ djeewo. Saolo ananghelaka Davidɛ akambo wa nyɛtshi efula ko ahonaka edjinge ndoyaka.​—1 Sa. 18:6-9, 29; 19:9-11.

13. Davidɛ ndananghe nge wina wɔ Nkumi Saolo ndonanghela akambo la ntshamba djɛ sii?

¹³ Kaanga Nkfumi Saolo ndonanghela akambo la ntshamba djɛ sii, Davidɛ akindjɛka ndjala la ntshunamo te nkfumi kɛsɔnamisa me Yehova kɛsɔ. (1 Sa. 24:6) Davidɛ atamama Yehova lowo la wepo w’akambo wa nyɛtshi wonaghelaki Saolo. Koko Davidɛ ayatshikaka tshɛ ngo le Yehova djɛnde ndɔpɛyɛ wolo wɔndayalaka la djonyi djɛ nkfumeyɛ ohemba wɔ wolo wɔsɔ.​—Yee. 18:1, efunelo kel’adjiko.

14. N’kambo djɛkɔnge djɛ nfɛna la djɛ Davidɛ Poolo nda mpomana la djɛkɔ?

¹⁴ Ɔpɔstɔlɔ Poolo apomanaka la n’kambo  mɔtshi djɛ nfɔna la djɛ Davidɛ. Antonyi wa Poolo wayalaki la wolo efula ndoleka. Ewandji efula wɛ lomo wɛ l’etsho wɛnde wotonaki. Ngete Davidɛ, anto wakokisa ndjala tolongo tɔ Poolo wonanghelaka nyɛtshi. Anto amɔtshi wa l’otshumano w’Akristo wonanyɛka. (2 Kɔ. 12:11; Flp. 3:18) Koko Poolo alekaka anto ankfumɔ wonanyɛki. Ngete mo? Nde akindjɛka mpoposanyɛ kaanga iyonanyɛka. Nde akindjɛka ntshikala la n’kɔmano te wananyɔ la wakaana kaanga lá wina wiyotshutshumadjɛka. N’kambo djɛ djonyi efula nde, nde atshikalaka la n’kɔmano te Ndjambe tii l’ekomo kɛ lowiko lɔnde. (2 Ti. 4:8) Nde alekaka ekakasono wɛ welo wɛsɔ wolo, ape má nkfulu kɛnde koko, ladjikɛnde nde ayaawɛkɛka te Yehova.

15. Okoma wɔkɔnge wolekɔ lawɛ, edjinge wopo wɔkɔnge okokɛ ndokotshɛ?

¹⁵ Ko wɛ, ongɛnake ndjolo la atoyi kana ɛhɛnyɔhɛnyɔ wime winako we lá nkalasa, we l’olemo kana ase nkfumbo kɛko wapalekɔ Ewakɛ wɛ Yehova? Ose otshumano wɔko ɔmɔtshi ambokonanghela n’kambo mɔtshi djɛ nyɛtshi? Ntsha nghɔsɔ mbɔ n’vungɔ ndjɔmbɔmba kɛ Davidɛ edjinge kɛ Poolo. Wɛ nkoka nkindjɛ ‘ndongela akambo wa nyɛtshi tá akambo wa wɔlɔ.’ (Ɔrɔ. 12:21) Wina wɔ anto otonanyɛwɔ, iso topanane lawɔ entengo Davidɛ indanane la Gɔliyatɛ, koko iso ndongelaka akambo wa nyɛshi lá wopo w’okotshɛso anto djɛ ndjeka akambo walendana la Yehova edjinge Bible. Wɛ nkoka nkotshɛ okoma wɔsɔ lá ndaapɛyɛ lá Bible djɛ nkadjimola anto weepó wɛwɔ, lá ndjala l’okitshakitshɛ, lá nanghela waakonanghela akambo wa nyɛshi wɔlɔ edjinge lá ndjala l’oloko wɔlɔ te anto ankfumɔ, ndjila edjinge antonyi wako.​—Mat. 5:44; 1 Pɛ. 3:15-17.

16-17. Kɛkɔnge kɛ Poolo ndotavungɛ?

¹⁶ Lá ntondo k’ɔpɔtɔlɔ Poolo ndoyala ombeki wɔ Kristo, nde ayalaki olangala w’ɔsɛndji wɛnyɛki ambeki wa Yeso ndjolo. (Ele 7:58; 1 Ti. 1:13) Yeso ashimbaka Poolo l’iyetaka Saolo, dj’ipa nde nkindjɛ nyɛnya otshumano w’Akristo ndjolo. M’olongo Yeso atepelaka la Poolo endjinge owolaka wiso. Djɛnde mbanga nyɛna, Poolo ayalaka ladjɛ mpona okotshɔ ngo le anto windɛnyɛka ndjolo. L’okitshakitshɛ onkfumɔ nde awolaka okotshɔ w’ombeki  Ananiya, ko wiso wa Poolo wadjipɔka.​—Ele 9:3-9, 17, 18.

¹⁷ M’ɔkɔngɔ, Poolo ayɛka ndoyala ose otshumano w’Akristo loyisa ndewama efula, koko nde atavungɛ kaanga daambi olakanyelo wɔ Yeso ndɔpɛyɛ l’ontayimbo wɔtá Damasɛkɛ. Poolo akindjɛka ndjala l’okitshakitshɛ, edjinge awolaka l’oloko ɔmɔ okotshɔ wɔ wananyɔ la waakana yɛnde. Nde ayɛka ndɛna dj’iwɔ walekɔ ‘okotshɔ w’osukɔ’ tende.​—Kɔl. 4:10, 11, nɔtɛ.

18. Ladjikɛnge okokaso ndjala l’okakasano wina ɛmɔtshi djɛ ndjawola okotshɔ w’anto ankina?

¹⁸ Olakanyelo wɔkɔnge wowaso me Poolo? Wina wisatateyɛ ndjala la djokanelo l’ankambi wa Yehova, mbala imɔtshi, toyalaka la mposɛ k’efula kɛ ndjawola okotshɔ w’anto ankina, ladjikɛnde tewaki djɛ tolekɔ wana wa ndɛngɛ lá nyuma edjinge tolekɔ l’akambo efula wa ndjeka. (1 Kɔ. 3:1, 2) Iya koko etsho wɛnɛ? Ntsha tombokambela Yehova ɛnɔnyi efula ko tombowa balo dj’efula, nkoka ndjala ko topaawolaka okotshɔ w’anto ankina, pekapeka ntsha okotshɔ wɔkɔ womboyɛ me onto ɔmɔtshi lotayalaka ila efula lá akambo wa nsɔsɔlɔ entengo iso. Koko mbala efula Yehova nkambaka la wananyɔ la wakaana yɛso djɛ ntokeketshɛ. (Ɔrɔ. 1:11, 12) Iso ladjɛ ndjawola n’kambo n’tshɔ ntsha iso kɔpaka mba wolo wɔ Yehova ɔpɛyɛnde ankambi yɛnde.

19. Ladjikɛnge Poolo ndalonge?

¹⁹ Poolo ananghaka akambo amɔtshi wa nkamɔ m’ɔkɔngɔ wɔnde koma Okristo. Ladjikɛnge? Ladjikɛnde Poolo ekaka djɛ ndonga n’kambo apalendana ngo la wolo wɔ demba, nkalasa yɛsingela, okfudji kana etena kisawotshɔ, koko ndendamaka la okitshakitshɛ edjinge lɛdji lɔso lɔ ndaawɛkɛ te Yehova. Nyotshɔ isankfumɔ tokole Poolo 1) lá ndapɛyɛ l’oloko ɔmɔ te Yehova 2) lá ndjekaka ndjɔmbɔmba yima Bible, endjinge 3) lá ndjawolaka okotshɔ wɔ winaso wasanga laso ndjawo. Ladjiko djɛ lasɔ, kaanga tongoyawoka djɛ tolekɔ wɔdju, Yehova angotila anto wa wolo!