1. Paulo rekoñese saida?

APÓSTOLU PAULO rekoñese katak dala ruma nia sente fraku. Nia hatete katak ninia “isin sai fraku daudaun”, dala ruma nia sente susar atu halo buat neʼebé loos, no dala ruma Jeová hatán ninia orasaun iha dalan neʼebé la tuir ninia hanoin rasik. (2 Kor 4:16; 12:7-9; Rom 7:21-23) Paulo mós rekoñese katak ninia inimigu sira haree nia nuʼudar ema fraku. * Maibé nia la husik ema seluk nia hanoin negativu ka ninia fraku rasik atu halo nia sente folin-laek.​—2 Kor 10:10-12, 17, 18.

2. Tuir 2 Korinto 12:9, 10, Paulo aprende lisaun importante saida?

² Paulo aprende lisaun importante ida katak ema bele iha kbiit maski sente fraku. (Lee 2 Korinto 12:9, 10.) Jeová hatete ba Paulo katak Jeová nia kbiit “sai kompletu kuandu [Paulo] fraku”, neʼe katak Jeová sei fó kbiit neʼebé Paulo presiza. Primeiru, mai ita aprende tanbasá ita labele sai laran-kraik bainhira ema koʼalia aat ita.

3. Tanbasá ita bele haksolok maski ema koʼalia aat ita?

³ Ita hotu la gosta kuandu ema koʼalia aat ita. Se ita-nia inimigu koʼalia aat ita no ita hanoin barak kona-ba sira-nia liafuan, ita bele sai laran-kraik. (Prov 24:10) Entaun, saida mak ita bele halo bainhira ema koʼalia aat ita? Hanesan  Paulo, ita bele “haksolok . . . iha tempu neʼebé ema koʼalia aat” ita. (2 Kor 12:10) Tanbasá? Tanba bainhira ema koʼalia aat no kontra ita, neʼe hatudu katak ita mak Jesus nia dixípulu neʼebé loos. (1 Ped 4:14) Jesus hatete katak ema sei fó-terus ba ninia dixípulu sira. (João 15:18-20) Neʼe akontese iha apóstolu sira-nia tempu, ema sira neʼebé hetan influénsia husi ema Gregu nia kultura, haree ema Kristaun nuʼudar ema neʼebé la matenek no fraku. No ema Judeu hanoin katak ema Kristaun mak “ema la eskola no ema baibain deʼit”, hanesan apóstolu Pedro no João. (Após 4:13) Ema barak hanoin katak ema Kristaun mak fraku tanba sira la envolve an iha polítiku ka militár, no ema la respeitu sira iha komunidade nia leet.

4. Ema Kristaun iha apóstolu sira-nia tempu halo saida bainhira ema koʼalia aat sira?

⁴ Bainhira ema koʼalia aat ema Kristaun iha apóstolu sira-nia tempu, neʼe hapara sira ka lae? Lae. Porezemplu, apóstolu Pedro no João sente haksolok bainhira ema fó-terus ba sira tanba laʼo tuir Jesus no hanorin ema seluk kona-ba Jesus. (Após 4:18-21; 5:27-29, 40-42) Dixípulu sira la iha razaun atu sente moe. Maski komunidade la respeitu ema Kristaun iha apóstolu sira-nia tempu, maibé ema Kristaun sira-neʼe ajuda ema barak. Porezemplu, livru balu iha Bíblia neʼebé ema Kristaun sira-neʼe balu mak hakerek, kontinua ajuda ema millaun ba millaun no fó sira esperansa. No uluk ema Kristaun haklaken kona-ba Ukun ida, no agora Ukun neʼe harii ona no lakleur tan sei ukun mundu tomak. (Mt 24:14) Maibé governu neʼebé uluk fó-terus ba ema Kristaun lakon ona. No agora daudaun, dixípulu laran-metin sira-neʼe ukun nuʼudar liurai iha lalehan. Maibé ema neʼebé uluk kontra sira mate ona. No se karik kontradór sira sei moris-hiʼas, sira sei sai povu ba Maromak nia Ukun neʼebé uluk ema Kristaun fó sai.​—Apok 5:10.

5. Tuir João 15:19, tanbasá ema la respeitu Testemuña ba Jeová?

⁵ Ohin loron ema balu la respeitu no goza Testemuña ba Jeová tanba sira hanoin katak ita ema neʼebé la matenek no fraku. Tanbasá? Tanba ita-nia hanoin la hanesan ho ema iha mundu. Ita hakaʼas an atu hatudu hahalok haraik an, laran-maus no halo tuir. Maibé mundu admira ema neʼebé foti an, hanoin an deʼit no kontradór. Liután neʼe ita la envolve an iha polítiku no la tama militár. Ita la hanesan ho ema iha mundu, tan neʼe sira hanoin katak ita ema fraku.​—Lee João 15:19; Rom 12:2.

6. Jeová ajuda nia povu atu kumpre saida?

⁶ Maski mundu hanoin katak ita fraku, maibé Jeová uza ita atu halo buat kmanek oioin. Nia kumpre daudaun serbisu haklaken neʼebé boot liu iha ema nia istória. Ohin loron, ninia atan sira prodús revista neʼebé tradús ba língua barak liu no fahe ba ema barak liu iha mundu, no sira uza Bíblia atu ajuda ema millaun ba millaun atu iha moris neʼebé kontente liu. Sira bele kumpre buat hotu neʼe tanba Jeová. Nia uza povu neʼebé mundu haree nuʼudar ema fraku atu halo serbisu neʼebé importante. Maibé oinsá ho ita ida-idak? Jeová bele ajuda ita atu iha kbiit ka lae? Saida mak ita presiza halo atu simu ninia ajuda? Mai ita koʼalia kona-ba buat tolu neʼebé ita bele aprende husi apóstolu Paulo nia ezemplu.

7. Saida mak lisaun ida neʼebé ita bele aprende husi Paulo?

⁷ Lisaun ida neʼebé ita bele aprende husi Paulo nia ezemplu mak keta sadere ba ita-nia kbiit ka abilidade rasik bainhira serbí Jeová. Tuir ema nia hanoin, Paulo iha razaun atu sai foti an no sadere ba ninia an rasik. Nia sai boot iha Tarsu, sidade kapitál iha Roma nia provínsia ida. Tarsu mak sidade neʼebé riku no iha universidade neʼebé famozu. Paulo matenek no simu hanorin husi Gamaliel, ulun-naʼin neʼebé ema Judeu barak respeitu. (Após 5:34; 22:3) Uluk Paulo mós iha naran-boot iha ema Judeu nia leet. Nia hatete: “Iha relijiaun Judeu nian haʼu laʼo ba oin diʼak liu fali ema barak neʼebé idade hanesan haʼu iha haʼu-nia nasaun.” (Gal 1:13, 14; Após 26:4) Maibé Paulo la sadere ba ninia kbiit rasik.

8. Tuir Filipe 3:8 no nota-rodapé, oinsá Paulo hanoin kona-ba buat neʼebé nia husik tiha? Tanbasá nia ‘haksolok iha ninia fraku’?

⁸ Paulo kontente atu husik tiha buat neʼebé mundu admira husi nia. Tuir loloos, nia haree buat sira-neʼe nuʼudar “foʼer deʼit”. (Lee Filipe 3:8 no nota-rodapé.) Paulo hasoru susar oioin tanba sai Kristu nia dixípulu. Ema iha ninia nasaun rasik odi nia. (Após 23:12-14) No ema Roma baku no hatama nia ba komarka. (Após 16:19-24, 37) Liután neʼe, nia rekoñese katak nia mós iha limitadu. (Rom 7:21-25) Maibé nia la para atu halo tuir Kristu tanba ema kontra nia ka tanba ninia fraku rasik. Duké halo nuneʼe, nia ‘haksolok iha ninia fraku’. Tanbasá? Tanba bainhira nia fraku, nia haree oinsá Maromak ajuda nia.​—2 Kor 4:7; 12:10.

9. Maski ita la iha buat neʼebé mundu admira, maibé ita presiza hanoin oinsá kona-ba ita-nia situasaun?

⁹ Se ita hakarak hetan kbiit husi Jeová, ita labele hanoin katak Jeová bele uza deʼit ita se ita iha saúde diʼak, edukasaun boot, pozisaun diʼak iha komunidade, ka riku. Jeová nia hanoin kona-ba ita la bazeia ba buat sira-neʼe. Tuir loloos, Maromak nia povu uitoan deʼit mak ‘matenek  tuir ema nia haree, no iha kbiit, no mai husi liurai nia jerasaun’. Maibé Jeová hili atu uza “buat fraku husi mundu neʼe”. (1 Kor 1:26, 27) Tan neʼe maski ita la iha buat neʼebé mundu admira, maibé ita bele nafatin serbí Jeová. Ita haree Ita-nia situasaun nuʼudar oportunidade atu haree oinsá Maromak fó kbiit ba Ita. Porezemplu, se Ita sente taʼuk ba ema sira neʼebé kontra Ita-nia fiar, halo orasaun ba Jeová atu fó Ita aten-brani hodi defende Ita-nia fiar. (Éf 6:19, 20) Se Ita hasoru problema tanba Ita moras todan, husu Jeová atu fó Ita kbiit neʼebé Ita presiza atu kontinua okupadu iha ninia serbisu tuir Ita-nia kbiit. Tempu ida-idak neʼebé Ita haree Jeová ajuda Ita, Ita-nia fiar sei sai metin liután.

10. Tanbasá ita presiza estuda ezemplu sira husi Bíblia hanesan temi iha Ebreu 11:32-34?

¹⁰ Paulo estuda Eskritura sira ho badinas. Nia aprende informasaun barak, maibé nia mós aprende husi ezemplu sira neʼebé hakerek iha Maromak nia Liafuan. Bainhira hakerek ba ema Ebreu neʼebé sai ona ema Kristaun, nia husu sira atu hanoin kona-ba Jeová nia atan sira neʼebé laran-metin. (Lee Ebreu 11:32-34.) Hanoin toʼok kona-ba Liurai David. Nia tenke tahan susar tanba inimigu kontra nia no mós ema neʼebé uluk sai ninia belun kontra fali nia. Bainhira ita estuda kona-ba David nia ezemplu, ita sei komprende tanbasá David nia ezemplu bele ajuda hametin Paulo no oinsá ita bele banati-tuir Paulo.

11. Tanbasá David haree hanesan fraku? (Haree dezeñu iha livru oin.)

¹¹ Golias mak asuwaʼin neʼebé kbiit boot no nia haree David nuʼudar ema fraku. Bainhira Golias haree David, Golias hatudu “oin-buis ba David”. Golias isin-boot, iha armas kompletu, no hetan ona treinu atu halo funu. Maibé David mak labarik neʼebé la iha esperiénsia no la iha armas atu halo funu. Maski David haree hanesan fraku, maibé nia iha forsa. Nia sadere ba Jeová atu fó forsa ba nia, no nia manán ninia inimigu.​—1 Sam 17:41-45, 50.

12. David hasoru susar saida tan?

¹² David tenke hasoru susar seluk neʼebé bele halo nia sente fraku no kbiit-laek. Ho laran-metin, David serbí liurai Izraél naran Saul neʼebé Jeová hili ona. Foufoun, Liurai Saul respeitu David. Maibé ikusmai, tanba Saul sai foti an, nia komesa sai laran-moras ba David. Saul trata aat David no mós koko atu oho David.​—1 Sam 18:6-9, 29; 19:9-11.

13. Saida mak David halo bainhira liurai Saul trata aat nia?

¹³ Maski Liurai Saul trata aat David, maibé nia nafatin hatudu respeitu ba liurai neʼebé Jeová hili ona. (1 Sam 24:6) David la fó sala ba Jeová tanba buat aat neʼebé Saul halo ba nia. Maibé nia sadere ba Jeová atu fó kbiit neʼebé nia presiza atu tahan susar neʼe.​—Sal 18:1, introdusaun.

14. Situasaun saida deʼit mak Paulo hasoru neʼebé hanesan ho David?

¹⁴ Apóstolu Paulo hasoru situasaun neʼebé hanesan ho David. Paulo nia inimigu sira forsa boot liu fali nia. Ulun-naʼin sira neʼebé naran-boot iha tempu neʼebá odi tebes Paulo. Dala barak sira haruka ema baku nia no hatama nia ba komarka. Hanesan David, ema neʼebé uluk sai Paulo nia belun trata aat  nia. No mós ema balu iha kongregasaun Kristaun kontra nia. (2 Kor 12:11; Flp 3:18) Maibé Paulo manán ema hotu neʼebé kontra nia. Oinsá? Nia kontinua haklaken maski ema kontra nia. Nia nafatin laran-metin ba ninia irmaun-irmán sira maski sira halo nia laran-kanek. Importante liu, nia laran-metin ba Maromak toʼo mate. (2 Tim 4:8) Nia bele halo buat hotu neʼe, tanba nia sadere ba Jeová, laʼós ba ninia kbiit rasik.

15. Saida mak ita-nia objetivu? Oinsá ita bele kumpre ida-neʼe?

¹⁵ Ema neʼebé laʼós Testemuña iha eskola, serbisu-fatin, ka família koʼalia aat ka fó-terus Ita ka lae? Iha kongregasaun laran, ema trata aat ona Ita ka lae? Se nuneʼe, hanoin-hetan David no Paulo nia ezemplu. Ita bele “kontinua halo buat diʼak hodi bele manán buat neʼebé aat”. (Rom 12:21) Bainhira ema kontra Ita, Ita lakohi kontra fali sira hanesan David kontra Golias. Maibé Ita-nia objetivu mak atu manán buat neʼebé aat hodi ajuda ema aprende kona-ba Jeová no Bíblia. Ita bele halo nuneʼe hodi sadere ba Bíblia atu hatán ba ema nia pergunta, hatudu respeitu no laran-diʼak ba ema neʼebé trata aat Ita, no hatudu hahalok diʼak ba ema hotu, inklui Ita-nia inimigu.​—Mt 5:44; 1 Ped 3:15-17.

16-17. Paulo nunka haluha saida?

¹⁶ Antes apóstolu Paulo sai Kristu nia dixípulu, ninia naran mak Saul, no nia mak mane joven neʼebé fó-terus ba Jesus nia dixípulu sira. (Após 7:58; 1 Tim 1:13) Jesus rasik hanetik Paulo atu labele fó-terus tan ba kongregasaun Kristaun. Jesus koʼalia ba Paulo husi lalehan no halo nia sai matan-delek. Atu bele haree fali, Paulo tenke buka ajuda husi ema neʼebé nia fó-terus. Nia ho haraik an simu ajuda husi dixípulu naran Ananias, no Ananias ajuda Paulo atu haree fali.​—Após 9:3-9, 17, 18.

¹⁷ Ikusmai Paulo sai ema Kristaun neʼebé ema barak koñese, maibé nia nunka haluha lisaun neʼebé Jesus hanorin ba nia  iha dalan ba Damasku. Paulo kontinua haraik an, no nia prontu atu simu ajuda husi irmaun-irmán sira. Nia rekoñese katak sira “hametin” nia.​—Kol 4:10, 11, nota.

18. Tanbasá dala ruma ita lakohi simu ajuda husi ema seluk?

¹⁸ Saida mak ita bele aprende husi Paulo? Karik uluk bainhira ita komesa ransu ho Jeová nia povu, ita prontu atu simu ajuda husi ema seluk tanba ita hatene katak ita presiza aprende buat barak tan. (1 Kor 3:1, 2) Maibé oinsá ho agora? Se ita serbí Jeová tinan barak ona no iha esperiénsia barak, karik ita lakohi simu ajuda, liuliu se ema neʼebé fó ajuda mak foin tama lia-loos. Maibé, baibain Jeová uza irmaun-irmán sira atu hametin ita. (Rom 1:11, 12) Entaun, se ita hakarak hetan kbiit husi Jeová, ita presiza simu ajuda husi irmaun-irmán sira.

19. Tanbasá Paulo hetan susesu?

¹⁹ Paulo kumpre buat kmanek oioin bainhira nia sai ema Kristaun. Tanbasá? Tanba nia aprende katak ninia susesu la depende ba ninia saúde, edukasaun, rikusoin, ka pozisaun iha komunidade, maibé depende ba ninia hahalok haraik an no sadere ba Jeová. Mai ita hotu banati-tuir Paulo hodi (1) sadere ba Jeová, (2) aprende husi Bíblia nia ezemplu sira, no (3) simu ajuda husi maluk Kristaun. Hodi halo nuneʼe, Jeová sei fó kbiit ba ita maski ita sente katak ita fraku.