1. ¿Tuku lichuwinalh apóstol Pablo?

APÓSTOL Pablo lichuwinalh pi lakgachunin xmakgkatsi pi ni xkgalhi litliwakga o kxlajwanan. Lichuwinalh pi xmakni «xlakgsputtilhama», chu xliskuja natlawa tuku xatlan chu pi Jehová ni ankgalhin xkgalhti xʼoraciones chuna la xla xlakaskin (2 Cor. 4:16; 12:7-9; Rom. 7:21-23). Nachuna lichuwinalh pi xtalamakgasitsin xwankgo pi ni tliwakga xwanit. * Pero ni mastalh talakaskin pi tuku nitlan xwankgo amakgapitsin chu tuku xʼakstu xmakgkatsi xtlawalh pi xlakpuwa pi nitu xlitaxtu (2 Cor. 10:10-12, 17, 18).

2. Chuna la wan 2 Corintios 12:9, 10, ¿tuku lu xlakaskinka katsinilh Pablo?

² Wi tuku lu xlakaskinka katsinilh Pablo: pi chatum lataman namakgkatsi pi xlajwanan pero tuku xaxlikana wa pi lu tliwakga (kalikgalhtawakga 2 Corintios 12:9, 10). Akxni Jehová wanilh Pablo «kilitliwakga liwana litasiya akxni xlajwanana», xwamputun pi xʼama maxki litliwakga akxni xmaklakaskilh. Pulana kaʼakxilhwi tuku xlakata ni lu nalilakgaputsayaw akxni kintalamakgasitsinkan nitlan kinkalichuwinankgoyan o kinkalikgalhkgamanankgoyan.

3. ¿Tuku xlakata napaxuwayaw akxni “nitlan nakinkalichuwinankanan”?

³ Niti lakgati pi wi tiku nalikgalhkgamanankan. Pero komo lu nalilakgaputsayaw akxni kintalamakgasitsinkan nakinkalikgalhkgamanankgoyan, max nataxlajwaniyaw (Prov. 24:10). ¿Tuku natlawayaw akxni nakinkalikgalhkgamanankanan? Tlan natlawayaw tuku tlawalh Pablo chu nalipaxuwayaw akxni  “nitlan kinkalichuwinankanan” (2 Cor. 12:10). ¿Tuku xlakata? Xlakata akxni kinkalikgalhkgamanankanan chu kinkaputsastalanikanan limasiya pi akinin xaxlikana kstalaninanin Cristo (1 Ped. 4:14). Jesús lichuwinalh pi kstalaninanin xʼamaka kaputsastalanikan (Juan 15:18-20). Chu wa uma tuku lalh kxapulana siglo. Akgtum liʼakxilhtit, tiku nachuna tsukukgolh lakpuwankgo chuna la griegos, xwankgo pi kstalaninanin Cristo nitu xkatsikgo chu nitu xlitaxtukgo. Chu judíos xwankgo pi xlakan «lakchixkuwin tiku ni xlakaskinka xlitaxtukgo chu nitu xkgalhtawakgakgonit» chuna la kawanika Pedro chu Juan (Hech. 4:13). Lhuwa xlakpuwankgo pi kstalaninanin Cristo ni xkgalhikgo litliwakga xlakata ni xkgalhikgo limapakgsin chu tiku xkamakgtayakgolh chu latamanin xkalakgmakgankgo.

4. ¿Tuku tlawakgolh xapulana kstalaninanin Cristo akxni nitlan xkalichuwinankgo xtalamakgasitsinkan?

⁴ Xapulana kstalaninanin Cristo ni mastakgolh talakaskin pi tuku nitlan xkawanikan xkamalakgachokgolh. Akgtum liʼakxilhtit, Pedro chu Juan lanka talakgalhaman xliʼakxilhkgo pi xkaputsastalanikan xlakata kstalanikgo Jesús chu xkamasiyanikgo amakgapitsin (Hech. 4:18-21; 5:27-29, 40-42). Kstalaninanin Cristo xalak pulana siglo ni xʼanan tuku xlimaxanankgolh. Xlakata umakgolh kstalaninanin Cristo lu kamakgtayakgolh latamanin nixawa tuku katlawanikgolh xtalamakgasitsinkan. Liwana katsiyaw uma xlakata libros nema makgapitsi tsokgwilikgolh chuntiya kamakgtayama chu kamaxki takgalhkgalhin lhuwa latamanin. Chu Tamapakgsin nema xlichuwinankgo ni kajwatiya xaxlikana litaxtu la uku, wata nialh makgas namapakgsinan kxlikalanka kakilhtamaku (Mat. 24:14). Pero lanka kachikin nema xkaputsastalanima lakgsputli chu la uku kajwatiya lichuwinankan. Nachuna umakgolh kstalaninanin Cristo tiku ni makgxtakgkgolh la uku mapakgsinanin litaxtukgo kʼakgapun. Pero xtalamakgasitsinkan nikgolh, chu komo nalakastakwanamparakgo wa nakamapakgsi Tamapakgsin nema xlichuwinankgo kstalaninanin Cristo tiku kaputsastalanikgolh (Apoc. 5:10).

5. Chuna la wan Juan 15:19, ¿tuku xlakata ni kinkaʼakxilhputunkgoyan latamanin xalak kakilhtamaku?

⁵ La uku na wilakgolh latamanin tiku ni kinkaʼakxilhputunkgoyan, kinkalikgalhkgamanankgoyan chu lakpuwankgo pi nitu litaxtuyaw. ¿Tuku xlakata? Xlakata nichuna likatsiyaw la likatsikgo latamanin xalak kakilhtamaku. Kakilhtamaku lanka xtapalh kaʼakxilha tiku lanka kamakgkatsikan, chu niti tapakgsinikgo. Pero akinin liskujaw xlakata nataktujuyaw, tlan nalikatsiyaw chu nakgalhakgaxmatnanaw. Nachuna ni makgtanuyaw kpolítica chu kʼguerra. Xlakata ni makgtanuyaw kʼuma kakilhtamaku nitu kinkaliʼakxilhkanan (kalikgalhtawakga Juan 15:19; Rom. 12:2).

6. ¿Tuku lu tlan tlawama Jehová xlakata kinkalimaklakaskiman?

⁶ Maski latamanin tanu tanu tuku lakpuwankgo kimpalakatakan, Jehová kinkalimaklakaskiman xlakata namakgantaxti xtalakaskin. Akgtum liʼakxilhtit, lichuwinamaka xtachuwin xlikalanka katiyatni. Xlakskujnin maʼakgpitsimaw likgalhtawakga nema matitaxtikanit klhuwa tachuwin kxlikalanka katiyatni, chu limaklakaskinaw Biblia xlakata nakamakgtayayaw lhuwa millones latamanin. Chu uma chuna kgantaxtuma kaj xlakata xtamakgtay Jehová xlakata kamaklakaskin latamanin tiku tasiyakgo pi ni kgalhikgo litliwakga xlakata tlan namakgantaxtikgo putum uma. Pero ¿chu akinin? ¿Tlan nakinkamakgtayayan Jehová xlakata tliwakga nawanaw? Chu komo chuna, ¿tuku kilitlawatkan xlakata nakinkamakgtayayan? Kaʼakxilhwi pulaktutu tuku kinkamasiyaniyan xliʼakxilhtit apóstol Pablo.

7. ¿Tuku xapulana kinkamasiyaniyan xliʼakxilhtit Pablo?

⁷ Xapulana tuku kinkamasiyaniyan xliʼakxilhtit apóstol Pablo wa pi akxni naskujnaniyaw Jehová ni wa nalipawanaw kilitliwakgakan chu tuku tlan tlawayaw. Lhuwa tuku xtlawa pi Pablo lanka xmakgkatsika chu ni xpekualh. Makgastakka kTarso, akgtum kachikin nema xtapakgsini Roma, chu lu tlan xkakitaxtuni tiku xlamakgolh anta chu xʼanan akgtum lu xlakaskinka pukgalhtawakga. Pablo lu xkgalhtawakganit, xlakata wa Gamaliel tiku xmakgalhtawakgena xwanit, chatum pulalina judío tiku lu xmaxkikan kakni (Hech. 5:34; 22:3). Chu milh kilhtamaku, Pablo na lu xlakaskinka litaxtulh nixawa amakgapitsin judíos. Xla lichuwinan: «Lu tlan xkinkitaxtunima kxtakanajlakan judíos nixawa tiku xalak kinkachikin nema watiya kinkata xkgalhikgo» (Gál. 1:13, 14; Hech. 26:4). Pero putum uma ni tlawalh pi xʼakstu nalipawankan.

8. 1) Chuna la wan Filipenses 3:8, ¿tuku xlakpuwan Pablo xlakata tuku xmakgxtakgnit? 2) ¿Tuku xlakata Pablo lichuwinalh pi xpaxuwa akxni kxlajwanan?

⁸ Pablo xatapaxuwan lakgmakgalh tuku xtlawa pi lanka nalitaxtu kʼuma kakilhtamaku. Chu asta wa pi umakgolh tuku xkgalhi xlitaxtukgo xtachuna la «palhma» (kalikgalhtawakga Filipenses 3:8). Chu wi tuku tlawalh xlakata kstalanina Cristo xlitaxtulh. Asta kxkachikin lakgmakganka (Hech. 23:12-14). Chu asta romanos tiku xtachiki xwankgonit, wilinikgolh chu tamaknukgolh kpulachin (Hech. 16:19-24, 37). Nachuna, lu nitlan xlimakgkatsi pi wi tuku nila xtlawa (Rom. 7:21-25). Pero nikxni mastalh talakaskin pi xtalamakgasitsin o tuku nila xtlawa xmalakgachokgolh. Wata lichuwinalh: «Kpaxuwa akxni kxlajwanan». ¿Tuku xlakata? Xlakata akxni kxlajwanan xʼakxilha la xmakgtaya xlitliwakga Dios (2 Cor. 4:7; 12:10).

9. ¿La naʼakxilhaw tuku nila tlawayaw?

⁹ Komo lakaskinaw pi Jehová nakinkamaxkiyan xlitliwakga, ni nalakpuwanaw pi lanka xtapalh litaxtuyaw kaj xlakata kilitliwakgakan, xlakata lhuwa kgalhtawakganitaw, kinkachikinkan o xlakata tuku kgalhiyaw. Ni wa uma tuku tlawa pi lanka xtapalh nalitaxtuyaw kxlakatin Jehová. Kxkachikin Dios «ni lu lhuwa tiku xalakgskgalalan litaxtukgo kxlakatinkan latamanin chu ni lhuwa tiku xalakgtliwakgan  chu tiku lakanchikgolh kfamilias nema lu xlakaskinka kaʼakxilhkan». Wata Jehová kamaklakaskin «tiku ni kgalhikgo litliwakga xalak kakilhtamaku» (1 Cor. 1:26, 27). Wa xlakata, ni kalakpuwaw pi tuku nila tlawayaw nakinkamalakgachokgoyan xlakata nialh naskujnaniyaw Dios, wata kaʼakxilhwi pi akxni tlan naʼakxilhaw la kinkalimakgtayayan xlimakgatliwakga. Akgtum liʼakxilhtit, komo wi tiku natlawaputun kalakpuwaw pi nixaxlikana tuku kanajlayaw chu ni katsiyaw tuku natlawayaw, kaskiniw Jehová pi kakinkamakgtayan ni napekuanaw akxni nakgalhmakgtayayaw kintakanajlakan (Efes. 6:19, 20). Komo kgalhiyaw akgtum lu xatuwa tajatat, kaskiniw Jehová pi kakinkamaxkin litliwakga xlakata chuntiya naskujnaniyaw chuna la matlaniyaw. Akxni akxilhaw la kinkamakgtayayan, kintakanajlakan tatliwakglha chu tlakg tliwakga makgkatsiyaw.

10. ¿Tuku xlakata xlakaskinka nalikgalhtawakgayaw xliʼakxilhtitkan xlakskujnin Dios nema kalichuwinankan kʼHebreos 11:32-34?

¹⁰ Pablo lu xlismaninit xlikgalhtawakga xaSanto Tatsokgni. Uma makgtayalh xlakata lhuwa tuku nakatsini, pero nachuna lhuwa tuku katsinilh xlakata xliʼakxilhtitkan xlakskujnin Dios xala makgasa. Carta nema katsokgnanilh kstalaninanin Cristo tiku hebreos xwankgonit, Pablo kamakgpuwantinilh wa naʼakxilhkgo xliʼakxilhtitkan umakgolh xlakskujnin Dios tiku ni makgxtakgkgolh (kalikgalhtawakga Hebreos 11:32-34). Kalilakpuwaw mapakgsina David. Xtalamakgasitsin David putsastalanikgolh, pero nachuna putsastalanikgolh tiku xʼamigos xwankgonit. Tlakg kalichuwinaw xliʼakxilhtit David. Chuna naʼakxilhaw la makgtayalh Pablo akxni xlilakpuwan xlatamat David chu la tlan nastalaniyaw xliʼakxilhtit Pablo.

11. ¿Tuku xlakata David xtasiya pi ni tliwakga xwanit? (Kaʼakxilhti xmakni revista).

¹¹ Akxni tliwakga soldado tiku xwanikan Goliat akxilhli David, nitu liʼakxilhli chu «tsukulh likgalhkgamanan». Goliat tlakg tliwakga xwanit, xkgalhi tuku xmaklakaskin xlakata xʼan kʼguerra chu makgasata la soldado xlitaxtu. David kajku kgawasa xwanit chu nikxni xʼanit kʼakgtum guerra, pero xlipawan xlitliwakga Jehová. Chu lu tlan tuku kitaxtulh xlakata maski xtasiya pi ni tliwakga xwanit makgtayalh xlakata tlan natlaja xtalamakgasitsin (1 Sam. 17:41-45, 50).

12. ¿Tuku atanu taʼakglhuwit titaxtulh David?

¹² David wi atanu tuku titaxtulh nema xtlawa pi ni tliwakga xmakgkatsilh. Xla chatum kskujni Saúl xwanit, mapakgsina tiku Jehová xlaksaknit anta kʼIsrael. Xapulana, Saúl xmaxki kakni. Pero titaxtulh kilhtamaku, xlakata lanka xmakgkatsikan tsukulh lakgsitsilakan David. Chu nitlan tsukulh likatsini chu asta makgniputulh (1 Sam. 18:6-9, 29; 19:9-11).

13. ¿Tuku tlawalh David akxni mapakgsina Saúl nitlan likatsinilh?

¹³ Maski Saúl nitlan xlikatsini, David chuntiya maxkilh kakni, xlakata liwana xkatsi pi Jehová xlaksaknit xlakata mapakgsina nalitaxtu (1 Sam. 24:6). Nachuna nikxni limawakalh Jehová tuku nitlan xtlawani Saúl. Wata lipawa pi Jehová xʼama maxki litliwakga xlakata natayani akxni xtitaxtulh tuku tuwa (Sal. 18:1 chu tuku litsuku).

14. ¿Tuku tuwa titaxtulh Pablo nema nachuna titaxtulh David?

¹⁴ Apóstol Pablo na titaxtulh tuku tuwa chuna la David. Xkgalhi xtalamakgasitsin nema tlakg lakgtliwakga xwankgonit nixawa la xla. Xʼanan lhuwa pulalinanin tiku lu xkalakgapaskan chu ni xʼakxilhputunkgo asta lakgachunin xtlawakgo pi xwilinika chu xtamaknuka kpulachin. Chuna la David, tiku xwankgo  pi xʼamigos xwankgonit putsastalanikgolh. Chu asta tiku xalak congregación xwankgonit nitlan tsukukgolh lichuwinankgo (2 Cor. 12:11; Filip. 3:18). Pero nikxni mastalh talakaskin pi xtalamakgasitsin xmaxlajwanikgolh. Chuntiya xlichuwinan Dios maski xputsastalanikan. Nikxni kamakgxtakgli xnatalan maski xlakan nitlan xlikatsinikgo. Chu nachuna nikxni makgxtakgli Jehová (2 Tim. 4:8). Maski lhuwa tuku nitlan titaxtulh tayanilh xlakata lipawa Jehová chu ni xʼakstu lipawanka.

15. ¿Tuku tlawaputunaw, chu la tlan natlawayaw?

¹⁵ ¿Nitlan kinkalichuwinankanan o kinkaputsastalanikgoyan tiku akxtum kataʼanaw kʼescuela, kataskujaw o tiku xalak kifamiliajkan tiku ni xtatayananin Jehová? ¿Minit kilhtamaku nitlan kinkalikatsinikanitan kcongregación? Komo chuna, kalakapastakwi xliʼakxilhtitkan David chu Pablo. Chuntiya «wantuku nixatlan kalimakgatlajaw tuku xatlan» (Rom. 12:21). Akxni latamanin kinkatalawanikgoyan, ni katalatlawayaw chuna la David talatlawalh Goliat. Wata limaklakaskinaw xTachuwin Dios xlakata nalakgchanaw xtalakapastaknikan chu xnakujkan tiku kgalhikgo tlan tayat. ¿La tlan natlawayaw? Nalimaklakaskinaw Biblia xlakata nakgalhtiyaw xtakgalhskininkan latamanin, nakalimasiyaniyaw talakgalhaman chu nakamaxkiyaw kakni tiku nitlan nakinkalikatsinikgoyan, chu tlan nakalikatsiniyaw putum latamanin asta kintalamakgasitsinkan (Mat. 5:44; 1 Ped. 3:15-17).

16, 17. ¿Tuku ankgalhin xlakapastaka Pablo?

¹⁶ Akxni nina kstalanina Cristo xlitaxtu apóstol Pablo, tiku xlilakgapaskan Saulo, chatum kgawasa xlitaxtu tiku xkaputsastalani kstalaninanin Jesús (Hech. 7:58; 1 Tim. 1:13). Pero wa Jesús tiku tachuwinalh, tlawalh pi nialh xlakawanalh chu nialh maxkilh talakaskin chuntiya nakaputsastalani kstalaninanin. Xlakata tlan xlakawanampa, xtalakaskin pi xkalakgalh latamanin tiku xkaputsastalaninit. Taktujulh chu makgamakglhtinalh xtamakgtay chatum kstalanina Jesús tiku xwanikan Ananías, tiku tlawalh pi xlakawanampa (Hech. 9:3-9, 17, 18).

¹⁷ Titaxtulh kilhtamaku, Pablo lu xlakaskinka  litaxtulh kcongregación xla kstalaninanin Cristo, chu ankgalhin xlakapastaka tuku Jesús masiyanilh akxni tachuwinalh kxtiji Damasco. Taktujulh chu xatapaxuwan makgamakglhtinalh xtamakgtaykan xnatalan. Liwana katsilh pi xmakgtayakgonit chu lu xmatliwakglhkgonit (Col. 4:10, 11, nota).

18. ¿Tuku xlakata tuwa namakgkatsiyaw namakglhtinanaw xtamakgtaykan amakgapitsin?

¹⁸ ¿Tuku kinkamasiyaniyan xliʼakxilhtit Pablo? Akxni tsukuw likgalhtawakgayaw Biblia, max xatapaxuwan xmakgamakglhtinanaw xtamakgtaykan amakgapitsin, xlakata xkatsiyaw pi xtachuna la laktsu kamanan xlitaxtuyaw kkintakanajlakan chu xtalakaskin lhuwa tuku nakatsiniyaw (1 Cor. 3:1, 2). Pero ¿chu la uku? Komo akglhuwata kata la skujnanimaw Jehová chu lhuwata tuku katsiniyaw, max ni katimakgamakglhtinamputuw xtamakgtaykan amakgapitsin, liwaka akxni kinkamakgtayaputunan tiku nina makgas wi anta kxaxlikana. Pero Jehová, kamaklakaskin natalan lakchixkuwin chu lakpuskatin xlakata nakinkamatliwakglhan (Rom. 1:11, 12). Uma pulaktum tuku xaxlikana nakanajlayaw komo litamakgtayaputunaw xlitliwakga Jehová nema kinkamaxkiyan.

19. ¿Tuku xlakata Pablo lhuwa tuku tlan tlawalh?

¹⁹ Akxni Pablo kstalanina Cristo litaxtulh, lhuwa tuku tlan tlawalh. ¿Tuku xlakata? Xlakata akgatekgsli pi xlakata tlan nakinkakitaxtuniyan ni kajwatiya talakaskin kilitliwakgakan, takgalhtawakga o tumin, wata talakaskin nataktujuyaw chu nalipawanaw Jehová. Wa xlakata, chuna katlawaw la Pablo: kalipawaw Jehová, wi tuku kakatsiniw xlakata tiku kalichuwinan Biblia chu kamakgamakglhtinaw xtamakgtaykan kinatalankan. Wa xlakata, maski makgkatsiyaw pi taxlajwaniyaw, Jehová nakinkamatliwakglhan.