1. I mpsini leswi Pawulo aaswi tiva?

MUPOSTOLO Pawulo aaswi tiva swaku minkama yin’wana a ahela ntamu. A vule swaku miri wa yena awu “hlakala” ni swaku a afanele a lwa hi matimba akuva a yendla swilo swaswinene. Naswona Yehovha aangamu hlamuli swikhongelo swa yena xileswi a alavisa xiswona. (2 Kor. 4:16; 12:7-9; Rhom. 7:21-23) Pawulo aaswi tiva swaku hambi vanhu lava avamu nyenya, avamu vona na a li munhu wa kutsana * kumbe na anga li wa nchumu. Kambe anga pfumelanga swaku swilo swa kubiha leswi vanhu avaswi vula hi yena kumbe swihoxo swa yena swimu yendla a titwa na anga pfuni nchumu. — 2 Kor. 10:10-12, 17, 18.

2. Hikuya hi 2 Vakorinto 12: 9, 10, hi yini mhaka ya lisima leyi Pawulo angayi djondza?

² Pawulo a djondze mhaka ya lisima. A tsumbule swaku munhu hambiloko a hele ntamu angaswi kota kutiya. (Lerha 2 Vakorinto 12:9, 10.) Yehovha a byele Pawulo swaku matimba ya yena “mahetiseka laha kunga ni kutsana kona”, leswi vulaka swaku Yehovha aata nyika Pawulo ntamu, hambiloko a tsanile. Ahi voneni swaku hi mhaka muni hinga fanelanga hi kwata loko lava vahi nyenyaka vahi rhuka.

3. Hi mhaka muni hi fanele hi tsaka loko vahi rhuka?

³ Anga kona lweyi a rhandzaka kurhuketeliwa, kambe loko hi kwata hintamu loko vanhu vahi rhuka switahi heta ntamu.  (Swi. 24:10) Se hi fanele hi ku yini loko vahi rhuketela? Kufana na Pawulo, hi fanele hi ‘tsaka loko . . . hi rhuketeliwa’. (2 Kor. 12:10, NM) Hi mhaka muni? Hi mhaka loko vahi rhuka va tlhela va lwisana na hina swi kombisa swaku hi valandzeli va ntiyiso va Yesu. (1 Pet. 4:14) Yesu a vule swaku valandzeli va yena avata xanisiwa. (Yoh. 15:18-20) Swoleswo swi yendlekile ka Vakreste va nkameni wa vapostolo. Ka nkama wolowo, Vagriki van’wana avava tekela hansi Vakreste, vava vona na vanga li va nchumu; naswona Vayuda ava vona Vakreste na va li vanhu ‘lava ni kudjondza avanga djondzanga’ kufana na mupostolo Petro na Yohane. (Mint. 4:13) Leswi Vakreste avanga yi nyimpini kumbe kutipeta ka politika, mimfumu ayiva vona na vanga li va nchumu naswona kutala ka vanhu avangava hloniphi.

4. Vakreste va minkameni ya vapostolo va yendle yini loko vanhu va vulavula kubiha hi vona?

⁴ Vakreste va le minkameni ya vapostolo va pfumele kuhetiwa ntamu hi lava avava xanisa? Ihim. Hi xikombiso, mupostolo Petro na Yohane vaswi vone na kuli nkateko kuxanisiwa hi mhaka ya kulandzela Yesu ni kudjondzisa van’wana leswi vangaswi djondza ka Yesu. (Mint. 4:18-21; 5:27-29, 40-42) Valandzeli va Yesu avanga danisiwi hi ntirho lowu avawu yendla. Hambileswi vanhu avangava hloniphi, va yendle minchumu ya yinyingi swaku vava pfuna. Hi xikombiso, Vakreste van’wana lava ava xanisiwa hi vona vanga tsala mabuku ya Bibele lawa ma pfunaka vanhu va vanyingi namuntlha; naswona a Mfumu lowu ava vulavula hi wona se wa fuma matilweni funtshi wuta fuma ni lani misaveni. (Mat. 24:14) A mfumu wa matimba wa Roma lowu awu xanisa Vakreste ka nkama luwani awaha li kona, kambe Vakreste van’wana va kutshembeka lava ava xanisiwa hi mfumu lowu, swoswi va fuma na Yesu amatilweni. Hinkwavu lava ava xanisa Vakreste aminkameni ya vapostolo va file, naswona loko va tshuka va pfuxiwa vata fumiwa hi mfumu lowu avawu nyenya va tlhela va nyenya ni lava vawu seketelaka. — Nhla. 5:10.

5. Hikuya hi Yohane 15:19, hi mhaka muni Timboni ta Yehovha ti tekeliwa hansi?

⁵ Ni swoswi, kahali ni vanhu lava kalaka vangahi hloniphi hina Timboni ta Yehovha naswona vahi tekela hansi va pimisa swaku ahi va nchumu. Hi mhaka muni? Hi mhaka mahanyela ya hina ama fani ni ya vona. Hi zama kutiveka hansi, hi va vanhu va kurhula hi tlhela hi va ni xihlonipho. Misava leyi yi tale hi vanhu va kutibyela, va ku ava na mhaka ni van’wana va tlhela vanga vi ni xihlonipho. Xin’wana xiva yendlaka vahi nyenya hi mhaka ya leswi hi kalaka hinga tipeti ka politika naswona ahi yi nyimpini. Leswi hi kalaka hinga fani na vona, vahi tekela hansi. — Lerha Yohane 15:19; Rhom. 12:2.

6. Hi wihi ntirho lowu Yehovha a pfunaka vanhu va yena kuva vawu yendla?

⁶ Hambileswi vanhu va misava leyi vahi vonaka na hinga li va nchumu, Yehovha wahi tirhisa swaku hi yendla minchumu ya lisima. Hi yendla ntirho wawukulu wa ku awuse tshama wu yentxiwa lani misaveni kunga kuchumayela misaveni hinkwayu. Hi hundzuluxela mabuku yamanyingi hi tlhela hi pfuna vanhu hi kutirhisa Bibele akuva va txintxa mahanyela ya vona. Hinkwaswu leswi swi za swi koteka hi mhaka Yehovha, hambileswi vanhu va pimisaka swaku ahi va nchumu. Kambe Yehovha ahi vonisa kuyini hi mun’we hi mun’we? Swinga koteka swaku ahi nyika ntamu? Loko swi koteka, hinga yendla yini akuva ahi pfuna? Ahi voneni swilo swinharhu leswi hingaswi djondzaka ka xikombiso xa mupostolo Pawulo.

7. Hi djondza yini ka xikombiso xa Pawulo?

⁷ Ka xikombiso xa mupostolo Pawulo, hi djondza swaku: Ahi fanelanga hi tshemba ntamu wa hina kumbe leswi hi kotaka kuswi yendla loko hi tirhela Yehovha. Loko a ali munhu mun’wana, Pawulo aata tibyela hikusa a ativa kuyendla minchumu yayinyingi. A kulele Tarsu, a capital la Roma. Ka doropa la Tarsu a kutale hi vanhu va kuganya naswona aku ni univhersidadi. Pawulo a adjondze ngopfu naswona a adjondzisiwe hi Gamaliyele, prisori lweyi a ahloniphiwa ngopfu. (Mint. 5:34; 22:3) Ku ni nkama lowu Vayuda ava vona Pawulo na a li munhu wa lisima. A te: “Hi kuhanya Xiyuda, ani tlula lavotala va tintanga ta mina xikarhi ka va ka hina”. (Gal. 1:13, 14; Mint. 26:4) Kambe Pawulo aanga tshembi ntamu wa yena.

8. Hikuya hi Vafilipiya 3:8, Pawulo aaswi vonisa kuyini swilo leswi angaswi tshika naswona hi mhaka muni a tsaka hi kutsana ka yena?

⁸ Pawulo a tshike swilo hinkwaswu leswi vanhu ava pimisa swaku i swa lisima, kambe aswi vone na swi li “nsila ntsena”. (Lerha Vafilipiya 3:8.) Pawulo a kumane ni swikarhatu swa swinyingi hileswi anga va Mukreste. A anyenyiwa hi vanhu va tiko la yena. (Mint. 23:12-14) Naswona vamu bile va tlhela vamu pfalela djele. (Mint. 16:19-24, 37) Leswi aanga hetisekanga, aswimu karhatela kuyendla swilo swaswinene. (Rhom. 7:21-25) Kambe anga pfumelelanga swikarhatu swoleswo swimu heta ntamu. A yamukele kutsana ka yena hi kutsaka. Hi mhaka muni? Hikusa loko a tsanile hi kona a avona swaku Yehovha wamu pfuna. — 2 Kor. 4:7; 12:10.

9. Hi fanele hi yendla yini loko ku ni leswihi hetaka ntamu?

⁹ Loko hi lava kupfuniwa hi Yehovha ahi fanelanga hi pimisa swaku ntamu, kudjondza ngopfu, lomu hinga psaleliwa kona ni kuganya hi swona swihi yendlaka hi va va lisima. Yehovha anga na mhaka ni swilo leswo. Ntiyiso hileswaku “lava tlhariheke ni lava tiyeke ni lava chavisekaka ava talanga” xikarhi ka vanhu va Yehovha. Kambe Xikwembu xi hlawule ‘leswi misava yiswi vonaka swi li ni gome  kumbe swingali swa nchumu’. (1 Kor. 1:26, 27) Hambiloko unga ganyanga, unga djondzanga kumbe unga na ntamu ungaswi kota kutirhela Yehovha. Funtshi loko unga li na swona swilo leswi, uta va ni nkama wawunyingi wa kutirhela Yehovha a tlhela aku katekisa. Hi xikombiso, loko ku ni lava vulavulaka kubiha hi leswi uswi kholwaka, khongela ka Yehovha u kombela swaku unga chavi kunyimelela leswi uswi kholwaka. (Efe. 6:19, 20) Loko u vabya kumbe u limalile, kombela Yehovha aku nyika ntamu wa kuyendla leswi ungaswi kotaka akuva umu tirhela. A nkama lowu u vonaka Yehovha aku pfuna, lipfumelo la wena lita ya li kula li tlhela li tiya.

10. Hi mhaka muni hi fanele hi pimisa hi swikombiso swa vanhu va kutshembeka swa kufana ni leswinga ka Vaheveru 11:32-34?

¹⁰ Mupostolo Pawulo a arhandza kudjondza Matsalwa naswona adjondze swilo swinyingi ka vanhu va kutshembeka lava ava tirhela Yehovha. Ka karta leli anga tsalela Vaheberu, ava byele swaku va pimisa hi swikombiso swaswinene swa vanhu lava ava tirhela Yehovha minkameni ya khale. (Lerha Vaheveru 11:32-34.) Mun’we wa vona i Hosi Davhida. Davhida anga hluphiwanga hi lava avamu nyenya ntsena, kambe a ahluphiwa ni hi lava vanga tshama va va vanghanu va yena. Loko hi pimisa hi xikombiso xa Davhida, hita vona swaku hikakunene Pawulo swimu pfunile kupimisa hi leswi.

11. Hi mhaka muni Goliyadi a avona Davhida na anga li wa nchumu? (Vona xifaniso lexinga ka pajina la kusungula.)

¹¹ Goliyadi a avona Davhida na anga li wa nchumu naswona aamu tekela hansi. Goliyadi a alehile, a ani swipada swa kulwa hi swona nyimpi funtshi a ali khale na a lwa nyimpi. Kambe Davhida a ali mutsongo funtshi aanga tivi nchumu hi kulwa nyimpi. Hambileswo Davhida a atiyile hikusa a atshemba Yehovha naswona Yehovha amu nyike ntamu wa kuhlula Goliyadi. — 1 Sam. 17:41-45, 50.

12. Hi xini xikarhatu xin’wana lexi Davhida anga kumana na xona?

¹² Davhida a kumane ni xikarhatu xin’wana lexi axitamu yendla a hela ntamu. Davhida a atirhela Sawulo, lweyi a avekiwe hi Yehovha leswaku a va hosi ya Israyele. A kusunguleni hosi Sawulo aamu hlonipha Davhida, kambe hi kufamba ka nkama a sungule kumu nyenya. A sungule kuxanisa Davhida a tlhela a zama kumu dlaya. — 1 Sam. 18:6-9, 29; 19:9-11.

13. Davhida a yendle yini a nkama anga xanisiwa hi hosi Sawulo?

¹³ Hambileswi Sawulo aamu xanisa, Davhida a tame amu hlonipha hileswi a ali hosi leyinga vekiwa hi Yehovha. (1 Sam. 24:6) Anga zanga a sola Yehovha hi mhaka swilo swa kubiha leswi anga yendleliwa hi Sawulo. Kuhambana ni leswo, a atshemba Yehovha swaku atamu nyika ntamu wa kutiyisela swikarhatu swa yena. — Pis. 18:1.

14. Hi swihi swikarhatu leswi Pawulo anga kumana na swona swa kufana ni swa Davhida?

¹⁴ Mupostolo Pawulo a kumane ni xikarhatu xa kufana ni xa Davhida. Vanhu lava avamu nyenya ava ni ntamu kumu tlula. A anyenyiwa hi vafundhisi lava ava hloniphiwa hintamu. Vamu bile va tlhela vamu peta djele. Kufana na Davhida, vanhu lava ava xanisa Pawulo va tshame va va vanghanu va yena. Hambi hi Vakreste van’wana bandleni avamu nyenya. (2 Kor. 12:11; Filp. 3:18) Kambe Pawulo ava hlule hinkwavu lava avamu nyenya. Aswi kotise kuyini leswo? Aswi kotile hi kutama a chumayela hambiloko vanhu vamu kaneta. A tame a tshembeka ka vamakwerhu hambileswi van’wana avamu nyenya. Kambe xa lisima  kutlula hinkwaswu, a tshembekile ka Yehovha anze a fa. (2 Tim. 4:8) Hinkwaswu leswi anga kotanga kuswi yendla hi ntamu wa yena kambe a kote kuswi yendla hileswi a apfuniwa hi Yehovha.

15. Hi fanele hi yendla yini loko vanhu vahi xanisa?

¹⁵ Ku ni vanhu lava tshamelaka kuku poyila kumbe kuku xanisa axikolweni, antirhweni kumbe maxaka lawa ma kalaka manga li Timboni? U tshama u hluphiwa hi makwerhu abandleni? Loko swi tshama swiku humelela, khumbuka xikombiso xa Davhida ni xa Pawulo hi kutama u ‘hlula leswobiha hi leswinene’. (Rhom. 12:21) Loko vanhu vahi kaneta, ahi lwi na vona kufana na Davhida anga lwa na Goliyadi kambe hi hlula swa kubiha hi kuyendla hinkwaswu leswi hingaswi kotaka kuva hiva pfuna va djondza hi Yehovha ka Bibele. Hinga yendla leswo hi kuva hlamula swivutiso swa vona hi kutirhisa Bibele ni kuva hlonipha hambiloko vahi xanisa ni kuyendlela swaswinene vanhu hinkwavu hambi lava vahi nyenyaka. — Mat. 5:44; 1 Pet. 3:15-17.

16-17. I mpsini leswi Pawulo a kalaka angaswi kohlwanga?

¹⁶ A nkama mupostolo Pawulo aangase va Mukreste aanga na xihlonipho funtshi a axanisa valandzeli va Yesu. (Mint. 7:58; 1 Tim. 1:13) Hi Yesu anga tshikisa Pawulo kuxanisa bandla naswona hi nkama wolowo Pawulo a ativiwa swaku hi Sawulo. Yesu a vulavule na Pawulo na a li matilweni a tlhela amu dlaya matihlo. Swaku a tlhela a kota kuvona, Pawulo a afanele a kombela kupfuniwa hi vanhu volava aava xanisa. Hi kutiveka hansi, Pawulo a pfumele kupfuniwa hi Ananiya lweyi angamu hanyisa matihlo. — Mint. 9:3-9, 17, 18.

¹⁷ Hi kufamba ka nkama, Pawulo a ve Mukreste lweyi a ativiwa abandleni kambe angaswi kohlwanga leswi Yesu angamu djondzisa swona siku leli na a ya Damaxka. A ativeka hansi naswona a apfumela kupfuniwa hi vamakwerhu abandleni. Aaswi tiva swaku vamakwerhu avamu ‘tiyisa swinene’. — Kol. 4:10, 11.

18. Hi mhaka muni minkama yin’wana hinga yalaka kupfuniwa hi van’wana?

 ¹⁸ Hi djondza yini ka xikombiso xa Pawulo? A nkama hinga djondza ntiyiso ahi lava kupfuniwa hi van’wana hikusa ahiswi tiva swaku ku ni minchumu ya yinyingi leyi hi faneleke hiyi djondza. (1 Kor. 3:1, 2) Se swoswi ke? Loko hi ni malembe yamanyingi na hi tirhela Yehovha, swingahahi karhatela kupfumela loko van’wana va lava kuhi pfuna, ngopfungopfu loko munhu lweyi a lavaka kuhi pfuna aha li kudjondza ntiyiso. Kambe minkama yinyingi, Yehovha a tirhisa vamakwerhu swaku vahi tiyisa. (Rhom. 1:11, 12) Hi mhaka leyo, loko hi lava kutiyisiwa hi Yehovha, hi fanele hi pfumela kupfuniwa hi vamakwerhu.

19. I mpsini leswinga pfuna Pawulo kuva a kota kuyendla swilo swaswinene swa kuhlamalisa?

¹⁹ Ankama mupostolo Pawulo anga va Mukreste, a yendle swilo swa swinyingi swa kuhlamalisa. Hi mhaka muni? Hikusa a djondze swaku aswi na mhaka swaku munhu a kulele kwini, a ni ntamu kufikela kwini, a djondze kufikela kwini kumbe a ganyile, kambe loko a tiveka hansi a tlhela a tshemba Yehovha anga yendla swilo swa swinyingi. Hinkwerhu ahi tekeleleni xikombiso xa Pawulo hi (1) kutshemba Yehovha, (2) kutekelela swikombiso leswinga Bibeleni ni (3) kupfumela kupfuniwa hi vamakwerhu. Hambiloko hi hela ntamu, Yehovha atahi yendla hi va ni ntamu.