1. Se a te mea ne fakaasi ‵tonu mai ne te apositolo ko Paulo e uiga ki a ia?

NE FAKAASI ‵tonu mai ne te apositolo ko Paulo me ne loto vāivāi a ia i nisi taimi. Ne fai ‵tonu mai a ia me i tena foitino ne “gasolosolo ifo o vāivāi,” telā ne taumafai malosi ei a ia o fai te mea tonu, kae ne seki tali faeloa ne Ieova ana ‵talo i te auala telā ne fakamoemoe a ia me ka tali mai ne Ia. (2 Koli. 4:16; 12:7-9; Loma 7:21-23) Ne fakaasi ‵tonu mai foki ne Paulo me i ana fili ne ‵kilo atu ki a ia pelā me e vāivāi fua. * Kae ne seki talia ne ia te kilokiloga sē ‵lei a nisi tino io me ko tena tulaga sē ‵lei katoatoa ke fakavāivāi atu ki a ia.—2 Koli. 10:10-12, 17, 18.

2. E ‵tusa mo te 2 Kolinito 12:9, 10, se a te akoakoga tāua ne tauloto ne Paulo?

² Ne tauloto ne Paulo se akoakoga tāua—e mafai eiloa o malosi ‵ki se tino faitalia me e mafaufau i a ia e vāivāi. (Faitau te 2 Kolinito 12:9, 10.) Ne fai atu a Ieova ki a Paulo me i Tena ‵mana “e katoatoa ‵lei i taimi e vāivāi ei,” ko tena uiga, ka tuku atu ne Ieova te malosi telā ne seki maua muamua ne Paulo. Muamua la, ke na onoono tatou ki te pogai e se ‵tau ei o fanoa‵noa tatou māfai ko fai mai ne ‵tou fili a pati faka‵mae loto ki a tatou.

3. Kaia e mafai ei o fia‵fia tatou i pati faka‵mae loto?

³ E seai se tino i a tatou e manako ke fakamasei a ia ne tino. Kae kafai e fai mai ne ‵tou fili a pati faka‵mae loto kae fanoa‵noa  malosi tatou i ei, e mafai loa o loto vāi‵vai tatou. (Faata. 24:10) Tela la, e ‵saga atu pefea tatou ki pati faka‵mae loto a ‵tou fili? Pelā mo Paulo, e mafai ne tatou o “fia‵fia . . . i pati faka‵mae loto.” (2 Koli. 12:10) Kaia? Me i pati faka‵mae loto mo ‵tekemaiga ne fakailoga me i a tatou ko soko ‵tonu o Iesu. (1 Pe. 4:14) Ne fai mai a Iesu me ka fakasauagina ana soko. (Ioa. 15:18-20) Ne tupu te mea tenā i te senitenali muamua. I te vaitaimi tenā, a latou kolā ne fakamalosigina ne tuu a tino Eleni ne ‵kilo atu ki Kelisiano e pelā me seki a‵koga ‵lei kae e vāi‵vai. E pelā mo apositolo ko Petelu mo Ioane, ne ‵kilo atu a tino Iutaia ki a lāua e pelā me “seki a‵koga faka‵lei.” (Galu. 4:13) Ne foliga mai me ne vāi‵vai a Kelisiano; ne seki aofia latou i mea fakapolitiki io me ‵kau atu ki se kautau, kae ne ‵kilo atu a tino ki a latou e pelā me ne tino fakaa‵tea.

4. Ne ‵saga atu pefea a Kelisiano i te senitenali muamua ki kilokiloga sē ‵lei a olotou fili e uiga ki a latou?

⁴ E mata, ne talia ne Kelisiano i te senitenali muamua a kilokiloga sē ‵lei a olotou fili ke taofi aka latou? Ikai. Ne ‵kilo atu a apositolo ko Petelu mo Ioane ki ei e pelā me se tauliaga mō soko o Iesu ke fakasauagina ona ko te tau‵tali i ana akoakoga kae fakailoa atu ne latou ki tino. (Galu. 4:18-21; 5:27-29, 40-42) Ne seki ‵tau o isi se pogai ke ‵ma i ei a soko. E tiga loa ne seki āva a tino ki Kelisiano, ne uke atu olotou mea ‵lei ne fai mō tino i lō so se tino telā ne ‵teke atu ki a latou. Pelā mo tusi o te Tusi Tapu kolā ne tusi ne nisi o Kelisiano konā, ne tumau i te fesoaosoani atu ke maua ne te fia miliona o tino a te fakamoemoega. Kae ko te Malo telā e talai atu ne latou, ko oti ne fakatu aka, kae ko pili fua o pule mai ki tino katoa. (Mata. 24:14) E ‵kese mai i ei, a te ‵toe malo fakapolitiki malosi telā ne fakasaua ne ia a Kelisiano ko oti ne maofa kae ko seai foki, kae ko soko fakamaoni konā ko fai nei mo tupu i te lagi. Ko oti ne ‵mate atu olotou fili; kae kafai fua e faka‵tu aka latou, ka ‵nofo latou mai lalo i te pulega a te Malo telā ne fakatāua ne Kelisiano kolā ne takalia‵lia latou ki ei.—Faka. 5:10.

5. E ‵tusa mo te Ioane 15:19, kaia e ‵kilo fatauva mai a tino o te lalolagi ki tino o Ieova?

⁵ E pelā me ne tino o Ieova i aso nei, i nisi taimi e ‵kilo fatauvā mai a tino ki a tatou kae fakatauemu mai i a tatou e seki a‵koga ‵lei kae e vāi‵vai foki. Kaia? Me e se ‵lago tatou ki faifaiga a tino i ‵tou tafa. E taumafai tatou o loto maulalo, agamalu, kae faka‵logo. Kae ko te lalolagi i te suā feitu e tavae ne latou a tino fakamata‵mata, tino fakamaua‵luga mo tino ‵teke. E se gata i ei, e se aofia tatou i mea fakapolitiki, kae e se ‵kau foki tatou ki kautau o so se fenua. Ona ko te tu ‵kese o tatou mai tino o te lalolagi i aso nei, tela la, e ‵kilo fatauva mai latou ki a tatou.—Faitau te Ioane 15:19; Loma 12:2.

6. Se a te galuega tāua e fesoasoani mai a Ieova ke fakataunu ne ana tino?

⁶ Faitalia me e mafau‵fau a tino o te lalolagi i a tatou e vāi‵vai, e fakaaoga eiloa ne Ieova tatou ke fai a mea fakaofoofogia. E fakataunu ne ia a te faiga o te galuega talai i te lalolagi kātoa. I aso nei, e ‵lomi ne ana tavini a toe tusi kolā ne lasi te ‵fuliga mo te tufatufaatuga i te lalolagi kātoa, kae fakaaoga te Tusi Tapu ke fesoasoani atu ki te fia miliona o tino ke momea aka te ‵lei o olotou olaga. Ona ko te uke o galuega fakaofoofogia ko oti ne fakataunu, e ‵tau eiloa o avatu a tavaega ki a Ieova, telā e fakaaoga ne ia se potukau o tino kolā e foliga mai me e vāi‵vai ke fai ne latou a galuega fakaofoofogia konei. Kae e pefea a tatou taki tokotasi? E mata, e mafai o fesoasoani mai a Ieova ke ma‵losi tatou? Kafai e penā loa, ne a mea e ‵tau o fai ne tatou ke maua tena fesoasoani? Ke na sau‵tala nei tatou ki auala e tolu e mafai o tauloto ne tatou mai te fakaakoakoga a te apositolo ko Paulo.

7. Se a te akoakoga e tasi e tauloto ne tatou mai te fakaakoakoga a Paulo?

⁷ Tenei te akoakoga e tasi e tauloto ne tatou mai i a Paulo: Sa fakalagolago ki tou malosi totino io me ko tou atamai māfai e tavini atu ki a Ieova. Mai kilokiloga a tino, e isi se pogai ne ‵tau ei mo Paulo o fakamatamata kae fakalagolago ki a ia eiloa. Ne puti aka a ia i Taso, te laumua o se kolone e tasi o Loma. A Taso se fakai maumea kae e isi sena akoga lauiloa. A Paulo se tino ne akoga ‵lei—ne akoakogina a ia ne se takitaki Iutaia telā ne āva malosi ki ei a tino i ana aso, ko Kamalielu tena igoa. (Galu. 5:34; 22:3) Kae i se taimi ne fai eiloa a Paulo pelā me se tino tāua ki tino Iutaia. Ana muna: “Ne sili atu toku gasolo ki mua i te lotu Iutaia i lō oku kautama e tokouke i toku fenua.” (Kala. 1:13, 14; Galu. 26:4) Kae ne seki fakalagolago eiloa a Paulo ki a ia eiloa.

8. E ‵tusa mo te Filipi 3:8, se a te kilokiloga a Paulo ki mea kolā ne tiaki ne ia, kae kaia ne ‘fiafia ei a ia i ana vāivāiga’?

⁸ Ne loto fiafia a Paulo o tiaki a mea kolā ne fai ei ke takutakua a ia i te kilokiloga a te lalolagi. A te ‵tonuga loa, ne kilo atu a ia ki mea kolā e foliga mai me ne mea aoga kae ne maua muamua ne ia, e pelā me ne “kaiga ko oko eiloa i te uke.” (Faitau te Filipi 3:8) Ne fepaki a Paulo mo mea faiga‵ta e uke ona ko te fai mo fai se soko o Keliso. Ne takalia‵lia a tino o tena fenua tonu ki a ia. (Galu. 23:12-14) Kae ne ‵kini kae ‵pei atu a ia ki te falepuipui ne tino o tena fenua ko Loma. (Galu. 16:19-24, 37) E se gata i ei, ne iloa aka ne ia me i a ia e se ‵lei katoatoa kae ne faigata ‵ki ke fai ne ia te mea tonu. (Loma 7:21-25) Kae i lō te talia ne ia ana fili io me ko ana vāivāiga ke fakamasei ei a ia, ne “fiafia [a ia i ana] vāivāiga.” Kaia? Me i te taimi ne vāivāi ei a ia, ne lavea ne ia te auala ne fesoasoani atu te Atua ki a ia.—2 Koli. 4:7; 12:10.

9. E ‵tau o pefea ‵tou kilokiloga ki mea kolā e fai ei tatou ke foliga vāi‵vai?

⁹ Kafai e ma‵nako tatou ke maua te malosi mai i a Ieova, e se ‵tau o mafau‵fau tatou me e fakalagolago te tāua o tatou ki te malosi faka-te-foitino, akoakoga, tulaga i te olaga, io me ko te maumea. E se fai ne mea konei ke aoga tatou ki a Ieova. E tonu, e se tokouke a  tino o te Atua e “‵poto i mea faka-te-lalolagi, e se tokouke mai i ei ne tino pule, e se tokouke foki ne o‵mai mai i kaigā aliki.” Kae ko oti ne filifili aka ne Ieova ke fakaaoga a “mea vāi‵vai o te lalolagi.” (1 Koli. 1:26, 27) Tela la, sa kilo ki mea konā e pelā me ne mea e fakatalave ei koe mai te tavini atu ki a Ieova. Kae kilo atu ki ei pelā me ne avanoaga, io me se auala ke lavea ne koe te malosi o Ieova e galue i a koe. Pelā me se fakaakoakoga, kafai koe e mataku ki tino kolā e taumafai o fai ke fakalotolotolua koe ki ou talitonuga, ‵talo ki a Ieova ke tuku atu te loto toa i te taimi e ‵pulu ei ne koe ou talitonuga. (Efe. 6:19, 20) Kafai e taumafai koe o kufaki i se masaki tumau, fakamolemole atu ki a Ieova ke tuku mai ne ia te malosi e manakogina ne koe ke tumau i te fakalavelave i tena galuega. I taimi takitasi e lavea ei ne koe te fesoasoani o Ieova, ka gasolo aka o lasi tou fakatuanaki kae gasolo aka foki koe o malosi.

10. Kaia e ‵tau ei mo tatou o suke‵suke ki fakaakoakoga a tino fakamaoni o te Tusi Tapu, pelā mo latou kolā ne taku mai i te Epelu 11:32-34?

¹⁰ A Paulo se tino akoga fakamaoni o te Tusi Tapu. Ne tauloto ne ia a akoakoge ‵tonu e uke, penā foki mo fakaakoakoga a tino kolā ne fakamau olotou tala i te Muna a te Atua. I tena tusi ki Kelisiano Epelu, ne fakamolemole atu a Paulo ki a latou ke mafau‵fau ki fakaakoakoga a tavini fakamaoni a Ieova e tokouke. (Faitau te Epelu 11:32-34.) Ke mafaufau ki se tokotasi o tavini konei, te Tupu ko Tavita. Ne ‵tau o fakafesagai atu a ia ki ‵tekemaiga mai i ana fili, mo latou foki kolā ne fai muamua mo fai ana taugasoa. I te taimi e sau‵tala tatou ki te fakaakoakoga a Tavita, ka lavea ne tatou te pogai ne maua ei ne Paulo te malosi mai te mafaufau ‵loto ki te olaga o Tavita, mo te auala e mafai o fakaakoako tatou ki a Paulo.

11. Kaia ne foliga mai pelā me i a Tavita e vāivāi fua? (Onoono ki te ata i te ‵kava.)

¹¹ Ne ‵kilo atu a tino ki a Tavita pelā me e vāivāi fua, ona ko te malosi o te ‵toa ko Koliata. I te laveaga ne Koliata a Tavita, ne “fakatauemu atu tou tagata ki a ia.” E se gata i ei, a Koliata se tagata lasi, e katoatoa ‵lei ana meatau, kae ne akoako faka‵lei mō te taua. Kae ko Tavita i te suā feitu, se tamaliki tagata fua, e sē se sotia telā ne akoako faka‵lei mō te taua, kae e se katoatoa ‵lei foki ana meatau. Kae ne ‵fuli eiloa a Tavita telā ne foliga vāivāi ki se tagata malosi. Ne fakalagolago a ia ki a Ieova ke tuku atu ki a ia te malosi, kae ne fakatakavale eiloa ne ia a tena fili.—1 Samu. 17:41-45, 50.

12. Se a te suā tofotofoga ne ‵tau o kufaki i ei a Tavita?

¹² Ne ‵tau mo Tavita o fakafesagai atu ki te suā tofotofoga telā ne mafai o fakavāivāi atu ki a ia. Ne tavini atu eiloa a Tavita mo te fakamaoni ki te tino telā ne filifili ne Ieova ke fai mo tupu o Isalaelu, ko Saulo. Muamua la, ne āva eiloa te tupu ko Saulo ki a Tavita. Fakamuli ifo, ne fai ne te fakamatamata ke loto masei a Saulo ki a Tavita. Ne fai fakamasei ne Saulo a Tavita, kae taumafai foki o tamate tou tagata.—1 Samu. 18:6-9, 29; 19:9-11.

13. Ne saga atu pefea a Tavita ki faifaiga sē ‵tonu a te tupu ko Saulo ki a ia?

¹³ Faitalia a faifaiga sē ‵tonu a te tupu ko Saulo, ne fakaasi atu faeloa ne Tavita te āva ki te tupu filifilia a Ieova. (1 Samu. 24:6) Ne seki ‵losi atu a Tavita me ne mafua mai i a Ieova a mea ma‵sei ne fai ne Saulo. Kae ne fakalagolago eiloa a Tavita ki a Ieova ke tuku atu ki a ia te malosi e manakogina ke kufaki a ia i te mea faigata tenei.—Sala. 18:1, fakamatalaga mai luga.

14. Se a te tulaga faigata ne fakafesagai atu ki ei te apositolo ko Paulo, telā e tai ‵pau mo Tavita?

¹⁴ Ne fakafesagai atu te apositolo ko Paulo ki te tulaga faigata telā e tai ‵pau mo Tavita. Ne ma‵losi fakafia atu a fili o Paulo i a ia. Ne  takalia‵lia a takitaki fia takutakua i ona aso ki a ia. E fakafia taimi ne ‵kini kae ‵pei ne latou a ia ki te falepuipui. Pelā mo Tavita, ne fai fakamasei foki a Paulo ne tino kolā ne ‵tau o fai mo fai ana taugasoa. Ne ‵teke atu foki a nisi tino i te fakapotopotoga Kelisiano ki a ia. (2 Koli. 12:11; Fili. 3:18) Kae ne manumalo a Paulo i a latou katoa kolā ne taua atu ki a ia. Pefea la? Ne tumau a ia i te talai faitalia a ‵tekemaiga. Ne tumau a ia i te fakamaoni ki ana taina mo tuagane, e tiga loa ne fakafanoanoa ne latou a ia. Kae sili atu i te tāua, ne fakamaoni a ia ki te Atua ke oko eiloa ki tena mate. (2 Timo. 4:8) Ne mafai ne ia o fai a mea katoa konei, e se mai tena malosi totino, kae ona ko tena fakalagolago ki a Ieova.

15. Se a te ‵tou fakamoemoega, kae e mafai pefea o fakataunu ne tatou?

¹⁵ E mata, e fakafesagai atu koe ki pati faka‵mae loto io me ko fakasauaga mai tau vasega, tino e ga‵lue tasi mo koe, io me ko ou kāiga sē Molimau? E mata, kai fai fakamasei aka loa koe ne se tino i loto i te fakapotopotoga? Kafai e penā loa, masaua a fakaakoakoga a Tavita mo Paulo. E mafai eiloa ne koe o “fakatakavale faeloa a te masei ki te ‵lei.” (Loma 12:21) Kafai e ‵teke mai a tino ki a tatou, a ‵tou fakamoemoega e se ko te taua atu ki a latou, pelā mo Tavita telā ne taua atu ki a Koliata. I lō te fai penā, e fakatakavale ne tatou a te masei mai te taumafai ke fesoasoani atu ki tino ke tauloto ki mea e uiga ki a Ieova mo te Tusi Tapu. E mafai fua o taunu ‵tou fakamoemoega mai te fakalagolago ki te Tusi Tapu ke tali aka ei a fesili a tino, mai te āva kae atafai ki a latou kolā e fai fakamasei ne latou a tatou, mo te faiga o mea ‵lei ki tino katoa, penā foki ‵tou fili.—Mata. 5:44; 1 Pe. 3:15-17.

16-17. Se a te mea ne seki mafai o puli i a Paulo?

¹⁶ A koi tuai o fai te apositolo ko Paulo mo fai se soko o Keliso, a ia se tagata fia sili telā ne fakasaua ne ia a soko o Iesu. (Galu. 7:58; 1 Timo. 1:13) Ko Iesu eiloa ne taofi ne ia a Paulo, telā ko Saulo i te taimi tenā, mai te fakamatakutaku atu ki te fakapotopotoga Kelisiano. Ne faipati mai eiloa a Iesu ki a Paulo mai te lagi kae fai ne ia tou tagata ke ‵kivi. Ke toe ‵kite a ia, ne faimalo a Paulo ke ‵sala atu ki te fesoasoani mai tino kolā ne fakasaua ne ia. Ne talia ne ia mo te loto  maulalo a te fesoasoani o te soko ko Anania telā ne toe fai ne ia ke ‵kite a mata o Paulo.—Galu. 9:3-9, 17, 18.

¹⁷ Fakamuli ifo, ne fai a Paulo pelā me se tino lauiloa o te fakapotopotoga Kelisiano, kae ne seki mafai o puli i a ia a te akoakoga a Iesu ki a ia i te auala ki Tamaseko. Ne tumau eiloa a Paulo i te loto maulalo, kae ne loto fiafia o talia ne ia te fesoasoani o ana taina mo tuagane. Ne iloa ne ia me ne fai latou pelā me “se fakamafanafanaga lasi ‵ki” ki a ia.—Kolose 4:10, 11.

18. Kaia e se talia ei ne tatou i nisi taimi a manatu fesoasoani mai nisi tino?

¹⁸ Ne a mea e mafai o tauloto ne tatou mai i a Paulo? I te taimi muamua ne tauloto tatou ki te munatonu, e mautinoa loa me ne ma‵nako tatou ke fesoasoani mai nisi tino, me e iloa ne tatou me koi uke a mea e ‵tau o tauloto ne tatou. (1 Koli. 3:1, 2) Kae e a i te taimi nei? Kafai ne tavini atu tatou ki a Ieova i tausaga e uke kae ko gasolo aka o lasi te ‵tou atamai, kāti ka faigata o talia ne tatou se manatu fesoasoani, maise māfai ne tuku mai ne se tino telā ne fatoa kau mai ki te munatonu. Kae ui i ei, e fakaaoga faeloa ne Ieova a ‵tou taina mo tuagane ke fakamalosi tatou. (Loma 1:11, 12) Tela la, kafai e ma‵nako tatou ke maua te malosi mai i a Ieova, e ‵tau o talia ne tatou te fesoasoani mai ‵tou taina mo tuagane.

19. Kaia ne manuia i ei a Paulo?

¹⁹ Ne fai ne Paulo a nisi mea fakaofoofogia mai tua o te faiga pelā me se Kelisiano. Kaia? Me ne tauloto ne ia me i te manuia e se fakalagolago ki te malosi o se tino i te feitu faka-te-foitino, akoakoga, maumea io me ko tulaga i te olaga, kae ki te loto maulalo mo te fakalagolago ki a Ieova. Ke na fakaakoako tatou katoa ki a Paulo (1) mai te fakalagolago ki a Ieova, (2) mai te tauloto ki fakaakoakoga i te Tusi Tapu, mo te (3) mai te talia te fesoasoani mai taina tali‵tonu. Tela la, faitalia me e vāi‵vai tatou, ka fai eiloa ne Ieova ke ma‵losi tatou!