1. Мае ачиз сярысь ӧз ваты апостол Павел?

 АПОСТОЛ Павел ӧз ваты, куддыръя со лябӟемын вал шуыса. Со валэктӥз: солэн мугорыз вужме; шонер ужъёс лэсьтон понна, солы асэныз нюръяськоно луэ; куддыръя Иегова вӧсяськонъёсызлы ответ уг сёты озьы, кызьы со возьмаз (2 Кор. 4:16; 12:7—9; Рим. 7:21—23). Озьы ик Павел тодӥз, солэн тушмонъёсыз сое ляб адямиен лыдъязы шуыса b. Нош мукет адямиослэн со сярысь урод малпамзы сэрен яке аслаз янгышъёсыз сэрен со ӧз малпа, нокыӵе пайда вайыны уг быгаты шуыса (2 Кор. 10:10—12, 17, 18).

2. Кыӵе кулэ луись зэмлыкез валаз Павел, 2 Коринфъёслы 12:9, 10 лыдэ басьтыса?

² Павел валаз одӥг зэмлыкез: адями ассэ лябӟемен шӧдэ ке но, со кужмо луыны быгатэ. (Лыдӟе 2 Коринфъёслы 12:9, 10.) Иегова вераз: «Лябӟыса улон дыръя Мынам кужыме юнгес шарае потэ». Та кылъёс возьмато: Инмар Павеллы сомында кужым сётоз, кӧня солы кулэ. Та статьяын ми эскеромы, малы ми Павеллэсь дышетскыны быгатӥськомы. Нош нырысь ойдолэ малпаськомы: малы милям мылкыдмы куашканы кулэ ӧвӧл, куке тушмонъёсмы милемыз мыскылляло.

3. Малы ми шумпотыны быгатӥськомы, куке милемыз мыскылляло?

³ Нокинлы уг кельшы, куке сое мыскылляло. Тушмонъёсмы ми сярысь уродзэ вераку, ми мултэс трос сюлмаськимы  ке, мылкыдмы куашканы быгатоз (Мад. 24:10). Соку кызьы асьмеды возёно, куке милемыз мыскыл каро? Павел сямен ик, ми шумпотыса улыны быгатӥськомы, милемыз ӝожомытыкузы, яке мыскыллякузы (2 Кор. 12:10). Малы? Малы ке шуоно, куке адямиос милемыз мыскылляло но уйыло-улляло, со возьматэ, ми Христослэн зэмос дышетскисьёсыз луиськомы шуыса (1 Пётр 4:14). Иисус вераз, солэсь дышетскисьёссэ уйылозы-уллялозы шуыса (Иоанн 15:18—20). Со дыре, грекъёслэн сям-йылолъёссы пыӵамен, куд-огъёсыз христианъёсты тырмыт дышетскымтэ но ляб адямиосын лыдъязы. Иудейёс пӧлын но христианъёс сярысь, озьы ик Пётр но Иоанн сярысь, веразы, соос «дышетскымтэ, огшоры адямиос» луо шуыса (Ап. уж. 4:13). Тросэз малпазы, христианъёслэн утисьсы ӧвӧл шуыса. Христианъёс ӧз пыриське политикаен но ожен герӟаськем ужъёсы, соин ик ожмаськыны яке асьсэды утьыны ӧз быгатэ. Адямиос соослэсь палэнскыны тыршизы.

4. Кызьы асьсэды возизы нырысетӥ христианъёс, куке адямиос соос сярысь уродзэ веразы?

⁴ Дугдӥзы-а нырысетӥ христианъёс Христос сьӧры мынэмысь но тодытон уже пыриськемысь, тушмонъёссылэн соос сярысь урод малпамзы сэрен? Ӧз дугдэ. Кылсярысь, Пётрез но Иоаннэз уйылӥзы-уллязы, малы ке шуоно соос Христослэн дышетскисьёсыз вал но солэсь дышетонъёссэ тодытӥзы. Та апостолъёс уйылон-уллянъёсты данэн лыдъязы (Ап. уж. 4:18—21; 5:27—29, 40—42). Христианъёс асьсэлэн осконзылэсь ӧз возьдаське. Тушмонъёсынызы ӵошатыса, та зӥбыт-востэм ужась-тыршисьёс адямиослы тросгес юрттӥзы. Кылсярысь, Библиысь книгаос, кудъёссэ та христианъёс гожтӥзы, асьме нуналъёсы но трос миллион адямиослы юртто но оскон сёто. Эксэйлык, кудӥз сярысь соос тодытӥзы, али кивалтэ ини, нош ӝоген вань адямиосын кивалтоз (Матф. 24:14). Нош кужмо рим кивалтэт, кудӥз христианъёсты уйылыса-улляса возиз, кемалась куашказ ини. Со сяна, нырысетӥ христианъёс али инмын кивалто. Нош соослэн тушмонъёссы кулэмын ини. Та адямиосты Инмар улӟытӥз ке но, соос улозы Инмар Эксэйлыклэн кивалтэмез улсын. Ӵапак та Эксэйлык сярысь тодытӥзы христианъёс, кудъёссэ соос адӟемпотостэм каризы (Усьт. 5:10).

5. Малы та дунне Иеговалэсь калыксэ ултӥяса возе, Иоаннлэсь 15:19 лыдэ басьтоно ке?

⁵ Туннэ куд-огъёсыз Иеговалэсь Адӟись-Ивортӥсьёссэ уг гажало но мыскылляло, малы ке шуоно соос малпало, христианъёс тырмыт дышетскымтэ но ляб адямиос луо шуыса. Малы? Малы ке шуоно ми та дуннеысь адямиослэн эсэпъёссыя ум улӥське. Ми тыршиськомы зӥбыт-востэмесь луыны. Нош та дунне данъяське вылтӥяськись адямиосын. Со сяна, кыӵе гинэ шаерын ми медам улэ, политикаен но армиен герӟаськем ужъёсы ми ум пыриськиське. Ми та дуннелэн куронъёсызъя ум улӥське, соин ик адямиос милемыз ултӥяло. (Лыдӟе Иоаннлэсь 15:19; Рим. 12:2).

6. Кыӵе ужез быдэстыны юрттэ Иегова аслаз ужась-тыршисьёсызлы?

⁶ Та дунне милемыз уг гажа ке но, Иегова милемыз кутэ, паймымон ужез быдэстон понна. Со ортчытэ туж бадӟым тодытон ужез, кудӥз талэсь азьло ноку ӧй вал на. Солэн ужась-тыршисьёсыз потто журналъёсты, кудъёсыз дунне вылын тужгес но трос кылъёсы берыктӥсько, озьы ик тужгес но трос лыдын печатласько. Иеговалэн Адӟись-Ивортӥсьёсыз Библиез уже куто, трос миллион адямиослы шудо луыны юрттон понна. Иеговалэн юрттэменыз гинэ, адямиос, кудъёссэ та дунне ултӥяса возе, сокем бадӟым  ужез быдэстыны быгато. Нош мар вераны луоз ми пӧлысь котькудӥз сярысь? Быгатэ-а Иегова юрттыны милемлы кужмо луыны? Быгатэ ке, соку мар милемлы со понна кароно? Ойдолэ эскеромы, малы ми дышетскыны быгатӥськомы апостол Павеллэсь.

7. Малы ми дышетскыны быгатӥськомы апостол Павеллэсь?

⁷ Нырысетӥез, апостол Павеллэн примерез дышетэ милемыз: Иеговалы ужаку-тыршыку, аслад кужымедлы но быгатонлыкъёсыдлы оскиськыны кулэ ӧвӧл. Адями синмын учкыса, Павеллэн мугъёсыз вал, вылтӥяськись луыны но ас вылаз оскиськыса улыны. Павел будӥз Рим котырысь Киликия улослэн шоркараз, узыр Тарс карын, кытын трос дышетскон интыос вал. Павел умой дышетскон басьтӥз: со дышетскиз Гамалиил дорын, кудӥз иудей дышетӥсьёс пӧлысь тужгес но гажаноез вал (Ап. уж. 5:34; 22:3). Одӥг вакытэ иудейёс Павелэз туж дано адямиен лыдъязы. Со вераз: «Иудей сямъёсъя улонын ас выжыысьтым тросэзлы ёзъёсылы мон адӟем карымон вал» (Гал. 1:13, 14; Ап. уж. 26:4). Нош Павел ас вылаз оскиськыса ӧз улы.

8. Филиппыослы 3:8 лыдэ басьтыса, кызьы Павел учкиз со шоры, мае кельтӥз? Малы со лябӟем дыръяз шумпотыса улӥз?

⁸ Павел шумпотыса кельтӥз ваньзэ, малы луыса та дуннеын дано адями луиз. Со валаз, ваньмыз со жуг-жаг луэ шуыса. (Лыдӟе Филиппыослы 3:8.) Христослэн дышетскисез луон понна, Павел трос шуг-секытъёс пыр потӥз. Иудей калык сое адӟемпотостэм кариз (Ап. уж. 23:12—14). Нош Римын улӥсьёс сое жугылӥзы но пытсэтэ пуктылӥзы (Ап. уж. 16:19—24, 37). Со сяна, солэн тырмымтэосыз вал, кудъёсыз сэрен со туж сюлмаськиз (Рим. 7:21—25). Озьы ке но Павел тушмонъёсызлы но, аслаз янгышъёсызлы но ӧз сётскы — лябӟем дыръяз со шумпотыса улӥз. Малы? Малы ке шуоно, куке Павел лябӟемын вал, со адӟиз, кызьы Инмар солы юрттӥз (2 Кор. 4:7; 12:10).

9. Кызьы милемлы учконо со шоры, маин сэрен асьмеды ляб адямиосын лыдъяны быгатӥськомы?

⁹ Милемлы малпано ӧвӧл: трос кужыммылы, вылӥ дышетсконмылы, кыӵе калыкысь  потэммылы яке ваньбурмылы луыса Иегова милемыз дуноенгес лыдъя. Зэмзэ вераса, Инмарлэн калыкез пӧлын трос дышетскемъёс, кужмо кивалтӥсьёс но йӧноос ӧжыт. Нош Инмар «дуннелэсь визьмо луисьтэмзэ бырйиз» (1 Кор. 1:26, 27). Соин ик, ваньмыз таос тӥляд ӧвӧл ке но, эн малпалэ, тӥ Инмарлы ужаны-тыршыны уд быгатӥське шуыса. Со интые, адӟыны тырше, кызьы сыӵе дыре, Иеговалэн юрттэменыз, кужмо луыны быгатӥськоды. Кылсярысь, тӥ кышкаськоды ке адямиослэсь, кудъёсыз соглаш уг луо соин, малы тӥ оскиськоды, Иеговалэсь кышкасьтэм сям куре, оскондэс утён понна (Еф. 6:19, 20). Нош тӥ эмъяны луонтэм висёнэн нюръяськиськоды ке, Иеговалэсь кужым куре тодытон ужын лэсьтыны сое, мае быгатӥськоды. Котькуд учыре, куке адӟиськоды, кызьы Иегова тӥледлы юрттэ, тӥляд осконды юнма но тӥ кужмогес луиськоды.

10. Малы ми Инмарлэн оскымон ужась-тыршисьёсызлэсь дышетскыны кулэ, озьы ик соосызлэсь но, кудъёсыз сярысь Еврейёслы 11:32—34 гожтэмын?

¹⁰ Павел туж тыршыса эскериз Священной Гожтэмъёсты. Со трос тодон-валан басьтӥз, озьы ик дышетскиз адямиослэсь, кудъёсыз сярысь Инмарлэн Кылаз вераське. Куке Павел еврей луись христианъёслы гожъяз, со соосты Иеговалэн трос оскымон ужась-тыршисьёсыз сярысь малпаськыны куриз. (Лыдӟе Еврейёслы 11:32—34.) Та оскымон ужась-тыршисьёс пӧлысь одӥгез — Давид эксэй. Солы пумитъяськизы тушмонъёсыз но, озьы ик соос но, кинъёсын со куке но эшъяськиз. Давидлэсь примерзэ эскерыса, ми адӟомы, кызьы солэн улонэз сярысь малпаськон Павелэз юнматыны быгатӥз. Озьы ик эскеромы, кызьы ми Павеллэсь адӟем карыны быгатӥськомы.

11. Малы малпан кылдыны быгатэ вал, Давид ляб адями шуыса? (Учке вылбамысь суредэз.)

¹¹ Голиаф, кужмо ожгарчи, Давид шоры учкиз ляб адями шоры кадь. Давидэз адӟыса, Голиаф, «унь-мань карыса, со шоры учкиз». Голиаф ӝужыт, умой ожтӥрлыкен но ожмаськыны дышетскемын вал. Давид сярысь верано ке, со егит на вал, быгатӥсь ожгарчи кадь ӧз адӟиськы. Нош зэмзэ вераса, Давид кужмо вал: со Иеговалы оскиськиз но, Инмар солы тушмонзэ вормыны юрттӥз (1 Экс. 17:41—45, 50).

12. Кыӵе вал мукетыз шуг-секыт, кудӥныз нюръяськиз Давид?

¹² Давид мукет шуг-секытэн но нюръяськоно луиз, кудӥз сэрен со ассэ ляб адямиен шӧдыны быгатӥз. Давид оскымон ужаз-тыршиз Сауллы, кудзэ Иегова Израильлы эксэй карыса пуктӥз. Нырысь Саул Давидэз гажаз, нош берлогес вылтӥяськеменыз Давидлы вожъяськыны кутскиз. Саул Давидэн ассэ урод возиз, сое виыны но тыршиз (1 Экс. 18:6—9, 29; 19:9—11).

13. Мар кариз Давид, куке Саул эксэй соин ассэ шонертэм возиз?

¹³ Саул ассэ шонертэм возиз ке но, Давид азьло сямен ик Иеговаен зырӟем муртлы гажамзэ возьматӥз (1 Экс. 24:6). Сауллэн урод ужъёсыз понна Давид Иеговаез янгыше ӧз уськыты. Со интые, Давид Иеговалы оскиськиз: со оскиз, та шуг-секытэз чиданы Инмар солы кужым сётоз шуыса (Пс. 17:1, 2).

14. Маин Павеллэн югдурез тупа Давидлэн югдурезлы?

¹⁴ Апостол Павел но та выллем югдуре сюриз. Солэн тушмонъёсыз солэсь трослы кужмогес вал. Со дыре религия но политика удысъёсысь азьветлӥсьёс сое адӟемпотостэм каризы. Ӵем дыръя, соослэн косэмзыя, Павелэз жугылӥзы но пытсэтэ пуктылӥзы. Давидлэн учыраз кадь ик, соос, кинъёс Павеллы юрттыны кулэ вал, асьсэды соин  туж урод возизы. Кылсярысь, куд-ог христианъёс солы пумит но мынӥзы (2 Кор. 12:11; Флп. 3:18). Нош Павел соослы ӧз сётскы. Малы озьы вераны луоз? Пумитъяськемзы шоры учкытэк, со тодытэмысь ӧз дугды. Вын-агайёс но сузэр-апайёс сое ӝоже уськытъязы ке но, со соосты азьло сямен ик яратӥз. Нош самой валтӥсез, Павел кулытозяз Инмарлы оскымон вал (2 Тим. 4:8). Со бадӟым шуг-секытъёсты чидаз Иеговалэн юрттэмезлы луыса, нош аслаз кужымезлы луыса ӧз.

15. Мае милемлы вормыны тыршоно но мар со понна кароно?

¹⁵ Пумиськылӥськоды-а тӥ ӵош дышетскисьёстылэн, ӵош ужасьёстылэн яке оскисьтэм ӵыжы-выжыостылэн мыскыллянъёсынызы но уйылон-уллянъёсынызы? Яке тӥ кенешын шонерлыктэм ужен пумиськиды? Озьы ке, тодады возе Давидлэсь но Павеллэсь примеръёссэс. Тӥ котьку но быгатӥськоды уродзэ ӟечен вормыны (Рим. 12:21). Куке адямиос тӥледлы пумитъясько, эн нюръяське соосын озьы, кызьы Давид Голиафен нюръяськиз. Со интые, уродэз ворме, та адямиослы Иегова но Библия сярысь тодыны юрттыса. Тӥ уродэз вормыны быгатоды, куке, Библия вылэ пыкиськыса, адямиослы валэктонъёс сётъяськоды, гажамдэс но ӟеч сямдэс возьматӥськоды соослы, кинъёс тӥледлы пумитъясько, но ӟеч ужъёс лэсьтӥськоды котькинлы, озьы ик тушмонъёстылы но (Матф. 5:44; 1 Пётр 3:15—17).

16, 17. Мае Павел ноку но ӧз вунэты?

¹⁶ Христиан мурт луэмезлэсь азьло, апостол Павел Христослэсь дышетскисьёссэ улляса-ёртыса, ӝоже уськытъяса возиз (Ап. уж. 7:58; 1 Тим. 1:13). Апостол Павел, кудӥз со дыре Савл шуыса тодмо вал, христианъёсты азьланяз но уйылыса-улляса медаз возьы шуыса, сое ачиз Иисус дугдытӥз. Со Павеллы инмысен вазиськиз но солэсь синзэ «ӵоксаз». Выльысь адӟыны мед кутскоз шуыса, Павел юрттэт утчано луиз соослэсь, кинъёсты со уйылӥз-улляз. Зӥбыт-востэмен со Анания нимо христиан муртлэсь юрттэтсэ басьтӥз но нош ик адӟыны кутскиз. (Ап. уж. 9:3—9, 17, 18).

 ¹⁷ Берлогес Павеллы христиан кенешын бадӟымгес уж сётэмын вал, нош со ноку ӧз вунэты, малы сое дышетӥз Иисус Дамаске мынон сюрес вылын. Павел азьланяз но ассэ зӥбыт-востэм возиз, озьы ик вын-агайёслэсь но сузэр-апайёслэсь юрттэтсэс ӧз палэнты. Та христианъёс сярысь со вераз: «Соос мынам шумпотон вайисьёсы» (Кол. 4:10, 11).

18. Малы ми куддыръя мукетъёсызлэсь юрттэтсэс палэнтыны быгатӥськомы?

¹⁸ Малы ми дышетскыны быгатӥськомы Павеллэсь? Куке ми зэмлыкен тодматскимы, ми мукетъёсызлэсь юрттэт утчамы, вылды, малы ке шуоно валамы, троссэ ум тодӥське на шуыса (1 Кор. 3:1, 2). Нош али? Ми Иеговалы трос аръёс ӵоже ужаськомы-тыршиськомы ке но шӧдӥськомы ке, троссэ лэсьтыны быгатӥськомы шуыса, соку малпаны быгатомы: милемлы мукетъёсызлэн юрттэтсы сокем кулэ ӧвӧл, тужгес но соослэн юрттэтсы, кинъёс милесьтым берлогес пылатӥськизы. Нош Иегова ӵем дыръя юнматэ милемыз ӵапак вын-агайёсмы но сузэр-апайёсмы пыр (Рим. 1:11, 12). Милям потэ ке, Иегова милемлы кужым мед сётоз шуыса, тае валаны кулэ.

19. Малы Павел азинлыко вал?

¹⁹ Христиан мурт луыса, Павел трос паймымон ужъёс лэсьтӥз. Кызьы со сое лэсьтыны быгатӥз? Со валаз: адямилэн азинлыко луэмез герӟаськемын ӧвӧл трос кужыменыз, вылӥ дышетсконэныз, ваньбуреныз яке кыӵе калыкысь потэменыз. Азинлыко луо зӥбыт-востэм адямиос, кудъёсыз Иеговалы оскисько. Ойдолэ апостол Павеллэсь адӟем каромы но тодамы возёмы, малы ми солэсь дышетскыны быгатӥськомы: 1) Иеговалы оскиськыны, 2) Библиысь примеръёс вылын дышетскыны но 3) вын-агайёсмылэсь но сузэр-апайёсмылэсь юрттэтсэс басьтыны. Соку, туж лябӟеммы дыръя но, Иегова милемыз кужмо кароз!