1. Әлчи Паул немини очуқ етирап қилған?

 ӘЛЧИ ПАУЛ бәзидә өзини аҗиз һис қилидиғанлиғини етирап қилған. У тени аҗизлап кәткәчкә, тоғра иш қилиш үчүн бар күчини чиқириш керәклигини вә Йәһваниң дуалириға һемишәм у халиғандәк җавап бәрмәйдиғанлиғини иқрар қилған (Кор. 2-х. 4:16; 12:7—9; Рим. 7:21—23). Паул йәнә дүшмәнлириниң уни аҗиз дәп қариғанлиғини билгән b. Бирақ Паул башқиларниң сәлбий көзқаришиниң вә өз аҗизлиқлириниң өзини әрзимәс һис қилдурушиға йол қоймиған (Кор. 2-х. 10:10—12, 17, 18).

2. Коринтлиқларға 2-хәт 12:9, 10-айәтләргә асасән, Әлчи Паул қандақ муһим савақ алған?

² Әлчи Паул бир муһим савақ алған — адәм аҗизлиқни һис қилған чағда, күчлүк болалайду (Коринтлиқларға 2-хәт 12:9, 10ни оқуң). Йәһва Худа әлчи Паулға «Мениң күч-қудритим аҗизлиқта мукәммәллишиду»,— дегән. Бу сөзләр, Худаниң әлчи Паулға муһтаҗ болған күчни беридиғанлиғини билдүриду. Һазир бизгә қарши чиққанларниң һақарәтлиригә немә үчүн ерән қилмаслиғимиз керәклигини көрүп чиқимиз.

3. Немә үчүн «һақарәтләнгән вақитларда,... шат-хорам» болалаймиз?

³ һәчқайсимиз һақарәтлинишни халимаймиз. Амма дүшмәнләр бизни һақарәтлигәндә уларниң сөзлиригә зиядә  көп көңүл бөлсәк, үмүтсизлик патқиғиға петип қелишимиз мүмкин (Пәнд н. 24:10). Шуңа дүшмәнләрниң һақарәтлиригә қандақ қаришимиз керәк? Әлчи Паулға охшаш, «һақарәтләнгән вақитларда,... шат-хорам» болалаймиз (Кор. 2-х. 12:10). Немә үчүн? Чүнки һақарәтләр вә қаршилиқлар бизниң Әйсаниң һәқиқий шагирти екәнлигимизни көрситиду (Пет. 1-х. 4:14). Әйса әгәшкүчилириниң зиянкәшликкә учрайдиғанлиғини ейтқан еди (Йоһ. 15:18—20). Бундақ зиянкәшликләр биринчи әсирдә йүз бәргән. Шу заманларда, грек мәдәнийитиниң тәсиридә болғанлар, мәсиһийләргә әқилсиз һәм аҗиз дәп қариған. Йәһудийларниң арисида, әлчи Петрус билән Йоһанға охшаш мәсиһийләр «оқумиған аддий адәмләр» дәп һесапланған (Әлч. 4:13). Қаримаққа, мәсиһийләр аҗиз көрүнгән, сәвәви уларниң сәясий тәсири вә һәрбий күчи йоқ болған вә адәмләр җәмийәттә уларни рәт қилған.

4. Дүшмәнләр дәсләпки мәсиһийләрни һақарәтлигәндә, улар қандақ инкас қайтурған?

⁴ Шу дәсләпки мәсиһийләр дүшмәнлириниң сәлбий көзқаришиниң вәз ишни тохтишиға йол қойғанму? Яқ, қоймиған. Мәсилән, әлчи Петрус билән Йоһан Әйсаға әгишишни вә униң тәлимлирини тарқитишни чоң шан-шәрәп дәп қариған (Әлч. 4:18—21; 5:27—29, 40—42). Шагиртларниң номус қилишиға һеч сәвәплири болмиған. Вақит көрситидуки, дәсләпки кәмтәр мәсиһийләр дүшмәнлиригә қариғанда инсанийәт үчүн, көпирәк пайда әкәлгән. Мәсилән, Худаниң роһиниң илһамландуруши билән бәзи мәсиһийләр язған китаплар миллионлиған адәмләргә мошу кәмгичә ярдәм вә үмүт бериду. Улар вәз қиливатқан Падишалиқ һазир асманда һөкүмранлиқ жүргүзиватиду вә пат йеқинда һәммә адәмзат үстидин һөкүмранлиқ қилиду (Мәт. 24:14). Бирақ мәсиһийләргә зиянкәшлик қилған қедимий күчлүк Рим империяси йоқулуп пәқәт тарихта қалди. Әксинчә, Әйсаниң садиқ әгәшкүчилири асманда падишалар болуп олтириду. Уларниң дүшмәнлири болса, өлүп тупраққа айланди, һәтта кәлгүсидә тирилгән тәғдирдиму өч көргән мәсиһийләр уларниң үстидин һөкүмранлиқ қилиду (Вәһ. 5:10).

5. Йоһан 15:19-айәткә асасән, немә үчүн бәзиләр Йәһваниң гувачилирини көзгә илмайду?

⁵ Бүгүнки күндә бәзи адәмләр Йәһва гувачилирини әқилсиз вә аҗиз дәп бизни көзгә илмайду вә мәсхирә қилиду. Немә үчүн? Чүнки уларниң көзқаришини қобул қилмаймиз. Биз мулайим, кәмтәр вә итаәтчан болушқа бәл бағлидуқ. Мошу дуниядики адәмләр болса, тәкәббур вә исиянкар адәмләрдин зоқлиниду. Униңдин башқа биз сәясәткә арилашмаймиз вә һечқандақ бир дөләтниң һәрбий қошунлириға қошулмаймиз. Биз мошу дуниядики адәмләрдин пәриқлинимиз. Шуңа улар бизгә төвән қарайду (Йоһан 15:19ни оқуң; Римлиқларға 12:2).

6. Йәһва Худа Өз хәлқигә қандақ бир чоң ишларни қилишқа ярдәм бериду?

⁶ Дунияниң бизгә болған көзқаришиға қаримастин, Йәһва Худа биз арқилиқ чоң бир ишларни қилип кәлмәктә. У инсанийәт тарихида һечқачан болмиған кәң көләмлик вәз қилиш паалийитини башқуриватиду. Худа хизмәтчилири пүтүн йәр йүзидә көп тилларда тәрҗимә қилинған вә кәң тарқалған журналларни нәшир қилиду. Йәнә улар миллионлиған адәмләрниң һаятини яхшилитиш үчүн Муқәддәс китапни қоллиниду. Бу һәйран қаларлиқ ишлар үчүн Йәһва Худа шан-шәрәпкә сазавәр. У аҗиз болуп көрүнгән адәмләрни қоллинип, чоң ишларни қилип кәлмәктә. Һәрқайсимиз һәққидә  немә ейтишқа болиду? Йәһва Худа бизгә күч берәләмду? Шундақ болса, Униң ярдимигә еришиш үчүн биз немә қилишимиз керәк? Һазир әлчи Паул көрсәткән мисалидин алаһидә үч нәрсини көрүп чиқимиз.

7. Паулниң үлгисидин қандақ савақ алимиз?

⁷ Паулниң үлгисидин алидиған бир савақ: Йәһва Худаға хизмәт қилғанда өз күчиңиз билән қабилийитиңизгә таянмаң. Көплигән адәмләр Паулниң әһвалидин вә қабилийәтлиридин зоқланған. Шу сәвәптин, у тәкәббур болса вә өзигә таянса асан болатти. У Рим империясидики Тарсус шәһиридә чоң болған. Тарсус гүлләнгән шәһәр болуп, униңда даңлиқ университети бар еди. Паул алий билимгә егә болған. Униңға шу замандики даңлиқ йәһудий рәһбәрлириниң бири Гамалиил исимлиқ киши билим бәргән (Әлч. 5:34; 22:3). Бир вақитларда Паул йәһудийларниң арисида бир муһим орунға егә болған еди. У мундақ дегән: «Мән йәһудий динида... хәлқимдики көплигән мениң тәңтушлиримдин артуғирақ мувәппәқийәт қазанғандим» (Гал. 1:13, 14; Әлч. 26:4). Амма Паул өзигә таянмиған.

8. Филипиликләргә 3:8-айәткә асасән, Паул өзи рәт қилған нәрсигә қандақ қариған вә немә үчүн аҗизлашқан чағларда у шат-хорам болған?

⁸ Бу дунияниң өлчәмлири бойичә муһим саналған һәммә нәрсини Паул хошаллиқ билән рәт қилған. Һәқиқәтән, у илгәрки утуқлирини «әхләт дәп һесаплиған» (Филипиликләргә 3:8ни оқуң). Әлчи Паул Әйсаниң әгәшкүчиси болуп, бешидин көп қийинчилиқларни өткүзгән. Мәсилән, уни өз хәлқи өч көргән (Әлч. 23:12—14). Шундақла Рим пухралириму уни уруп-соқуп, түрмигә ташлиған (Әлч. 16:19—24, 37). Буниңдин ташқири, у өзиниң намукәммәл вә униң үчүн тоғра ишларни қилиш қийин болғанлиғини тонуп йәткән (Рим. 7:21—25). Бирақ әлчи Паул дүшмәнлириниң қаршилиғи яки өзини гунакар һис қилғанлиғи сәвәплик, Әйса Мәсиһниң кәйнидин әгишип меңишни тохтатмиған. Буниң орниға, у аҗизлашқан чағларда «шат-хорам болимән», дегән еди. Немә үчүн? Сәвәви  у аҗиз болғанда, Йәһва Өз күчини әвәткәнлигини көргән (Кор. 2-х. 4:7; 12:10).

9. Бизни қаримаққа аҗиз көрситидиған нәрсиләргә қандақ көзқарашта болушимиз лазим?

⁹ Йәһва Худаниң күчигә еришишни халисақ, билимимиз, мәдәнийитимиз, келип чиқишимиз вә мал-дуниямиз бизни қәдир-қиммәтлик қилиду, дәп ойлимаслиғимиз керәк. Бу һәммә нәрсиләр Йәһваға болған хизмитимиз үчүн пайдилиқ болмайду. Әслидә, Худа хәлқиниң арисида инсаний тәрәптин данишмәнләр, күч-һоқуққа егә болғанлар вә ақсүйәкләр анчә көп әмәс. Әксинчә, Худа дуния аҗиз дәп саниғанларни таллавалған еди (Кор. 1-х. 1:26, 27). Бу абзацниң бешида кәлтүрүлгән һәммә нәрсиләргә егә болмисиңизму, йәнила Йәһваға хизмәт қилалайсиз. Әксинчә, бундақ вәзийәтләргә иҗабий көзқарашта болуң. Буни қандақ қилалайсиз? Есиңиздә болсунки, мошу дунияда муһим дәп саналған нәрсиләргә егә болмисиңизму, Йәһваниң беридиған күч-қудритини көрәләйсиз. Мәсилән, ишәнчиңизни әйипләйдиған кишидин қорқсиңиз, өз иман-етиқадиңизни қоғдаш үчүн җасарәтлик болушқа Йәһва Худадин ярдәм сорап дуа қилиң (Әфәс. 6:19, 20). Қандақту бир еғир кесәл билән күрәш қиливатқан болсиңиз, вәз қилиш ишиға қолуңиздин кәлгиничә көпирәк қатнишиш үчүн Йәһва Худадин керәклик күч сораң. Һәр қетим Йәһва Худаниң ярдимини көргәндә, сизниң ишәнчиңиз өсиду вә техиму мустәһкәмлиниду.

10. Немә үчүн Ибранийларға 11:32—34 айәтләрдә тилға елинған садиқ хизмәтчилириниң мисаллирини үгинишимиз керәк?

¹⁰ Әлчи Паул тиришчанлиқ билән Язмиларни тәтқиқ қилған. Әлчи Паул Худа Сөзни үгинипла қоймай, Униң садиқ хизмәтчилириниң мисаллирини пухта тәтқиқ қилған. Паул ибранийларға язған хетидә, улардин Худаниң қедимий садиқ хизмәтчилириниң үлгиси һәққидә чоңқур мулаһизә қилишни сориған (Ибранийларға 11:32—34ни оқуң). Давут падишаниң үлгисини көрүп чиқайли. У пәқәт дүшмәнлириниң әмәс, һәтта бурун дост болған бәзиләрниң қаршилиқлириға дуч кәлгән. Паул Давутниң һаяти тоғрилиқ чоңқур ой-пикир жүргүзүп, өзигә күч алғанлиғини көрүп йетәләймиз вә биз Паулдин қандақ үлгә алидиғанлиғимизни чүшинәләймиз.

11. Немә үчүн Давут аҗиз болуп көрүнгән? (Муқавидики рәсимгә қараң.)

¹¹ Күчлүк җәңчи Ғолият Давутқа җисманий җәһәттин аҗиз дәп қариған. Ғолият Давутни көзгә илмиған. Сәвәви Ғолият бойи егиз, яхши қуралланған вә җәңдә тәҗрибиси мол бири болған. Қаримаққа, Давут җәңдә тәҗрибиси йоқ аддий бала болған еди. Лекин Давут аҗиз болуп көрүнсиму, әмәлийәттә у күчлүк болған. У Йәһва Худаға таянған, шуңа Йәһваниң күчи билән у Ғолиятни мәғлуп қилған (Сам. 1-яз. 17:41—45, 50).

12. Давут йәнә қандақ қийинчилиқларға учриған?

¹² Давут уни аҗиз һис қилдуридиған йәнә бир қийинчилиққа учриған. Давут Йәһва Өзи Исраил хәлқигә падиша қилип таллиған Саулға садиқ хизмәт қилған еди. Бешида падиша Саул Давутни һөрмәтлигән. Кейин Саул мәғрурлуққа берилип, Давутқа ич тарлиқ қилишқа башлиған. Андин Саул Давутқа яман муамилә қилип, һәтта уни өлтүрмәкчи болған (Сам. 1-яз. 18:6—9, 29; 19:9—11).

13. Давут у Саул падишаниң униңға көрсәткән адаләтсиз муамилисигә қандақ инкас қайтурған?

¹³ Саулниң адаләтсиз муамилисигә қаримастин, Давут Йәһва тәйинлигән падишаға давамлиқ һөрмәт көрсәткән (Сам. 1-яз.  24:6). Давут Саулниң қилған яман ишлири үчүн Йәһвани әйиплимигән. Буниң орниға, у мошу қийин синақларға бәрдашлиқ беришкә керәклик күчкә еришиш үчүн Йәһва Худаға таянған еди (Зәб. 18:1).

14. Әлчи Паул Давут падишаға охшап кетидиған қандақ вәзийәткә дуч кәлгән?

¹⁴ Әлчи Паул Давут падишаға охшаш вәзийәткә дуч кәлгән. Паулниң дүшмәнлири униңдин күчлигирәк болған. Көплигән диний вә сәясий рәһбәрләр уни өч көргән. Улар уни пат-пат уруп түрмигә ташлиған. Давутқа охшаш, бурун Паулниң достлири болғанлар кейин униңға яман муамилә қилишқа башлиған. Җамаәттикиләрниң бәзилири, һәтта униңға қаршилиқни көрсәткән (Кор. 2-х. 12:11; Флп. 3:18). Лекин Паул дүшмәнлиригә қарши туралиған. Қандақларчә? У қаршилиқларға қаримастин, вәз қилишни давамлаштурған. Һәтта уни үмүтсизләндүргән қериндашларни яхши көрүшни тохтатмиған. Әң муһими, у һаятиниң ахириғичә Худаға садиқлиғини сақлап қалған (Тим. 2-х. 4:8). У өз күчигә әмәс, Худаға таянғачқа, еғир қийинчилиқларни йеңәлигән еди.

15. Бизниң мәхситимиз қандақ вә униңға қандақ йетәләймиз?

¹⁵ Синипдашлириңиз, хизмәтдашлириңиз яки Йәһва гувачиси болмиған аилә әзалириңизниң һақарити яки зиянкәшлигигә қарши туриватамсиз? Җамаәттә бирси сизгә яман муамилә қилғанму? Шундақ болсиму, Давут билән Паулниң мисаллирини есиңиздә тутуң. Сиз «яманлиқни яхшилиқ билән йеңишни» давамлаштуралайсиз (Рим. 12:21). Сизниң мәхситиңиз Давутқа охшаш башқиларниң пешанисигә таш етиш әмәс, Худа Сөзини адәмләрниң әқиллиригә вә жүрәклиригә сиңдүрүш. Сиз адәмләрниң соаллириға Муқәддәс китапқа асаслинип җавап бәрсиңиз вә сизгә яманлиқ қилғанларға, һәтта дүшмәнлириңизгиму һөрмәт көрситип, яхшилиқ қилсиңиз, мошу мәхсәткә йетәләйсиз (Мәт. 5:44; Пет. 1-х. 3:15—17).

16, 17. Паул немини һечқачан унтуп қалмиған?

¹⁶ Әлчи Паул Мәсиһниң әгәшкүчиси болуштин бурун һакавур бир яш киши болуп,  Әйсаниң шагиртлириға зиянкәшлик қилған (Әлч. 7:58; Тим. 1-х. 1:13). У Саул дегән исми биләнму тонулған еди. Мәсиһийләрниң җамаәтлиригә қаршилиқ көрсәткән Паулни Әйса өзи тохтатқан. Әйса Мәсиһ Паулға асмандин сөзләп, уни қарғу қилип қойған. Шуңа қайтидин көзиниң көрүши үчүн, Паул өзи зиянкәшлик қилған адәмләрдин ярдәм сорашқа мәҗбур болған. У Һанания исмилиқ шагиртниң ярдимини кәмтәрлик билән қобул қилған. Һанания униң көзини әксигә кәлтүргән (Әлч. 9:3—9, 17, 18).

¹⁷ Паул кейинирәк җамаәтә һәммигә тонушлуқ бир етиқатчи болған. Бирақ Дәмәшққа баридиған йолида Әйса униңға бәргән савақни һечқачан унтуп қалмиған. Паул кәмтәрликни сақлап қалған вә қериндашларниң ярдимини хошаллиқ билән қобул қилған. У қериндашлирини яр-йөлигим, дәп атиған (Кол. 4:10, 11).

18. Немә үчүн бәзидә башқиларниң ярдимини қобул қилиш қийин болуши мүмкин?

¹⁸ Биз Паулдин немини үгәнсәк болиду? Йәһва Худаниң хизмәтчилири билән арилишишни башлиғанда, биз роһий бовақ екәнлигимизни вә нурғун нәрсиләрни үгиниш керәклигини чүшинип, уларниң ярдимини қобул қилғандуқ (Кор. 1-х. 3:1, 2). Бирақ һазирчу? Әгәр биз Йәһваға узун жиллар хизмәт қилип, мол тәҗрибигә егә болсақ, башқиларниң болупму, биздин кейин һәқиқәткә кәлгәнләрниң ярдимини қобул қилишқа анчә тәйяр болмаслиғимиз мүмкин. Амма Йәһва Худа дайим қериндашлар арқилиқ бизни мустәһкәмләйду (Рим. 1:11, 12). Әгәр биз Йәһва бәргән күчкә еришишни халисақ, биз қериндашларниң ярдимини қобул қилишимиз лазим.

19. Қандақларчә әлчи Паул әҗайип ишларни қилған?

¹⁹ Әлчи Паул мәсиһий болғандин кейин, әҗайип ишларни қилған. Нәмә үчүн? Чүнки у адәмниң утуқ қазиниши, җисманий күчи, алған билими, мал-дунияси вә келип чиқишиға әмәс, бәлки униң кәмтәрлиги вә Худаға таянғанлиғиға бағлиқ екәнлигини үгәнгән. Һәммимиз Паулдин үлгә елип, 1) Яратқучи Йәһваға тайинайли, 2) Муқәддәс китапниң мисаллирини үгинәйли, 3) етиқатдашларниң ярдимини қобул қилайли. Шу чағда, қанчә аҗиз болсақму, Йәһва Атимиз бизни күчлүк қилалайду!