1. Etthu xeeni murummwa Paulo aasuwela awe?

MURUMMWA Paulo aanisuwela wira waahikhala okathi atteettheya awe. Nave aahoona wira erutthu awe “enrowa omalamala”, nto aahaana wiimananiha wira opakeke itthu sooloka. Nave Yehova khaakhula mavekelo a Paulo ntoko owo aaphavela awe. (2 aKor. 4:16; 12:7-9; aRom. 7:21-23) Paulo aanisuwela wira awanani awe yaamoona ntoko mutthu oohilipa. * Masi Paulo kheemerenrye wira moonelo woohiloka wa atthu akina wala ohilipa wawe omwiirihe wuupuwela wira khorina efaita.—2 aKor. 10:10-12, 17, 18.

2. Moovarihana ni 2 aKorinto 12:9, 10, etthu xeeni murummwa Paulo iixuntte awe?

² Murummwa Paulo aahiixutta wira mutthu onnikhala oolipa hata uupuwelaka wira toohilipa. (Mmusome 2 aKorinto 12:9, 10.) Yehova aahimuleela Paulo wira owerya Wawe “onnitepexa osuwanyeya mohilipani”, eyo enooniherya wira Yehova aamunvaha ikuru Paulo. Vano nrowe niwehe xeeni vahinreerela aya oxanka vaavo ale annilupattha anniveeha aya.

3. Xeeni vari aya vooloka otteeliwa murima vaavo ninruwaniwa ahu?

³ Khuuvo mutthu oniphavela oruwaniwa. Masi awanani ahu anniruwana aphavelaka oninyoonyiha mwaha wa itthu anihimya aya, nto okathi owo hiyo pooti okhulumuwa. (Mir. 24:10) Nto nooneleke sai vaavo ale annilupattha anniruwana aya? Nimutakihaka Paulo, nihaana ‘otteliwa murima . . . naruwaniwaka’. (2 aKor. 12:10) Mwaha wa xeeni? Mwaha woowi vaavo atthu anniveeha aya ni annilupattha  aya enooniherya wira naatthareli eekeekhai a Yesu. (1 Ped. 4:14) Nave muhiliyale wira Yesu aahihimya wira atthareli awe yaarowa olupatthiwaka. (Yoh. 15:18-20) MaKristau a eseekulu yoopacerya yaanilupatthiwa. Okhuma okathi ole, atthu otheene yaahapuxiwe ni soolema sa aKriki yoona wira maKristau yaari atthu oohisoma ni ahirina efaita. Nave eriyari ya aYuda maKristau yaathokoreriwa okhala “atthu yahasomme” ntoko murummwa Pedru ni Yohani. (Mit. 4:13) Atthu anceene yaaniwoona maKristau okhala atthu oohilipa. Mwaha woowi awo khayiirela mpantta myaha sa epoliitika ni yaanikhootta orowa owana ekhotto. Nto atthu a mmuttettheni khiyaattittimiha ni khiyaaphavela.

4. MaKristau a eseekulu yoopacerya yoonela sai moonelo woohiloka wa atthu ale yaalupattha?

⁴ Niireke maKristau a eseekulu yoopacerya yaaheemererya okhulumuliwa ni moonelo woohiloka wa atthu ale yaalupattha? Nnaari. Mwa ntakiheryo, murummwa Pedru ni Yohani yaanoona okhala eparakha olupatthiwa mwaha woomutthara Yesu ni owiixuttiha atthu akina voohimya sa Yesu. (Mit. 4:18-21; 5:27-29, 40-42) Awiixutti ale khayuuleliwa muru. Hata atthu a mmuttettheni yahaattittimiha maKristau ale a eseekulu yoopacerya, awo yaahimananiha waakhaliherya atthu akina. Mwa ntakiheryo, iliivuru sikina sa mBiibiliyani saalempwale ni maKristau oowiiyeviha ni khiyaahiyale waakhaliherya atthu imilyau sinceene. Nave Omwene yaalaleya aya, vano onilamulela wiirimu ni moohipisa onirowa waalamulelaka apinaatamu otheene valaponi. (Math. 24:14) Masi eKuvernu yuulupale ya oRoma yaalupattha maKristau khekhanle mpakha olelo-va. Maana maKristau ale oororomeleya mamwene wiirimu. Masi atthu otheene yaalupattha ahookhwa, akhala wira anoohihimuxiwa, awo anrowa weettihiwaka ni Omwene alamuleliwaka ni atthu yaale yaalupattha aya.—Wis. 5:10.

5. Moovarihana ni Yohani 15:19, xeeni atthu akina ahinaattittimiha aya Anamoona a Yehova?

⁵ Olelo-va, atthu akina khanaattittimiha Anamoona a Yehova ni anninruwana mwaha woowi anuupuwela wira na atthu oohisoma ni oohilipa. Mwaha wa xeeni? Mwaha woowi khanneemererya mweettelo woohiloka. Hiyo ninniimananiha okhala atthu oowiiyeviha, oomaala ni oowiiwelela. Masi atthu anceene olelo-va toowiixinnuwiha, oowiitthuna ni oohiiwelela. Nave hiyo khaninkhaliherya myaha sa epoliitika ni khaninrowa okhottoni. Hiyo na atthu oovirikana ni atthu a olumwenku ola, nto mwaha wa yeeyo, awo anuupuwela wira khanrina efaita.—Mmusome Yohani 15:19; aRom. 12:2.

6. Aarumeelaka atthu awe, itthu xeeni Yehova oniwerya awe opaka?

⁶ Hata atthu a mulaponi yuupuwelaka wira naatthu oohilipa, Yehova oonithanla wira nipakeke itthu suulupale. Aarumeelaka atthu awe, Yehova onnipaka ekampaanya ya olaleya ihapari sooreera olumwenku wotheene, yeeyo yahaatonko opakiwa okhuma vaavale apattuxiwe aya apinaatamu. Olelo-va, atthu a Muluku annipaka ni otaphulela irevista anikawa aya olumwenku wotheene ni annimurumeela Biibiliya wira yaakhaliherye atthu imilyau sinceene okhalana okumi wooloka. Yehova tonireerela ovuwihiwa mwaha wa itthu iyo sotheene atthu awe anipaka aya. Tthiri Yehova onnaarumeela atthu anikhala ntoko wira toohilipa wira opake itthu suulupale. Ankhi nyuwo? Niireke Yehova pooti wookhaliheryani okhalana ikuru sinceene? Akhala wira ti siiso, muhaana opaka exeeni wira Yehova ookhaliheryeni? Ninrowa othokorerya itthu tthaaru (3) nniixutta ahu ni ntakiheryo na murummwa Paulo.

7. Etthu xeeni nniixutta ahu ni ntakiheryo na Paulo?

⁷ Etthu emosa nniixutta ahu ni ntakiheryo na murummwa Paulo tiila: Muhiroromeleke ikuru sanyu wala itthu munisuwela anyu  wira mmurumeele Yehova. Mwa moonelo wa apinaatamu, Paulo aahikhalana mikhalelo saarowa omwiiriha okhala mutthu oowiixinnuwiha ni oowiiroromela. Owo aannuwale epooma ya oTarso, yeeyo yaari ekapitaali ya oRoma. Epooma ya oTarso yaari yoothaaciri ni naari nipuro noovuwa ni naarina ixikola suulupale atthu yaasoma aya. Paulo aari mutthu aasomme vanceene. Owo iixuttihiwe ni muhooleli a aYuda oovuwa ni oottittimihiwa a okathi ole, yoowo iihaniwa Gamaliyeli. (Mit. 5:34; 22:3) Musuweleke wira waahikhala okathi Paulo aarina awe okhulupale eriyari ya aYuda. Paulo onihimya so: “Miyo kanikelela oholo mw’edini y’aYuda vowavikana amusi aka anjene, yalikanaka wunnuwa”. (aGal. 1:13, 14; Mit. 26:4) Hata vaari siiso, Paulo khairoromela.

8. Moovarihana ni aFilipi 3:8, Paulo oonela sai itthu sa mulaponi, ni xeeni ‘atteliwa awe murima mwaha wohilipa wawe’?

⁸ Voohakalala, Paulo aahihiya itthu sotheene saarowa omwiiriha okhala mulopwana oolipa ni oovuwa moovarihana ni olumwenku. Tthiri itthu seiye atthu akina yoona aya okhala eparakha, Paulo oona ntoko “ikokhola”. (Mmusome aFilipi 3:8.) Paulo aahiphwanya mixankiho sinceene mwaha wookhala mutthareli a Kristu. Owo aaninyokhiwa vanceene ni atthu a nloko nawe. (Mit. 23:12-14) Nave aahitupheliwa ni otthukweliwa mukhatteya ni atthu a elapo awe ya oRoma. (Mit. 16:19-24, 37) Ohiya-vo, Paulo aaniwanana mixankiho sawe. (aRom. 7:21-25) Masi, Paulo kheemerenrye mixankiho sawe ni atthu yaamulupattha amwiirihaka okhulumuwa wala otthikela ottuli. Ohiya opaka eyo, owo ‘anitteliwa murima mwaha wohilipa wawe’. Mwaha wa xeeni? Mwaha woowi khula okathi uupuwela awe wira khaalimpe, Paulo aanoona owerya wa Muluku omukhaliheryaka.—2 aKor. 4:7; 12:10.

9. Mooneleke sai muupuwelaka wira khamuhiyo oolipa?

⁹ Naaphavelaka wira Yehova onivahe ikuru sawe, nihuupuweleke wira ikuru sahu, osoma wahu, okhulupale ahu mmuttettheni wala musurukhu nrina ahu ekhalaka etthu enniiriha okhala atthu a efaita. Itthu iyo khasinniiriha okhalana efaita vamaithoni va Yehova. Tthiri olelo-va, eriyari ya atthu a Yehova “khinnaphwanya asuweli anjene, nnákhala atthu òwerya, walá makhulupale manjene”. Hata vari siiso, Yehova “òthanla [orumeela] ololo wa vathí-va”. (1 aKor. 1:26, 27) Nto muupuwelaka wira khamunisuwela  itthu sinceene, eyo khenookhoottiheryani omurumeela Yehova. Ohiya-vo, nweheke mukhalelo anyu mwa enamuna yooloka. Munrowa owerya sai opaka eyo? Muupuweleke wira vaavo muhirina anyu itthu saarowa owiirihani okhala mutthu oovuwa mulaponi, nyuwo munoowerya woona moota Yehova onoovahaaweni ikuru. Mwa ntakiheryo, akhala wira munniwoova atthu ale aniphavela ohonona waamini wanyu, munvekeleke Yehova wira oovaheeni olipa murima wira mwaakiherye waamini wanyu. (aÉf. 6:19, 20) Akhala wira murina oretta ohinivoniwa, munvekeleke Yehova ikuru wira mwiimananiheke ovara muteko awe. Vaavo munrowa anyu woonaka Yehova aakhulaka mavekelo anyu, waamini wanyu onrowa wunnuwaka ni olipa vanceene.

10. Xeeni vari aya vooloka osoma matakiheryo a arumeyi oororomeleya a khalai, ntoko ale aniromoliwa aHéberi 11:32-34?

¹⁰ Paulo aaniimananiha vanceene osoma Soolempwa. Tivonto, ohiya paahi wiixutta itthu sinceene, owo aahiixutta ni matakiheryo a atthu oororomeleya yaamurumeela Yehova alempwale mBiibiliyani. Okathi aalepela awe ewarakha maKristau a muloko wa aHeberi, Paulo aahaavekela wira yuupuweleke matakiheryo a arumeyi oororomeleya a Yehova a khalai. (Mmusome aHéberi 11:32-34.) Nkahaya nwehe ntakiheryo nimosa na arumeyi awo, ntakiheryo na Mwene Davidi. Owo aanilupatthiwa vanceene ohiya paahi ni awanani awe, masi-tho ni atthu akina yaari apatthani awe. Tthiri wuupuwelela ntakiheryo na Mwene Davidi, naahimukhaliherya ni omulipiha murummwa Paulo ni opaka eyo enoonikhaliherya ni onilipiha olelo-va.

11. Xeeni Davidi aakhala awe ntoko toohilipa namulikanyiha ni Goliyathi? (Nwehe elatarato ya ekaapa.)

¹¹ Okathi aari awe ohoolo wa nakhotto ootupa ni oowerya Goliyathi, Davidi aakhala ntoko oohilipa. Nto okathi anwenhe awe Davidi, Goliyathi “ahimuthanya”. Ohiya-vo, Goliyathi aari nakhotto muulupale, ooneneva, oorakama, aarina ikaruma sotheene sa ekhotto ni iixuttihiwe oratteene owana ekhotto. Masi Davidi aari mmiravo ahaasuwela owana ekhotto ni ahaatonko orowa okhottoni. Hata vari siiso, Davidi aahiiriha ohilipa wawe okhala mutthu oolipa. Owo aanimuroromela ni murima wotheene Yehova, nto aahiwerya omuxintta nwanani awe ole ootupa.—1 Sam. 17:41-45, 50.

12. Muxankiho xeeni mukina Davidi aarina awe?

¹² Davidi aahikhalana muxankiho mukina waarowa omwiiriha wuupuwelaka wira aari ootteettheya wala oohilipa. Owo aahimurumeela moororomeleya mwene Sawuli, yoowo aathanliwe ni Yehova. Wanipacerya, mwene Sawuli aanimuttittimiha Davidi. Muhoolo mwaya, wiixinnuwiha waahimwiiriha Sawuli omukhalela nrima Davidi. Nto Sawuli aahipacerya omuhasula Davidi ni aaphavela omwiiva.—1 Sam. 18:6-9, 29; 19:9-11.

13. Davidi aapanke exeeni okathi aathokoreriwa awe voohixariya ni Mwene Sawuli?

¹³ Hata aathokoreriwe voohixariya ni Sawuli, Davidi khaahiyale omuttittimiha, mwaha woowi Sawuli aari mwene aathanliwe ni Yehova. (1 Sam. 24:6) Nave Davidi khanvanhe nthowa Yehova mwaha wa itthu soohiloka Sawuli aapaka awe. Ohiya vo, Davidi aanikupali wira Yehova aamunvaha ikuru wira ovilele muxankiho ole.—Esal. 18:1, masu oopacerya.

14. Mixankiho xeeni Paulo aarina awe sinlikana ni sa Davidi?

¹⁴ Murummwa Paulo aahikhalana muxankiho onlikana ni wa Davidi. Awanani a Paulo yaahikhalana ikuru ni owerya onvikana yena. Ahooleli anceene oovuwa a okathi ole yaanimunyokha vanceene Paulo. Ikwaha sinceene awo yaanaaruma atthu ommana Paulo ni omutthukwela mukhatteya. Ntoko Davidi, Paulo aanihasuliwa ni atthu yaale yaarowa okhala apatthani awe. Hata  atthu akina mmulokoni khiyamphavela Paulo. (2 aKor. 12:11; aFil. 3:18) Masi Paulo aahiwerya waaxintta atthu otheene yaamulupattha. Moota xeeni? Owo khaahiyale olaleerya hata aalupatthiwa vanceene. Owo aahivikaniha waaroromela anna ni arokora hata yaamunyoonyiha. Etthu yootepa otthuneya, okhala wira aahiroromeleya wa Muluku mpakha wiiviwa. (2 Tim. 4:8) Paulo aahixintta mixankiho sinceene, ohiya mwaha woororomela ikuru sawe, masi mwaha woororomela ikuru sa Yehova.

15. Yoolakela anyu tiivi, ni munrowa ophwanya sai yoolakela eyo?

¹⁵ Ankhi nyuwo? Niireke munoohasuliwa wala onyokhiwa ni ale munisomana anyu oxikola, munivarana anyu muteko wala ni amusi anyu ahikhanle Anamoona a Yehova? Wala niireke mootoko othokoreriwa moohixariya ni munna wala murokora mmulokoni? Akhala wira ti siiso, mutthareke ntakiheryo na Davidi ni Paulo. Muhihiye ‘oxintta sotakhala mwiraka sorera’. (aRom. 12:21) Yoolakela anyu yoovirikana ni ya Davidi, maana yoolakela anyu khahiyo ommana ni nluku vamuru mutthu, masi ohela Nuulumo na Muluku mmuupuweloni ni vamurimani va mutthu oniphavela. Nyuwo pooti ophwanya yoolakela eyo akhala wira munoopaka itthu iya: Omuroromela Biibiliya okathi munaakhula anyu makoho a atthu; waattittimiha ni waareerela murima atthu ahinoothokoreryani saana ni owiirela itthu sooloka atthu othene waahela muhina ale anoonyokhani.—Math. 5:44; 1 Ped. 3:15-17.

16-17. Etthu xeeni Paulo ahaaliyanle awe?

¹⁶ Ohinatthi okhala mwiixutti a Kristu, murummwa Paulo aari mmiravo oohittittimiha ni aalupattha vanceene atthareli a Yesu. (Mit. 7:58; 1 Tim. 1:13) Okathi aasuweliwa awe okhala Sawuli, Paulo aanaaxankiha vanceene maKristau a okathi ole. Ori ene wiirimu, Yesu aahimulavuliha ni aahimwiiriha ohoona. Wira otthikele woona, Paulo aahaana waavekela nikhaliheryo atthu yaale aalupattha awe. Nto moowiiyeviha, Paulo aaheemererya okhaliheriwa ni mwiixutti a Yesu iitthaniwa Ananiya, yoowo aamukhalihenrye Paulo otthikela woona.—Mit. 9:3-9, 17, 18.

¹⁷ Muhoolo mwaya, Paulo aahikhala mutthu aasuweliwa oratteene mmulokoni mwa eKristau.  Masi owo khaaliyanle etthu Yesu aamwiixuttinhe awe mphironi orowaka oDamaasiko. Paulo khaahiyale okhala mutthu oowiiyeviha, mutthu oneemererya okhaliheriwa ni axinnawe ni axirokorawe maKristau. Nave Paulo aanisuwela wira axinnawe yaanimulipiha vanceene.—aKol. 4:10, 11.

18. Xeeni okathi mukina vanivila aya weemererya nikhaliheryo na atthu akina?

¹⁸ Ntakiheryo na Paulo ninniixuttiha exeeni? Pooti wira wanipacerya, okathi niixutta ahu ekeekhai vaaninikhweela weemererya nikhaliheryo na atthu akina, maana naithokorerya ntoko anamwane momunepani ni naaphavela wiixuttihiwa itthu sinceene. (1 aKor. 3:1, 2) Masi ankhi olelo-va? Niireke iyaakha sotheene nivirinhe ahu nimurumeelaka Yehova ni ninsuwela ahu itthu sinceene, ninneemererya okhaliheriwa ni atthu akina? Pooti wira vano onninivila opaka eyo, otepexa wene akhala wira ninkhaliheriwa ni mutthu iixuntte ekeekhai niinaano. Masi muhiliyale wira Yehova onnaarumeela anna ni arokora wira anivahe ikuru nimphavela ahu. (aRom. 1:11, 12) Naaphavelaka wira Yehova onivahe ikuru, nihikhala-khale niliyalaka wira nihaana okhaliheriwa ni anna ni arokora mmulokoni.

19. Exeeni yaamukhalihenrye Paulo opaka itthu sinceene?

¹⁹ Paulo aahipaka itthu sinceene sa faita nuumala okhala muKristau. Mwaha wa xeeni? Mwaha woowi aahiixutta wira okhumela wahu saana khonlipa ni ikuru sahu, osoma wahu, musurukhu nrina ahu wala okhulupale nrina ahu. Masi okhumela saana mookumini onlipa ni wiiyeviha ni omuroromela Yehova ni murima wotheene. Nihaana omutakiha Paulo (1) nimuroromelaka Yehova, (2) niixuttaka matakiheryo a atthu aniromoliwa mBiibiliyani ni (3) weemererya okhaliheriwa ni atthu akina. Mwiira siiso, hata muupuwelaka wira khamulimpe, Yehova onimookhaliheryani okhala oolipa!