1. Ano an gin-amin ni apostol Pablo?

GIN-AMIN ni apostol Pablo nga may mga panahon nga inabat niya nga maluya hiya. Nagsiring hiya nga an iya lawas “nagtitikaluya,” nga kinahanglan niya maniguro nga buhaton an tama, ngan hi Jehova diri pirme nabaton ha iya mga pag-ampo ha paagi nga iya ginlalaoman. (2 Cor. 4:16; 12:7-9; Roma 7:21-23) Nagsiring liwat hi Pablo nga ginhuhunahuna hiya han iya mga parakontra sugad nga maluya. * Pero waray niya tuguti an negatibo nga panhunahuna han iba o an iya mga kaluyahan nga magin hinungdan nga abaton niya nga waray hiya pulos.​—2 Cor. 10:10-12, 17, 18.

2. Sumala ha 2 Corinto 12:9, 10, ano nga importante nga leksyon an nahibaroan ni Pablo?

² Nahibaro hi Pablo hin importante nga leksyon​—an usa nga tawo mahimo magin makusog bisan pa kon inaabat niya nga maluya hiya. (Basaha an 2 Corinto 12:9, 10.) Hi Jehova nagsiring kan Pablo nga an Iya gahum “nagigin perpekto ha maluya,” karuyag sidngon, tatagan ni Jehova hi Pablo hin kusog nga iya kinahanglan. Siyahan, kitaon naton kon kay ano nga diri kita angay masina kon gin-iinsulto kita han mga nakontra ha aton.

3. Kay ano nga mahimo kita malipay ha mga pag-insulto?

³ Waray naruruyag ha aton nga insultuhon. Pero kon an aton mga kaaway nag-iinsulto ha aton ngan nagpapaapekto kita hin  sobra ha ira ginsisiring, mahimo kita manluya. (Prob. 24:10) Salit ano an angay naton magin panhunahuna ha mga pan-insulto ha aton? Pariho kan Pablo, mahimo kita ‘malipay . . . ha mga pag-insulto.’ (2 Cor. 12:10) Kay ano? Kay an mga pag-insulto ngan pagkontra mga tigaman nga tinuod kita nga mga disipulo ni Jesus. (1 Ped. 4:14) Hi Jesus nagsiring nga an iya mga sumurunod pagtitimarauton. (Juan 15:18-20) Nahitabo ito ha siyahan nga siglo. Hito nga panahon, adton naimpluwensyahan han kultura han mga Griego naghuhunahuna nga an mga Kristiano mga bulok ngan ubos nga mga tawo. Ngan para ha mga Judio, an mga Kristiano “diri . . . edukado ngan ordinaryo la,” pariho kanda apostol Pedro ngan Juan. (Buh. 4:13) An mga Kristiano baga hin magluya; waray hira impluwensya ha politika o gahum ha militar, ngan diri hira ginrirespeto han mga tawo.

4. Ano an reaksyon han mga Kristiano ha siyahan nga siglo ha negatibo nga panhunahuna ha ira han mga parakontra?

⁴ Humunong ba an mga Kristiano ha siyahan nga siglo tungod ha negatibo nga panhunahuna ha ira han mga parakontra? Waray. Pananglitan, ginhunahuna nira apostol Pedro ngan Juan sugad nga kadungganan an pagtimarauton tungod ha pagsunod kan Jesus ngan pagpasamwak han iya katutdoan. (Buh. 4:18-21; 5:27-29, 40-42) An mga disipulo waray hinungdan nga maawod. Ha urhi, iton mapainubsanon nga mga Kristiano ha siyahan nga siglo mas damu an naibulig ha mga tawo kay han naibulig han mga nakontra ha ira. Pananglitan, an mga libro han Biblia nga iginsurat han pipira hito nga mga Kristiano padayon nga naghahatag hin bulig ngan paglaom ha minilyon nga mga tawo. Ngan an Ginhadian nga ira iginsangyaw diri la nagmamando ha langit yana, kondi diri mag-iiha, magmamando ha ngatanan nga katawohan. (Mat. 24:14) Ha kabaliktaran, an gamhanan nga gobyerno nga nagtimaraot ha mga Kristiano nabungkag na ngan bahin na la han kasaysayan, pero iton matinumanon nga mga Kristiano mga hadi na yana ha langit. Kondi an mga nagkontra ha ira patay na; ngan kon banhawon man hira, magigin mga sakop hira han Ginhadian nga iginsangyaw han mga Kristiano nga ira ginkangalasan.​—Pah. 5:10.

5. Sumala ha Juan 15:19, kay ano nga ginmiminos an katawohan ni Jehova?

⁵ Yana, sugad nga katawohan ni Jehova, usahay ginmiminos kita ngan gintatamay tungod kay naghuhunahuna hira nga mga bulok kita ngan ubos nga mga tawo. Kay ano? Kay diri kita nauyon ha pamatasan han mga tawo ha aton palibot. Nangangalimbasog kita nga magin mapainubsanon, malumo, ngan masinugtanon. Ha kabaliktaran, gindadayaw yana han mga tawo an mapahitas-on, hambog, ngan rebelyoso. Dugang pa, diri kita nakikigbahin ha politika, ngan diri kita naapi ha pwersa-militar han bisan ano nga nasud. Naiiba kita ha mga tawo ha kalibotan yana salit naghuhunahuna hira nga mga ubos kita ha ira.​—Basaha an Juan 15:19; Roma 12:2.

6. Ano nga talagsahon nga mga buruhaton an nahihimo han katawohan ni Jehova tungod han iya bulig?

⁶ Bisan kon ginhuhunahuna han mga tawo ha kalibotan nga maluya kita, gin-gagamit kita ni Jehova ha pagbuhat hin talagsahon gud nga mga butang. Ginpapahinabo niya an buruhaton nga pagsangyaw nga may pinakahaluag nga lukop nga yana pa gud la nahitabo ha bug-os nga kasaysayan. An iya mga surugoon yana nagpupublikar hin mga magasin nga iginhuhubad ha damu gud nga yinaknan ngan iginpapanaltag ha damu nga lugar ha tuna. Ngan ginagamit nira an Biblia basi buligan an minilyon nga tawo nga magin maopay an ira kinabuhi. Ini ngatanan nagigin posible tungod kan Jehova, nga nagamit hin grupo hin mga tawo nga baga hin maluya basi himoon inin gamhanan nga mga buhat. Pero kumusta man kita sugad nga indibiduwal? Mabubuligan ba kita ni Jehova nga magin makusog?  Kon oo, ano an kinahanglan naton buhaton basi makarawat an iya bulig? Hisgotan naton yana an tulo nga butang nga mahibabaroan naton ha ehemplo ni apostol Pablo.

7. Ano an usa nga leksyon nga aton mahibabaroan ha ehemplo ni Pablo?

⁷ Ini an usa nga leksyon nga aton mahibabaroan ha ehemplo ni Pablo: Ha imo pag-alagad kan Jehova, ayaw sarig ha imo kalugaringon nga kusog o abilidad. Ha pagkita han tawo, may rason hi Pablo nga magpahitaas ngan sumarig ha iya kalugaringon. Nagdaku hiya ha Tarso, an kapital nga syudad han usa nga probinsya ha Roma. An Tarso mainuswagon nga syudad ngan may sikat nga unibersidad. Hi Pablo edukado gud; gintutdoan hiya han usa nga ginrirespeto gud nga lider han mga Judio ha iya panahon, nga an ngaran hi Gamaliel. (Buh. 5:34; 22:3) Ngan hi Pablo nagin importante nga tawo hadto ha komunidad han mga Judio. Hiya nagsiring: “Mas nag-uswag ako ha Judaismo kay ha damu han akon kaedad ha akon nasud.” (Gal. 1:13, 14; Buh. 26:4) Pero waray sumarig hi Pablo ha iya kalugaringon.

8. Sumala ha Filipos 3:8, ano an panhunahuna ni Pablo ha mga butang nga iya ginbayaan, ngan kay ano nga ‘nalipay hiya ha mga kaluyahan’?

⁸ Malipayon nga ginbayaan ni Pablo an mga butang nga nakahimo ha iya nga magin importante ha iba. Ngani, nasabtan niya nga ini nga mga butang “mga basura.” (Basaha an Filipos 3:8.) Nakaeksperyensya hi Pablo hin damu nga kakurian tungod kay nagin sumurunod hiya han Kristo. Nasina gud ha iya an iya kalugaringon nga nasud. (Buh. 23:12-14) Ngan ginkastigo ngan ginpriso hiya han iya mga igkasi-molupyo, an mga Romano. (Buh. 16:19-24, 37) Dugang pa, nakurian liwat hi Pablo ha pagbuhat han tama tungod han iya pagin diri perpekto. (Roma 7:21-25) Imbes nga tugotan an mga nakontra ha iya o an iya mga kaluyahan nga magpahunong ha iya ha pagsunod ha Kristo, ‘nalipay [lugod] hiya ha mga kaluyahan.’ Kay ano? Kay han maluya hiya, dida niya nakita kon paonan-o hiya ginbuligan han Dios.​—2 Cor. 4:7; 12:10.

9. Ano an angay naton magin panhunahuna kon waray kita han mga butang nga ginkukonsiderar han kalibotan nga mas importante?

⁹ Kon karuyag naton magkaada kusog tikang kan Jehova, kinahanglan diri naton hunahunaon  nga nagigin importante kita tungod han aton pisikal nga kusog, edukasyon, kultura, o materyal nga karikohan. Diri ito an basihan basi magin importante kita kan Jehova. Ngani ha katawohan han Dios, “diri damu an maaramon ha unudnon nga paagi, diri damu an gamhanan, diri damu an igin-anak nga dungganon.” Lugod, ginpili ni Jehova nga gamiton “an magluya nga mga butang han kalibotan.” (1 Cor. 1:26, 27) Salit ayaw hunahunaa nga kon waray ka hito nga mga butang, diri ka makakag-alagad kan Jehova. Lugod, hunahunaa an imo sitwasyon sugad nga higayon nga makita kon paonan-o ka gintatagan ni Jehova hin kusog. Pananglitan, kon nahahadlok ka ha mga tawo nga nangangalimbasog nga magruhaduha ka ha imo gintotoohan, pag-ampo kan Jehova nga tagan ka hin kaisog ha pagdepensa han imo mga gintotoohan. (Efe. 6:19, 20) Kon nakukurian ka tungod hin grabe nga sakit, pangaro kan Jehova han kusog nga imo kinahanglan basi makapabilin ka nga sagipo ha pag-alagad ha iya tubtob ha imo mahihimo. Ha kada panahon nga nakikita mo nga ginbubuligan ka ni Jehova, nadudugangan an imo pagtoo ngan nagigin mas marig-on ka.

10. Kay ano nga kinahanglan naton pag-adman an ehemplo han matinumanon nga mga tawohan ha Biblia, sugad hadton gin-unabi ha Hebreo 11:32-34?

¹⁰ Hi Pablo maduruto gud ha pag-aram han Kasuratan. Damu an iya nahibaroan tikang hito, pero nahibaro liwat hiya tikang ha mga ehemplo han mga tawo nga an eksperyensya iginrekord ha Pulong han Dios. Han nagsurat hiya ha Hebreo nga mga Kristiano, ginhangyo niya hira nga hunahunaon an ehemplo han damu nga matinumanon nga mga surugoon ni Jehova. (Basaha an Hebreo 11:32-34.) Tagda an usa ha ira, hi Hadi David. Inatubang hiya hin pagkontra diri la tikang ha iya mga kaaway kondi pati liwat ha pipira nga nagin mga kasangkayan niya hadto. Samtang ginhihisgotan naton an ehemplo ni David, mahibabaroan naton kon kay ano nga posible nakabulig kan Pablo an pagpamalandong ha kinabuhi ni David ngan kon paonan-o naton masusubad hi Pablo.

11. Kay ano nga baga hin maluya hi David? (Kitaa an retrato ha kobre.)

¹¹ Ginhunahuna han makusog gud nga girriro nga hi Goliat nga maluya hi David. Han nakita ni Goliat hi David, “ginminos niya hiya.” Oo, mas daku hi Goliat, may mga armas, ngan ginbansay ha pakiggirra. Hi David naman usa la nga bata, diri hiya sundalo salit baga hin maluya hiya. Pero an baga hin maluya nga hi David makusog ngay-an kay sinarig hiya kan Jehova. Ngan gintagan hiya ni Jehova hin kusog basi mapirde hi Goliat.​—1 Sam. 17:41-45, 50.

12. Ano an usa pa nga pagsari nga gin-atubang ni David?

¹² Inatubang hi David hin usa pa nga pagsari nga posible nga nakapaluya ha iya. Maunungon nga nagserbi hi David ha ginpili ni Jehova nga hadi han Israel nga hi Saul. Han una, ginrirespeto ni Hadi Saul hi David. Pero ha urhi tungod han pagpahitaas, naawa hi Saul kan David. Gintratar niya hin maraot hi David ngan gin-ikaparatay pa ngani.​—1 Sam. 18:6-9, 29; 19:9-11.

13. Ano an reaksyon ni David ha maraot nga pagtratar ha iya ni Hadi Saul?

¹³ Bisan pa han maraot nga pagtratar ha iya ni Hadi Saul, padayon nga ginrespeto ni David an pinili nga hadi ni Jehova. (1 Sam. 24:6) Waray basola ni David hi Jehova ha magraot nga ginbuhat ha iya ni Saul. Lugod, sinarig hi David kan Jehova para han kusog nga iya kinahanglan basi mailob iton makuri nga pagsari.​—Sal. 18:1, superskripsyon.

14. Ano nga sitwasyon an gin-atubang ni apostol Pablo nga pariho han kan David?

¹⁴ Hi apostol Pablo inatubang liwat hin sitwasyon nga pariho han kan David. An mga kaaway ni Pablo mas gamhanan gud kay ha iya. Damu  nga prominente nga mga lider ha iya panahon an nasisina gud ha iya. Pipira ka beses hiya nga ginkastigo ngan iginpapriso. Pariho kan David, gintratar hin maraot hi Pablo han mga tawo nga sadang unta magin kasangkayan niya. Ginkontra pa ngani hiya han pipira nga Kristiano ha kongregasyon. (2 Cor. 12:11; Fil. 3:18) Pero napirde ni Pablo an ngatanan nga nakontra ha iya. Paonan-o? Nagpadayon hiya ha pagsangyaw bisan pa ha pagkontra. Nagpabilin hiya nga maunungon ha iya kabugtoan bisan kon napasubo nira hiya. Ngan labaw ha ngatanan, matinumanon hiya ha Dios tubtob ha iya kamatayon. (2 Tim. 4:8) Nahimo niya ito ngatanan tungod kay sinarig hiya, diri ha iya kalugaringon nga kusog, kondi kan Jehova.

15. Ano an aton tumong, ngan paonan-o naton ito mahihimo?

¹⁵ May gin-aatubang ka ba nga mga pan-insulto o pagtimaraot tikang ha imo mga kaklase, katrabaho, o diri Saksi nga kapamilya? Gintratar ka ba hin maraot han usa ha kongregasyon? Kon oo, hinumdumi an ehemplo nira David ngan Pablo. Padayon mo nga ‘madadaog an maraot pinaagi han maopay.’ (Roma 12:21) An imo tumong diri an pagpalubong hin bato ha agtang han usa pariho han ginbuhat ni David, kondi an pagpasilsil han Pulong han Dios ha makinarawaton nga hunahuna ngan kasingkasing. Mahihimo mo ito nga tumong pinaagi ha pagsarig ha Biblia ha pagbaton ha mga pakiana han mga tawo, pinaagi ha pagpakita hin respeto ngan pagin buotan hadton maraot an pagtratar ha imo, ngan pinaagi ha pagbuhat hin maopay ha ngatanan, bisan ha imo mga kaaway.​—Mat. 5:44; 1 Ped. 3:15-17.

16-17. Ano an waray gud kalimti ni Pablo?

¹⁶ Antes magin disipulo han Kristo hi apostol Pablo, usa hiya nga batan-on nga lalaki nga waray respeto nga nagtimaraot ha mga sumurunod ni Jesus. (Buh. 7:58; 1 Tim. 1:13) Ginpahunong mismo ni Jesus hi Pablo, nga kilala hadto nga Saul, ha pag-atake ha Kristiano nga kongregasyon. Nakiistorya hi Jesus kan Pablo tikang ha langit ngan ginbuta hiya. Basi makakita utro, kinahanglan mangaro hi Pablo hin bulig ha mga tawo nga iya mismo gintimaraot. Mapainubsanon nga ginkarawat niya an bulig han disipulo nga hi Ananias basi makakita utro.​—Buh. 9:3-9, 17, 18.

 ¹⁷ Ha urhi, hi Pablo nagin kilala gud nga membro han Kristiano nga kongregasyon. Pero waray gud niya kalimti an leksyon nga igintutdo ha iya ni Jesus ha dalan tipakadto ha Damasco. Nagpabilin nga mapainubsanon hi Pablo ngan kinaburut-on nga ginkarawat niya an bulig han iya kabugtoan. Hiya nagsiring nga “makaparig-on nga bulig” hira ha iya.​—Col. 4:10, 11, ftn.

18. Kay ano nga bangin mag-alang kita ha pagkarawat han bulig han iba?

¹⁸ Ano an aton mahibabaroan kan Pablo? Han siyahan nga nakig-upod kita ha katawohan ni Jehova, bangin karuyag gud naton karawaton an bulig han iba kay maaram kita nga maluya pa kita ha espirituwal ngan damu pa an kinahanglan naton hibaroan. (1 Cor. 3:1, 2) Pero kumusta man yana? Kon damu ka tuig na kita nga nag-aalagad kan Jehova ngan damu na an aton eksperyensya, bangin diri na kita sugad kaandam ha pagkarawat hin bulig, labi na kon an bulig nagtikang ha usa nga diri sugad kaiha ha aton ha kamatuoran. Pero kasagaran nga gin-gagamit ni Jehova an aton kabugtoan basi parig-unon kita. (Roma 1:11, 12) Salit basi magkaada kita kusog tikang kan Jehova, kinahanglan karawaton naton an bulig han aton kabugtoan.

19. Kay ano nga nagin malampuson hi Pablo?

¹⁹ Damu nga urusahon nga butang an nahimo ni Pablo han nagin Kristiano hiya. Kay ano? Kay nahibaroan niya nga an kalamposan nakadepende, diri ha pisikal nga kusog han usa, ha iya edukasyon, karikohan, o estado han kinabuhi, kondi ha iya pagkamapainubsanon ngan pagsarig kan Jehova. Hinaot subaron naton ngatanan hi Pablo (1) pinaagi ha pagsarig kan Jehova, (2) pinaagi ha paghibaro tikang ha mga ehemplo ha Biblia, ngan (3) pinaagi ha pagkarawat hin bulig tikang ha mga igkasi-tumuroo. Kon bubuhaton naton ito, umabat man kita nga maluya kita, pakukusgon kita ni Jehova!