1. მუს აღიარენდჷ მოციქულ პავლე?

მოციქულ პავლე აღიარენდჷ, ნამდა სისუსტეეფ უღუდ. მაგალთო, მუჭოთ თინა იჩიებუდ, დუდის სუსტო გინაფლენდჷ, მუშენდა ხანშა მიშეშ. თეს გეძინელ, ობრძოლებერ აფუდ, ნამდა სწორას ქიმიქცუკო. ხვალე თენა ვარინ, იეჰოვა ირო თეშ ვა პასუხენდჷ თიშ ლოცვეფს, მუჭოთ მუ ელუდ (2 კორ. 4:16; 12:7—9; რომ. 7:21—23). თეწკუმა ართო პავლე აღიარენდჷ, ნამდა მოწინააღმდეგეეფს თინა სუსტო მიორჩქუდეს. * მარა თინა ვართ შხვეფიშ უარყოფით თვალსაზრისის დო ვართ პირად სისუსტეეფს საშვალებას ვარზენდჷ, ნამდა უღირსო ქიგინკო დუდ (2 კორ. 10:10—12, 17, 18).

2. მუჭოთ 2 კორინთელეფიშ 12:9, 10-ის ჭარჷ, მუ მნიშვნელოვან მუდგარენ დიგურუ პავლექ?

² პავლექ მნიშვნელოვან მუდგარენ ქიდიგურუ — პიროვნებას შეულებ თი დროს ხოლო რდას ძალიერ, მუჟამსით სუსტ რე (წეკითხით 2 კორინთელეფიშ 12:9, 10). იეჰოვაქ პავლეს უწუ: „მუჟამსით ძალაგიშალიებურ რექ, თიმწკუმა იგინანქ სრულაშე ჩქიმ ძალას“. თენა თის ნიშნენდჷ, ნამდა იეჰოვა ქიმეჩანდჷ პავლეს საჭირო ძალას. მორთ დუდშე ქობძირათ, მუშენ ოკო ვა ბწუხენდათ ზედმეტო, მუჟამსით მოწინააღმდეგეეფ შეურაცხყოფას მიმორინუანა.

3. მუ მიზეზიშ გურშენ შემლებნა მოსიამოვნუდან შეურაცხყოფა?

³ მითინს ვა მობწონა, მუჟამსით შეურაცხყოფას მიმორინუანა. მარა შეურაცხყოფას ქუმმორინუანა დო თე საკითხშე ზედმეტო  ქობწუხენთ-და, შილებე გურქ გომტირხან (იგავ. 24:10). მუჭო ოკო ვუჯინედათ მოწინააღმდეგეეფშე შეურაცხყოფას? მოციქულ პავლეცალო, ჩქი ხოლო შემლებნა ფთქუათ: „მოსიამოვნ . . . შეურაცხყოფა“ (2 კორ. 12:10). მუშენ იფჩიებუთ თეს? შეურაცხყოფა დო წინააღმდეგობა ოძირანს, ნამდა ჩქი ქრისტეშ ნამდვილ მოწაფეეფ ვორეთ (1 პეტ. 4:14). იესოქ თქუ, ნამდა მუშ მიმაჸუნალეფს თხოზინს ქუდუჭყანდეს (იოან. 15:18—20). იესოშ სიტყვეფქ პირველ საუკუნეს შისრულ. თინეფ, მით ბერძნულ კულტურაშ გავლენაშ თუდო რდეს, ქრისტიანეფს თეშ უჯინედეს, მუჭოთ ურჩქინჯ დო სუსტ კათას. იუდეველეფს ხოლო ქრისტიანეფ მოციქულ პეტრე დო იოანეცალო, „უბრალო დო უგურაფ“ ხალხო მიორჩქუდეს (საქ. 4:13). ქრისტიანეფ ართ მეჯინათ სუსტეფო იძირედეს, მუშენდა თინეფს ვა უღდეს პოლიტიკურ გავლენა, ვართ სამხედრო ძალაუფლება დო ხალხ დუდის არიდანდჷ თინეფწკუმა ურთიერთობას.

4. მუჭო უჯინედეს პირველ საუკუნეშ ქრისტიანეფ მოწინააღმდეგეეფიშ უარყოფით დამოკიდებულებას?

⁴ ქიმეჩესო პირველ საუკუნეშ ქრისტიანეფქ შხვეფიშ არასწორ თვალსაზრისის თიშ უფლება, ნამდა ეცილესკო იესოშ მეჸუნას დო ქადაგებას? მუშო ოკო რაგად, ვარ. მაგალთო, მოციქულ პეტრე დო იოანეს დიდ პატით მიორჩქუდეს, მუჟამსით იესოშ მოწაფეობაშ დო ქადაგებაშ გურშენ თხოზუდეს (საქ. 4:18—21; 5:27—29, 40—42). მოწაფეეფს ონჯღორეშ მუთუნნერ მიზეზ ვა უღდეს. სინამდვილეს, მოწინააღმდეგეეფიშ გინაწონს, პირველ საუკუნეშ თანდაბალ ქრისტიანეფქ უმოს მეტ მუდგარენ აკეთეს კაცობრიობაშო. მაგალთო, ღორონთშე შთაგონებულ ბიბლიაშ წიგნეფ, ნამუთ თი დროს მახორუ ნამთინე ქრისტიანქ ჭარჷ, ამდღარშახ ოხვარ დო იმენდის არზენს მილიონობით ადამიანს. თი სამეფო, ნამდგაშეთ თინეფ ქადაგენდეს, უკვე მართველენს ზეცას დო მალას დედამიწას ხოლო დიჭყანს მართველობას (მათ. 24:14). მარა რომიშ ძალიერ პოლიტიკურ მართველობა, ნამუთ ქრისტიანეფს თხოზუდ, საუკუნეეფ რე, მუთ ვა არსებენს, მუჟამსით თე ართგურ ქრისტიანეფ მეფეეფ რენა ზეცას. მარა თინეფიშ ნტერეფ ცოცხალ ვა რენა. თინეფ გეთელებნან-და, ღორონთიშ სამეფოშ მართველობაშ თუდო იცხოვრენა, ნამდგაშ გურშენ ზუსტას თი ქრისტიანეფ ქადაგენდეს, მით თინეფს ჯოგდეს (გამოცხ. 5:10).

5. მუჭოთ იოანეშ 15:19-ს ჭარჷ, მუშენ ოქცუ იეჰოვაშ მოწმეეფს ნამთინე უპატიცემლოთ?

⁵ ამდღა ნამთინე უპატიცემლოთ ოქცუ იეჰოვაშ მოწმეეფს, მუშენდა თინეფს ურჩქინჯ დო სუსტ ხალხო მივორჩქუთ. მუშენ ფიქრენა თაშ? მიზეზ თინა რე, ნამდა ჩქინ აზროვნება გენესხვავებ თინეფიშ აზროვნებაშე. ჩქი ვოცადუთ, ვორდათ თანდაბალ, თვინიერ დო მორჩილ. თეშ გინაწონს, ქვეყნიერება იწონუანს თიცალეფს, მით რე ამაყ, დუდიშ გიმორჩქინას ოცად დო ბუნტიშ ემატახალ რე. თეს გეძინელ, ჩქი ვემშურთ პოლიტიკაშა დო ნამთინ ქიანაშ სამხედრო სამსახურს ვა ბღებულენთ მონაწილებას. ჩქი განსხვავებულეფ ვორეთ თე ქვეყნიერებას მახორუ კათაშე დო ათეშენ, თინეფ ჟიშე გინმოჯინენა (წეკითხით იოანეშ 15:19; რომ. 12:2).

6. მუ დიდებულ საქმეეფს ოკეთებაფუანს იეჰოვა მუშ ხალხის?

⁶ მართალ რე, ქვეყნიერებას სუსტეფო მივორჩქუთ, მარა იეჰოვა დიდებულ საქმეეფიშ ოკეთებელო გიმომრინუანა. თიშ ხემძღვანელობათ ისრულებ კაცობრიობაშ ისტორიას არძაშ უმოს დიდებულ სამქადაგებლო საქმე. ამდღა იეჰოვაშ ხალხ გიშმაშქვანს ჟურნალეფს, ნამუთ თარგმნილ რე არძაშ უმოს მეტ ნინაშა დო არძაშ უმოს გავრცელებურ რე მსოფლიოს. ღორონთიშ მსახურეფ ბიბლიაშ გიმორნაფათ ოხვარნა მილიონობით ადამიანს, ნამდა გაუჯგუშან მუნეფიშ ცხოვრება. ფაქტ რე, ნამდა თე განსაკუთრებულ საქმეშ შესრულება იეჰოვაშ დამსახურება რე; თინა ქვეყნიერებაშ თოლს სუსტ ხალხის გიმირინუანს თე დიდებულ საქმეეფიშ ოკეთებელო. მარა  მუშ რაგად შილებე პირადო ჩქინდე? შეულებნო იეჰოვას გუმამანგარან? მუ ოკო ვაკეთათ თიშ მოხვარაშ მიოღებელო? მორთ გუვარჩუათ სუმ კონკრეტულ მხარე, მუდგაშ გურაფა პავლეშ მაგალითშე შემლებნა.

7. მუ რე ართ-ართ მუდგარენ, მუდგას პავლეშ მაგალითშე ბგურაფლენთ?

⁷ ართ-ართ მუდგარენ, მუდგას პავლეშ მაგალითშე ბგურაფლენთ, თინა რე, ნამდა იეჰოვაშ მსახურებას ჩქინ ძალა დო უნარეფშა ვა ვორდათ დაიმენდებულ. ადამიანურ თვალსაზრისით, პავლეს უღუდ მიზეზ, ჸოფედკო ამაყ დო მუშ დუდშა დაიმენდებულ ადამიან. თიქ ტარსოსის, რომიშ ართ-ართ პროვინციაშ დედაქალაქის, მირდჷ. ტარსოს გავითარებულ ქალაქ რდუ, სოდეთ ხალხ ჯგირ განათლებას ღებულენდჷ. პავლე განათლებულ რდუ. თიქ განათლება მიღჷ თიმ დროს ართ-ართ არძაშ უმოს პატიცემულ იუდეველ წინამძღოლწკუმა, ნამდგას გამალიელ ჯოხოდ (საქ. 5:34; 22:3). თაშ ნამდა, პავლეს დიდ გავლენა უღუდ იუდეველეფ შქას. თიქ თქუ: „ჩქიმ ტომს ბრელ ჩქიმ მახანეფშე უმოსო მიფშჷ წიმი იუდეველობას“ (გალ. 1:13, 14; საქ. 26:4). მარა პავლე მუშ დუდშა ვარდჷ დაიმენდებულ.

8. მუჭოთ ფილიპელეფიშ 3:8-ს ჭარჷ, მუჭო უჯინედ პავლე თი ირფელს, მუთ დათმჷ დო მუშენ ოსიამოვნუდ სისუსტეეფ?

⁸ პავლექ სიამოვნებათ დათმჷ ირფელ, მუდგაშ ჭყოლოფათ ქვეყნიერებაშ თოლს ძალიერ იჸუაფუდ. თის „დიდ გვამო“ მიორჩქუდ თი ირფელ, მუთ ართ დროს უღუდ დო ართ მეჯინათ უპირატესობათ იძირედ (წეკითხით ფილიპელეფიშ 3:8). პავლექ ბრელ მუდგარენ დათმჷ, ნამდა ქრისტეშ მიმაჸუნალ ჸოფედკო. თინა მუშ ხალხიქ გიჯოგუ (საქ. 23:12—14). ხვალე თენა ვარინ, მუშ თანამოქალაქე რომაელეფქ გოლახეს დო ციხეს ქუდახუნეს (საქ. 16:19—24, 37). თეს გეძინელ, თის აწუხენდჷ, ნამდა არასრულყოფილ რდუ დო ოძნელუდ თიშ კეთება, მუთ სწორ რე (რომ. 7:21—25). მარა პავლექ ვართ მოწინააღმდეგეეფს დო ვართ მუშ პირად სისუსტეეფს, ვემეჩჷ უფლება, ნამდა გურქ გუტირხკო. თეშ გინაწონს, თინა იჩიებუდ: „მოსიამოვნ სისუსტეეფ“. მუშენ ფიქრენდჷ პავლე თაშ? მუშენდა, მუჟამსით სუსტ რდუ, თიმწკუმა ორწყედ იეჰოვაშ ძალას მუშ ცხოვრებას (2 კორ. 4:7; 12:10).

9. მუჭო ოკო ვუჯინათ თი ირფელს, მუთ ართ მეჯინათ უპირატესობათ იძირე?

⁹ იეჰოვაშე ძალაშ მეღება ქუმოკონან-და,  ოკო ვეფიფქრათ, ნამდა ფიზიკურ ძალა, განათლება, წარმოშობა ვარდა ქონება გინოჭყვიდუნს, მუსხით ძვირფასეფ ვორეთ იეჰოვაშო. ოკო ვეფიფქრათ, ნამდა თე ირფელიშ ჭყოლოფათ გინიფრთუთ თიცალ პიროვნებათ, ნამუთ იეჰოვას გიმადირთუ. ღორონთიშ მსახურეფშე უმენტაშ ვა რე „კოჩიშ თოლს ბრძენ, ვართ ძალიერ დო ვართ დიდგვარიშ“. თეშ გინაწონს, იეჰოვაქ „ქვეყნიერებაშ სუსტეფ გიშეგორ“ (1 კორ. 1:26, 27). ათეშენ, ჟიშე მოშინაფილ ართ მეჯინათ უპირატესობეფ ვაიღნა-და, ოკო ვეფიფქრათ, ნამდა იეჰოვაშ მსახურება ვეშქალებენა. თეშ მანგიორო, გიღდან დადებით განწყობა დო თქვან მდგომარეობას უჯინით, მუჭოთ შესაძლებლობას, ნამდა იეჰოვაშ ხე ქოძირათ თქვან ცხოვრებას. მაგალთო, შილებე დოშქურდათ, მუჟამსით ოცადნა, ქუდოიჸუნუან დო ბიბლიურ პოზიცია დუგოთმებაფუან. თეცალ დროს ლოცვას ქოთხით იეჰოვას გაბედულება, ნამდა მტკიცას დეცვათ თქვან რწმენა (ეფეს. 6:19, 20). ქრონიკულ ლახალას ქაბრძოლუთ-და, ქოთხით იეჰოვას ძალა, ნამდა მუთ შეილებნან, ირფელ გაკეთათ თიშ მსახურებას. ირო, მუჟამსით ორწყეთ, მუჭო გოხვარნა იეჰოვა, თქვან რწმენა უმოსო იმანგარებ.

10. მუშენ ოკო გუვარჩუათ ებრაელეფიშ 11:32—34-ის მოშინაფილ ართგურ მსახურეფიშ მაგალითეფ?

¹⁰ პავლე გურგედვალირო გურაფლენდჷ წმინდა წერილეფს. თინა გიმირკვიენდჷ ბიბლიას ინოჭარილ ფაქტეფს დო თეწკუმა ართო, ბრელ მუდგარენს გურაფლენდჷ ღორონთიშ თი ართგურ მსახურეფშე, მიდგაშ შემთხვევეფქ ბიბლიას ინიჭარ. მუჟამსით პავლე ებრაელ ქრისტიანეფს ჭარუნდჷ, თინეფს ელუჩ, ნამდა იფიქრესკო ჯვეშ დროს მახორუ იეჰოვაშ ართგურ მსახურეფიშ მაგალითეფშე (წეკითხით ებრაელეფიშ 11:32—34). მორთ გუვარჩუათ ართ-ართ თეცალ პიროვნებაშ, მეფე დავითიშ მაგალით. თიქ ბრელ წინააღმდეგობას შეხვად ხვალე ნტერეფშე ვარინ თინეფშე ხოლო, მით ართ დროს თიშ მეგობრეფ რდეს. დავითიშ მაგალითიშ გარჩიება ქუმოძირანა, მუჭო შილებე გამანგარკო პავლე დავითიშ ცხოვრებაშე დაფიქრებაქ დო ჩქი მუჭო შემლებნა, მივაჸუნათ პავლეშ მაგალითის.

11. მუშენ იძირედ დავით სუსტო? (ქოძირით სურათ გალენ გვერდის)

¹¹ ძალიერ მეომარ გოლიათიშ კარს დავით სუსტო იძირედ. მუჟამსით გოლიათიქ დავით ქოძირ „მუთუნო ვემირჩქინ“ თინა. გოლიათ მეჯინელო დიდ, ჯგირო აღჭურვილ დო მომზადებულ მეომარ რდუ. თეშ გინაწონს, დავით ართ მეჯინათ გამოუცდელ, გლახათ აღჭურვილ დო ჩხუპშო მოუმზადებელ ბაღანა ბოშ რდუ. მარა დავითიქ დამტკიც, ნამდა მუთ ართ მეჯინათ ასუსტენდჷ, სინამდვილეს ძალიერო გინაშქვანდჷ თის. თინა იეჰოვაშ ძალაშა რდუ დაიმენდებულ დო ათეშენ, გიორჯგინ მუშ ნტერს (1 სამ. 17:41—45, 50).

12. ხოლო მუ სირთულეს შეხვად დავითიქ?

¹² დავითის შხვა სირთულეშა ხოლო აფუდ ობრძოლებერ, მუდგაქ შილებე დუდ სუსტო ოგინაფუკო. თინა ართგურო ომსახურუდ საულს, ნამუთ იეჰოვაქ დანიშნჷ ისრაელიშ მეფეთ. საულ დუდშე პატის ცენდჷ დავითის. მარა უკულ გეამაყ დო დავითიშ ონჯარუდ. თინა გლახათ ოქცუდ დავითის დო თიშ ჸვილუას ხოლო ქეცად (1 სამ. 18:6—9, 29; 19:9—11).

13. მუჭო იქციებუდ დავით თიშ უმკუჯინუო, ნამდა საულ უსამართლოთ ოქცუდ თის?

¹³ თიშ უმკუჯინუო, ნამდა მეფე საულ უსამართლოთ ოქცუდ, დავით იშენით პატიცემას გიმირჩქინანდჷ იეჰოვაშ ცხებულ მეფეშ მიმართ (1 სამ. 24:6). თინა იეჰოვას ვაბრალუაფუდ, ნამდა საულ გლახათ ოქცუდ. თეშ გინაწონს, დავით დარწმუნებულ რდუ, ნამდა იეჰოვა ქიმეჩანდჷ ძალას განსაცდელეფიშ გარზებელო (ფსალმ. 18:1, ეპიგრაფი).

14. მუ სიტუაციეფს შეხვად მოციქულ პავლექ, მუნერით დავითის ხოლო უღუდ?

¹⁴ მოციქულ პავლექ ხოლო შეხვად თიცალ სიტუაციას, მუნერით დავითის უღუდ. პავლეშ  ნტერეფ თიშე ბრელით უმოს ძალიერეფ რდეს. ბრელ გავლენიან რელიგიურ დო პოლიტიკურ ლიდერს ჯოგუდ პავლე. ხშირას თინეფ ლახუნდეს დო ციხეს ოხუნუანდეს თის. მუჭოთ დავითის, პავლეს ხოლო გლახათ თი ხალხ ოქცუდ, მით წესით თიშ მეგობარ ოკო ჸოფედკო. ქრისტიანულ კრებას ხოლო, ნამთინე ოწინააღმდეგუდ თის (2 კორ. 12:11; ფილ. 3:18). მარა პავლექ გიორჯგინ არძას, მით თის ონტერუდ. მუჭო აკეთ თენა? წინააღმდეგობაშ უმკუჯინუო, თინა აგრძელენდჷ ქადაგებას. პავლე და დო ჯიმალეფიშ ართგურ სქიდუდ თიმწკუმა ხოლო, მუჟამსით გურს ელაჭუანდეს. მუთ არძაშ უმოს მნიშვნელოვან რე, თიქ სიცოცხლეშ ბოლოშა იეჰოვაშ ართგურქ ქუდოსქიდ (2 ტიმ. 4:8). თე ირფელ, პავლეს მუშ უნარ დო ძალაქ ვარინ, იეჰოვაშა მენდებაქ ოკეთებაფუ.

15. მუ რე თქვან მიზან დო მუჭო შეილებნა თიშ მეჭირნაფა?

¹⁵ ხომ ვეშეხვადუთ თანაკლასელეფშე, თანამშრომლეფშე ვარდა იეჰოვაშ მოწმე ვარენ ფერ ოჯახიშ წევრეფშე შეურაცხყოფას ვარდა თხოზინს? დღას გლახათ ქუმუქციებინნო თქვანდა თანაქრისტიანს? თაშ ქორენ-და, რშუდან დავით დო პავლე. თქვა შეილებნა ჯგირით გიორჯგინათ უბადობას (რომ. 12:21). მუჟამსით ნტერეფ მოწინააღმდეგნა, ჩქი თეშ ვა ვობრძოლუთ თინეფს, მუჭოთ დავითიქ ებრძოლ გოლიათის. ჩქი უბადობას თით გივორჯგინანთ, ნამდა ვოცადუთ ხალხის იეჰოვაშ დო ბიბლიაშ გურშენ მეტიშ გაგებას მივეხვარათ. თე მიზანიშ მეჭირნაფა შეგალებენა, მუჟამსით ადამიანეფს ბიბლიაშა გერსხილ პასუხეფს ქიმეჩანთ, პატიცემას გეგმირჩქინანთ დო ჯგირო მექციებუთ თინეფს ხოლო, მით გლახათ გოქცუნა დო ჯგირს გუკეთენთ არძას, თინეფ შქას ნტერეფს ხოლო (მათ. 5:44; 1 პეტ. 3:15—17).

16, 17. მუ ვა გოჭყოლად დღას პავლეს?

¹⁶ სოიშახ მოციქულ პავლე ქრისტეშ მოწაფეთ გინირთუდ, თინა შეურაცხყოფას მიორინუანდჷ დო თხოზუდ ქრისტიანეფს (საქ. 7:58; 1 ტიმ. 1:13). იესოქ გაჩერ პავლე, ნამდგას თეიშახ სავლე ჯოხოდ, მუჟამსით კრებაშა თავდასხმას აპირენდჷ. იესოქ ზეცაშე დურაგადუ პავლეს დო თოლსინთე მიდუღ თის. თოლსინთეშ დართინაფალო პავლეს მოხვარაქ თინეფშა აჸუ ოთხუალქ, მიდგას თეიშახ თხოზუდ. თიქ თანდაბლურო მიღჷ მოხვარა მოწაფე ანანიაშე,  ნამდგაქ თოლსინთე დურთინუ (საქ. 9:3—9, 17, 18).

¹⁷ მართალ რე, უმოს გვიანო პავლექ კრებას დაფასებულ პიროვნებათ გინირთჷ, მარა თის დღას ვა გოჭყოლად გაკვეთილ, ნამუთ იესოქ დამასკოშ შარას დაგურუ. პავლე ირიათო თანდაბლობას გიმირჩქინანდჷ დო ხიოლით ღებულენდჷ და დო ჯიმალეფშე მოხვარას. თინა თანდაბლურო აღიარენდჷ, ნამდა თანაქრისტიანეფ თიშ „გუმამანგარებელეფ“ რდეს (კოლ. 4:10, 11).

18. მუშენ შილებე გამჭირდან შხვეფშე მოხვარაშ მეღებაქ?

¹⁸ მუშ გურაფა შემლებნა პავლეშე? მუჟამსით პირველო დიბჭყით იეჰოვაშ ხალხწკუმა ურთიერთობა, შილებე ხიოლით ბღებულენდით მოხვარას შხვეფშე, მუშენდა მარჩქილედეს, ნამდა სულიერ გაგებათ ბაღანეფ ვორდით დო ბრელ მუდგარენ მაფდეს დაგურაფალ (1 კორ. 3:1, 2). მარა მუს ფთქუანდით ასე? შილებე ბრელ წანა რე, ვომსახურუთ იეჰოვას დო დიდ გამოცდილება მიბღით. ათეშენ, შილებე გამჭირდან შხვეფშე მოხვარაშ მეღებაქ, განსაკუთრებით თინეფშე, მით ჩქინდე ნაკლებ ხან რე, ჭეშმარიტებას რენა. მარა იეჰოვა ხშირას ზუსტას და დო ჯიმალეფს გიმირინუანს ჩქინ გამანგარებელო (რომ. 1:11, 12). თაშ ნამდა, იეჰოვაშე ძალაშ მეღება ქუმოკონან-და, ოკო მიბღათ მოხვარა და დო ჯიმალეფშე.

19. მუშენ რდუ პავლე წარმატებულ?

¹⁹ თიშ უკულ, მუთ ქრისტიანო გინირთჷ, პავლექ ბრელ მნიშვნელოვან საქმე აკეთ. მუქ შეიოლებაფუ თენა? პავლექ დიგურუ, ნამდა წარმატებაშ მეჭირნაფა, პიროვნებაშ ძალაშა, განათლებაშა, ქონებაშა ვარდა წარმოშობაშა ვარინ, თანდაბლობა დო იეჰოვაშა მენდებაშა რე დამოკიდებულ. მორთ მივაჸუნათ პავლეშ მაგალითის დო 1) იეჰოვაშა ვორდათ დაიმენდებულ, 2) ქიდიბგურუათ ბიბლიას მოჩამილ მაგალითეფშე დო 3) მიბღათ მოხვარა თანაქრისტიანეფშე. თაშ ქიმიფქციებუთ-და, მუდგა სუსტას ვა ბგინაფლენდათ დუდის, იეჰოვა გუმამანგარენა!