1. Ino raha nikeny apostoly Paoly?

APOSTOLY Paoly nan̈eky fa ndraikindraiky izy nahatsiaro malemy na tsisy angovo. Nivolan̈a izy fa “nahaihaosa” ain̈inany. Izy koa ho izy nila niady mare baka hahavita han̈ano raha tsara. Nisy lera koa tsy arakaraka raha nantin̈ainy fomba namaliany Jehovah vavakanany. (2 Kor. 4:16; 12:7-9; Rom. 7:21-23) Nivolan̈a koa Paoly fa olo malemy * fahitanolo nan̈enjiky izy aby io izy. Sosoko zen̈y koa, izy tsy lavorary. Fa raha jiaby zen̈y tsy nambelany hahavy izy hieritreritry fa izy tsisy dikany.—2 Kor. 10:10-12, 17, 18.

2. Izikoa 2 Korintianina 12:9, 10 zahan̈a, ino raha maventy nianarany Paoly?

² Ty raha maventy nianarany Paoly: Olo araiky ndray mahatsiaro malemy, izy mety hatanjaka fo. (Vakia 2 Korintianina 12:9, 10.) Ho Jehovah taminany: “Anao koa malemy, aminin̈y edy angovonaka miasa aminao amy fomba feno.” Dikanizen̈y, Paoly koa fa tsisy angovo, Jehovah nan̈amia izy angovo nilainy. Alô zahavantsika nan̈ino atsika tsy tokony hiasaloha be izikoa fa misy olo manihitihy na tsy man̈isy fotiny atsika.

3. Nan̈ino ma atsika ravoravo fo ndray tihitihinolo?

³ Tsisy olo tian̈a tihitihin̈a zen̈y. Fa izikoa kila volandratsy ataonolo amintsika zay ataontsika mampiasaloha atsika, ho rivan̈a edy atsika. (Ohab. 24:10) Akory fo basy tokony hataontsika? Karaha nataony Paoly in̈y, atsika tokony ho ‘ravoravo fo ndray tihitihinolo.’ (2 Kor. 12:10) Fotony matoa atsika tihitihinolo na injehinolo, dikanizen̈y atsika ten̈a pan̈aradia Jesosy. (1 Pet. 4:14) Jesosy lastio efa nivolan̈a fa zay olo man̈aradia izy tsy maintsy injehin̈y. (Jaona 15:18-20) Karaha zen̈y tamy taonjato voanalohany. Olo nan̈araka kolontsain̈y griky nihevitry fa Kristianin̈y zen̈y olo bahara ndreky olo ambany. Tamindro Jiosy aby io ndraiky, ‘olo tsy dia nahita fianaran̈a’ fahitandro iro Kristianin̈y aby io, an̈isanizen̈y apostoly Petera ndreky Jaona. (Asa. 4:13) Fahitany fiarahamonin̈y iro Kristianin̈y aby io, olo ambany ndreky tsisy fiarovan̈a, fotony iro tsy nan̈ano politiky, iro tsy nan̈eky nan̈ano maramila, baka io iro tsy najainolo foeky.

4. Akory nataondro Kristianin̈y tamy taonjato voanalohany, izikoa fa tsy nasianolo fotiny?

⁴ Tsy voly nanompo Jehovah foeky iro Kristianin̈y voanalohany aby io ndray tsy nasianolo fotiny. Voninahitry lastio fahitany apostoly Petera ndreky Jaona fan̈injehan̈a nahazo iro zen̈y, ke ravoravo mare iro ndray ninjehin̈y fotony nan̈aradia Jesosy ndreky nampianatra olo raha momba izy. (Asa. 4:18-21; 5:27-29, 40-42) Sady tsisy raha tokony ho nampamen̈atra iro! Fotony iro ten̈a nan̈ano raha han̈ampian̈a olo, mandilatra iro olo nanohitry ndreky tsy nan̈isy fotiny iro in̈y. Diniha hely baka! Mbala mahatsara olo antapitrisany, firaka iziô, boky amy Baiboly nisoratiny sasany tamindro sady man̈ampy olo han̈anten̈a raha tsara. Tsy zen̈y fo fa, efa manjaka andan̈itry an̈y koa Fanjakan̈a nitoriandro in̈y, sady tsy ho ela izio hanjaka amy tany jiaby! (Mat. 24:14) Akory nifaran̈any fitondrasan̈a natanjaka be nan̈enjiky iro Kristianin̈y aby in̈y? Tsy ravan̈a va? Iro Kristianin̈y tsy nivadiky aby io ndraiky nanjary panjaka andan̈itry an̈y. Iro olo nanohitry aby in̈y efa naty, ary ndray iro hivilomin̈y amy Paradisa, iro hanjary vahoakany Fanjakan̈a nitoriandro Kristianin̈y tsy tiandro be aby in̈y.—Apok. 5:10.

5. Koa zahan̈a Jaona 15:19, nan̈ino ma atsika tsy asianolo fotiny?

⁵ Amy zioty koa, misy olo tsy man̈isy fotiny atsika Vavolombelon̈o Jehovah, fotony iro mihevitry atsika bahara ndreky malemy. Ino antony? Fotony toetsain̈intsika tsy mira amy nindro foeky. Atsika mifen̈y hanetry ten̈a ndreky han̈araka volan̈a Zan̈ahary. Fa olo amy donia ty ndraiky poerapoera, man̈ambony ten̈a sady tsy man̈eky fahifan̈a. Fan̈ampinizen̈y koa, atsika tsy man̈ano politiky foeky sady tsy man̈ano maramila. Olo ambany fahitandro atsika, fotony atsika tsy man̈ano raha fataondro.—Vakia Jaona 15:19; Rom. 12:2.

6. Ino asa maventy ampiasany Jehovah olonany?

⁶ Ndray karakory fiheveranolo atsika, atsika ny ampiasainy Jehovah han̈ano asa maventy, an̈isanizen̈y asa fitorian̈a. Sady mbala tsiary nisy asa fitorian̈a bebenilay ataontsika amiziô io, letrizay! Avahizo, gazety aboakantsika panompony Jehovah ny ten̈a avoadika amy volan̈a maro ndreky ten̈a rasain̈a amy tany maro erantany. Mampiasa Baiboly koa atsika han̈ampian̈a olo antapitrisany hanan̈a fiain̈ana mahafapo rango iziô. Baka amy Jehovah ahavitan̈a raha jiaby zen̈y. Olo hiveriny donia ty ho tsisy dikany edy hampiasainy han̈ano asa maventy aby zen̈y. Akory fo basy atsika tsiaraikiaraiky? Vitany Jehovah  man̈amia angovo atsika. Ke ino basy raha mila ataontsika baka atsika hampiany? Alô atsika handiniky raha telo mety ianarantsika baka aminy apostoly Paoly.

7. Ino raha ianarantsika baka amy Paoly?

⁷ Ty raha ianarantsika baka amy Paoly: Fanompoan̈a Jehovah tsy hitoraon̈ana angovo na fahaizan̈a. Izikoa dinihin̈y raha niain̈any Paoly, maro raha mety nahavy izy ho poerapoera ndreky hatoky ten̈a mare! Tarsosy tany faviany Paoly; izio kapitaliny faritany romanin̈y. Nandroso be tanàna io. Tao koa nisy iniversite farany nalaza tamy zen̈y. Nahita fianaran̈a Paoly, fotony izy nampianariny Gamaliela, olo an̈abo sady an̈isany ten̈a najainy jiosy tamy fotoan̈a zen̈y. (Asa. 5:34; 22:3) Olo maventy tamy fiarahamonin̈y koa Paoly. ‘Tafiditry lalin̈y tamy fivavahan̈a jiosy’ koa izy ho izy, ‘mandilatra ankamarozanolo nitovy taon̈o taminany ndreky karazan̈a araiky taminany.’ (Gal. 1:13, 14; Asa. 26:4) Fa zen̈y tsy nahavy Paoly hitôron̈o angovonany na fahaizan̈anany.

8. Koa Filipianina 3:8 zahan̈a, karakory ma fahitany Paoly raha nialàny aby io? Nan̈ino izy ravoravo fo ndray tamy fotoan̈any izy nalemy?

⁸ Tsisy dikany tamy Paoly foeky niala raha nety nahavy izy najainolo. Mira “fako” fahitany raha aby io. (Vakia Filipianina 3:8.) Maro raha sarotro niaretany, izy koa fa nan̈aradia Kristy. Izy halanolo firenena araiky taminany. (Asa. 23:12-14) Izy koa nipopohindro Romanin̈y aby io ndreky nigadraindro, kanefa izy nanan̈a zòmpirenena romanin̈y. (Asa. 16:19-24, 37) Tsapany fa sarotro taminany koa nan̈ano ny tsara, fotony izy tsy lavorary. (Rom. 7:21-25) Fa na ino na ino raha tsapany Paoly ndreky raha sarotro niaretany, izy tsy voly nan̈aradia Kristy. Ndray izy aby “ravoravo fo.” Fotony hainy fa amy fotoan̈any izy nalemy na tsisy angovo in̈y, aminin̈y edy Jehovah ten̈a nan̈ampy izy.—2 Kor. 4:7; 12:10.

9. Ino aby raha mety hahavy atsika hatsapaten̈a ho “malemy”? Karakory tokony fiheverantsika raha aby zen̈y?

⁹ Izikoa atsika tihahazo fan̈ampian̈a baka amy Jehovah, atsika tsy tokony hieritreritry fa baka amy fahasalaman̈antsika, na fianaran̈a  vitantsika, na tany faviantsika, na fanan̈anantsika mahavy atsika hampiasainy Jehovah ndreky misy valerany aminany. Salakady ny marin̈y aminany ane, tsy maro amy panompony Jehovah ‘nahita fianaran̈a na taranaka andriana na manandraha be’ zen̈y! Iro olo hiveriny donia ty “malemy” na tsisy dikany edy ampiasainy Jehovah. (1 Kor. 1:26, 27) Ke ndray tsy anan̈anao raha aby voakoran̈a tio in̈y, anao afaka manompo Jehovah fo. Lafintsarandraha fo zahava. Ndray tsy han̈isy fotiny anao koa olo amy donia ty, aza adin̈a fa, amy leranizen̈y edy Jehovah ten̈a han̈ampy anao. Ke izikoa anao mavozo fotony misy olo man̈aratsy raha inoanao, mivavaha amy Jehovah baka izy han̈ampy anao hasaky hiaro finoan̈anao. (Efes. 6:19, 20) Anao ndraiky koa miaritry fotony marary mare, mivavaha baka Jehovah han̈amia angovo ilainao hanohizan̈a fanompoan̈a izy. Hahaihahazo angovo ndreky ho fatatra finoan̈a fo anao, isaka anao mahita fomba an̈ampiany Jehovah anao.

10. Nan̈ino ma atsika tokony handiniky raha nataondro panompony Jehovah koran̈iny Hebreo 11:32-34 ao?

¹⁰ Nazoto mare Paoly nianatra Soratra Masin̈y, ke maro raha nianarany momba panompony Jehovah tsy nivadiky. Izy koa fa nanoratra tamy Kristianin̈y hebreo, izy nan̈iraka iro handiniky modeliny panompony Jehovah taloha tan̈y. (Vakia Hebreo 11:32-34.) Araiky amindro zen̈y Panjaka Davida. Niatriky fan̈injehan̈a izy. Samy nan̈enjiky izy aby, na fahavalonany zen̈y na iro olo niritriretiny ho naman̈a. Alô baka hidinihintsika raha nataony Davida, amy zen̈y ho hitantsika nan̈ino izio ten̈a nan̈ampy Paoly, avio akory hangalantsika tahaka Paoly.

11. Karaha tsisy kabaro fahitan̈a Davida, ino antony? (Zahava sary amy fon̈ony gazety ty.)

¹¹ Tandraraiky, Davida nandeha niady tamy maramila matanjaka be, Goliata an̈arany. Malemy sady tsisy dikany fahitany Goliata io Davida, ke tsy nasiany fotiny foeky izy. Goliata lastio ronjany be, zatra ady, sady ampy fitaovan̈a. Davida ndraiky manafolahy hely, tsy zatra ady sady tsisy fitaovan̈a. Karaha tsisy kabaro fahitan̈a izy, kanefa izy ten̈a natanjaka fotony natoky Jehovah. Namiany Jehovah angovo izy, ke Goliata resiny.—1 Sam. 17:41-45, 50.

12. Ino koa raha hafa niaretany Davida?

¹² Nisy raha hafa koa niaretany Davida ke nahavy izy nieritreritry fa izy malemy na tsisy dikany. Izy tamy zen̈y niasa tamy Saoly, panjaka nifidiny Jehovah nitondra Israely. Tamy voanalohany, panjaka Saoly ten̈a nan̈aja Davida. Fa izikoa fa nandeha fotoan̈a, Saoly nan̈ambony ten̈a, ke izy nanjary be fô Davida. Nanjary niova mare fitondrasany Saoly i Davida; ke efa tihivoneny foeky Davida.—1 Sam. 18:6-9, 29; 19:9-11.

13. Ino raha nataony Davida, ndray tsy rariny fomba nitondrasany Panjaka Saoly izy?

¹³ Ndray tsy rariny raha nataony Saoly taminany, mbala najainy Davida fo panjaka nifidiny Jehovah io. (1 Sam. 24:6) Davida tsy nan̈amia tsin̈y Jehovah tamy raha ratsy nataony Saoly. Efa angovo baka amy Jehovah edy nitavandrainy han̈ampy izy hiaritry zen̈y.—Sal. 18:1 ndreky volan̈a mampiditry toko io.

14. Miramiran̈a fo raha niaretany Davida ndreky Paoly. Ino ohatra?

¹⁴ Niatriky raha sarotro miramiran̈a amy raha niaretany Davida koa apostoly Paoly. Iro olo nanohitry Paoly aby io tsy vitany naro fa natanjaka koa, an̈isanizen̈y iro manampahifan̈a pitondra tamy zen̈y. Matetiky izy nipopohindro ndreky nampidirindro  tamy prizon. Karaha Davida, olo tokony ho namany ndraiky nanjary nivadiky taminany. Firaka olo sasany tan̈ivony fiangonan̈a mbala nanohitry izy fo. (2 Kor. 12:11; Fil. 3:18) Fa vitany Paoly fo nandresy iro olo nanohitry izy aby io. Amy karakory? Ndray tio fanoheran̈a, izy nitory fo. Nampalahelo izy raha nataondro piaramanompo taminany aby io, fa ndray zen̈y, nitiaviny fo iro. Fa ny ten̈a maventy, izy tsy nivadiky tamy Jehovah foeky firaka tamy farany. (2 Tim. 4:8) Vitany nan̈ano raha aby zen̈y, fotony izy tsy nitôron̈o angovo na fahaizan̈anany, fa izy nitavandra Jehovah fo.

15. Ino ma tanjon̈onao, avio akory havitanao zen̈y?

¹⁵ Misy olo lekoly araiky aminao, na miaraka miasa aminao, na havanao tsy Vavolombelon̈o ma man̈aratsy na man̈enjiky anao? Sa misy piaramanompo nan̈ano raha tsy rariny taminao? Izikoa zen̈y, tsarova Davida ndreky Paoly, ke ‘risia amy tsara fo ny ratsy.’ (Rom. 12:21) Aleva onon̈o fa tanjon̈onao: Han̈ampy olo hahay Jehovah ndreky raha koran̈iny Baiboly fa tsy hiady aminany karaha nataony Davida tamy Goliata in̈y. Akory ma havitanao zen̈y? Ampiasà Baiboly izikoa fa mamaly fan̈ontanian̈anolo. Mila man̈aja olo ndreky tsara fan̈ahy fo anao, ndray anao tsy tianolo io na tsy hasiany fotiny.—Mat. 5:44; 1 Pet. 3:15-17.

16-17. Ino raha tsy nadin̈any Paoly foeky?

¹⁶ Talohany apostoly Paoly nanjary pianatra Kristy, izy tsy nan̈isy fotiny olo foeky, sady nan̈enjiky pan̈aradiany Jesosy. Mbala Saoly an̈aranany tamy zen̈y. (Asa. 7:58; 1 Tim. 1:13) Paoly koa fa tapakevitry hampijaly fiangonan̈a kristianin̈y, Jesosy foeky nisakana izy. Jesosy taminio efa tandan̈itry. Izy nikoran̈a tamy Paoly, baka io nataony jamba Paoly. Tsy maintsy nitady fan̈ampian̈a taminolo aby ninjehiny aby in̈y Paoly, izikoa tihahita ndraiky. Paoly koa fa nanetry ten̈a ndreky nan̈eky nampiany Ananiasy, nanjary nahita ndraiky izy.—Asa. 9:3-9, 17, 18.

¹⁷ Tafara tatỳ, Paoly nanjary nahazo andraikitry maventy tan̈ivony fiangonan̈a kristianin̈y.  Kanefa, tsy nadin̈any foeky raha nampianariny Jesosy taminizy tamy lalan̈a nengo ta Damaskosy. Paoly nanetry ten̈a fo, sady nan̈eky fan̈ampian̈a baka tamindro piaramanompo aby io. Ten̈a tsapany fa iro “nan̈ampy sady nankahery” izy.—Kol. 4:10, 11.

18. Nan̈ino mety tsy ho mora amintsika man̈eky fan̈ampian̈a, ndraikindraiky?

¹⁸ Ino raha ianarantsika baka amy Paoly? Taminy atsika vo nanomboko nianatra Baiboly tamy vahoakany Jehovah, atsika mety mora nan̈eky ampian̈a. Mety nahatsapaten̈a mira tsaiky atsika, ke tontohitry fa mbala maro raha tokony hianarantsika. (1 Kor. 3:1, 2) Karakory ndraiky atsika iziô? Mety efa elaela baka nanompoantsika Jehovah zay. Mety efa maro koa raha haintsika, ke mety tsy ho mora amintsika eky han̈eky fan̈ampian̈a, intsaka eky izikoa olo mifen̈y man̈ampy atsika io tsendriky ela nahitan̈a fahamarin̈ana. Aleva onon̈o fa matetiky Jehovah mampiasa piaramanompo hankahirezan̈a atsika. (Rom. 1:11, 12) Hahazo angovo baka aminany edy atsika izikoa man̈eky zen̈y.

19. Nan̈ino Paoly nahavita raha maro tsara?

¹⁹ Maro raha tsara vitany Paoly, tafaranizy nanjary Kristianin̈y. Nan̈ino? Fotony nianarany fa tsy hahavita raha tsara foeky olo araiky izikoa mitôron̈o angovonany tompiny, na diplaomy anan̈any, ndreky fanan̈ananany, baka io fehitrinany. Mila manetry ten̈a ndreky mitavandra Jehovah fo izy izikoa tihahavita raha tsara maro. Irarian̈a atsika tsiaraikiaraiky hangala tahaka Paoly ke 1) hitavandra Jehovah, ndreky 2) hazoto hianatra ohatranolo amy Baiboly ao, baka io 3) han̈eky fan̈ampian̈a baka amy piaramanompo. Izikoa atsika man̈ano zen̈y, hamezany Jehovah angovo edy atsika, ndray mahatsiaro efa karaha tsisy angovo!