1. Ginipai gu mokedi nangia Pauro arugutiko na ni ziazia?

GU MOKEDI nangia Pauro aima rugatiko na gupai ziazia nga aregbo anidu kinaho ko anidu rurungbura. Ko ape gupai ni rengo nga kpotoko ‘aazirã,’ na ko anaamanga asadatise amanga tipa ka manga gupai duni ruruhe, na Yekova anaakaraganga pai kuti ga Pauro akparakpee ti aregbo dunduko kina wai Pauro anaaidaha te. (2 Kor. 4:16; 12:7-9; Rom. 7:21-23) Pauro aima ino gupai a nga asogoko anaabi ko ni rurungbura boro. * Ono ko aambunga gu gbegberẽ bipai nga ga aboro watadu gako arungbura si sa gupai nga ko naabi tiko nga sunge tiko te te.—2 Kor. 10:10-12, 17, 18.

2. Ringbisihe kuti 2 AKorindo 12:9, 10, gini nyanyakipa pai Pauro awirikihe?

² Pauro aima wirika nyanyakipa pai nga—boro ima rengba kadu nyanyaki zavura ho du ni ni rurungbura. (Oni gedi 2 AKorindo 12:9, 10.) Yekova agumba gupai fu Pauro nga, Gako “tandu du ni mbakadimbakadi he ziazia rogo rungbura yo,” nayugo gupai nga Yekova arengbe ka fu gu ome fu Pauro nga gu naadunga ti ko ya. Ni bambataha, ani bingo ndu gupai si aidanga rago gberẽ ti ni tirani ho asogorani agumba gbegberẽ afugo ni furani ya.

3. Tipagine rengbe ani ka ngi ti ni mbiko gu gbegberẽ afugo aboro apekaha furani?

³ Boro ho dagbarani yo naida gupai nga i naagumba gbegberẽ afugo funi te. Ono tie, ka si du nga avurarani napeka gbegberẽ afugo furani ani kini tona kaa bakabangirani tipa gupai i agumbaha,  ani ima rengba kadu na gberãrago. (Snz. 24:10) Wai du tie si aida ani naabi gu gbegberẽ afugo nga ga asogorani? Wakina Pauro, ani ima rengba ka “ngi mbiko gu gbegberẽ afugo” aboro apekaha furani. (2 Kor. 12:10, NW) Tipagine? Bambiko ho aboro apeka gbegberẽ afugo ni furani na kini sogo rani, si nayugo gupai nga ani nga ndikidi ga Yesu abawiriki. (1 Pet. 4:14) Yesu ape gupai nga i nika rungosi apefuoko arungosi. (Yo. 15:18-20) Gupai re aima du ni rengo rogo bambata sa kama agarã. Ti gu regbo re, agu aboro gu sino mangaapai nga ga aGiriki adu na maapai kuriyo, i anaabi aKristano wa ka i ya i angia mumungo aboro na ni rurungbura yo. Na dagba aYudo yo, i anaabi aKristano ni agu aboro ‘naadunga ni tatamana tatamana aboro na ni airainahe ya,’ wa agu amokedi nangia aPetero na Yoane. (Amo. 4:13) AKristano anaangera wa ka i ya i angia rurungbura aboro, i aarimisongo tiyo ku rogo agu apai nga ga birĩ-zogarago tipa kadu na maapai kurii zogorago te, na i aadunga na gu ome nga ga riivura beyo a te, na aboro anaabingo yo na irisa te.

4. Waigu agu aKristano naadu mbata amangipai kuti gu iraira bipai asogoyo adu na ni tipa yo?

⁴ Ya mo agu aKristano naadu mbata kusayo re ambu gu iraira bipai asogoyo adu na ni tipa yo si rugusi yo ti du ni ga Yesu abawiriki na ti sunge tungusapai? Oó. Ni kpiapai, agu amokedi nangia aPetero na Yoane aabihe nga pa momu du nangiaha i rungosiyo tipa pa peka yo fuo Yesu gbiati yugopai fu kura aboro tipa ko. (Amo. 4:18-21; 5:27-29, 40-42) Ndupai aadunga ho be abawiriki tipa kadu na zee te. Wa si avura du nga aboro anaabingo agu aKristano naadu rogo bambata sa kama agarã re na irisa te, i aima manga badungu apai tipa ka undo kura aboro. Ni kpiapai, agu abuku nga ga Ziazia Kekeapai bete agu aKristano re akekehe naundo amirioni aboro kindi na kini fu maabangirise fuyo. Na gu Kindo i aatungusapai tipaha nazogarago awere ngbangbaturũ yo na si nika zoga ngbatunga aboro dunduko barambeda. (Mt. 24:14) Ono gu zogarago nangia ga Roma bakuru kusayo nga gu naadu na bakere ome ti ni aanyenga tipa dungu agarã te. Kurigure, gu ruru abawiriki re nga abakindo awere ngbangbaturũ yo, ono tie, asogoyo aima kpiko; na ka si du nga i azingisa yo be kpio, i nika ngia avuru gu Kindo agu aKristano i anaasoga yo aatungusa paha.—Yugo. 5:10.

5. Ringbisihe kuti Yoane 15:19, tipagine aboro abi ga Yekova aboro ti ni na payo kusende?

⁵ Areme, wangia ani ga Yekova aboro, kura aregbo kinaho aboro abi rani nga sunge tirani te, kini sawia rani nga ani ni mumungo aboro na ni rurungbura rani. Tipagine? Bambiko ani na agu abipai nga ga agu aboro du pati rani te. Ani naˈasada kadu ni aboro umbasitise, kadu ni bayee rani, na kadu ni aboro giasangba. Ono tie, aboro areme natambua kina airarukö gbiati airasamungu. Kurigure, ani arimisongo tirani ku rogo agu apai nga ga birĩ zogarago te, na ani arimisongo tirani ku rogo sunge abanzengere rogo ai ringara te. Ani kia ti agu aboro du rogo zegino areme, sidu, i nabihe nga parani kusende ti ga kura aboro.—Oni gedi Yoane 15:19; Rom. 12:2.

6. Ginipai Yekova amangaha na gako aboro?

⁶ Wa vura duhe nga agu aboro du rogo zegino naberã gupai nga ani nga rurungbura aboro, Yekova namangasunge na ani tipa ani mangi bakere apai. Ko nasa sunge tungusapai si mangi ni bakerehe gbe awere auru kpotosende kisusi gu niidu mbata. Gako amoyambu areme nakusa amagazini nga gu i asaha ku rogo afugo na kini kparakaha kisusi kura amagazini dunduko auru kpotosende, na i namangasunge na Ziazia Kekeapai tipa ka undo amirioni aboro tipa i mbakadi gayo raka. Yekova du nasa gipai re si mangi. Ko namangasunge na umba badona aboro nga aguyo zegino abiyo wa i ni  rurungbura yo tipa ka manga gi bakere asunge re. Ono ginipai tie du tipa rani wa du ani ni basasa dunduko? Ya mo Yekova rengbe ka undo rani ani du nyanyaki? Kangia wo duhe, ginipai rengbe ani ka mangaha tipa ka gbia gako undo? Ani furanga awere tipa apai biata nga gu rengbe ani ka wirikaha ti gu kpiapai gu mokedi nangia Pauro amoihe.

7. Ginipai du sa dagba agu apai yo ani awirikaha ti gu kpiapai nangia ga Pauro?

⁷ Pai sa dagba agu apai yo ani awirikaha ti ga Pauro kpiapai nga: Ka mo kidongo kuti gamo ome watadu gamo tandu mangaapai ho mo amangasunge ni fu Yekova ya. Ringbisihe kuti gu bipai nga ga aboro, Pauro aima rengba kadu na ndupai beko kadu ni boro rukö, na kini kido kuti tiko. Ko asono Taruseu yo, nga gu bakere gbata nangia ga gu rago nga Kirikia, Roma yo. Taruseu angia kumukokumuko rago, na si adu na bakere yunivasiti rogoho badungu aboro aima inopai tipaha. Pauro aima wirikapai wenengai—gu kumba nayugupai fu Pauro rimoko angia Gamariere, ko angia boro sa dagba agu abarumbatayo nga ga aYudo yo aboro anaairisa yo ni kerehe kisusi ti rago Pauro. (Amo. 5:34; 22:3) Na ti kura regbo sa, Pauro aima du na maapai kurii aboro rogo gu dagbarago nangia ga aYudo. Ko aya: ‘Mi asusi agu yo asusa ni dungu yo garãyo arengbe na gimi dagba ngbatungarani rogo ga aYudo dini yo.’ (Gara. 1:13, 14; Amo. 26:4) Ono Pauro aakidongo kuti tiko te.

8. Ringbisihe kuti AFiripoio 3:8, waigu Pauro anaabi agu ahe ko ambupaha, na tipagine ko ‘anaangi ti ni mbiko agu apai ko arungbura ti ni’?

⁸ Pauro adu na ngbarago ka mbupa agu ahe naasako ko naangera na nyanyakipa ko fu aboro. Ko arugutiko na gupai nga agu ahe naadu beko mbata re adu “wa kina mirĩ ahe.” (Oni gedi AFiripoio 3:8) Pauro aima gbiatiko na badungu akpakarapai mbiko gupai nga ko ada ni gu boro naapekafuo Kristo. Avuru gako ringara anaasoga ko asoga. (Amo. 23:12-14) Gako avuru ringara nangia aRomo ata ko na ki bako ku bambukiso yo. (Amo. 16:19-24, 37) Kurigure, Pauro aima rugatiko a na gupai nga ko angia kpakpa boro na si aima du ni ba mbumbuhe fuko ka manga gupai du ni ruruhe. (Rom. 7:21-25) Ono ko aambunga pekafuo Kristo mbiko gupai nga kura aboro aasoga ko watadu mbiko gupai nga ko anaamanga aingahe te. Kuba gure, ko  ‘anaangi angi mbiko agu apai ko arungbura ti ni.’ Tipagine? Bambiko gupai nga ho ko anidu ni rurungbura, gu regbo re du ko anaabi wai Mbori anaaundo ko.—2 Kor. 4:7; 12:10.

9. Ginipai si aida mo tingidihe ho adunga mo ni na agu ahe bero nasa aboro na nyanyakipa yo rogo zegino ya?

⁹ Ka ani aida ka gbia ome be Yekova, ka ani berẽnga gupai nga gu ome nga ga kpotose, wirikapai, wai i asonosi rani, watadu kumuko rengbe ka yugo pa wai du ani na nyanyaki parani ya. Anga agi apai re du nasarani na nyanyakipa rani fu Yekova te. Dagba ga Mbori aboro, “agu yo du na tatamana wa du pa borose ni dungu yo te, agu yo nga bahe ni dungu yo te, agu yo nga irisiirisi yo ni dungu yo te.” Ono Yekova ima sia ka mangasunge na “gu rurungbura ahe nga ga zegino.” (1 Kor. 1:26, 27) Sidu, ka mo avuranga du na agu ahe bero i nagumbapaha ti tonatona gi genewaraga re ya, mo ima rengba ka mangasunge fu Yekova. Mo du na ruru bipai tipa gupai du tipa ro. Waigu rengbe mo ka manga gupai re? Mo tingidi gupai nga ho adunga mo ni na agu ahe bero nasa aboro na nyanyakipa yo rogo zegino ya, mo nika du na rengba ka bi wai Yekova afu ome foro. Ni kpiapai, ka mo agunde be agu aboro naˈasada ka saro mo du na kapa tipa gamo aida, mo kpari fu Yekova ko fu wingbaduse foro ho mo asongoda pai ni ku bara gamo idapase yo. (Ef. 6:19, 20) Ka mo agbia tiro na akpakarapai mbiko gupai nga mo na bangabanga kaza tiro, mo sana Yekova ko fu gu ome foro mo aidaha tipa kaa manga gako sunge kindi wa rengbe omero na ni. Ai gu regbo mo abi Yekova ko niundo ro, gamo idapase nasona na mo nadu nyanyaki gbe.

10. Tipagine si aida ani wisigi agu akpiapai ti ni nga ga gu ruru airisi Yekova du payo rogo Ziazia Kekeapai yo, wa aguyo i nagumba payo rogo AEbere 11:32-34?

¹⁰ Pauro anaawisigo Ziazia Kekeapai dedede. Ko aima wirika badungu arengo, ono ko aima wirikapai a be agu akpiapai nga ga agu aboro du gayo apangbanga ni kekehe rogo Fugo Mbori yo. Ho Pauro aakepai ni fu agu aKristano nangia aEbere, ko asana yo tipa i berẽpa agu akpiapai gu ruru airisi Yekova naadu mbata amoihe. (Oni gedi AEbere 11:32-34.) Ani sakingo pai tipa gu ni sa nga Bakindo Davide. Anga kina avurako sa naasoga ko te, ono zavura agu aboro naadu mbata ni abakureako a. Wa ani nikaa bi gu kpiapai nga ga Davide, ani nika bi gu ome Pauro agbiaha ni berãko kurii gu raka nangia ga Davide na ani ki bi wai rengbe ani ka wirika Pauro.

11. Tipagine Davide aangera ti ni wa gu boro naanyakanga ya? (Oni bi gu sura duti kpotoho.)

¹¹ Goriata nangia kere basovura kidu na ome tiko ni bakerehe gbe aabi Davide wa rurungbura boro. Ho Goriata abi Davide ni, ko ‘apayasi pa ko.’ Gu nagaraka ha agaraka gbe berewe nga, Goriata adu ni bakiki ko, ki mbakadi tiko wenengai na aũvura, na ki ima gbia rabahe wenengai tipa vura. Ono Davide tigako angia gu kumbagude naadunga na inohe ya, na ko aangera ni gu boro naagbianga rabahe tipa vura ya. Davide aangera wa gu boro naadunga nyanyaki ya, bambiko ko angia wiri tooni paranga, angianga gu banzengere i aima raba ni ya. Ono tie, ko aima du nzunzu ni nyanyaki ko. Ko akido kuti Yekova, na Yekova ki fu ome fuko tipa ko du na rengba ka diabe Goriata.—1 Sam. 17:41-45, 50.

12. Gini kura kpakarapai Davide agbiatiko na ni?

¹² Gu kura kpakarapai adu kinaho ka rengbe ka sa Davide ko du rurungbura. Davide amangisunge ni ruruko fu gu boro Yekova amoi ni ni bakindo Yisaraere yo, nangia Saura. Bakindo Saura anaairisa Davide airisa mbata. Kusa, rukö asa Saura ko tona kpi Davide. Saura anaamanga Davide gbegberẽ, zavura kini asadi ka imoko.—1 Sam. 18:6-9, 29; 19:9-11.

13. Waigu Davide amangipai kuti gu gbegberẽ gene Bakindo Saura aamanga ko ngbaha?

 ¹³ Wa si avura du vurũ nga Bakindo Saura anaamanga Davide gbegberẽ, Davide aandu kindi kumbatayo kaa irisa ko, bambiko Yekova du namoi ko ni bakindo. (1 Sam. 24:6) Davide aabiranga Yekova tipa gu gbegberẽ apai Saura aamangaha te. Kuba gure, Davide akido kuti Yekova tipa ko fu gu ome fuko ko aaidaha tipa ka hi gu kere asada re.

14. Gini kpakarapai gu mokedi nangia Pauro agbiatiko na ni nga gu naadu wakina gu Davide agbiatiko na ni?

¹⁴ Gu mokedi nangia Pauro agbiatiko na kpakarapai wakina gu nangia ga Davide. Avura Pauro aima nge ni kerehe na kidu na bakere ome tiyo kisusi ko. Badungu agu abangbembatayo naadu ti regbo ko aima soga ko. Dedede, i anaasa gupai nga i nita ko na kini ba ko ku bambukiso yo. Wakina Davide, agu aboro kaa du ni abakurea Pauro anaamanga ko gbegberẽ. Kura aboro rogo gu dungurati nga ga aKristano aabisira pako abisira. (2 Kor. 12:11; Frp. 3:18) Ono Pauro aima diabe agu aboro dunduko naasoga ko. Ngba gini gene? Ko aandu kindi kumbatayo kaa tungusapai, ko ki vura kaa gbiatiko vurũ na sogote. Ko aima nye ni ruruko fu awirinako zavura ti agu aregbo i anaaba gberãrago tiko. Na gu paha anyaki anyaka gbe nga, ko adu ni ruruko fu Mbori dati kpioko. (2 Tim. 4:8) Ko adu na rengba ka manga agi apai re dunduko, angianga mbiko gupai nga ko aakido kuti gako ome ya, ono mbiko gupai nga ko aakido kuti Yekova.

15. Gaani sasa nga gine, na waigu rengbe ani kada ti ni?

¹⁵ Ya mo mo nagbia tiro na gbegberẽ afugo watadu rungosiro be agu aboro du mo na yo rogo riko sukuru yo, agu aboro mo amangasunge na yo, watadu gu gamo aborokporo angianga aDezire Yekova ya? Ya mo boro amangingo ro gbegberẽ rogo dungurati? Kangia wo duhe, mo tingidipa agu akpiapai nangia ga Davide na Pauro. Mo ima rengba kaa “dia be gbegberẽpai ni wenepai” kindi. (Rom. 12:21) Ho aboro asoga rani ni, ani asonga vura kutiyo wa Davide asovura na Goriata te. Kuba gure, ani nadiabe gbegberẽpai ni asada ani ka undo aboro i wirikipai tipa Yekova na tipa Ziazia Kekeapai. Mo rengbe kada ti gu sasa re ni manga mo sunge na Ziazia Kekeapai ka karagapai kuti ga aboro asanahe, ni irisa mo agu aboro namanga ro gbegberẽ kini yugu wenesino fuyo, na ni manga mo wene apai fu aboro dunduko, zavura avura ro a.—Mt. 5:44; 1 Pet. 3:15-17.

16-17. Ginipai bangiri Pauro aagonga ti ni ya?

¹⁶ Mbata fu gu mokedi nangia Pauro da ni ga Kristo bawiriki, ko angia iragbarasapai nga guko naarungosi apefuo Yesu. (Amo. 7:58; 1 Tim. 1:13) Yesu nitiko aima rugusa Pauro i anaayamba ko mbata nga Saura ti rungosi ko agu adungurati nangia ga aKristano. Yesu afura fu Pauro ngbangbaturũ yo na ki sa ko ni iravurari. Tipa gupai nga Pauro tona ngera berewe, si aaida ko gbata undo kina be agu aboro ko aima digo nirungosi yo. Ko ayugu umbasitise ki gbata undo be gu bawiriki rimoko angia Anania nga guko nasa gupai nga ko tona ngera berewe.—Amo. 9:3-9, 17, 18.

¹⁷ Kusa, badungu aboro aima ye ka ino Pauro rogo gu dungurati nangia ga aKristano, ono bangiriko aagonga ti gupai Yesu ayuguhe fuko ngbagene Damaseke te. Pauro anye ni boro umbasitise, na ko anaadia gu undo adia kugume awirinako anaafuhe fuko. Ko aima rugatiko na gupai nga i ‘nanaangarãsa’ ko watadu nanaasa gupai nga ko du ngangarã.—Koro. 4:10, 11.

18. Tipagine rengbe ani kadu ti ni ti kura aregbo dindikodindiko ka dia undo kugume be aboro?

¹⁸ Ginipai rengbe ani ka wirikaha be Pauro? Ho ani awiriki rengo ni ti bambata regbo, si nawira gupai nga ani aima ida aboro naaundo rani bambiko ani aini gupai nga badungu apai si aaida ani wirikihe. (1 Kor. 3:1, 2) Ono na awere? Ka si du nga ani ima iriso Yekova tipa dungu agarã, na ki ima gbia bakere inohe, ani ima rengba ka zanga du na nyemu ka dia undo kugume, gbe ka si du nga gu boro aimanga ku rogo rengo yo wa ani ya du nafuhe furani. Ono tie, Yekova ninaamangasunge dedede na awirinarani tipa ka nyakasa rani. (Rom. 1:11, 12) Sidu, ka ani aida ka gbia ome be Yekova, si naida ani di gu undo kugume awirinarani afuhe furani.

19. Ginipai nasa Pauro ko du na diabese?

¹⁹ Pauro aima manga bakere apai tingbafuo da ko ni Kristano. Tipagine? Bambiko ko awiriki gupai nga diabese arunga rii ga boro ome, wirikapai, kumuko, watadu wai ni asono te, ono si naruriipa gani umbasitise gbiati kido kuti Yekova. Ani dunduko rengbe ka wirika Pauro (1) ni kido ani kuti Yekova, (2) ni wirika ani pai ti agu akpiapai du rogo Ziazia Kekeapai yo na (3) ni dia ani undo kugume be akuarani aidipase. Ka ani mangihe wo, Yekova nika sarani ani du nyanyaki, ka ani vura du kina rurungbura wai vurũ!