1. Kit ma kinyuto kwede i 3 Jon 3, 4, ngo ma keliwa yomcwiny?

TIKA itwero goyo yomcwiny ma lakwena Jon obedo kwede i kare ma owinyo ni jo ma en okonyogi me pwonyo ada pud gitye ka medde ki tic pi Jehovah ki gen? Onongo gukato ki i pekki mapol, dok Jon otiyo matek me jingo niye pa Lukricitayo ma lugen magi ma en onongo nenogi calo lutinone. I yo acel-lu, cwinywa bedo yom ka lutino ma wan wanywalo nyo lutino kwanwa me Baibul gudyere bot Jehovah dok gucung matek me tic pire.​—Kwan 3 Jon 3, 4.

2. Jon ocoyo waragane adek-ki pi tyen lok ango?

² I mwaka 98 K.M., Jon nen calo onongo tye i boma me Epeco nyo kabedo mo macok kenyo. Twero bedo ni en okobo kunnu i kare ma kigonye ki i buc ma i cula nam me Patimo. I kare meno, cwiny maleng pa Jehovah otugo cwiny Jon me coyo waraga adek. Tyen lok me coyo waraga magi obedo me tugo cwiny Lukricitayo ma lugen me gwoko niyegi i kom Yecu ki dok medde ki wot i ada.

3. Lapeny mene ma wabigamogi i pwony man?

³ Jon keken aye obedo lakwena ma onongo pud kwo i kare meno, dok en obedo ki par pi adwogi marac ma lupwonye ma lugoba gubedo ka kelone i kom kacokke. * (1 Jon 2:18, 19, 26) Jo mungak magi onongo giwaco ni gingeyo Lubanga, ento onongo pe gilubo cik pa Jehovah. Kong wanenu tira ma Jon omiyo. Ka watimo meno, wabigamo lapeny adek: Tyen lokke ngo me wot i ada? Ariya ango ma wakemme kwede? Dok watwero konyo Lukricitayo luwotwa nining wek gumedde ki wot i ada?

4. Ma lubbe ki 1 Jon 2:3-6 ki 2 Jon 4, 6, gin ango ma mitte wek wawot i ada?

⁴ Me wot i ada, myero wange ada ma nonge i lok pa Lubanga, i Baibul. Medo i kom meno, omyero ‘wagwok cik pa Jehovah’ ma meno tyen lokke ni waketo cikke i tic. (Kwan 1 Jon 2:3-6; 2 Jon 4, 6.) Yecu owekiwa lanen maber loyo me bedo ki winy i kom lok pa Jehovah. Pi meno, yo acel ma pire tek ma wawinyo kwede Jehovah aye ki lubo lanen pa Yecu macok adada.​—Jon 8:29; 1 Pet. 2:21.

5. Gin ango ma omyero wabed labongo akalakala mo keken iye?

⁵ Wek wamedde ki wot i ada, myero wamok piwa kenwa ni Jehovah aye obedo Lubanga me ada, dok ni jami ducu ma en wacciwa i Lokke, Baibul, tye ada. Dok omyero wamok piwa kenwa ni Yecu aye obedo Meciya ma kiciko pire-ni. Jo mapol i kare-ni gikalo akala kace kiwiro Yecu macalo Kabaka me Ker pa Lubanga. Jon ociko ni “lubwol dano mapol,” onongo gitye ma gitwero bwolo jo ma pe gitye ki niye matek i kom Jehovah ki Yecu. (2 Jon 7-11) Jon ocoyo ni: “Dong anga ma lagoba? Ngat ma lagoba en aye dano ma kwero woko ni Yecu pe Kricito.” (1 Jon 2:22) Yo acel keken ma watwero gwokke kwede wek pe kibwolwa aye ki kwano Lok pa Lubanga. Ka watimo meno ci wabingeyo Jehovah ki Yecu. (Jon 17:3) Meno keken aye biweko wabedo labongo akalakala mo ni watye i ada.

6. Ariya ango ma twero gengo Lukricitayo matino ki i wot i ada?

⁶ Lukricitayo ducu myero gugwokke wek pe kibwolgi ki lok me ryeko pa dano. (1 Jon 2:26) Mitte tutwal ni Lukricitayo ma pud gitino gugwokke ki i owic man. Alexia, * laminwa ma tye ki mwaka 25 ma a ki i lobo France owaco ni: “I kare ma onongo pud atye i cukul, kipwonyowa ni kwo ocakke pire kene kacel ki lok mapol mukene me ryeko pa dano, dok pwony magi oweko abedo ki akalakala. I kare mogo, pwony magi onongo gudo cwinya. Ento ki tungcel onongo awinyo calo pe rwatte ka acayo pwony me Baibul ci aye jami ducu ma lupwonyena giwaco.”  Alexia okwano buk me Life​—How Did It Get Here? By Evolution or by Creation? I nge cabit mogo manok, akalakala ma onongo en tye kwede orweny woko. Alexia owaco ni: “Amoko pira kena ni Baibul tye ki ada. Dok aniang ni kwo ma lubbe ki rwom me Baibul bikela yomcwiny ki kuc.”

7. Gin ango ma omyero wagwokke tutwal ki timone, dok pingo?

⁷ Lukricitayo ducu, jo matino wa ki jo madongo, omyero gukwer dic me kwo kwo laiye aryo. Lakwena Jon otito ni pe watwero bedo ka wot i ada kun ki tungcel bene nongo watye ka timo tim tarwang. (1 Jon 1:6) Ka wamito nongo cwak pa Lubanga kombeddi ki i anyim, ci myero wiwa opo ni Jehovah neno jami ducu ma watimo. Pi meno, pe tye bal mo ma watwero timo i mung pien jami ducu ma watimo nen woko ka maleng bot Jehovah.​—Ibru 4:13.

8. Gin ango ma omyero wakwer lajwac?

⁸ Omyero wakwer lajwac kit ma jo me lobo-ni gineno kwede bal. Lakwena Jon ocoyo ni: “Ka ce wawaco ni wape ki bal, meno nongo wabwolle abwola kenwa.” (1 Jon 1:8) I kare pa lakwena Jon, jo mungak onongo giwaco ni ngat moni twero bedo ka timo bal akaka ento bene pud medde ki bedo larem Lubanga. I kare-ni, watye ka kwo i kin dano ma gitye ki tam marom ki pa jo mungak magi. Jo mapol giwaco ni giye i kom Lubanga, ento pe giye gin ma Jehovah waco madok i kom bal, tutwalle ka odok i lok kom buto. Tim me buto mogo ma Jehovah waco ni obedo bal gin giwaco ni pe rac ka ngat moni oyero me kwo kit meno.

9. Adwogi maber ango ma jo matino ginongo ka gumoko matek i kom pwony me Baibul?

⁹ Lukricitayo ma gitino tutwalle aye ginongo dic me poro kit kwo macilo pa lutic nyo lutino kwan luwotgi. Man aye gin mutimme  i kom ominwa Aleksandar. Wiye po ni: “Anyira mogo i cukul guketo lyeto i koma ni adony i tim me buto kwedgi. Guwacca ni kit ma ape ki nyako mo ma atye i mar kwede-ni, myero obedo ni abuto ki co luwota aye.” Ka itye ka kemme ki atematema marom ki man, wi myero opo ni ka imoko matek i kom pwony me Baibul, ibibedo ki woro i komi kekeni, ibigwoko yotkomi, ibigwokke ki turcwiny, dok ibibedo ki wat maber ki Jehovah. Dok kare ducu ma icung matek i kom atematema, weko doko yot boti me timo gin matir. Wi omyero opo bene ni, tam maraco ma jo me lobo-ni gitye kwede i kom tim me buto oa ki bot Catan. Pi meno, ka ikwero tam calo gin, ci nongo ‘iloyo Larac-ci woko.’​—1 Jon 2:14.

10. I yo ma nining ma 1 Jon 1:9 konyowa me tic pi Jehovah ma nongo cwinywa pe pidowa?

¹⁰ Wan waye ni Jehovah aye tye ki twero me moko ka gin moni obedo bal. Dok watute ki kerowa ducu pe me timo bal. Ento ka watimo bal, watuco balwa bot Jehovah i lega. (Kwan 1 Jon 1:9.) Dok ka watimo bal madit, wayenyo kony ki bot luelda ma Jehovah ocimogi me gwokowa. (Yak. 5:14-16) Kadi bed kit meno, pe omyero wawek cwinywa obed ka pidowa mukato kare woko pi bal ma watimo i kare mukato angec. Pingo? Pien Wonwa ma lamar-ri omiyo Wode macalo ginkok piwa wek kitim kica pi balwa. Ka Jehovah owaco ni ebitimo kica ki lubal ma gungut, en timo meno ada. Pi meno, pe tye gin mo ma twero gengowa tic pi Jehovah ma cwinywa pe pidowa.​—1 Jon 2:1, 2, 12; 3:19, 20.

11. Watwero gwoko tamwa nining ki i pwony goba ma romo balo niyewa?

¹¹ Omyero wakwer pwony pa jo mungak. Nicakke i acakki me kacokke pa Lukricitayo, Larac-ci tye ka tic ki lugoba me  pito kodi me akalakala i tam pa lutic pa Lubanga ma gin lugen. Pi meno, myero wange kit me poko kin lok me ada ki lok goba. * Lumonewa gitwero tic ki Intanet me balo genwa i kom Jehovah ki marwa pi omegiwa. Wi opo i kom ngat ma tye i nge goba magi, dok ikwergi woko lajwac!​—1 Jon 4:1, 6; Yabo 12:9.

12. Pingo myero wadong pwocwa pi ada ma wapwonyo?

¹² Me cung matek i kom tute pa Catan me balo niyewa, myero wajing genwa i kom Yecu kacel ki ticce i cobo yub pa Lubanga. Myero wagen jo ma Jehovah tye ka tic kwedgi me doro dulle i kare-ni. (Mat. 24:45-47) Wajingo genwa ki kwano Lok pa Lubanga kare ki kare. Ka watimo kit meno, ci niyewa bibedo calo yat ma lwite odonyo matut i ngom. Paulo oloko lok ma cal ki meno i kare ma ocoyo waraga bot kacokke me Kolocai. En owaco ni: “Macalo yam dong wuye Rwot Yecu Kricito, myero bene wubed i en. Lwitwu odony ocung matek i kome, dok wubed macalo ot ma gigero i kome, ma wucung matek i niyewu.” (Kol. 2:6, 7) Pe tye gin mo ma Catan nyo jo ma gitye i te twerone giromo timo ma bigengo Lakricitayo ma ojingo niyene ki wot i ada.​—2 Jon 8, 9.

13. Gin ango ma omyero wange, dok pingo?

¹³ Myero wange ni jo me lobo-ni gibikwerowa. (1 Jon 3:13) Jon opoyo wiwa ni “lobo ducu tye i te loc pa Larac.” (1 Jon 5:19) Ka agikki me lobo-ni woto ki nyiko cok, akemo pa Catan bene medde ameda. (Yabo 12:12) En pe lwenyo i komwa i yo ma lapiny keken, calo ki bitowa me donyo i tim me tarwang nyo ye goba pa jo mungak. En bene lwenyo i komwa atir atir kun tiyo ki gero. Catan ngeyo ni edong ki kare manok keken me temo juko ticwa me tito kwena nyo turo niyewa. Dong pe tye me ur ni, i lobe mogo, kiketo kigeng i kom ticwa ducu nyo mukene. Kadi bed kit meno, omegiwa ki lumegiwa ma i lobe magi gitye ka kanyone. Gitye ka nyuto ni kadi bed Catan otim gin ango i kom jo pa Jehovah, pud watwero loyo!

14. Gin acel mene ma watwero timo me konyo omegiwa ki lumegiwa me medde ki wot i ada?

¹⁴ Wek wakony omegiwa ki lumegiwa me bedo i ada, omyero wanyut ni waparo pigi. (1 Jon 3:10, 11, 16-18) Myero wamar luwotwa pe i kare ma nongo jami tye ka wot maber keken ento bene wa i kare ma nongo peko tye. Me labolle, tika ingeyo ngat mo ma orwenyo danone me amara i to dok mito cuko cwiny ki kony mapatpat? Nyo iwinyo ni omege mogo gurwenyo jamigi i can ma poto atura dok gimito kony me gero otgi nyo Odi me Ker? Wanyuto tut pa marwa ki kicawa pi omegiwa ki lumegiwa pe ki i lok ma waloko keken ento, ma pire tek loyo ducu, ki i jami ma watimo.

15. Kit ma kitito kwede i 1 Jon 4:7, 8, gin ango ma mitte ni watim?

¹⁵ Walubo lanen pa Wonwa me polo ka wanyuto mar pi luwotwa. (Kwan 1 Jon 4:7, 8.) Yo acel ma pire tek ma wanyuto kwede mar aye ki timo kica ki luwotwa. Me labolle, ngat mo twero cwero cwinywa ento lacen kwayo kica. Wanyuto mar ka watimme kica kun waweko wiwa wil woko i kom balle. (Kol. 3:13) Ominwa mo ma nyinge Aldo cwinye ocwer matek i kare ma owinyo ni omego mo ma en onongo tye ki woro pire oloko marac i kom kakane. Aldo owaco ni, “Abedo ka lega  matek bot Jehovah wek okonya pe me mako lok meno i cwinya i kom omego-ni.” Ento Aldo bene otimo gin mo mukene. En openyo omego-ni me cito kacel kwede i tic me pwony. I kare ma gitye ka tic kacel, Aldo otito bot omego-ni kit ma lokke ocwero kwede cwinye. Aldo owaco ni: “I kare ma omego-ni oniang ni cwinya onongo ocwer pi lokke meno, en okwayo kica. I kit ma en oloko kwede, onongo atwero winyo ni en okoko ange matek pi lok ma en owaco-ni. I nge meno, wadoko lurem odoco dok waweko lok meno odong i ngewa.”

16-17. Gin ango ma omyero wamok tamwa me timone?

¹⁶ Lakwena Jon onongo maro utmegine dok mito ni gubed ki niye matek. Marre onen woko ka maleng i tirane ma en ominigi i waragane adek-ki. Pud dong cuko cwinywa ya me ngeyo ni co ki mon, ma gin lumar calo Jon, kiwirogi me loc kacel ki Kricito i polo!​—1 Jon 2:27.

¹⁷ Walego ni wan ducu walubu tira ma wanyamo i pwony man. Wamoku tamwa me medde ki wot i ada, kun walubo tira pa Jehovah i yo me kwowa ducu. Kwan Lokke, dok iket genni iye. Dong niye matek i kom Yecu. Kwer lajwac lok me ryeko pa dano ki pwony pa jo mungak. Kwer dic me kwo kwo laiye aryo kacel ki timo bal. Medde ki lubo rwom me kit ma atir pa Jehovah. Dok wakonyu utmegiwa me cung matek kun watimo kica ki jo ma gucwero cwinywa dok wakonyo jo ma gitye i peko. Ka watimo kit meno, ci wabimedde ki wot i ada kadi bed watye ki pekki.