1. 3 Yoˇhaˬ 3, 4-ahˇ haw ngeh, aˬ dui˗ahˇ laˬ kʼaˬ bi cehˇ laˇ˗eu jeˬ naˇ aˬ geu jeˬ nga?

 Gʼaˬ kʼehˇ Yoˇhaˬ aˬ yawꞈ neh yaw tsaˬ yaw dawˇ jeˬ˗ahˇ siˬ nya laˇ ni caw ba nehˬ˗euˬ deuˬ, Yeˬhawˇbaˬ˗euˬ gaˇ˗ahˇ saˇ jaˇ ziꞈ˗eu laꞈ kʼoeˇ mˇ luꞈ˗eu lehˇ ya gaˬ ngeh, laˬ kʼaˬ aˇ naˆ ni cehˇ paˬ nga lehˇ shaˇ noeˬ haw sheˇ. Yoˇhaˬ yawˬ ha˗euˬ zaˬ˗ahˇ duˇ˗eu saˇ jaˇ ziꞈ˗eu Ka li zaˬ heu deuˬ˗ahˇ shaˬ zahˬ˗ahˇ ya tahˬ puˬ ngeh aˬ yawꞈ maꞈ˗euˬ jah˗eu jeˬ ziꞈ ni leh jeh˗awˇ caw ba nehˬ˗euˬ meh. Teu gaˇ duˇ ni aˬ dui˗ahˇ jiˇ yawˬ ha˗euˬ aˬ buˇ aˬ li deuˬ maˬ ehˇ, yawˬ ha neh yaw tsaˬ yaw dawˇ jeˬ˗ahˇ siˬ nya laˇ ni caw ba nehˬ˗euˬ deuˬ maˬ ehˇ, aˬ yawꞈ maꞈ Yeˬhawˇbaˬ˗ahˇ a nehˬ˗awˇ aˬ yawꞈ˗euˬ gaˇ˗ahˇ saˇ jaˇ ziꞈ˗eu laꞈ kʼoeˇ mˇ luꞈ gaˇ ya mawˇ ngeh laˬ kʼaˬ cehˇ laˇ˗eu meh.—3 Yoˇhaˬ 3, 4-ahˇ gui.

2. Yoˇhaˬ neh boꞈ˗euˬ sahˬ boꞈ teu naˇ aˬ jeˬ˗euˬ gʼaˇ duˬ boꞈ˗euˬ nga?

² Yoˇhaˬ A.D. 98-ahˇ Eˇpeˇsu˗ahˇ maˬ ngeuˇ naˇ teu˗euˬ dawˬ peh dawˬ dzeˇ jawˇ gaˇ duˇ˗eu meh. Aˬ yawꞈ Baˬmoˇ iˇ jaw lahˇ˗euˬ tawˬ˗ahˇ neh doˆ laˇ ngeh teu gaˇ jawˇ˗iˇ˗euˬ kʼawꞈ pyeuꞈ nya meh. Teu ngeh Yeˬhawˇbaˬ˗euˬ muiˬ˗eu shawˇ˗eu yaw sahˇ Yoˇhaˬ˗ahˇ laˆ noeˬ nehˬ˗awˇ sahˬ boꞈ smˇ taꞈ bi boꞈ˗euˬ meh. Sahˬ boꞈ teu boꞈ˗euˬ naˇ saˇ jaˇ ziꞈ˗eu Ka li zaˬ deuˬ˗ahˇ Yeˬsuˇ laꞈ kʼoeˇ bi jah ziꞈ˗eu gʼaˇ duˬ hawˇ˗eu, yaw tsaˬ yaw dawˇ jeˬ laꞈ kʼoeˇ bi dehꞈ daˆ leꞈ˗eu gʼaˇ duˬ pyeuꞈ meh.

3. Aˬ dui aˬ jeˬ jeˇ˗euˬ naˇ haˬ˗eu jeˬ˗ahˇ ja sawˇ˗eu nga?

³ Yoˇhaˬ naˇ gʼaˬ kʼehˇ deuˬ laꞈ kʼoeˇ neh dehꞈ saˬ saˬ yaꞈ˗euˬ gʼaˬ pyeuꞈ meh. Aˬ yawꞈ aˇ muˇ deuˬ˗ahˇ, mehˬ bahˬ˗eu jaˬ myawꞈ mehˇ shuiˇ dawˬ˗ahˇ tawˆ leˇ gaˇ kʼahˬ lahˇ˗eu meh. b (1 Yoˇhaˬ 2:18, 19, 26) Miˬyehˇ˗ahˇ puiˬ˗eu heu deuˬ naˇ, Miˬyehˇ˗ahˇ siˬ nya ma lehˇ ehˇ kʼawꞈ, Miˬyehˇ˗euˬ dawˬ˗ahˇ maˬ mˇ caw˗a. Aˬ dui Yoˇhaˬ neh biꞈ˗euˬ nui noeˬ nui duˇ˗ahˇ ja sawˇ ma. Heu kawˆ laꞈ kʼoeˇ aˬ dui naˇ haˬ˗eu jeˬ smˬ kawˆ˗ahˇ ja sawˇ ma. Yaw tsaˬ yaw dawˇ jeˬ laꞈ kʼoeˇ dehꞈ˗eu lehˇ ehˇ˗eu heu naˇ, aˬ jeˬ˗ahˇ ehˇ˗eu nga? Aˬ dui yaw tsaˬ yaw dawˇ jeˬ laꞈ kʼoeˇ dehꞈ luꞈ gaˇ laˆ tsoeˬ˗eu aˬ jeˬ nga? Yaw tsaˬ yaw dawˇ jeˬ laꞈ kʼoeˇ dehꞈ daˆ  leꞈ nya˗eu gʼaˇ duˬ, tiˬ gʼaˬ tiˇ gʼaˬ aˬ joˆ˗ehˇ caw ba nya˗eu nga?

4. 1 Yoˇhaˬ 2:3-6 hawˇ˗eu 2 Yoˇhaˬ 4, 6-ahˇ haw ngeh, aˬ dui yaw tsaˬ yaw dawˇ jeˬ laꞈ kʼoeˇ dehꞈ daˆ leꞈ nya˗eu gʼaˇ duˬ aˬ jeˬ ya jahˇ˗eu nga?

⁴ Aˬ dui yaw tsaˬ yaw dawˇ jeˬ laꞈ kʼoeˇ dehꞈ daˆ leꞈ nya˗eu gʼaˇ duˬ, Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ˗ahˇ ya siˬ nya˗awˇ, ‘Yeˬhawˇbaˬ˗euˬ dawˬ deuˬ˗ahˇ ya naˇ haˬ geuꞈ’˗eu meh. (1 Yoˇhaˬ 2:3-6; 2 Yoˇhaˬ 4, 6-ahˇ gui.) Yeˬsuˇ Yeˬhawˇbaˬ˗euˬ ehˇ dawˬ naˇ haˬ geuꞈ˗eu gaˇ kawˆ nehˬ˗ehˇ taꞈ leˇ˗awˇ muiˬ dui dui˗eu aˇ baˇ mˇ mehˬ yaꞈ˗euˬ meh. Teu miˇ neh, Yeˬhawˇbaˬ ehˇ dawˬ naˇ haˬ˗eu lehˇ mˇ mawˇ nya˗eu tiˬ jeˬ naˇ kʼaˇ gʼeh nya gaˇ neh Yeˬsuˇ˗euˬ pehˬ zaˇ˗ahˇ caw teh˗eu heu meh.—Yoˇhaˬ 8:29; 1 Beˬtuˆluˆ 2:21.

5. Aˬ dui aˬ jeˬ jeˇ˗euˬ gaˇ kawˆ˗ahˇ ya jah ziꞈ˗eu nga?

⁵ Yaw tsaˬ yaw dawˇ jeˬ laꞈ kʼoeˇ dehꞈ daˆ leꞈ nya˗eu gʼaˇ duˬ, aˬ dui Yeˬhawˇbaˬ yaw tsaˬ yaw dawˇ˗euˬ Miˬyehˇ pyeuꞈ˗awˇ, Jaˇliꞈ˗ahˇ kʼaˇ ahˇ˗eu jeˬ yaw tsaˬ yaw dawˇ jeˬ pyeuꞈ meh lehˇ ya jah˗eu meh. Kʼoeˇ naˇ Yeˬsuˇ˗aˬ, oe meh lehˇ saˇ jaˇ dzaˬ taˬ˗euˬ Meˬsiˇya pyeuꞈ meh lehˇ jiˇ ya jah ziꞈ meh. Nymˬ˗mˇ iˬ nah gʼawˬ mya gʼaˬ Yeˬsuˇ˗ahˇ Miˬyehˇ Miˇkʼahˬ˗euˬ tseˇ doˆ taˬ˗euˬ sahˬ paˬ pyeuꞈ˗eu gaˇ kawˆ˗ahˇ laꞈ maˬ daˬ˗a. Yoˇhaˬ “jaˬ myawꞈ mehˇ shuiˇ shuiˇ˗eu tsawˇ haˬ deuˬ gʼawˬ mya ni” jawˇ meh lehˇ saˇ tiˇ biꞈ˗eu meh. Aˬ yawꞈ maꞈ naˇ, Yeˬhawˇbaˬ hawˇ˗eu Yeˬsuˇ nehˬ˗ehˇ taꞈ˗eu yaw tsaˬ yaw dawˇ jeˬ˗ahˇ maˬ jah ziꞈ˗eu deuˬ˗ahˇ mehˇ shuiˇ shuiˇ˗eu meh. (2 Yoˇhaˬ 7-11) “Yeˬsuˇ˗ahˇ Ka li maˬ ngeuˇ˗a lehˇ pyehˇ˗eu gʼaˬ˗aˬ, jaˬ myawꞈ myawꞈ˗eu gʼaˬ meh” lehˇ Yoˇhaˬ boꞈ taˬ˗euˬ meh. (1 Yoˇhaˬ 2:22) Aˬ dui mehˇ shuiˇ˗ahˇ maˬ ya tawˆ leˇ˗eu gʼaˇ duˬ mˇ nya˗eu tiˬ jeˬ naˇ, Jaˇliꞈ˗ahˇ pyehˆ tseˇ˗eu heu meh. Jaˇliꞈ˗ahˇ pyehˆ tseˇ˗awˇ neh tehꞈ˗ehˇ Yeˬhawˇbaˬ hawˇ˗eu Yeˬsuˇ˗euˬ gaˇ kawˆ˗ahˇ siˬ nya laˇ˗eu meh. (Yoˇhaˬ 17:3) Toˆ˗ehˇ siˬ nya laˇ˗awˇ neh tehꞈ˗ehˇ aˬ dui yawˬ ha jah luꞈ˗eu jeˬ˗aˬ, yaw tsaˬ yaw dawˇ jeˬ pyeuꞈ meh lehˇ jah ziꞈ laˇ˗eu meh.

6. Zaˬ guˬ zaˬ pyeuꞈ˗eu Ka li zaˬ deuˬ˗ahˇ yaw tsaˬ yaw dawˇ jeˬ laꞈ kʼoeˇ maˬ bi dehꞈ daˆ leꞈ ni laˆ tsoeˬ˗eu aˬ jeˬ nga?

⁶ Aˬ dui Ka li zaˬ deuˬ yawˬ gʼaˬ na luꞈ tsawˇ haˬ zaˬ˗euˬ zaˬ siˬ tsawˇ gahˇ˗euˬ mehˇ shuiˇ dawˬ˗ahˇ maˬ tawˆ leˇ ni ya yahˇ˗eu meh. (1 Yoˇhaˬ 2:26) Zaˬ guˬ zaˬ pyeuꞈ˗eu Ka li zaˬ deuˬ ngehˬ˗ehˇ dzehˬ, gaˇ kawˆ heu˗ahˇ yaw kʼaˆ˗ehˇ ya yahˇ˗eu meh. Paˇlaˬ miˇ kʼahˬ˗ahˇ neh laˇ˗awˇ, 25 kʼoꞈ kʼawˆ laˇ˗euˬ Aˬlehˇsiˬ˗yaˬ  c “Ngaˇ sahˬ boꞈ dzaw ngeh, tiˬ jeˬ˗ahˇ neh tiˬ jeˬ pyeuꞈ laˇ˗eu gaˇ kawˆ hawˇ˗eu tsawˇ haˬ zaˬ˗euˬ zaˬ siˬ tsawˇ gahˇ gaˇ kawˆ ya dzaw˗euˬ ma. Teu baˬ da neh ngaˬ˗ahˇ Jaˇliꞈ mehˬ˗eu jeˬ˗ahˇ maˬ jah coeˇ ni pyeuꞈ laˇ˗euˬ meh. Tiˬ poˆ na ngaˬ˗ahˇ dzaw nymˇ˗ahˇ ya dzaw˗euˬ jeˬ˗ahˇ ya leˇ miˇ˗a.  Ehˇ kʼawꞈ ngaˇ Jaˇliꞈ˗ahˇ yaw muiˬ˗ehˇ maˬ pyehˆ tseˇ haw˗euˬ gaˇ, saˬ laˬ deuˬ neh kʼaˇ mehˬ˗eu jeˬ˗ahˇ jah˗eu teu naˇ, maˬ tsaˬ nga lehˇ noeˬ laˇ nya” lehˇ ehˇ˗eu meh. Aˬlehˇsiˬ˗yaˬ Dehꞈ˗eu jeˬ aˬ joˆ˗ehˇ pyeuꞈ laˇ˗euˬ nga, tiˬ jeˬ˗ahˇ neh tiˬ jeˬ pyeuꞈ laˇ˗euˬ nga laˬ beh˗euˬ nga laˬ? lehˇ ehˇ˗eu paˇ dmˬ˗ahˇ pyehˆ tseˇ˗euˬ meh. Teu gaˇ neh heu myaˆ jaw naˇ, aˬ yawꞈ maˬ jah coeˇ˗eu jeˬ maˬ paˇ jaˆ meh. Aˬlehˇsiˬ˗yaˬ paˇ ehˇ˗eu, “Ngaˇ yaw muiˬ˗ehˇ pyehˇ tseˇ duˬ ngeh tiˬ jawˇ, Jaˇliꞈ laꞈ kʼoeˇ ahˇ˗eu jeˬ heu naˇ, yaw tsaˬ yaw dawˇ jeˬ pyeuꞈ ngaˇ lehˇ ya siˬ˗awˇ teu˗ahˇ mˇ caw naˇ, laˬ kʼaˬ cehˇ nui saˇ oꞈ˗eu jeˬ za meh lehˇ jiˇ ya siˬ˗euˬ ma.”

7. Aˬ dui aˬ joˆ˗ehˇ maˬ ya dehꞈ˗eu nga? Aˬ jeˬ miˇ neh?

⁷ Ka li zaˬ deuˬ yawˬ gʼaˬ na luꞈ zaˬ guˬ tsawˇ mawˬ maˬ ehˇ, mehˬ shi naˇ kʼah tiˬ jeˬ lehˇ maˬ ya dehꞈ˗a. Yoˇhaˬ aˬ dui yaw tsaˬ yaw dawˇ jeˬ laꞈ kʼoeˇ dehꞈ luꞈ˗awˇ, dehꞈ bahˬ dehꞈ muˆ˗eu jeˬ maˬ mˇ nya˗a lehˇ ehˇ˗eu meh. (1 Yoˇhaˬ 1:6) Aˬ dui Yeˬhawˇbaˬ neh nui kʼahˇ bi shiˇ mawꞈ naˇ, aˬ yawꞈ aˬ dui kʼaˇ mˇ˗eu yawˬ jeˬ na luꞈ˗ahˇ mawˇ meh lehˇ ya noeˬ taˬ˗eu meh. Aˬ dui neh mˇ˗euˬ jeˬ, tsawˇ haˬ zaˬ˗euˬ mehˬ shi dehˬ kaˬ zaꞈ nya kʼawꞈ, Miˬyehˇ˗euˬ mehˬ shi dehˬ kaˬ zaꞈ nya˗eu tiˬ jeˬ˗iˬ maˬ jaˆ.—Heˬbyehˇ 4:13.

8. Aˬ dui aˬ jeˬ˗ahˇ laꞈ maˬ ya daˬ˗eu nga?

⁸ Aˬ dui iˬ baˇ gaˇ kawˆ nehˬ˗ehˇ taꞈ leˇ˗awˇ, miˇ tsaˬ zaˬ deuˬ noeˬ˗eu loꞈ˗ehˇ maˬ ya noeˬ˗a. Gʼaˬ kʼehˇ Yoˇhaˬ “aˬ dui iˬ baˇ maˬ ahˇ lehˇ ehˇ naˇ, yawˬ haˇ yawˬ ha jaˬ myawꞈ myawꞈ˗eu jeˬ pyeuꞈ” meh lehˇ boꞈ taˬ˗euˬ meh. (1 Yoˇhaˬ 1:8) Yoˇhaˬ˗euˬ saˇ ka˗ahˇ Miˬyehˇ˗ahˇ puiˬ˗eu deuˬ, iˬ baˇ mˇ˗euˬ kʼawꞈ Miˬyehˇ nehˬ˗ehˇ cawˬ cawˬ daˆ leꞈ nya meh lehˇ ehˇ˗eu meh. Nymˬ˗mˇ iˬ nah aˬ dui˗euˬ tiˬ jawˬ jawˇ˗eu deuˬ jiˇ teu loꞈ˗ehˇ noeˬ˗eu meh. Gʼawˬ mya gʼaˬ Miˬyehˇ˗ahˇ jah ma lehˇ ehˇ˗eu kʼawꞈ, iˬ baˇ gaˇ kawˆ nehˬ˗ehˇ taꞈ leˇ˗awˇ Miˬyehˇ noeˬ˗eu loꞈ˗ehˇ maˬ noeˬ˗a. Yuꞈ taꞈ jawˇ taꞈ˗eu gaˇ kawˆ heu˗ahˇ ngehˬ˗ehˇ dzehˬ meh. Yuꞈ taꞈ jawˇ taꞈ˗eu tiˬ jeˬ na Yeˬhawˇbaˬ˗euˬ mehˬ shi yaw bahˬ jeˬ pyeuꞈ kʼawꞈ tsawˇ haˬ deuˬ naˇ, aˬ yawꞈ maꞈ nui ma tsaˬ naˇ yaw bahˬ jeˬ maˬ ngeuˇ˗a lehˇ ehˇ˗eu meh.

9. Zaˬ guˬ zaˬ deuˬ Jaˇliꞈ mehˬ˗eu jeˬ˗ahˇ tuˆ tehˬ taˬ˗eu heu naˇ, aˬ joˆ˗ehˇ gaˇ dahˇ tsoeˬ˗eu nga?

⁹ Sahˬ boꞈ dzaw cawˬ deuˬ maˬ ehˇ, gaˇ mˇ cawˬ deuˬ maˬ ehˇ, yuꞈ taꞈ jawˇ taꞈ˗eu gaˇ kawˆ nehˬ˗ehˇ taꞈ leˇ˗awˇ, Jaˇliꞈ mehˬ˗eu jeˬ˗ahˇ laꞈ maˬ daˬ ngeh, zaˬ guˬ zaˬ pyeuꞈ˗eu Ka li zaˬ deuˬ˗euˬ gʼaˇ duˬ, yuꞈ  taꞈ jawˇ taꞈ˗eu gaˇ kawˆ˗ahˇ tsaˬ˗eu jeˬ˗ehˇ haw˗eu yaw shaˬ meh. Aˬlehˇsaˬdaˬ gaˇ kawˆ heu˗ahˇ ya tahˬ puˬ˗euˬ meh. Aˬ yawꞈ ehˇ˗eu “Dzaw nymˇ˗ahˇ jawˇ ngeh, ngaˬ˗euˬ cawˬ tiˬ gʼaˬ na aˬ yawꞈ nehˬ˗ehˇ bi yuꞈ taꞈ jawˇ taꞈ˗eu lehˇ muˇ juˇ juˇ˗eu meh. Aˬ yawꞈ maꞈ ngaˇ zaˬ kʼaˬ maˬ baw naˇ, li buˇ pyeuꞈ nga lehˇ ehˇ˗eu meh.” Aˬ dui˗ahˇ jiˇ heu loꞈ˗ehˇ lawˬ haw laˇ nya˗eu meh. Ehˇ kʼawꞈ aˬ dui Jaˇliꞈ mehˬ˗eu jeˬ˗ahˇ tuˆ tehˬ taˬ naˇ, aˬ dui˗euˬ nui noeˬ nui ma hawˇ˗eu mawˇ do˗ahˇ uˆ kaˬ uˆ lahˇ nya˗eu uˬ taꞈ, Yeˬhawˇbaˬ nehˬ˗ehˇ jiˇ cawˬ cawˬ daˆ leꞈ nya˗eu meh. Kʼoeˇ naˇ, aˬ dui lawˬ haw laˇ˗eu jeˬ˗ahˇ kʼaˇ gʼaˬ leˇ ngeh, tsaˬ˗eu jeˬ˗ahˇ mˇ˗eu jiˇ awˬ dzehˬ laˇ˗eu meh. Kʼoeˇ uˬ taꞈ, aˬ dui yuꞈ taꞈ jawˇ taꞈ˗eu gaˇ kawˆ nehˬ˗ehˇ taꞈ leˇ˗awˇ, miˇ tsaˬ zaˬ deuˬ noeˬ bahˬ taˬ˗euˬ jeˬ heu naˇ, Saˬdaˬ˗ahˇ neh laˇ˗euˬ jeˬ pyeuꞈ meh lehˇ ya noeˬ taˬ˗eu meh. Teu miˇ neh, aˬ dui miˇ tsaˬ zaˬ deuˬ noeˬ˗eu loꞈ˗ehˇ maˬ noeˬ ngeh, ‘Haiˬ dui dui˗eu Gʼaˬ˗ahˇ gʼaˬ leˇ˗euˬ’ jeˬ pyeuꞈ meh.—1 Yoˇhaˬ 2:14.

10. 1 Yoˇhaˬ 1:9 aˬ dui siˬ nya˗eu nui ma shawˇ˗eu laꞈ kʼoeˇ Yeˬhawˇbaˬ˗euˬ gaˇ mˇ nya ni aˬ joˆ˗ehˇ caw ba nehˬ˗eu nga?

¹⁰ Yeˬhawˇbaˬ aˬ geu jeˬ naˇ iˬ baˇ pyeuꞈ˗eu lehˇ ehˇ˗eu aˬ kawˬ˗aˬ jaˆ meh lehˇ aˬ dui siˬ nya˗eu ma. Teu miˇ neh aˬ dui iˬ baˇ maˬ mˇ˗eu gʼaˇ duˬ, kʼaˇ gʼeh nya gaˇ neh leh jeh˗eu ma. Ehˇ kʼawꞈ aˬ dui iˬ baˇ mˇ dzeuˇ ngeh, guiˬ lahˬ shaˇ˗awˇ, aˬ dui neh mˇ bahˬ˗euˬ jeˬ Yeˬhawˇbaˬ˗ahˇ ja doˆ nehˬ˗eu ma. (1 Yoˇhaˬ 1:9-ahˇ gui.) Aˬ dui huiˬ˗eu iˬ baˇ mˇ ngeh, aˬ dui˗ahˇ bi ngehˬ gʼeh˗eu gʼaˇ duˬ, Yeˬhawˇbaˬ neh tseˇ taˬ˗euˬ aˇ muˇ˗ahˇ sheuˬ gʼeh˗eu deuˬ neh bi caw ba˗eu ma. (Yaˬkoˆ 5:14-16) Ehˇ kʼawꞈ, aˬ dui dzeuˇ yaꞈ ngeh mˇ˗euˬ iˬ baˇ deuˬ˗ahˇ nui ma cawˆ cawˆ˗ehˇ maˬ ya jawˇ˗a. Aˬ jeˬ miˇ neh nga? Aˬ jeˬ miˇ neh ehˇ naˇ, aˬ dui˗ahˇ gaˬ˗eu Aˬda aˬ dui˗ahˇ iˬ baˇ pyehˬ nehˬ˗eu gʼaˇ duˬ, aˬ yawꞈ˗euˬ Zaˬmaˇ bi kamˇ shiˇ le˗euˬ miˇ neh meh. Teu miˇ neh, Yeˬhawˇbaˬ noeˬ poˆ noeˬ paˇ˗eu deuˬ˗ahˇ iˬ baˇ pyehˬ ma lehˇ ehˇ ngeh, aˬ yawꞈ maˇ diˇ pyehˬ nehˬ˗eu meh. Teu miˇ neh, aˬ dui siˬ nya˗eu nui ma shawˇ˗eu laꞈ kʼoeˇ Yeˬhawˇbaˬ˗euˬ gaˇ˗ahˇ mˇ daˆ leꞈ nya˗eu meh.—1 Yoˇhaˬ 2:1, 2, 12; 3:19, 20.

11. Aˬ dui aˬ dui˗euˬ jah˗eu jeˬ˗ahˇ gʼaˬ bi baˬ˗iˇ˗eu, mehˬ˗eu jeˬ˗ahˇ aˬ joˆ˗ehˇ yahˇ nya˗eu nga?

¹¹ Miˬyehˇ˗ahˇ puiˬ˗eu deuˬ neh mehˬ˗euˬ jeˬ˗ahˇ laꞈ maˬ ya daˬ˗a. Ka li zaˬ aˇ muˇ lehˇ jaˆ laˇ˗euˬ taꞈ  naˇ, Saˬdaˬ jaˬ myawꞈ mehˇ shuiˇ deuˬ˗ahˇ zmˬ˗awˇ, Miˬyehˇ˗euˬ gaˇ mˇ zaˬ deuˬ˗euˬ jah˗eu jeˬ gʼaˬ bi baˬ˗iˇ˗eu gʼaˇ duˬ leh jeh˗eu meh. Teu miˇ neh, aˬ dui yaw tsaˬ yaw dawˇ jeˬ hawˇ˗eu jaˬ myawꞈ myawꞈ˗eu jeˬ˗ahˇ ya tseˇ paˆ nya meh. d Muiˇ˗eu deuˬ aˬ dui Yeˬhawˇbaˬ˗ahˇ jah˗eu jeˬ hawˇ˗eu mehˇ nmˇ deuˬ˗ahˇ gaˬ˗eu jeˬ˗ahˇ laˆ cawˆ˗eu gʼaˇ duˬ, iˇteuꞈnehꞈ paw neh maˬ ehˇ, soˇsho miˇdiˬ˗yaˬ paw neh maˬ ehˇ, aˬ dui˗euˬ gaˇ kawˆ˗ahˇ maˬ ngeuˇ˗eu jeˬ˗ehˇ pyehˬ kʼawˬ˗eu meh. Jaˬ myawꞈ mehˇ shuiˇ dawˬ teu deuˬ˗ahˇ maˬ ya jah˗a. Teu naˇ Saˬdaˬ˗ahˇ neh laˇ˗euˬ jeˬ pyeuꞈ meh.—1 Yoˇhaˬ 4:1, 6; Pah mehˬ˗eu 12:9.

12. Aˬ dui yawˬ ha neh ya siˬ˗euˬ yaw tsaˬ yaw dawˇ jeˬ˗ahˇ, aˬ jeˬ miˇ neh ya jah ziꞈ˗eu nga?

¹² Aˬ dui Saˬdaˬ deuˆ laˇ˗eu jeˬ˗ahˇ neh dzeuˇ˗iˇ nya˗eu gʼaˇ duˬ, Yeˬsuˇ˗ahˇ ya jah˗awˇ Miˬyehˇ aˬ yawꞈ neh noeˬ taˬ˗euˬ jeˬ mˇ byah˗eu gʼaˬ duˬ, Yeˬsuˇ˗ahˇ aˬ joˆ˗ehˇ zmˬ˗eu gaˇ kawˆ˗ahˇ jiˇ ya jah˗eu meh. Kʼoeˇ uˬ taꞈ, aˬ dui nymˬ˗mˇ iˬ nah Yeˬhawˇbaˬ saˇ jaˇ ziꞈ˗awˇ noeˬ dahˇ doe˗eu zaˬ kʼaˆ deuˬ˗ahˇ tehꞈ˗ehˇ zmˬ˗awˇ, aˬ yawꞈ˗euˬ aˇ maꞈ aˇ muˇ˗ahˇ bi sheuˬ gʼeh meh lehˇ jiˇ ya jah˗eu meh. (Maꞈtehˬ 24:45-47) Aˬ dui˗euˬ jah˗eu jeˬ ziꞈ dah ni bi gʼeh˗eu gʼaˇ duˬ, aˬ myah luꞈ Jaˇliꞈ ya dzaw˗eu meh. Aˬ dui teu loꞈ˗ehˇ jahˇ naˇ, aˬ dui˗euˬ jah˗eu jeˬ duˬ ciˇ naꞈ leˇ taˬ˗euˬ aˇ bawˇ˗ahˇ duˇ˗eu meh. Pawˇluˆ jiˇ ni Gawˇlawˇsehˇ aˇ muˇ˗ahˇ sahˬ boꞈ boꞈ nehˬ ngeh, teu loꞈ˗ehˇ gʼeh˗eu jeˬ˗ahˇ ngehˬ keuˆ taˬ˗euˬ meh. Aˬ yawꞈ “Naw maꞈ˗aˬ, Yeˬsuˇ Ka li˗ahˇ naw maꞈ˗euˬ Sahˬpaˬ loꞈ˗ehˇ ha geuꞈ gʼaˬ˗euˬ miˇ neh, aˬ yawꞈ˗euˬ laꞈ kʼoeˇ dehꞈ gʼeh˗awˬ. Naw maꞈ˗ahˇ mehˬ nehˬ tsoˆ nehˬ taˬ˗euˬ loꞈ˗ehˇ, aˬ yawꞈ laꞈ kʼoeˇ ciˇ ka bi naꞈ˗awˇ, naw maꞈ yaw dehꞈ dehꞈ˗eu jeˬ aˬ yawꞈ kʼoeˇ taˆ gawˬ daˆ leꞈ˗awˇ, jah˗eu jeˬ laꞈ kʼoeˇ gʼaˬ kʼaˆ dzehˬ laˇ”˗awˬ lehˇ ehˇ˗eu meh. (Gawˇlawˇsehˇ 2:6, 7) Aˬ dui teu loꞈ˗ehˇ jahˇ naˇ, Saˬdaˬ maˬ ehˇ, aˬ yawꞈ paw pyawˬ˗eu deuˬ maˬ ehˇ, aˬ dui yaw tsaˬ yaw dawˇ jeˬ laꞈ kʼoeˇ dehꞈ daˆ leꞈ gaˇ maˬ laˆ tsoeˬ laˇ nya˗a.—2 Yoˇhaˬ 8, 9.

13. Aˬ dui aˬ jeˬ˗ahˇ zahˬ leˇ paˬ˗ehˇ maˬ gʼeh nga, aˬ jeˬ miˇ neh?

¹³ Aˬ dui miˇ tsaˬ zaˬ deuˬ aˬ dui˗ahˇ muiˇ laˇ gaˇ maˬ zahˬ leˇ. (1 Yoˇhaˬ 3:13) Yoˇhaˬ aˬ dui˗ahˇ ‘Miˇ tsaˬ zaˬ dawˬ tawˆ luꞈ Haiˬ dui dui˗eu Gʼaˬ uˆ lahˇ˗eu uˬ moˆ jawˇ luꞈ meh’ lehˇ saˇ tiˇ biꞈ˗eu meh. (1 Yoˇhaˬ 5:19) Miˇ tsaˬ heu siˬ aˇ saˬ saˬ˗eu ngehˬ˗ehˇ peh laˇ naˇ ngehˬ˗ehˇ Saˬdaˬ nui ma pehˇ dui dui˗eu meh. (Pah mehˬ˗eu 12:12) Saˬdaˬ dehꞈ bahˬ dehꞈ muˆ˗eu jeˬ hawˇ˗eu Miˬyehˇ˗ahˇ puiˬ˗eu deuˬ˗euˬ jaˬ myawꞈ mehˇ shuiˇ dawˬ˗ahˇ zmˬ˗awˇ maˬ bi siˬ laˇ ni deuˆ laˇ˗eu tehꞈ˗ehˇ maˬ gʼaˬ ni, kʼehˬ˗eu kʼaˆ˗eu jeˬ neh maˬ ehˇ do lehˇ jiˇ deuˆ laˇ˗eu meh. Saˬdaˬ tsaꞈ gaˬ˗eu gaˇ˗ahˇ laˆ tsoeˬ˗eu gʼaˇ duˬ hawˇ˗eu, aˬ dui˗euˬ jah˗eu jeˬ˗ahˇ gʼaˬ bi baˬ˗iˇ˗eu gʼaˇ duˬ, aˬ yawꞈ leh jeh˗eu aˇ yamˬ gʼawˬ myahˇ˗iˬ maˬ paˇ jaˆ mehˬ lehˇ siˬ nya˗eu meh. Teu miˇ neh, miˇ kʼahˬ tiˬ kʼahˬ na˗ahˇ aˬ dui˗euˬ tsaꞈ gaˬ˗eu gaˇ˗ahˇ laꞈ naˬ gaˇ maˬ ehˇ, tiˬ byah tiˬ loꞈ ma bi mˇ gaˇ maˬ ehˇ aˬ dui maˬ zahˬ leˇ. Miˇ kʼahˬ teu laꞈ kʼoeˇ jawˇ˗eu aˬ dui˗euˬ mehˇ nmˇ deuˬ oˇ oꞈ dui dui luꞈ˗eu meh. Saˬdaˬ Yeˬhawˇbaˬ˗euˬ tsawˇ haˬ˗ahˇ aˬ jeˬ lehˇ jahˇ laˇ kʼawꞈ aˬ dui saˇ jaˇ ziꞈ daˆ leꞈ nya˗eu meh.

14. Aˬ dui˗euˬ mehˇ nmˇ deuˬ˗ahˇ yaw tsaˬ yaw dawˇ jeˬ laꞈ kʼoeˇ dehꞈ daˆ leꞈ nya ni caw ba nehˬ˗eu aˬ jeˬ nga?

¹⁴ Mehˇ nmˇ deuˬ˗ahˇ yaw tsaˬ yaw dawˇ jeˬ laꞈ kʼoeˇ dehꞈ daˆ leꞈ nya ni caw ba nehˬ˗eu gʼaˇ duˬ, aˬ dui aˬ yawꞈ maꞈ˗ahˇ gʼawˬ shaˬ ya gaˬ˗eu meh. (1 Yoˇhaˬ 3:10, 11, 16-18) Aˬ dui saˇ ngeh tehꞈ˗ehˇ maˬ ngeuˇ˗eu, shaˬ ngeh jiˇ tiˬ gʼaˬ tiˇ gʼaˬ ya gaˬ˗eu meh. Yaw jeˬ ma jeˬ, nawˇ gaˬ˗eu gʼaˬ bi shiˇ˗euˬ baˬ da neh gʼaˬ bi biꞈ mawꞈ˗eu maˬ ngeuˇ naˇ, tiˬ jeˬ na bi caw ba mawꞈ˗eu tiˬ gʼaˬ na˗ahˇ siˬ nya ma loˇ? Maˬ ngeuˇ naˇ, uˬ jeˬ jaˬ lehˇ˗euˬ shaˬ zahˬ baˬ da neh aˬ dui˗euˬ mehˇ nmˇ˗euˬ iˇ kahˇ maˬ ngeuˇ naˇ bawˬ dzaˬ nymˇ laˆ saˆ˗eu loˬ nga lehˇ ya siˬ maˬ loˇ? Aˬ dui aˬ yawꞈ maꞈ˗ahˇ aˇ naˆ ni gaˬ˗eu gaˇ kawˆ mehˬ boeˬ neh tehꞈ˗ehˇ maˬ ngeuˇ˗eu laꞈ neh mˇ doˆ laꞈ˗eu ma.

15. 1 Yoˇhaˬ 4:7, 8-ahˇ haw ngeh, aˬ dui aˬ jeˬ ya jahˇ˗eu nga?

¹⁵ Aˬ dui tiˬ gʼaˬ tiˇ gʼaˬ gaˬ ngeh mˬ taˆ Aˬda˗ahˇ dzaw geuꞈ luꞈ˗eu jeˬ pyeuꞈ meh. (1 Yoˇhaˬ 4:7, 8-ahˇ gui.) Aˬ dui gaˬ˗eu lehˇ mˇ mawˇ nya˗eu tiˬ jeˬ naˇ,  tiˬ gʼaˬ tiˇ gʼaˬ iˬ baˇ pyehˬ nehˬ˗eu heu meh. Yaw jeˬ ma jeˬ, tiˬ gʼaˬ paˬ aˬ dui˗euˬ nui ma˗ahˇ laˆ naˇ nehˬ˗awˇ, lehˬ˗iˇ miˬ˗aˇ lehˇ tahˬ shaˇ laˇ ngeh aˬ dui aˬ yawꞈ maꞈ˗ahˇ iˬ baˇ pyehˬ nehˬ˗awˇ, aˬ yawꞈ maꞈ neh mˇ lehˬ˗euˬ jeˬ˗ehˇ noeˬ noeˬ˗ehˇ maˬ jawˇ˗eu heu neh gaˬ˗eu jeˬ mˇ mawˇ˗eu ma. (Gawˇlawˇsehˇ 3:13) Mehˇ nmˇ Awˇdoˬ aˬ yawꞈ yaw zeu baw˗eu mehˇ nmˇ tiˬ gʼaˬ aˬ yawꞈ neh tawˬ yaꞈ˗euˬ zahˇ sahˇ kʼoꞈ˗ahˇ maˬ ngeuˇ˗eu jeˬ˗ehˇ ngehˬ gaˇ ya gaˬ ngeh nui ma pehˇ˗eu meh. “Ngaˇ Yeˬhawˇbaˬ˗ahˇ mehˇ nmˇ teu gʼaˬ˗ahˇ maˬ muiˬ˗eu jeˬ maˬ bi noeˬ ni caw ba nehˬ laꞈ lehˇ guiˬ lahˬ shaˇ˗euˬ ma” lehˇ ehˇ˗eu meh. Teu tehꞈ˗ehˇ maˬ gʼaˬ ni aˬ yawꞈ yawˬ jeˬ yawˬ jiˇ paˇ jahˇ˗euˬ meh. Aˬ yawꞈ mehˇ nmˇ teu gʼaˬ˗ahˇ cawˬ˗awˇ Miˬyehˇ gaˇ mˇ˗euˬ meh. Aˬ yawꞈ nehˬ˗ehˇ tsaꞈ gaˬ luꞈ ngeh mehˇ nmˇ Awˇdoˬ nawˬ neh ngehˬ˗euˬ dawˬ ngaˬ˗euˬ nui ma˗ahˇ aˇ naˆ ni deuˬ˗eu lehˇ dzawˇ nehˬ˗euˬ meh. “Mehˇ nmˇ teu gʼaˬ teu loꞈ˗ehˇ ya gaˬ ngeh aˬ yawꞈ lehˬ˗iˇ miˬ˗aˇ lehˇ laꞈ daˬ˗eu meh” lehˇ Awˇdoˬ ehˇ˗awˇ, “aˬ yawꞈ ngehˬ gaˇ haw ngeh maˇ diˇ nui ma cawˆ˗eu lehˇ siˬ laˇ˗eu meh. Teu gaˇ neh naˇ nga nyaꞈ muiˬ˗eu cawˬ pyeuꞈ kʼoꞈ laˇ˗euˬ ma” lehˇ jiˇ ehˇ˗eu meh.

16-17. Aˬ dui aˬ jeˬ jahˇ˗eu gʼaˇ duˬ ya noeˬ tsehˆ taˬ˗eu nga?

¹⁶ Gʼaˬ kʼehˇ Yoˇhaˬ mehˇ nmˇ deuˬ˗ahˇ aˇ naˆ ni gaˬ˗awˇ aˬ yawꞈ maꞈ˗euˬ jah˗eu jeˬ aˇ naˆ ni bi ziꞈ mawꞈ˗eu gaˇ kawˆ, aˬ yawꞈ neh boꞈ˗euˬ sahˬ boꞈ smˇ taꞈ laꞈ kʼoeˇ˗euˬ nui noeˬ nui duˇ deuˬ˗ahˇ haw ngeh siˬ laˇ˗eu meh. Ka li nehˬ˗ehˇ mˬ kʼoeˇ taˆ ya uˆ lahˇ leˇ˗eu deuˬ naˇ, Yoˇhaˬ loꞈ˗ehˇ gʼeh˗eu mehˇ nmˇ deuˬ˗ahˇ tseˇ taˬ˗euˬ lehˇ ya siˬ˗eu heu naˇ, aˇ naˆ ni gʼaˬ za laˇ paˬ˗ehˇ gʼeh˗eu nga!—1 Yoˇhaˬ 2:27.

¹⁷ Heu kawˆ laꞈ kʼoeˇ ja sawˇ˗euˬ nui noeˬ nui duˇ deuˬ˗ahˇ nui ma laꞈ kʼoeˇ dawˆ ahˇ taˬ kaˇ˗euˇ. Yaw tsaˬ yaw dawˇ jeˬ laꞈ kʼoeˇ dehꞈ daˆ leꞈ˗awˇ, dehꞈ ziˇ laꞈ kʼoeˇ yawˬ pyawˬ na luꞈ˗ahˇ, Yeˬhawˇbaˬ˗euˬ ehˇ dawˬ naˇ haˬ˗eu gʼaˇ duˬ noeˬ tsehˆ taˬ kaˇ˗euˇ. Jaˇliꞈ dzaw˗awˇ, Jaˇliꞈ˗ahˇ jah ziꞈ˗eu uˬ taꞈ Yeˬsuˇ˗ahˇ jah˗eu jeˬ ziꞈ laˇ ni leh jeh˗awˇ, tsawˇ haˬ˗euˬ zaˬ siˬ tsawˇ gahˇ hawˇ˗eu, puiˬ˗eu deuˬ mehˬ˗eu jeˬ˗ahˇ maˬ ya caw teh˗a. Kʼoeˇ naˇ, mehˬ shi naˇ kʼah tiˬ jeˬ lehˇ dehꞈ˗eu jeˬ hawˇ˗eu, iˬ baˇ mˇ mawꞈ˗eu nui ma˗ahˇ deuˆ ceh ceh˗awˇ, yaw dehꞈ dehꞈ˗eu Yeˬhawˇbaˬ˗euˬ muiˬ dui dui˗eu tsaˬ˗eu dawˇ˗eu zahˇ˗ahˇ dehꞈ caw. Kʼoeˇ uˬ taꞈ, aˬ dui˗ahˇ nui ma laˆ naˇ laˇ˗euˬ mehˇ nmˇ deuˬ˗ahˇ iˬ baˇ pyehˬ nehˬ˗awˇ, aˬ yawꞈ maꞈ loˬ˗eu jeˬ˗ahˇ caw ba nehˬ˗eu heu neh, aˬ yawꞈ maꞈ yaw tsaˬ yaw dawˇ jeˬ laꞈ kʼoeˇ dehꞈ daˆ leꞈ nya ni caw ba nehˬ kaˇ˗euˇ. Toˆ˗ehˇ naˇ aˬ dui shaˬ zahˬ jaˆ kʼawꞈ yaw tsaˬ yaw dawˇ jeˬ laꞈ kʼoeˇ dehꞈ daˆ leꞈ nya˗eu meh.