1. Calu ma 3 Yohana 3, 4 uyero, ang’o ma copo mio iwa anyong’a?

JAKWENDA Yohana ubino kud anyong’a ma lee dit kinde m’ewinjo nia dhanu m’ekonyo ning’eyo lemandha gibemediri asu nitimo ni Yehova ku bedopwe. Jukristu maeno ginwang’iri ku peko dupa, ento Yohana utimo tego ma lee pi nitielo yioyic migi, pilembe ebed enenogi calu nyithindhe i thenge mi tipo. Wan bende anyong’a negowa lee ka wabeneno awiya mwa giwa, kunoke dhanu ma waponjo kugi Biblia gibethieriri ni Yehova man gibemediri nitimo ire.​—Som 3 Yohana 3, 4.

2. Pirang’o Yohana ukiewo barua pare adek?

² I oro 98 R.M., copere nia jakwenda Yohana ubino kwo i Efeso kunoke ceng’ini kud adhurane. Saa moko nyo edok kuca i ng’ei ma jugonye kud i kol i cula mi Patmo. I kind nindo maeno re m’egam ekiewo barua adek ku kony pa tipo maleng’ pa Yehova. Ekiewo baruane pi nikonyo Jukristu ma gigwoko bedoleng’ migi kara gibed ku yioyic ma tek i Yesu, man gimediri niwotho i lemandha.

3. Wabidwoko wang’ penji ma kani i thiwiwec maeni?

³ Kud i kind jukwenda zoo, Yohana re m’ugam udong’ ma tokcen, man ebino dieng’ lee pilembe dhanu moko ma gibed giponjo ndra gibino nyotho cokiri. * (1 Yoh. 2:18, 19, 26) Ju maeno m’ujai i kum yioyic gibed giyero nia ging’eyo Yehova ento gibed giworo ngo cik pare. Dong’ wakenenu juk ma tipo uyuyo i wie ma Yohana umio. Kinde ma wabeweco iwi juk maeno, wabidwoko wang’ penji adek m’ulubo e: Niwotho i lemandha thelembene tie ang’o? Lembang’o ma copo ketho waweko niwotho i lemandha? Man waromo konyara nenedi i kindwa kara wamedara niwotho i lemandha?

4. Nimakere ku 1 Yohana 2:3-6 man 2 Yohana 4, 6, ubekwayu watim ang’o kara wawoth i lemandha?

⁴ Kara wawoth i lemandha, ubekwayu wang’ei lemandha ma nwang’ere i Biblia ma en e Lembe pa Mungu. M’umedo maeno, ubekwayu ‘wawor cik [pa Yehova].’ (Som 1 Yohana 2:3-6 ; 2 Yohana 4, 6.) Yesu ubed uworo Yehova i lembe ceke. Pieno, yo acel ma wacopo woro ko Yehova utie nilubo lapor pa Yesu ceng’ini ceng’ini mandha.​—Yoh. 8:29; 1 Pet. 2:21.

5. Lembang’o m’ukwayu wayii m’umbe jiji?

⁵ Kara wamedara niwotho i lemandha, ubekwayu wayii m’umbe jiji nia saa ceke Yehova yero lemandha, man wec ceke m’eyero i Lembe pare Biblia utie lemandha. Bende, wacikara niyio m’umbe jiji nia Yesu utie Masiya ma jular jung’olo pire. Tin eni dhanu dupa giyio ngo nia Yesu utie Rwoth ma Mungu uwiro pi nibimo iwi Ker pare. Yohana upoyo Jukristu nia ‘weg awondi’ ubino dupa ma gicopo wingo ju ma gitie ngo ayika nicero ba lemandha iwi Yehova man iwi Yesu. (2 Yoh. 7-11) Ekiewo kumae: “Ng’a ma jandra ndhu ng’atu m’ukwero nia Yesu en e Kristu ngo ngo?” (1 Yoh. 2:22) Kara kud juwondwa, gin acel kende ma copo konyowa utie niponjo Biblia. Tek watimo kumeno re ma wabing’eyo Yehova giku Yesu. (Yoh. 17:3) Bende, wabiyio m’umbe jiji nia wani lemandha.

6. Lembang’o ma copo ketho Jukristu m’aradu giweko niwotho i lemandha?

⁶ Jukristu ceke gicikiri nibedo ku wang’gi kara ponji m’ucungo iwi rieko mi dhanu mi ng’om maeni kud uwing wigi. (1 Yoh. 2:26) Asagane Jukristu ma gitie aradu re ma gicikiri nibedo ku wang’gi i kum awic maeno. Nyamego Alexia * ma oro pare 25 ma kwo i ng’om mi France uyero kumae: “I somo, jubed juponjowa nia piny ulokere aloka, man juponjo iwa lembe mange de dupa m’ujengere iwi rieko mi dhanu. Ponji maeno ucaku royo jiji i ia i kum lemandha. Saa moko abed aneno nia ve ponjine cuu. Ento anwang’u nia kakare niyio lembe ceke ma jubeponjo ira i somo, ukwayu akeng’ei paru pa Yehova bende iwi lembe maeno.” Alexia ugam usomo buku ma thiwie  tie La vie : comment est-elle apparue ? Évolution ou création ? E i ng’ei yenga moko, jiji m’i ie ugam uthum. Eyero kumae: “Anwang’u an gira nia karaman Biblia utie ku lemandha i ie. Bende anyang’ nia kan aworo cik mi Biblia, abikwo ku mutoro man ku kwiocwiny.”

7. Wacikara ngo nitimo ang’o, man ke pirang’o?

⁷ Wan ceke, kadok wabed aradu kunoke judongo, wacikara ngo nikwo ulik, niwacu ve Jukristu de, ve Jukristu ngo de. Jakwenda Yohana ukoro nia ecopere ngo iwa niwotho i lemandha, man i saa ma rom nibedo ku kura mi lembsasa mi tarwang’. (1 Yoh. 1:6) Tekene wabemito anyong’a uneg Yehova i kumwa, ukwayu saa ceke wabed wapoi nia gin moko mbe m’upondo i wang’ Yehova. Kadok nwang’u dhanu copo neno ngo lembe ma wabetimo i aponda de, re Yehova neno gin moko ci ma wabetimo.​—Ebr. 4:13.

8. Ukwayu ngo wabed ku paru ma kani?

⁸ Wacikara nibedo ku paru m’ukoc ku mi dhanu mi ng’om maeni iwi dubo. Jakwenda Yohana ukiewo kumae: “Tek wawacu nia dubo mbe kudwa, nwang’u wawondra giwa.” (1 Yoh. 1:8) I rundi pa jakwenda Yohana, dhanu ma gijai i kum yioyic gibed giyero nia ng’atini romo timo dubo, re asu ebedo ku winjiri ma ceng’ini ku Mungu. Tin bende wabekwo i kind dhanu ma gitie ku paru ma kumeno. Ju ma dupa giyero nia giyio Mungu, re gitie ngo ku nen ma rom ku pa Yehova iwi dubo, asagane dubo mi tarwang’. Yehova uyero nia lembsasa mi tarwang’ utie rac, re dhanu mi ng’om maeni giloko nia ng’atini copo timo tarwang’ kan emaru.

9. Jukristu m’aradu ginwang’u bero ma kani ka gibetimo lembe ma Biblia uyero nia utie atira?

⁹ Jukristu m’aradu gicopo caku winjo paru ma reco mi lembsasa mi tarwang’ i bang’ awiya wadi mi somo man i bang’ jurutic wadi. Dhanu maeno romo caku diyogi nia gin de giyii parune. Lembe  maeno ugam utimo umego moko ma nyinge Aleksandar. Ekoro kumae: “Jumanyir moko ma wabed wasomo kugi gibed gibidha nia atim kugi tarwang’. Giwacu ira nia calu m’aweco ngo ku nyir, nen nia abed atimo ribiri ku co wada.” In bende icopo nweng’iri i wang’ lembe ma kumeno. Ento kan itimo gin ma Biblia uwacu nia tie atira, ibiwinjiri ma ber, ibibedo ku leng’kum ma cuu, ibibedo ngo kud adieng’a m’akeca man ibigwoko mer peri ku Yehova. Ka nja ibed iceriri kara kud itim lembe ma rac, ebidoko iri yot nitimo lembe m’atira. Poi bende nia paru ma rac ma dhanu mi ng’om maeni gitie ko iwi ribiri uai i bang’ Sitani. Pieno kan ikwero nibedo ku paru mi dhanu mi ng’om maeni, nwang’u ‘iloyo ng’atu ma rac.’​—1 Yoh. 2:14.

10. Wec ma nwang’ere i 1 Yohana 1:9, copo konyowa nenedi kara watim ni Yehova ku pidocwiny ma cuu?

¹⁰ Wan wayio mwa nia Yehova re m’utie ku twero mi nyutho iwa nia girang’o m’utie dubo. Eno uketho watimo kero mwa ceke kara kud wapodh i dubo. Ento tek wapodho i dubo, watuco dubo mwane ni Yehova i rwo. (Som 1 Yohana 1:9.) Ka watimo dubo ma pek ke, wasayu kony i bang’ judong cokiri ma Yehova ung’io pi nineno wiwa. (Yak. 5:14-16) Re ukwayu ngo cwinywa ubed upid asu asu iwi dubo moko ma watimo con. Pirang’o? Pilembe Wegwa ma jamer umio Wode ni lam mi jamgony kara dubo mwa uwekere. Yehova ung’eyo thelembe m’uketho eyero nia ebiweko dubo mwa tek wayewo dubone. Pieno ukwayu ngo wawek gin moko ucerwa nitimo ni Yehova ku pidocwiny ma cuu.​—1 Yoh. 2:1, 2, 12; 3:19, 20.

11. Wacopo gwokara nenedi i kum ponji ma romo nyotho yioyic mwa?

¹¹ Wacikara nikwero cen ponji mi ju m’ujai i kum yioyic. Niai ma the cokiri mi Jukristu ucaku, Wonabali ubemedere nitio ku jundra pi niroyo jiji i jutic pa  Mungu ma gigwoko bedoleng’ migi. Pieno, ukwayu wang’ei nineno tung’ tung’ i kind lemandha ku vupo. * Judegi mwa gicopo mewo ndra nikadhu kud i Internet man kud i kusika mi weco ku jurimo i Internet, kara yioyic mwa i Yehova ukwii man kara wawek nimaru umego ku nyimego mwa. Kud iyii ndra maeno pilembe eai i bang’ Sitani!​—1 Yoh. 4:1, 6; Nyu. 12:9.

12. Pirang’o ukwayu wadwok yioyic mwa tek i lemandha ma waponjo?

¹² Kara Sitani kud uketh yioyic mwa ukwii, ukwayu wadwok yioyic mwa tek i Yesu, man wang’ei m’umbe jiji nia ebetimo tic ma lee kara lembakeca pa Mungu upong’. Bende, ukwayu wabed ku genogen ma lee iwi jamiru mandha man ma riek ma tie yo acel kende ma Yehova ubetio ko pi nitelo wi dilo pare tin eni. (Mat. 24:45-47) Pi nidwoko yioyic mwa tek, ukwayu wabed waponj Lembe pa Mungu nja. Tekene wabetimo kumeno, yioyic mwa bibedo ve yen m’ulage unyang’ lee i ng’om. Paulo bende uyero lembe ma rom kumeno i barua m’ekiewo ni cokiri mi Kolosai. Ekiewo kumae: ‘Calu wudaru jolo Kristu Yesu ma Rwoth, e wuwoth i ie kumeno, ma ulegwu nyang’ ma wugombru de i ie, ma wunyang’ i yioyic mwu de.’ (Kol. 2:6, 7) Tek watimo kero nidwoko yioyic mwa tek, Sitani kunoke jupare gibituc ungo nyanok de nicerowa ku wotho i lemandha.​—2 Yoh. 8, 9.

13. Ukwayu wang’ei lembang’o, man pirang’o?

¹³ Ukwayu wang’ei nia ng’om bidaguwa. (1 Yoh. 3:13) Jakwenda Yohana upoyo wiwa nia ‘ng’om ngung’ uvuto i ng’atu ma rac.’ (1 Yoh. 5:19) Calu m’ajiki mi ng’om maeni udhingo ceng’ini magwei, lak kwinyo pa Sitani ubemedere ameda. (Nyu. 12:12) Ebetio kud awic ma nen ungo, calu ve lembsasa mi tarwang’, kunoke vupo mi ju m’ujai i kum yioyic. Bende, ebetio kud awic ma nen, calu ve ragedo ma lake tek m’ebenyayu i kumwa. Sitani ung’eyo cuu nia i ng’ei nindo ma nok, kero m’ebetimo pi nicero tic mwa man pi nikwio yioyic mwa bijik. Dong’ etie lembe mi zungo ngo ka wabeneno nia i ng’om moko jukwero tic mwa zoo, kunoke jukwero theng tije moko. Kadok kumeno de, re umego ku nyimego mwa ma ginwang’iri i ng’om maeno gibeciro. Gibenyutho kamaleng’ nia kadok Sitani utim ang’o i kum dhanu pa Yehova de, gicopo gwoko bedoleng’ migi asu!

14. Wacopo timo ang’o pi nikonyo umego ku nyimego mwa kara gimediri nibedo i lemandha?

¹⁴ Pi nikonyo umego ku nyimego mwa kara gimediri nibedo i lemandha, ukwayu wabed ku kisa i kumgi. (1 Yoh. 3:10, 11, 16-18) Ukwayu ngo wabed wanyuth mer i kindwa kende kende i saa ma lembe tie ber, ento i saa mi peko bende. Ku lapor, nyo ing’eyo ng’atu moko ma wat pare utho man m’ukwayere nia jujuk cwinye kunoke jukonye? Nyo iwinjo pi peko moko ma rek m’uwok iwi Jukristu wedu, man ubekwayere nia jugier Udi Ker migi kendo man jugier udi migi gigi de? Ukwayu ngo wayer ayera kende ni umego ku nyimego mwa nia wamarugi man nia kisa ubenegowa lee i kumgi. Ento lembe ma pire tek utie ninyutho merne ku timo.

15. Nimakere ku 1 Yohana 4:7, 8, ukwayu watim ang’o?

¹⁵ Walubo lapor pa Wegwa mi polo ma jamer, nwang’u wan bende wabenyutho mer i kindwa. (Som 1 Yohana 4:7, 8.) Yo acel ma pire tek ma wacopo nyutho ko  merne utie niweko lembe i kindwa. Ku lapor, ka ng’atu moko utimowa rac man i ng’eye ekwayu kisa, waweko ire pi ninyutho nia wamare, man wadok ungo kendo iwi kosa m’etimone. (Kol. 3:13) Umego moko ma nyinge Aldo de utimo kumeno. Kinde m’ewinjo nia umego moko m’eworo lee uyero lembe ma rac ku nying’ dhanu mi thek pare, can unege lee. Aldo uyero kumae: “Abed akwayu Yehova saa ceke nia ekonya kara kud abed ku paru ma rac iwi umego maeno.” Re Aldo utimo lembe mange de. Ekwayu umegone nia giwok kude i lembanyong’a. Kinde ma gini lembanyong’a kuca, Aldo uwok ukoro ire nia lembe m’eyero ca ugam utime rac dit. Aldo umedo kumae: “Kinde m’umego maeno uwinjo nia kara wec pare ca utima rac, egam ekwayu kisa. Dwande m’ekwayu ko kisa ci uketho anwang’u nia karaman en gire de enyang’ nia eyero lembe ma rac. I ng’ei lembuno, mer mwa udok kakare.”

16-17. Wacikara nitimo ang’o?

¹⁶ Jakwenda Yohana umaru umego pare lee dit man emito gibed ku yioyic ma tek. Mer man adieng’a pare unen kamaleng’ i juk m’emio igi, ma nwang’ere i barua adek m’ekiewo. Etie lembe ma tielo cwinywa lee dit ning’eyo nia jumaco ku jumamon ma gibicibimo ku Kristugi i polo gimaruwa man gidieng’ piwa calu Yohana!​—1 Yoh. 2:27.

¹⁷ Dong’ ukwayu ng’atuman m’i kindwa utii ku juk ma wanwang’u i thiwiwec maeni. emedere niwotho i lemandha, niwacu ewor Yehova i lembe ceke m’ebetimo i kwo pare. Ponj Biblia, man bed ku genogen iwi Bibliane. Dwok yioyic m’itie ko i Yesu udok tek. Kud iwek ponji m’ucungo iwi rieko mi dhanu man ponji mi ju m’ujai i kum yioyic umond i wii. Kud ikwo ve ulik, niwacu ve itie Jakristu man ve itie Jakristu ngo de. Wor cik ma Yehova umio iwi kurajo, man wan ceke wakony umego ku nyimego mwa kara gimediri nibedo i lemandha. Wawek lembe ni ju m’utimowa rac man wakony ju m’utie ku yeny mi kony. Ka watimo kumeno, wabimedara niwotho i lemandha, kadok nwang’u wabenwang’ara ku peko ma nenedi de.