1. Malecad to sowal no 3 Yohani 3, 4, o manan ko papalipahak to falocoˈ ita hani?

NA padamaan no tarokos ci Yohani ko roma tamdaw mafanaˈ to soˈlinay kimad, tiya matengil ningra koya tamdaw padotocay madimadi midoko to Kawas i, maedeng lipahakay cingra. Adihayay ko masiˈayaway noya Krisciyang a pasangaray, misarocoday ci Yohani a paˈicel to pakasoˈlin nangra, samanen pakaynien ci Yohanian ko sowal, malecaday o wawa ningra cangra. Malecaday, maˈaraw ita ko wawa noniyah anca pacekiwan misaˈosi patafang to tireng ci Yihofaan hanaca madimadi a midoko Cingraanan, maedeng o lalipahak ko falocoˈ.—ˈOsien ko 3 Yohani 3, 4.

2. Ci Yohani hano patikami to itiyaay a Krisciyang hani?

² Itini saka 98 miheca, itiniay i niyaroˈ no Ifiso anca i ngata ko kitiraan no tarokos ci Yohani, alatek matedal cingra nai Patmos Kanatal malinahay tayra. Maedeng toya tatokian, misaka dademakan ni Yihofa ko fangcalay saocor mikayat ci Yohanian patikami to itiyaay a Krisciyang. O araaw i, papakalalok cangranan padadotoc pakasoˈlin ci Yisan, hanaca padadotoc midoedo to soˈlinay kimad a dademak.

3. Oniya lalakaw wa pacaˈof to maanan a salicay hani?

³ Edenganto a maˈoripay a tarokos ci Yohani itiya. Tada calemcemay cingra, samanen iraay ko makaniway a singsi i kasakopang, tatiihay ko pifiyor to romaroma tamdaw. * (1 Yohani 2:18, 19, 26) Oniya tamdaw sao mafanaˈay ci Yihofaan, kawra cowa pidofdof to limoˈot Ningra. Oniya lalakaw wa milengo to mihadakan ni Yohani i tikami a sapakalalok, halo pacaˈof to tolo a salicay: Midoedo to soˈlinay kimad dademak o maanan ko  tatodong? O maanan a demakan ko mamicara kitaanan? Wa ngaˈay kita samaan a padama to tao midoedo to soˈlinay kimad a dademak?

4. Mikitini 1 Yohani 2:3-6 ato 2 Yohani 4, 6, sapidoedoaw to soˈlinay kimad a dademak, sasamaan ko hademak hani?

⁴ Sapidoedoaw to soˈlinay kimad a dademak, wa isalakatho kita minanam to soˈlinay kimad no Fangcalay Cudad. Roma i, wa midofdof kita ci Yihofaan ‘midofdof to limoˈot Ningra.’ (ˈOsien ko 1 Yohani 2:3-6; 2 Yohani 4, 6.) Toniya pakayraan, malefotay ko patirengan ni Yis a taˈarawan. Mihaenay, sapidofdofaw kita ci Yihofaan, mamisarocod a minanam ci Yisan.—Yohani 8:29; 1 Pitiro 2:21.

5. Wa tatanektek ko pakasoˈlin ita to maanan hani?

⁵ Sapidoedoaw to soˈlinay kimad a dademak, o tatanektek ko pakasoˈlin ita to ngaˈayay tadiˈecen ci Yihofa, o sowal Ningra i Fangcalay Cudad sahtoay o soˈlinay kimad. Roma i, papakasoˈlin kita to ci Misiya ci Yis. Anini ˈalomanay tamdaw cowa pakasoˈlin to o hongti no Hongti Kitakit no Kawas ci Yis. Mirikecay ci Yohani, wa ‘adihayay ko misamangahay’ miolat to tamdaw. Ano caka tatodong ko kafanaˈ ci Yihofaan aci Yisan, caka tanektek ko pakasoˈlln, wa madolo a malipalaw. (2 Yohani 7-11) Sanay ci Yohani” “Cima ko misamangahay hani? Cokoya minaˈayay to ci Kristo ci Yis han?” (1 Yohani 2:22) Ano sakaecaaw ka malipalaw kita, misongilaˈ a micekiw to Fangcalay Cudad, mihaen ngaˈ soˈliˈlin a mafanaˈ ci Yihofaan aci Yisan, ngaˈay pakahapinang to iraay ko soˈlinay kimad no mita.——Yohani 17:3.

6. O kaemangay Krisciyang wa sinanot miconged to maanan hani?

⁶ Polong a Krisciyang o mamiconged to harateng no hekal. (1 Yohani 2:26) Mangalef ko pisinanot no kaemangay a Krisciyang. Ci Yalikesiya * o 25 ko mihecaan a fafahiyan salikaka i Frans, sanay cingra: “Ano micudad kako i, pasifanaˈay ko singsi to sinkalon ato roma kimad tamiyanan, pairaay to sasa ako to soˈlinay kimad. Latekay, o harateng no hekal tada misolotay takowanan. Kawra cowa ko ngangaˈay pakasoˈlinen ako a maemin ko sowal no singsi, o mamitengil to samanay ko sowal ni Yihofa.” Pinaay lipay ko mipalakan ni Yalikesiya micekiw to “Mikicowaay Ira ko ˈOrip? Fahal Sanay Ira Anca Misangaˈan?” a cudad, ikorto cowato ka cisasa cingra. Sanay cingra: Mahapinangay ako o soˈlinay kimad ko sowal no Fangcalay Cudad.  Midoedo to palinian no Fangcalay Cudad a maˈorip parihadayay to falocoˈ ako, milifokay to soˈliˈlinay a lipahak.”

7. Aka a pisamaan ko demak ita? Misamanay?

⁷ Ano hakowato ko mihecaan polong a Krisciyang oha mamisinanot, aka o potal aca ko sao midokoay ci Yihofaan, itini aikor midemak to mararaway a demak. Paihkalay ci Yohani, ano midemak kita to malafoay a demak, cowato ko midoedoay to soˈlinay kimad a dademak. (1 Yohani 1:6) Sapilifokaw kita to pihayda ni Yihofa, o waywayan a dademak o papaihkalen to ˈodingaray. Ano midemak kita to tatiihay a demak, soˈlin cowa ka ˈaraw no tao, o mamaˈaraw ni Yihofa.—Hipray 4:13.

8. Aka mafiyor kita to maanan a pinengneng to demak hani?

⁸ Aka mafiyor kita to pinengneng no hekal tamdaw to raraw. Sanay ci Yohani: “Awaay ko raraw ako ano saan kita a somowal i, o misamangahay kita to tireng.” (1 Yohani 1:8) Itini lintad ni Yohani, sowal no misafelitay to kimad a tamdaw, soˈlin padeteng a mararaw ko tamdaw, wa ngaˈayho padotoc a malo widang no Kawas sanay. Anini, malecaday ko harateng no ˈalomanay tamdaw. Pakasoˈlinay to Kawas sanay ko ˈalomanay, kawra pakayni i o maanan ko raraw, cowa pihayda cangra to pinengneng ni Yihofa, mangalef ko pakayniay madadiˈiyay a demak, haratengay sanay cangra a midemak. O roma waywayan o mararaway sanay ko pinengneng ni Yihofa, kawra oniyah a kaolahan, o pakayraan a maˈorip sanay cangra.

9. O kaemangay a Krisciyang tanektek ko pidofdof to palinian no Fangcalay Cudad wa ira ko maanan a haepoc hani?

⁹ O kaemangay a Krisciyang wa mikiriwiˈ ko macadaay a saroero alatek, samanen mararaway ko pinengneng no cafay a micudad to madadiˈiyay a demak. Iraay ko mahaenay a nalifetan ni Yalisanta. Sanay cingra: “O roma fafahiyan i picudadan mikayhiday takowanan,  madadiˈi cangraanan. Sanay cangra, ano awaay ko fafahiyan a widang ako, manaˈayayho cangranan, maedeng o tongsinlin sanay.” Ano masiˈayaw iso ko malecaday a sapalifet, haratengen, tanektek ko pidofdof to palinian no Fangcalay Cudad wa sanengseng ko kaˈorip iso, midipot to rihadayay a tireng, wa ngaˈayho padadotoc a malo widang ni Yihofa. Ano malaˈosi ko piconged iso to sakayhid, wa matongal ko katanektek. Roma i haharatengen iso, o mararaway a pinengneng to madadiˈiyay sahtoay o mikitiniay ci Satanan. Ano caka fiyor no hatiniay a pinengneng kiso, o ‘pakalowiday toya mariˈangay.’—1 Yohani 2:14.

10. Mikitini 1 Yohani 1:9, hano wa ngaˈay kita tano tingalaway a falocoˈ padadotoc a midoko to Kawas hani?

¹⁰ Makahiay kita micada to pinengneng ni Yihofa to raraw, wa misaˈicel miliyas to sakararawaw. Kawra, ano soˈlin mararaw kita, wa pasayra ci Yihofaan mitolon, mikifalocoˈ a mihai to mararaway i Cingranan. (ˈOsien ko 1 Yohani 1:9.) Ano pakidemay ko raraw ita, wa pasayra malohemay malitengay micangacang to sadama, samanen miocoran ni Yihofa cangra midimokos kitaanan. (Yakop 5:14-16) Hamaan padotoc a makesem kita to ˈayaway a raraw. Misamanay? Samanen maolahay ko kakarayan Wama kitanan, miocoray to wawa Ningra mihadak to sapatefoc, sapisodod to raraw ita. Ano somowalay ci Yihofa to mamisodod to soˈlinay a pasasiyor a tamdaw, o mamalaˈosi ko sowal Ningra. Mansa, ano o mananto ko raraw ita i saˈayaw, wa ngaˈay tano tingalaway a falocoˈ padadotoc a midoko to Kawas.—1 Yohani 2:1, 2, 12; 3:19, 20.

11. O roma sasowalen wa mifasaw to pakasoˈlin ita, sasamaan kita midipot to niyah hani?

¹¹ Roma i, aka pakasoˈlin to sasowalen no misafelitay to kimad a tamdaw. Mikitini katomireng no kasakopang no Krisciyang, padotocay ci Satan mihalaka sapipalakaw to pakasoˈlin no Krisciyang. Mihaenay, hahapinangen ita ko  soˈlinay ato misamangahay. * O miˈodisay to pihakelongan ita a tamdaw misakadademakay to sapicawmaˈ to widang a wangcan mipatenak to mangah, mifasaw to pakasoˈlin ita ci Yihofaan ato olah to salikaka. Haratengen, oniya mangah sahtoaay o mikitiniay ci Satanan, aka a malipalaw kita haw!—1 Yohani 4:1, 6; Paˈarawan 12:9.

12. Hano papadotoc kita patanektek to pakasoˈlinay falocoˈ hani?

¹² Pakayni sapicoˈayaw to saˈodis ni Satan, wa tongalen ita ko pitadiˈec ci Yisan, pakasoˈlin to kalimlaan ko demak ningra i araaw no Kawas. Tatadiˈecenho ita ko madimadiay citanengay a koli, pakasoˈlin to edengan cangra ko minilnilan ni Yihofa mikayat to likakawa Ningra. (Matay 24:45-47) Wa micerid kita minanam to Fangcalay Cudad patanektek to pakasoˈlin no niyah. Mihaen, o pakasoˈlin ita mamalecad o tangongolay ko lamit a kilang, matongal ko tanektek. Malecaday ko sowal ni Pawlo i Kolosay, sanay cingra: ‘Ano micadaayto kamo to tapang ci Kristo Yisan, ka padadotoc a malacecay cingranan, malacafay cingranan, doedoen ko macadaay namo a sapasifanaˈ, itini lalomaˈ ningra a palamit a mapatireng ko niyah, tanektek ko pakasoˈlinay.’ (Kolosay 2:6, 7) Ano padadotoc kita patanektek to pakasoˈlin, ano samaanto ko demak ni Satan ato mikotoday cingranan, cowa ko papakangiyangi kitaanan.—2 Yohani 8, 9.

13. O sasadayen no falocoˈ ita ko maanan, misamanay hani?

¹³ O ˈaˈinteh ko hekal tamdaw kitaanan, mihaenay salakaten ita misaday ko falocoˈ. (1 Yohani 3:13) Sanayho ko sowal ni Yohani: ‘Polong no hekal makowanay noya mariˈangay.’ (1 Yohani 5:19) Pakayni kangata no salikoray romiˈad, mafanaˈay ci Satan cowato ka hakowa ko romiˈad no niyah. Matongalay ko kangolaw ningra, ciharatengay sapicongedaw to mitosilay a tayal ita, ato mipalak to pakasoˈlin ita. (Paˈarawan 12:12) Mikayhid cingra kitanan midemak to malafoay a demak, misaka dademakayho to misafelitay to kimad a tamdaw patenak to mangah. Cowa ko hatiniay aca a pakayraan, mifekadayho to saˈodis kitaanan. Mansa itini roma kitakit ato kasakilac, makecengay ko roma a tayal ita, anca masongilaˈay a makeceng. Kawra o itiniay a salikaka kamayan mitafo to madimadiay. Misawacayay konini ano samaanto ko demak ni Satan, wa tahatolas kita a madimadi.

14. Sapadamaaw to salikaka midoedo to soˈlinay kimad a dademak, sasamaan ko demak ita hani?

¹⁴ Pakayni sapadamaaw to tao midoedo to soˈlinay kimad a dademak, o papaihkal kita to siniˈadaay a falocoˈ cangranan. (1 Yohani 3:10, 11, 16-18) Itini kangaˈayan no pakayraan masasiolah kita, itini pasangaray pakayraan padiheko to falocoˈ nangra. Tinakoen, malahdaway ko salawina no roma salikaka, wa ngaˈay kiso pafeli cingranan to sahinom ato ciepocay a sadama han? O roma salikaka tahapadesay, adihayay ko malahdaway dafong, wa ngaˈay kiso padama cangranan miliyaw patireng to lomaˈ anca kasaˈopoan han? Cowa ko tano sowal aca kita to maolahay to salikaka, wa tano waywayan a paihkal to siniˈadaay a falocoˈ.

15. Pakayni 1 Yohani 4:7, 8, o sasamaan ko hademak ita hani?

¹⁵ Ano todongen ita ko sidaˈitay Wama i kakarayan ci Yihofa, wa masasiolahto. (ˈOsien ko 1 Yohani 4:7, 8.) O cecay pakayraan ita paihkal to olah i, misodod to tao. Tinakoen, ano midokaˈ ko salikaka kitaanan, ikor miliˈayay, oha sasododen ita cingra, ecato pinaˈeng i falocoˈ toniya demak. (Kolosay 3:13) Cecay faˈinayan salikaka ci Aeto, matengilay ningra ko cecay kangodoan ningra a salikaka milikafay  to finacadan ningra. Sanay cingra: “Padotocay kako a mitolon ci Yihofaan, micangacang Cingranan padama takowanan aka ira ko tatiihay harateng toya salikaka.” Roma i, mitahidangan ni Aeto koya salikaka malacafay a mitosil. Itini pitosilan, pasowalan ni Aeto koniya salikaka, o sowal ningra samanay mifiyor cingranan. Sanay ci Aeto: “Mafanaˈ cingra to masomaday kako i, mikifalocoˈay a miliˈay takowanan. Mikitini kasomowal ningra mahapinangay ako, tada makesemay cingra mihaen ko sowal no niyah. Orato, malakangaˈayayto kami.”

16-17. Wa misetek kita to falocoˈ samaan ko hademak hani?

¹⁶ O mihadakan ni Yohani a tikami a sapakalalok pahapinangay kitaanan, tada maolahay cingra to salikaka, makalimay ira ko tanektekay a pakasoˈlin nangra. O manilnilay malacafay ci Yisan tayra kakarayan mikowan a Krisciyang malecaday ci Yohanian, naifalocoˈ a ciharateng kitaanan. Mafanaˈ tonini, tada mitemeray to falocoˈ ita!—1 Yohani 2:27.

¹⁷ Nanay paifalocoˈen ita a minaˈeng ko masowalay toniya lalakaw a sapakalalok, misetek to falocoˈ midoedo to soˈlinay kimad a dademak, itini polong no kaˈorip midofdof ci Yihofaan. Misongilaˈ a micekiw to Fangcalay Cudad, pakasoˈlin to o soˈlinay kimad ko sowal ni Yihofa, paˈicelen ko pakasoˈlin ci Yis Kristoan. Aka mafiyor no harateng no hekal ato sasowalen no misafelitay to kimad a tamdaw. O pidoko ci Yihofaan aka o potal aca ko sangaˈayen, coˈayen ko sakayhid, aka a mararaw. Tooren ko palinian ni Yihofa a maˈorip. Padamaenho ko salikaka mitafo to tanektekay, itini pisaalian nangra mihadak to sapadama, makahiho a misodod to pakararaway kitaanan a tamdaw. Ano mihaen ko demak ita, ano o mananto ko masiˈayaway sapalifet, wa ngaˈay padadotoc a midoedo to soˈlinay kimad a dademak.