1. Songon na ipatugah bani 3 Johannes 3, 4, aha do na mambahen hita marmalas ni uhur?

TONTU malas tumang ma uhur ni si Johannes dob itangar ia totap do setia halak na iurupi ia marlajar hasintongan. Songon anakni do sidea ganupan. Sanggah bahat parsoalan ni sidea, marusaha do ia mangurupi sidea ase totap toguh haporsayaonni. Hita pe, malas do uhurta anggo niombahta atap pe parlajar Bibelta ujungni boi ididi anjaha totap setia mangidangi Jahowa.​—Basa 3 Johannes 3, 4.

2. Aha do tujuan ni si Johannes manulis tolu suratni?

² Bani tahun 98 M, ra do si Johannes tading i Epesus atap pe dohor hunjai. Ra do ia pindah hujai dobkonsi ibebaskon hun penjara i pulou Patmos. Bani panorang ai do ra itogu-togu Jahowa ia laho manulis tolu surat. Tujuanni surat ai ibahen ai ma laho mangurupi halak Kristen ijia ase totap toguh haporsayaonni bani Jesus, anjaha totap mardalan ibagas hasintongan.

3. Bani artikel on, sungkun-sungkun aha do na laho ibalosi hita?

³ Humbani ganup apostel ni Jesus, pitah si Johannes mando na manggoluh. Jadi haru do uhurni halani domma adong parpodah na kahou na masuk hubagas kuria. * (1 Joh. 2:18, 19, 26) Ihatahon halak na murtad ai do anggo sidea porsaya bani Jahowa, tapi lang ihorjahon sidea parentah-Ni. Bani artikel on, iulas hita ma podah na ibere si Johannes marhitei suratni ai. Dong tolu sungkun-sungkun na laho ibalosi hita: Aha do artini mardalan ibagas hasintongan? Aha do na mambahen hita lang be mardalan ibagas hasintongan? Anjaha sonaha hita boi mangurupi na legan ase totap mardalan ibagas hasintongan?

4. Domu bani 1 Johannes 2:3-6 ampa 2 Johannes 4, 6, aha do artini mardalan ibagas hasintongan?

⁴ Ase boi hita mardalan ibagas hasintongan, maningon ibotoh hita ma hasintongan na iajarhon ibagas Bibel. Leganni ai, maningon ‘ihorjahon hita do titah ni Jahowa’. (Basa 1 Johannes 2:3-6; 2 Johannes 4, 6.) Totap do Jesus unduk hubani Jahowa. Halani ai, anggo sihol hita unduk bani Jahowa, maningon marusaha ma hita maniru Jesus.​—Joh. 8:29; 1 Ptr. 2:21.

5. Aha do na maningon ihaporsayai hita?

⁵ Ase boi totap mardalan ibagas hasintongan, maningon porsaya ma hita sintong do isi ni Bibel. Maningon porsaya ma homa hita Jesus do Mesias na ijanjihon. Sonari on bahat do halak lang porsaya anggo Jesus domma ipilih Naibata gabe Raja bani Harajaon-Ni. Si Johannes mangkatahon domma bahat “parpodah na kahou”. Jadi anggo lang toguh haporsayaonta, gabe boi ma ibahen sidea hita manlembang. (2 Joh. 7-11) Si Johannes mangkatahon, ‘Ise do siparladung, anggo lang halak na marnalangkon Kristus in do Jesus?’ (1 Joh. 2:22) Jadi ase ulang ipakahou hita, maningon iparlajari hita ma Bibel. Ai do carani hita boi mananda Jahowa pakon Jesus. (Joh. 17:3) On ma na mambahen lambin toguh haporsayaonta bani hasintongan.

6. Aha do na mambahen na maposo gabe lang mardalan ibagas hasintongan?

⁶ Ganup halak Kristen tarlobih ma na maposo, maningon jaga do ase ulang kahou ibahen ajaran ni jolma. (1 Joh. 2:26) Sada botounta na margoran si Alexa, * hun Prancis na marumur 25 tahun mangkatahon, “Iajarhon do i sikolahku pasal evolusi ampa bahat ajaran ni jolma. Halani ai gabe galek ma haporsayaonku. Sipata, marosuh do ahu manangar ajaran ni sidea. Tapi husadari do lang boi mintor porsaya ahu bani ganup na ihatahon gurungku. Sasintongni ajaran ni Bibel do na maningon huhaporsayai.” Jadi iparlajari ia ma buku Kehidupan—Bagaimana  Asal Mulanya? Melalui Evolusi atau Penciptaan? Dob piga-piga minggu, gabe toguh ma use haporsayaonni. Nini use, “Gabe pos ma uhurhu ajaran ni Bibel dassa na sintong. Domma huidah anggo hudalankon podahni, gabe martuah do ahu janah damei huahap.”

7. Aha do na lang boi ihorjahon hita, janah mase?

⁷ Sanggah mangidangi Jahowa, lang boi hita marsipakulah-kulah. Anggo mardalan hita ibagas hasintongan, hape ihorjahon hita ope na masambor, marladung do hita ijai. (1 Joh. 1:6) Ase marosuh Jahowa hubanta, maningon ihorjahon hita do na sintong. Dingat ma age pe lang ididah halak pambahenanta, tapi anggo Jahowa itonggor do ai.​—Heb. 4:13.

8. Aha do na maningon itulak hita?

⁸ Ulang ma hita mangihutkon aha na ihatahon buei halak pasal dousa. Si Johannes mangkatahon, “Anggo ihatahon hita seng dong dousanta, ipaoto-oto hita do dirinta.” (1 Joh. 1:8) Bani panorang ni si Johannes, ihatahon halak na murtad do anggo sidea boi totap marhasoman pakon Naibata, hassi pe ihorjahon sidea na sambor. Sonai ma homa pangahap ni buei halak sonari on. Porsaya do sidea bani Naibata, tapi lang ihorjahon sidea parentah-Ni. Umpamani, lang setuju sidea bani titah ni Jahowa pasal seks. Ihatahon sidea do lang salah mangkorjahon aha pe na mambahen malas uhurni.

9. Aha do gunani bani na maposo anggo idalankon sidea prinsip ni Bibel?

⁹ Halani bahat hasoman i sikolah atap pe i parhorjaan mangkorjahon na lepak, ra do lang urah na maposo mandalankon prinsip ni Bibel. Ai ma na iahapkon si Aleksander. Nini do, “Dong hasomanku naboru i sikolah na mangarahkon ahu berhubungan seks. Halani lang dong halletku  ihatahon sidea ma ahu homo.” Anggo sonai do homa na masa bamu, dingat ma aha do gunani anggo idalankon ho prinsip ni Bibel. Umpamani, lambin martuah ma goluhmu, lambin sehat, janah lambin orot bani Jahowa. Anggo lang ra ho mangkorjahon na sambor, lambin urah ma holi ho mangkorjahon na sintong. Aha na ihatahon buei halak pasal seks, sasintongni na mangihutkon pingkiran ni Sibolis do ai. Anggo lang ra ho mangihutkon sidea, domma ‘italuhon ho parjahat in’.​—1 Joh. 2:14.

10. Domu bani 1 Johannes 1:9, aha do na porlu ibahen hita ase boi mangidangi Jahowa humbani panggora ni uhur na borsih?

¹⁰ Porsaya do hita pitah Jahowa do na boi manontuhon ija na lepak pakon na sintong. Anjaha marusaha do hita ase lang mangkorjahon dousa. Tapi anggo ihorjahon hita na lepak, martonggo ma mangindo hasasapan ni dousa. (Basa 1 Johannes 1:9.) Porini ihorjahon hita dousa na banggal, pindo ma pangurupion bani sintua, halani sidea do na igunahon Jahowa laho mansarihon hita. (Jak. 5:14-16) Hassi pe sonai, ulang ma lalab manolsoli diri halani dousanta hinan. Mase? Halani domma ibere Jahowa tobusan laho manasap dousanta. Jadi anggo manosal hita bani dousanta janah ra hita mubah, isasap Jahowa do ai. Artini lang be idingat-dingat Ia ai. Gabe boi ma hita mangidangi-Si humbani panggora ni uhur na borsih.​—1 Joh. 2:1, 2, 12; 3:19, 20.

11. Aha do na maningon ibahen hita ase ulang ipakahou ajaran ni halak na murtad?

¹¹ Maningon itulak hita do ajaran ni halak na murtad. Humbani abad na parlobei igunahon Sibolis do bahat halak na murtad laho mambahen galek haporsayaon ni halak Kristen. Halani ai, maningon ibotoh hita ma ija do na sintong ampa na  lang. * Sonari, igunahon munsuhta do Internet atap media sosial laho mambahen galek haporsayaonta bani Jahowa janah lang mangkaholongi sanina botou. Dingat ma ladung do hata ni sidea janah humbani Sibolis do ai. Jadi tulak ma ai!​—1 Joh. 4:1, 6; Pangk. 12:9.

12. Mase maningon ipatoguh hita haporsayaonta bani hasintongan?

¹² Ase ulang galek haporsayaonta, maningon ipatoguh hita ma haporsayaonta hubani Jesus. Maningon ibotoh hita do sonaha Jahowa manggunahon Jesus laho pasaudkon harosuh-Ni. Anjaha maningon porsaya do homa hita bani juakjuak na bujur anjaha na maruhur. (Mat. 24:45-47) Ase porsaya hita bani ganupan ai, maningon tongtong ma hita marlajar Bibel. Haporsayaonta na toguh dos songon hayu na bagas uratni. Pasal ai pe, ongga do ihatahon si Paulus bani halak Kristen i Kolosse. Nini do, “Songon panjalo nasiam bani Kristus Jesus, Tuhan in, sonai ma marparlahou nasiam ibagas ia. Marurat anjaha ipauli-uli ibagas ia, jonam marhaporsayaon.” (Kol. 2:6, 7) Jadi anggo ipatoguh hita haporsayaonta, lang boi Sibolis atap pe halak i dunia on parontihon hita laho mardalan ibagas hasintongan.​—2 Joh. 8, 9.

13. Aha do na dob ibotoh hita, janah mase?

¹³ Domma ibotoh hita sogam do uhur ni halak i dunia on hubanta. (1 Joh. 3:13) Domma ipasingat si Johannes anggo “ganup dunia on ibagas kuasa ni hajahaton do”. (1 Joh. 5:19) Halani lambin dohor ujung ni dunia on, lambin manggila ma Sibolis. Ibotoh ia pondok mando panorangni. (Pangk. 12:12) Halani ai, inunuti ia do mambahen galek haporsayaonta. Marusaha do ia ase hita mangkorjahon parriah-riahon. Igunahon ia do ajaran ni halak na murtad laho pakahouhon hita. Igunahon ia do homa halak i dunia on laho mangarsik-arsik hita. Dob ai, marusaha do ia parontihon horja parambilanonta. Halani ai ma bahat pamarentah na manlarang horjanta. Tapi hassi pe ilarang, totap do sidea setia mangidangi Jahowa. Hunjai taridah ma lang soal aha pe na ibahen Sibolis hubanta, boi do hita totap setia mangidangi Jahowa.

14. Sonaha hita boi mangurupi sanina botou ase totap mardalan ibagas hasintongan?

¹⁴ Urupi hita ma sanina botou ase totap mardalan ibagas hasintongan marhitei patuduhkon idop ni uhur hubani sidea. (1 Joh. 3:10, 11, 16-18) Patuduh hita ma holong hubani sidea lang pitah sanggah dear situasini. Tapi sanggah sunsah pe maningon totap ma ihaholongi hita sidea. Umpamani, ai dong do ibotoh ham hasomanta na baru ope matei na hinaholonganni? Ai porlu do sidea iapoh atap pe iurupi? Ai dong do itangar ham hasomanta na hona bencana janah porlu iurupi laho padearhon Balei Harajaon atap pe rumahni? Patuduh hita ma holong ampa idop ni uhur lang pitah marhitei parsahap, tapi na sipontingan marhitei pambahenan.

15. Domu bani 1 Johannes 4:7, 8, aha do na porlu ibahen hita?

¹⁵ Anggo ipatuduh hita holong bani sanina botou, dos do ai hita maniru Jahowa, Bapanta na parholong in. (Basa 1 Johannes 4:7, 8.) Sada cara hita patuduhkon holong ai ma marhitei ra marsisasapan  dousa. Umpamani, ra do adong sanina botou na mambahen borit uhurta. Halani ai ra ma hita manasap salahni janah lang idingat-dingat hita be ai. (Kol. 3:13) Ai ma na iahapkon hasomanta na margoran si Aldo. Dong sada sanina i kuriani na mangkatahon na lang dear pasal sasada halak na sasuku pakonsi. Gabe borit ma uhur ni si Aldo. Nini ma, “Torus ma ahu martonggo hubani Jahowa ase ulang lalab sogam uhurhu bani sanina ai.” Tapi dong ope na ibahen si Aldo. Iarahkon ia ma sanina ai marbarita. Ijai ma ihatahon ia bani sanina ai domma borit uhurni manangar hatani pasal halak na sasukuni ai. Nini si Aldo, “Mangaku salah ma ia hubangku. Humbani parsahapni, taridah ma ia manosal bani hatani ai. Sonari domma orot hanami marhasoman janah lang idingat-dingat hanami be pasal ai.”

16-17. Aha do na sihol bahenonta?

¹⁶ Holong anjaha parduli do si Johannes bani saninani. Taridah do holongni ai humbani podah na dong bani tolu suratni ai. Tontu malas do uhurta halani mambotoh parholong janah parduli do homa ganup halak na laho mamarentah pakon Jesus.​—1 Joh. 2:27.

¹⁷ Jadi, dingat ma ganup podah na iulas bani artikel on. Tongtong ma mardalan ibagas hasintongan. Horjahon ma ganup parentah ni Jahowa. Parlajari ma Bibel janah patoguh ma haporsayaonmu bani ajaranni. Patoguh ma homa haporsayaonmu bani Jesus. Ulang ra hita manangar ajaran ni jolma pakon halak na murtad. Ulang ma hita marsipakulah-kulah, anjaha ulang ra hita mangkorjahon na lepak. Urupi ma sanina botou ase totap mardalan ibagas hasintongan marhitei ra manalpuhon hasalahanni, janah urupi ma sidea sanggah mamorluhon. Anggo sonai ibahen hita, boi ma hita totap mardalan ibagas hasintongan.