1. Bagi si ikataken bas 3 Johanes 3, 4, kai nge si erban meriah ukurta?

BANCI nge bayangkenndu uga riahna iakap Rasul Johanes sanga ibegina kalak si isampatina erlajar kebenaren terus setia ngelayani Jahwe? Kalak Kristen si setia enda enggo ianggapna bagi anak-anakna secara rohani. Melala masalah si iadapi kalak e, emaka iusahaken Johanes kel mpegegehi kiniteken kalak e. Kita pe pasti meriah ukurta adi anakta mbaktiken dirina janah terus setia ngelayani Jahwe, la soal ia anakta sendiri ntah pe anak-anakta secara rohani.​—Baca 3 Johanes 3, 4.

2. Kai nge tujun arah surat-surat si itulis Johanes?

² Bas tahun 98 Masehi, banci saja Johanes tading i deher Epesus. Banci saja pindah ia ku je kenca ibebasken ia arah penjara si lit i Pulau Patmos. Kira-kira bas paksa si e, tersuruh ukurna iban kesah si badia guna nulis telu surat. Tujun surat e ngiahken kalak Kristen si setia gelah tetap erkiniteken nandangi Jesus janah tetap erdalan i bas kebenaren.

3. Penungkunen kai saja nge kari si man bahasenta?

³ Johanes me rasul si terakhir si nggeluh denga, janah paksa si e latih kel ukurna perban lit pengaruh ajaren guru-guru palsu bas runggun. * (1 Joh. 2:18, 19, 26) Ikataken kalak murtad e maka itandaina Dibata, tapi la ipatuhina perentah-perentah Jahwe. Mari sibahas nasehat-nasehat si lit i bas surat Johanes. Sanga sibahas  kari, sijawap telu penungkunen enda: Kai ertina erdalan i bas kebenaren? Kai saja si banci erban kita lanai erdalan i bas kebenaren? Janah uga kita banci sisampat-sampaten gelah banci tetap bas kebenaren?

4. Menurut 1 Johanes 2:3-6 ras 2 Johanes 4, 6, kai nge si perlu silakoken gelah banci erdalan i bas kebenaren?

⁴ Gelah banci erdalan i bas kebenaren, perlu siteh kebenaren si lit bas Pustaka. Selain si e, arus ‘sipatuhi perentah-perentah Jahwe.’ (Baca 1 Johanes 2:3-6; 2 Johanes 4, 6.) Ibereken Jesus usihen si sempurna i bas matuhi Jahwe. Emaka sada cara si penting i bas matuhi Jahwe eme alu megermet ngikutken usihen si ibereken Jesus.​—Joh. 8:29; 1 Pet. 2:21.

5. Nandangi kai kita arus tek?

⁵ Gelah terus erdalan i bas kebenaren, arus kita tek maka Jahwe e Dibata kebenaren. E ertina tek kita maka kerina si ikatakenNa bas Pustaka eme kebenaren. Arus ka kita tek maka Jesus e Mesias si ijanjiken. Gundari enterem kalak si sangsi maka Jesus enggo ilantik jadi Raja i bas Kerajan Dibata. Ipersingeti Johanes maka “nterem penipu,” si banci erban kalak sesat. Banci isesatken kalak e kalak si la paguh kinitekenna nandangi kebenaren kerna Jahwe bage pe Jesus. (2 Joh. 7-11) Itulis Johanes, “Ise kin si perbual e, adi la kin ia si nulak Jesus Kristus?” (1 Joh. 2:22) Sada ngenca carana gelah ula kita kena tipu eme alu mpelajari Pustaka si Badia. Alu bage sitandai me Jahwe bage pe Jesus. (Joh. 17:3) Janah tek kita maka enggo sidat kebenaren.

6. Kai salah sada tentangen si iadapi anak muda Kristen si banci erban ia ngadi erdalan bas kebenaren ?

⁶ Kerina kalak Kristen arus hati-hati gelah ula itipu ajaren manusia. (1 Joh. 2:26) Khususna anak muda Kristen perlu hati-hati nandangi bahaya enda. Sekalak turang seninata arah Prancis nari si umurna 25 tahun si gelarna Alexia, * ngataken, “Sanga aku sekolah denga  kupelajari kerna ajaren evolusi ras ajaren manusia si deban. Ajaren e erban aku sangsi nandangi kebenaren. Mon-mon, tertarik aku man ajaren e. Tapi rukur ka aku gelah ula mis aku tek man kerina si iajarken guruku adi la lebe kubuktiken sendiri kai si iajarken Pustaka.” Ipelajari Alexia me buku Kehidupan​—Bagaimana Asal Mulanya? Melalui Evolusi atau Penciptaan? Piga-piga minggu kenca ipelajarina buku e, lanai ia sangsi. Nina Alexia, “Kubuktiken sendiri maka Pustaka e isina kebenaren. Janah sadar aku adi kuikutken nasehat-nasehat Pustaka banci dame kuakap janah meriah ukurku.”

7. Nandangi kai kita arus hati-hati, janah engkai?

⁷ Kerina kalak Kristen la soal nguda denga ntah pe enggo metua arus hati-hati gelah ula tempa-tempa teridah ngelayani Jahwe tapi ngelakoken ka kai si la mehuli. Ikataken Johanes maka la banci kita erdalan i bas kebenaren tapi terus silakoken dosa. (1 Joh. 1:6) Adi meriah ateta siban ukur Jahwe, perlu lalap siinget maka idah Jahwe kerina perbahanenta. Jadi, aminna pe la lit si ngidah perbahanenta sanga kita sisada, Jahwe banci idahNa.​—Heb. 4:13.

8. Kai si arus situlak?

⁸ Arus situlak perukuren doni kerna dosa. Itulis Rasul Johanes, “Adi ninta, ‘La lit dosata,’ sitipu kap dirita.” (1 Joh. 1:8) Bas jaman Johanes, ikataken kalak murtad maka tetap nge kita banci jadi teman Dibata amin pe terus silakoken kai si la mehuli. Gundari, kita nggeluh i tengah-tengah kalak si bage carana rukur. Ikatakenna tek ia man Dibata, tapi la ia setuju man kai si ikataken Dibata kerna dosa, khususna kerna seks. Kai si ianggap Dibata dosa, ianggap kalak e pilihen pribadi ntah pe gaya hidup.

9. Manpaat kai si idat anak muda adi ikutkenna nasehat arah Pustaka?

 ⁹ Perban rusur anak muda Kristen ipengaruhi cara rukur si la benar kerna seks bas sekolah ntah pe bas ingan erdahin, emaka mesera iakap kalak e njaga perukuren si benar. E me si terjadi man Aleksandar. Nina, “Piga-piga diberu bas sekolahku rusur kel mpengaruhi aku gelah erhubungen seks ras kalak e. Perban la lit rondongku, iakap kalak e aku homo.” Adi bage sangana si iadapindu, ingetlah kai manpaatna adi terus siikutken nasehat Pustaka. Banci terus jagandu harga dirindu, la kam kena penakit, tenang ukurndu, janah mehuli hubungenndu ras Jahwe. Adi ngasup kam ngelawan godan e, reh nukahna me kapndu ngelakoken kai si benar. Inget ka lah maka cara rukur si salah kerna seks rehna i bas Setan nari. Adi itulakndu cara rukur doni enda, ‘italukenndu me si jahat.’​—1 Joh. 2:14.

10. Menurut 1 Johanes 1:9, kai si arus silakoken gelah banci silayani Jahwe alu pusuh peraten si bersih?

¹⁰ Siakui maka Jahwe ngenca si lit hakna nentuken perbahanen kai saja si termasuk dosa. Siusahaken asa ngasupta gelah la ngelakoken dosa. Tapi adi enggo silakoken dosa, siakuilah kesalahenta e man Jahwe i bas toto. (Baca 1 Johanes 1:9.) Janah adi enggo silakoken dosa si serius, pindolah penampat pertua perban enggo ilantik Jahwe kalak e guna nampati kita. (Jak. 5:14-16) Tapi, ula terus sisalahken banta perban dosa si enggo pernah silakoken. Engkai? Perban Bapakta si perkeleng enggo ngorbanken anakNa guna nebus kita. Alu bage dosata banci iampuni. Adi tuhu-tuhu robah kita, iampuni Jahwe me kita. Alu bage banci terus silayani Jahwe alu pusuh  peraten si bersih.​—1 Joh. 2:1, 2, 12; 3:19, 20.

11. Uga kita banci njaga perukurenta si banci erban lemah kinitekenta?

¹¹ Arus situlak ajaren kalak murtad. Mulai kin tangtangna lit runggun Kristen, enggo igunaken Setan melala penipu guna erban lemah kiniteken kalak Kristen. Emaka, perlu siteh apai si benar ras apai bual. * Kalak si segat atena kita banci saja igunakenna Internet ntah pe media sosial gelah lemah kinitekenta man Jahwe bage pe kekelengenta man turang senina. Ula kita tek man kerina bual e, perban kerina e rehna arah Setan nari!​—1 Joh. 4:1, 6; Ket. 12:9.

12. Engkai maka arus sipepaguh kinitekenta nandangi kebenaren?

¹² Gelah banci silawan serangen Setan, perlu paguh kel kinitekenta man Jesus. Perlu ka kita tek maka Jesus me si igunaken Jahwe i bas ngelakoken peratenNa. Selain si e, perlu kita tek man budak si setia janah pentar si igunaken Jahwe guna ngurus organisasiNa gundari. (Mat. 24:45-47) Sipepaguh kinitekenta alu ratur mpelajari Kata Dibata. Alu bage kinitekenta bali bagi batang kayu si mbages uratna kel. Paulus pe bage ka isi suratna man runggun Kolose. Nina, “Erkiteken nggo ialoken kena Tuan Jesus Kristus, teruslah erdalan ras Kristus. Bali bagi si nggo ipelajari kena, kiniteken kena arus mbages uratna, nteguh, janah ibangun i datas pondasi.” (Kol. 2:6, 7) Adi siusahaken kel mpegegehi kinitekenta, Setan ras pengikutna la banci erban kita ngadi erdalan bas kebenaren.​—2 Joh. 8, 9.

13. Kai saja nge si pasti siadapi, janah engkai?

¹³ Pasti segat ate doni enda kita. (1 Joh. 3:13) Iingetken Johanes ka kita maka “kerina doni enda lit i bas kuasa si jahat.” (1 Joh. 5:19) Perban lanai ndekah kedungen doni enda, reh rawana me Setan. (Ket. 12:12) Labo ngenca alu cara si halus Setan nerang kita bagi daya tarik seks ntah pe bual si iajarken kalak murtad, tapi iserangna ka kita alu cara si kejam bagi penganiayan. Iteh Setan maka kentisik nari ngenca waktuna mpengadi kita erberita ras erban lemah kinitekenta. Emaka, la ateta mamang pendahinta ibatasi ntah pe ilarang i bas piga-piga negri. Amin pe bage, turang seninata si lit bas negri-negri e tetap setia. Ibuktiken kalak e maka la soal kai pe si ilakoken Setan man banta, banci kita setia!

14. Kai salah sada carata nampati turang seninata gelah tetap erdalan bas kebenaren?

¹⁴ Gelah banci sisampati turang seninata tetap i bas kebenaren, arus sicidahken perkuah ate. (1 Joh. 3:10, 11, 16-18) Perlu kita sikeleng-kelengen labo ngenca sanga la lit masalah tapi sanga lit masalah pe arus terus kita sikeleng-kelengen. Contohna, lit nge turang senina si sangana erceda ate janah merluken pengapul ntah pe penampat si deban? Ntah, lit nge turang seninata si bene ertana perban bencana alam ntah pe merluken penampat guna mbangun mulihi Bale Kerajan ntah pe rumahna? Sicidahken perkuah ateta bage pe kekelengenta si mbages man turang seninata labo saja arah ranan tapi si pentingna arah perbahanen.

15. Bagi si icatat bas 1 Johanes 4:7, 8, kai si perlu silakoken?

 ¹⁵ Adi kita sikeleng-kelengen siusih Bapakta si perkeleng. (Baca 1 Johanes 4:7, 8.) Salah sada carata ncidahken kekelengen eme nggit ngampuni kalak si deban. Contohna, banci saja lit si erban kitik ukurta. Sibuktiken keleng ateta ia alu ngampuni salahna e janah ula nai pernah siinget-inget. (Kol. 3:13) Misalna, bagi si iadapi turang seninata si gelarna Aldo. Lit sekalak turang senina ngataken si la mehuli kerna sukuna, padahal sedekah enda iergaina kel turang senina e. Nina Aldo, “Gelah ula nembeh ateku man turang senina e, terus aku ertoto man Jahwe.” Selain si e, iajakna ka turang senina e erberita ras ia. Sanga kalak e erberita, ikataken Aldo uga perasanna sanga megi ranan turang senina e. Nina Aldo, “Sanga itehna uga perasanku megi rananna, mis ia mindo maaf. Arah carana ngerana teridah maka menyesal kel ia. Kenca si e, kompak ka kami mulihi janah ilupaken kami masalah e.”

16-17. Kai si arusna jadi tekadta?

¹⁶ Keleng kel ate Rasul Johanes turang senina janah merhat ka ia gelah paguh kiniteken kalak e. E jelas teridah arah nasehat si iberekenna i bas telu suratna. Pasti meriah kel ukurta perban si merentah pagi ras Jesus i surga eme dilaki ras diberu si perkeleng janah ermediate bali bagi Rasul Johanes!​—1 Joh. 2:27.

¹⁷ Mbera sidalanken kerina pedah si enggo sibahas ndai. Ertekadlah kita gelah tetap erdalan i bas kebenaren, sipatuhi Jahwe i bas kai pe. Pelajari janah teklah kam man isi Pustaka. Teruslah pegegehi kinitekenndu man Jesus. Tulaklah ajaren manusia bage pe ajaren kalak murtad. Ula tempa-tempa teridah kam ngelayani Jahwe tapi ilakokenndu kai si la mehuli. Ikutkenlah patoken Jahwe kerna lagu langkah. Sisampatilah turang seninata gelah tetap paguh alu ngampuni kalak e janah nampati kalak si merluken penampat. Amin pe melala tentangen, banci kita tetap erdalan bas kebenaren.