1. Bela’ane 3 Jean 3, 4 na ô timine jam éziñ e wô’ô ve bia ava’a nlem.

TAME ve’ele simesan abim meva’ Jean a nga wôk éyoñ be nga kate nye na bôt a nga volô na be yeme benya mejôô ba ke ôsu a kabetane Yéhôva! Bôte bete be nga tôban abui minjuk, nde Jean a nga jeñ a nlem ôse na a volô be na be yemete mbunane wop, amu a mbe a yene’e be ane bone bé ya nsisim. Bia fe bi wô’ô wô’ô mvaé éyoñe bia yen ane mone wongan, nge ke môte bia ye’ele Bible, a ve émiene ngumba be Yéhôva, a ke ôsu a kañe nye.​—Lañe’e 3 Jean 3, 4.

2. Nsôñane ya bekalate be Jean ô mbe ôvé?

² Mbu 98 É.J., Jean a mbe a yiane nyiñ Éphèse nge ke mefefel. Éko éziñ a nga ke wôé éyoñ a nga kôlô minkôm ékôte mañe ya Patmos. Zia biyoñ éte nje Yéhôva a nga bo na a tili bekalate belal. Nsôñane ya bekalate bete ô mbe na a volô Bekristene na be ke ôsu a ba’ale ngule mbunan, a wulu benya mejôô été.

3. Bia zu bi biyalane ya minsili mivé ayé’é di?

³ Jean a nga nyiñ ayap adañe minlômane mise mivok, ajô te a nga yen aval avé miñye’elane b’apostat mia kômbô zu ndaman akônda Bekristen. * (1 Jean 2:18, 19, 26) B’apostat bete be mbe be tameta’ane na ba yeme Zambe ve teke bo aval a jô. Bi tame zu yene melebe Jean a nga ve éyoñ éte. Nté bia bindi me, bia zu yalane minsili  milale mi: Jé ja tinane na e wulu benya mejôô été? Mam mevé me ne kamane bia na bi ke ôsu a wulu benya mejôô été? A aval avé môt ase ya be bia a ne volô nyô mbo’o na a ke ôsu a wulu benya mejôô été?

4. Bela’ane 1 Jean 2:3-6 a 2 Jean 4, 6 na ô liti jé ja tinane na e wulu benya mejôô été.

⁴ Asu na bi wulu benya mejôô été, da sili na bi kôme yeme benya mejôo me ne Kalate Zambe été. Bia yiane fe ‘ba’ale metiñe me Yéhôva,’ nge bo nye mewôk. (Lañe’e 1 Jean 2:3-6; 2 Jean 4, 6.) Yésus a nga liti bia mbamba éve’ela mfa’a ya bo Yéhôva mewôk. Ajô te, bi ne jô na bia bo Yéhôva mewôk éyoñ bia jeñ a ngul ése na bi tôñe bibô’a mebo bi Yésus.​—Jean 8:29; 1 P. 2:21.

5. Jam avé bia yiane tabe de ndi?

⁵ Môt a kômbô ke ôsu a wulu benya mejôô été a yiane kôme tabe ndi na Yéhôva a ne Zambe ya benya mejôô, a na mam mese me ne Bible été me ne betotyii. A yiane fe buni na Yésus a ne Messie. Abui bôte da sôane na Yéhôva a teléya Yésus Njôô ya Éjôé Zambe. Jean a nga kôme kobô ajô “abui bedu’u bôt;” a nga jô na belaa minsos bete ba jeñe ve avale be ne wone ba mbunan ô ne ôveves. (2 Jean 7-11) A nga tili na: “Za a ne nlaa minsos ate, ve nyô a ne te me’ete na Yésus a ne Krist?” (1 Jean 2:22) Bia yiane kôme yé’é Bible nge bi nji yi na bôte bete be wone bia. Amu ayé’é Bible nde é ne kôme volô bia na bi yeme Yéhôva ba Yésus. (Jean 17:3) Nde fe da ye yemete ndi nleme jangan na bia bi bili benya mejôô.

6. Nju’ ôvé bisoé bia tôbane wô?

⁶ Bekristene bese ba yiane tabe ntyele ya bo te du’uban a mbia miñye’elane mia wum émo ji. (1 Jean 2:26) Bisoé mbie bia yiane beta dañe tabe ntyel a ôlam ôte. Alexia, * sita ya France a bili mimbu 25 a jô na: “Éyoñ me mbe mongô, miñye’elane miziñe ya émo, ane wu wo jô na teke Nté biôm a philosophie, mi mbe  mi ndeñele’e ma angôndô. Biyoñ biziñe bisô bi mbe me nlem. Ve me nga jô mamiene na me nji yiane buni mam mete teke taté ve Yéhôva fane ya na nye’e fe a kate ma ôsimesane wé.” Nde Alexia a nga yé’é kalate La vie : comment est-elle apparue ? Évolution ou création ? Mvuse bone besondô, bisô bise bi nga mane kôlô nye nlem. Alexia a jô na: “Nde me nga yemelane na Bible nnye a ye’ele benya mejôô. A na, e tôñe melebe ma so été a ne susu’a jam e ne soo ma benya meva’ a mvo’é.”

7. Bia yiane tabe ntyel a jé, a amu jé?

⁷ Bia bese, benya bôtô a bisoé, bia yiane tabe ntyele ya bo te tametane na bia kañe Yéhôva a too ke na bia bo mbia be mam asoé. Jean a nga jô na môt a bo nalé a wulu ki benya mejôô. (1 Jean 1:6) Nge bia yi na Yéhôva a wô’ô bia mvaé, bi nji yiane bi jame ya solé. Nya ajôô a ne na, teke jam éziñ é ne nsolane mise me Yéhôva, nde, nge bia jeñe na bi solé mbia nsem éziñ bi nga bo, bia jañele éyoñe zezé.​—Beh. 4:13.

8. Bia yiane sa’ale mbia mboane mbé?

⁸ Bi nji yiane biasé nsem aval émo ja bo. Jean a nga tili na: “Nge bia jô na, bi se ke abé, bia du’u biabebien.” (1 Jean 1:8) B’apostat ya melu me Jean be mbe be jô’ô na môt a ne bo mame Zambe a vini ve a too mvôé jé. Nde fe abui bôte da buni nalé den. Ba jô na ba kañe Zambe, ve te yene mam ane nye, e dañe dañ éyoñe jam é tii a ajô ya nkeane binoñ. Nté Yéhôva a yene mvite mame ya bisô’ abé, be ba jô na ajô ya mam bisôk e ne di da fombô ve môt émien.

9. Bibotane bivé ésoé ja kabetane Yéhôva meve’ele été ja bi?

⁹ Bisoé bia dañe tôbane njuk éyoñe bongô besikôlô bevo’o ba kômbô tindi  be na be yene mam bisôk ane be. Jam ete e nga kui Alexandre. A jô na: “Bobe binga béziñe ya aba sikôlô dam be mbe be kômbô’ô jô’ôbô a ma. Mbôle me nga ben, be nga taté na ba sômelane ma, a jô na ma yiane bo de ve a bobefam, amu me nji bi ébon é too minga.” Nge wo fe ô tele aval été éte, te vuane na nge ô tebe ne bip avale biyoñ ete, wo ye ba’ale éjijine jôé, mvo’é jôé ya minsôn a nlem, a amvôé dôé a Yéhôva. Éyoñ ése ki wo kabe avale meve’ele ete, wo bi ngule ya ke ôsu a bo mam avale Yéhôva a yi. Te ve’ele vuane môs éziñe na, ñyenane mame ya émo a lat a mam bisôk wo so be Satan. Ajô te, éyoñ ése wo bene tôñe wô, wo “dañe mbia môt ate.”​—1 Jean 2:14.

10. Bela’ane 1 Jean 1:9 na ô liti avale bi ne ke ôsu a bo Yéhôva ésaé a mone môte ya nlem a ne mfuban.

¹⁰ Bia yeme na Yéhôva nnye a yiane kôme timine bia jôm é ne nsem. Bia ve fe ngule na bi bo te seme mise mé. Nge e kui ki na bi sem, bia yiane ye’elane nye na a jamé bia. (Lañe’e 1 Jean 1:9.) Ve nge bi bo mbia nsem, bia yiane ke yene bemvendé a kate be de, amu Yéhôva a nga telé be na be nyoñe ngab a bia. (Jc. 5:14-16) Ve bi nji yiane ke ôsu a tyelé minleme yôp asu minsem bi nga bo kôa. Amu jé? Amu Yéhôva a nga lôme Mone wé si va na a zu wu a butane mam abé mangan, a ntañ ôte wo bo na a jamé bia bikobe biañ. Yéhôva a yeme jôm a jô éyoñ a ka’ale bia na a ne Zambe a jamé môt ase a kôme jôban abé dé. Ajô te, éyoñ a jaméya bia, bi ne ngule ya ke ôsu a bo nye ésaé a mone môte ya nlem a ne mfuban.​—1 Jean 2:1, 2, 12; 3:19, 20.

11. Jé é ne volô bia na bi sa’ale minsos Satan a belane mie asu na a te’e bia mbunan?

¹¹ Bia yiane sa’ale bikobekobô b’apostat ba ke ba kobô anyu. Aso kôa, Satan a  jeñe na a ndumekane Bekristene minlô. Jôm ete nje e ne mfi na bi yeme kandé benya mejôô a bebadu’u. * Besiñe bangan ba belan Internet a beréseaux sociaux asu na be te’e mbunane wongan a nye’ane wongan. Te vô’ôlô nja’a minsose mite, mia so be Satan!​—1 Jean 4:1, 6; Nli. 12:9.

12. Amu jé bia yiane yemete mbunane wongan?

¹² Asu na bi sa’ale ôlame Satan, bia yiane yemete mbunane wongane be Yésus a tabe ndi na Yéhôva a belane nye na a tôé nsôñane Wé. Bia yiane fe tabe ndi a ôlo ô ne mewôk a fek, amu ñwô Zambe a belane wô na a wulu bia den. (Mt. 24:45-47) Bia yemete mbunane wongan éyoñ bi ne mbane ya yé’é benya mejôô. Fulu ya bindi mejô me Zambe mban ja bo na mbunane wongan ô bo ane élé ja lôme minkañ ôyabe si été. Paul a nga belan aval éve’an éte éyoñ a nga tili Becolossien kalate. A nga jô na: “Aval ane mi nga nyoñe Krist Yésus Tate, nalé ate wula’ane be nye, ane mi bemeya mindi, a mia lôñebane be nye, a bo ngule mbunane wônan été.” (Beco. 2:6, 7) Nge bia kôme nyoñ éyoñe ya yemete mbunane wongan, Satan a bôte bé be kusa jeñe na be vaa bia benya mejôô été, susu’a jôm ba ye kui na be bo, a ne ve na, ba ye yat!​—2 Jean 8, 9.

13. Jé bia bese bia yiane yem, a amu jé?

¹³ Bia yiane yeme na émo é vo’o nye’e bia. (1 Jean 3:13) Jean a kôme kate bia na “[émo ji] ése é jô’ô be mbia môt ate.” (1 Jean 5:19) Nté môs asu’ulane ya émo wo subu, nde fe ayaa Satan e ne ve nene nalé. (Nli. 12:12) Ane ô vaa mvite mame ya bisôk a minsose b’apostat, Satan a belane fe étibela’a asu na a te’e bia. Mbôl a yeme na a nji beta bi abui éyoñ, a bili bebubu mevale mese asu na a telé ésaé nkañete jangan a na a kpwé bia si. Jôm ete nje mia yene be tyili’ ésaé jangan, nge ke mefase méziñe ya été abui mesi. Ve to’o nalé, bobejañ a besita ya wôé ba ke ôsu a jibi. Nalé a liti na Satan a kusa wosane bia aya, bi ne ngule ya kpwé nye si!

14. Nge bia yi na bobejañ be ke ôsu a wulu benya mejôô été jé bia yiane bo?

¹⁴ Nge bia yi na bobejañ be ke ôsu a wulu benya mejôô été, bia yiane liti be fulu mvam. (1 Jean 3:10, 11, 16-18) Bia yiane nye’e bobejañ éyoñ ése, éyoñe ya mvaé a éyoñe ya minjuk. Ye mojañ éziñ a sili mvolane nlem, nge ke mam mefe amu a bili awu? Ye da sili na be volô lôñe Meba m’Éjôé nge menda me bobejañ béziñ amu ébubua ja te kui vôm be too? Mam bia jô a mam bia bo asu bobejañe mme me ne kôme bo’olô na bia mvamane be, a na bia nye’e be nya nye’ane.

15. Bela’ane 1 Jean 4:7, 8 na ô liti jam bia yiane bo.

¹⁵ Bia vu Zambe wongane ya nye’an éyoñe bia nye’esane bia bia. (Lañe’e 1 Jean 4:7, 8.) Mbamba zene ya liti nye’an ôte a ne na bi yeme jamé. Môt a ne bo bia mbia jam éyoñ éte a sili bia njaman. Nye’ane wo ye tindi bia na bi jamé nye a na bi vuane jam a te bo bia. (Beco. 3:13) Tame yene jam e nga kui mojañ éziñ ba loone na Aldo. Môs éziñ a nga wô’ô mojañe mfe a kobô’ ayoñe dé abé,  nde jam ete e nga bo nye mintaé nlem amu a mbe a semé’ mojañ ate angôndô. Aldo a jô na: “Me nga ye’elane Yéhôva abui biyoñ asu na me bo te feme mojañ ate.” Ve a nji su’u valé. A nga ke fe yene monyañ a sili nye nge ba nye be ne kui nkañete. Nté be mbe nkañete, Aldo a nga kate mojañe na mejô mé me nga bo nye mintaé nlem angôndô. Aldo a jô na: “Éyoñ mojañ ate a nga yen abim avé jam ete e nga ndeñele ma, a nga sili njaman. Tyiñe nkobô jé ébien é mbe é kôme’e liti na a jôban. Ane bia nye bi nga beta late ngbwa, dili ke faas!”

16-17. Ntyi’an ôvé bia bese bia yiane nyoñ?

¹⁶ Nlômane Jean ô mbe ô nye’e bobenyañe bé étua ya abui, ô kômbô’ô fe na be bi ngule mbunan. Jam ete da kôme yené éyoñ bia lañe bekalate belal a nga tili be. Nga bia wô’ô mvaé ya yeme na bôte bese Yéhôva a nga tobe na be ke jôé a Mone wé yôp ba wô’ô bia mintaé ane nlômane Jean!​—1 Jean 2:27.

¹⁷ Ye bia ye fo’o tôñe melebe ba te ve bia ayé’é di? Ngo’o nge bia bese bia nyoñe ntyi’ane ya ke ôsu a wulu benya mejôô été a bo Yéhôva mewôk mam mese ya ényiñe jangan! Yeké’é Mejô me Zambe a tabe me mebun. Yemete’e mbunane wôé be Yésus. Sa’ale’e miñye’elane ya émo a bikobekobô b’apostat. Te bo mesu mebaé, ô jô’ô na wo kañe Yéhôva, nde wo bo mbia be mam asoé. Tôñe’e miñye’elane mi Yéhôva ényiñe jôé. Bo’o avale môte da yeme jamé asu na ô ve bobenyoñe ngule nyul; mvama’ane fe bôte ba yi mvolan. Nge ô bo mam mete mese, wônaa, to’o jé, to’o jé, wo ye ke ôsu a wulu benya mejôô été.