1. Akaadn tu 3 Jan 3, 4, weh mek wi hapi?

YOO ku imajin how hapi di apasl Jan mi feel wen ih mi hyaa dat di peepl weh hihn mi help fi laan di chroot mi-di kantinyu fi bee faytful ahn serv Jehoava? Dehn mi fays lata prablem, ahn Jan mi-di werk haad fi schrentn di fayt a dehnya laayal Kristyanz weh da-mi laik spirichwal chiljren tu hihn. Saym way soh, wi feel hapi wen fi wee oan chiljren er peepl weh wi help fi laan di chroot dedikayt dehnself tu Jehoava ahn kantinyu serv ahn.—Reed 3 Jan 3, 4.

2. Wai Jan mi rait ih chree leta dehn?

² Da di en a di fers senchri, Jan praabli mi-di liv rong Efisos. Hihn maita mi moov deh afta ih mi geh free fahn prizn da di ailan a Patmos. Rong da taim, Jehoava hoali spirit mi mek Jan rait chree leta. Hihn mi rait dehndeh leta fi inkorij laayal Kristyanz fi kip dehn fayt eena Jeezas schrang ahn fi mek dehn kip di fala di chroot.

3. Weh kweschanz wi wahn ansa?

³ Wen Jan mi rait dehnya leta, hihn da-mi di onli apasl weh mi stil livin. Hihn mi-di wori bowt how di faals teecha dehn mi-di afek di kangrigayshan dehn. * (1 Jan 2:18, 19, 26) Dehndeh apastayt mi klaym seh dehn noa Gaad, bot akchwali dehn neva obay Jehoava koman dehn non ataal. Eena dis aatikl, wi wahn diskos di kongsl weh Jan mi giv, ahn wi wahn ansa dehnya chree kweschan: Weh ih meenz fi fala di chroot? Weh ku stap wi fahn fala di chroot? Ahn how wi ku help wan anada fi stay eena di chroot?

4. Akaadn tu 1 Jan 2:3-6 ahn 2 Jan 4, 6, weh wi haftu du fi fala di chroot?

⁴ If wi waahn fala di chroot, wi haftu noa di chroot weh deh eena Gaad Werd, di Baibl. Pahn tap a dat, wi haftu “obay [Jehoava] komanment dehn.” (Reed 1 Jan 2:3-6; 2 Jan 4, 6) Jeezas da di bes egzampl a sombadi weh obay Jehoava. Soh wan impoatant way fi obay Jehoava da fi fala Jeezas egzampl az kloas az wi kud.—Jan 8:29; 1 Peet. 2:21.

5. Weh wi haftu bileev wid aala wi haat?

⁵ If wi waahn kip di fala di chroot, wi haftu bileev wid aala wi haat dat Jehoava aalwayz tel di chroot, ahn soh evriting weh ih tel wi eena fi hihn Werd, di Baibl, da chroo. Ahn wi aalso haftu bileev dat Jeezas da di Mesaiya. Lata peepl tudeh noh bileev dat Jeezas don di rool az King a Gaad Kingdom. Jan mi waan di Kristyan dehn dat lata peepl weh “noh di taak di chroot” mi wahn chrai fool op enibadi weh neva bileev di chroot bowt Jehoava ahn Jeezas wid aala dehn haat. (2 Jan 7-11) Jan mi rait: “Da hoo di lai? Da dehn wan weh seh dat Jeezas da noh di Krais.” (1 Jan 2:22) Di onli way fi mek shoar dat nobadi kyaahn fool wi op da fi kip di stodi Gaad Werd. Den wi wahn geh fi noa Jehoava ahn Jeezas. (Jan 17:3) Ahn wi wahn bee shoar dat wi ga di chroot.

6. Weh ku stap yong Kristyanz fahn fala di chroot?

⁶ Aal Kristyanz haftu bee kyaaful mek nobadi fool dehn op wid hyooman tinkin. (1 Jan 2:26) Yong Kristyanz reeli haftu wach owt fi dis chrap. Alexia, * wahn 25-yaa-oal sista fahn France, seh: “Wen Ah mi deh eena skool, Ah mi laan bowt evolooshan an ada hyooman aidyaaz. Dehnya teechinz mi kanfyooz mi ahn mek Ah dowt di chroot. Sohntaim, dehndeh teechinz mi mek sens tu mi. Bot Ah mi tink dat ih rang fi ignoar weh di Baibl teech ahn lisn onli tu weh Ah mi-di laan fahn di teechaz da skool.” Alexia mi stodi di buk Life—How Did It Get Here? By Evolution or by Creation? Afta wahn fyoo weeks, ih neva dowt di chroot nohmoh. Alexia seh: “Ah mi proov tu miself dat di Baibl gat een di chroot. An Ah mi riyalaiz dat if Ah liv akaadn tu Baibl standadz, Ah wahn bee hapi ahn ga pees eena mi laif.”

7. Weh wi noh fi du, ahn wai?

 ⁷ Aal Kristyanz, noh mata if dehn yong er oal, haftu bee kyaaful noh fi play laik dehn di serv Jehoava ahn saym taim dehn di du weh rang. Jan mi seh dat wi kyaahn liv akaadn tu di chroot ahn saym taim liv wahn imoaral laif. (1 Jan 1:6) If wi waahn Jehoava bee hapi wid wi, wi aalwayz haftu memba dat hihn si evriting weh wi du. Eevn if ada peepl kyaahn si weh wi du eena seekrit, Jehoava ku seeʼt.—Heeb. 4:13.

8. Weh wi haftu rijek?

⁸ Wi haftu rijek di way peepl eena di werl luk pahn sin. Di apasl Jan mi rait: “If wi seh wi noh ga no sin, wi oanli di fool wiself.” (1 Jan 1:8) Eena Jan dayz, peepl weh da-mi apastayt mi seh dat sombadi ku du tingz weh Gaad seh rang ahn stilyet bee Gaad fren. Tudeh, wi di liv monks peepl weh tink di saym way. Lata peepl klaym seh dehn bileev eena Gaad, bot dehn noh aksep weh Jehoava seh bowt sin, espeshali weh Jehoava seh bowt sin weh ga fi du wid seks. Jehoava seh sertn kaina sekshwal bihayvya rang, bot peepl laik dehndeh seh dat ih aarait fi sombadi du dehn kaina ting if dehn waahn.

9. How yong peepl benifit wen dehn du weh di Baibl seh?

⁹ Yong Kristyanz geh wahn lata presha fahn dehn klaasmayt dehn er werkmayt dehn fi chaynj di way dehn tink bowt seks. Dat da weh mi hapm tu Aleksandar. Hihn seh: “Sohn gyal da skool mi chrai presha mi fi ga seks wid dehn. Dehn mi seh dat sins Ah neva ga no gyalfren, Ah mos bee wahn homosekshwal.” If yoo di goh chroo sohnting laik dis, memba dat if yu du weh yu noa di Baibl seh rait, yu wahn feel gud bowt yuself, ahn yu wahn  protek yu helt, yu haat, ahn yu frenship wid Jehoava. An evritaim yu noh giv een tu temtayshan, yu wahn fain dat ih geh eeziya fi du weh rait. Ahn memba dat di werl luk pahn seks di saym way Saytan luk pan it. Soh wen yu rifyooz fi tink di way peepl eena di werl tink, yu win owt oava di eevl wan.—1 Jan 2:14.

10. How 1 Jan 1:9 ku help wi fi serv Jehoava wid wahn kleen kanshans?

¹⁰ Wi aksep dat Jehoava ga di rait fi seh wat da wahn sin. Ahn wi du wi bes fi noh sin. Bot if wi doo sin, wi pray tu Jehoava ahn kanfes wi sin. (Reed 1 Jan 1:9) An if wi komit wahn seeryos sin, wi goh tu di eldaz fi help. Jehoava apoint dehn fi gi wi di help weh wi need. (Jay. 5:14-16) Bot wi noh fi kantinyu fi feel gilti sayka di rang tingz weh wi mi du eena di paas. Wai? Bikaaz fi wee lovin Faada mi gi wi di ransom sakrifais a fi hihn Son fi mek wi ku geh fergivnis fi wi sin dehn. Wen Jehoava seh dat ih wahn fergiv wi if wi ripent fahn wi sin dehn, ih meen it. Soh notn kyaahn stap wi fahn serv Jehoava wid wahn kleen kanshans.—1 Jan 2:1, 2, 12; 3:19, 20.

11. How wi ku protek wiself fahn teechinz weh ku damij wi fayt?

¹¹ Wi haftu rijek apastayt teechinz. Fahn sins di Kristyan kangrigayshan mi fers staat, di Devl aalwayz di chrai mek Gaad peepl fayt geh week. Soh wi haftu noa how fi tel wat da chroo ahn wat da lai. * Wi enimi dehn mait yooz di Intanet er soashal meedya fi spred lai weh ku mek wi stap chros eena Jehoava ahn stap lov wi bradaz ahn sistaz. Dehndeh lai kohn fahn Saytan, soh noh bileev dehn!—1 Jan 4:1, 6; Rev. 12:9.

12. Wai wi shuda schrentn wi fayt eena di chroot weh wi laan?

 ¹² Fi mek wi ku stan op tu Saytan atak dehn, wi haftu schrentn wi fayt eena Jeezas an eena how Jehoava di yooz ahn fi du fi hihn wil. Wi aalso need fi chros di onli wan dehn weh Jehoava di yooz tudeh fi dairek fi hihn aaganaizayshan. (Mach. 24:45-47) Wi schrentn wi fayt wen wi stodi Gaad Werd regyula. Den wi fayt wahn bee laik wahn chree weh ga roots weh goh deep dong eena di grong. Paal mi seh sohnting simila wen ih mi rait ih leta tu di kangrigayshan da Koloaseh. Hihn mi seh: “Jos laik how unu mi aksep Krais Jeezas az unu Laad, wel da sayhn way unu fi kip aan di liv laik peepl weh da wan wid hihn. Soh den yu fi mek yu root dehn goh deep dong eena Krais, soh hihn fi bee di fongdayshan fi yu laif. Den yu wahn groa schranga eena yu fayt ahn schranga eena di chroot.” (Kol. 2:6, 7) If wi werk haad fi schrentn wi fayt, needa Saytan ner enibadi weh sopoat ahn wahn ku stap wi fahn liv akaadn tu di chroot.—2 Jan 8, 9.

13. Weh wi shuda ekspek, ahn wai?

¹³ Wi shuda ekspek dat di werl wahn hayt wi. (1 Jan 3:13) Jan rimain wi dat “di hoal werl deh anda di powa a di eevl wan.” (1 Jan 5:19) Di en a di werl di kohn kloasa ahn kloasa, ahn Saytan di geh moa ahn moa beks. (Rev. 12:12) Hihn noh onli chrai chrik wi wid imoaral temtayshan er di lai dehn weh di apastayt dehn seh. Sohntaim hihn atak wi wid kruwil persikyooshan tu. Saytan noa dat ih onli ga lee bit a taim lef fi chrai stap wi preechin werk er fi brok wi fayt. Soh da noh no sopraiz dat eena wahn lata konchri, wi werk deh anda ban er anda rischrikshan. Eevn soh, wi bradaz ahn sistaz eena dehndeh konchri stil di bayr op. Soh noh mata weh Saytan du fi chrai stap Jehoava peepl, wee kud stay faytful!

14. How wi ku help wi bradaz ahn sistaz fi stay eena di chroot?

¹⁴ Fi help wi bradaz ahn sistaz fi stay eena di chroot, wi need fi shoa dehn kompashan. (1 Jan 3:10, 11, 16-18) Wi noh onli fi lov wan anada wen tingz di goh gud bot wi fi lov wan anada wen prablemz kom op tu. Fi egzampl, yoo noa enibadi weh need komfert er help eena sohn ada kaina way bikaaz wan a dehn fren er famili ded? Er yoo noa bowt eni a wi bradaz ahn sistaz weh gaahn chroo wahn nachral dizaasta ahn need help fi bil bak dehn Kingdom Haal er hows? Wi noh fi jos klaym seh wi ga lov ahn kompashan fi wi bradaz ahn sistaz. Ih veri impoatant fi shoa dehn humoch lov ahn kompashan wi ga fi dehn bai weh wi du.

15. Akaadn tu 1 Jan 4:7, 8, weh wi haftu du?

¹⁵ Wen wi shoa lov fi wan anada, wi di kapi di egzampl a wi lovin hevnli Faada. (Reed 1 Jan 4:7, 8) Wahn impoatant way how wi shoa lov fi wan anada da fi fergiv wan anada. Fi egzampl, sombadi mait mek wi opset bot aftawodz dehn tel wi dehn sari. Wi shoa dat wi lov dehn wen wi fergiv dehn ahn noh kip di tink bowt weh dehn mi du wi. (Kol. 3:13) Wahn brada weh naym Aldo mi fays dis tes wen ih mi hyaa wahn brada weh hihn rispek seh sohnting bad bowt peepl fahn fi hihn kolcha. Aldo seh, “Ah mi kip di pray tu Jehoava fi help mi noh fi tink  bad bowt dis brada.” Bot Aldo mi du sohnting els tu. Hihn mi aks di brada fi mek dehn werk tugeda pahn feel servis. Wail dehn mi-di werk tugeda pahn feel servis, Aldo mi eksplayn tu di brada how opset ih mi feel bowt weh di brada mi seh. Aldo seh, “Afta Ah mi tel di brada how Ah feel bowt weh ih mi seh, hihn mi tel mi sari. Fahn di way how ih mi seh it, Ah kuda mi tel how sari ih mi sari bowt weh ih mi seh. Afta dat, wi da-mi gud frenz agen.”

16-17. Weh wee shuda mek op wi main fi du?

¹⁶ Di apasl Jan mi lov ih bradaz ahn sistaz wahn lat, an ih mi waahn mek dehn ga schrang fayt. Fi hihn lov ahn kansaan fi dehn klyaa fi si eena di kongsl weh hihn mi gi dehn eena di chree leta dehn weh ih mi rait. Ih veri inkorijin fi noa dat di peepl weh wahn rool wid Jeezas da hevn shoa lov ahn kansaan fi peepl jos laik Jan.—1 Jan 2:27.

¹⁷ Mek aala wi tek tu haat di kongsl weh wi jos diskos. Mek wi mek op wi main fi liv akaadn tu di chroot. Dat meenz dat wi wahn obay Jehoava eena evriting weh wi du. Stodi fi Hihn Werd ahn put yu chros eena it. Bil schrang fayt eena Jeezas. Rijek hyooman tinkin an apastayt teechinz. Noh eva play laik yu di serv Jehoava ahn saym taim du tingz weh rang, ahn noh eva lisn tu peepl weh chrai kanvins yu fi du weh rang. Liv akaadn tu Jehoava hai standad a weh rait ahn weh rang. Ahn mek wi fergiv wi bradaz ahn sistaz if dehn opset wi ahn mek wi help eni wan a dehn weh need it, ahn dat wahn help dehn stay schrang. Den, noh mata weh wi goh chroo, wi wahn kip di fala di chroot.