1. Ka katei adügübei lun gunda wamá, ítara kei larufuduni 3 Huan 3, 4?

SAMINA wamuti san lanarime ugundani le lasandirubei apostolu Huan dan le laganbubei añahamémegua lan kristiánugu ha líderagubaña asubudirei inarüni úaragua lun Heowá? Ítara haña meha kristiánugu úaraguatiña ha lun Huan, kei lisaanigu. Kei gibe lubéi meha haturóbulin, adüga lumuti apostolu Huan sun liyaraati lun lederebudagüdüni hafiñen. Wagía sun, gúndaatiwa giñe dan le hederegeruni wasaanigu o gürigia ha únbaña wíchiga aturiahani habagari lun Heowá ani sigitiña eseriwida lun (aliiha huméi 3 Huan 3, 4).

2. Ka tisuunibei ǘrüwa gárada to labürühaboun Huan?

² Lidan irumu 98, másiñati lawinwanduña lan meha Huan uburugu Éfesu o yarafa lun. Másiñati aban lan láguyun awinwanda ñein lárigiñe láfuridun lídangiñe ladaürün tidan furisun to lídanboun ubouhu Pátümosu. Lidan dan ligía, aban línchahani lani Heowá sífiri sandu lun labürühan ǘrüwa gárada. Le tisuunibei gárada tuguya lun tínchahaniña kristiánugu úaraguatiña lun meferidirun hamani hafiñen luagu Hesusu luma lun hasigirun éibuga lidan inarüni.

3. Kaba álügüdahani wóunaba lidan arütíkulu le?

³ Lidan meha dan ligía, Huanrügaali meha hádangiñe hagumuhóun apostolugu erederuti wínwanñu ani nidiheriti meha luagu luriban igaburi le harufudubei máisturugu yéetiña ha lídanbaña damuriguaü (1 Huan 2:18, 19, 26). * Ariñagatiña meha gürigia ha subudi lan Bungiu houn, gama lumoun úati meha inebe lan lugumadin houn. Lidan arütíkulu le, wakutihabei adundehani le líchugubei Huan ani wóunabuba ǘrüwa álügüdahani: Ka mini lubéi  léibuguniwa lidan inarüni? Ka burí lénrengunga úmabei wagagibudagua? Ani ida luba wíderagun wámagua lun wasigirun lidan inarüni?

4. Según 1 Huan 2:3-6 luma 2 Huan 4, 6, ka lunbei wadügüni lun wéibugun lidan inarüni?

⁴ Lun gayaraabei lan wéibugun lidan inarüni, furumiñe, mosu wasubudiruni inarüni le tídanbei Lererun Bungiu to Bíbülia. Mosu giñe gaganbadi wamá lun lugumadin Heowá (aliiha huméi 1 Huan 2:3-6; 2 Huan 4, 6). Ru lumuti Hesusu hénpulu le buídutimabei lidan kesi le. Aban igaburi súdiniti lun gaganbadi wamá lun Heowá, lau wadügüni sun wayaraati lun wafalaruni Hesusu lau úaraguni (Huan 8:29; 1 Fe. 2:21).

5. Ka katei lunbei chouru wamani?

⁵ Lun wasigirun éibuga lidan inarüni, mosu wachoururuni Heowá lan Lubungiutebei inarüni ani sun lan le lariñagubei woun tidan Lererun inarüni lan. Lunti giñe chouru wamani Hesusu lan Mesíasi le füramasewaalibei. Uguñe weyu, saragu gürigia mafiñentiña anuadirúaali lan Hesusu kei Urúei lidan Larúeihan Bungiu. Eweridihati Huan añahein lan “saragu eyeehatiña”, ha gayaraabei heyeeduniña ha machourunbalin inarüni luáguti Heowá luma Hesusu (2 Huan 7-11). Abürühati Huan: “Kagia eyeehabaña? Ha ariñagubaña luagu mama lan Hesusu Krístubei” (1 Huan 2:22). Ánheingubeirügü waturiahoun Lererun Bungiu ligíarügüba mígirun wamá lun weyeeduniwa. Ítararügüba wasubudiruni Heowá luma Hesusu (Huan 17:3). Ani ítararügübei chouru wamani lídanñadiwa lan inarüni.

6. Ka lénrengunga úmabei hagagibudagua nibureintiña kristiánugu?

⁶ Sun wagía kristiánugu, mosu wóunigiragun woungua luéi weyeedúniwa lau ligaburi hasaminan gürigia (1 Huan 2:26). Hátima lúnbaña hóunigiragun houngua tuéi sádara to, kristiánugu nibureingiña. Ariñagatu Alexia, * aban íbiri faransuna 25 irumu tau: “Dan meha le aturiahagidina leskuelarugu, aturiahatina meha luagu saliguarügü lan katei lúnguarügü ani aturiahatina giñe luagu arufudahani málati le lánina ubóu. Adügati saminaü le lun machourun nan luagu inarüni. Anihein dan chawá lumuti arufudahani le naritagun. Gama lumoun saminatina mama lan mosu gufuruma nan láurügü le arufudahóubei nun leskuelarugu  ani míchugunga nuguya chansi lun Heowá lun layanuhan”. Aba taturiahanu Alexia líburu La vida... ¿cómo se presentó aquí? ¿Por evolución, o por creación? Lídanrügü fiu dimaasu, aba lagumuchagun machouruni le tuágubei Alexia. Ariñagatu: “Aba nachouruni nungua anihein lan inarüni tidan Bíbülia. Ani aba níchugun fe ánhana lan gaganbadi lun gumadi le tídanbei gúndaabadina lan ani nasandiruba lan darangilaü”.

7. Ka óuchawaguni lunbei wáfaagun lun méiguadun wamá lidoun, ani ka uagu?

⁷ Sun kristiánugu, nibureingidiwa lan yebe o wéinamugaadiwa lan, lunti wáfaagun lun ua lan biangua lan wagibu. Ayanuhati Huan luagu le, dan le lariñagunbei moun lumuti lan lidan wamá inarüni ani awanha awinwanda lidan magíaguni (1 Huan 1:6). Anhein busén wabéi lun lagundaarun Bungiu wau guentó luma ámuñegü, lunti wóuserun kamá hamuga aríagu haña sun gürigia lun le wadügübei. Le linarün katei, úati figóu aramudaguati ligibugiñe lagu Heowá, lugundun ariha lumuti sun katei (Ebü. 4:13).

8. Kaba un wamahada?

⁸ Mosu giñe wamaharun lun ligaburi larihini ubóu figóu. Abürühati apostolu Huan: “Ánhawa ariñaga luagu mafigoun wamá, weyeedaguña woungua” (1 Huan 1:8). Lidan lidaani Huan, ariñagatiña meha gürigia ha agarabaagubaña luagun Bungiu gayara lan hafigounhan gürigia subudiga houn, ani ariñagatiña íbini lan ítara gayara lan hasigirun gamadagua luma Bungiu. Uguñe weyu, saragu gürigia ligiaméme hasaminarubei. Ariñagatiña afiñe hamá luagu Bungiu, gama lumoun máhatiña lun le lariñagubei luagu figóu, dántima le layanuhan luagu agamariduni. Le uágubei lariñaga Heowá figóu lan, ariñagatiña gürigia luagu: ladügüni gürigia le hínsiñebei lun o lawinwanduni libagari kei le aubei labusenra.

9. Ida liña hasagarun nibureintiña buiti dan le hawinwandun según le hafurendeirubei tídangiñe Bíbülia?

⁹ Gayaraati lénrengudun houn nibureintiña kristiánugu lun máyeihan hamani ligaburi hasaminan hánigu paaná lidan wadagimanu o leskuelarugu  lidan luáguti magíaguni. Ligía meha asuseredubei lun aban Gefenti gíriti Aleksandar. Ariñagati: “Álugatiña meha fiu nibureintiña würiña leskuelarugu hadügüdarun nuagu lun narounrun hama. Aba meha hariñagun nun kei lan madari nubéi, másiñati lan, aban lan magüsi au”. Nibureinti, másiñati bagagibudaguba lan luma aban óuchawaguni ítarati. Gama lumoun, haritaguabei dan le lan bawinwandun úara luma adundehani le bafurendeirubei tídangiñe Bíbülia, bóunigiruñein laruma bibagari, bátuadi, bisaminan luma bumadagua luma Heowá. Eibu bawanduni óuchawaguni, ménrenguntimabei bun badügüni le buídubei. Mabulieidabei anihein lan Satanási lanagangiñe liwiye saminaü le arihíbei ubouagu luáguti agamariduni. Ligíati, dan le bamahadun basaminarun kei gürigia ubouaguna, bagañeinruñein Mafia (1 Huan 2:14).

10. Ida liña líderaguniwa 1 Huan 1:9 lun weseriwidun lun Heowá lau aban saminaü harumati?

¹⁰ Subudi wamuti garicha lan Heowá lun lariñaguni ka lan katei figoubei. Ani áfaaguatiwa saragu lun mábürühan wamá lidoun. Gama lumoun, dan le wafigouhan aba wagufeseruni lidan wafurieidun (aliiha huméi 1 Huan 1:9). Ani anhein aban lubéi figóu wéiriti, áluaha wamuti hídehan wéiyaaña lidan afiñeni, lugundun írida laaña Heowá lun hóunigiruniwa (Sant. 5:14-16). Ábaya katei, mígira wamá lun ladügün wasandiragun woungua lau duru luagu charati le wadügübei lidan binadu dan lun lagumuchun wau. Ka uagu? Ladüga derege laali Wáguchi le hínsiñehabubei Lisaani lun ferudunawa lan wafigoun. Dan le lariñagun Heowá feruduna lubaña lan afigouhatiña ha asakürihabaña, gúnfuli lumuti lererun. Ligíati, gayaraati weseriwidun lun lau aban saminaü harumati (1 Huan 2:1, 2, 12; 3:19, 20).

11. Ida luba wadüga lun magadeirun lani le hariñagunbei ha agarabaagubaña luagun Bungiu wafiñen?

¹¹ Anihein ámuya katei lun wamahadun lun: le hariñagunbei ha agarabaagubaña luagun Bungiu. Lúmagiñe ñein lan damuriguaü kristiánu,  yúsuhali Mafia saragu gürigia lun ládarun machouruni lidoun hasaminan lubúeingu Bungiu ha úaraguabaña. Ligíati, lunti wasubudiruni ka lan inarünibei lumoun iyeeni. * Gayaraati hayusurun wáganiñu Internet luma páhina le ñein lubéi hadügǘwa umadagu lun hálugun hedebilidagüdüni wafiñen luagu Heowá luma ínsiñeni le wasandirubei hawagu wábirigu. Mánhara wamá lun iyeeni burí le, lugundun lúmagiñe Mafia liabin (1 Huan 4:1, 6; Aruf. 12:9).

12. Ka uagu lunti lubéi wederebudagüdüni wafiñen luagu inarüni le furendei wamaalibei?

¹² Anhein mabusenrun wabéi lun ledebilidagüdüni Satanási wafiñen, lunti wederebudagüdüni wafiñen luagu Hesusu ani afiñe wagíame tuagu ligaradan lidan lisuuni Bungiu. Lunti giñe wafiñerun luagu “musu úaraguati” le layusurubei Heowá uguñe weyu lun ladundehanu lóundarun (Mat. 24:45-47). Ladügüba waturiahanu Lererun Bungiu gabügürügua lun lederebugudun wafiñen luma lun ítara lan kei aban tídibu wewe le ragüti tílagüle. Ayanuhati Pábulu luagu saminaü le dan le labürühabei houn kolosana: “Ítara keisi heresibiruni Wabureme Hesukrístu lau sun hafiñen luagu, lunti ítara lan habagaridun lidan aban luma, lun ragüñu lan hibagari luagu, deregüdagu lidan hafiñen” (Kol. 2:6, 7). Anhein derebugu lubéi wafiñen, úabei ni kata le ladügübei Satanási ni ha ígiraguagüdübaña houngua lun, lun lábürühan warüna (2 Huan 8, 9).

13. Ka wasubudirubei wagía kristiánugu, ani ka uagu?

¹³ Subudi wamuti luagu weyereeguduba lan lun ubóu (1 Huan 3:13). Haritaguagüda lumutiwa Huan “luagu lábugiñeñanu lan lubafu Mafia sun ha lánigubaña ubóu” (1 Huan 5:19). Yarafatimarügaali lagumuchagüle ubóu le, ligía eibu lubéi dan, gáñitimarügaali Satanási (Aruf. 12:12). Mama ábürüharügüti wawagun lau layusurun magíaguni luma iyeeni le hariñagubei ha agarabaagubaña luagun Bungiu, yúsuti giñe erei. Subudi lumuti murusunrügaali lan dan lau, ligíati eibu dan lálugun lun lararamuni apurichihani luma lun lagünrinchaguni wafiñen. Maweirintu wanigi lau anihein lan ageiraü rúati lébeha wawadigimari o hamahadun lun. Íbini ítara, añahagua íbirigu ha lídanbaña ageiraü ligía awanda. Arufuda hamuti meberesenga ka lan lálugubei Mafia ladügün, gayaraati úaraguameme wamá.

14. Ida liña gayara lan wíderaguniña íbirigu lun hasigirun lidan inarüni?

¹⁴ Gayaraati wíderaguniña íbirigu lun hasigirun lidan inarüni lau gudemehabu wamá (1 Huan 3:10, 11, 16-18). Lunti hínsiñegua wamá wámagua dandu lidan buiti kei lidan wuribati. Kéiburi, subuditi san somu íbiri woun le féridihali somu liduhe lidan óunweni ani mégeiti dǘgüdaguaü o somu ídemuei? Rúhadiwa san fe megei hamá somu íbirigu ídemuei lun tábunawagun Luban Hadamuridagun o haban ladüga aban lanarime liñawan dan? Arufudatiwa ínsiñeni inarüniti luma gudemehabu houn wábirigu lau le wadügübei, mámarügü lau dimurei.

15. Ka lunbei wadügüni según 1 Huan 4:7, 8?

¹⁵ Dan le warufudun ínsiñeni wámagua, áyeiha wamuti Wáguchi le siélubei, le hínsiñehabubei (aliiha huméi 1 Huan 4:7, 8). Aban igaburi súdiniti lun warufudun ínsiñehabuni lau feruduna wamaniña amu. Kéiburi anhein acharara somu gürigia woun, ladügüba ínsiñeni lun feruduna wamani luma lun wabulieiduni le ladügübei woun (Kol. 3:13). Ariha waméi le asuseredubei lun aban íbiri gíriti Aldo. Aba lasandiragun lungua wuriba dan le laganbubalin aban íbiri le inebeti lun ayanuha wuriba hawagu lirasan. Ariñagati Aldo: “Amuriahatina saragu wéiyaasu luma Heowá lun masandirun nan iyereehabúni  luagu íbiri le”. Gama lumoun adügati amu katei: aba lagunbirahani apurichiha luma. Ábati lafuranguagüdüni lun ida liña lan lasandiragun lungua. Ariñagati Aldo: “Dan le gunfuranda lubalin bulesei lanu dimurei le lariñagubei nanigi, aba lamuriahan ferudun numa. Aba níchugun fe lau ligaburi layanuhan sarí lani tídangiñe sun lanigi. Ábati warandarun ani aba wabulieiduni le asuseredubei”.

16, 17. Kaba uagu wáfaagua?

¹⁶ Hínsiñetiña meha lílana damuriguaü lun apostolu Huan saragu, ani bereseti meha lau ida liña lan hamadagua luma Bungiu. Arihúati furangu le lasandirubei hawagu lílana damuriguaü lidan adundehani le líchugubei tidan ǘrüwa gárada to labürühaboun lau lídehan Heowá. Ma wagundan wasubudiruni sandí hamani wügüriña hama würiña ha lúnbaña houdin sielun arúeiha luma kristu ligiaméme le lasandirubei Huan (1 Huan 2:27).

¹⁷ Gaganbadi wamá lun eweridihani le akutiha wamaalibei. Áfaagua wamá lun wasigirun éibuga lidan inarüni luma lun gaganbadi wamá lun Heowá lidan sun le wadügübei. Aturiaha wamóun Lererun ani afiñe wamá tuagu. Derebugugüda waméi wafiñen luagu Hesusu. Mánhara wamá lun saminaü hámagiñeti gürigia ni lun le hariñagubei ha agarabaagubaña luagun Bungiu. Áfaagua wamá lun manügün wamá aban ibagari le arufudati biangua lan wagibu ani mígiraguagüda wamá woungua lun figóu. Ígiraguagüda wamá woungua lun ladundehaniwa liñun lugumadin Heowá. Ani íderagua wamaña íbirigu lun derebugu hamá lau feruduna wamaniña ha achararubaña woun luma lau wíderaguniña ha mégeihabubaña. Ligíati, meberesenga ka lan uma wagagibudagua, wasigiruba éibuga lidan inarüni.