1. Como cosa ya habla na 3 San Juan 3, 4, cosa kanaton ta hace alegre?

TA PUEDE ba tu imagina si paquemodo de alegre si apostol Juan cuando ya puede le sabe que ya continua sirvi con Jehova aquellos maga gente con quien le ya ayuda aprende con el verdad? Ya experiencia sila manada problema y ya hace esfuerzo si Juan para hace fuerte con el fe de este maga leal Cristiano con quien le ta mira como de suyu maga espiritual anak. Na igual manera, alegre kita si el diaton mismo maga anak o aquellos con quien kita ya ayuda para aprende con el verdad hay dedica con el diila vida con Jehova y continua sirvi con ele.​—Le con el 3 San Juan 3, 4.

2. Cosa el proposito del maga carta que ya escribi si Juan?

² Del 98 C.E., posible ta queda si Juan na Efeso o cerca alli. Posible ya anda le alli despues le man preso na isla de Patmos. Na ese tiempo, ya guia con ele el sagrao espiritu de Jehova para escribi tres carta. El proposito de ese maga carta amo para anima con el maga leal Cristiano que mentena con el diila fe con Jesus y continua vivi harmonia na verdad.

3. Cosa maga pregunta kita hay contesta?

³ Si Juan ya lang el apostol que vivo na ese tiempo y malingasa ele con el efecto na congregacion del maga falso maestro. * (1 Juan 2:18, 19, 26) Este maga apostata ya clama que conoce sila con Dios pero nuay sila obedece con el maga mandamiento de Jehova. Na este articulo, hay discuti kita con el consejo que ya dale si Juan y hay contesta kita con el tres pregunta: Cosa quierre decir que vivi harmonia na verdad? Cosa maga dificultad kita ta enfrenta? Y paquemodo kita ayuda con otro para esta na verdad?

4. Asegun na 1 San Juan 2:3-6 y 2 San Juan 4, 6, cosa kita necesita hace para vivi harmonia na verdad?

⁴ Para vivi harmonia na verdad, necesita kita sabe con el verdad que puede incuntra na Palabra del Dios, el Biblia. Mas pa, debe kita ‘obedece con el maga mandamiento’ de Jehova. (Le con el 1 San Juan 2:3-6; 2 San Juan 4, 6.) Si Jesus ya dale buen ejemplo si paquemodo obedece con Jehova. Poreso, el un importante manera que ta obedece kita con Jehova amo si ta hace kita esfuerzo para sigui con el ejemplo de Jesus.​—Juan 8:29; 1 Ped. 2:21.

5. Na cosa kita debe queda convincido?

⁵ Para continua vivi harmonia na verdad, debe kita queda convincido que si Jehova el Dios de verdad y que verdad el todo cosa le ya habla na de suyu Palabra, el Biblia. Y debe tambien kita queda convincido que si Jesus el Mesias. Manada ahora el gendeh ta creé que si Jesus el Rey na Reino del Dios. Ya dale aviso si Juan que “mucho gayot maga engañador” el engaña con aquellos quien gendeh preparao defende con el verdad acerca con Jehova y con Jesus. (2 Juan 7-11) Si Juan ya escribi: “Quien man el imbustero si gendeh aquel lang quien ta nega cay si Jesus amo el Cristo?” (1 Juan 2:22) El solamente manera que gendeh kanaton puede engaña amo si estudia kita con el Palabra del Dios. Si hace kita se, hay conoce kita con Jehova y con Jesus. (Juan 17:3) Y como resulta, hay queda kita convincido que talli kita na verdad.

6. Cosa el un dificultad que ta enfrenta el maga joven Cristiano?

⁶ Todo maga Cristiano debe queda con cuidao que gendeh kanila engaña el filosofia del gente. (1 Juan 2:26) Necesita queda con cuidao con este especialmente el maga joven Cristiano. Si Alexia, * un 25 año hermana na France, ya habla: “Cuando joven pa yo, yan libug yo na maga idea del maga gente, igual con el teoria de evolucion y filosofia del gente. Tiene maga tiempo que ya queda yo interesao na ese maga enseñanza. Pero ya sinti yo que gendeh justo que creé yo con el todo cosa que ta enseña conmigo na escuela y ignora si cosa conmigo ta habla si Jehova.” Ya estudia si Alexia con el libro Life—How Did It Get Here? By Evolution or by Creation? Despues del cuanto semana, nuay mas le man duda. Si Alexia ya habla: “Ya queda yo convincido que el Biblia  ta contene el verdad. Y ya realiza yo que hay tiene yo alegria y paz si sigui yo con el maga principio de este.”

7. Cosa tentacion kita debe resisti y porque?

⁷ Todo Cristiano, joven man o de edad, debe resisti con el tentacion que tiene doble manera de vida. Ya hace claro si Juan que gendeh kita puede vivi harmonia na verdad y vivi tambien un imoral clase de vida. (1 Juan 1:6) Si quierre kita ganá con el favor del Dios ahora y na futuro, necesita kita actua na manera que dol ta puede mira con el todo cosa kita ta hace. Gane, gendeh kita puede comete secreto culpa cay ta puede se mira si Jehova.​—Heb. 4:13

8. Cosa kita debe resisti?

⁸ Necesita kita resisti con el mirada del mundo na pecado. Si apostol Juan ya escribi: “Si ta habla kita: ‘Noay kita culpa,’ entonces ta engaña kita con el diaton mismo cuerpo.” (1 Juan 1:8) Na tiempo de Juan, el maga apostata ya clama que el un persona puede comete culpa y tiene siempre buen amistad con Dios. Ta vivi tambien kita ahora donde el maga gente tiene tambien ansina mirada. Manada el ta habla que ta creé sila con Dios pero gendeh sila ta sigui con el mirada de Jehova na pecado especialmente si acerca este na sexo. Tiene maga conducta que gendeh justo na mirada de Jehova pero ese maga gente ta habla que aceptable lang que hace se el un persona si quierre le.

9. Cosa el maga beneficio si sigui el maga jovenes con el cosa sila ya aprende na Biblia?

⁹ Posible ta sinti pressure el maga joven Cristiano que sigui con el mirada na imoral conducta del diila maga classmate o uban na trabajo. Amo se el cosa ya sucede con el un hermano que si Aleksandar. Ele ya habla: “El cuanto maga mujer na diamon escuela ya pricura conmigo man pressure que man sex. Ya habla sila que ciendo nuay yo novia, baka  mareng yo.” Si ta enfrenta tu probanza igual ansina, acorda que si sigui tu con el cosa tu ya aprende na Biblia, hay mentena tu con el de tuyu respeto na cuerpo, tiene tu buen salud y hay protege tu con el de tuyu emocion y de tuyu relacion con Jehova. Y cada vez tu resisti con el tentacion, mas facil ya lang contigo que hace si cosa el justo. Acorda tambien que estaba con Satanas el gendeh justo mirada na sexo del maga gente na mundo. Poreso, si gendeh tu man compromiso, hay “gana [tu] con el demonio.”​—1 Juan 2:14.

10. Na cosa manera el 1 San Juan 1:9 puede ayuda kanaton para sirvi con Jehova con limpio conciencia?

¹⁰ Sabe kita que tiene derecho si Jehova para determina si cosa conducta el justo y gendeh justo. Y ta hace kita el todo para gendeh comete pecado. Pero, si ya puede kita comete pecado, ta habla kita se con Jehova na rezo. (Le con el 1 San Juan 1:9.) Y si ya comete kita serioso pecado, ta pidi kita con el ayuda del maga anciano con quien ya iscuji si Jehova para cuida kanaton. (Sant. 5:14-16) Pero, gendeh kita debe continua sinti culpable na maga kamali que ya hace kita de antes. Porque man? Cay el diaton amable Tata ya dale con el rescate por medio na de suyu Anak para puede perdona con el diaton maga pecado. Cuando ya habla si Jehova que hay perdona le con el maga quien ya comete pecado que ya arripinti, amo gayot se el cosa le hace. Poreso, puede siempre kita sirvi con Jehova con limpio conciencia.​—1 Juan 2:1, 2, 12; 3:19, 20.

11. Paquemodo kita puede protege con el diaton mismo cuerpo na maga enseñanza que posible hace hina con el diaton fe?

¹¹ Debe kita evita con el maga enseñanza del maga apostata. Desde ya principia el Cristiano congregacion, el Diablo ya usa manada maga engañador quien ya hace manera para man duda el maga fiel siervo del Dios. Poreso, necesita kita aprende si paquemodo sabe si  cosa el verdad y si cosa el imbusterias. * El diaton maga enemigo posible usa con el Internet o social media para hinay-hinay perde el diaton confianza con Jehova y el diaton amor para na maga hermano y hermana. Acorda si con quien se estaba y evita con ese.​—1 Juan 4:1, 6; Rev. 12:9.

12. Porque kita debe hace hondo con el diaton apresacion na verdad que ya aprende kita?

¹² Para puede resisti con el maga ataque de Satanas, necesita kita hace fuerte con el diaton confianza con Jesus y na de suyu papel na proposito del Dios. Necesita tambien kita confia con aquellos lang quien ta usa si Jehova para guia con el de suyu organizacion. (Mat. 24:45-47) Queda mas fuerte el diaton confianza si regular kita estudia con el Palabra del Dios. Como resulta, el diaton fe hay queda igual na un pono que el maga reiz bien sumido na tierra. Ya menciona si Pablo igual ansina cuando ya escribi le con el congregacion na Colosa. Ele ya habla: “Vivi ustedes asegun con Jesus como Cristo y Señor, cay ansina ya recivi ustedes con Ele. Manda con Ele queda el raiz y fundacion del de ustedes vida. Esta fuerte na fe.” (Col. 2:6, 7) Si hace kita esfuerzo para hace fuerte con el diaton fe, imposible para con Satanas y con aquellos bajo na de suyu influencia para sangga kanaton que vivi harmonia na verdad.​—2 Juan 8, 9.

13. Cosa kita debe expecta y porque?

¹³ Debe kita expecta que hay odia kanaton el mundo. (1 Juan 3:13) Ya hace kanaton acorda si Juan que “el entero mundo talli na poder del demonio.” (1 Juan 5:19) Mientras ta queda cerca el fin de este sistema, mas ta queda rabiao si Satanas. (Rev. 12:12) Gendeh lang le usa maga gendeh directa ataque, igual na imoralidad y imbusterias del maga apostata. Sino, usa tambien le maga directa ataque igual na persecucion. Sabe si Satanas que limitao ya lang el de suyu tiempo para pricura hace descanza con el diaton trabajo predicacion o hace luya con el diaton fe. Poreso, gendeh mas kita ta estraña si ta prohibi con el cuanto o con el todo diaton trabajo na cuanto maga nacion. Maskin pa ansina, ta continua aguanta el diaton maga hermano y hermana na ese maga lugar. Ta dale sila prueba que maskin cosa pa hace si Satanas, puede siempre kita esta fiel.

14. Cosa el un manera que puede kita ayuda con el diaton maga hermano y hermana que esta na verdad?

¹⁴ Para ayuda con el diaton maga hermano y hermana que esta na verdad, debe kita dale mira compasion kanila. (1 Juan 3:10, 11, 16-18) Necesita kita ama con uno y otro gendeh lang si enbuenamente el situacion sino pati si tiene maga problema. Por ejemplo, tiene ba tu conoce que ya muri el miembro de familia y ta necesita comforta o ayuda na practical manera? O ya puede ba tu sabe que tiene maga hermano y hermana quien ya sale bien afectao na calamidad y quien ta necesita ayuda para planta otravez con el diila Kingdom Hall o diila casa? Ta dale kita mira si paquemodo de hondo el diaton amor y compasion para na diaton maga hermano y hermana gendeh lang na cosa kita ta habla sino mas importante, na cosa kita ta hace.

15. Como cosa ya habla na 1 San Juan 4:7, 8, cosa kita necesita hace?

¹⁵ Ta imita kita con el diaton Tata na cielo si ta dale kita mira amor con uno y otro. (Le con el 1 San Juan 4:7, 8.) El un importante  manera que ta dale kita mira amor amo si ta perdona kita con uno y otro. Por ejemplo, baka tiene quien ya hace sinti duele kanaton y despues, ya pidi perdon. Ta dale kita mira amor si perdona kita con ele y ulvida con el kamali que ya hace le. (Col. 3:13) Ya sucede se con el hermano que si Aldo cuando ya oi le con el un hermano con quien le ta respeta que ya puede habla gendeh bueno acerca con el de suyu cultura. Ya habla si Aldo: “Manada beses yo ya reza con Jehova que ayuda conmigo para gendeh yo tiene negativo sentido con ese hermano.” Pero, tiene pa cosa ya hace si Aldo. Ya pidi le con el hermano que man junto con ele na ministerio. Mientras na predicacion, ya habla si Aldo si cosa le ya sinti na cosa ya habla el hermano. “Cuando ya oi el hermano si cosa yo ya sinti na cosa le ya habla,” ya habla si Aldo, “ya pidi le despensa. Na tono del de suyu voz, ya puede yo sinti que ya arripinti gayot le con el cosa le ya habla. Despues de ese, ya queda kame amigo otravez.”

16-17. Cosa debe el diaton determinacion?

¹⁶ Ta ama gayot si apostol Juan con el de suyu maga hermano y hermana, y bien interesao le na diila espiritualidad. Ya puede se kita mira na consejo que ya dale le na de suyu tres carta. Alegre gayot kita cay sabe kita que tiene maga hombre y mujer igual con ele quien hay rula junto con el Cristo na cielo.​—1 Juan 2:27.

¹⁷ Ojala, hay aplica kita con el consejo que ya discuti kita. Queda kita determinao vivi harmonia na verdad y obedece con Jehova na todo aspeto del diaton vida. Estudia con el de suyu Palabra y tiene confianza con ese. Hace fuerte con el de tuyu fe con Jesus. Resisti con el maga filosofia del gente y con el enseñanza del maga apostata. Evita con el tentacion que tiene doble manera de vida y comete pecado. Sigui con el alto principio de Jehova na moral. Y ojala, hay ayuda kita con el diaton maga hermano y hermana que esta fuerte. Puede kita hace con ese si perdona kita con aquellos quien ya puede hace sinti duele kanaton y ayuda con aquellos quien ta necesita ayuda. Como resulta, hay continua kita vivi harmonia na verdad maskin pa ta experiencia kita maga dificultad.