1. Nga ha hi ti nga kombiswa ngu kona ka 3 Johani 3, 4 nji txani txi hi mahako hi va ni litsako?

Johani a vhuni vathu vo tala ve gonda ditshuri. Alakanya litshako li a nga va nalo mbimo yi a nga va wona va txi simama ve thumela Jehovha ngu kuthembeka. Vona va ti manana ni sikarato so tala, se Johani a mahile totshe ati a nga ti ti kota ti to e tsanisa likholo lawe ni ku a ti va teka kota vanana vakwe va moya. Ngu ha kufanako nathu ha tsaka ngako hi txi wona vanana vathu, va moya mwendo va hi nga veleka va txi tiningetela ka Jehovha ni ku mu muthumela ngu kutimisela.—Lera 3 Johani 3, 4.

2. Ngu txihi txikongomelo txa mapasi a Johani?

² Ka dilembe da 98 ka mbimo ya Makrsitu Johani ati hanya Efesu. Ti woneka nga a ti ya zumba kona kheya msana ko va a di humile jele txitondoloni ka Patmosi. Ka txikhati txonetxo moya wo sawuleka wa Txizimu wu mu susumetete ku e bhala mapasi yawa a mararu. Txikongomelo txa mapasi onewo i ti txo kuzeta Makrisu ku me simama me va ni likholo ka Jesu ni ku me simama me tsimbila mu ka ditshuri.

3. Ngu sihi siwotiso a si hi no bhula ngu sona?

³ Johani kota Mpostoli wu a nga hanya ngutu ka vapostoli va Jesu a karatekile ngu kuwona mkuzetelo wo biha wa vagondisi va makuhu a muwa mabanzani. * (1 Joh. 2:18, 19, 26) Vagondisi vonewo va makuhu va txi tigela ku va ziva Txizimu, kambe va si engisi milayo ya txona. A hi bhuleni ngu  sileletelo asi Johani a nga bhala. Mbimo yi hi bhulako ngu siletelo siya hi na xamula siwotiso siya sa siraru: Ti womba txani kutsimbila ditshurini? Ngu sihi sikarato asi si nga hi mahako hi tandeka kutshimbila ditshurini? Ni ku hi nga vhunanisana kutxani kusimama hi tsimbila ditshurini?

4. Ngu kuya ngu 1 Johani 2:3-6 ni 2 Johani 4, 6, ngu tihi ti hi fanelako kutimaha ti to hi tsimbila ditshurini?

⁴ Ti to hi tsimbila nzilani ka ditshuri ti lava hi ziva ti to dona di maneka amu ka Dipswi da Txizimu i ku Bhiblia. Kuengetela ka tiya ti lava hi ‘vekete milayo ya [Jehovha]’ i ku ku muengisa. (Lera 1 Johani 2:3-6; 2 Johani 4, 6.) Jesu a hi vekete txikombiso txa txinene txo engisa Jehovha. Se nzila ya lisima yo engisa Jehovha, ngu londisa mkondo wa Jesu ngu ha hi tikotako ngu kona.—Joh. 8:29; 1 Pedro 2:21.

5. Ngu tihi ti hi fanelako kutsaniseka ka tona?

⁵ Ti to hi simama hi tsimbila ditshurini ti lava hi tsaniseka ti to Jehovha Njizimu txa ditshuri ni ku totshe ti ati wombako mu ka Bhiblia ditshuri. Ti lava hi tshumela hi tsaniseka ti to Jesu ngene Mesiya awu a nga thembiswa. Vathu vo tala nyamsi kha va kholwi ti to Jesu ngene Mkoma wa Mfumo wa Txizimu. Johani a zivisile ti to ku na humelela “vaxengeteli vavangi” ava va ndi no timeta votshe va va nga mbi tiemisela kuemela ditshuri mayelano ni Jehovha ni Jesu. (2 Joh. 7-11) Jonhani a bhate tiya: “I mani i ku wa makuhu, i singa wule a kanetako ti to Jesu i Mesiya, kani?” (1 Joh. 2:22) Ko va ni nzila yimweyo dwe ayi hi nga yi thumisako ti to hi si kanganyiswi, i ku kugonda dipswi da Txizimu. Ngako hi txi maha toneto ngu kona hi no ziva Jehovha ni Jesu. (Joh. 17:3) Se ngu magwito hi na tsaniseka ti to hi nzilani ya ditshuri.

6. Ngu txihi txikarato atxi Makristu ya i ku ngadi maphya ma mananako natxo?

⁶ Otshe Makristu ma fanete kutiwonela ti to ma si timetwi ngu tifilozofiya ta vathu. (1 Joh. 2:26) Mwanathu Alexia * wa França awu a ku ni 25 wa malembe a womba tiya: “Mbimo yi ni nga ti ngadi mphya ni ti jujeka msungo ngu tigondo to fana ni tifilozofiya  ni gondo ya kutimahekela ka silo. Mbimo yimwani ni txi tipfa nga ta pfisiseka. Kambe ni txi tipfa ti si pfisiseki kukholwa ka timwani ni timwani ti ni nga ti gondiswa txikolwani kambe ni si ningi nzeve Jehovha.” Alexia a gondile dibhuku di di ku: A Vida—Qual a Sua Origem? A Evolução ou a Criação? Ku di pindile mavhikinyana, Alexia asi nga nga di a txi kana-kana. Ene a womba tiya: “Ni tsanisekile nipune ti to Bhiblia yi womba ditshuri. Ni tshumete ni wona ti to kuhanya ngu milayo ya yona yi nga ni tisela litsako la hombe?”

7. Ngu tihi hi fanelako ku ti vayilela, ngu txani?

⁷ Hotshethu mwendo hi vaphya mwendo hi va hombe hi fanete hi ti wonela ku hi nga khathu hi thumela Jehovha kuve ho ti xenga. Johani a ti vekile hakubasani ti to kha hi na kusikota kutsimbila nzilani ya ditshuri ka mbimo ya yimweyo hi di ni mahanyelo a nzambwa. (1 Joh. 1:6) Ngako hi txi lava ku Jehovha e hi tsakela konkuwa ni mbimo yi yi tako ti lava hi khumbula to Jehovha wa ti wona tosthe ti hi mahako. Masoni ka Jehovha kha ku na txionho txi txi nga barama.—Vaheb. 4:13.

8. Ngu tihi ti hi fanelo ku ti vayilela?

⁸ Ti lava hi vayielela mawonela a ditiko a ti to m’thu a nga tsakisa Txizimu hambi a txi maha sionho. Mpostoli Johani a bhate tiya: “Ngako hi txi womba ti to kha hi nga ni txionho, ha ti kanganyisa, se ditshuri kha di nga ho kwathu.” (1 Joh. 1:8) Ka masiku a Johani vaxengeteli va txi womba to m’thu a nga maha txionho kha kwenye e simama e va ni wuxaka wo tsana ni Txizimu. Nyamsi hi hanya ka ditiko di vathu va ku ni mawonelo o fana. Vathu vo tala va khona va kholwa ka Txizimu kambe kha va tumelelani ni mawoneli a Jehovha mayelano ni txionho, ngutu-ngutu ka timhaka ta wugango. Vathu va pimisa ti to m’thu a nga ti sawulela ati a ti lavako hambi ti di bihile masoni ka Jehovha.

9. Ngu yihi wuyelo u no yi mana ngako u txi tsana ka ti u ti kholwako?

 ⁹ Makristu ma manana ni txikarato txo kuzetelwa ti to ve belela ka timhaka ta mataho ngu vagondi mwendo vathumi kulowe, ngutu-ngutu ya i ku ngadi vaphya. Atiya ti humelete Aleksandar. Ene a womba tiya: “Mahorana manwani txikolwani ma txi ni sinzisa ku ni otela nawo. Ona ma txi khona aku ni si nga ni dihorana ti nga maha ni di ni txigango txa dijaha.” U txi manana ni sikrato so fana ni soneso, khumbula ti to ngako u txi tsana ka ti u ti kolwako u na xoniphwa, u va ni dihanyo da dinene u tsaka u tshumela u va ni wungana ni Jehovha. U txi lamba kukuzetelwa kumaha to biha ti na mbi kunemelela kumaha ta tinene. Khumbula ti to mawonelo a ditiko ngu ta mataho ma ta ngu ka Sathani. Ngako u txi simama u di thembekile u na va u txo ‘xula ditiko.’—1 Joh. 2:14.

10. Dibhuku da 1 Johani 1:9, di hi vhunisa kutxani kuthumela Jehovha hi di ni livhalo lo basa?

¹⁰ Athu ha ti ziva ti to Jehovha ngene a ku ni fanelo yo hi gela ti to ati tibile mwendo kha ta biha. Se athu hi maha ti hi nga ti kotako ti to hi vayilela txionho. Kambe, ngako hi txi maha txionho ha kombela divalelo ka Jehovha ngu mkombelo. (Lera 1 Johani 1:9) Ni ku loko hi txi maha txionho txa hombe hi kombela txivhuno ka madhota i ku va Jehovha a nga va sawula ti to ve hi khatalela. (Jak. 5:14-16) Hambiketo, kha ti lavi kuzumbela ku ti sotela ngu mhaka ya sionho sa hombe si hi nga maha kale. Ngu kutxani? Nguko tate wathu wa lirando wa hi divalela sionho sathu ngu kuthumisa mterulo. Ngako Jehovha a txi khene a na divalela sionho sathu, ngu ditshuri a na hi divalela. Se txi walo txi txi nga hi tsivelako kuthumela Jehovha hi di ni livhalo lo basa.—1 Joh. 2:1, 2, 12; 3:19, 20.

11. Hi nga maha txani ti to hi si kanganyiswi ngu makuhu?

¹¹ Ti lava hi vayilela tigondo ta vaxengeteli ava va nga xangela ditshuri. Ka mabanza  a Makristu o khata Sathani a thumisile vaxengeteli ti to e phaya kukana-kana ka timbilu ta malanda o thembeka a Txizimu. Ngu toneto ti lava hi ziva kuhambanisa ditshuri ni makuhu. * Valala vathu va nga thumisa internet ti to ve zama ku hi xenga hi si thembi Jehovha kumweko ni vanathu. Khumbula ti to vathu vonevo va xengetelwa ngu Sathani!—1 Joh. 4:1, 6; Mtu. 12:9.

12. Ngu kutxani ti txi lava hi tsanisa likholo lathu ka ditshuri di hi nga di gonda?

¹² Ti to hi si xulwi ngu Sathani ti lava hi kulisa lirando lathu ngu Jesu ni ka mthumo awu a wu mahako ti to e hetisisa sikongomelo sa Jehovha. Ti lava hi themba txithumi txo thembeka atxi Jehovha a txi thumisako ti to e hi ninga sakudya sa moya. (Mat. 24:45-47) Hi tsanisa likholo lathu ngu ku gonda Bhiblia ditshiku ni ditshiku. Likholo lathu li na fana ni mdonga awu mikoloti ya wona yi nga nava. Paulo a thumisile txikombiso txa mndonga mbimo yi a nga bhalela Vakolosa. A txi khene: “Kufana ni ku mi nga amukela Mkoma Kristu Jesu, hanyani mi di txilo tximwetxo nayo; zimani mikuluti kwakwe, mi txi akwa txitimwi kwakwe, mi txi tsaniswa amu ka likholo.” (Vakl. 2:6, 7) Sathani ni maxaka akwe kha na kusikota kuxula Mkristu awu a ku ni likholo lo tsana.—2 Joh. 8, 9.

13. Ngu tihi ti hi ti zivako ku ti na humelela, ngu kutxani?

¹³ Kha ti lavi hi xamala ngako ditiko di txi hi vengela. (1 Joh. 3:13) Johani a hi khumbutisa tiya: “Ditiko dotshe di mtamoni ka m’bihi.” (1 Joh. 5:19) Aku Sathani a yako a txi gumelwa ngu masiko o hala ngu txiviti. (Mtu. 12:12) Ene kha gwiteli ko thumisa siduko so fana ni wagango ni makuhu dwe, ene a tshumela e thumisa tihanyi. Sathani wa ti ziva ti to mbimo yi a ku nayo yo zama kuemisa mthumo wathu wo txhumayela mwendo kudaya likholo lathu nji dotho ngutu. Ngu toneto kha ti hi xamalisi a ku matiko mamwani ma tsimbisako mthumo wathu. Hambiketo, vanathu ka matiko onewo va simama ve timisela. Vona va ti veka hakubasani ti to ti si nga ni mhaka ni ti mlala wathu a no maha, athu hi na xula!

14. Ngu yihi yimwani ya tinzila ta lisima yo vhuna vanathu ti to ve simama nzilani ka ditshuri?

¹⁴ Ti to hi vhuna vanathu ku ve simama ka ditshuri ti lava hi kombisa wumbilu. (1 Joh. 3:10, 11, 16-18) Ti lava hi kombisana lirando mwendo hi ha kutsakani mwendo hi ha kuxanisekani. Ngu txikombiso ina ku mwanathu awu u mu zivako awu a nga felwa ngu dixaka awu a lavako txivhuno? Mwendo ku ni vanathu u va zivako ava va nga welwa ngu tiphango ta mtumbuluko, ava va ku ni txilaveko txo wusetelwa Tinyumba ta Mfumo mwendo tinyumba tawe? Kha hi kombisi lirando lo tshima ngu vanathu ngu ti hi ti wombako dwe, kambe txa lisima ngu li kombisa ngu ti hi ti mahako.

15. Ngu kuya ngu 1 Johani 4:7, 8, ngu tihi ti hi fanelako kumaha?

¹⁵ Ngako hi txi kombisana lirando hi etetela Tate wathu wa lirando wa nzumani. (Lera 1 Johani 4:7, 8.) Nzila ya lisima yo kombisana lirando ngu kudivalelana. Ngu txikombiso, mwanathu a nga hi henyisa kambe e gwita e kombela divalelo. Hi nga kombisa lirando ngu ku mu divalela hi tshumela hi divala phazamo yakwe. (Vakl. 3:13) Mwanathu  wu a dhanwako ku i Aldo a mananile ni txikarato txonetxo mbimo yi a nga pfa mwanathu wo kari a txi womba-womba kubiha ngu vathu va lixaka lawe. Aldo a womba tiya: “Mbimo yotshe ni txi khongela ka Jehovha ti to ni xula kupandiseka ku ni nga di nako ngu mwnanathu wule.” Kambe Aldo kha gwitela eho, ditshiku dimwani a kombete mwanathu wule ku ve huma votshe thembwe. Mbimo yi va nga di thembweni Aldo a gete mwanathu wule ti to atile a nga womba kha ta mu tsakisa. Aldo a tshumela a womba tiya: “Mbimo yi mwanathu wule a nga pfa ti ni nga mu gela a to kombela divalelo, ni ti pfite ngu ti a nga wombisa tona ti to ngu ditshuri a di ti sote. Kukhukhela ka ditshiku donedo hi divalelanide hi tshumela hi va vangana.”

16-17. Ngu tihi ti hi fanelako kutiemisela kumaha?

¹⁶ Johani a txi ma randa ngutu Makristu kulowe, se a ti ma navelela ku ve va ni likholo lo tsana, eto ta woneka ka ti a nga bhala ka mapapilo akwe a mararu. Ta tsakisa kuziva ti to vavamna ni vavasikati ava va no ya fuma ni Kristu nzumani va tekelela txikombiso txa Johani txo khatala ngu Makristu kulowe!—1 Joh. 2:27.

¹⁷ Hi fanete ku ti tekela ha msungo ati hi nga bhula ngu tona. He tiemiseleni kutshimbila nzilani ya ditshuri, hi engisa Jehovha ka totshe ti hi ti mahako. Gonga dipswi da Txizimu u tshumela u di themba. Tiyisa likholo la wena ka Jesu. Vayilela tifilozofiya ta vathu ni tigondo ta va xengeteli. Vayilela mkuzetelo wo kanda kheno ni kheno, ngu ku tigela ku khawe u thumela Jehovha kuve wo ti xenga. Hanya ngu milayo yo guleka ya Jehovha. A hi simameni hi vhuna vanathu ti to ve zumba va di tsani ditshurini ngu ku divalela va va nga hi onhela ni kuvhuna ava va xanisekako. Ngako hi txi maha toneto, hambi hi txo manana ni sikarato hi na simama nzilani ka ditshuri.