1. Ingon sa gipakita sa 3 Juan 3, 4, unsay makapalipay nato?

MAIMADYIN ba nimo kon unsa ka malipayon si apostol Juan dihang iyang nabalitaan nga kadtong iyang natabangan nga makakat-on sa kamatuoran nagpadayon sa pag-alagad kang Jehova nga matinumanon? Nag-atubang silag daghang problema, ug naningkamot si Juan sa pagpalig-on sa pagtuo niining maunongong mga Kristohanon kinsa giisip niya ingong iyang espirituwal nga mga anak. Sa susama, malipay ta dihang ang atong mga anak o kadtong atong gitabangan sa espirituwal magpahinungod sa ilang kaugalingon kang Jehova ug magpadayon sa pag-alagad kaniya.​—Basaha ang 3 Juan 3, 4.

2. Unsay katuyoan sa mga sulat ni Juan?

² Niadtong 98 C.E., si Juan posibleng nagpuyo sa Efeso o sa dapit nga duol niana. Tingali mibalhin siya didto human sa iyang pagkapriso sa isla sa Patmos. Ingon-ingon nianang panahona nga ang balaang espiritu ni Jehova nagpalihok niya sa paghimog tulo ka sulat. Tuyo sa maong mga sulat nga dasigon ang maunongong mga Kristohanon nga magpabilin sa ilang pagtuo kang Jesus ug magpadayon sa paglakaw diha sa kamatuoran.

3. Unsang mga pangutana ang atong tubagon?

³ Si Juan mao na lay apostol nga buhi niadtong panahona, ug nabalaka siya sa epekto sa bakak nga mga magtutudlo diha sa mga kongregasyon. * (1 Juan 2:18, 19, 26) Ang maong mga apostata nag-angkon nga nakaila sa Diyos, pero wala nila sunda ang iyang mga sugo. Niining artikuloha, atong hisgotan ang  tambag ni Juan ug tubagon ang tulo ka pangutana: Unsay gipasabot sa paglakaw diha sa kamatuoran? Unsang mga kalisdanan ang atong maatubang? Ug sa unsang paagi matabangan nato ang usag usa sa pagpabilin diha sa kamatuoran?

4. Sumala sa 1 Juan 2:3-6 ug 2 Juan 4, 6, unsay kinahanglan natong buhaton aron makalakaw diha sa kamatuoran?

⁴ Aron makalakaw diha sa kamatuoran, kinahanglang mahibalo ta sa mga kamatuoran nga naa sa Pulong sa Diyos, ang Bibliya. Dugang pa, kinahanglan natong ‘tumanon ang mga sugo’ ni Jehova. (Basaha ang 1 Juan 2:3-6; 2 Juan 4, 6.) Si Jesus nagpakitag hingpit nga ehemplo sa pagtuman kang Jehova. Busa ang usa ka importanteng paagi nga matuman nato si Jehova mao ang pagsunod sa ehemplo ni Jesus kutob sa maarangan.​—Juan 8:29; 1 Ped. 2:21.

5. Sa unsa ta angayng makombinsir?

⁵ Aron makapadayon sa paglakaw diha sa kamatuoran, kinahanglang kombinsido ta nga si Jehova ang Diyos sa kamatuoran, nga tinuod ang tanang gisulti niya kanato diha sa iyang Pulong, ang Bibliya. Ug kinahanglang kombinsido sab ta nga si Jesus ang gisaad nga Mesiyas. Karon daghan ang nagduhaduha nga si Jesus gidihogan ingong Hari sa Gingharian sa Diyos. Si Juan nagpasidaan nga naay “daghang maglilimbong” nga posibleng magpahisalaag niadtong walay lig-ong pagtuo kang Jehova ug Jesus. (2 Juan 7-11) Si Juan misulat: “Kinsa man ang bakakon? Dili ba kadtong naglimod nga si Jesus ang Kristo?” (1 Juan 2:22) Ang bugtong paagi nga dili ta malimbongan mao ang pagtuon sa Pulong sa Diyos. Kon buhaton nato kana, atong mailhan si Jehova ug Jesus. (Juan 17:3) Ug makombinsir ta nga atong nabatonan ang kamatuoran.

6. Unsa ang usa ka kalisdanan nga giatubang sa batan-ong mga Kristohanon?

⁶ Ang tanang Kristohanon kinahanglang magbantay nga dili malimbongan sa tawhanong mga ideya. (1 Juan 2:26) Ang batan-ong mga Kristohanon ilabinang magbantay niini nga lit-ag. Si Alexia, * usa ka 25 anyos nga sister nga taga-France, miingon: “Niadtong batabata pa ko, naglibog ko tungod sa kalibotanong mga pangatarongan, sama sa teoriya sa  ebolusyon ug tawhanong mga ideya. Usahay, ganahan ko sa maong mga ideya. Pero gibati nako nga dili maayong motuo ko sa tanang gitudlo diha sa eskuwelahan ug dili hatagag higayon si Jehova nga mosulti.” Gitun-an ni Alexia ang librong Life​—How Did It Get Here? By Evolution or by Creation? Human sa pipila ka semana, nawala ang iyang mga pagduhaduha. Si Alexia miingon: “Gipamatud-an nako sa kaugalingon nga kamatuoran ang naa sa Bibliya. Ug akong naamgohan nga ang pagsunod sa mga sukdanan niini makahatag nakog kalipay ug kalinaw.”

7. Unsay angay natong likayan, ug ngano?

⁷ Kinahanglang likayan sa tanang Kristohanon, bata ug tigulang, ang dobleng pagkinabuhi. Si Juan miingon nga dili puwedeng maglakaw ta diha sa kamatuoran ug sa samang higayon magkinabuhing imoral. (1 Juan 1:6) Aron mabatonan nato ang pag-uyon sa Diyos karon ug sa umaabot, kinahanglan natong hinumdoman kanunay nga makita ni Jehova ang tanan natong ginahimo. Sa pagkatinuod, walay sekretong sala, kay ang tanan natong buhaton makita ni Jehova.​—Heb. 4:13.

8. Unsay kinahanglan natong isalikway?

⁸ Kinahanglang isalikway nato ang panglantaw sa kalibotan maylabot sa sala. Si apostol Juan misulat: “Kon kita moingon, ‘Kita walay sala,’ atong gilimbongan ang atong kaugalingon.” (1 Juan 1:8) Sa panahon ni Juan, ang mga apostata nag-ingon nga ang usa puwedeng mohimog sala ug magpabilin gihapong higala sa Diyos. Karon, ang mga tawo sa atong palibot susamag panglantaw. Daghan ang nag-ingon nga nagtuo sila sa Diyos, pero dili sila mouyon sa panglantaw sa Diyos bahin sa sala, ilabina maylabot sa sekso. Ang gilantaw ni Jehova nga sala, giisip nilang dalawaton ug gitawag nga alternative lifestyle.

9. Sa unsang paagi ang mga batan-on makabenepisyo kon buhaton nila ang giingon sa Bibliya nga husto?

⁹ Ang batan-ong mga Kristohanon ilabina tingaling mapresyur sa pagsundog sa panglantaw  sa ilang mga klasmet o kauban sa trabaho bahin sa sekso. Mao nay nahitabo kang Aleksandar. Siya miingon: “Gipresyur ko sa pipila ka babaye sa among eskuwelahan nga makigsekso nila. Ila kong giingnan nga bayot kuno ko kay wala koy trato.” Kon nakasinati kag susama niana, hinumdomi nga kon buhaton nimo ang giingon sa Bibliya nga husto, mobati kag respeto sa kaugalingon, mapanalipdan nimo ang imong panglawas, malikayan nimo ang kasakit, ug mamentinar nimo ang imong relasyon kang Jehova. Sa matag higayon nga suklan nimo ang tentasyon, mahimong mas sayon ang pagbuhat kon unsay matarong. Hinumdomi sab nga ang sayop nga panglantaw niining kalibotana bahin sa sekso naggikan kang Satanas. Busa kon dili ka mokompromiso, imong ‘madaog ang usa nga daotan.’​—1 Juan 2:14.

10. Sa unsang paagi ang 1 Juan 1:9 makatabang nato sa pag-alagad kang Jehova nga may hinlong konsensiya?

¹⁰ Giila nato nga si Jehova ang may katungod nga magtakda kon unsay matawag nga sala. Ug naningkamot gyod ta nga dili mohimog sala. Pero kon makasala ta, ato kanang itug-an kang Jehova pinaagig pag-ampo. (Basaha ang 1 Juan 1:9.) Ug kon makahimo tag seryosong sala, mangayo tag tabang sa mga ansiyano, kinsa gitudlo ni Jehova sa pag-atiman kanato. (Sant. 5:14-16) Pero dili ta angayng mahasol sa nangagi natong kasaypanan. Ngano? Tungod kay gitagana sa atong mahigugmaong Amahan ang halad lukat sa iyang Anak aron mapasaylo ang atong mga sala. Dihang miingon si Jehova nga iyang pasayloon ang mahinulsolong mga makasasala, buhaton gyod nâ niya. Busa gipaposible ni Jehova nga makaalagad ta niya nga may hinlong konsensiya.​—1 Juan 2:1, 2, 12; 3:19, 20.

11. Unsaon nato pagpanalipod ang atong hunahuna sa mga pagtulon-an nga makadaot sa atong pagtuo?

¹¹ Kinahanglang isalikway nato ang pagtulon-an sa mga apostata. Sukad sa pagkatukod sa Kristohanong kongregasyon, ang Yawa kanunayng naningkamot sa pagpahuyang sa pagtuo  sa matinumanong mga alagad sa Diyos. Busa kinahanglang mailhan nato ang kalainan sa tinuod ug bakak. * Mahimong gamiton sa atong mga kaaway ang Internet o social media aron mawala ang atong pagsalig kang Jehova ug ang atong gugma sa mga igsoon. Hinumdomi kon kinsay nagpaluyo niana, ug isalikway kana!​—1 Juan 4:1, 6; Pin. 12:9.

12. Nganong angay natong palig-onon ang atong pagsalig sa mga kamatuoran nga atong nakat-onan?

¹² Aron masuklan nato ang mga pag-atake ni Satanas, kinahanglang palig-onon nato ang atong pagsalig kang Jesus ug sa iyang papel diha sa katuyoan sa Diyos. Kinahanglan sab tang mosalig niadtong gigamit ni Jehova karon sa pagdumala sa iyang organisasyon. (Mat. 24:45-47) Mapalig-on nato ang maong pagsalig pinaagi sa regular nga pagtuon sa Pulong sa Diyos. Ingong resulta, ang atong pagtuo mahisama sa kahoy nga nakagamot pag-ayo. Susama niana ang giingon ni Pablo dihang misulat siya sa kongregasyon sa Colosas. Siya miingon: “Kay gidawat ninyo si Kristo Jesus nga atong Ginoo, padayon sa paglakaw nga nahiusa kaniya. Kinahanglan nga ang inyong pagtuo sa Kristo nakagamot pag-ayo, natukod diha kaniya, ug lig-on.” (Col. 2:6, 7) Kon maningkamot ta sa pagpalig-on sa atong pagtuo, dili gyod ta mapugngan ni Satanas o sa iyang mga tigpaluyo sa paglakaw diha sa kamatuoran.​—2 Juan 8, 9.

13. Unsay atong madahom, ug ngano?

¹³ Dahomon gyod nato nga dumtan ta sa kalibotan. (1 Juan 3:13) Si Juan nagpahinumdom kanato nga “ang tibuok kalibotan nailalom sa gahom sa usa nga daotan.” (1 Juan 5:19) Samtang magkaduol ang kataposan niining sistemaha, mas mosamot ang kasuko ni Satanas. (Pin. 12:12) Gawas nga naggamit siyag dili direktang mga pag-atake sama sa imoralidad ug mga bakak nga gipakaylap sa mga apostata, naggamit sab siyag direktang mga pag-atake sama sa grabeng paglutos. Si Satanas nahibalo nga mubo na lang kaayo ang nahibiling panahon sa pagpaningkamot nga mapahunong ang atong buluhatong pagsangyaw ug mapahuyang ang atong pagtuo. Busa dili ikatingala nga ang atong buluhaton, o ang pipila ka bahin niini, gidili diha sa ubang nasod. Bisan pa niana, ang atong mga igsoon sa maong mga nasod nagpadayon sa paglahutay. Gipamatud-an nila nga bisan unsa pay buhaton sa usa nga daotan, makapabilin tang matinumanon.

14. Unsa ang usa ka paagi nga matabangan nato ang atong mga igsoon sa pagpabilin diha sa kamatuoran?

¹⁴ Aron matabangan nato ang atong mga igsoon sa pagpabilin diha sa kamatuoran, kinahanglan tang magmabination. (1 Juan 3:10, 11, 16-18) Kinahanglang maghigugmaay ta dili lang sa maayong panahon kondili dihang motungha sab ang mga problema. Pananglitan, duna ba kay nailhan nga namatyag minahal ug nagkinahanglag paghupay o tabang? O duna ba kay nabalitaan nga mga igsoon nga nawad-ag kabtangan tungod sa kalamidad ug nagkinahanglag tabang aron matukod pag-usab ang ilang Kingdom Hall o balay? Ikapakita nato sa atong mga igsoon ang kalawom sa atong gugma ug pagkamabination dili lang sa pulong kondili, labaw sa tanan, sa buhat.

15. Sumala sa 1 Juan 4:7, 8, unsay kinahanglan natong buhaton?

¹⁵ Atong gisundog ang atong mahigugmaong langitnong Amahan sa dihang magpakita tag gugma sa usag usa. (Basaha ang 1 Juan 4:7, 8.) Ang usa ka importanteng paagi nga mapakita  nato ang gugma mao ang pagpasaylo sa usag usa. Pananglitan, duna tingali nakapasakit nato pero nangayo siyag pasaylo. Mapakita nato ang gugma kon pasayloon nato siya ug kalimtan ang iyang nahimo. (Col. 3:13) Ang brader nga si Aldo nasakitan dihang ang brader nga iyang gitahod misultig dili maayo bahin sa iyang kagikan. Siya miingon, “Nagsige kog ampo kang Jehova nga tabangan ko nga dili maglagot sa maong brader.” Pero may lain pang gihimo si Aldo. Iyang gihangyo ang brader nga mag-uban sila sa ministeryo. Samtang nag-uban silag sangyaw, gisulti ni Aldo ang iyang gibati. “Sa dihang nahibaloan sa brader nga nasakitan kaayo ko sa iyang giingon,” matod ni Aldo, “nangayo siyag pasaylo. Sa iyang tonada, gibati nako nga nagbasol gyod siya sa iyang giingon. Human niana, amigo na sab mi.”

16-17. Unsay angay natong determinasyon?

¹⁶ Gihigugma pag-ayo ni apostol Juan ang mga igsoon ug gusto niya nga makabaton silag lig-ong pagtuo. Ang iyang gugma ug kabalaka makita sa tambag nga iyang gihatag kanila diha sa iyang tulo ka sulat. Makapadasig gyod ang pagkahibalo nga ang mga lalaki ug babaye nga sama niya gidihogan aron magmando kauban sa Kristo!​—1 Juan 2:27.

¹⁷ Hinaot nga palandongon nato pag-ayo ang tambag nga atong gihisgotan. Magmadeterminado ta sa paglakaw diha sa kamatuoran pinaagi sa pagsunod kang Jehova sa tanang bahin sa atong kinabuhi. Tun-i ang iyang Pulong, ug salig niini. Palig-ona ang imong pagtuo kang Jesus. Isalikway ang tawhanong mga ideya ug ang pagtulon-an sa mga apostata. Likayi ang dobleng pagkinabuhi ug ayawg padaog sa sala. Pagkinabuhi subay sa taas nga moral nga sukdanan ni Jehova. Ug tabangi ang mga igsoon sa pagpabiling lig-on pinaagi sa pagpasaylo niadtong nakapasakit nato ug pagtabang niadtong nanginahanglan. Pinaagi niana, makapadayon ta sa paglakaw diha sa kamatuoran bisan pa sa mga kalisdanan.