MUTWE WA KULILONGESA 30
Nunga ni Kwenda mu Umwenemwene
“Uwahililo wahiana uno chishi nawo shina kwivwa hali ana jami ngwo, Kanende mu umwenemwene.”—3 YOA. 4.
MWASO 54 “Ye Jila, Yino”
CHIKUMA CHILEMU *
1.Kulita ni 3 Yoano 3, 4, yuma yika yakutwaha uwahililo?
POSTOLO Yoano, kakwashile atu anji kunyingika umwenemwene. Kuli iye, atu jacho kapwile ngwe ana jenyi. Chipwe ngwe atu jacho kapwile ni kupalika mu yipikalo yinji, nihindu yaanunga ni kulingila Yehova, chino chevwishile Yoano kuwaha chinji. Chipwe yetu, twakuwahilila chinji ha kumona ana jetu a ku musunya ni a ku ufulielo kanalihane kuli Yehova ni kununga mu umwenemwene.—Tanga 3 Yoano 3, 4.
2. Mumu liaka Yoano asonekene mikanda yenyi?
2 Ha mwaka 98 M.J, Yoano kota kapwile mu mbonge ya Efwesu hanji hakamwihi ni mbonge yacho. Kota kayilemo muze atuhukile mu zuwo lia ususu ku tungu lia Patemu. Ha mashimbu jacho, spiritu yisandu ya Yehova yakwashile Yoano kusoneka mikanda yitatu. Mikanda yacho, kayisonekene hanga yikwase akwa-Kristu ashishika afuliele muli Yesu ni kununga ni kwenda mu umwenemwene.
3. Yihula yika mutukumbulula ha mutwe uno?
3 Ha mashimbu jacho, apostolo akwo te hanafu, Yoano mwe wika wasalile ni mwono, kashika apwile ni kulipikala ni yitanganyanyi waze te anafupu kupiangula mandumbu mu chikungulwila. * (1 Yoa. 2:18, 19, 26) Yitanganyanyi jacho, kapwile ni kwamba ngwo, kananyingika Zambi, alioze te keshi kwononokena shimbi jenyi. Ha longeso lino, mutumona yiyulo yize Yehova atumine Yoano kusoneka. Mutumona nawa kumbululo lia yihula yitatu: Chitangu, kwenda mu umwenemwene yika chinalumbunuka? Chamuchiali, yuma yika muyihasa kutukwika kwenda mu umwenemwene? Chamuchitatu, kuchi mutuhasa kulikwasa hanga tununge ni kushishika?
KWENDA MU UMWENEMWENE YIKA CHINALUMBUNUKA?
4. Kulita ni 1 Yoano 2:3-6 ni 2 Yoano 4, 6, yika twatamba kulinga mba tununge ni kwenda mu umwenemwene?
4 Nyi tunazange kwenda mu umwenemwene, twatamba kunyingika umwenemwene uze uli mu Mbimbiliya, Liji lia Zambi. Chikwo nawa, twatamba kwononokena shimbi ja Yehova. (Tanga 1 Yoano 2:3-6; 2 Yoano 4, 6.) Yesu kali chilweza chipema ha kwononokena Yehova. Kashika, nyi tunazange kwononokena Yehova, twatamba kwimbulula kanawa Yesu.—Yoa. 8:29; 1 Petu. 2:21.
5. Shindakenyo yika twatamba kupwa nayo?
5 Nyi tunazange kununga ni kwenda mu umwenemwene, twatamba kupwa ni shindakenyo ngwetu, Yehova mwe Zambi wamwenemwene, nawa yuma yeswe yize akwamba mu Mbimbiliya, yili yamwenemwene. Twatamba kupwa ni shindakenyo ngwetu, Yesu mwe Mesaya yoze alakenyene. Atu anji musono, keshi kutayiza ngwo, Yehova kasakwile Yesu hanga apwe Mwanangana mu Wanangana wenyi. Yoano katowezele ngwenyi, kuli “akwa kupiangula anji” anafupu kupiangula waze achili aha, keshi kuhasa kukalila umwenemwene wa Yehova ni Yesu. (2 Yoa. 7-11) Yoano yasoneka ngwenyi: “Mukwa mahuza iya shina yoze malikala ngwenyi, Yesu hi Kristu ko?” (1 Yoa. 2:22) Nyi mutulilongesa kanawa Liji lia Zambi, kechi kuhasa kutwonga. Mutunyingika kanawa chize Yehova ni Yesu apwa. (Yoa. 17:3) Kashika, nyi twalilongesa kanawa Liji lia Zambi, mutuhasa kupwa ni shindakenyo ngwetu, tuli ni umwenemwene.
YUMA YIKA MUYIHASA KUTUKWIKA KWENDA MU UMWENEMWENE?
6. Kapinda muka akweze akwa-Kristu akupwa nenyi?
6 Akwa-Kristu eswe katamba kukanyama hanga ahone kwapiangula ni malongeso ja atu. (1 Yoa. 2:26) Chipi-chipi akweze, katamba kukanyama hanga ahone kufwa mu muheto wacho. Alexa, * umwe ndumbu wa pwo wa miaka 25 yamba ngwenyi: “Ku mashimbu a kunyima napwile ni kukakajana chinji ha yuma yize akwa hashi akulongesa, ngwe malongeso akwamba ngwo, yuma yalitangile yene ni malongeso akwo nawa. Yami te nakuzanga malongeso amwe. Alioze, yingunyingika ngwami, kuchatambile kutayiza yuma yeswe akungulongesa ku shikola chakuhona kunyingika yize Yehova akunyonga. Alexa yalilongesa mukanda uli ni mutwe ngwo, Kuchi Mwono Waputukile (A Vida—Qual a Sua Origem?) ni mukanda unambe ngwo, Yuma Kayitangile nyi Yalitangile Yene? (Evolução ou a Criação?). Ha mashimbu akehe wika, kuyambashana chenyi cheswe yichihwa. Alexa yamba nawa ngwenyi: “Yami mwene yingusa shindakenyo ngwami, Mbimbiliya yili ni umwenemwene. Yingunyingika nawa ngwami, kukaula yize Mbimbiliya yakulongesa, che chakuneha uwahililo ni sambukila.”
7. Kapinda muka twakupwa nenyi, nawa mumu liaka twatamba kumwehuka?
7 Akwa-Kristu eswe, akweze ni makulwana, katambile kupwa ni mwono ngwe wa nongwena. Yoano kambile ngwenyi, kutwatambile kwenda mu umwenemwene aku tunalingi yuma ya utanji. (1 Yoa. 1:6) Nyi tunazange kupwa ni utayizo wa Yehova musono ni kulutwe lia matangwa, twatamba kwiwuluka ngwetu, iye kakumona yuma yeswe yize twakulinga. Kwamba umwenemwene, shili yakusweka kuyatwamineko, mumu yuma yeswe yapwa ya “kufukula kumeso” ja Yehova.—Hepre. 4:13.
8. Yika twatamba kwehuka?
8 Twatamba kwehuka nyonga lia akwa hashi ha chize akumona shili. Postolo Yoano kasonekene ngwenyi: “Nyi mutwamba ngwetu Kutushi shili, tunaliongo” yetu ene. (1 Yoa. 1:8) Ha mashimbu ja Yoano, yitanganyanyi kapwile ni kwamba ngwo, mutu mahasa kulinga kwenyi shili, nihindu manunga ni kupwa sepa lia Zambi. Chipwe musono, atu che akunyonga. Atu anji kakutayiza ngwo, Zambi kwali, alioze, keshi kutayiza yiza iye akulongesa hakutwala ku shili ni utanji. Kuli yuma yize Yehova akwamba ngwo, yili shili, alioze atu anji kakuyilinga ni kwamba ngwo, yinatale hali mutu mwene.
Akweze, kolesenu ufulielo wenu ha yize Mbimbiliya yakwamba, nawa likwachililenu ha shimbi ja Yehova hakutwala ku upi ni upeme, nyi nwalinga chocho, munuhasa kukalila ufulielo wenu (Tala paragrafu 9) *
9. Yiwape yika akweze akuzuka muze akulikwachilila ku yize ananyingika ngwo yinalite?
9 Chipi-chipi akweze, mahasa kwapiangula kuli masepa jo a ku shikola, hanji ku mulimo hanga ahone kutayiza yize Mbimbiliya yakulongesa hakutwala ku utanji. Yino ye yalingiwile kuli Alexandre. Iye yamba ngwenyi: “Amwe akweze a mapwo ku shikola, kapwile ni kungushinjila hanga ngulinge no utanji. Ayo kapwile ni kungwamba ngwo, amu chishi ni kasendo, kota nguli chimbinda.” Shina ni yena wakupalika mu cheseko ngwe chino? Iwuluka ngwe, nyi walikwachilila ku yize unanyingika ngwo yinalite, muzuka yiwape yinji. Kukaula yize Mbimbiliya yakulongesa, chakutufunga ku mujimba ni mu manyonga, nawa chakufunga usepa wetu ni Yehova. Nyi wakumba chimwe cheseko, muupwa ni tachi hanga ukumbe chikwo. Iwuluka ngwe, manyonga eswe api waze ali hano hashi hakutwala ku utanji, kanakatuka kuli Satana. Kashika, nyingika ngwo, muze mununga ni kulituna manyonga jacho, ‘unakumbu mwe chingulungulu.’—1 Yoa. 2:4.
10. Kuchi 1 Yoano 1:9 unatukwase kuwayila Yehova ni mbunge yitoma?
10 Tunanyingika ngwetu, Yehova mwe uli ni ulite wakutulweza yize yinalite ni yize kuyalitele. Nawa twakusa tachi jinji hanga tuhone kulinga shili. Alioze, muze twakulinga shili, twakulemba kuli Yehova hanga twite ukonekeno. (Tanga 1 Yoano 1:9.) Muze twakulinga shili yinene, twakwita ukwaso kuli makulwana a mu chikungulwila. Yehova mwe waatongwele hanga atufunge. (Tia. 5:14-16) Chikwo nawa, twatamba kukeya hanga tuhone kulilamikiza ha mukunda wa shili yize twalingile kunyima. Yehova, Tata yetu wa zango, katumine mwanenyi ngwe ukuule mumu lia uhenge wetu. Muze Yehova akukonekena mutu yoze walikonyeka, keshi kwiuluka nawa shili yenyi. Kashika, mutuhasa kumulingila ni mbunge yitoma.—1 Yoa. 2:1, 2, 12; 3:19, 20.
11. Kuchi mutuhasa kufunga manyonga jetu ku malongeso a mahuza waze mahasa kukokolola ufulielo wetu?
11 Twatamba kulituna malongeso a yitanganyanyi. Chize haze chikungulwila cha akwa-Kristu chaputukile, Ndiapu kakweseka kukuwa mbuto ja kuyambashana mu manyonga ja tuvumbi twa Zambi ashishika. Kashika, twatamba kunyingika kanawa yuma yize yili yamwenemwene ni ya mahuza. * Akwa-kole jetu mahasa kusa sango ja mahuza ha Internet hanga akokolole ufulielo wetu ni kupihisa zango lietu hali Yehova ni mandumbu jetu. Kashika, nyingika kuze kunakatuka sango jacho, nawa jehuke kawashi-washi!—1 Yoa. 4:1, 6; Uso. 12:9.
12. Mumu liaka twatamba kukolesa ufulielo wetu?
12 Nyi tunazange kwehuka miheto ya Satana, twatamba kukolesa ufulielo wetu hali Yesu ni kujikijila ha chize Yehova anakalakala ni Yesu hanga amanunune upale wenyi. Twatamba kujikijila nawa hali waze Yehova atongwele hanga asongwele ululikiso wenyi. (Mateu 24:45-47) Mutuhasa kukolesa ufulielo wetu ha kulilongesa Liji lia Zambi matangwa eswe. Nyi mutulinga chino, ufulielo wetu muupwa ngwe mutundo wakutumba kusesa lia lwiji, uze miji yawo yakulitanda. Paulu kambile maliji wowene kuli mandumbu a mu chikungulwila cha A-Kolosu ngwenyi: “Chizechene ngwe nwatambwile Kristu Yesu mwe Mwene, chocho endenu muli iye; nukatande miji, nukondomoke muli iye, nukalikoleze mu ufulielo wenu.” (Kolo. 2:6, 7) Nyi mukwa-Kristu masa tachi hanga akolese ufulielo wenyi, Satana hanji atu waze iye akusongwela, kechi kuhasa kumukwika kwenda mu umwenemwene.—2 Yoa. 8, 9.
13. Yika twatamba kushimbwila, nawa mumu liaka?
13 Twatamba kushimbwila ngwetu, akwa hashi kumatwivwila kole. (1 Yoa. 3:13) Yoano kanatwiwulula ngwenyi, “hashi heswe lukombo kuhakupomba mu chiyulo cha mwe chingulungulu.” (1 Yoa. 5:19) Amu songo linakundama ufwatulo wa Satana unayi ni kwoka. (Uso. 12:12) Iye kakutupiangula hakehe-hakehe. Chakutalilaho, kakuzanga hanga tufwe mu miheto yenyi hakutwala ku utanji ni mahuza a yitanganyanyi. Chikwo nawa, kakutuma atu jenyi hanga atuhungumione. Satana kananyingika ngwenyi, hasala wika ni mashimbu akehe, kashika anase tachi hanga akwike mulimo wetu wa kwambujola ni kukokolola ufulielo wetu. Kashika, kutushi kukomoka ha kunyingika ngwo, mulimo wetu wa kwambujola kanaukanjisa mu yifuchi yinji. Chipwe chocho, mandumbu jetu waze atwama mu yifuchi yacho, kananungu ni kunyongonona. Ayo kanasolola ngwo, chipwe ngwe mutupalika mu yihungumiona yeswayo, nihindu mutukumba.
TULIKWASENU TUNUNGE MU UMWENEMWENE
14. Yuma yika mutuhasa kulinga hanga tukwase mandumbu jetu anunge mu umwenemwene?
14 Nyi tunazange kukwasa mandumbu jetu hanga anunge mu umwenemwene, twatamba kwasolwela keke. (1 Yoa. 3:10, 11, 16-18) Kutwatambile kusolola wika zango kuli mandumbu jetu muze yuma yinende kanawa, alioze chipwe muze mukusoloka kapinda. Chakutalilaho, shina unanyingika umwe ndumbu yoze unafupu ukwaso mumu kafwisa mutu yoze azanga chinji? Shina unanyingika amwe mandumbu anafupu ukwaso mumu vula kapuzula mazuwo jo ni Mazuwo ja Wanangana? Yetu twakusolola zango ni keke kuli mandumbu jetu hi wika ko mu kanwa, alioze ni mu yitanga.
15. Kulita ni 1 Yoano 4:7, 8, yika twatamba kulinga?
15 Twakwimbulula Tata yetu wa mu malilu Yehova, ha kuzanga mandumbu jetu. (Tanga 1 Yoano 4:7, 8.) Jila yimwe yize mutuhasa kusolwelamo zango, yili kukonekena akwetu. Chakutalilaho, ndumbu umwe mahasa kutwita ukonekeno ha mukunda wa yize atwamba hanji atulinga. Mutuhasa kumusolwela zango ha kumukonekena ni kuvulama yize ambanga hanji atulinganga. (Kolo. 3:13) Umwe ndumbu avuluka ngwo, Aldo, kapalikile mu kapinda wacho muze umwe ndumbu wa mu chikungulwila ahanjikile yuma yipi hakutwala ku munyachi wenyi. Aldo yamba ngwenyi, “Nalembele chinji kuli Yehova hanga angukwase nguhone kwivwila uli ndumbu wacho.” Alioze, yalinga nawa yimwe, yamusanyika hanga atuhuke nenyi mu munda. Muze te anambujola, Aldo yamulweza chize avwile ha mukunda wa yize ambile hakutwala ku munyachi wo. Iye yamba nawa ngwenyi: “Muze ndumbu wacho evwile yize namulwezele, yangwita ukonekeno. Yalinyenga chinji hamukunda wa yuma yacho. Chocho, yitulivwashana ni kuvulama yuma yeswe.”
16-17. Yika twatamba kununga ni kulinga?
16 Postolo Yoano, kapwile ni kuzanga chinji mandumbu jenyi a ku ufulielo, kashika te akulihulumba chinji ha ufulielo wo. Chino chinasoloka ha yiyulo yize asonekenene mandumbu jenyi, yili ha mikanda yenyi yitatu. Chili chiwape chinene kunyingika ngwo, atu waze makayula ni Yesu mu malilu, kakwete zango ngwe lia Yoano!—1 Yoa. 2:27.
17 Twatamba kulemesa chinji yiyulo yize twalilongesa ha mutwe uno. Nunga ni kwenda mu umwenemwene ha kwononokena Yehova mu yuma yeswe yize wakulinga ku mwono we. Lilongesa Mbimbiliya, nawa fuliela ha yize unalilongesa. Kolesa ufulielo we muli Yesu. Ehuka mana ja atu ni malongeso a yitanganyanyi. Kanda upwa ni mwono ngwe wa nongwena, nawa ehuka kulinga shili. Twama kulita ni shimbi ja Yehova ku mwono we. Kwasa mandumbu je hanga anunge mu umwenemwene ha kukonekena waze makulinga upi, ni kukwasa waze anafupu ukwaso. Nyi twalinga chino, mutununga ni kwenda mu umwenemwene, chipwe ngwe mutupalika mu kapinda.
MWASO 49 Kuwahisa Yehova ku Mbunge
^ kax. 5 Twatwama hashi haze anayulu kuli Samahuza, mwe Satana. Kashika, chakupwa chikalu kwenda mu umwenemwene. Akwa-Kristu a ku sekulu yitangu no kapwile ni kapinda yono. Yehova kakwashile akwa-Kristu jacho hakutuma postolo Yoano hanga aasonekene mikanda yitatu. Mikanda yacho, yinasolola kapinda yoze mahasa kukwika mutu kwenda mu umwenemwene ni yize mahasa kulinga hanga amukumbe.
^ kax. 3 Tala mushete unambe ngwo, “ Lusango wa Mikanda ya Yoano.”
^ kax. 6 Majina amwe kapwa kwalumuna.
^ kax. 11 Tala mutwe unambe ngwo, “Shina Sango Jino Jamwenemwene?” ha Kaposhi wa Kutalila wa Agosto 2018.
^ kax. 59 ULUMBUNWISO WA YIZULIE: Umwe ndumbu ku shikola, kali mukachi ka atu waze akulinga yuma ya utumwa. (Mu yifuchi yimwe, kongolo kakumutesa ni yitanga ya utumwa.) Muze haheta ku zuwo, kanahengwola shimbi ja Yehova hakutwala ku upi ni upeme. Chino chamukwasa kukumba kapinda wacho.
