1. Kuatthum Johan 3, 4 ningin zeinihdah a kan nuamhter?

LAMKALTU Johan nih biatak hngalh awkah a bawmhmi hna nih zumhfek tein Jehovah an biak peng timi kong a theih tikah zeitlukin dah aa nuamh lai ti kha na mitthlam ah cuanter hmanh. Buaibainak tampi a tong i thlaraulei ah a fale in a hmuhmi hna, mah zumhfekmi Khrihfa hna thazaang pek awkah Johan cu fakpi in a rak i zuam. Cu bantukin kan fale taktak asiloah biatak hngalh awkah kan bawmhmi hna nih Jehovah sinah an pum an i pe i Jehovah rian an ṭuan peng timi kong kan theih tikah kan i nuam tuk.—3 Johan 3, 4 rel.

2. Johan ṭialmi cakuat pathum i aa tinhnak cu zeidah a si?

² AD 98 ah Johan cu Efesa khua asiloah mah khua pawngah um dawh a rak si. Patmos tikulh i thong a tlaknak in a chuah hnuah aa ṭhialmi a si men lai. Mah caan hrawngah Jehovah thiang thlarau nih cakuat pathum ṭial dingin a fial. Mah cakuat aa tinhnak cu zumhfekmi Khrihfa hna nih Jesuh an zumh peng nakhnga le biatak chungah an kal peng khawh nakhnga forhnak caah a si.

3. Zei biahalnak a phi dah kan phit hna lai?

³ Johan cu lamkaltu hna lakah hmanung bik a nungmi a rak si i a hmaan lomi cawnpiaktu hna nih Khrihfabu an iap hna lai timi kong he aa tlaiin a lungre a rak thei. * (1 Johan 2:18, 19, 26) Mah zumhpialmi hna nih Pathian kan hngalh tiah an ti ko nain Jehovah nawl cu an ngai lo. Johan nih a ṭialmi ruahnak cheuhnak kong kha i ruah hna hmanh u sih. Cutin kan tuah ahcun mah biahalnak pathum hi kan phit khawh lai: Biatak chungah kal timi cu zei sullam dah a si? Cutin tuah lo awkah zeinihdah a kan donh khawh? Biatak chungah kan um khawh peng nakhnga pakhat le pakhat zeitindah kan i bawmh khawh?

4. Biatak chung kal khawh awkah 1 Johan 2:3-6 le 2 Johan 4, 6 ningin zeidah kan tuah a hau?

⁴ Biatak chungah kan kal khawh nakhnga Pathian Bia, Baibal in kan hmuhmi biatak kha kan hngalh a hau. Cun “Pathian kha a nawl kan ngaih” a hau. (1 Johan 2:3-6; 2 Johan 4, 6 rel.) Jesuh nih Jehovah nawlngaihnak ah zohchunh awk ṭha a chiah. Cucaah Jehovah nawl kan ngaih kan langhter khawhnak a biapi bikmi lam pakhat cu kan si khawh chungin Jesuh nunning kan i zohchunhnak thawngin a si.—Johan 8:29; 1 Pet. 2:21.

5. Zeidah kan zumh awk a si?

⁵ Biatak chungah kan kal khawh peng nakhnga Jehovah cu a hmaanmi Pathian a si i Baibal in a kan chimhmi vialte zong a hmaanmi a si ti kha kan zumh a hau. Cun Jesuh cu biakammi Messiah a si ti zong kha kan zumh a hau. Tuchan ah mi tampi nih Jesuh cu Pathian Pennak i Siangpahrang in chiti thuh a si timi kong he aa tlaiin lunghrinnak an ngei. Johan nih Jehovah le Jesuh kong biatak ṭha tein a zum lomi hna kha a ping ah a hruai kho dingmi “hlengtu tampi” an um lai tiah ralrinnak a kan pek. (2 Johan 7-11) Johan nih hitin a ti: “A si ahcun, aho cu dah lihchimpa cu a si kun? Jesuh cu Khrih a si lo, a titu kha a si.” (1 Johan 2:22) Mah hlennak kan hrial khawhnak lamkhat cu Baibal hlathlainak thawngin a si. Cutin kan tuah lawngah Jehovah le Jesuh kong kha kan hngalh khawh lai. (Johan 17:3) Cun biatak kan ngeih zong kha kan zumh khawh lai.

6. Khrihfa mino hna kha biatak chungah kal lo awkah zeinihdah a donh khawh hna?

⁶ Khrihfa hna cu minung cawnpiaknak nih a ping ah a hruai hna nakhnga lo an i ralrin a hau. (1 Johan 2:26) Cun Khrihfa mino pakhat cio zong nih mah ṭih a nungmi thil kha an hrial a hau. France ah a ummi kum 25 a simi unaunu Alexia * nih hitin a ti: “Sianginn ka kai lioah thlennawnnak kong le a dang minung cawnpiaknak kong kha ka cawn hna. Mah nih biatak cungah lunghrinnak a ka ngeihter. Mah caan lioah mah cawnpiaknak nih ka lung a ka suk tuk. Asinain Baibal cawnpiaknak zei rel loin um le ka sayate chimmi paoh zumh dih cu a palh tiah ka hun ruah.” Alexia nih Nunnak—Hika Ah Zeitindah A Phanh? Thlennawnnak In  Maw Asiloah Sernak In Maw? timi cauk kha a hlathlai. Zarh tlawmpal a rauh hnuah lunghrinnak a ngei ti lo. Alexia nih hitin a ti: “Baibal ah aa telmi biatak cu a hmaanmi a si ti kha keimah theng nih ka hun hngalh. Cun Baibal phunglam ningin nunnak nih nuamhnak le daihnak a ka hmuhter ti zong kha ka hun hngalh.”

7. Zei tuah lo awkah dah kan i ralrin a hauh, Zeicah?

⁷ Mino kan si ah, upa kan si ah kan dihlak in nunning pahnih in nun kha kan hrial awk a si. Johan nih ziaza ṭhalo in nun buin biatak chungah kal khawh a si lo tiah a ti. (1 Johan 1:6) Jehovah lunglawmhter kan duh ahcun kan tuahmi thil kip Jehovah nih a hmuh dih ti kha kan i cinken awk a si. A thli tein kan tuahmi kha mi nih an hmu lo nain Jehovah nih cun kan tuahmi kip kha a hmuh dih.—Heb. 4:13.

8. Zeidah kan hrial awk a si?

⁸ Sualnak he aa tlaiin vawlei hmuhning kha kan hrial awk a si. Johan nih “kannih nih, ‘sualnak kan ngei lo’ kan ti ahcun kanmah le kanmah kan i hlen a si” tiah a ti. (1 Johan 1:8) Johan chan lioah zumhpialmi hna nih mi pakhat nih sualnak a tuah buin Pathian he a ṭhami pehtlaihnak a ngei kho rih tiah an ti. Tuchan ah, kannih zong cu bantuk ruahnak a ngeimi hna lakah kan nung. Mi tampi nih Pathian kan zumh tiah an ti ko nain sualnak kong he aa tlaiin Pathian chimmi kha an cohlang duh lo. A hleiin nupa sinak kong he aa tlaiin Jehovah chimmi kha an cohlang lo. Jehovah nih sual a phawtmi nupa sualnak phun a um, asinain mi pakhat nih a duh ahcun cohlan khawh a si ko tiah an ti.

9. Mino pawl nih a hmaanmi Baibal cawnpiaknak ningin an tuahmi cu zeicah a ṭhat?

⁹ Khrihfa mino hna cu nupa sinak kong he aa tlaiin Baibal chimmi a cohlang lomi rian ṭuanṭi hawi asiloah sianginn kaiṭi hawi hna he an um ṭi caah mah kong he aa tlaiin a hmaanmi hmuhnak ngeih peng cu an caah a har kho. Aleksandar zong cu bantuk thil sining a rak  tong. Hitin a ti: “Sianginn ah nu cheukhat nih anmah he nupa sualnak tuah dingin an ka sawm. Nungak ka ngeih lo caah nu le nu asiloah pa le pa aa duhmi na si tiah an ka ti.” Nang zong cu bantuk thil sining na tong kho ve. Asinain Baibal chimmi ningin na zulh ahcun nangmah le nangmah kha a ṭhatnak leiin naa hmu kho lai, na ngan a dam lai, lungre theihnak kha na hrial khawh lai i Jehovah he a ṭhami pehtlaihnak na ngei kho peng lai. Lemsoinak kha na al khawh ahcun mah nih a hmaanmi thil kha tuah khawh awkah aan bawmh lai. Nupa sinak he aa tlaiin hi vawlei i a ṭhalomi hmuh ning cu Satan sinin a rami a si ti kha philhhlah. Cucaah vawlei ruahnak kha na doh ahcun ‘mi ṭhalopa kha na tei khawh lai.’—1 Johan 2:14.

10. A ṭhami chiaṭha thleidannak lungthin he Jehovah rian kan ṭuan khawh nakhnga 1 Johan 1:9 nih zeitindah a kan bawmh?

¹⁰ Sualnak kong he aa tlaiin Jehovah chimmi kha kan cohlan. Cun sualnak tuah lo awkah kan si khawh chungin kan i zuam. Asinain sualnak kan tuah tikah kan palhnak kha phuangin Jehovah sinah thla kan cam awk a si. (1 Johan 1:9 rel.) Sualnak ngan kan tuah ahcun Jehovah nih kanmah zohkhenh awkah rian a pekmi Khrihfa upa hna sinah bawmhnak kan hal hna awk a si. (Jeim 5:14-16) Asinain hlan ah kan tuahmi palhnak ruangah sualnak ka ngei timi ruahnak kan ngeih peng awk a si lo. Zeicah? Zeicahtiah dawtnak a ngeimi kan Pa nih kan sualnak ngaihthiam awkah a Fapa tlanhnak man kha a kan timhpiak caah a si. Kan tuahmi sualnak ruangah kan i ngaihchih taktak ahcun Jehovah nih kaan ngaihthiam hna lai tiah a kan ti. Cucaah Jehovah nih a ṭhami chiaṭha thleidannak lungthin he a rian kan ṭuan khawh nakhnga a kan timhpiak.—1 Johan 2:1, 2, 12; 3:19, 20.

11. Kan zumhnak a hrawk khomi cawnpiaknak in kanmah le kanmah kha zeitindah kan i kilven khawh?

¹¹ Zumhpialmi hna cawnpiaknak kha kan  hrial awk a si. Khrihfabu dirhhram an thawk lioah Khuachia nih Khrihfa pawl an zumhnak a der nakhnga aa zuam peng. Cucaah zeidah a hmaan i zeidah lihbia a si ti kha kan hngalh a hau. * Kan ral pawl nih Jehovah kan zumhnak le uanu pawl kan dawtnak a zor nakhnga Internet asiloah social media kha an hman men lai. Mah lihbia hna cu Satan sinin a rami a si caah kan zumh awk a si lo.—1 Johan 4:1, 6; Biat. 12:9.

12. Kan cawnmi biatak kan zumhnak kha zeicah kan fehter awk a si?

¹² Satan dohnak kan tei khawh nakhnga Jesuh cungah a fekmi zumhnak ngeih le Pathian tinhnak ah Jesuh a rian kha hngalhthiam a hau. Cun Jehovah nih a hmanmi a bupi lamhruainak zong kha kan zumh a hau. (Matt. 24:45-47) Pathian Bia hmaan tein kan hlathlainak thawngin kan zumhnak kha kan fehter awk a si. Cutin kan tuah ahcun kan zumhnak cu a hram thukpi in a thlami thingkung bantuk a si lai. Mah he aa lomi kong kha Paul nih Kolose Khrihfabu sinah a cakuat ah a langhter. Hitin a ti: “Khrih Jesuh cu nan Bawipa ah nan i lak cang caah, amah he i pehtlai in nung u. Amah chungah hram thukpi in thla u law amah chungah nan nuncan cu inn bantukin sa u law an rak in cawnpiak hna bang khan nan zumhnak ah ṭhawng chin lengmang ko u.” (Kol. 2:6, 7) Zumhnak ṭhawng dingin fakpi in kan i zuam ahcun Satan le amah lei ah a ṭangmi hna nih biatak lam cungin kan pial nakhnga zeihmanh an tuah kho lai lo.—2 Johan 8, 9.

13. Zeidah kan i ruahchanh awk a si, zeicah?

¹³ Vawlei nih a kan huat lai tiah kan i ruahchan awk a si. (1 Johan 3:13) Johan nih “vawlei hi a pumpi in mi ṭhalopa kuttang ah a um” tiah ralrin a kan pek. (1 Johan 5:19) Hi vawlei donghnak caan a naih chin bantukin Satan zong a thin a hung chinchin. (Biat. 12:12) Ziaza rawhralnak asiloah zumhpialmi hna lihbia ti bantuk a lang setsai lomi lam a hman lengah fakpi in hremnak ti bantuk langhngan in dohnak zong kha a hman. Satan nih kan phungchim rian ngolter awk asiloah kan zumhnak hrawh awkah caan tawite lawng ka ngei ti kha a hngalh. Cucaah kan rianṭuannak an dohmi asiloah ram tampi ah phungchimnak rian an khenkhammi cu khuaruahhar awk a si lo. Cutin a si ko nain cu bantuk ram ah a ummi kan unau pawl cu inkhawhnak an ngei. Satan nih Jehovah miphun cungah zeibantuk thil a tlunter hmanhah zumhfek tein kan um kho ko.

14. Kan unau pawl biatak chungah an um khawh peng nakhnga kan bawmh khawh hnanak lamkhat cu zeidah a si?

¹⁴ Kan unau pawl biatak chungah an um khawh peng nakhnga bawmh khawh awkah an cungah zaangfahnak kan langhter a hau. (1 Johan 3:10, 11, 16-18) Thil sining a ṭhat caan lawngah si loin harnak kan ton tik zongah unau cungah dawtnak kan langhter a hau. Tahchunhnak ah, dawtmi pakhat nih thihtak ruangah hnemhnak a herhmi asiloah a dang lam in bawmh a herhmi na hngalhmi hna an um maw? Asiloah leiser ral ruangah an thilri a sungmi unau cheukhat le Biakinn asiloah inn remh awkah bawmh a herhmi unau na hngalhmi an um maw? Zeitlukin dah kan dawt hna i an cungah zaangfahnak kan ngeih ti kha kan biachim lawng si loin kan tuahsernak in langhter cu a biapi tukmi a si.

15. Kuatkhat Johan 4:7, 8 ningin zeidah kan tuah a hau?

¹⁵ Pakhat le pakhat cungah dawtnak kan langhter tikah dawtnak a ngeimi vancung kan Pa kan i zohchunhmi a si. (1 Johan 4:7, 8 rel.) Dawtnak kan langhter khawhnak a biapimi  lamkhat cu pakhat le pakhat kan i ngaihthiamnak thawngin a si. Tahchunhnak ah, mi pakhat nih na lung aan fahter ko nain ngaihthiam aan hal. Mah tikah na ngaihthiam i a palhnak na ruah ti lonak thawngin dawtnak na langhter khawh. (Kol. 3:13) Unaupa Aldo cu a upatmi unaupa pakhat nih a nunphung kong he aa tlaiin a chiatnaklei in a chim tikah a lung a fak. Aldo nih hitin a ti: “Mah unaupa cungah a chiatnaklei in ka hmuh nakhnga lo atu le atu thla ka cam.” Asinain Aldo nih a dang thil a tuahmi zong a um. Mah unaupa kha phungchim kalṭi awkah a sawm. An kalṭi tikah Aldo nih unaupa a chimmi ruangah zeitlukin dah a ngaih a chiat timi kong kha a chimh. Aldo nih hitin a ti: “Ka lung a fahnak kong kha unaupa nih a theih tikah ngaihthiam a ka hal. A aw cawi le a biachim ningin zeitlukin dah a ngaih a chiat ti kha ka hun hngalhthiam. Mah hnuah hawikom ṭha kan hung si ṭhan.”

16-17. Zei tuah awk ah dah bia kan khiah awk a si?

¹⁶ Lamkaltu Johan nih unau pawl kha a dawt tuk hna i an zumhnak ṭhawng hna seh ti a duhpiak hna. Cutin a dawtnak hna kha an sinah ruahnak cheuhnak cakuat pathum a ṭialmi ah fiang tein a langhter. Khrih he uktu ṭuanṭi dingah Johan bantuk a simi nu le pa hna cu chiti thuh an si timi kong theih cu thazaang petu taktak a si.—1 Johan 2:27.

¹⁷ Kan i ruah cangmi ruahnak cheuhnak hna nih kan lung a kan suk tuk ko lai. Biatak lam cungah kal dingin bia khiak hna u sih law kan nunnak kip ah Jehovah nawl ngai hna u sih. Baibal kha hlathlai law lungtak tein zum. Jesuh kha lungtak tein zum. Minung cawnpiaknak le zumhpialmi cawnpiaknak hna kha hrial. Nunning pahnih in nun awk le sualnak tuah awkah hneknak kha do. Jehovah i a sangmi a phunglam ningin kan nung. Cun kan lung a kan fahtermi unau pawl kan ngaihthiam hnanak thawngin le a herhmi unau pawl kan bawmh hnanak thawngin uanu pawl kha an zumhnak a feh peng nakhnga bawm hna u sih. Cun zei bantuk harnak kan ton hmanhah biatak chungah kan kal kho peng lai.