1. Thenge la 3 Ioane 3, 4, nemene la ka amadrinë së?

 PANE mekune jë la madrine i Ioane aposetolo. Angeic a dreng laka, kola catre nyihlue i Iehova hnene la itre hnei angeic hna cainöje kow. Ioane a xome ceitu angatr me itre nekö i angeic ngöne la u. Nge hnei Ioane hna catre xatua angatr troa acatrene la lapaune i angatr ke, nyimutre la itre jol hnei angatr hna cile kow. Tui Ioane, easa madrin ngöne la itre nekö së me itre ka ini tus a nue la mele i angatr koi Iehova me nyihlue i Nyidrë.—E jë la 3 Ioane 3, 4.

2. Pine nemene matre hnei Ioane hna cinyihane la köni tus?

² Ame lo 98 M.K., hnei Ioane hna mel e Efeso. Maine jë, hnei angeic hna lapa e cili thupene la hna akalabusi angeic e Patamo. Celë hi ijine kola upi angeic hnene la uati hmitrötre i Iehova, troa cinyihane la köni tus. Itre ej a xatuane la itre Keresiano troa acatrene la lapaune i angatr koi Iesu me catre melëne la nyipici.

3. Nemene la köni hnying hne së hna troa sa?

³ Ioane pe hi la aposetolo ka mel ngöne la ijine cili. Angeic a xouene troa ajojezine la itre ekalesia hnene la itre atr ka hamë ini ka thoi. * (1 Ioane 2:18, 19, 26) Itre ka iamenumenu a qaja ka hape, atre Akötresieti hi hnei angatr, ngo tha trongëne pe angatr la itre hna amekötin hnei Nyidrë. Tro sa ce wang la itre eamo hna cinyihane hnei Ioane ngöne la köni tus, me sa la köni hnying celë: Nemene la aliene la kola hape, troa trongëne la nyipici? Nemene la itre jol hne së hna troa cile kow? Nemene la aqane tro sa ithuecatrekeu matre troa catre trongëne la nyipici?

4. Thenge la 1 Ioane 2:3-6 me 2 Ioane 4, 6, nemene la nyine troa kuca matre troa trongëne la nyipici?

⁴ Maine easa ajane troa trongëne la nyipici, loi e tro sa pane atre la nyipici e hnine la Tusi Hmitrötr. Loi e tro fe sa ‘trongëne la itre wathebo i Iehova.’ (E jë la 1 Ioane 2:3-6; 2 Ioane 4, 6.) Hnei Iesu hna amamai tulu ka lolo göne la aqane troa drengethenge Akötresie. Maine easa ajane troa drengethenge Iehova, loi e tro sa xötrethenge hnyawa la tulu i Iesu.—Ioane 8:29; 1 Pet. 2:21.

5. Nemene la ka troa xecie koi së?

⁵ Maine easa ajane troa catre trongëne la nyipici, loi e troa xecie koi së laka, Iehova la Akötresie ka nyipici, nge ka nyipici la itre hnei Nyidrëti hna qaja e hnine la Tusi Hmitrötr. Loi e tro fe a xecie koi së laka, Iesu hi la Mesia. Alanyimu la itre atr enehila ka thatre laka, Iesu la Joxu ne la Baselaia i Akötresie. Hnei Ioane hna amamane kowe la itre pane Keresiano laka, “ala nyimu la itretre iamenumenu” e hnine la ekalesia. Nge angatre hi la ka troa ajojezine la itre trejin ka tha maca palakö troa isigöline la nyipici göi Iehova me Iesu. (2 Ioane 7-11) Öni Ioane: “Drei la atre thoi? Hapeu, tha ene kö lo atre xelene ka hape, Iesu la Keriso?” (1 Ioane 2:22) Nyipiewekë tro sa catre inine la Tusi Hmitrötr, matre tha tro kö a ajojezi së. Celë hi aqane tro sa atrepengöi Iehova me Iesu. (Ioane 17:3) Nge e cili, tro ha xecie koi së laka, easë hnyawa hi a trongëne la nyipici.

6. Nemene la ketre jol hna cile kow hnene la itre jeune?

⁶ Loi e tro sa thupën matre tha tro kö a ajojezi së hnene la itre mekuna i atr. (1 Ioane 2:26) Loi e tro fe la itre jeune a hmek. Öni Alexia, * ketre trejin ka 25 lao macatre: “Ame lo eni a jeune, hna ajolë ni hnene la itre aqane mekune i fen, tune la ini évolution me inamacane i atr. Ame koi ni, ka nyipici la itre ini cili, ngo ame hë e thupen, tha ka loi kö ni. Öning ka hape, tha tro kö ni a lapa thaup, ngo loi e tro ni a amamane la mekuna i Iehova. Hnei Alexia hna inine lo itus, La vie : comment est-elle apparue ? Évolution ou création ? Itre wiik e thupen, tha  luelu hë Alexia. Öni angeic: “Hnenge hna sipu thel ka hape, ka nyipici la hna qaja hnei Tusi Hmitrötr. Mama hnyawa ha koi ni laka, maine tro sa trongëne la itre hna amekötine hnei Iehova, tro hë sa madrin me tingeting.”

7. Nemene la nyine tro sa thupën, nge pine nemen?

⁷ Nyipiewekë tro la itre Keresiano, ene la itre jeune me itre qatr, a thupën matre tha tro kö angatr a juetrë thiina. Öni Ioane, thatreine kö tro sa trongëne la nyipici me hane kuca la itre ewekë ka sis. (1 Ioane 1:6) Maine easa ajane troa kepe së enehila me elany hnei Akötresie, loi e tro palahi sa idrengethenge. Eje hi, pëkö ngazo “ka sihngödr” koi Iehova. Tune la kola thina së hnei laam, öhn asë hi Nyidrë la itre hne së hna kuca.—Heb. 4:13.

8. Nemene la nyine tro sa thipetrij?

⁸ Loi e tro sa thipetrije la aqane mekune i fen, göne la ngazo. Öni Ioane: “Maine easë a qaja ka hape: “Pëkö ngazo së,” easë lai a amenu së kö.” (1 Ioane 1:8) Ame lo ijine i Ioane, hnene la itre ka iamenumenu hna qaja ka hape, ijije hi troa kuca la ngazo me hane nyihlue i Iehova. Celë hi aqane mekune la itre atr enehila. Öni angatr ka hape, angatr a lapaune koi Akötresie, ngo tha kapa kö angatr la mekuna i Nyidrë göne la ngazo, tune la troa kuci ngazo. Ame la ka ngazo koi Iehova ke, tha ka ngazo kö koi angatr. Angatre kö a kuca la sipu aja i angatr.

9. Nemene la itre eloine hna troa kapa hnene la itre jeune ka catre lapaune kowe la Tusi Hmitrötr?

⁹ Ame la itre xaa Keresiano ka jeune, tre, hna huli nyudren hnene la itre sine ini maine itre sine huliwa nyudreni pena, matre troa hane nyitipune la mekuna i fen göne la troa kuci ngazo. Hna melëne lai hnei Aleksandar. Öni angeic: “Ame ngöne la uma ne ini, kolo palahi a iele ni hnene la itre neköjajiny troa ce meköl me angatr. Öni angatr ka hape, Tha ka ihanyi kö ni, ke pëkö sine  ce elong. Ame koi angatr, eni a ce lapa me ketre trahmany.” Maine easa cile kowe la jole cili, tha tro pi kö sa thëthëhmine laka, tro ha thupëne la mele së memine la aqane imelekeu së me Iehova, e tro sa catre lapaune kowe la Tusi Hmitrötr. Maine tro sa cile catr kowe la itre jol, tro ha hmaloi koi së troa kuca la itre ewekë ka loi. Ketre, qaathei Satana la itre mekuna i fen, göne la troa kuci ngazo. Nge tha itre mekune kö lai ka nyipici. Eje hi, maine tro sa thipetrije la aqane mekuna i fen, tro hë sa “ngaane la atre ka ngazo.”—1 Ioane 2:14.

10. Nemene la aqane troa xatua së hnene la hna qaja ngöne 1 Ioane 1:9, matre tha tro hmaca kö a huliwa la mekuthetheu së ngöne la easa nyihlue i Iehova?

¹⁰ Atre hi së laka, Iehova hmekuje hi la ka ijije troa qaja la ka ngazo. Nge easa kuca la hne së hna atrein matre tha tro kö sa kei kowe la ngazo. Ngo ame la easa tria, easa canga ietra me qaja koi Iehova ngöne la thith. (E jë la 1 Ioane 1:9.) Maine hne së hna kuca la ketre ewekë ka ngazo catr, loi e tro sa thele ixatua thene la itre qatre thup hna acile hnei Iehova matre troa xatua së. (Iako. 5:14-16) Ngo tha tro pi kö sa mekune hmaca la itre ewekë ka ngazo hne së hna kuca ekö. Pine nemen? Pine laka, hnene la Keme së ka tru ihnimin hna upe la Nekö i Nyidrë troa mec, matre troa nue la itre ngazo së. Ame la Iehova a qaja ka hape, tro Nyidrëti a nue la ngazo hna kuca hnene la atr ka ietra me ka qeje menu, haawe tro hë Nyidrëti lai a kuca. E cili, tha tro hmaca kö a huliwa la mekuthetheu së ngöne la easa nyihlue i Iehova.—1 Ioane 2:1, 2, 12; 3:19, 20.

11. Nemene la aqane troa thupë së qa ngöne la itre ini ka ajojezine la lapaune së?

¹¹ Loi e tro sa thipetrije la itre ini ne la itre ka iamenumenu. Qaane lo kola acile la ekalesia ne la itre Keresiano, Satana palahi a thele troa iaöne la itre hlue i Akötresie, matre tro angatr a luelu. Celë hi  matre, loi e tro sa atre la eisapengönene la nyipici memine la thoi. * Ame la itre ka icilekeu, angatr a huliwane la Ëternet me itre réseaux sociaux, matre troa ajojezine la lapaune së koi Iehova memine la ihnimi së kowe la itre trejin. The thëthëhmine kö së laka, Satana la qaane la itre trengathoi cili. Haawe, loi e tro sa thipetrije itre ej!—1 Ioane 4:1, 6; Hna ama. 12:9.

12. Pine nemene matre loi e tro palahi sa inine la Tusi Hmitrötr?

¹² Maine easa ajane troa cile koi Satana, loi e tro sa acatrene la lapaune së koi Iesu. Loi e tro fe sa atre la aqane troa eatrëne la aja i Iehova hnei Iesu. Ketre, nyipiewekë tro sa mejiune kowe la itre atr hnei Iehova hna iën, matre troa xomiujine la organizasio i Nyidrë. (Mat. 24:45-47) Celë hi matre, loi e tro palahi sa inine la Tusi Hmitrötr. E cili, tro ha catre la lapaune së, tune la ketre sinöe ka catre iwaan. Celë hi hna qaja hnei Paulo kowe la ekalesia ne Kolose, ka hape: “Pine laka, ase hë nyipunie kepe Iesu Keriso Joxu, catre jë ce tro me nyidrë. Nge tune lo hna ini nyipunie, nyipiewekë tro la lapaune i nyipunie koi Keriso a aegöcatrene me acatrenyi nyipunie, kösë sinöe ka jui iwaan.” (Kol. 2:6, 7) Eje hi, thatreine jë kö tro Satana me itre sine xöle i angeic a ajojezine la ketre trejin ka catre lapaun.—2 Ioane 8, 9.

13. Nemene la hne së hna öhn enehila, nge pine nemen?

¹³ Ame enehila, nyimutre la itre atr ka methinë së. (1 Ioane 3:13) Hnei Ioane hna qaja ka hape, “fene hnengödrai asë a lapa fene la musi ne la atre ka ngazo.” (1 Ioane 5:19) Easenyi hë troa paatre la fene celë, matre tru catre la elëhni Satana. (Hna ama. 12:12) Angeic a thele troa iaö së, jëne la itre huliwa ka sis me itre trengathoi ne la itre ka iamenumenu. Angeice fe a akötrëne la itre hlue i Akötresie. Atre hnyawa hi Satana laka, easenyi hë la troa apatrenyi angeic. Celë hi matre, angeice palahi a thele troa sewe së troa cainöj me ajojezine la lapaune së. Eje hi, tha sesëkötre kö së laka, kola wathebone la itre huliwa së ngöne la itre xaa nöj. Ame ngöne la itre nöje cili, kola catre xomihni hnene la itre trejin. Kola amamane koi së laka, ijije hi tro sa cile catr ngöne la nyipici, ngacama nyimutre la itre nyinyithiina i Satana!

14. Nemene la nyine tro sa pane kuca matre troa xatuane la itre trejin troa cile catre ngöne la nyipici?

¹⁴ Maine easa ajane tro la itre trejin a cile catre ngöne la nyipici, loi e tro sa utipi angatr. (1 Ioane 3:10, 11, 16-18) Loi e tro palahi sa ihnimikeu ngöne la itre ijine loi me ngöne fe la itre ijine jol. Hapeu, hetre trejine kö ka meci sineen nge ka aja ixatua? Tune kaa la itre trejin hna lep hnei hulö (catastrophe naturelle), angatre kö a aja ixatua troa xupe hmaca la Uma Ne Baselaia memine la uma i angatr? Nyipici, ijije hi tro sa amamane qa ngöne la aqane ithanata së memine la nöjei huliwa së, laka, easa utipin me hnime la itre trejin.

15. Thenge la 1 Ioane 4:7, 8, nemene la aqane tro sa nyitipu Iehova?

¹⁵ Easa nyitipu Iehova, Keme së ka tru ihnimin, ngöne la easa hnime la itre xan. (E jë la 1 Ioane 4:7, 8.) Nemene la aqane troa amamane la ihnimi së? Loi e tro sa thele troa iloi me qejemenu. Pane mekune jë së laka, kola akötrë së hnene la ketre atr, nge ame hë e thupen, angeic a qejemenu. Easa amamane la ihnimi së, ngöne la easa nue la ngazo i angeic me thëthëhmin la  hnei angeice hna kuca. (Kol. 3:13) Celë hi hna kuca hnei Aldo. Hnene la ketre trejin hna qaja angazone la nöje i angeic. Öni Aldo: “Hnenge hna catre thithi koi Iehova troa xatua ni matre tha tro kö ni a elëhni.” Ngo hetre ketre ewekë hna kuca hnei Aldo. Hnei angeic hna sipone troa ce cainöj memine lai trejin. Ame hë e cili, hnei Aldo hna qaja kowe lai trejin ka hape, hnei angeice hna akötrë Aldo. Öni Aldo: “Hnei angeice hna canga qejemenu pine la hna akötrë ni. Öhne hi ni laka, ka nyipici la qejemenu i angeic. Qaane ju hi lai, ketre sineenge hë angeic.”

16-17. Nemene la hne së hna troa kuca?

¹⁶ Tru catre la ihnimi Ioane kowe la itre trejin, nge aja i angeic tro angatr a catre lapaun. Celë hi ka mama ngöne la köni tusi angeic. Drei la madrine së ngöne la easa atre laka, hnene la uati hmitrötr hna iëne la itre atr ka ceitu me Ioane, matre troa ce musi me Keriso e koho hnengödrai!—1 Ioane 2:27.

¹⁷ Tha tro pi kö sa wangacone la itre eamo hna hamën ngöne la tane mekun celë. Catre pi së trongëne la nyipici, me drengethenge Iehova ngöne la mele së. Loi e tro sa inine la Tusi Hmitrötr, matre troa xecie koi së laka, ka nyipici hnyawa ej. Loi e tro fe sa acatrene la mejiune së koi Iesu. Ketre, loi e tro sa thipetrije la itre mekuna i atr me itre ini ne la itre ka iamenumenu. Tha tro kö sa juetrë thiina me mele thoi me kuca la ngazo, tune la itre atr ne fen. Loi e tro pe sa trongëne la itre trepene meköti Iehova. Ketre, nyipiewekë tro sa thele troa iloi me qeje menu matre troa xatuane la itre trejin troa acatrene la lapaune i angatr. Haawe, ngacama nyimutre la itre jol hne së hna cile kow, ngo loi e tro palahi sa cile catre ngöne la nyipici!